2007 年 6 月 25 日 星期一 【晴】

薄衾小枕天氣。
乍覺別離滋味。
展轉數寒更，起了還重睡。
畢竟不成眠，一夜長如歲。

也擬待、卻回征轡。
又爭奈、已成行計。
萬種思量，多方開解，只恁寂寞厭厭地。
繫我一生心，負你千行淚。

柳永《憶帝京》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十七天

最後一日響荷蘭遊覽
當然唔會好似尋日咁留響宿舍
起身就睇下有邊 D 重要景點未去
就係：
1. Van Gogh Museum（梵高博物館）
2. Anna Frank Haus
3. Nederland Scheepvarrt Museum（荷蘭海事博物館）
4. Volendane（漁村）
5. Haarlem（花之城）
節目好似好豐富

Scheepvarrt Museum 連當地 Travel Guild 同寂寞的行星都無
上網搵地址同地圖
草草畫左幅圖就上路
前日行番宿舍, 今日就調轉由宿舍出發
事關 Metro 唔到 Van Gogh Museum
電車又要扣兩個 Zone, 唔抵
（荷蘭電車都係分 Zone,
　就算只係坐一個站, 過左另一個 Zone 都要計兩個 Zone）
寧願步行過去算數

同樣係 €10 入場費
有 D 唔捨得
不過之前睇過咁多唔同風格唔同畫家既油畫
好有興趣研究下呢個自殺既大畫家同普通畫家有乜分別

時間所限, 淨係行左個幾鐘就走
總算補充了我對佢既不熟悉, 以及對油畫既知識
不過都係唔明點解有 D 油畫近睇不知所謂
要離遠睇先覺得精彩

梵高用畫年畫既方法畫花
很有彩色中國水墨桃花的感覺
尤其背景的藍很有介乎虛幻和現實間感覺
本來都諗著響度買少少有關呢幅畫既紀念品
可惜太貴, 吝嗇既我唔捨得買
被逼放棄

繼續行去 Anna Frank Haus
花左 €1.5 買左個包食
熱辣辣, 醬汁都好好食, 唔錯
無齋咬消化餅咁寡

館外有一大條長龍等入場參觀
持續落雨, 無乜娛樂
隔離教堂成日傳來音樂聲, 都唔係報時鐘聲黎既！
正在納悶之際, 人龍旁的水道傳來一陣小號的聲音, 與教堂的音樂和應
儘管雙重音準, 但感覺很好, 很有即興娛樂的氣氛
表演過後當然要打賞
船上的表演者拿出一根長杆, 吊著一隻木鞋等人塞錢入去
好彩佢支桿唔夠長伸到排隊既人群當中

€7.5 入場費
又係無學生優惠
昂貴, 不過值得一去

Anna Frank 係一個猶太裔德國女孩
二戰其間一家四口匿藏於佢爸爸工作既三層大廈後座
平時無機會出去玩（除左後花園）
匿藏處同工作間既通道靠一個書架掩蔽（真實的機關）
她在這個環境下寫了本日記
直至一家四口被人出賣, 連同當時一同匿藏的四人押送往不同的集中營

戰後父親一直在此等候消息
1945年7月某日, 他秘書如常將信件拿給他看時
一陣沉默的死寂出現
國際紅十字會傳來的信息,表示兩姊妹已被確認經已離世
原來的一家四口, 卒之證實了只有父親生還
此時他的秘書美亞 - 姬斯從抽屜內取出小女孩被抓前留在屋內的日記
父親幾經辛苦幫她出版
就是全球翻譯了多國語言的《The Diary of a Young Girl》

館內有段訪問找來了 Anna Frank 的小學同學
她們在集中營內最後一次見面
當時 Anna 只是孤身一人
十多歲的小女孩要忍受這些痛苦, 很心痛
最可憐的是她在 1 March 1945 死去
而 8 May 德國正式宣告投降
集中營內的人相繼獲得釋放
小女孩竟捱不到她渴望已久的和平

紀念品部主要都係佢本日記
有多國版本, 但係無中文
即使係英文譯本都唔太難明, 睇得過
不過圖書館都有得借, 所以無買

行返 Centraal Station
買左個 €2 既包
邊咬邊搵 Scheepvarrt Museum

之前上網查地圖
明明顯示 Scheepvarrt Museum 響車站附近
但係響手上既地圖又睇唔到
問人又唔知響邊
風大雨唔大
拎遮又怕遮反, 唔拎又怕相機濕
風大到有 D 凍, 仲差 D 吹起我

行左好耐都搵唔到
太凍, 入去郵政局暖番個身先行出黎
卒之搵到, 但係入面既職員叫我睇門口海報
隨即關門
海報寫住博物館現正進行維修
到 2009 年維修完就會重新開放
頂！
花我咁多時間精神, 始終都入唔到去睇添

天氣持續不穩定
加上時間又晏（已經 1600）
如果再出 Amsterdam 去其餘兩個地點是但一度
去到已經 1700
而且仲要預時間買聽日返 Frankfurt 既火車票
決定終止行程, 買車票要緊！

又係拎籌慢慢等
到我既時候就走去問職員
佢 check 左一輪, 話要 €77.5
以為聽錯, 問多次, 佢直頭寫埋出黎畀我睇
之前用機查都要 €100 以上架喎！

點解會平左咁多？
佢解釋話每架車都會有優惠票
佢 Check 完發現我坐架車仲有優惠位, 所以就畀我
仲包埋 reserve 位既錢
抵到爛！！

畀錢既時候好論盡
散銀包拉鍊未拉好, 散銀跌完一次又一次
狼狽之餘仲好白痴
佢見我咁唔小心, 之前又好似聽唔明佢講乜（其實唔係唔明, 只係震驚緊咁平既價錢）
除左話我聽聽日幾點響邊個月台上邊卡車之外
仲襯我忙於執錢時寫埋中文解釋響張荷文車票度以作解釋
另加一句：「一路平安」
出門遇貴人

咁就搞到 1700
坐電車返宿舍
只需 25 分鐘就返到宿舍樓下
等左陣就有人黎

返到去問雷拎我仲有冇差佢錢
差 D 唔記得畀返車票錢佢
佢仲響屋企煮左西米露, 叫我食多幾碗
有少少怪味, 不過都照食
肚餓嘛！

繼續上網同 Konnie 傾偈
尋日幫佢寫左五百幾字
佢要將呢五百幾字擴充成 1500 字, 辛苦晒佢
儘管篇野佢應該朝早交, 但事實上佢到夜晚都未寫完

聽日就坐飛機返香港
執野其間 Yuki 突然返黎
原來佢由瑞士返左黎, 仲用鎖匙開我度門（即係佢間房度門）
好彩唔係換緊衫
結果佢入左黎一陣就行去摷醒雷拎
兩個人仲整意粉食

見到 Konnie 屋企咁多零食
我食黎食去都係得消化餅
儘管經濟實惠, 但真係好鬼悶架嘛
聽日返 Frankfurt 一定買多 D 野食
帶返香港也好, 響果度食都好
總之戒消化餅！

最緊要買多隻鹹豬手
一個人回味下
呵呵

─────────────────────────────
書籍簡介：

作者安妮 - 法蘭克最大的願望是做一位記者和作家。

「（二次大）戰後我想出版一本書，叫做《密室》......」

一九四二年七月，十三歲的安妮和家人為逃離納粹恐怖統治，
躲藏在荷蘭阿姆斯特丹一間倉庫裡，從此展開兩年多的密室生活。
「我經常心情沮喪，可是從來不絕望。
　我將我們躲藏在這裡的生活看成一場有趣的探險，充滿危險與浪漫情事，
　並且將每個艱辛匱乏當成使我日記更豐富的材料。」
一九四四年四月五日安妮在日記裡寫道：「我希望我死後，仍能繼續活著。」

安妮的日記從一九四二年六月十二日寫到一九四四年八月一日。
起初，她這日記是純為自己而寫。
後來，荷蘭流亡政府的成員 Gerrit Bolkestein 傑瑞特 - 波克斯坦從倫敦廣播電臺宣布說，
他希望在戰爭結束之後，能蒐集有關荷蘭人民在德軍佔領之下苦難生活的目擊報導，公諸大眾。
他特別以信件與日記做為例子。
安妮收聽到這段話，為之動心，於是決定在戰爭結束之後，要依據她的日記出版一本書。
她開始將她的日記加以改寫、編輯、潤飾，刪去她認為不夠有趣的部分，
並且靠回憶增加一些內容。
同時，安妮也保留了原始的日記。

學術界編纂的《安妮的日記：評註本》將安妮第一次寫成、未經整編的日記稱為A版，
以別於第二次所寫、經過整理的版本，是第二種版本，一般稱為B版......
奧圖 - 法蘭克斟酌許久，決定完成女兒的宿願，將日記出版問世。
他從A與B版中選材，編成篇幅較短的一種版本，後來稱為C版，
全世界讀者歷來讀到的《安妮的日記》就是這個版本。

奧圖 - 法蘭克的遺產由坐落在瑞士巴塞爾的「安妮 - 法蘭克基金會」繼承，
該會擁有安妮日記的版權。
後來，基金會決定為日記推出一種增訂的新版本，從安妮的A與B兩個版本取材，
對奧圖 - 法蘭克的內容加以補充，內容大約增加了百分之三十，
希望讓讀者更瞭解安妮的內心世界。

自從安妮死後，她的日記已經被翻譯成五十五種文字，銷售二千四百萬冊，
安妮的確以另一種方式完成她的夢想。
這個最新披露的絕對版本對於已經認識安妮的人來說，提供一個重新發現安妮的機會；
對於未識安妮的人而言，更是一個值得珍藏的版本。

【精采文摘】

1.
一九四○年五月以後，好日子很少，而且相隔很久......
我們的自由被一連串的反猶太命令嚴格限制：
命令猶太人身上要佩一顆黃星；......
猶太人禁止搭電車；......
猶太人在下午三點到五點之間才能買東西；......
這也不准，那也不准，可是日子還是過下來了。
賈桂琳常常對我說：「我現在什麼事都不敢做，怕做到不准做的事情。」

2.
你一定想聽聽我對躲起來過日子的想法。
這個嘛，我只能說我還不是很清楚。
我想我在這幢房子裡永遠不會覺得賓至如歸，不過這並不表示我討厭它。
我們很像在一幢奇怪的公寓裡度假。

3.
我不要像大多數人那樣，過了一輩子，結果白活。
我要有用，或者帶給所有人喜悅，即使是我不認識的人。
我希望在我死後，仍能繼續活著！
所以，我非常感謝上帝給了我這個天賦，我利用這天賦長進，並且表達我內心的一切。

4.
在當前這樣的時代，的確很難：
理想、夢想和寶貴的希望也在我們心中浮現，但只有被殘酷的現實壓碎。
我沒有把我的理想全都拋棄，也是奇事，那些理想看起來那麼荒謬，那麼不切實際。
可是我仍然緊抱著它們，因為世界雖然這樣，我還是相信人在內心裡其實是善良的。

【作者簡介】

安妮 - 法蘭克（Anne Frank）

一九二六年六月十二日生，
一九四五年死於德國貝根貝爾森集中營，距離她的十六歲生日只差三個月。

奧圖 - 法蘭克（Otto H. Frank）

安妮 - 法蘭克的父親，是法蘭克一家經歷納粹恐怖統治後唯一的倖存者。
他的餘生致力傳揚女兒的日記，一九八○年過世。

>>July 11, 2007 at 5:47:48 PM GMT+8

2007 年 6 月 24 日 星期日 【晴】

渡口、向晚，乘瘦馬、陟平岡。
西郊又送秋光。
對暮山橫翠，襯殘葉飄黃。
憑高念遠，素景楚天，無處不淒涼。

香閨別無信息，雲愁雨恨難忘。
指帝城歸路，但煙水茫茫。
凝情望斷淚眼，盡日獨之斜陽。

柳永《臨江仙引》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十六天

1000 先起身
今日雷拎唔出去
自己行左兩日, 都懶得成日一條友周街走
加上尋日淋左一日雨, 決定放自己一日假
響 hall 上左一整日網

無寫日記
掛著睇文
睇到最新連載的《明朝的那些事兒》後
走去搵《尋秦記》睇, 咁就消磨左一日

打番之前累積既日記
打得咁上下又停手, 懶惰
仲係打緊 Study Tour 其間既事
換言之即係仲有廿幾日未打, 唉......

無間斷同 Konnie 傾偈
結果見到 skype 既通話時間長達 35 小時之譜（包括了佢訓覺同我訓覺既時間）

佢要寫去台灣既得著
我要寫呢次旅行既感受
由於佢要寫中文, 我要睇英文
結果交換功課
佢用英文打左大概要寫既內容畀我翻譯
我就叫佢是但作 D 人人都識講既旅遊感受

佢開 now 睇《刑事偵緝檔案 IV》
佢將個 webcam 對住螢幕, 等我可以睇埋一份
睇到第八集, 佢訓左我就無得睇
等到佢起身就輪到我訓覺
0200, 都唔算好夜

────────────────────────────────
由於是日日記太短的關係
所以要加少少補充資料填塞空間
如果唔想睇既都可以唔睇

────────────────────────────────
雨天的煩惱

在香港的眾人受酷熱天氣的折磨已久
偶而一場雨, 降溫之餘同時清洗空氣中的懸浮粒子
感覺很好

在荷蘭則不然
之前在風車村時那些手持問卷的學生問我有否覺得荷蘭的天氣很煩
那天只是在荷蘭的第一個早上, 完全唔知點解會有咁既評語
尤其係陽光正猛既時候聽到呢句野
有點摸不著頭腦

經過多日的感受
卒之明白當時設計問卷的人說「荷蘭的天氣很麻煩」並非無的放矢
雨下得密, 下得大
這也算了
風才是最可怕的
風大得幾乎可以把人吹起
自然可以將所有的雨水吹到傘下苦苦支持的人
傘也反了, 人也濕了
難怪歐洲人多數不拿傘
因為拿了也於事無補

不過雨勢太大時他們仍會拿傘
可惜也只能盡點人事
對保持身體乾爽並無幫助
如果再有問卷問我喜不喜歡荷蘭天氣時
我想我會有個確定的答案了

────────────────────────────────
消費高？

在德國時早覺消費高
吃一個稍為正式的午餐 / 晚餐（即如漢堡大王）也要至少 €5 以上
價錢也不算很貴很貴
但份量不夠, 辛苦了我的胃了

到了荷蘭才知什麼是高消費
一個漢堡包居然要 €1.5, 貴一點的甚至要 €2
只是一塊肉 + 一塊芝士 + 醬 + 麵包
份量跟牡的漢堡包一樣, 價錢可貴上四倍！
還有街頭的熱門小食──薯條
售價平均要 €3
絕對是昂貴的小食

還是鹹豬手好
€3.6, 價格相宜
有令人感到充實滿足的感覺
超值

所以在荷蘭的晚餐時份就只有以消化餅度日
錯過了美食, 可惜
但金錢要用得其所
沉溺口腹之慾無助感受旅行樂趣

────────────────────────────────
Sex & drug？

第一天到風車村時遇上問卷少年
被問及有人對荷蘭的印象只有 Sex & drug, 我有什麼看法
當時連市中心也來不及參觀
自然不甚了解

其後幾日都在市區閒逛
對這個問題多加留意
發現性的話題在荷蘭當真十分平常
無論是在街頭的性商店, 或是三層大廈的櫥窗人體展覽均大行其道
精品店更有不少軟性性商品作招徠, 吸引遊客選購
雜誌店中的男士毫不忌諱地瀏覽色情刊物, 還會細心挑選

當地人對性的開放態度
儘管不懂欣賞, 但開放總勝過抑壓
只要有足夠的理智平衡就好了

至於毒品
未有接觸
只有在精品店內見到很多大麻附屬商品
也有經過大麻博物館
但係真正既大麻反而無見過
難以妄下判斷

────────────────────────────────
集中營囚禁的人

以往總是聽到納綷德國對猶太人的迫害
又聽到大量的猶太人被關到集中營囚禁, 甚至殺害
還以為集中營是為了清洗猶太人而設的工具
是次歐遊令我對集中營有新的了解

集中營是類似監獄的大型拘留中心，用於統一關押或隔離持不同政見者、敵僑，
以及屬於某一特定種族、宗教或政治信仰團體的成員於一個有限的空間內。
它與監獄最大的區別在於，
集中營中關押的人由於具有某種特定的身份往往不經過法律判決即遭拘留，
而且沒有確定的拘留期限。

有些被關押者雖有法律判決，而且有確定的關押期限，
但這些判決大多是不經司法程序的，這些被關押者也往往不被關在監獄而是關在集中營中。

集中營的形式有很多種，可以單純限制人身自由，或者強迫勞動，
納粹德國的集中營甚至進行種族滅絕式的屠殺。
通常人們很難清楚的界定集中營的各種形式，但是它們有一個共同點就是：
其中的被關押者的人權都被忽視、被損害。

納粹德國在1934年成立的達豪集中營是最早建立的德國集中營（Konzentrationslager）
開始時集中營只用來關押犯了法的罪犯、同性戀者與政治犯，
與監獄唯一的區別是集中營關押的犯人密度較大，而且設有刑場。
許多納粹集中營的入口處都有「勞動帶來自由」（「Arbeit macht frei」）的標誌。

在1941年12月，德國在波蘭興建6個殺人的集中營。
當中的地點包括奧斯威辛和特雷布林卡。
這些地點被選擇的原因是因爲它們都是鐵路的交匯點，與及它們都不是軍事上重要的地點。
所以，納粹黨可以秘密地進行用毒氣消滅猶太人的殺人計劃。

二戰爆發之後，位於波蘭的各集中營的性質開始轉化為滅絕營轉化，
關押的範圍也大大增加，設備了毒氣室與焚屍爐。
特別是1942年之後，設立了專門的滅絕營，用於解決「猶太人問題」。
有的滅絕營一天要處理上萬人。

納粹集中營的囚犯包括：
猶太人、蘇聯戰俘、共產黨和社會黨黨員、吉普賽人、耶和華見證人的信徒、
歐洲各國地下抵抗運動成員、「無生存價值」的德國人、保皇派、共濟會成員、
波蘭人、索布人，以及敵國國民（包括英國、法國、美國、中國等國）。
當中只有猶太人及吉普賽人會只因種族原因被屠殺。
這些人被用火車從歐洲各佔領區運往集中營，實施「保護性拘留」（Schutzhaft)。

隨著盟軍的推進，各集中營開始陸續關閉。
到了1945年5月上旬僅有奧地利與捷克地區的部分集中營尚未解放。

────────────────────────────────
車票蓋印

荷蘭的電車及 Metro 車票
荷蘭的公共交通系統包括巴士、電車與地下鐵
這三種交通工具所用的車票是同一種的，不需要分別購買
在車上向司機購買只能買到限於2格、3格、8格的聯票
15 格的車票需先於小食店購買

乘車時讓在車上坐著的核票員蓋印
儘管票上有一定數目的空格, 但核票員絕對不會蓋滿全張車票
因為公共交通系統的車費採「區域(zone)制」，所需之回數券的1個回數是「區域+1」。
也就是說，是同1個區域的話，則將花費2「格(strip)」，司機會在第2格上蓋印。
而如果您起訖的車站是從A區到B區，跨越1個區域的話，
則將花費3格的strip，司機會在第3格上蓋印。

另外，在一定的時間內，您還可以在同一個區域(zone)內不限次數搭車與換車，
司機會根據您車票上的時間，計算您是否在規定的時間內，不會跟您多收車資。

車資如下：

Fares per 1 January 2007
2-strippenkaart € 1,60
3-strippenkaart € 2,40
8-strippenkaart € 6,40
15-strippenkaart full fare € 6,80
45-strippenkaart € 20,10
15-strippenkaart reduce fare € 4,50

>>July 24, 2007 at 6:41:35 PM GMT+8

2007 年 6 月 23 日 星期六 【晴】

萬恨千愁，將年少、衷腸牽繫。
殘夢斷、酒醒孤館，夜長無味。
可惜許枕前多少意，到如今兩總無終始。
獨自個、贏得不成眠，成憔悴。

添傷感，將何計。
空只恁，厭厭地。
無人處思量，幾度垂淚。
不會得都來些子事，甚恁底死難拚棄。
待到頭、終久問伊看，如何是。

柳永《滿江紅 - 其三》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十五天

訓既時間為 0300
起身既時間為 0900
尋晚雷拎早就用 msn 通知左我佢今日唔出街
所以又係我一人自由行
尋晚就諗定今日行市中心
事關大部份景點都響度嘛

第一站係行教堂
行左咁多教堂, 次次都係得小貓三四隻響入面參觀
今日係星期日, 正好去睇下入面既人響教堂做崇拜
可惜過左陣人地就以 1230 之後才是參觀時間趕遊客走
只係夠時間映幾幅相就要走

信步而行
之前 plan 既時候從無興趣走去 China Town
但係行完教堂之後唔覺唔覺就走左去（真係唔覺, 事關連地圖都懶睇）
一碟叉燒飯要 €7.5
D 叉燒鑲金咩
忽然諗起日本一級中華料理一碟叉燒要港幣六十幾
我諗加埋飯都同荷蘭同價

繼續行, 見到無線電視無處不在
仲有一系列既電視劇供人觀賞
好似《賭場風雲》、《同事三分親》、《緣來自有機》、《歲月風雲》等
仲 update 過我
我真的脫節了

出發前往市區內既景點
主要去左 Dam Square、Royal Palace、Our lord in the attic
以及各條縱橫 Amsterdam 既水道同橋

行過某 D 地方
一樓及地面都係落地玻璃
入面仲有女性搔首弄姿
身上的布不少, 但根本掩蓋不了身體
有些還是外婆級人馬
咁有「經驗」既既女性, 到底仲會唔會有生意？

大部份既博物館都要收費
去左由孤兒院改建成的 Amsterdam Historical Museum
參觀免費畫廊（名乎其實的廊, 事關真係得一條狹長既通道）
廢事響人地餐廳食自己野
走去 Museum 門口廣場食消化餅
食食下又落雨
匆匆收拾入館內避雨

原本都好有興趣參觀
但係 €10 + 無學生優惠足以令我卻步
尤其身上得番 €200 流動資金（當然唔計儲備金）
還需預留金錢購買回 Frankfurt 的車票
還是算了吧

狼狽地避雨時路經一個公園
內有多尊青銅雕像
附近仲有一幅油畫複製本
原來雕像群是按照該畫的佈局來擺位, 十分有趣
不過要跟萬惡的荷蘭雨天搏鬥誠非易事
很難在相機不沾水的情況下自拍成功, 可惜

走回大街, 繼續四周遊蕩
蕩到 1615 開始回程
不過今次唔使畀錢, 亦唔使蓋印
因為我打算徒步跟隨電車路軌歸家

由市中心的電車總站（Centraal Station）旁出發
跟蹤往來的 2 號電車, 再細心留意地面的電車軌以確定方向
初時十分困難
因為市中心交通繁忙, 有太多不同路線的電車
加上我又唔可以行電車路
跟失了很多次
不過根據第一晚既殘餘記憶, 以及不斷行走既 2 號電車
還有路上的電車站作「補給」（補給下有冇行錯路既資訊）之用
走到只有 2 號電車行走的路線就更容了
偶而也有分岔的路軌
幸好問題不大, 輕鬆解決

步行回宿舍
主要的精神留了在追蹤電車
忽略了值得細看的沿途景物
但亦有留意到 Van Gogh Museum 的正確位置
待來日再來參觀

1735 正式行到宿舍樓下
但需要等到大門有人經過才能入內
明明大門旁有門鐘可叫樓上的人開門
但至今仍不曉得如何使用
有外國人走來問路, 當然不懂回應
他也不懂如何操作門鐘, 一籌莫展

圍著宿舍行左個圈, 睇下有冇其他方法入去
當然無, 否則在內的學生會好危險
不但無功而還, 個身仲再濕多二錢重
最後都係等人返黎開門

返到去繼續上網
又開 skype 同 Konnie 傾
以及同老姐 msn
無乜特別事發生

是夜一個人食消化餅
打番之前既日記, 進度不大
打左一篇就算
0000 就訓, 很健康

>>July 7, 2007 at 3:33:45 PM GMT+8

2007 年 6 月 22 日 星期五 【晴】

望處雨收雲斷，憑闌悄悄，目送秋光。
晚景蕭疏，堪動宋玉悲涼。
水風輕、蘋花漸老，月露冷、梧葉飄黃。
遣情傷。故人何在，煙水茫茫。

難忘。文期酒會，幾孤風月，屢變星霜。
海闊山遙，未知何處是瀟湘。
念雙燕、難憑遠信，指暮天、空識歸航。
黯相望。斷鴻聲裡，立盡斜陽。

柳永《玉蝴蝶》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十四天

0630 ~袗�
唔願醒, 再訓過
狠狠地訓到 0930 先醒
Konnie 唔響屋企, 反而老姐在家
尋晚 send offline msg 問佢有乜大事發生
一上網就見到唐唐升左做政務司司長

同佢閒 hae 左陣
1000 忍唔住敲門搵雷拎
無反應, 應該未訓醒
隔左陣佢話佢今日唔想出去
叫我一個人去行風車村

佢拎左 Yuki 既《Western Europe》（英文版寂寞的行星）
講我知去邊度坐乜車
再畫埋一幅簡單地圖教我點去地鐵站
真感激
不過旅行當然想一齊行, 有點失望

出發之前 Konnie 返左屋企
畀佢成功拖延到多 45 分鐘先出門口
落到樓下一出 lift 就見到出面落大雨
一見到落大雨就想拎把遮出黎
一想拎就發現我把遮仲響房入面曬緊太陽
好彩未出大門, 未至於要等人開大門
衝上去按門鈴
雷拎開門畀我就拎遮, 拎完出發

再次落到樓下
今次大門一關上外面就滂沱大雨
有少少想卻步轉身返上去
等左陣見雨勢稍減
諗左一陣, 決定放手一搏
最多都只係一身濕晒, 一於勇往直前！
結果行行下就真係無落雨

行到 Metro（地鐵）Heemstedestraat 站
根據雷拎既指示前往 Sloterdijk 轉火車
到站後落車, 發現荷蘭同德國車站間其中一樣好唔同既野：
買票機一係無英文選擇, 一係淨係可以入咭畀錢, 仲有一款可以入散銀同咭
點解無一部機可以既有英文選擇, 又可以入紙幣呢？

響舖頭睇左好耐
可惜無野適合買黎唱散銀
要走入票務中心買, 問埋響邊個月台上車
代價係 €0.5
詢問唔使錢, 但係荷蘭人無找贖既習慣
之前都聽 Yuki 講過
但係佢都係講 €0.01-0.02 無找錢
今次咁就畀人黑左 €0.5, 實在係一個昂貴既教訓
以後都係早早準備零錢買票用

上車去 Zaandijk
落車, 一如雷拎所言有足夠路標指引我去 Zaanee Schans
幾好, 好過香港
香港唔係無指引既路標, 但係有時 D 路標會老點左人行錯路
保養得太差了

行到去, 天色不佳, 雲太多太厚
風不大, 風車沒有轉動
經過一座座風車
有些要付款進場, 有些不用
只進了免費進場的風車內, 明白為何有些風車不轉動的原因
──內還連接風車的轉盤給人拆下了, 可惜

走到盡頭的風車
然後向風車村內其他地方參觀
行行下見到前面天色陰暗, 後面卻陽光普照
點解會咁既？
弔詭程度有如當年沿城門河由暴雨下的「有錢佬花園」至無雨的沙燕橋

入左間賣芝士既舖頭
響外面已經聞到非常濃烈既芝士味
有多款不同種類的芝士任君選購, 仲歡迎試食
好認真試勻每一款芝士
揀到兩款好想買
但係一來貴（最平一舊都要 €6.5, 我想買既山羊奶香料芝士仲要 €9.45）
二來其實屋企人對芝士無乜濃烈興趣, 買左返去都唔知佢地食唔食
三來走去問職員, 佢話一舊芝士室溫下可以放一個月, 放入雪櫃仲可以放兩個月
但係開左就只可以放一個月
屋企人唔慌會響限期前食得晒
所以最後忍痛放棄

如果唔係上次響北京買既蜜棗食左成年都未食完
我諗我唔會唔買

響風車村周圍行
除左一般景點外, 仲有好多不同既精品店
多數都有木鞋賣
但係我對呢 D 木鞋無興趣（價錢高, 屋企無位放, 想著起 D 鞋內櫳又太粗糙）

行行下畀人叫停左
係兩個學生叫我幫手做問卷
響香港我就唔多願意做, 不過響荷蘭我就無乜所謂（得閒得滯掛）


行完就坐車出 Amsterdam Centraal Station
響市中心周圍行精品店
發現荷蘭精品店內既貨物大同小異
主要有：
1. 木鞋（就算無木造既, 都仲有 D 鞋狀既其他產品）
2. 錫錫荷蘭男女
3. T-Shirt / 衞衣
4. 大麻附屬產品（煙灰盅, 以及有大麻樣既打火機、啤牌等等）
5. 性商品（除左性商店外, 普通精品店都有 D 有味 T-Shirt, 啤牌以及各式產品）
6. 瓷器（離唔開風車、錫錫男女、鞋, 較有趣既就係有 Miffy 瓷器）
7. Postcard（風景景點少不得, 但有關性的題材, 無論質還是量都比德國多得多）

之後又去左幾間響火車站開既雜誌店睇書及雜誌
很多不同類型的雜誌, 數量頗豐
而且除了荷文外, 還有英日德韓雜誌
不同類型的雜誌都翻開看看
不過較早時間在 Sloterdijk 站雜誌店見到的歷史雜誌就遍尋不獲
歷史雜誌一向唔多, 見到一本英文, 一本荷文
之前要行, 所以廢事揹多本書（有本「寂寞的行星」！！）
但係響呢個大站居然搵唔到, 有冇搞錯呀！！！

本來坐電車返去, 但係走左架車
由於應承左 Konnie 會盡量響 1800 之前（即係香港時間 0000）返屋企
改搭地鐵, 但係等車都等到 1728 先有車, 之後仲要轉車
最後連跑帶滾, 仲差 D 畀車撞死先趕到宿舍樓下
好彩有人無啦啦出大門, 唔使等太耐

遲左 10 分鐘先上到網
同Konnie 傾左陣
不過佢話我無野同佢講
之後就唔用 skype 講, 用番 msn 文字聯絡

夜晚雷拎煮意粉
見我未食晚飯就煮埋我份
無其它配菜, 齋係意粉同醬汁
食得消化餅多, 有其他野食真好
感激

睇著佢訓, 無心機打日記
結果上網睇《明朝的那些事兒》
之前響香港已經開始睇, 黎到歐洲佢更新至嘉靖年間
通俗手法寫歷史, 能生動地吸引少看歷史的人
同時文中偶有創見, 或從另一角度分析史事
亦能啟發思維

將歷史故事化、片面化的問題
的確不太好
但作者取向顯然不是向學術方面進發
就當成故事來看, 精彩
人家有興趣就自會自行翻閱正史以求史識

有關點擊率做假問題
是真是假未有公論
但一切皆是噱頭
我看這故事也不是因為網上點擊率超過 20 萬才感到興趣
如果本質不行, 宣傳再多終究無用

睇著 Konnie 起身
然後自己訓覺

>>July 7, 2007 at 2:24:35 PM GMT+8

2007 年 6 月 21 日 星期四 【晴】

一枕清宵好夢，可惜被、鄰雞喚覺。
匆匆策馬登途，滿目淡煙衰草。
前驅風觸鳴珂，過霜林、漸覺驚棲鳥。
冒征塵遠況，自古淒涼長安道。
行行又歷孤村，楚天闊、望中未曉。

念勞生，惜芳年壯歲，離多歡少。
歎斷梗難停，暮雲漸杳。
但黯黯魂消，寸腸憑誰表。
恁驅驅、何時是了。
又爭似、卻返瑤京，重買千金笑。

柳永《輪台子》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十三天

起身, 成間房得我一個（廢話, 單人房有多個人都幾得人驚）
又唔知佢地起左身未（平時都係見到佢地郁先起身）
由 0630 典到 0730 先落去食早餐
食完早餐諗住返房執野, 先見雷拎出 lift 落樓下食早餐

執完野, 又唔知佢地做緊乜
等到 0830 就拎埋行李落大堂
見佢地仲食緊早餐
於是邊睇書邊等佢地
直至 0940 先見到佢地落大堂
放低幾件行李就走去搭火車
乜我地唔係拎埋 D 野去科隆咩？

一個站後到科隆
一出 Hbf 就見到科隆大教堂
搵位映教堂全景
畀佢地叫左去映第二幅三人照
行完入面, 頗失望
相對起來 Berliner Dom 值得睇得多, 又多 D 野睇
除左外部裝修之外, 我唔覺科隆大教堂有乜咁出色

睇完大教堂基本上就完成左我地響科隆既所有行程
沿火車橋橫渡萊因河
行過對岸, 映多幾幅相
又沿火車橋返去

午餐食左個薄餅
真的很薄
幾好食, 有芝士 + 忌廉 + 火腿
不過食完唔代表夠, 更唔代表飽
都係坐車去 Amsterdam 再食野會好 D
但係午餐時間就會響 1940 之後

行商店, 佢地行 D 全層都係賣女裝衣物的地方時我就無能為力了
same as 賣袋賣鞋賣包......
唯有行去其他地方
然後睇佢地幾時就, 再搵番佢地一齊行
不過行到某間麵包店, 被隔鄰店舖的貨品吸引著
一時無留意佢地, 結果就唔知佢地兩個去左邊
街上又無佢地既"�影
諗著最多都係返 Bonn Hotel 同佢地會合
都無咁擔心

行完超市佢地又響我視線範圍出現
繼續行
行到咁上下（1500 左右）就返 Koln Hbf 諗住坐車返 Bonn
架車因事延遲到達月台
當時電子板顯示去 Bonn Hbf 既火車響隔離月台上車
上左架寫著會去到 Siegburg / Bonn 既車
不虞有詐就上車

出事了
落到 Siegburg / Bonn, 一個完全陌生既地方
查 info 機, 有架車可以坐返 Bonn Hbf
搞左一輪先知係 U-Bahn
當時已經走左架車, 唯有等下一架

1629 先落到 Bonn Hbf
差 D 唔知邊度出（差 D 既意思係是但出一個出口, 再搵路返 hotel 都得）
拎完行李就出發
陪 Yuki 坐去 Dusseldorf 等之後同佢去瑞士既友人
響牡坐低等
佢兩個出左去睇 Amsterdam 列車資料, 我就留低看行李同寫日記
由尋日寫到今日佢地先返

希望之後會變番二人同行啦
書已經睇得七七八八
餘下既行程得一個人既會好悶

上車, 跟 Yuki 話別
延遲左 18 分鐘
睇完《波蘭簡史》, 悶得很
剛好 2100, 雷拎一如以往雙眼呆瞪窗外聽 iPod
補票畀左 €30, 銀包剩番 €15
缺水了

到了 Amsterdam Centraal Station
先去 Kiosk（小食店）買車票
雷拎好徬徨地周圍望, 同埋問人響邊度搭車
之後仲行開左陣
由於我都唔知目的地響邊, 只能站在一旁看管行李

上 2 號電車
沿途佢見到重要地點都會講我知
仲會簡述下 D 歷史知識
識帶隊過我

到左 Westlandgracht 就落車
冒著唔算好大既雨勢行
行到一幢野既樓下停低
佢響大門前既 Panel 按左幾下
初時仲以為佢叫人開大門
但係之後又無晒消息
原來佢都只係等人經過開門

好彩等左無耐就有人返屋企
好好彩架, 當時已經 2300 啦
搭 lift 上到 11 樓 229 室
兩人 hall
有浴室 + 洗手間以及廚房
佢間房大 D, 但係我間房（Yuki 間房）都有個「半獨立套房」
何謂「半獨立套房」？
即係我間房可以直接入浴室 + 洗手間
但係就要同雷拎共用

最好玩既係呢個浴室 + 洗手間有兩度門
一度門開向走廊, 從室內鎖上
另一度門開向我間房, 從我間房鎖上
即係即使有人響入面, 我隨時可以開鎖衝入去
哇哈哈哈（真變態）

各自梳洗
佢煮米粉自己食
我懶得食野, 同被嘈醒的 Konnie 傾偈
當時為香港時間 06??
被命令要響佢起身之後先訓得
結果 0200 先訓
累極了

>>July 3, 2007 at 3:44:22 PM GMT+8

2007 年 6 月 20 日 星期三 【晴】

一聲畫角日四昏。
催促掩朱門。
不堪更倚危闌，腸斷已消魂。

年漸晚，雁空頻。
問無因。
思心欲碎，愁淚難收，又是黃昏。

柳永《訴衷情》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十二天

旅程不經不覺剩返一星期
今日原訂係見 BD 既日子
不過相對而言
當然係留響德國更寫意啦

起身就食早餐
食完返房執野
天雨關係留左陣
雨勢稍減先離開
買火車票, 代價為 €19.2 兩個人
不過唔係坐 ICE, 而係坐 RE
平 D 嘛

0905 先行到月台
0916 就開車
走入殘廁
既開唔到門, 又唔識閂門鎖門
多得冇位單車客出手相助, 不至出醜於人前

繼續《波蘭簡史》
睇埋就將所有帶來既書都睇晒（包括「寂寞的行星」！！）
真悠閒
不過坐車如果唔睇書的話, 又有乜好做呢？

落車, 搵地方住
行左一大輪, 最後都係去番「寂寞的行星」介紹既地方
響貝多芬既出生地, 入住名為 Hotel Mozart 既酒店
有趣得很
今次無 3 人房
佢兩個孖住雙人房, 我就一個人單獨住單人房
過下一人旅程既奢華享受

安頓後出發
下雨天不會掛念從前, 只會掛念沒下雨不怕弄濕相機的日子
又怕濕了背包, 又怕濕了長褲, 又怕濕了鞋襪
狼狽得很, 很怕旅行時下雨
最後都係衣衫盡濕

首站係行去貝多芬既雕像
呢個雕像係由 Franz Liszt 出錢立既
相當有意義
雨勢不大, 仲可以同佢合照

先去 Beethoven Haus
淨係行左個 Museum Shop 就走
之後就邊行邊避雨
雨勢頗大
佢地兩個共用一把正常 size 既縮骨傘
我就拎著把扁傘一個行
（特細, 想遮多個都唔得）

1400 就頂唔順要返 hotel
其間經過一幢外觀華麗既建築物
無暇細心欣賞, 只能匆匆而過
都未搞清楚果幢係乜

返到 hotel 無乜野做
一個人響房睇左陣電視就訓
訓到 1645 繼續無所事事

外面無落雨
於是我地再出發參觀
卒之搞清楚之前行過既係 Town Hall
戴高樂同甘迺迪都響果度揮過手
難怪裝修得咁靚

想去 Beethoven Hall 參觀
過左參觀時間
查實都只係想行去略盡人事
點知就蕩失路
跟著佢兩個帶路人慢慢行
之後問人, 呢個人開頭都行錯路
不過最後都指明左我地既路徑

響門口既雕像映左幾幅相就走
呢個雕像幾特別, 唔係傳統既雕塑手法
但係正面睇又睇得出效果
回程時又蕩失路
其實好想出聲, 不過最後都係無講我認得路
原因係一來佢地根本就無同我講要去邊
我都唔知佢地想去邊
二來我都無乜信心認得路

行到 Town Centre 佢地都唔認路
今次有信心認得路, 所以出聲
然後同佢地一齊行返 Hotel

夜晚沖涼過後走過去佢地間房講數
放低二百幾歐羅
換左個風筒返房
其實係借雷拎個風筒烘乾濕了的一切

邊烘邊睇電視
成場意大利 Vs 葡萄牙（足球）
踢足 90 分鐘, 加時, 再互射十二碼
都唔足以烘乾我既野
無聊地望著 D 相撲手撲黎撲去
發現左一個定律：往績較好既通常都贏
即係之前 10 勝 0 負既會贏 9 勝 1 負, 如此類推

無聊至 0030 先有得訓
原來得一個人齋望著 D 聽唔明既電視節目, 以及睇到悶既 CNN
加埋唔使聽得明既體育節目
真係一種沉悶既清閒活動

目前為止用左 €564.69

>>July 3, 2007 at 3:06:52 PM GMT+8

2007 年 6 月 19 日 星期二 【晴】

戀帝裡，金谷園林，平康巷陌，
觸處繁華，連日疏狂，未嘗輕負，寸心雙眼。
況佳人、盡天外行雲，掌上飛燕。
向玳筵、一一皆妙選。
長是因酒沉迷，被花縈絆。

更可惜、淑景亭台，暑天枕簟。
霜月夜涼，雪霰朝飛，一歲風光，盡堪隨分，俊游清宴。
算浮生事，瞬息光陰，錙銖名宦。
正歡笑，試恁暫時分散。
卻是恨雨愁雲，地遙天遠。

柳永《歸雲》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十一天

尋晚沖埋涼
頭都未乾就訓
第一次醒
聽到出面行雷閃電
又記得佢兩個朝早要沖涼, 所以繼續訓
第二次畀人叫醒
佢兩個已經整裝待發
匆匆起身同佢地去食早餐

見到有橙汁同色水好似蘋果汁既飲品
飲左咁多日橙汁同茶, 想轉下口味
斟左少少, 為免有誤會, 聞多聞, 有蘋果味喎
一口氣飲晒
先有蘋果甜味, 然後一大陣苦味
原來係蘋果酒黎既, 好難飲
難怪之前 Vickie 佢地飲過一次都廢事再飲啦

返房執野, 然後出發
首站係去 DB 問由 Amsterdam 返 Frankfurt 既事宜
得知有 pass 就得, 放心

行去 AUDI（「淆底」超級市場？？）
無收獲, 繼續行
周圍搵地方行
不過都係信步而行
無跟地圖既景點走
只係見到景點既時候我會同佢地講
佢地一係映相, 一係「哦」一聲就繼續行

行去尋日見到既 Deutsches Eck
上左去行左陣, 映下相
本來仲諗過過河另一邊既城堡（現為 hostel, 入場參觀都得, 不過要畀錢）
不過一來懶（要行好遠先過到橋）
二來今朝撞到個香港黎既媽媽, 佢話入面無乜特別, 放棄

去 KD （Koln-Dusseldorf, 尋日間船公司）
睇下可否免費過 Bonn
可惜 1430 先開船, 太晏, 所以放棄
同時放棄繼續行景點
行街算數

行商場
佢兩個買左盒七彩金莎
我就無收獲
之後返 hotel 附近又去行「淆底」
以€5 以內黎開個大食會
買左薯片 x 2, 蘋果汁, 1L 雪糕, 罐頭菠蘿 + 粟米 + 茄汁沙丁魚
埋單只係€4.49

好早返到 hotel（1600 前）
用雷拎把「雙人牌」萬用刀（有兩個人印響上面, 但唔係孖人牌）開菠蘿
Yuki 千辛萬苦先開到（我有幫手架）

倒菠蘿入食物盒（雷拎帶來的, 入面真係有兩包公仔麵, 名乎其實的食物盒）
然後開餐
先清大盒雪糕（易溶嘛）
其次係薯片s
最後係沙丁魚同菠蘿
蘋果汁飲唔晒, 粟米開都無開

之前響 Stay & Learn (Frankfurt) 拎左套刀叉匙"d用
刀叉響 Wurzburg 食鹹豬手用過
匙"d食雪糕就派上用場
自由行時, 原來自備餐具都好重要（一係就拎）
好彩食杯麵時雷拎有多對筷子
否則當年 music camp 七人「輪」叉事件將會重演

果年響鯉魚門 music camp
有謝同周振聲
都唔記得係邊年
總知果陣晏晝人人都買左個杯麵（合味道）
夜晚煲水時（當年有水煲響房內任用）大家先發現無餐具
唔記得邊個（好似係謝）有隻膠叉
結果我地一個食完, 另一個人就拎隻叉去洗完再食
個天黑晒 D 人仲響後院（三間房公用既地方）行黎行去
自此以後就多左句話人既術語：
「正一合味道（無叉用）！」

食完野佢兩個訓晏覺
太早, 訓唔著
無野做, 又睇左陣《波蘭簡史》
怕太快睇完無野做
之後轉用 harddisk 聽歌（叉電中, 唔怕無電）
邊聽邊訓響床, 但係都訓唔著

沖涼, 然後開始眼訓就寫日記
佢兩個就睇戲
大食會時雷拎拎左 D DVD 出黎
每齣戲都係睇睇下 hang 左
見佢嘗試用各種唔同既 program 開戲
開始明白點解佢個電腦會無位（當然, 佢 D 相都佔左佢電腦 17 GB 中既 13 GB）
都係失敗, 食完野就訓

訓響窗隔離
硬係覺得個窗唔多穩陣
德國既窗除左可以好似香港咁打橫拉開之外
仲可以向下拉開少少用以通風
不過感覺好似會跌落黎咁
尤其係望到窗框旁的牆好似有少少解體

打橫開到盡既, 起身坐直就會「啪」一聲撞落玻璃
向下拉開少少再打橫打到盡, 就怕起身撞到窗角
只係向下拉開又唔夠通風
點解唔可以淨係拉開少少？
我都想, 但係個窗無咁仁慈
畀個裝滿水既水壺頂住隻窗都唔頂得幾耐
所以要冒被窗角撞到既機會訓覺
好彩都無中過頭獎

響德國見到幾間超市
AUDI, DM, Plus, Citybus
DM 好似萬寧 / 屈人寺咁上下, 都係買日用品為主；
Plus 賣既野平 D；
Citybus 淨係今日響 Koblenz 先見到有
所以都 AUDI 普遍 D

雷拎 iTune 內既歌多數都楊千嬅
正常, 佢偶像嘛
得兩隻張學友同王菲
佢話佢兩個既歌唔係佢既年代
佢 iTune 有呢幾隻歌原因係響 D 舊雜錦碟
如果佢知我聽緊許冠傑會點？

佢同 Konnie 同年
到底我同 Konnie 有冇代溝呢？
雷拎聽到「優客李林」個名就覺得好搞笑
既話唔知係歌名定歌手名
又覺得 D 歌舊
代溝真可怕

2310 先訓

>>July 1, 2007 at 6:16:07 PM GMT+8

2007 年 6 月 18 日 星期一 【晴】

煦景朝升，煙光畫斂，疏雨夜來新霽。
垂楊艷杏，絲軟霞輕，繡出芳郊明媚。
處處踏青斗草，人人眷紅偎翠。
奈少年、自有新愁舊恨，消遣無計。

帝裡。風光當此際。正好恁攜佳麗。
阻歸程迢遞。奈好景難留，舊歡頓棄。
早是傷春情緒，那堪困人天氣。
但贏得、獨立高原，斷魂一餉凝睇。

柳永《內家嬌》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第二十天

0014 上車
呢架 ICE 基本上係空車
好快就安頓好
由於聽過人講有人訓訓下行李失竊既故事
將行李箱同背囊綁埋一齊
再成個人痴 D 行李
應該無問題掛

Check 飛既時候無打印
多左一日用
點解夜晚會 hae 咁多呢？
不明所以

聽 iPod 至訓覺
途中~袗�, 熄 iPod 再訓
坐響度訓始終無咁舒服
0500 再醒, 趕得切落車

搵間牡坐低（24 小時開放嘛）
佢兩個食早餐
我就睇書 + 訓覺
其後佢兩個走去搵酒店
我就留響牡看行李
其時為 0615

卒之有一日唔係以「起身」作為一日既開始
尋晚同今朝都響牡渡過
分別只係尋晚坐室外又無幫襯
今日坐室內而佢兩個有幫襯
雷拎額外收到由牡既蘋果汁機附送的出咀乙個
佢一開頭以為果舊係蘋果, 仲以為杯杯蘋果汁都會有舊蘋果

又住響 Hotel International（即係同響 Muchen 果間一樣）
入到去各自梳洗, 順便叉電同過相
然後就閒坐房中
出門口就拔掉只叉了一回的相機電

0830 出發
坐 1 號巴士到 Deutsches Eck（德國之角）
其實就係坐落在河流匯合處沙洲上的一個岬角地區
名稱來源於條頓騎士團（Deutscher Ritterorden）
仲有一尊 19 世紀末誇張風格既雕像, 刻畫了騎在馬背上的威廉一世皇帝
原雕像於二戰其間被毀, 石制基座則是德國統一紀念碑
1993 年後重塑的雕像矗立在這具戰略意義的位置上

黎呢度其實唔係為左參觀呢個景點
主要目的係為左搵船搭
手持 Eurail Pass 可以有免費船坐嘛
儘管「龍祥號」上無野做既陰影持續影響著我
但係一場黎到歐洲, 點都要遊下 River Rhine（萊因河）既

由 Koblenz 逆流而上
沿河見證小鎮風光
乘坐既 Padle Steamship GOETHE 幾好
至少唔似「龍祥號」咁殘

上船精神左陣就訓
尋晚無覺好訓, 訓得唔夠
自然要襯無聊補補眠
錯過了風景？
不怕！回程仍有機會飽覽沿河風光
好彩德國既夏天響 2200 仲有太陽, 唔怕回程乜都無得睇

船至 Bacharach, 補眠完畢
窮極無聊, 唯有寫日記
艘船行左無耐就開 iPod 聽
有 D 浪費左眼前美景, 但真係好悶
好彩尋日朝早都叉左陣電, 夜晚又無邊訓邊聽
慳埋慳埋 D 電應該捱到返酒店既
不過相機就難說
舊電用左一日, 另一舊就只係叉左半小時
都唔知仲剩番幾多電, 祝我好運

上船開頭都幾凍
可能係無食野, 訓唔夠同剛沖完涼頭未乾既相互影響
著左件衞夜頂
之後曬左陣, 訓左陣就熱到除番件衞衣
和煦既陽光又變得太熱了

邊坐邊訓
隻船行到 1545 先到 Rudeshein
比原訂時間遲左半個鐘
但係回程開船時間仍然係 1615, 仲要 1600 就開始登船
得番 15 分鐘行街

返上船回程
又係訓同聽佢兩個吹水
宜家講野仲少過平時
長此下去我諗我就快連野都唔識講
之後繼續寫日記同聽 iPod
去旅行去得好似坐天星小輪過海加長版咁

仲有八日就啟程返港
日記本都就快畀我寫完
好彩老姐臨行前叫我帶多本傍身
自己又執埋之前重慶之旅未寫完果本
宜家完全唔怕

呢次旅行真係唔錯
有要我帶隊既時候（帶住班 year 1 過黎, 帶住成班人時, 帶雷拎行柏林）
有畀人帶隊既時候（太多了）；
有人地唔知我帶佢地去邊既時候（我蕩失路果陣咯）
有我唔知人地帶我去邊既時候（人地蕩失路果陣咯）；
有好多人既時候, 有三個人既時候, 有兩個人既時候, 仲有得番一個人既時候
多重體驗, 變化無窮

落船
坐日山士返 Koblenz Hbf
然後搵野食
三個人食左一碟羊仔骨 + Pizza + Cabonara 意粉
很滿足

返 hotel
佢兩個涼都唔沖
話聽朝先沖
搵左件衫, 再睇多陣相就訓
我等肚落格, 然後再沖涼訓覺
不過見佢地睇叮噹, 睇埋先沖涼同訓覺

>>July 1, 2007 at 3:41:41 PM GMT+8

2007 年 6 月 17 日 星期日 【晴】

夢覺、透窗風一線，寒燈吹息。
那堪酒醒，又聞空階，夜雨頻滴。
嗟因循、久作天涯客。
負佳人、幾許盟言，便忍把、從前歡會，陡頓翻成憂戚。
愁極。
再三追思，洞庭深處，幾度飲散歌闌，香暖鴛鴦被，豈暫時疏散，費伊心力。

殢雲尤雨，有萬般千種，相憐相惜。
恰到如今，天長漏永，無端自家疏隔。
知何時、卻擁秦雲態，願低幃暱枕，輕輕細說與，江鄉夜夜，數寒更思憶。

柳永《浪淘沙》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十九天

0730 起身
晏過平時
不過佢兩個響我梳洗換衫後都依然未肯醒
睇黎佢地尋日都相當疲累了
真係辛苦晒佢地, 我先有得訓得咁安穩

檢查行李乾左幾多
響乾燥既歐洲, 好多野響一晚之內已經乾透
行李箱已經完全乾晒
但係入面既野有 D 仲濕濕地
而鞋仲差內櫳少少未乾透
希望出發前會乾得切啦

雷拎 0810 就醒
Yuki 再遲 10 分鐘先起身
執野, 食早餐
拎左個啤梨走
返房收拾左陣就搬行李落樓下
職員好好人地畀我地將行李放響無乜人用既電話房內

開始行程
其實我地尋晚已經基本行晒由 Hbf 至 hotel 呢段路既 Freiburg（縱向）
今日行既係橫向既 Freiburg
先去 tourism information 拎地圖同埋問人有關蕭士蘭峰既資料

問完就出發上山
坐 2 號電車過 DorfStrasst
轉 21 號巴士去 Schauinsland-bahn-Talstation
畀錢買票坐纜車
坐坐下突然講昂坪 360 跌左架車事件
好彩無響呢度重演

上山跟人行
行行下就自己慢慢摸
行到去相信係最高既地方
上面有棟木 + 鐵搭既建築物
兩者同樣可以令人清晰地直望地面
愈高愈大風
行行下忍唔住要著番件長袖衞衣
好驚吹走一兩件野落街

順利行到頂層
三角形既平台設計得幾特別
三面均有圖示示意遠處的景物是什麼地方
很周到
可惜三角平台的空間有限, 以及陽光方向問題
難以每邊都係自拍成功
好彩今次又係得遊客出手相助

行返地面, 風少了
除下衞衣繼續跟陽光搏鬥
走去兒童遊樂場食午餐──消化餅
成功消滅了第一條消化餅
繼續努力減少負重

食完行多陣就坐纜車落山
響山腳等坐巴士返市區其間佢兩個走左去遊樂場玩
玩到其他小朋友「吼」住佢地遊到不亦樂乎既大籃狀鞦韆就走

返回市區, 開始四圍 hae 行
響唔同方向直走
走到盡頭就轉彎
仲走入大型百貨公司
見到一大堆彈彈波
之前見到 €0.5, €1 既無買畀陳倫
最後居然揀左個 €1.5 既畀佢=.=

1830 行到去一個公園
搵張陰涼 D 無太陽曬既長櫈坐低, 然後訓覺
訓左半個鐘起身
發現隔離張長櫈有兩個訓直左既人
好似兩具被遺棄既屍體咁, 嚇親
嚇完就食消化餅 + 睇「寂寞的行星」解悶

1920 全部人起晒身就行
走去呢個公園既遊樂場
佢兩個去玩, 行李由我看管
其實我無乜所謂
但係附近實在有太多不明飛行物體了
加上佢地愈行愈遠, 我有乜野急事都行唔開......

等到佢地返黎就離開
返酒店拎行李走
行去坐 1 號電車過 Hbf
響牡門外既檯坐低無所事事
於是寫日記
今晚將會上 0014 火車去 Koblenz
響火車上訓, 有點擔心會唔見野

寫完日記只係 2245
希望今朝差左陣電既 iPod 能夠支持得住啦
尋晚借畀雷拎叉佢部 iPod mini
我果部都係由我起身叉到出門口為止

>>July 1, 2007 at 10:06:48 AM GMT+8

2007 年 6 月 16 日 星期六 【晴】

屆征途，攜書劍，迢迢匹馬東去。
慘離懷，嗟少年易分難聚。
佳人方恁繾綣，便忍分鴛侶。
當媚景，算密意幽歡，盡成輕負。

此際寸腸萬緒。慘愁顏、斷魂無語。
和淚眼、片時幾番回顧。
傷心脈脈誰訴。但黯然凝佇。
暮煙寒雨。望秦樓何處。

柳永《鵲橋仙》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十八天

起身, 早過佢兩個
梳洗過後食早餐
尋日都係每人夾帶兩個麵包做午餐
今日每人四個, 狼死
佢地仲要又芝士又火腿又果醬又蛋咁夾
我無咁過份, 齋火腿夾包就好滿足了

食完上房執野出發
去 Muchen Hbf check 幾時有車同響邊個月台上車
之後坐響「漢堡大王」室外看行李
佢兩個就周圍行
過左陣就返黎拎行李出發

響 27 號月台上 ICE
等到 0951 先開車
本來我 + 背囊 + 雷拎個行李箱坐晒四人位
後來有三個十幾歲既小朋友（個子不小, 高我好多）想坐
其實其他車廂都有好多位
不過一個人 + 行李霸四人位實在幾無品
所以讓畀佢地坐
同隔離既佢地兩個一齊坐, 三個人 + 一堆行李佔用四人位
迫係迫 D, 但係無咁無品

寫完日記就睇書
望到 Yuki 雙腳連襪放響我個行李箱
頗感不舒服
大佬, 就算我唔介意, 你都問聲呀
何況我介意

1041 響 Buchloe 轉車
1044 另一架車就開出
好彩響隔鄰月台, 唔使行上行落
無咁狼狽
安頓好又睇書

卒之到左 Fussen
落車第一樣野唔係搵 Hostel, 而係搵 locker
但係又黎一樣不幸既野：D locker 畀人用晒！！
點算？？
搵其他酒店, 希望暫時託管, 就算肯畀錢都不幸被拒
走去搵 tourism information, 人地又無開門
由於今晚仲要趕去 Freiburg, 有點徬徨

好彩行去對面有間亞洲食店（有土地公, 應該係中國人開既）
老闆好好人地畀我地將行李暫時放響樓梯\
不過要 1700 之前返黎拎
無所謂, 搵到地方安置行李已經好好架啦

返車站搵幾點有火車到 Freiburg
以及睇下點樣去新舊天鵝堡
火車要 1605 出發的話, 至少要 2206 先到 Freiburg
問到內地同胞, 佢地指點我地上乜車
「寂寞的行星」都無咁好用

上車, 上山, 去到票務處就停
由於時間關係, 再加原定行程安排
無買票, 只係各搵外圍映一兩幅相就走

先去舊天鵝堡, 外牆做緊維修
一半被掩蓋了, 可惜
響度撞到 Faith 拖著佢個「朋友」
不過佢扮睇我唔到就行左去

大部份有我既相都係自拍（廢事勞煩佢兩個嘛）
有個位自拍極都係失敗
有個遊客自告奮勇話幫我映
當真感激

自 Yuki 黎左之後, 我都無乜點出聲
可能話不投機掛
同埋佢兩個講既野都離唔開水球 / exchange 既人同事
難以置喙
唯有沉默是金
都係搵古巨基解下悶

行完舊就行新
搵車坐
巴士要每人 €2.6, 包來回
等到第二架巴士先上到, 可見參觀人數眾多
沿途風景被森林掩蓋
不過無樹既又會好曬
一切都要負出代價

巴士停低都仲要行一陣先到新堡
映唔到新堡全貌
映下四周風景
映完行精品部
搵 D 明信片映低佢
權當遊完新天鵝堡

行完就返去搭車
落山後又等巴士返 Fussen
返到去就等火車（不過要拎左行李先）
好似今日既目的係等車同轉車咁

1605 有兩個途經去 Freiburg
一個係轉三次車, 但係快 6 分鐘
另一個係轉兩次車
不過一開頭都要坐同一架車
只係轉車既車站同火車都唔同
最後決定轉車少 D 會舒服 D

上車, 睇左陣書就頂唔順訓著
訓到有人想坐我對面（我攤響度訓, 雙腳響對面座位下面）我先醒
之後再訓多陣, 訓到太陽曬正我就無心機訓
寫日記, 然後繼續睇書

響 Augsburg Hbf 轉車
由於火車好快就開出, 好「貧能」下
上左架 ICE 又四出搵位
雷拎個行李箱太大舊, 拖得好辛苦
就算沿途無障礙物都好唔方便
加上狹窄既通道（拖埋行李箱而言, 否則都算幾闊落）
以及企響走廊既人, 放滿行李箱既走廊, 簡直係惡夢

佢地話留我響卡上等
佢兩個搵到位就返黎叫我過去
呢個方法相當好, 問題係逗留既地點唔太適合
佢叫我留響果卡係「煙格」
食煙都食飽, 個肺積晒煙, 遲 D 呼氣都有煙噴出黎

卒之有容身之處
雷拎坐響人地 reserve 左既位, 前途未卜
佢將我個行李箱放響人地 reserve 左既位, 同樣前途未卜
最後雷拎畀人趕, 尤幸坐隔離既先生有空位安置佢
至於我個行李箱, 就同佢個行李箱一齊放響卡尾通道上

響 Manachein Hbf 轉車
行去原定既 8 號月台
突然有廣播話轉去 3 號月台
拖著行李過左去, 又聽到德文廣播
今次電子板又停埋
都唔知發生乜事
唔通要訓月台？

最後都有車到
至於使唔使訓街, 仲要視乎一陣搵唔搵到地方收留我地

響仲有 35 分鐘先落車既時候, 我已經無所事事
睇完《中世紀的旅行》
「寂寞的行星」無我咁寂寞, 同樣畀我刨埋
《波蘭簡史》畀我收左入行李箱, 懶得響火車拎出黎
iPod 僅有既遊戲都畀我玩晒
甚至連抹埋塵都只係過左五分鐘
無聊死我了
宜家既時間就用黎聽 iPod 同寫日記
iPod 無乜電, 所以連機都唔敢打
唉......

之前火車位置不多
有個空位響堆放行李既隔離
將兩個行李箱放響度, 自己留響空位看管
等佢兩個可以搵 D 孖位坐
響前一個站見到窗外有雨
今次真係屋漏兼逢連夜雨了......

架車 delay 左 10 分鐘先到站
所以我地到 Freiburg 既時間仲有三十分鐘
2200 佢地就返黎
原來佢地以為架車會照原來時間到站

落車, 好大雨
仲要無地方住
響火毋站附近既一間酒店問
價錢唔太得（其實應該話個價錢太得, 所以我地唔得）
職員畀左幾間酒店既方位（連地圖）我地按圖索驥, 感激

冒雨繼續搵
搵完一間又一間
由頭到腳連行李都濕晒
最後行到一間叫 Gastronomic G..m.b.H 既 hotel-resturant
經佢兩個講價後一晚 €100 三個人
但係張單就寫 €115, 奇怪

拖著行李行四層樓上樓頂
又疲累又濕
不過有回報
呢間係一間有五張床既家庭套房
設備幾齊全
除左有個斜既屋頂, 以及浴室無得鎖門之外都好好
點解斜既屋頂係一個問題？
因為起身既時候會撞到個頭

梳洗過後檢查行李濕得嚴唔嚴重
行李箱面好濕, 但係入面就無乜點濕
要拎番香港 Claim 錢既單就濕左 D, 唔知會唔會 claim 唔到添！
至於背囊, 除左表面之外一切安好
書就因為響等候其間轉移左去安全地方
所以都無問題, 好乾
呵呵

晚上無食飯
肚餓就咬幾塊消化餅
晚上雷拎開叮噹睇, 都唔錯架
睇左一集叮噹就訓
其時已經係 0030 了

>>July 1, 2007 at 7:51:51 AM GMT+8