2004 年 6 月 4 日 星期五 【晴】

以下這篇為 CCIV 北京之旅 《經驗分享》 所交之文章
六月九日完成

忘不了的北京之旅

天子九門、三山五園、左祖右社、前朝後市 ── 這些名詞在我來到北京之前，
完全是聞所未聞，一無所知。我只是知道北京是中華人民共和國的首都，也是
多個朝代的政治、經濟和文化中心，城內保存了甚具歷史價值的建築和古蹟。
身為一個中國人若連我國的首都也未去過，也太說不過去了吧！因此當中國
文化中心宣佈今個暑假開辦北京課程時，我毫不猶疑地便填妥報名表，因為
我相信在隨團導師的指導下，加上參加當地教授主講的講座，我所得的定必
比參加一般旅行團和自由行多得多。我也十分幸運地獲得取錄，成為四十位
上京學習的其中一員。

在抵達北京的第一天，我已經深深感受到北京大學歷史系的厚待，他們特意
派出兩位研究生 ── 別志雷同學和吳靜同學和我們隨團，又為我們舉辦了
歡迎儀式和晚宴。第二日的文化講座，更安排退休多時的祝總斌教授出山
為我們主講”中國歷史上的皇權”，而其他講者也是百忙中撥冗為我們
授課的，機會十分難得。教授們又因應我們的程度和普通話水平，調整
主講的題目，而講座也特別安排在相關的考察活動前，讓我們在考察時
可以掌握多一點背景知識。上一段提及的幾個名詞，就是從教授的講解中學懂了。

至於實地考察課，就是香港的導師 ── 李磷老師和黃佩賢老師「盡顯身價」的
時間了！他們專業的講解絕對勝於放在古蹟前的介紹板，很多一般遊客忽略的地方，
例如屋頂檐角的走獸，在老師的提點之後，我們都頓時加倍留意起來。美中不足的，
是部分地點考察的時間略嫌不足，例如故宮的御花園很多地方都沒有參觀；
八達嶺長城只容許逗留一個多小時，我們只好選擇向一個方向攀登；十三陵
只能參觀定陵而沒有時間去長陵。

另外一點要讚賞的，是導師給予我們自由度很大，在北大校園內我們可以拿著
儲值卡去吃自己喜歡的食物，在校園外則有十五元的膳食津貼；考察完畢後
我們可以自由選擇留在市區，省卻由學校再出市區的車程；行程中更給予
我們兩日自由活動時間，而兩位導師更十分樂意地答應多做半日嚮導，
帶領我們遊覽景山和北海公園，實在是感激不已。

與香港的大學相比，北京大學多了一分樸素，少了一分喧鬧；校園內凝聚了
讀書的氣氛，常有學生坐在草地和湖邊看書，但另一邊箱運動場則擠滿
活躍好動的學生在打球。這兩個星期，我在北大上課、吃飯、打球、
溫書、測驗，可說是完全融入北大的讀書生活中。當然我們也會爭取時間
走出校園，鑽到小街和胡同感受當地人的生活文化，然而留給我的印象
還是負面比較多：去年的非典似乎未給北京居民一個教訓，到今天
隨地吐啖的人還多得很；乘搭地鐵，車門一打開，上車的乘客便一窩蜂
湧進車箱內，完全不理會下車乘客的感受；有時我們也會遇到商店食肆
服務員的不禮貌對待。或許這只是一小撮人的行為，但北京舉辦奧運在即，
若屆時外地遊客都遇到這些不愉快經歷，還是會損害中國的形象吧！

回到香港，看到由北京大學校長簽發的進修証書，心裡更堅定的對自己說：
我選擇參加這些北京之旅是明智的。除了讓我親身接觸珍貴的歷史古蹟、
登上了長城當好漢外，我還與其他參加的同學成為了好友，這份友誼
並不止於北京，盼望能在香港城市大學繼續維繫下去……





>>June 13, 2004 at 1:14:20 AM GMT+8

2004 年 6 月 3 日 星期四 【晴】

首都遊學第十四天：再見北京


房間通頂活動啤牌 UNO 一定唔少得
但麻將發現少左七隻變左無得打 ~_~
同埋一時間太多人留o係同一間房，不利通宵活動
於是就使出調虎離山計，有o的K組人先走話返房休息
引到其他非K組成員離開，然後K組人再集合返 ^^
傾下玩下去到四點幾，天又開始光，但真係好眼訓
返房小休兩粒鐘先，跟住去食早餐

原本安排係同北大學生交流，但佢地考緊試邊得閒應酬我地
變左係我地團員間互相「交流」^^
食完早餐同 Miss 去碌保齡，Chris 打左幾次全中
早幾日佢私下訓練果然有o的成果 ^^
打完就最後一次入北大校園作最後掃貨
跟住去校園裡面一間麵店食麵(終於唔係去農園喇 :P)
但我食o個碗雪菜肉絲麵辣到唔係人咁品
食左一半就即刻衝出去買雪條
結果試左杯雀檸o既檸檬冰，幾得意
跟住就要同北大 say goodbye
返療養院搬行李落去，然後驅車去機場
見大家收穫都好豐富，銀包乾塘但行李箱就「豐滿」左
我o既行李肥左2kg，Miss 仲勁超榜18kg，有o的書唯有改為手提

去到候機室見到我地搭班機(KA909)o岩o岩泊好
機上乘客魚貫落機，即係我地起飛又要遲
過呢部機新o的，有電台有電視播千嬅套《花好月圓》
飛機餐食左雞肉炒貴刁，味道唔錯之餘仲有 Haegan Daz 雪糕送
結果飛機都追得返時間順利降落，呢次輕鬆愉快o既遊學之旅
到此亦都圓滿結束，拎完行李大家就各散東西(返屋企)喇...

KA909 北京→香港 (北京機場攝)


>>July 8, 2004 at 5:15:56 PM GMT+8

2004 年 6 月 2 日 星期三 【晴】

首都遊學第十三天：最後考察


最後一次集體考察活動，但旅遊車公司
誤會我們今天不用車(那位好司機去了長城)
在我們電話追問之下才急忙調配一架車給我們
在等車來的途中，我跟 Miss 以及隔離組 Jay, Ray, Steven, Benny 他們
到附近單車店買單車送給別同學
為避免太搶眼增加被偷的機會
我們買了一架全黑色的，配上升級的防盜設備
Miss 壓價的時候說我們為了籌錢，幾日幾夜無吃飯
聽罷差點笑了出來...最後講價成功 $200 成交！

來到鐘鼓樓附近行胡同，那兒的居民問我們是那裡人
知道我們來自香港後，就問我們香港是否正在搞港獨 ~_~
走了一個多小時老師說可以解散了，分發了每人 $30 的飯錢
昨晚去不成全聚德，今日午飯一定要吃烤鴨補償
K組十人分乘三架的士去全聚德王府井分店
只叫了三個菜：烤鴨一隻、蟹子豆腐和西蘭花鴨翼
吃得乾乾淨淨，汁也不剩
埋單 $415，每人再多付 $11.5，真「抵食」
離開全聚德其他組員留在王府井和大柵欄購物
而一早完成購物任務的我就離開大隊做其他事
什麼事呢？看下面的貼相就知道了
回到療養院已是三時多，因為六點要出席歷史系
為我們安排的餞行晚宴，睡午覺的願望落空了 ~_~
唯有先執好一部分行李，然後早一點回北大校園
今日是出 Semester B 成績的日子
本來打算回香港才看免得掃興，但還是按捺不住
去到圖書館見到 Ray 和 Benny 他們
一看成績，有點難以置信
Analytical Chem 竟然拿到 A-，Cell & Mic 就是預期的 B-
加上 Computing 的 A grade，這學期 GPA 達到 3.32
連帶全年 GPA 也拉上來突破 3 這個重要關口

懷著開心的心情走到勺園出席 fairwell dinner
聽說北京大學校長也會露一露面，更是興奮極了
晚宴前先頒發畢業證書，人人有份 (除了導師們)
我們更成為北大的校友，在日後歷史系的 database
可以查到自己名字，好不威風啊！
這餐餞行飯當然也有烤鴨，不過剛吃過美味的全聚德
這一隻就完全給比了下去...
吃飯時候導師們更走到每一檯向我們祝酒
有些毫不客氣的更要他們「隊酒」
嘻嘻哈哈過後就到較感性的時刻
因為離告別北京的時候不遠了
與吳靜和別同學相處的時刻還剩不多
趁這個時候我送了個九鐵杯墊給吳同學
希望她能夠抽時間來香港走一走 ^^
之後就回到療養院稍事休息，準備進行房間通頂活動 ^^


相片

抬轎


兩個年代的交通工具


胡同


睇下全聚德o的獎項！


午飯後拿著地圖獨自尋找城巴
上了車一直去到恩濟西街總站


之後再坐城巴出去，轉特6路雙層巴士返北大
完成這一次北京巴士小遊河
但這程車坐了一個小時多...


餞行晚宴菜色


飲杯！！


>>July 8, 2004 at 5:14:43 PM GMT+8

2004 年 6 月 1 日 星期二 【酷熱】

首都遊學第十二天：意外行程


今日係第二日自由活動
終於有機會拍下星期六晚o係家樂福買o既籃球
朝早我同 Jeffrey, Chris 以及後來加入o既 Tobe
去北大籃球場打波，因為呢排係學校考試期
球場一個人都無，不過太陽實在太猛烈
打唔夠一個鐘已經唔想打
我亦都感覺到好熱但無汗出o既滋味(因為濕度實在太低)
計埋今日，o係北大上過堂、食過飯、溫過書、測過驗、打過波
可以話完完全全融入晒做北大o既學生
除左一樣o野...去公共浴室沖涼...都係返療養院自己房沖好o的 :P

返到房沖涼之前打去全聚德同老舍茶館留位先
全聚德o既北京填鴨出名大家都知啦
而老舍茶館就係可以一邊嚐茶一邊睇民間表演
問到全聚德話散叫無得訂座，而老舍就無晒
最平o既 40 蚊位，局住每人要俾多廿蚊
梳洗之後再會合返去左新華書店掃貨o既女將們
一齊o係農園食午飯，因為老師無再派飯卡俾我地
呢一餐就要用盡之前發o既飯卡剩低o既餘額
尤其係遲o黎o既我, Jeffrey 同 Chris，唔可以再大魚大肉
不過都夠每人食一碗麵加一杯汽水o既~
食完又兵分兩路，未去過清華o既我, Jeffrey, Maggie, Sisi, Ada 去參觀清華
其他人就出王府井揀手袋送俾吳同學，之後再會合去大柵欄

北大同清華可以話係一街之隔，但清華佔地面積仲大過北大
我地由西南入口入，見到一幢又一幢o既宿舍
完全唔相信已經入左全國聞名o既高等學府範圍
跟住沿路一直行，進入中心地帶，就見到o的使館式建築
不過o黎清華o既目的，除左逛一逛(時間有限，今次行左一半都唔夠)
當然又係買紀念品啦，去到商店區買左幾件 T-shirt
就行返出東門試下搭地鐵新線落市區
個地鐵站建築極似香港o既西鐵，又以架空路段為主
列車亦都靚過市區線好多，去到西直門又要轉返市區線
敗北之處係轉車要行返出路面過馬路轉，落雨就好麻煩
地鐵市區線係由一條東西走向o既線同一條環線組成
有兩個轉車站，轉車隧道o既長度同鯽魚涌站差唔多
仲有就係列車停站時收到電話，但行緊o個陣又會無晒訊號

我地五個o係王府井地鐵站月台等買手袋o既其他組員
佢地買左個好靚o既粉紅色手袋俾吳同學
之後繼續搭地鐵去前門站(由清華出o黎一共轉左三次車...)
行緊去大柵欄途中，Elaine 發現掛o係背囊前面o既手提電話唔見左
估計係有人特登界斷條電話繩，Chris 同 Elaine 去報案
跟住有警察帶我地去派出所 (個段路突然間覺得好安全)
之後又要行去宣武公安分局拎張報失紙
搞左一段時間，打亂晒原來o既行程
由於老舍茶館定死左七點八要入場，唯有暫時捨棄全聚德
等睇完老舍o既表演再博下有無得食
我地去左老舍附近o既 KFC 醫肚 (由食鴨轉為食雞 ~_~)
七點鬆o的就入茶館等開場，呢晚表演有京劇、雙聲、說書
雜技、樂器同魔術表演等等，都幾好睇

九點四散場就即刻快步行去全聚德，可惜已經準備關門
只好幫襯下佢個洗手間同埋跟門口隻鴨公仔影相
因為十二點療養院會停水，所以我地都唔怠慢o係全聚德
分乘三部的士返療養院洗白白先，然後再o係療養院附近搵宵夜食
去左間未打烊o既小菜館，嗌左一盤四十隻o既餃子
o黎北京十二日無乜點食過餃子，呢餐我毫不客氣咁吞噬左十幾隻 ^^


相片

清華大學校園




這兒像理工大學嗎？


同學們浩浩蕩蕩騎單車上學去


清華園牌坊


地鐵市區線 -- 天安門東站車站大堂


車站大堂有張咁o既o野...為等遲大到o既乘客而設？


王府井站月台及列車


地鐵新線(13線) 車站外觀勁西鐵 feel








新線列車及車箱




一間像 M 記o既肯德基 (留意牆及地板)


>>June 23, 2004 at 1:55:35 AM GMT+8

2004 年 5 月 31 日 星期一 【酷熱】

首都遊學第十一天：香山京劇


朝早去香山，係今次北京之旅最後一個考察o既名牌景點
(雖則唔覺有香港旅行團會去個度)
裡面同海洋公園一樣分山上山下兩個範圍
之間有纜車連接，亦可以選擇徒步上落山
不過天時暑熱老師都唔建議行山
行到纜車站，見到o的纜車係雙腳「吊吊fing」o係半空中o個隻
仲收成 $30 一個人，要搭就自費
但老師就俾我地自由選擇上唔上山
結果有幾個跟阿 Sir 搭纜車上去
有o的自己行，我同另外幾個同學就跟 Miss 行碧雲寺(入場費都要$10)
裡面有為孫中山設計但最後無用到o既玻璃棺木
仲有講孫中山葬禮o既展覽
行完我就早o的離開落返停車場
但原來 Ada, Maggie, Sisi 佢地早過我走
仲去左附近間郵局掃貨o添...
跟住又同司機傾幾句，我地大部分用車o既日子都係佢渣o既
而架旅遊巴今年三月先出廠，新淨之餘又豪華舒服，正過 Cityflyer...
o係旅遊點見過好多架同公司旅遊巴都無我地呢架咁正...
不過唔知係咪國產貨特色，車身左邊o的位係迫過右邊，仲要越後越迫
好似我呢o的腳長o既坐左邊認真受罪...

返到北大食午飯，去圖書館 check email，就準備測驗
30 個空格填充，我用 10 分鐘就完成左，第二個交
結果o岩 25 個，但 K 組大部分人都o岩 28、29 個...
慶幸全班過晒關，無人唔合格，個個順利拎畢業證書 ^^
之後傾多陣網頁內容之後，我就繼續o係北大掃 T-shirt
見時間差唔多就返療養院擺低戰利品
因為今日行程下半場係去梨園劇場睇京劇
搭左 75 分鐘車先到，o係附近餐廳食晚餐
七點入場霸個靚位，七點半開場
前日聽左京劇個講座，總算識睇少少啦
不過最後表現踢槍真係歎為觀止
完左就搭旅遊巴返療養院
梳洗完又開始房間o既「餘興節目」喇
今晚 Miss 仲親自落場打牌o添 ^^


相片

香山碧雲寺風景兩攝




孫中山紀念館兩攝




豪華旅遊巴車箱


下午繁忙時間塞車...媲美香港


>>June 23, 2004 at 1:59:36 AM GMT+8

2004 年 5 月 30 日 星期日 【晴】

首都遊學第十天：北海景山


雖說今日自由活動，但都沒有遲很多起身
八時多就落餐廳與 Miss 共晉早餐
Miss 知我們去北海和景山
還叫醒阿 Sir 跟我們一齊去
真好！可以有多半日導遊服務 ^^
我組加 Vincent 組例牌的八位成員，連同
早幾日受傷的 Maggie 與她同房 Sisi
十個人就組成了由 Chris 做組長的新一組---K組
( C + H + 0.5I = K !)

K 組連同老師一共十二個人，分乘三部的士
我組是最先上車的，但竟然遇著不懂去北海公園的司機
(心裡想北海公園咁出名都唔識去，真係有無搞錯)
之後還要轉錯路口行了條不歸路
他見狀就叫我們棄車，這程不收錢 (還算有些良心)
之後過行人天橋去另一邊截的士
問了幾部都說不懂得去北海公園的東門
之後我靈機一觸，改問他們懂不懂去景山公園西門
因為根據地圖，北海東門其實就在景山西門對面
終於可以再上車繼續行程了
到達後才發現原來的士不能駛近北海東門
難怪個個的士司機都理直氣壯地說北海沒有東門！
出奇地我們不是最遲到的
因為 Vincent 那組的的士載了他們去北海南門
只有阿 sir 坐那架能正確到目的地...

天氣十分好，藍天白雲，影出來的相更加漂亮
不過大風，北海海面不時湧起白頭浪
划船的希望又落空了，不過看北海公園的建築也不錯
中午在公園內一間據稱五星級食肆的飯店吃午飯
不過服務員似乎對我們的到臨不是太歡迎
態度極不友善，碗筷骯髒有異味想找水洗
他們就說想洗就付多十五元買壺菊花茶
但因為已叫了菜，唯有乖乖就範
不過廚房抄出來的菜確是有一手的
離開北海，過對面馬路去景山公園
這兒是拍攝紫禁城全景最好的地方
陽光照到故宮建築群的屋頂金光閃閃，一流！
之後 Maggie 他們與老師去王府井，Chris 他們就先回北大
而我組就繼續到太廟和社稷壇考察
其實他們本應是紫禁城的一部分
現在就劃入中山公園和勞動人民文化宮
想看又再收多一次錢
社稷壇就看到了，但太廟卻封閉無緣參觀
那麼今日的考察也到此為止
乘的士返北大與 Chris, Kathy, Janet 吃晚飯
之後返療養院乖乖地溫書準備明天的測驗


相片

好天氣配好風景 @北海


暢游北海


九龍壁


景山上宏觀故宮


封閉了的太廟 (左祖)


社稷壇，又稱五色土 (右社)


遠攝天安門廣場 (左起：歷史博物館，人民英雄紀念碑，毛澤東紀念堂)


>>June 17, 2004 at 11:03:41 PM GMT+8

2004 年 5 月 29 日 星期六 【晴】

首都遊學第九天：最後講座


日記開始之前問大家一條問題：
一個籃球跟一個西瓜邊樣平o的？

今日要上三堂呀，不過亦係最後三個講座
八點第一堂，六點鐘無端端醒左起一起身
諗住只係小睡一陣間，但再識醒已經係七點三
即係衝落去食個快早餐再行去歷史系上堂
每一次上堂教授總係早過同學到o既
遲到學生當然要檢討啦
但成日遲到o既 Lecturer 係咪都要學習下呢？ :P

\第一堂o既教授臨時將題目由美術史改為專講書法
課室兩邊貼滿晒書法筆跡
講完書法o既歷史之後教授更即席揮毫寫草書俾我地睇
又邀請同學試寫，唔覺唔覺就過左兩個鐘
下一堂換另一位老教授介紹京劇
講課期間又播放一o的京劇片段俾我地睇
之前完全唔識京劇聽o既我，上完呢堂知多好多o野
不過因為遲左落堂，去到飯堂都接近一點
o的o野食已經凍冰冰...

下晝個堂講北京o既宗教
不過我都已經決定左邊兩個講座寫評論
理應可以發白日夢唔駛理教授講咩o既
但因為一個原因我要堅持聽同 drop notes 到最尾
就係 Miss 話後日測驗！
三十個填充，答o岩一半先可以拎畢業證書
出題內容會關於考察、講座同導修
呢兩晚要好好準備先得
落左堂就同 Miss 去北大裡面o既地下百貨公司
原來北大西南面有好多商店我地仲未行過架
仲有公眾浴室同要自己帶兜入去裝飯o既飯堂
跟住見有塊牌指去週末文化市場
好奇行過去睇...原來係舊書買賣市場
一本本二手書棟晒o係地面
拎上手都沙塵滾滾，價錢應該唔會好貴掛...
但對於我呢o的平時唔睇開書o既就唔太吸引喇

大約六點就去農園食晚飯
終於食到比較新鮮熱辣o既飯菜 ^^
食完飯時間尚早，我個組連同 Vincent 個組一共八個人
經過東門向南行廿幾分鐘左右，就到早兩年撤出香港o既家樂福
北京o既家樂福唔只係一個超級市場，仲係購物中心
特別在於可以推住架手推車逛一間間o既零售商店
八個人o既袋放晒落架手推車，加加埋埋總值過萬
推o個個(即係我 ~_~)真係要打醒十二分精神
不過我留意到行家樂福o既大部分都係
生活質素高一班，消費能力高一等o既
所以行得o黎都覺得舒服o的

去到超級市場範圍就要寄存o的袋
家樂福o既 locker 非常先進
首先電腦會 assign 個 locker 俾你
放晒o野之後關 locker 門 keep 起張收據
張收據上面有 bar code，放o係 reader 上面 scan
度 locker 門就自動打開
我地約左九點集合之後就各行各路

一開始咪問過大家籃球同西瓜邊樣平o的
事緣我地成日都見北大學生o係球場打波
有次 Vincent 話如果買波佢會出三蚊
跟住無人理佢啦，今日行家樂福見到
最平o既籃球竟然係---$8.8！仲要係標準橙波！
四個男仔夾份每人都唔駛出三蚊咁多 ^^
之後口痕想買西瓜返房食，揀好再去磅重計錢，$9.91！
所以答案好明顯，籃球係平過西瓜o既 :P
拎住兩個球體，當然搭的士返療養院啦，o岩o岩要跳一次錶
梳洗完之後就計劃下之後兩日自由活動o既行程
同埋做左個 Mock Test 估星期一出咩題目
當然唔少得「例行公事」---UNO!!
(之前日記無特別講，但實情幾乎晚晚o係房都 UNO 耍樂...)


相片

貼在課室的書法 (同學們，可以精神點嗎？)


楊教授教握毛筆正確方法


楊教授即席揮毫


楊教授與同學字作品大比拼


週末文化市場


家樂福


家樂福 shopping


家樂福儲物櫃


>>June 16, 2004 at 11:59:00 PM GMT+8

2004 年 5 月 28 日 星期五 【綿綿細雨】

首都遊學第八天：長城好漢


十四日行程裡面，我最期待o既就係今日去長城
早餐要食飽o的，上到車唔理三七廿一大覺訓...
知醒o既時候聽到李教授話到左居庸關
之前以為長城離北京市好遠，原來都唔係
跟住就聽教授用旅遊車o既咪介紹長城
過多一陣就到八達嶺
教授話十一點半集合，咦！得返 75 分鐘咋喎！
唯有影少o的相，急急腳上去啦
不過都係唔夠時間到頂峰，去到另一邊o既高峰就算
上到去當然要花 $15 買張銅製証書，刻名証明自己登上長城啦
雖然沿路都有得刻，但係個度刻有意思得多
落山o既時候見到李教授
有o的人選擇跟教授坐纜車落山，$30一位
而我就選擇行落去，實行做好漢做到底！
不過有o的路段係勁傾斜，落山腳趾頂到隻鞋有o的痛
但都唔影響我行落山o既決心
走之前買返兩件衫同一頂帽做紀念，當然有講價啦 ^^
結果話就話十一點半集合，但等到十二點先齊人開車
去附近一間飯店食午餐
因為獨市生意比較貴，呢餐蠶食左兩餐o既津貼 ($15 X2)
但有九碟食送，味道都算幾好，叫做物有所值啦

食飽飽驅車去十三陵o既定陵
最重要當然係睇地下陵墓係點
本來話時間夠的話去埋長陵
但又係有團員遲到，最後都無去到
回程期間途經同仁堂博物館
館方竟然搵到個識講少少廣東話o既職員
同我地介紹同仁堂o既歷史
又俾佢地出o既菊花茶我地試飲，同埋免費中醫會診
不過我就無去睇，自己知自己事
但我唔係攪攪震無幫襯架...買左盒屋企用開看門口o既牛黃解毒片
之後就出返市區...又係遇著塞車
期間又落過場雨，但好快又出返太陽
返到療養院擺低o的o野，又要趕去北大食晚飯 (都成六點幾...)
跟住陪 Vincent 去北大南門附近o既中銀提款機
但好可惜仍然係提唔到錢出o黎
之後又去新華書店睇左陣書
再o係天黑而又無電筒o既情況下行返療養院


相片

長城山腳，人頭湧湧


辛苦爬上o黎，為o既就係睇咁o既風景


坐旅遊車攝居庸關長城


定陵外的壁畫


地宮的中殿


地宮後殿


同仁堂金漆招牌


職員介紹同仁堂歷史


同仁堂著名產品


百子櫃


歡迎參觀選購


>>June 17, 2004 at 12:04:44 AM GMT+8

2004 年 5 月 27 日 星期四 【晴】

首都遊學第七天：吃閉門羹


今日一共要去四個地方
首先是雍和宮，雍正做皇帝前的寓所
其後改為了喇嘛教的寺廟
之後到附近的孔廟和國子監(當年全國最高學府)
禮樂在書本上就讀得多了，實質是怎樣今天從表演中終於知道了
我們又在孔子像和萬世師表的匾額下影相
午餐在一間快餐店解決
苦候了三個字，我柯打的紅燒肉飯終於來了
而且有香港的碟頭飯那麼大碟！！

飯後乘車去第三個境點恭王府花園
老師 briefing 完就自由參觀
但裡面人頭湧湧，旅行團一個接一個
參觀的興致也減低了很多，隨意走一走便算
最後去的梅蘭芳故居也在恭王府花園附近
但要穿過大大小小的胡同
有見及此我也借了自己的地圖書給阿 Sir 領路
終於也都到了，但發現慘吃閉門羹！
門外貼了張通告指進行維修，十月才再開放
通告發出日期為 5月26日，看來是近日的事
但就算沒有維修，正常開放時間都是到四時止
今天我們也是過了四時才到這裡，也很大機會沒有得看
考察安排的次序有改善的空間...

既然沒有得看，老師就在那兒解散
這時我和另外一組 (Vincent, Janet, Kathy)
決定落市區的大柵欄 (北京著名的購物市集)
我們分乘兩部的士去到 Sogo，然後跟著地圖行去
但原來 Sogo 是完全不近大柵欄的
加上有少少行錯路，走了一小時多才到
不過沿途經過了新建的多層住宅
老胡同和工藝品市場，算是看多點東西
去到大柵欄，忍了手多日的同學
是時候大買特買，出血大掃貨了
而我只是買了一副特別的撲克罷了

晚上在那兒一間飯店叫小菜，七個人吃了百二元
飯後就步行到前門搭地鐵至西直門轉的士
期間入了北京暫時只得三間 7-11 行個轉
又看到亮著燈的前門和戰樓
是啊！我們還未看天安門的夜景呢！
但因為同行的已經覺得累 (明天還得去長城)
只好留待下次再來北京才看吧...
到西直門又要循例問司機懂不懂去療養院
同樣地隔離組走先，我個組隨後
但載我組的司機技術好之餘又非常熟路
懂得由公路直接入小徑去療養院
小弟額外「醒」多一元小費給他 ^^


相片

香火鼎盛o既雍和宮


孔廟


禮樂表演 @孔廟


恭王府花園


咁o既罰款好似無乜阻嚇力喎...


恭王府府邸變晒樣，慶王府亦唔例外


梅蘭芳故居...o既門口


公共衛生間，與香港不相伯仲


呢條街十間有八間舖賣工藝品


大柵欄


前門全聚德


北京夜景一攝


>>June 17, 2004 at 12:08:28 AM GMT+8

2004 年 5 月 26 日 星期三 【晴】

首都遊學第六天：步行訓練


今日考察頤和園同圓明園
由於兩個地方都好近北大
為左節省成本決定唔租旅遊車
改搭公車感受下同人迫巴士o既滋味
但出發前就有意外發生
食完早餐 Maggie 跑返入療養院期間
唔小心跌親，頸鍊刮到下巴留好多血
好彩療養院有醫生 stand by
一睇個情況就話即刻去附近醫院縫針
Maggie 聽到即時問會唔會破相
緊張o既氣氛頓時輕鬆好多
至少佢問得咁o既問題証明佢仲頂得住
之後聽 Miss 講返 Maggie o係醫院
一滴眼淚都無留過，堅強得令人佩服

講返行程，因為 Miss 同吳同學帶左 Maggie 去醫院
剩返李 sir 同別同學帶我地三十幾個人
迫上一架巴士，搭兩個站就到頤和園
入到去穿過o的宮殿建築，就望到一大片湖景
但由於o個日水比較淺，所以唔可以搭船同划艇
我地沿著湖邊o既長廊漫步，見到靚景就停一陣影相
無幾耐 Maggie 出院又再 join 返我地
午餐就o係頤和園賣小食o既地方解決
之後又繼續沿著個湖行一圈
不過個湖真係好大，行到腳跛都好似未行完
好彩琴日落左場雨個天無咁熱
沿途我又捉住吳同學傾計，先無咁辛苦
但當係登長城o既熱身先啦
兩點半我地終於離開喇，睇個錶原來足足行左五個鐘頭
應該係成個行程「考察」得最耐o既景點

行到巴士總站，成團人又再迫爆一架巴士
搭幾個站去圓明園
入到去又係要行一大餐先到最想睇o既西洋樓遺址
因為時間無多，Miss 催我地行快o的差o的發火
o係o個度影左張團體相，又周圍睇下影下相
就起程行返北大，大家經過幾日訓練
行兩至三個字，濕濕碎啦 ^^

夜晚慶祝 Maggie 無大礙
一大夥人去左唱 K，唔駛出市區先有得唱o既
療養院餐廳下面有 Multi-function room
部 DVD 機播住 Midi 出字幕一樣都可以唱o者
但當然唔期望有呢一兩年o既香港新歌啦
翻查目錄冊，最新o既應該就係祖兒o既未知
同埋千嬅o既少女的祈禱
加上有 Miss 係度，搵返佢年代o既歌
一齊唱就最好架喇，例如狂潮、大會堂演奏廳呢o的
小弟闊別歌壇半年，呢晚係今年第一次唱 K 咋 ^^
最搞笑係部 DVD 自設一套評分系統
但個評分標準似乎剩係計唱得大唔大聲
Miss 歌喉唔錯架，只係唔太入聲
部機竟然俾 0 分，認真唔俾面...
反而大大聲唱就拎到高分
成晚最高分係 92，唱學友隻《這個冬天不太冷》
我同另一組阿 Jay, Ray, Steven, Benny 佢地由八點半
唱到十一點半，房租 $60 一個鐘 (當然唔包飲品啦)
每個人都係俾十幾蚊，好抵 ^^


相片

迫巴士去頤和園 (我有得坐，嘻嘻！)


湖畔長廊 @頤和園


頤和園靚景


著名的十七孔橋 @頤和園


拱橋...好看不好行...


頤和園美景確實是學習掃描寫生的好地方


綠色隧道 @圓明園


圓明園建築重現...單看模型已感覺到有多堂皇


圓明園遺跡



你有做首都市民的條件嗎?


國恥，除了八國聯軍火燒圓明園外，還有...


原來廢電池是在可收與不可收之間...


>>June 16, 2004 at 10:15:04 PM GMT+8