2007 年 6 月 5 日 星期二 【晴】

斷雲殘雨。灑微涼、生軒戶。
動清籟、蕭蕭庭樹。銀河濃淡，華星明滅，輕雲時度。
莎階寂靜無睹。幽蛩切切秋吟苦。
疏篁一徑，流螢幾點，飛來又去。

對月臨風，空恁無眠耿耿，暗想舊日牽情處。
綺羅叢裡，有人人、那回飲散，略曾諧鴛侶。
因循忍便睽阻。相思不得長相聚。
好天良夜，無端惹起，千愁萬緒。

柳永《女冠子》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第七天

儘管 1100 先集合
大夥兒都 0900 就起身
皆因早餐供應時間為 0700 – 1000
大家廢事無免費早餐食
食得好高興, 可能係唔使額外畀錢掛

食完早餐, 大家好心急上網
今日放 GPA 嘛
我既心情都相當緊張
Year 1 既人全部都諗緊會唔會勁過其他人
Year 3 既人（當然包括在下）就祈求唔好肥佬（否則到手既 offer 可能不保）

部買票機卒之整好
上網
我等大部份人睇完, 興奮完或失落完先靜靜雞 check
無肥佬, 相當好
放下心頭大石

不過 Frank 就陰功 D
一科肥佬, 搞到 Sem GPA 得 1.88
同其他 year 1 有一大段距離
呢班 year 1 個個都好得, 唔問都唔知好多人拎「船」入黎讀
奇怪在 Frank 考得唔好, 但係佢讀 Law Minor
咁都可以叫馬失前蹄
不過佢要讀 ELC, 有 D 奇怪點會收佢讀 Law Minor？

出發去景點
沿途大家一齊安慰 Frank
即使佢今次考得相當唔好
但係力追既話, GPA 都會升番既

實在太少野行
同 Jeff 一邊搵景點之餘, 一邊周圍望下街上有乜特別野
見到就話呢個係景點
連 Faith 都話我地帶得 hae
唔緊要, 搵到真正既景點, 以及浪費到大家既時間先係最重要既任務
而我同 Jeff 都做得相當成功

去到廣場, 叫大家分頭行動
同 Gieselle + Kenneth 去埋邊店舖既室外飲野
2 啤酒 + 1 芬達雪碧混合體
啤酒最細杯都 0.5L
Kenneth 話 D 啤酒無乜酒精
但係我肚空空 + 唔飲得
好快就面紅, 仲有少少上腦既感覺添
結果飲剩一杯, 少飲為妙, 否則容乜易魂斷德國架

Giselle 搵到份好工
響怡和做 BSE MT Trainee
但係佢一邊為自己 project 拎 B- 而唔高興
一邊就唔太想做呢份難得既好工
唔知佢點諗

佢話份工難得真係無錯
事關佢之前申請呢份工既時候畀人 reject 左
後來參加左一個由怡和搞既比賽, 東抄抄西抄抄（佢話佢地個 Topic 外國一早有人用喎）
咁就拎到個大獎, 仲有十萬大元
五人平分都位位兩萬
怡和仲請埋佢
真係難得

天氣炎熱, 就算酒凍都無用
酒氣易來易去
坐左陣訓左陣就一切如常

繼續周圍行
放 shopping 時間
D 人 shopping 多過食飯
響 Frankfurt 寺間唔趕急
可以好仔細地買手信

到咁上下就返 hostel
周圍搵地方食晚餐
結果又行返晏晝行過既廣場附近覓食
走左去間意大利 bar 食野
個侍應相當搞笑（儘管有女仔覺得呢 D 唔係幽默, 而係態度唔好）
食完埋單時要 90 Euro
計埋每人平均要 5.625 Euro
查實唔算太貴, 香港食一餐相似既都差唔多
但係望到要畀 19% 消費稅（成 10 Euro 架）咁多
始終都有少少做羊祜之嫌
所以佢叫我地畀貼士既時候我地就扮乜都唔知算數

食完就返 hostel
返到去就買票上網同 Konnie 傾左陣
第一晚就諗住搏下 send sms 畀佢, 但係唔成功
咁多日都上唔到網, 掛著佢嘛
不過傾既方式相當新鮮
由於裝唔到 msn, 要上佢 xanga 留言, 之後要係咁 refresh 黎溝通
傾到佢要訓覺就 off

去左女仔房玩
先係玩 Killer
然後七級豬
玩玩下返房沖京
沖完已經有隻豬誕生左（Frank）
本來諗著忙佢拍番段 Video
可惜撞正隔離房有個女仔開唔到房門（匙咭壞左, 房入面既人又訓晒）
最後都係叫佢去 counter 整

玩多舖冚棉胎就返房訓
0330, 好晏

>>June 25, 2007 at 10:22:48 PM GMT+8

2007 年 6 月 4 日 星期一 【晴】

閒窗漏永，月冷霜華墮。
悄悄下廉幕，殘燈火。
再三追往事，離魂亂，愁腸鎖。
無語沈吟坐。
好天好景，未省展眉則個。

從前早是多成破。
何況經歲月，相拋軃。
假使重相見，還得似、舊時麼。
悔恨無計那。
迢迢良夜，自家只恁摧挫。

柳永《鶴沖天》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第六天
黃頌然生日快樂

起身
其實朝朝都唔太想起身
所以朝朝真正起身之前都會坐起身幾次
目的就係諗清楚到底係咪要咁早醒
而每次既結局都係訓番
今日亦不例外
所以到 0700 就畀踢醒（踢床o者）

梳洗過後就落大堂
畀聰既鎖鎖起所有行李就出發
是日波茨坦皇宮既有八個人
包括 Kenneth, Faith, 我, 聰, Jeff, 傑, Alice 同 Karl

一齊坐火車過波茨坦
上車一陣 Kenneth 想打 NDS
但係開得多人打機, set 完 D 野就要落車
所以其實真係好近
儘管係 C 區（柏林分ABC三區, C 區最遠）, 半個鐘都唔使就到

由火車站落巴士
落錯站, 好彩之前未買飛, 無蝕本
不過就浪費左十分鐘等車

先去買飛, 10 Euro 可以行晒波茨坦既皇宮
以及另一組人行既市內皇宮
如果有時間行晒既話, 抵！
弔詭的是, 響市內皇宮買既票只能遊市內, 不包括波茨坦的其他皇宮
但係價錢一樣

連波茨坦我地都無時間行晒
點去市內既皇宮呢？

遊皇宮主殿內部
分好多唔同房畀人參觀
開頭都好守規矩唔映相
但係邪惡既 Faith 見皇宮內既導遊一走就拎相機出黎猛映
搞到我又影埋一份

去到要著拖鞋
落雨整濕晒對鞋
再著拖鞋
可想而知拖鞋其實都相當污糟
只係咁做可以保護大理石地板, 既唔花, 又唔嘈
大夥兒仲扮踩冰咁行, 仲差 D 跣低

一人一個 Audio Guide
見到佢地拎起咁大個 Audio Guide 放響耳邊聽
真辛苦
好似同 Jeff 都有帶耳筒, 插著耳筒聽真舒服

見到好多神既雕像
問左個我想問好耐既問題
點解個個雕像既體態都做得咁講究, 肌肉線條活靈活現
但那話兒卻那麼小？
Faith 好正經答：「D 人唔想咁強調呢方面......」
Kenneth 就答：「佢地就係標榜人同神既分別, 就係特別細。」

見到腓特烈大帝既書房
好豪華好大好靚
仲有二千幾本書
如果我有間咁大既書房畀我擺書就好了
唔一定要咁多奢華既雕飾, 但係一定要夠大
咁先舒服得黎又裝得多書嘛

出番去就天朗氣清
行去睇畫, 唔覺意擰錯自動模式（一向都用手動模式, 而且設定左熄閃光燈）
而自動模式就一定開著閃光燈
結果除左職員走左過黎之外
仲有個日本遊客走埋黎講：「I said, I told you, no photo!!」

繼續遊覽
遊花園後再行去修道院
個個禮堂都有大型管風琴
個個都有人彈
但係個個都彈錯野
今次呢個好特別
皆因佢一邊彈一邊搵拍子機幫佢數拍子
個拍子機仲大聲到幾乎蓋過佢 D 音樂聲

去蒙古包外型既 Chineisches Haus
睇黎佢地畀蒙古人打到傻左了

再行去新宮
本來想行埋其他地方
不過時間唔許可, 可惜
響新宮行左個轉就走

出發去 Siegessaule（勝利女神柱）
坐車過 Bellevue 站
行左勁耐先到
門票 1.5 Euro
時間所限, 只有 15 分鐘
3 分鐘跑上 275 級共 69 米既螺旋形樓梯到達瞭望台
行左個圈, 映左陣相
四個人（我, 聰, Jeff, Frank）頭暈腳軟地用 5 分鐘時間跑落地面

由於從地圖上看行去 Bellevue 站既路程同行返動物園站既距離差唔多
決定行返 hostel
不過計漏左 distance 同 displacement 既分別
行到蕩失路, 好彩問到人

串過 Tiergarden 行
其間見到動物園內既動物
免費參觀之餘, 仲順手行多兩個景點
真好

遲左少少返到 hostel
會合大眾就去火車站集合
先去 Berlin Hbf
其間見到無間道查票員
一上車就扮情侶閒談
閂左車門就開始查票
呃到人架

坐 ICE 過 Frankfurt
今次呢架車既終點站係 Basel
所以我地要響途中落車
擔心佢地會搭過龍之餘, 同時怕無位坐（無預約座位嘛）

上車, 另一個站（Wolfsburg）要個幾鐘後先到
坐著人地 reserve 左既位
直至有人黎趕我地走
做遊牧民族, 除左幫 Daisy 同 Kenneth 搵到位外
仲搵左個更舒服既位坐
早知唔坐一開頭既位啦
事關我搵到果卡車既座位都無人 reserve

一上車就訓
訓到咁上下就寫日記
清到 4 號就好放心地自動收筆
隔一日, 唔會咁快唔記得既

叫班 year 1 坐過黎
其他人戀棧得來不易既座位（同埋要看行李）, 得 Ian 一個坐左埋黎
佢響我隔離睇東周刊
拎左黎八卦下, 然後既行程就同佢吹水
唔講唔知佢係踩冰高手
仲要係為左佢老師話佢身體未夠柔軟走去玩 Dance So.
之後上埋莊
真有毅力

2044 到 Frankfurt
有左第一晚既經驗, 好快就帶大家到達 Stay and Learn Hostel
一次過出晒男女房錢
然後帶人入房
夜晚落樓下食雞
半隻雞賣 2.99 Euro
啖啖肉, 正！

返到房梳洗
今次呢間 316 比第一晚住果間房好得多
燈光光猛, 洗手間又無乜問題（無淤塞）
除左房內電視開唔到之外（可能要另行收費掛, 不過我地無需要睇就無問）都好好
一間房要住九個男人
如果係第一晚間房既質素就死咯
至少睇到間房乾淨 D 嘛

見到上網 1 Euro 有 60 分鐘, 幾抵（至少抵過響 Berlin 0.5 Euro 先得 15 分鐘）
不過都係聽日先買票
唔係因為懶或唔掛著香港既人同事
而係部買票機壞左未修理好

問返行程部既 Jeff
佢話 Frankfurt 真係無乜特別野行
所以集合時間為 1100
晏得很, 以及悠閒得很
起碼唔似響柏林時既鴨仔團生涯

安頓好就訓
聽著 Eric, Karl & Frank 既鼻鼾三重奏黎訓, 仲相當好訓
最尾一個訓覺
熄完燈仲要摸黑上床訓覺
好彩無踢到野

經初步點算
暫時行程使左 180 Euro

>>June 25, 2007 at 10:22:30 PM GMT+8

2007 年 6 月 3 日 星期日 【晴】

追悔當初孤深願。
經年價、兩成幽怨。
任越水吳山，似屏如障堪遊玩。
奈獨自、慵抬眼。

賞煙花，聽絃管。
圖歡笑、轉加腸斷。
更時展丹青，強拈書信頻頻看。
又爭似、親相見。

柳永《鳳銜杯 - 其二》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第五天
六四事件18週年

今日係六四 18 周年
問番班 year 1, 當年佢地得兩歲
難免對呢件事完全無感覺
當年我都係得六歲
見到既景象就係香港好多人上街聲援示威絕食既學生
之後仲睇新聞見到好多到宜家依然不斷重播既場面
很震撼

六四事件發生只有一晚
但四月時已經有學生展開運動
當年一無所知的我現在重溫歷史
對照當時世界大事
柏林圍牆倒下, 各共產主義政權相繼倒台
當時中國的處境跟其他政權也很危急
加上國際環境雜境（尤其當時老布殊的鷹派政府）
若中國政府不能控制大局
除了改革開放的步伐會被打亂（也許會轉向封閉）, 連政府的穩定也成問題

說了良久, 就是想說中國政府的做法並非全錯
只是對一群不全然是政治動物的學生來說太殘忍了
像主要人物王丹, 監禁經年, 著實老盡了少年心
其他不甚著名的學生下場可能更可憐, 但我已是毫不了解了

假如當時政府的公關手段好一點（至少要比強拆鐘樓的香洪政府更好）
既不定學生運動為叛亂, 甚至找一兩個貪官出來懲治（當時確有學生以打倒貪官為口號）
相信這些手段並不困難
有了這些口實, 儘管不完滿
亦未必解決當時變幻不定的政局
也比現在既責備日本否認二次大戰責任, 自家政府又不敢面對這場鬧劇更好

說了良久, 居然還未開始說是日的事
真囉嗦

今日比平時早出發
0915 響大堂集合
0930 行到三位老師既酒店門口
老師們拎左 D 早餐出黎接濟我地, 感激

呢幾日都係短袖衫上陣
一來唔覺凍
二來帶得一件長袖衞衣黎
為免遲 D 再凍 D 唔知點辦
倒引致三位老師嘖嘖稱奇

成個行程都唔需要老師操心
事關日日都係由聰, 濤, Jeff 同我四個主要負責搵地方
加埋黎過柏林既 Giselle 響我地唔清楚時有問必答
非常順利到達各景點

到左 Berlin Technical University
人地個 Dean 黎接待我地
簡述佢地既 master programme
仲叫左兩個由「同志」大學（其實係上海同濟大學）既 master year 1 學生黎
同我地講下佢地做過既 project

有橙汁有水有曲奇做零食畀我地聽著黎充電
我淨係鍾意飲水
一直聽, 直至聽到好悶就拎本野扮低重點
實際係寫日記

捱完兩個人講野
Berlin Technical University 安排左一個女仔同我地一齊行
由於 Daisy 之前同 RICS 搵左呢邊既一間 QS firm 同我講一個 briefing
而間野都 reply 左無問題
所以今日第二站就係去Guntzel Str. 車站附近既 QS firm

上到地面, 有 D 唔對路
周圍全部都係住宅喎！
Daisy 仲質疑我地有冇帶錯路添（當然, 講笑o者）
到左果個地址, 有 RICS 既門牌一個
樓下有對講機
佢開左大門畀我地
我地都搵左輪先知佢幢樓響天井後面

樓高數層, 加上地方淺窄
經德國姐姐同濤上去探路後
決定由 Daisy, 我同濤三個上去
上到四樓, Daisy 休息左陣先按門鐘

先係一個女人應門（應該係 QS 先生既老婆）
佢表示 QS 好忙, 唔得閒理我地
之後我地問佢可唔可以抽五分鐘畀我地問幾個簡單問題
佢就走番入屋同 QS 先生商議

在門外窺探
只見有張床響入面
加上佢地既夜著打扮
我地估計果間係一人公司
仲要係屋企 = office

QS 先生卒之肯露面
佢先話我地事先無同佢聯絡並確定時間
之後又話好忙唔得閒理我地
一面拎著 Daisy 早前同佢聯絡既 email 副本, 一面想關門
Daisy 問佢拎番份副本
QS 先生就「嘭」一聲閂埋度門
門外既 Daisy, Faith, Kenneth 同我都 O 晒嘴
呢 D 現實場面, 宜乎畀班 year 1 組員望望

我就一肚氣（畀人請食個結結實實既閉門羮喎！）
相反 Daisy 就覺得無所謂
其實之前都搵左相當多資料
QS 先生都 send 左 D 德國 QS 既工作範圍黎
見唔見佢都無乜大不了
不過唔見過就無呢 D 驚喜

由德國女 master 帶我地返動物園車站
再行去大學飯堂食晏
夾左一條大香腸 + 5 條小香腸 + 飯 + 茄汁湯（伴飯用）+ 橙芝士蛋榚
承惠 3.83 Euro
響仲好憤怒既心情下食野, 好滿足

呢個係 Berlin Technical University 既飯堂
樓底好高（兩層樓, 某 D 地方有樓上雅座）
地方大而開揚, 同 city 大而侷束
Poly 舊 Can 唔夠開揚（少有日光照射）
同新 Can 設計得太浪費空間（counter 放中間, 令某 D 位變成好少人去既死位）
相比之下好好多

食完儲足精神
一口氣衝去博物館
查實果度係德國 Urban Planning Department 搞既一個展覽場地
入面有幾個柏林既大模型（全市又有, 東西柏林分開都有）
休息左陣就走

聽女 master 提議去左一個小地方行
果度以前係猶太人集中地
二戰後當地人死既死, 走既走
由於位於東柏林關係, 一直無發展
直至 1989 年柏林圍牆倒下, 政府將當地規劃成類似牛棚書院既藝術地方
漸漸變成一個高消費地區

行左一個圈就走
Faith 想行耐 D
因為有唔少潮流野適合佢
不過帶團就無得畀佢咁自由了

一齊坐車返 hostel
響火車站逗留, 問預約火車座位事宜
最後無人預約位置
但係就 activate 左 Kenneth 同 Daisy 既二人同行德國四天火車證

由於之前行左相當多景點
聽日既景點又未有定案
全部人入 404 室開會相議
經投票決定兵分兩路
Kenneth 同 Faith 去位於 Postdam（波茨坦）既舊皇宮
Daisy 就去大屠殺紀念館 + 市內既新皇宮 + Lego Land + 購物團
讀萬卷書不如行萬里路
當然選擇去遠 D 既舊皇宮

最搞笑係之前 Daisy 都想同我地一齊去波茨坦
但係聽到要行長長既樓梯就放棄

開完會就四散
Karl 突然話佢部數碼相機唔見左
仲要響開會之前就已經唔見左
幫佢響自己房 / 225 室搵過, 不果
同佢行去車站問, DB service point 既職員又以為我地要既係即映即有機
猛咁指我地去部機既方向
陪佢返房再搵都係無
一邊食包一邊同佢 send SMS 搵 Kenneth
留低濤幫 Karl 手, 然後我, 聰, Jeff 三個一齊出去搵景點行

第一站去大屠殺紀館
去到已經係 2030
搵左好耐先搵到入口（之前都唔知有得行去入面）
但係已經關門了
隨即發現即使早過 2000 去到都無用
事關星期一休息

第二站去 Bebel Palaza（貝爾廣場）
聰既旅遊書內有幅相映到地面有棟好高既金屬書狀雕塑
所以想去映低佢
行到半路落雨
唔大, 但係凍凍地

當我準備拎件長袖衞衣出黎著時
赫然發現件衫頭先順手放左響床
著短袖衫面對風雨
凍死, 會唔會冷親架

行到去個廣場
空無一物, 果疊書呢？
問左附近幾個做野既人
佢地都叫我地響廣場中間望落去
行過去一望, 只見空空如也既白色書架透過玻璃呈現響我地睇前
好有特色
但係我地專登走黎係為左睇既雕塑唔知去左邊
落去樓一停車場問, 原來已經畀人搬走左
可惜

行另一條路坐車離開
途經一座唔知乜既建築物
搵書先知係憲兵廣場
附近仲有柏林音樂廳, 德國大教堂同法國教堂
逗留左陣先離開（好彩堅持行去睇下呢棟野係乜）

去柏林圍牆公園
坐車去 Eberswalder Str. 站
行行下聽到廣播
初時聽唔明德文
其後車上既工作人員示意我地離開車廂
之後聽到英文廣播, 先知前面有路軌問題

行上地面搭接駁巴士
兩個站後落車
唔識行, 正想問路就有個女仔拖著行李箱走黎問我地路
我地都係第一次黎呢度, 鬼知咩
點解佢地唔搵當地人問？
唔通我地個樣善良 D？

問其他人
佢話幅牆係假既
都係堅持行過去
去到佢兩個先知果度係之前行 fleamarket 太無聊時順手行去既公園
天黑路遠, 人煙稀少, 四野無人, 可怕得很

最後行左返去 Bernauer Str. 站
然後經 Alexender Platz 返 hostel
返到去 Karl 已經報案歸來
聽日去波茨坦睇皇宮
0800 起身出發
聽日就過 Frankfurt
執野執到 0100 先訓

是日消費：
1. Group ticket：61.6 Euro（個個都畀晒 D 散紙我, 不過要我找錢既人都有報應）
2. 食晏：3.83 Euro

>>June 25, 2007 at 4:45:36 PM GMT+8

2007 年 6 月 2 日 星期六 【晴】

花隔銅壺，露〔日希〕金掌，都門十二清曉。
帝裡風光爛漫，偏愛春杪。
煙輕晝永，引鶯囀上林，魚游靈沼。
巷陌乍晴，香塵染惹，垂楊芳草。

因念秦樓彩鳳，楚觀朝雲，往昔曾迷歌笑。
別來歲久，偶憶盟重到。
人面桃花，未知何處，但掩朱扉悄悄。
盡日佇立無言，贏得淒涼懷抱。

柳永《滿朝歡》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第四天

朝早 0900 起身
梳洗完已經接近 1000
響樓下集合出發
首先係去番尋日無去既地方
就係星期日先開既 Fleamarket

出發時買票
今日去幾個遠 D 既地方, 所以買 day ticket
而有 19 個人既關係, 買 Group Ticket 都只係 61.6 Euro
一張票最多包五個人, 平均每人都只係 3.25 Euro
平過單日日票既 5.6 Euro
所以由我出錢暫時幫大家買票
買完記著要收番大家錢先得

入到市場入面
大家心裏面都係諗同一樣野：
「點解得二手野賣？」
入面有多好唔同既貨品
大部份都係舊貨, 有少少食肆 + 一手衫
賣既衫主要係有自己印出黎既 print
幾靚, 不過價錢仲靚
激唔起我地買既意欲

好大, 行左好一陣子先行完
剩係響入面買左一條相機繩
唔貴, 0.5 Euro
上面印左獅子座既德文
可惜唔係所有星座都有（嚴格黎講同我熟既人既星座都欠奉）
結果其他人既手信未有著落（除左 Tim）

約好 1200 響門口集合
全部人等 Faith 等到剛剛 1200 先出到黎
佢收獲豐富, 早知就同佢一齊行啦
不過都響入面同傑夾份食左個腸仔包, 盛惠 2 Euro

行過報紙檔, 先知 Brandenburg Tor 尋日點解咁多警察
原來尋日德國有暴動
但係我地一 D 都唔知
Daisy 話早知係咁就早 D 去
等報新聞果陣可以免費同香港既人報平安

離開 Bernauer Str. 站
出發去電視塔
上面可以眺望柏林全景
好吸引, 可惜無學生優惠
位位要 8 Euro, 所以無上去

行落樓下, 見到又有腸仔包
好吸引, 又同 Alice 夾份買左個黎食
不太愉快
因為賣野食既女仔好無禮貌, 同埋無耐性
人地只係諗左陣揀邊隻腸, 佢就好唔耐煩地叫我快 D
不過個包幾好食, 條腸亦無頭先食既咁乾

邊食邊響 Starbucks 吹水
到集合時間就一齊出發去 Rotes Rathaus（紅色市政廳）
其間見到個噴泉, 上面果個應該係海神波賽冬
之後睇番先知呢個係 Neptunbrunnen（海神噴泉）
隔離仲有幢之後先知係 Marienkirche（瑪麗亞教堂）既教堂

去 Berliner Dom（柏林大教堂）
入場費 5 Euro
貴, 不過好值得去
因為真係好靚
太趕, 唔夠時間
地底既墓室又睇唔清楚, 匆匆而過
響紀念品部又匆匆買買左個哨子咁大把
可惜, 有機會再去

休整又行
再去睇柏林圍牆
今次係彩色版
呢幅牆同之前果幅好唔同
好多好靚既彩圖, 目不暇給
全長 1.1 公里
儘管好靚, 但係都掩蓋唔到我地既疲累
映到最尾兩塊電都無晒電
可惜

夜晚夾番今朝出過既錢
大家畀番車錢我既時候相當慷慨
絕不吝嗇地將所有既「神砂」（即係 0.01, 0.02, 0.05, 0.1, 0.2, 0.5）畀晒我
=.=

夜晚大夥兒行得好疲累
無心機搞破冰
0100 就訓

>>June 25, 2007 at 2:33:37 PM GMT+8

2007 年 6 月 1 日 星期五 【晴】

隴首雲飛，江邊日晚，煙波滿目憑闌久。
立望關河蕭索，千里清秋。忍凝眸。
杳杳神京，盈盈仙子，別來錦字終難偶。
斷雁無憑，冉冉飛下汀洲。思悠悠。

暗想當初，有多少、幽歡佳會，豈知聚散難期，翻成雨恨雲愁。
阻追游。每登山臨水，惹起平生心事，一場消黯，永日無言，卻下層樓。

柳永《曲玉管》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第三天

朝早 0700 起過身
事關有兩部電話輪流響
坐左起身, 但係又好眼訓
所以又訓番

到左 0800 起身
發現間房多左一個人──Jeff！
佢原來朝早 0500 已經黎到
去 counter 問人, 人地拎左我地間房張匙咭畀佢
事關我尋日拎剩一張匙咭, 留番一條畀未黎既人自己拎

由於佢都係同濤 & 聰訓
BSE三個女仔又寧願一張碌架床三個人訓
所以我間房將會同響 Frankfurt 時既既組會一樣
都係六男一女
仲有一張空床

同 Jeff 邊吹水邊見著班 year 1 醒
梳洗過後同 Cat & 一眾 year 1（除左傑要寫日記唔出外）一齊行超市
間野叫 Plus, 一來一回已經要 20 分鐘
但係離集合時間只剩 25 分鐘
五分鐘當然唔夠選購 + 畀錢啦
結果好正常, 就係遲到咯

不過我地都好盡力咁趕返 hostel
淨係睇左陣就要買
見到一支 1.5L 既水賣 0.19 Euro, 加埋樽錢（0.25 Euro, 仲貴過支水本身）
都仲平過香港
結果 Karl 要拎著 6 支 1.5L 既水飛奔返去
真辛苦

返到 hostel 都未齊人
拎埋 D 野上房放低 D 野再落 lobby, 然後出發
先落 U-bahn（地車站）
搞左一陣, 爭拗左一輪
Jeff 唔太同意我地尋晚 plan 既行程
而之前又係佢 Plan 行程
最後買完 day ticket 就去 Sony Centre

響 Postdamer Platz （波茨坦廣場站）落車
睇左輪建築就走
行去 Sony Centre
經過隔離既建築物, D 德國人用玻璃包圍住幢舊建築
等人睇落既有舊建築既特色, 又混合到新鮮既感覺
新舊混合為一, 相當有特色

經過見到一截截既柏林圍牆街邊展覽檔口
整得相當靚
香港可以模倣下
例如將拆左既鐘樓做 D 展覽, 放響原本既地方之類

搵左一搵就搵到 Lego Land 既位置
原來就響 Sony Centre 隔離
不過要成 11 – 14 Euro, 連本身想去既 Kenneth 都縮沙
原本 BSE 三人組好想離隊去
基於安全理由（無人肯花咁多錢陪佢地行）
加上行程緊密, 佢地最後屈服同我地一齊行

行去 Brandenberg Tor（勃蘭登堡門）其間見到一間 Souvenir 店
見到 4 Euro 10 張 postcard 就諗起 Tim
響街揀完就入舖頭畀錢
響入面見到我既咭片套裝, 賣成 12.99 Euro, 貴得很
老闆係香港人, 仲同我地講廣東話

見到有音樂盒膽
每個要 5.95 Euro
唔夠時間揀, 無功而還

繼續行
見到好多警察守著 Brandenberg Tor
神色凝重, 又唔似係日常駐紥
到底有乜重要事發生

映左幾幅相
見到五個人持桿控制一個人形公仔
活動得相當靈活
有時仲會控制個公仔踩著人地個頭
無時間睇完就走

行去 Reichtag（國會大廈）其間經過一架警車
見到入面有四個警察吞泡響度鋤 D
機會難逢, 趁機拍低佢地既罪證
然後逃去無踪
只聽到警車內傳來一陣笑聲

去到國會大廈, 響門口排隊入場
其間又見到「五人公仔團」
今次卒之見到佢地全部表演（包括收錢）
之前仲諗緊佢地唔收錢既話點維生添

入去國會大廈都要過金屬探測器
不過今次無不愉快事件發生
好彩得很, 幾驚佢收左我既咭片套裝
但係上到個 Dom 只能見到一格格既遠景
皆因畀 D 金屬架阻住

各自周圍行
原定 1600 響大門前等
1500 就睇完
我同班 year 1 行左陣就落番去
響門前既草地坐同會合其他人
儘管地下有好多煙頭
但係響咁大塊咁綠咁靚既草地上面坐, 既悠閒又舒服

其實大家都唔係好悠閒
事關今日已經行左相當多路, 去左好多地方
加上國會大廈比預期少野睇
愈坐愈多人
大部份人響 1500 已經聚集響草地
不過都要等到 1545 BSE 三人組黎到先走得

去 Topographie des Terrors（恐怖地下室）
柏林圍牆下既納粹德軍地下刑訊室
殘破, 好似響工地隔離
睇到當時既人點被迫害, 可怕

行去 Checkpoint Charlie（查理檢查站）
再入Checkpoint Charlie Museum（查理檢查站博物館）
初時望著個檢查站都唔知有乜咁特別
入到博物館, 儘管價錢頗貴（學生價 5.5 Euro）
但係望番幅相, 再望出窗外的複製品
除左寺往日壁壘分明感到不寒而慄外
還暗嘆不到 50 年的變化

入面有戲睇
內容講一家人要逃出東柏林
不過行得好疲累, 坐坐下恰著左
醒就走, 同 Alice 一齊行
差 D 同佢一齊大頭蝦行錯路

響對面街既咖啡店休整
其間 Eric 講番東西德分裂既歷史
無打斷佢, 至少佢講既都唔係完全錯
呢 D 係普通人當歷史係故事後片面化既錯覺
歷史乃往日的政治, 生活, 文化......的綜合
怎可三言兩語就說得清楚？

返動物園站
去超市買野食
早早訓覺
不過早極都要 0130
即係香港時間 0730
雙腳行左一日, 真係幾疲累

是日消費：
1. Single Ticket： 3.29 Euro
2. 野食：包 – 1.99 Euro, 腸仔 – 1.99 Euro

>>June 25, 2007 at 12:34:33 PM GMT+8

2007 年 5 月 31 日 星期四 【晴】

皓月初圓，暮雲飄散，分明夜色如晴晝。
漸消盡、醺醺殘酒。危閣遠、涼生襟袖。
追舊事、一餉憑闌久。如何媚容艷態，抵死孤歡偶。
朝思暮想，自家空恁添清瘦。

算到頭、誰與伸剖。
向道我別來，為伊牽繫，度歲經年，偷眼覷、也不忍覷花柳。
可惜恁、好景良宵，未曾略展雙眉開口。
問甚時與你，深憐痛惜還依舊。

柳永《傾杯樂》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二天

起身時間 0645
原因係凍醒
=.=
起身時天氣轉為清涼
加上無被蓋, 同埋床頭窗開左
所以凍醒左

較左 0800 鬧鐘
但係人人響鬧鐘響之前就凍醒左
各自梳洗同收拾行李
0900 食早餐
由 2 樓行上 3 樓 counter 兼餐廳食
有燕麥片 + 提子乾, 粟米片, 方飽, 大塊切片麥包食
飲品有茶包 + 熱水, 奶, 咖啡, 樣樣都試左少少

尋日響飛機有 100ml 既一小盒水派
派一個收埋一個, 總共拎左三個走
今日就有得飲免費水, 抵！
事關一支 500ml 既水平均要 2 Euro 架
貴得很

食完早餐周圍行下
行過某商舖, 見到有明信片就諗起 Tim
不過遲 D 要返 Frankfurt, 所以無買
行 1 Euro 店, 同香港既十蚊店差唔多
賣既野麻麻地, 仲有 D 殘

行完就返 hostel check out
坐 ICE 過 Berlin
忙左一輪, 要行到去二等車廂
上車見到好多人坐緊
分散坐好, 順手清日記

1524 落火車
響 Berlin Hauptbahnhof（即中央車站, 以後簡稱為 Hbf）落車
個個都好飢渴
於是一齊去搵野食
不過首先去買水飲
1.5 L 既水賣 2.09 Euro, 計埋 0.25 Euro 膠樽費
貴得很

繼續邊行邊睇有乜食
見到 Pizza Hut
選擇食 1/6 塊最普通芝士 + 蕃茄 pizza
價值 1.59 Euro
加一杯 0.4 L 既汽水要多 0.4 Euro
2/6 塊 pizza + 汽水則要 2.99 Euro
慳儉既我當然揀齋食芝士 + 蕃茄啦, 平 D 嘛

Frank 響「漢堡大王」度買左個「長雞（Long Chicken）」餐
價值 4.99 Euro
拎多包茄汁要 0.5 Euro
佢又肯買果下先好喎
最佢響「漢堡大王」食左個份量同香港差唔多, 但係價值 5.49 Euro 既餐

睇到呢度上 1 小時要 2 Euro
很貴, 所以無上
食完繼續上路
坐左三個站去動物園公園站（Zoologischer Garten）
好快就搵到 hostel
無重蹈尋晚行冤枉路既覆轍, 很好

Check in, 拎到 411 號房既匙咭
望到德國人寫個 1 字會寫到好似 ^ 咁
上到去, 點解會有個唔識既人響度訓緊既？
宜且間房好似係多過八張床喎！

落 counter 問職員
開頭話無房空出黎換
最後都好彩搵到 404 呢間 8 人房

等緊跟進既時候撞到聰同濤（德國既先行部隊）
上房 settledown 後同佢行去 225 室（另一間房）
細 D, 無咁光猛, 多一條 column
但係同時多個獨立洗手間 + 浴室

等埋 Cat 沖完涼就出去搵野食
行過 Nike Town, 有款「蕉」色既波鞋賣 170 Euro
睇到件幾靚既衫要 83 Euro
心裏不禁想：「又話香港生活指數高？好似呢度高消費 D 喎......」

行到去 pizza hut
又係食 1 塊芝士 + 蕃茄 pizza
今次仲平, 1/6 塊只係賣 1.49 Euro
食左兩塊, 仲係覺得餓
同傑再食多一塊先滿足
埋單食左 4.47 Euro

由於今日係 15 個 study tour 既成員（就係差 Jeff 未到）聚首柏林後既第一餐
所以很值得紀念

原先約定 2100 返到 hostel 同 Daisy, Kenneth & Faith 三位老師會合
不過食到 2100 先走, 遲左
佢地已經到左, Faith 仲上埋房搵我地
最後去 404 號房開會
各人講番邊日做 D 乜（即係好似 Kenneth 好想去 Lego Land 咁......）
同埋講解完星期一要做野就解散

開會其間 Daisy 居然話紥孖辮扮學生
唔係呀嘛......

開完會我地幾個 year 3 雄性再商議聽日行程
傾左一個大網, 完成左呢三日大致上會去邊
最後一日就未諗

梳洗後響房百無聊賴
七個人玩 Killer（又係我 + 其餘 year 1）
但係玩得頗為沉悶
之後教佢地玩 German Bridge
大家戰意不高, 完成左一局就唔玩
0230 先訓, 都算幾晏

明明有十六個人, 兩間八人房
但係我地呢邊仲有個床位剩, 點解？
原因係三個 BSE 既女仔好團結, 一張碌架床寧願三個人訓都唔想分開
結果 Giselle 一個訓上格床, Rachel 同 Cathy 就孖舖下格床

是日消費：
1. 水：2.34 Euro
2. Pizza Hut：1.59 + 1.49 x 3 = 6.06 Euro

>>June 24, 2007 at 9:59:54 PM GMT+8

2007 年 5 月 30 日 星期三 【晴】

洞房記得初相遇，便只合、長相聚。
何期小會幽歡，變作離情別緒，況值闌珊春色暮。
對滿目、亂花狂絮。直恐好風光，盡隨伊歸去。

一場寂寞憑誰訴。
算前言，總輕負。
早知恁地難拚，悔不當時留住。
其奈風流端正外，更別有、繫人處，一日不思量，也攢眉千度。

柳永《晝夜樂》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第一天

送完 Konnie 歸家
佢有佢訓, 我有我「搞機」
佢部電腦上唔到網
搞左成個鐘先記得可以熄 router 再開過
真白痴

一上到網就同雷拎作戰
佢話歷次旅行都係佢一個人搵晒所有野
所以佢怕我會有壓力
不過如果要佢一個人做埋我果份, 就算佢肯我都唔願
旅行就係要搵下野先好玩嘛

搵到 0400
卒之都係有某幾個城市可能要 walk in
walk in 既價錢可能仲貴
佢樂觀時我悲觀
最後都係由樂觀既人佔上風

同疲累到極既 Konnie 講完再見就正式出發
坐 N31 到機場
太早, 早到無舖頭開門咁滯
行左陣, 走去 happy together 食糯米雞 + 艇仔粥做早餐
餓得很呀

食完打畀班 yr1
佢地原來都到左
仲驚佢地 0630 都仲未起身添

返行李寄存拎行李
畀左一百大元先走得
會合班 yr1, 拎埋登機證就自由活動至 0715
想搵 PCCW 專門店
發現已經變左 CSL
無計, 無得漫游

入閘
E 道幾方便
不過唔係個個都識用
足以引致人龍

入 21 號閘口
夠鐘就上機
上到機先記得未打畀 Konnie
好彩架機未開, 仲可以打埋畀佢

響 SQ001 時而清醒時而昏迷
早餐食奄列, 唔太好食
若非朝早已經食左糯米雞的話
我都想試下機上既糯米雞中餐
訓到落機
點解傑可以搞佢面前既電視搞得咁起勁, 半點疲累也沒有？

抵達新加坡
身上攜帶一包 extra 既我相當擔心會畀人捉走
Frank 唱得 200 Euro
佢想唱多 D, 但係畀機場內找換店既匯率嚇怕
最後決定去到德國先搵地方唱

閒逛左陣, 去到 E5 閘口前
響 E5 閘口前有一大堆可供上網既電腦
走過去上 xanga 留個言
好讓大夥兒知道我仲生存緊

閒坐
Alice 拎左副啤牌出黎
緊住就「力」到入閘

入閘時又要 check 行李
金屬探測器既檢查底下
畀個麻甩佬前前後後非禮左好多次
行李袋又畀人摷晒 D 野出黎檢查
搞左一大輪先上得機

呢架機座位較寬闊
至少令我較有心情寫日記
睇部電視有乜做
想打機, 一係唔好玩, 一係 load 太耐
所以訓醒之後（1530 左右）用部電視聽左陣 Beethoven（儘管 iPod 都有）
然後開始睇戲

首先係睇《50 First Dates》
內容好有趣, 睇到女主角為左令自己記得野而寫日記
很有同感
係咁我都應該驗下個腦, 睇下係咪有某個部位出現問題先得

睇完, 隨即睇《The Holiday》
比第一齣更加不合情理
很童話故事
儘管很浪漫, 但沒有《50 First Dates》那麼感人（因為第一齣戲有同感？）
也許只有現實才能動人
幻想是好, 終究虛幻

睇完兩齣戲, 悶悶地想打機
但係自己個位既電視 load & run game 好慢（睇戲又題喎）
好彩 Eric 隔離有個空左出黎
走上前排打機

打到香港時間 2300
順應完自然的呼喚, 太悶
又係時候睇戲
今次睇既係《Music & Lyrics》

由Hugh Grant 同 Drew Barrymore（又係佢）主演
潦倒唱作歌手 + 蛋白質女孩 & 填詞天才
幾好睇, 同時好聽
Hugh Grant 做既戲有質素保證

臨尾 Hugh Grant 唱歌果段
直情令我眼濕濕
返到香港一要搵到呢齣戲 / sound track 重溫一次
同時佢唱歌都唔錯, 可以好 touching, 又好搞笑

睇完第三齣戲都未到
一邊聽歌一邊訓
剛上飛機無耐曾經短暫地訓過一陣
訓醒既時候仲以為未起飛
飛到香港時間 0130 仲未到
好似有排都未到咁
直頭有 D 似發緊個永不降落既噩夢

0215 卒之落機
Frankfurt 時間為 2015
從來都只係聽過夏天晝長夜短
響東京 1930 天就黑晒
但係響呢度, 2030 仲係黃昏, 可怕

天氣微冷
濕度較機艙高
所以相當舒服
落機後一群「大鄉里」盲中中行出去
主要係跟其他同機既外籍人士去拎行李

拎完走去問 counter 職員點去 hostel
佢好好人咁話晒我知
否則即使 hostel 幾近機場都無用

去到鐵路, 又唔知點買票去目的地
又問人
今次呢個人除左教我地點用部售票機外
仲教埋我地點買得更慳錢, 真熱心

去到 Frankfurt Hauptbahnhof（法蘭克福中央車站）
落車, 按指示牌同地圖行
出左車站就見到 hostel 所在既街道
開始往前直行
間 hostel 附近既位置都幾雜
有好多成人用品店及夜店
我仲差 D 畀人「兜搭」左入去

行到咁上下, 望到個街牌
明明 hostel 響 74 號
點解愈行門牌號碼愈細？
後軍作前軍, 行到 hostel 門口就呻笨
事關間野就響車站對面不足 50 米
笨
唯有賴天黑同眼訓
好彩一眾 yr1 都好體諒我

2145 去到, 我同 Ian 率先走上去 check in
職員畀左張匙咭同使用說明我地
然後我地兩個就會合其餘既人行去 212 號房

開黎開去都開唔到門
原因係我地懶得睇說明
本來張匙咭都有圖示, 但係我地又睇唔明
最後我都係睇完說明, 再試幾試先開到度門
為左令大家都識開門, 專登行出房門開多次然後教佢地
確保每個人都曉自己開門

六男一女一間房
燈光昏黃, 浴室麻麻, 洗手盆淤塞
其他都幾好
應該咁講, 自從上次重慶之旅上過「龍祥號」後
我既要求低左好多

女仔沖先, 然後到我
各自沖涼 + 吹水
Alice 居然提出一個幾有趣既話題：「你是否接受婚前性行為？」
大家討論得相當熱烈
不過我一講歷史同宗教大家就無野接落去, 唔 arm channel

0130 先訓
香港時間為 0730
同我平時差唔多
可能今日追著換日線
是日過得相當漫長, 連日記都好長

無漫遊, 打唔到返香港
無電腦上網, 報唔到平安
又聯絡唔到雷拎
濕滯
希望聽日會合埋眾人可以借 notebook 上網啦

是日消費
1. 房租：18 Euro
2. 車票：3 Euro

>>June 13, 2007 at 6:44:15 PM GMT+8

2007 年 5 月 29 日 星期二 【晴】

戀愛是迷人的黎明，結婚是漫長而繁忙的白天。
〔俄〕車爾尼雪夫斯基

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Konnie 台灣之旅第十日
卒之返香港了
快 D 過海關出黎啦
^^

朝早都係起唔到身
直至 1400 先開始清醒
起身就開始執行李
之前幾日都有話執
但係果陣只係執左 D 有用既野放響廳
今日先係確確實實將 D 行李放落行李箱同袋

好快就執完
事關之前已經拎晒 D 野出黎
只要妥善地將所有野塞落個箱, 而個箱唔爆就得
執完就繼續閒 hae

由於今日最後一日響屋企
所以專登等埋老爸老媽返黎
同佢地一齊食完晚飯先出門口
去到果邊應該無咁好既飯茶（主要係因為無錢, 食唔起貴野）

多得老姐指點, 行左去搭 E22
唔使好似平時搭 E23 咁行咁遠
不過要勞動佢同我一齊行落去
仲要幫手拎行李
^^

上車
無幾耐有個國泰既空姐坐左響我隔離（隔著條走廊）
果然國泰 D 空姐係比其他航空公司既空姐後生 D 同靚 D
但係最印象心刻的是她可以一手抽起一個大行李箱
力量驚人
國泰請著呢 D 空姐, 超值

去到機場打畀 Konnie
佢已經坐緊機場內既鐵路準備出閘
我趕快走去接機大堂既另一端（B出口附近）拎 D 行李去寄存
兩件盛惠 $100

一邊睇下 CX581 既乘客響邊個出口出黎
另一邊就周圍望下有冇行李車
搵到去番一開頭既 A出口附近就見到有架有垃圾既行李車
至於 CX581......
成個表都係得 CX531 由台北返香港
好有畀佢愚弄既感覺

行返 B出口
等左一陣佢就出到黎
得佢一個, 原來佢好早就搞掂
佢 D 同學就叫佢走先

同佢坐 A31 返屋企
趁佢好多行李, 乘機補送番佢份生日禮物
叫佢百上加斤
其間睇左陣佢響台灣既生活片段
不過睇左一陣佢就覺得好疲累訓左

落車拎埋 D 行李同佢返屋企
果然好多野
佢去 10 日, 但係拎 D 野仲多過我去一個月
可怕

留響佢屋企
本來諗住用佢部電腦黎上網搵響邊度搭車返機場
但係佢部電腦上網又上唔到
搞左兩個鐘先記得可以用最傳統既熄 modem 黎解決佢既網路問題
愚蠢之極

一邊打日記, 一邊同老拎聯絡 book hostel 事宜
到宜家都未 book 好
真濕滯
唔知到時使唔使訓街呢？

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
月滿
作詞：馮正　作曲：馮正　編曲：鮑比達

愉快的狂歡　長夜還剩一半
面前日子請分享這一半
良辰如此美麗　感覺猶如沒有身體
請告訴我　真戀愛是這般

願世間常歡　床前明月多美
月兒沒膽說　傷感的一半
完全忘卻也罷　便能描畫夢裡的畫
是這幅畫　即使太完美似虛假

是　你在意　也怕我仍介意
對我說起　你的某些故事
癡情地看看我　讓我唸出半首莫明奇妙的詩
只有為你　我會半傻半醉　半醉半癡想一切替你作主
而我願意　不理狂雷和暴雨　人生這麼短　能相愛多寫意

但我在意　說過也忘記了
對你再講　我的某些往事
癡情地看看你　讓我唸出半首莫明奇妙的詩
只有為你　我會半傻半醉　半醉半癡想一切替你作主
而我願意　不理狂雷和暴雨　人生這麼短　能相愛多寫意

───────────────────────────────
周華健的歌很多
選上這一首的主因是歌詞內容說了我日常生活的部份
當然不是唸詩, 也不是為人作主
而是重複的說我的往事
原因不是在意
而是無記性
-.-

在快樂的同時記著並不完美的事, 很痛苦
能忘卻當然好
現實沒有這麼完美
太完美的事, 反而很假
不真實, 也不應冀求

看過一個故事
主人翁渴望能心想事成
神仙達成了他的願望
但他並不快樂

原因是他想什麼, 事便自動自覺的完成了
就像他想跟朋友下棋, 「登」的一聲就下完
神仙向他匯報他驕人的勝利戰果（場場皆勝）
但他不能置身其中, 享受玩樂的過程

沒有過程的結局並不美好
美好, 就是建基於不完美
只要有白晝, 才會有黑夜
珍惜剩餘美好的長夜, 與人分享才是上策

>>May 30, 2007 at 6:24:17 PM GMT+8

2007 年 5 月 28 日 星期一 【晴】

男女之間不存在也不可能存在友誼。
所謂男女之間的友誼，不外是愛情的開端或殘餘，或者就是愛情本身。
〔俄〕岡察洛夫

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Konnie 台灣之旅第九日
聽日佢就返香港
希望到時佢可以早 D 出到黎啦
^^

早左訓（0300）, 早左起身（1400）
響屋企坐左陣, 上左陣網
突然醒起自己唔記得買 Germany Pass
嚇死
打電話問學聯
佢話即日都有得拎（要廿分鐘）, 仲要響 1830 前去到

在家執左陣行李
1530 衝出尖咀星光行
上到八樓, 搵左一陣先搵到學聯
果度 D 間隔認真麻麻
最差就係要我由西座行到東座
點解唔寫明由東座升降機上最快呢......

買左, 但係佢話要聽日先拎得
唔係玩呀嘛
同佢講要即日拎
佢就叫我 1830 返去拎

行左一陣街
走去新開既商務美麗華分店
幾大, 睇到 1830 先出發返學聯
拎完 pass 就過銅鑼灣搵漲

同漲響 Times Square 會合
然後先陪佢行去 Nokia 專門店
事源佢想搵人幫佢移走積響手機螢幕既塵
可惜維修要去另一度, 而果度都收左工

之後佢提議去食 Fat Angelo's
事關佢之前行過渣甸坊, 有人派左三張 $50 優惠券
好似幾抵食咁
優惠券上寫著最多可以用五張優惠券
所以行過去再拎多幾張

其間見到好多人排隊
原來係有人派膠樽裝葡萄適
同漲排埋一份

叫埋黃蜂去果邊等我地
但係我地兩個都唔識路......
優惠券上有地圖
示意響 C 出口附近

漲同我行左入 SOGO
然後叫我一齊行去地鐵站
以為佢想搵地方涼冷氣, 於是同佢講：「呢度 D 冷氣涼 D 喎」
跟著佢就講：「地鐵站涼 D 呀」

落左去地鐵站
原來佢原意係想經地鐵站行去 C 出口搵 Fat Angelo's
只係 SOGO 位於 D 出口
而所有響銅鑼灣地鐵站行過既人都知
呢個站既 ABC 出口同 DEF 出口互不相通
但係佢竟然唔信我講, 死都要行埋落去睇過先信
早知就唔理佢啦

最後都係唔知間野響邊度
走左去 Times Square 問詢問處
講完之後隱約記得響邊
行到出電車路, 卒之醒起間野既正確位置

行左入去, 一陣黃蜂就到
三個人食飯
聽到一個男侍應用意大利口音（估架咋）既英文同我地講野
內容大致係解釋果幾張 Menu
最尾果張講左好耐, 但係無心聽
一來只係聽到八成, 二來果張 Menu 講酒
完全無興趣聽

見到兩個女侍應好似糖黐豆咁
好明顯一個係新手
新手到會走去問人 D 野好唔好食（如果答佢唔好既, 都唔知佢會點答）
之後找錢既時候又整跌左 $5
最搞笑既係佢真係拎左個 $5 硬幣 + 4 毫子黎找贖
點畀貼士呀！

不過漲仲絕
佢真係放低 4 毫子就想走
過份
最後同黃蜂叫佢放低個 $5 先匆匆離開

幾好食
不過太趕時間
食完已經 2100
埋完單就 2106
趕時間既原因係買左飛睇《加勒比海盜：魔盜王終極之戰》
開場時間係 2100......

返到 Times Square
行去會合一同謝
入到場都仲係賣緊廣告
好彩趕得切

幾好睇
不過有 D 位輕輕帶過就算
都係特技好過劇情
同埋周潤發既角色, 真係可以是但搵個人去做

套戲完左
由於之前睇影評果陣話完左仲有野睇
所以叫大家留低
一邊播字幕一邊畀佢地質疑
好彩最後都真係播多一小段
短, 咁都係有嘛

各散東西
坐地車歸家
返到屋企仲睇到少少《洗冤錄II》
不過之後都無得睇, 減少我追既意欲

Konnie 0130 打黎
佢把聲好攰
話仲有野未做完
同佢講左陣就收線
免得佢太疲累
最緊要係聽日仲有時間同佢講野

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
安靜
作詞：周杰倫　作曲：周杰倫　編曲：鍾興民

只剩下鋼琴陪我彈了一天
睡著的大提琴　安靜的舊舊的

我想你已表現的非常明白
我懂我也知道　你沒有捨不得

你說你也會難過我不相信
牽著你陪著我也只是曾經
希望他是真的比我還要愛你
我才會逼自己離開

你要我說多難堪　我根本不想分開
為什麼還要我用微笑來帶過
我沒有這種天份　包容你也接受他
不用擔心的太多　我會一直好好過

你已經遠遠離開　我也會慢慢走開
為什麼我連分開都遷就著你
我真的沒有天份　安靜的沒這麼快
我會學著放棄你　是因為我太愛你

───────────────────────────────
本曲收錄於周杰倫第二張大碟《范特西》
是少有我齋聽歌都聽到歌詞既周杰倫歌曲

歌詞講一個男仔仲記掛著一個唔再愛佢既女仔
很情深, 也很蠢
不過這種蠢能迷到不少女士
除笨有精

不是說分手後不應另覓對象
問題是分手的時間和另覓對象的時間
分手後很快便另覓新歡
不管其目的是為了麻醉自己（很自私的行徑）
還是找到了他心目的那一個（太快的話也很難令人信服他對前任的愛有多重）
均不應鼓勵

也許因為有相當數目的男士沒有這種蠢
才會有女士認同這種男士自我抑壓的行為
以為那是愛的表現
不捨才會沉溺

我想每個人天生都不會拒絕幸福
如果覺得能夠得到幸福的話, 應該不會分手
每對分手的情侶當中應有不少的因由（冰封三尺, 非一日之寒吧）
如果一方只是自我抑壓, 不反省分手的原因
然後盲目認為對方不應離己而去（最可怕的是以為自己對對方很好, 然後怨天怨地怨別人）
那是愚蠢, 不是情深
同樣不應鼓勵

>>May 29, 2007 at 7:43:25 PM GMT+8

2007 年 5 月 27 日 星期日 【晴】

愛情是什麼？
是兩個相似的天性在無限的感覺中和諧的交融。
〔俄〕萊蒙托夫

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Konnie 台灣之旅第八日
即係仲有兩日就返黎
呢兩日佢都唔使做野
有多 D 時間休息同觀光
輕鬆下, 再準備最後兩日挑戰

今日有好多野做：
還晒手頭上 City 既書
簽約
唱 Euro
睇德國打返香港既價錢
執行李

晏晝起身
個天都幾陰
當想出門口既時候就落起大雨
咁就延遲左我出門口既時間

直到停左雨先離開
首站係 City
拎著八本磚頭返去還
重得很
不過還完就回復輕鬆
只係有 D 唔捨得
事關有 D 書仲未睇完

由於還完書既時間接近人地午飯時間
所以響商務睇書睇到過左 1400 先繼續旅程
第二站係去簽約
去到佐敦又係下雨時刻
上到去七樓, 又要我去五樓
簽完一份正本同一份副本就拎份正本走
無帶任何野裝張約
皺晒

出發去中環
去傑推介的百年找換有限公司
上到去, 有好多人
不過好少人找換同我差唔多數額既錢
佢地應該去短程旅行居多

年青既職員比較無禮貌
不過都好細心
問左我係咪去旅行
答係之後就幫我唱開 D 錢
由 5 歐羅到 100 歐羅都有
但匯率唔算好優惠
唱完錢就離開

出旺角
諗住問德國打返香港既價錢
佢講要 $14/min
嚇怕了

轉而去書店
買左兩本書就歸家

歸家食飯
飯後食荔枝
食左十粒
多過舊年全年 3.333333333 倍
高興得很

夜晚打畀 Konnie
又同佢傾左十分鐘
聽日佢又要做野
希望佢返黎果陣唔好咁攰啦

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
這是愛（電影《胡越的故事》插曲）
作詞：林敏聰　作曲：林敏怡

這是愛　似驟來　他朝怕驟然失去
艷陽下　有若靈犀　暗地兩相通
心已通　但願為天邊一雙飛鳥　空中往返
心變做連理樹　倚那春風

這是愛　似驟來　他朝怕驟然失去
夕陽下　百丈情絲　暗地兩低弄
心已通　但願為天邊一雙飛鳥　花間往返
花也在含笑枕在　春意之中

寒雨暴至　秋風竟吹散春夢
霧雨輕煙添我迷濛　問何日方可再復見
雲霧散始終不再現　失去影蹤

這是愛　似驟來　今朝已驟然失去
是場夢　淚若泉湧　再沒法牽動
空嘆息　心彷似天邊一孤鳥　影孤隻單
想世事常變幻　轉眼一空

───────────────────────────────
此曲原唱為泰迪羅賓
其後曾被多人翻唱
記有張國榮, 夏韶聲, 關淑怡等

《胡越的故事》（1981）由周潤發，鍾楚紅主演。
胡越本來是一名越南的軍人，長期與一名香港的筆友李立君通信。
但曾有一段時間音訊全無。
正當立君以為胡越可能已經戰死時，胡越卻來信說他已經準備要坐船來香港。
兩人雖未見過面，但彼此卻互有愛意。
後來胡越接受香港政府的安排移民美國，
立君以為從此兩人可以在美國過著新生活時，胡越卻被捲入了一件謀殺事件……

全曲以「這是愛　似驟來　今朝已驟然失去」以中心
概念很好, 有層次, 點題句很好
奈何其中歌詞未能承接點題句, 大好的點題句被浪費掉了
曲首兩段的旋律太悲傷, 與內容溫馨的歌詞不協調
中段以虛無的雲霧喻為變故, 很難有更深刻的聯想
以致聽起來很累贅

不過點題句實在太好
適合較喜歡即食情感的罐頭歌迷

>>May 29, 2007 at 7:11:41 PM GMT+8