2004 年 3 月 17 日 星期三 【晴】

今日去左 Betty 屋企
有禤 , 昆 , Rocky , 大佬 & 玲
超好玩

首先o係 Betty 屋企樓下見到兩大神醫
「西醫梅乃彬」 & 「彬乃梅醫西」

上到加埋 Betty 家姐o岩o岩好 8 個人
開左一檯麻雀同撲克牌

初頭鋤大 D 手風不錯
不過 Betty 收埋左隻大 D

之後去打麻雀 , 一直都輸 . . . . . .

最後一齊玩大富翁
我有好多地同錢
不過都係輸比大佬

玩到 7 點就走了
我同阿禤去左長發同左輪 , 占士打波
條褲都爆了呔

打到 10 點幾先走

今日好玩 ~ *

>>March 22, 2004 at 2:52:54 PM GMT+8

2004 年 3 月 16 日 星期二 【晴】

差唔多 2 個星期冇寫日記了

最近好努力咁溫書 , 因為要考試

今日考英文 Usage 同 Listening
本來o係 SAC 考 , 但係個風扇制著火焚燒
結果我地全班去左 5 樓考
超搞笑 . . . .

到宜家考淨電腦 , 而其他科成績超差
好驚要留班 . . .

有少少不知所措
但係呢個成績已經幾乎係我o既全部
都盡左力了 . . . .

唔開心o既野唔講咁多
宜家為大家送上黑馬王子狂想曲 (7) ~*
寫果陣心情好亂

寫o既亦係內心感受
毫無劇情可言

還請識貨之人用心去欣賞 . . . . .
( 鼓掌 )


黑馬王子狂想曲 (7) ~*

我小心翼翼打開飯盒 , 今日的午餐是洋蔥豬扒飯
我最喜歡吃豬扒 , 但最不喜歡就是吃洋蔥
真是叫人又愛又恨
但是媽媽千叮萬囑叫我不要浪費食物
所以我硬著頭皮都要吃掉那些洋蔥
經過千辛萬苦 , 我才把洋蔥和飯吃完
唯獨剩下那塊豬扒好讓我慢慢享受

可是 , 隔離的大強來如風 , 去如風 , 將我的豬扒夾走
毫不留情一口一口咬下去

「大強 , 這塊豬扒是我的 . . . . 」

「甚麼 ? 我見你一直都不吃這塊豬扒 , 我還以為你不喜歡吃豬扒 , 所以我好心幫你處理掉 . . . 」

「這是我故意留在最後才吃 . . . . 」

「男人大丈夫 , 做事這般婆媽 . . . 算了 , 就當我怕了你 , 我所有洋蔥都給你吧 , 我見你剛才不斷吃洋蔥 , 你一定很愛吃吧」

大強把他所有的洋蔥撥過來 , 但我並不想要洋蔥
我要的是那一塊豬扒
是那一塊豬扒 . . . .

. . . . .

我睜開眼 , 是凌晨三時正
又是這一個夢 , 連續幾天都是發這個夢

這個夢想告訴我甚麼呢 ?

也許要告訴我不要痴心妄想 . . .

從小開始 , 我喜歡的東西總是得不到
由恐龍戰隊合體機械人開始
無論是高達也好 , 數碼暴龍也好
抑或激鬥戰車 , 阿童木小飛俠鎖匙扣
到現在的 2R 簽名海報 , 我一樣都得不到

跟這個夢一樣 . . .

這樣的命運 , 我幾乎已經習慣了
每當我喜歡上一樣東西 , 我都會多看幾眼
但係亦只能夠多看幾眼
因為我知道我唔會得到它

或者阿琪也一樣 . . .
我喜歡她 , 但我註定不是她的白馬王子

她就似公主一般高貴 , 雙眼閃閃生光 , 太光了 . . .
有時根本不能直視她 , 我只能悄悄的在她背後偷看她

我可以單純的在你身邊暗戀你嗎 ?

我只想在你的故事之中做最佳的男配角

我們都維繫著過去 , 延續著將來
故事每一分每一秒都在發展
每個人都在這個世界上的大舞台扮演著不同角色
所以我相信每個人在世上都有自己的戲份
有些人戲份是要建立豐功偉績 , 有些人戲份可能就只是簡簡單單做好一件事
每個角色就是按著已經定下的劇情去演這一場戲

好不容易 , 我的故事扣著了你故事
扣不緊 , 亦鬆不開

我閉起雙眼 . . .

阿琪 . . .
也許我的戲份就是守護你
把幸福帶給你

那就好了 . . . .


黑馬王子放下了佩劍
騎著馬追尋那坐遙遠的城堡
卻一直找不著
在四面無人的草原踱步 . . . . . .

>>March 17, 2004 at 7:17:26 PM GMT+8

2004 年 3 月 6 日 星期六 【晴】

當黑馬王子邂逅 2 R <----- 是真的

今日夜晚同暉暉 , 聰聰 , 麥狗 , 美作及羅仔去左尖沙咀文化中心睇
「2003 - 2004 撲滅罪行人生顯光輝青少年歌唱大賽總決賽」
因為家俊有份比賽 , 佢請哂我地去睇
我地都好奇怪家俊竟然同撲滅罪行址上關係

佢地一早去左尖咀 , 而我就遲 d 去
不過我o係小熊國鬧出了一件笑料 . . . .

入場之後好多嘉賓致辭
又有風笛隊演奏同跳舞
好耐先正式開始
司儀係安德尊 . . . .
首先係少年組 , 其實好多個都唱得幾好

之後係青少組 , 個個都好有個人風格
有個蒙古王子唱山歌
第十組先到家俊
佢同另一個人合唱「認錯」
「 I Don't Believe It . . . . 」
唱得真係唔錯 , 有 d 估唔到

完左青年組第一圈 , 有表演嘉賓 ----> 2R
我咁大個仔第一次咁接近 2R
我同佢地只係僅僅相隔十幾米
唔 . . . 果然真人靚個上鏡
因為有班 2R fans 坐我地後面
佢地不停咁叫 , 2R 亦成日留意住我呢邊
我乘機向 2R 揮手
點知 Race 真係同我揮返手
種感覺實在太奇妙了
我同佢眼神交流o既一刻 , 我感覺到 2R 已經將我緊緊抱住
簡直就是完美的邂逅
冇錯 , 我知道 , 我已經知道宇宙形成o既一刻就等緊一樣野
就係等緊公元 2003 年 3 月 7 日 2R 同我o既眼神接觸
我同 2R 在無盡的意識中永遠也扣在一起
我實在好難去用筆描寫 2R 對住我o既笑容

2R 總共為我唱左三首歌就走了 . . . .

之後到青年組第二圈 , 要清唱
不過家俊果隊都 ok ~

o係評判計分果陣又有另一個表演嘉賓 -----> Deep 吳浩康
佢唱歌果陣都有望過黎 , 仲有同麥狗揮手
我諗麥狗同吳浩康在無盡的意識中正在接吻 . . . .

終於到頒獎時刻了 , 原來有好多人都支持家俊
哈 ~ 結果佢地終於拎左「2003 - 2004 撲滅罪行人生顯光輝青少年歌唱大賽總決賽青年組冠軍」
有點兒難以置信
家俊從此就做左滅罪大使了 . . . . 簡直奇境

今日真係太美妙了
我相信我終有一日會再遇 2R ~*

>>March 7, 2004 at 5:25:46 PM GMT+8

2004 年 3 月 5 日 星期五 【晴】

好耐冇寫日記了
最近還可以啦

首先學業方面仍然一潭死水
除左中化同電腦 , 其他亳無起色
p.maths 有次小測食蛋
有一次 8 / 36
最近果次 7 / 36
頂 ~
phy 都唔好得好多
有時打開 d notes , 根本唔知係咩黎

至於學生會方面最近多左野做
上幾個星期有足球比賽
超好睇 , 算係幾成功
之後再有社際球賽
我發覺我最近上台講野 , 台下都有人笑
唉 . . . 把聲唔好聽冇罪掛
做學生會又冇錢收 , 有時都唔知做黎為乜 . . .

身體方面 . . .
心煩 , 失眠 , 流汗等等都係更年期o既跡象
吾老矣 . . .
最近隻右眼又唔知做乜野
成日紅晒又流眼水

情感方面還可以啦
略有點煩燥
o係心入面最深處仍然有一點兒空虛 . . .

另外 , 星期五係 F. 5 最後一天
佢地周圍影相 , 同我地上年一樣
希望佢地會考 ok 啦

琴晚去左文娛打波
好耐冇去了 . . . .

無疑 , 文娛是屬於我的
我不知不覺 --> 愛上文娛
無論呢個世界點樣變 , 人點變 , 文娛始終都冇變
果個穿針會出煙o既網 , 果間賣唔凍o既冰爽茶字典o既士多
果間 $3 一鋪機械人大戰o既機鋪 , 果個頭髮蓬鬆o既鄭中基
所有都冇變
我傷痕累累的文娛 . . .
依舊靜靜地等住我去將籃球放入佢心懷之中

同一班戰友打波
這就是我的心願

>>March 6, 2004 at 5:40:51 PM GMT+8

2004 年 2 月 29 日 星期日 【晴】

第六集
本節目含有暴力鏡頭
請家長陪同子女收看


黑馬王子狂想曲 (6) ~*

今日如常咁返學
琴晚聽完阿琪講有關佢 d 野 , 我個心有 d 唔舒服
唔知阿琪會唔會同光仔講清楚

我第一個小息如常去二樓廁所屙尿
一入到去 , 有一個人已經企左o係度 ---- 光仔 ! ! ! !
佢露出兇猛無比o既眼神
我感覺到來者不善 , 而廁所入面 d 人見到大戰一觸即發即刻走晒
佢一見到我就一手將我推埋牆 , 一個右直拳打落我左邊面
「我知係你講架 ! 你咁算咩意思 ! ? 」

我差 d 成個人跌落地下 , 我諗阿琪已經同佢講清楚
希望阿琪咁樣揀係冇錯啦
「我只係為阿琪好 . . . 」

佢今次一個左勾拳打中我右邊面
「你想討好阿琪我一早知啦 , 洗唔洗用 d 咁卑鄙o既手段呀 ! 」

佢一講呢句 , 我真係忍唔住喇 , 我洗出一招「嫦娥奔月」 , 一腳踢中佢個肚
「我都唔夠你卑鄙啦 , 你乘人之危 , 你以為阿琪同你一齊好開心咩 ! ? 佢話一 d 都唔鍾意你呀 !」

我估唔到一向軟弱o既我竟然變得咁堅強 . . .
不過光仔絕非等閒之輩 , 一招「飛龍在天」由下至上由左至右打中我下巴
「呢 d 野唔關你事 , 總知佢同我一齊就得啦 , 你理咁多做乜野 ! ? 」

可惡 . . . 我知道 . . . 我知道我點解要理佢地o既事 . . . 因為 . . .
「因為我鍾意阿琪 , 我唔會比阿琪受傷害 , 或者見到佢唔開心 , 呢種心情你又點會明呀 ? 」
我用我全身僅餘o既 25 點 HP 洗出「黑虎偷心」 . . . .

可惜光仔黎一個心口控定 , 半車身窩利倒掛大力解圍 , 我隻手就報銷了 . . .
「我唔理你鍾唔鍾意 , 總知阿琪係我o既 , 你想同我爭就過黎打過 , 來吧 ! 」

我已經身受重傷 . . . 只能夠執返個尾彩
「你呢 d 人連咩叫愛都唔識 , 根本就唔配同阿琪一齊」

之後光仔面色都變埋 , 正想洗出一招「勾魂奪命鎖」
冇錯 , 就係「泡妞大法」第一百二十六式「勾魂奪命鎖 , 打完情敵笑呵呵」
我心知不妙 . . . 估唔到我o既生命咁快就要畫上句號 . . .

就係呢個時候 , 有人踢門衝入黎 , 係 kai 豪哥呀 ~
佢仲帶埋領袖生長「龍咁威」黎埋
龍咁威大叫「停手」
光仔被龍咁威o既威勢震懾住亦都收手喇

我知道我有救了 . . .
Kai 豪哥大叫「男左女右 , 雙手放頭 , 熄匙車牌身份證」
亦慢慢扶起我
龍咁威推左光仔埋牆
「你涉嫌同一宗傷人案有關 , 我宜家正式拘捕你」
龍咁威就咁帶左光仔去見針 sir

我兩邊面同下巴都比光仔打腫左 . . .
kai 豪哥見到笑到扒地
不過佢了解件事之後就話光仔已經再冇勝算
淨返果個二世祖同埋猛虎
仲話我機會大左好多
唔 . . . 望就咁望啦

之後上兩堂中化堂
Miss 話要竭止學園暴力
唔 . . . 講得好o岩
話咁快就到左第二個小息
我一出班房又有一個人等緊我 , 不過佢唔係光仔 . . . 係阿琪呀 !

佢一見到我就問我
「你有冇事呀 ? 有人同我講你同光仔o係廁所打架呀」

我見到阿琪 , HP 回復 100 %
「哦 . . . 小意思啦 , 係呢 , 點解你會肯下定決心拒絕光仔o既 ? 」

佢又笑了 , 不過今次笑得好燦爛 , 唔同以前
「因為琴晚我返到去 , 爸爸話公司賺到錢 , 已經還清 d 債務了 . . . 所以我亦都下定決心拒絕光仔 , 講起黎 , 我應該好多謝你呢 . . . 」

我感覺到我同阿琪距離越來越近
我越來越幸福 . . .

>>March 1, 2004 at 3:46:52 PM GMT+8

2004 年 2 月 27 日 星期五 【晴】

第五集
有美作o既回應
我動力大增


黑馬王子狂想曲 (5) ~*

今日又有去 F.4 果陣上堂
所以我又有機會見到阿琪
不過好可惜 , 雖然我見到阿琪 , 但係果個光仔一直o係佢身邊
唔通佢地先係真正王子同公主 , 而我只係白雪公主身邊o既小矮人 ?

放左學之後係垃圾創作比賽 , 我做評判 , 阿琪叫到冇辦法
而司儀就係 . . . 阿琪同光仔
頂 ~ 果個光仔男人老狗去參加美術學會
睇見咁樣又冇乜心情了 . . .

做評判超悶 , 有陣時想望下阿琪 , 光仔總會o係佢隔離 , 有講有笑
我個心好難受 . . . 這就是暗戀的滋味
就好似食橙咁 , 入口甜甜地 , 食落酸酸地 , 但係又好想食
唔 . . . 不過我諗我個橙已經不多了

個垃圾創作比賽好快完左 , 我都係時候走喇 , 以免眼冤 . . .
可惜 , 我太仁慈了 , 眼見阿琪一個弱質纖纖的小女子去搬野 , 我實在於心不忍
我立即趁光仔走開果陣一個飛身走埋去 . . .

「阿琪 , 我幫你手啦」我完全表現出我o既風度

「哦 . . 好呀 , 今日真係唔該晒你呀」阿琪笑住咁講

「唔洗客氣啦 , 呢 d 係男子漢o既本份」

「哈 . . . 你真係好人」

我回應左一個梨渦淺笑 , 然後我鼓起勇氣 , 終於開口問佢
「你同果個光仔關係好好架 ?」

「你指頭先果個男仔 ? 做乜咁問o既 ? 」

「我多口問下o者」你快 d 答我啦 , 我想知呀 . . .

「我一 d 都唔鍾意果個光仔 , 仲覺得佢乞人憎」阿琪果樣變得好認真

「咁點解佢成日o係你身邊出現o既 ? 我仲以為你地係咩 tim . . . 」

「哈哈 . . . 如果你同佢比較 , 我鍾意你多 d 呢」

「下 . . . 係咪真架 . . . 」

我諗我面都紅晒了 , 估唔到佢會咁講 , 咁即係話我仲有機會不過我依然有 d 唔明白 , 既然佢覺得光仔乞人憎 , 咁點解佢亦都好似冇乜抗拒過光仔呢 ?

「你係咪想問點解我仲成日同光仔一齊呢 ? 」阿琪大概知道我諗緊乜

「係囉 , 點解呢 ? 」

「不如我地換個地方講啦 . . . 」

之後阿琪同我搬 d 野入美術室 , 入面只係得佢同我 . . .
佢個眼神變得有少少委屈

「我爸爸係一間細公司副主席 , 不過之前資金週轉不靈 , 就向財務公司借左 d 錢 , 而光仔爸爸就係果間財務公司o既經理 , 原本我爸爸就冇錢還架 , 不過光仔就同佢爸爸講話寬限多一陣 , 所以我爸爸間公司先可以捱到宜家 . . . 」

哦 . . . 我明白了
「咁光仔就係因為咁迫你同佢交往嗎 ? 」

「又唔算迫o既 , 不過我怕如果我唔理佢 , 佢就會叫佢爸爸追返 d 欠款 , 到時我爸爸間公司就要倒閉了 . . . 本來我好多謝佢幫左我 , 但係佢之前叫我做佢女朋友 , 因為我對佢一 d 感覺都冇 , 所以我唔應承 , 咁佢即刻暗示話要追返 d 欠款 , 所以我唯有話考慮下先 , 而佢就成日都煩住我 . . . 」

我估唔到光仔係 d 咁o既人 . . .
「咁你諗住點同佢講呀 ? 」

「我宜家諗緊係咪拒絕佢 , 你覺得我應該點做呀 ? 」

嘩 ~ 佢咁樣問 , 我緊係話拒絕佢好 d 啦
「如果你同佢一齊唔開心 , 咁就唔好同佢一齊喇 . . . 至於你爸爸果方面 , 或者你等陣一返到屋企 , 佢就會話有錢還呢 . . . 」

或者我講得太勉強了 . . .

阿琪點一點頭
「係就好喇 . . . 」

我唔知有咩可以幫阿琪
但係我好想佢開心

d 野執完都差唔多天黑了 . . .
「夜了 . . . 不如一齊走啦」
我好想成日都o係阿琪身邊

「嗯 . . . 咁行啦」
好彩佢冇拒絕

我陪同行到去車站 , 一路上都見唔到光仔
之後一架 407 駛到

「你有車喇 , 再見」
我同佢揮手道別 , 其實我好唔捨得

「今日同你傾完計 , 我好開心呀 . . . 」阿琪細細聲同我講

佢上左車 , 望住我揮手 . . . . .

我是王子 . . . 我是王子 . . .
我是黑馬王子

我開始有王子的感覺了

>>February 28, 2004 at 12:35:16 PM GMT+8

2004 年 2 月 20 日 星期五 【晴】

第四集
最近好忙 , 冇乜時間寫
而且寫得有 d 亂


黑馬王子狂想曲 (4) ~ *

話咁快又過左一個星期
o係呢一個星期入面佢冇再搵我 , 我冇刻意去搵佢
不過有陣時經過佢果層 , 我都會偷偷望下佢
感覺已經好幸福了 . . .

今日又再去果層上堂
幸福就係咁簡單

kai 豪哥見我被美色所迷 , 不能自拔
佢走過黎同我講
「我有 d 野同你講 , 你唔好介意 , 我之前幫你打聽過 ,
其實你心入面個公主其實有大把人追 , 你再係咁按兵不動唔係辦法 ,
你要知道你o既對手好利害 . . . . 中五有個圍棋王光仔 , 實力僅僅o係我之下 ,
有傳聞話佢有齊<<泡妞大法>>全套十二冊 」
聽到呢到 , 我呼吸加速

「唔止咁呀 , 隔離班有個有錢二世祖 , 18 歲都唔夠就有車有樓 ,
仲有兩間上市公司 , 日日 lunch 都去食鮑魚 ,
佢一直展開攻勢 , 但係尚未成功」
kai 豪哥o既眼神好有壓迫感
我手心開始出汗

kai 豪哥之後叫我睇下個手球場 , 又指住一個大隻佬
「呢個就係手球隊o既猛虎 , 身高 1.8 米 , 柔道黑帶 , 空手道九段」
我跟住聽到果個猛虎咆哮 , 然後射左球波
「砰」一聲 . . . 波都爆埋
四周圍 d 人都一齊歡呼
我尿都差 d 標埋

「仲有好多男仔都係佢裙下之臣 , 你尖嘴猴腮 , 有點兒癩蛤蟆想食天鵝肉」

原來 . . . 原來佢根本就係白雪公主
身邊有好多真正白馬王子等緊佢
而我就係一個假王子
o係佢故事之中路過

又或者我只係佢身邊o既小矮人
會o係佢有需要果陣幫佢
以及陪佢等佢o既白馬王子出現
然後衷心祝福佢地

「咁又唔洗咁灰 . . . 我有辦法」
kai 豪哥用佢去完廁所仲未洗o既手搭住我膊頭
「你樣又冇 , 腦又冇 , 雖然你唔係白馬王子 , 不過你係黑馬王子 , 唯一可以做到o既野就係大膽出擊 , 隨時爆冷鸁得美人歸」

不過講就易o者 , 要我做我又唔多敢
但係唔試就唔會成功 , 而失敗左又唔會蝕底
o係第 1 集有題到我唔係白馬王子都要爭取我o既幸福
所以我決定放學等佢 , 問佢有關垃圾創作比賽 d 野
其實係接近佢

我放學o係門口等佢 , 放學o既人潮散了變得冷清
守得雲開見月明 , 我終於見到阿琪了
佢o係樓梯行落黎 , 我心跳加速
但係 . . . 佢隔離有一個男仔同佢一齊行
呢個大概係叫光仔果個
kai 豪哥說得不錯 , 佢的確好受歡迎

佢都見到我 , 仲先同我打招呼

「王子同學 , 你好」

「你好」

「聽日係垃圾創作比賽 , 你要記住準時到呀」

「OK」

「咁我走喇 , 拜拜 ~」

「再見」

我乜心情冇晒 , 個表情一定好怪

佢地兩個遠遠離開 , 我即刻冇哂心機
天都黑了 , 我一步一步慢慢走
回味第一次遇見佢o既滋味

深藍色o既天空閃過一條白線 . . . 係流星嗎 ?
聽說見到流星許願會好靈
我閉起雙眼 , 心入面許願
「我希望阿琪做我女朋友」
我可以嗎 ? 阿琪會願意嗎 ?
「不 . . . 我希望可以對阿琪好我就得喇 . . . 」

>>February 21, 2004 at 4:03:48 AM GMT+8

2004 年 2 月 13 日 星期五 【晴】

今日係情人節
祝大家情人節快樂

今朝 11 點起身
去左睇手球乙組打決賽
對手又係石天 . . .
真係不是冤家不聚頭
結果又係輸左

不過今日收到 2 粒朱古力
好開心

夜晚本來同小學同學打邊爐
但係取消左
咁結果同 kai 豪佢地去左長發打邊爐
上次有 5 E o既同學
今次係以前 B 班果 d

kai 豪叫左個麻辣湯底
食到鼻涕都標埋

我同 k 樂又玩汽水
超好笑

食左好多好多野
差 d 脹爆肚皮 . . .

>>February 15, 2004 at 4:26:22 PM GMT+8

2004 年 2 月 12 日 星期四 【晴】

第三集了
劇情好慢 , 冇乜進展
Kai 豪哥比 d 靈感我啦


黑馬王子狂想曲 (3) ~ *


我小心翼翼拿起聽筒 , 一個一個號碼按下去

「喂 . . . 我 . . . 我想搵阿琪」

「係 , 小女子正是 , 王子殿下你好」
我又聽到佢把聲了 , 我個心卜卜咁跳

「你今日問過我做唔做評判 , 我雖然最近冇乜時間 , 但係我都應承你啦」
我扮晒為難咁 , 其實心入面好願意

「噢 . . . 你太好人了 , 真係唔知點多謝你好」
哈 . . . 哈 . . . 你以身相許啦

「舉手之勞o者」

「嗯 . . . 我宜家有 d 野做 , 唔傾住 , 不如 d 詳情我聽日講過你知啦 ,
你 . . . 聽日 lunch 有冇時間呀 ?」
佢唔通想約我食飯 ?

「有 ! 多多都有 !」

「咁我聽日 lunch 來搵你啦 , 你唔好走左去呀 !」
哈 . . . 我緊係打死都唔走啦

「好 . . . 」
我願意 . . . .

「咁聽日見啦 , 拜拜 ~」

「拜拜」

咯一聲 , 阿琪就收線了
螢幕上顯示了 1 : 12 , 1 分鐘 12 秒

我夜晚鑽研左<<泡妞大法>>好耐先訓
迎接聽日的來臨


天光了
今日係 2 月 13 日 , 星期五
情人節前一天 , 我除左等待與公主的約會 , 仲希望朱古力有零的突破

Kai 豪哥今日春光滿面 , 手上面又拎住大量朱古力
多到要去 Locker 放低先
點知一去到就發現佢 Locker 個鎖爛左 , 而且櫃門有扭曲跡象

我即刻問佢
「係咪有人偷野呀 ?」

「我都唔知 . . . 」
Kai 豪哥立即打開 Locker

嘩 . . .
有好多朱古力湧出黎
仲塞滿晒個 Locker
果然好受歡迎

同我相比 , 結果係 65 比 0
我仲未開齋 . . .

話咁快就到 Lunch 了
阿琪果然準時出現
佢好遠就揮手同我打招呼

「你等左好耐嗎 ?」

「都唔係好耐o者 , 今日我地去食麥當勞 , 好冇 ?」

「哦 . . . 好呀 . . . 點解o既 ? 」

「你去到咪知囉 . . . 」

咪住 , 有可疑 . . .
佢咁隨便就同我食飯 , 咁著數 ?
仲要去食麥當勞 , 有古怪
不過我始終受唔住佢o既引誘 , 跟住佢走了

直到去到麥當勞 , o係時候要佢講真說話了
咁就唯有使出「泡妞大法」 , 看招

<<泡妞大法第一式 -- 風度翩翩 , 打成一片>>
與異性去食飯 , 應該先拉開椅子 , 讓對方先坐

我行去佢張椅子o既旁邊 , 諗住拉開 , 點知好似唔夠力 , 我全力再拉 . . .

阿琪見到我咁有風度 , 成個呆左
「你做咩呀 , 張椅固定左 , 拉唔郁架 . . . 」

下 . . . 又唔早講 , 泡妞大法第一式 , 失敗 . . . .
「哦 , 我其實想睇下張椅用o既係咪環保質料o者」

「咁個結果係點呀 ?」

「我諗大概係聚本乙稀 , 唔多環保喎 , 唔 . . . 我睇完喇 , 你坐啦」

第一式失敗唔緊要 , 陸續有來

<<泡妞大法第二式 -- 用詞高雅 , 迷死阿 sa>>
言談要有禮 , 用詞要華麗 , 令對方覺得自己談吐大方

我深呼吸一口氣
「噢 , 今天的天氣晴之中有點陰 , 令我聯想起雙層芝士漢堡 , 你呢 ? 你想吃甚麼 ?」

「我不吃了」
咩話 , 我用詞咁感性你都唔感動 . . . 失敗

不過仲有一式

<<泡妞大法第三式 -- 做人成熟 , 最忌木獨>>
與異性約會 , 要保持成熟 , 飲野果陣最好飲熱咖啡 , 唔好飲果汁 , 汽水 , 特顯你o既成熟

我等陣飲返杯熱咖啡 , 讓你感受到我的成熟

「咁我去買野食先喇 , 你等等」

「咪住 , 你可以食開心樂園餐嗎 ? 我想換果隻 Qoo ~」

「好 . . . 」
為左討好佢冇辦法

我走去櫃檯細細聲同個職員講
「麻煩你一個開心樂園餐 , 我想換埋隻 Qoo」

我以為其他人聽唔到 , 點知個職員大大聲讀出來
「好o既 , 一個開心樂園餐 , 麻煩你等等」
周圍 d 人開始注視我

「仲有呀 . . . 我想轉熱咖啡 . . . 」
我超細聲同佢講

佢又大大聲讀埋出來
「嘩 , 開心樂園餐轉熱咖啡 , 馬上到 !」
我頂 . . . . . . .

我被眾人o既目光包圍 , 我相信冇人食過開心樂園餐轉熱咖啡
我拎個 Qoo 公仔去阿琪面前 , 佢即刻好開心
個公仔係曬黑左 , 成個碳咁

反而我杯熱咖啡亳無作用
原來 tum 女仔開心o係咁難 . . .

突然之間 , 有個司拉拖住個仔入麥當勞
仔仔指住我大叫 :「嘩 , 媽媽 , 你睇 , 有大哥哥食開心樂園餐 , 媽媽 , 我又要」

我感受到奇恥大辱 . . .
「本大爺係飲咖啡 , 你有冇呀 ? 小朋友」

之後個司拉即刻拖住個仔走左 . . .

跟住我一邊食阿琪一邊講垃圾創作比賽 , 我見到佢咁認真同我介紹
我怒氣全消

「好喇 , 我要返學校先喇 , 你慢慢食 , 小女子告退 ~」
阿琪拎住個 Qoo 公仔就走了 . . .
雖然有 d 被騙o既感覺 , 但係卻又好滿足 . . .
哈 ~ 我太傻了 . . .

過左一陣 , 阿琪又返來

「差 d 唔記得 , 送粒朱古力呀 , 祝你情人節快樂」

佢轉身又走了
我望住佢背影越走越遠
好快樂 , 今年的情人節好快樂 . . .

>>February 13, 2004 at 6:29:10 PM GMT+8

2004 年 2 月 10 日 星期二 【晴】

今日係第二集
本故事純屬虛構
如有雷同 , 實屬巧合


黑馬王子狂想曲 (2) ~*

到左第 2 日
我將成件事講左比 kai 豪哥聽
kai 豪哥話我琴日表現唔錯 , 仲話會撐我 , 不斷鼓勵我展開攻勢

不過冇理咁多住
今日我個環保小組有宣傳要我早會上台講野
其實身為環保小組o既我一 d 都唔環保
仲經常將汽水罐放入廢紙回收箱
我只不過但求有個主席做下

「校長 , 各位老師 , 各位同學 , 早晨 , 我係環保小組主席 6B 班王子 . . 」
台下 d 人係咁笑 , 我個名太怪了 . . . .
我話咁快就宣傳完 , 拿拿聲走返入後台 , 畢竟我太怕醜了

小息果陣 , kai 豪哥知我情竇初開
就介紹左本書比我
佢小心翼翼由書包拎出來
我想一定好珍貴
果本書書名叫 <<泡妞大法>> ! ! ! ! !
好唔簡單 . . . .

kai 豪哥向我強烈推介
「呢本野係內地啟豪書局於 1960 年出版 , 定價 1 元 5 角 , 不過而家升價百倍 , 你返去睇熟佢 , 包你情場得意 ! 」

我雙手接過呢本書
「kai 豪哥果然夠兄弟 , 你成日咁關照我 , 我真係好感動 . . . 」

突然之間 , 窗外邊出現了一張似曾相識o既面孔
呀 . . . 我又遇到我琴日o既公主了
佢o係出面望來望去 , 似乎搵緊人

Kai 豪哥見有女仔o係課室外徘徊
立即有所行動 , 一個飛身打開道門
單手按住牆 , 頭微微向下
有如獅子撲兔
呢個 . . . 呢個姿勢係 Kai 豪哥o既 " 進攻模式 "
唔通佢想 . . . . 唔 ! 好 ! 呀 !

Kai 豪哥將姿勢轉為單手插袋
「小姐 , 你找我嗎 ?」

「你走開啦 , 我搵王子呀 !」
哈 ~ 呢個話打沉左 Kai 豪哥
之後 Kai 豪哥一臉無奈 , 唯有向我指一指

我o既公主見到我之後就揮晒手
其他同學都詫異有女同學搵我
我慢慢行去門口 , 打左個招呼
「哈佬 ~ 又見面了 . . . 」

佢似乎幾開心
「哈哈哈 . . . 王子殿下 , 小女子係來還錢的 」

個名叫王子就好好笑嗎 ?
不過真係幾好笑
佢一邊笑 , 一邊坽左個 5 蚊出來
「還返比你呀 , 仲有呀 . . . 琴日唔該晒你呀」

我個人有 d 飄飄然
「哦 . . . 咁客氣呀 . . . 」
我又唔知講咩好喇 . . .

「咁 . . . 冇野o既話 , 小女子就告退了 . . . 」
佢轉身就走 , 不帶走一點雲彩
我o既心情亦平伏下來

一個 1993 年洋紫荊 5 元硬幣
我小心收好 . . .

Kai 豪哥似乎想執返個尾彩
「哈 , 王子殿下 , 你眼光都唔錯喎 , 不過同我追求果個層次仲有 d 距離 , 呢個公主我冇乜興趣」

之後 Kai 豪哥又過左幾招比我
睇黎我都要拎 d 勇氣出黎了

放左學之後 , 我一直o係圖書館研究<<泡妞大法>> ! ! ! ! !
唔 . . . 內容有 d 難
但係諗起今日o既公主 , 動力就源源不絕了
直到 5 點幾 , 終於忍唔住要走了

一落到有蓋操場 , 我又見到我朝思暮想o既公主了
我只能夠話真係好有緣分份

佢預備走了
咪住 , 我仲想見多佢一面
o係佢執緊野果陣 , 我一個飛身走出校門再慢慢減速
行左幾步 , 身後面終於聽到佢把聲
「王子同學 !」

我即刻扮嚇親
「嘩 . . . 你嚇死我喇 , 又係你 , 你跟蹤我嗎 ? 」

「我先冇咁無聊呀 , 點解你又咁夜走o既 ?」

我一時之間唔知點答 , 就亂咁講
「冇 . . . 我構想緊一 d 環保活動」

「咁就o岩喇 , 我地美術學會要搞個垃圾創作比賽 , 仲差一個評判 , 你賞面嗎 ? 」

佢要我做評判 , 咁即係話仲有大把機會見面啦 , 我開心到不得了
不過 kai 豪教我以退為進 , 暗渡陳倉 . . .
「唔 . . . 我想考慮下先 , 不如你比你電話我 , 我今晚覆你啦 !」

「好 . . . 咁有請王子殿下伸隻手出黎啦」

好 ! 戰術成功
我慢慢伸隻手出黎 , 佢捉住我隻手 , 寫低佢個電話 . . .
我觸電了 . . .

「呢個就係我電話 , 我叫阿琪」

噢 . . 原來佢叫阿琪
「個名好好聽呢」

佢又笑左一笑
「我有車喇 , 今晚記住打比我 , 拜拜 ~」

我睇住佢上車 , 睇住佢o係車上面同我揮手 . . .
太幸福了 . . .

好期待今晚打比佢 . . . .


(待續 . . . . . . . )

>>February 11, 2004 at 1:12:06 PM GMT+8