2004 年 7 月 29 日 星期四 【颱風】

即離即棄


近期香港社會出現兩個意見幾分歧o既風波
其一係廉署查案查到上報館
傳媒就肯定瓜瓜嘈話踐踏新聞自由
呢一波未平，商台同鄭大班解約又嘈得好熾熱
商台以違反合約精神為由同佢解約本身有佢道理
不過就係余琤個種心裡面有個句講個句o既性格
搞到變成受炮轟o既一方
今朝返學校見到民主牆貼左反對商台無理解僱鄭大班o既大字報
上面就寫話：「天地無正氣，即離即棄」
從另一角度諗，聽左十年大班毓民o既聲音
轉聽另一o的人講o野都唔係壞事 ^_^
anyway，繼續支持大班毓民飛哥「捍衛」言論自由！

講返工作先，呢一日落左好多雨
千辛萬苦咁由南丫島抬兩大樽雨水返 CityU
返到 Lab 即刻磅，每樽都有近 2L o架！
真係制水都唔駛驚 :P
更令「某o的人」振奮o既係
天文台預測下個禮拜繼續有雨落
唔信而家係雨季都唔得咯...

>>July 30, 2004 at 11:01:09 PM GMT+8

2004 年 7 月 26 日 星期一 【微雨】

十字路口


上個禮拜集中火力處理之前o既 data
剩係收左一日 sample，後日先處理
所以難得有個清閒o既星期五
決定連埋琴日同今日
一連三日去勻港九新界加埋大嶼山遊車河同追車影
本來約好左o既三個飯局
到最後只有今晚呢個開得成
上次係同學帶我去呢間日式任點任食為另一個同學慶祝生日
今次就我帶一班朋友去返呢一間為另一個朋友慶祝生日 ^^

o黎到七月尾，即係我o係實驗室做 student helper 已經一個月
而家就仿如置身十字路口，唔知去向係點
坦白講，我享受o係 Lab o既時間多過南丫島收雨
去南丫島等船同一來一回o既時間真係幾 dull
一個禮拜去兩次都仲接受到，再多我都無乜癮
但我預計到 Ivan 日後會越來越少時間幫我地
又唔忍心見到得返 Meiji 一個撐起成份 project
真係好矛盾...睇怕我仲會o係十字路口一段時間...

P.S. 好耐都未發自內心咁大笑過...

>>July 27, 2004 at 1:11:05 AM GMT+8

2004 年 7 月 21 日 星期三 【綿綿細雨】

逛書展記 2


首先回顧去年在書展買的六本書近況如何 (可參考 31/7/03 日記)
《孽留屬兒》、《非典型戒嚴》一買回來很快就看完，現時仍在書架
《魔界23條》同樣在書架上，不過還未開封
與基本法 23 條一樣無限期擱置 :P
《獅子山下》比較好彩，上星期終於開封，現在趁著
在實驗室的垃圾時間翻閱
(早兩星期就是利用這些垃圾時間讀完今年初
在書節買的飛機書《翹首振翅─香港機師手記》)
《莎士比亞名作全集》更加不用說，也是等待閱讀中
至於本成語辭典件這一年好像完全沒揭過...
如果再數前一兩年...不得了，還是不要提吧...

心知家裡還有幾本書等待著我
今年也特意帶少一點盤川進書展
兩張一百元加三張五十元罷了
這次選擇了逛夜書市
一來不想等到周末同人逼，而平日只有晚上才有時間
(今日在實驗室很清閒，一點開工四點收工)
二來入場費也平一半，而三小時半(我六點半入場)
勉勉強強也夠我逛
而我的決定也沒錯，買了飛輕輕鬆鬆就入到 Hall 1

正如傳媒所報導，今年書展有關瘦身和健康飲食的書大行其道
但另一樣我發現今年書展特別多的是---貓! (包括書和精品)
逛了兩個鐘頭，略讀過一本寫學校鬼故，看城大的鬼故事 ^^
也去過次文化堂看過今年的政治漫畫《動物農莊》、《建華之賜》、
《IQ楷》，但個人覺得無太大突破，不值一買
直至八時半我準備離開 Hall 1 仍未有收穫
這時機緣巧合下在茶杯雜誌的攤檔看到鄭經翰的新書
(真是很新，有談及楊永強和梁智鴻辭職！)
吸引我入去，又留意到一本叫《尋找失落的菠蘿油》
談香港地道美食，翻過幾頁見幾想看，價錢又合理
剛巧作者又在場，就買了這本兼要求作者題字 ^^
成為第二本我擁有的作者親筆簽名本
(第一本是中學母校圖書館主任寫的《鐵達尼號的秘密》
在學校買也在學校要求他簽 ^^)

然後剩下的一小時快速地逛 Hall 2 和 Hall 5
今年見會方特別加強場內的膳食
當然價錢也是略高一籌，但我覺得還算合理
(小點心 $10, 蒸飯/意粉 $28)
一如往年，黃巴士攤檔聚滿了麥o麥麥兜 Fans
以前如非必要也不會湧入去
但今年實在 miss 了春田花花一班同學很長時間
又知他們出了一本新書《大個佬麥兜》
這就成了我買的第二本書
又是臨走前入了一個出版社攤檔隨手拿起一本書
由頭開始翻不是太特別，但多手由後面開始翻
咦...嘩...想不到竟是挑戰尺度之作！
趁未有生理反應之前快快放回原位 :P

特價文具也是小弟年年到書展必買的
讀大學知道了擁有 Clear Book 的重要性
有攤檔賣十蚊兩本 A4 30 頁，抵到不得了
另外也補給了原子筆和塗改液
在清場前五分鐘就離開了
總結今日的書展購買清單：

《尋找失落的菠蘿油》------------$28
《大個佬麥兜》---------------------$40
A4 30 頁 Clear Book X2----------- $10
百樂牌原子筆 X2 ------------------ $8
塗改液+原子筆套裝----------------$5
入場券--------------------------------$10
總計-----------------------------------$101 (差 $1 就齊頭...)

>>July 27, 2004 at 12:45:45 AM GMT+8

2004 年 7 月 18 日 星期日 【晴】

課程招生


o係討論區見到一間學校o既課程招生廣告


課　程　　　　　　　　　　　　　　　　教　師　　　　　學分
==========================================================
如何做好鬥爭的準備　　　　　　　　　　梁國雄　　　　　　3
向下沈淪學分析（上）　　　　　　　　　梁錦松　　　　　　3
向下沈淪學分析（下）　　　　　　　　　曾蔭權　　　　　　3
清廉學　　　　　　　　　　　　　　　　梁錦松　　　　　　2
貸款借錢的技巧　　　　　　　　　　　　唐英年　　　　　　2
證卷投資分析　　　　　　　　　　　　　任志剛　　　　　　3
美術：抹黑學　　　　　　　　　　　　　鄔維庸　　　　　　2
資料分析與剪輯　　　　　　　　　　　　梁立人　　　　　　2
面對失敗　　　　　　　　　　　　　　　曾鈺成　　　　　　2
天主教哲學思想　　　　　　　　　　　　陳日君　　　　　　2
髮型與造型設計　　　　　　　　　　　　葉劉淑儀　　　　　2
體育：太極入門　　　　　　　　　　　　董建華　　　　　　3
公眾利益的實踐與體現　　　　　　　　　梁愛詩　　　　　　3
歷史／公民教育：中共－壯闊波瀾的革民　葉劉淑儀　　　　　3
如何自我反省　　　　　　　　　　　　　楊永強　　　　　　3
為退休生活舖路的藝術　　　　　　　　　孫名揚　　　　　　3

額外開課：
數位音效剪接技巧（上機實習）　　　　　ifg 、買家甲　　　 2
專題討論：優秀行政主管之宦官篇（上）　路祥安　　　　　　2
專題討論：優秀行政主管之宦官篇（下）　林瑞麟　　　　　　2

熱門課程：
冷凍庫管理學　　　　　　　　　　　　　陳方安生　　　　　2
翻譯學入門課程　　　　　　　　　　　　人大委員　　　　　3
進階駕駛課程：高速轉呔與防衛駕駛　　　田北俊、史文鴻　　3

新開課程：
綜合生物物理：臉皮厚度與人腦功能學　　董建華　　　　　　3
泡沫的化學性質分析　　　　　　　　　　任志剛、梁錦松　　3
歷史：德國納粹黨權力之路　　　　　　　葉劉淑儀　　　　　3
髮型護理導論　　　　　　　　　　　　　許崇德、蕭蔚雲、
　　　　　　　　　　　　　　　　　　　吳建璠、夏勇　　　2
地理：美洲國家導論　　　　　　　　　　李柱銘　　　　　　3
歌劇入門　　　　　　　　　　　　　　　梁錦松　　　　　　2
如何爭取獎學金　　　　　　　　　　　　田北辰　　　　　　2
醫學研究：狗糧與人格之關係　　　　　　鄔維庸　　　　　　3
戀愛與人格發展　　　　　　　　　　　　梁錦松　　　　　　3
語音分析技巧與結論推演　　　　　　　　李鵬飛　　　　　　2
人類學：壞人，不是人　　　　　　　　　曾憲梓、鄔維庸　　3
股票市場操作原理與散戶心理分析　　　　索羅斯　　　　　　2
泡沫工程學導論　　　　　　　　　　　　李嘉誠、李澤楷　　3
機場求生技巧　　　　　　　　　　　　　李柱銘　　　　　　3
實驗研究：香港水質及港人血液分析　　　曾蔭權　　　　　　1
香港地下經濟研究　　　　　　　　　　　梁振英　　　　　　3
如何面對千夫所指　　　　　　　　　　　劉千石　　　　　　2
民意調查問卷設計學　　　　　　　　　　劉兆佳、
　　　　　　　　　　　　　　　　　　　中央政策組　　　　2
評佔及遊行人數統計學　　　　　　　　　李明逵　　　　　　2
傳媒學　　　　　　　　　　　　　　　　黎智英　　　　　　2

哲學：
領呔與愛國思維　　　　　　　　　　　　曾憲梓　　　　　　3
聖經人物研究　　　　　　　　　　　　　司徒華　　　　　　2

課程名稱更動：
權力與腐化　　　　　　　　　　　　　　民建聯　　　　　　2
沒有權力也要腐化　　　　　　　　　　　自由黨　　　　　　2
土地交易與檯底交易之內部存續關係　　　李嘉誠　　　　　　3
牆頭草與馬屁學　　　　　　　　　　　　曾憲梓、鄔維庸　　3

已列為通識選修系列課程
廢話與媒體（上）　　　　　　　　　　　董建華　　　　　　2
廢話與媒體（下）　　　　　　　　　　　曾憲梓、鄔維庸　　2
踐踏民眾：理論與實作　　　　　　　　　李明逵　　　　　　3
厚黑學理論與實作　　　　　　　　　　　葉國謙　　　　　　3
神經科學入門：老人癡呆症之診斷　　　　梁富華　　　　　　2
通俗手勢與香港次文化　　　　　　　　　黃宜弘　　　　　　2
人類學：偽裝和善變　　　　　　　　　　田北俊　　　　　　3

剩係知道呢間學校校長係董建華
但邊度有得報名，唔好問我，因為我都唔知 :P

>>July 18, 2004 at 6:46:37 PM GMT+8

2004 年 7 月 16 日 星期五 【寒冷】

「風暴」消息


0830「小鋒」集結在家裡客廳，看早晨新聞有關圓規的最新情況
發出三號強風訊號已是預料之內，想不到的是那麼快就要考慮發八號訊號
Ivan 和 Meiji 昨晚連夜闖入南丫島等待第一場雨 (Single Rainfall Event)
而我就要在發出八號訊號前返到城大收雨水 sample

0945 天文台預告兩小時後發出八號訊號，這時「小鋒」集結在北角，
向西北偏西方向移動，時速視乎駕駛8號巴士的車長而定，趨向灣仔碼頭

1020 「小鋒」到達灣仔碼頭，趁渡輪未停航前一嘗風暴下乘坐小輪的滋味，
由於風浪仍不太大，所以航程中都不太驚險，這時「小鋒」向西北偏北方向移動
趨向尖沙咀碼頭

1030 尖沙咀天星碼頭錄得的「鋒」力最盛，幾分鐘後尖沙咀地鐵站亦感受到，
這時終於與 Ivan 取得聯絡，他們正乘坐渡輪回中環。「小鋒」正向東北偏北移動，
取道荃灣線及觀塘線趨向九龍塘

1050 「小鋒」登陸九龍塘城市大學，並停留了一個多小時，期間只有建設沒有破壞 :P
冒雨把收集雨水的筒拿回實驗室，又做了一輪功夫，學校發出風暴廣播時 Ivan 和 Meiji
正好返到，整理好用過的物品就離開了

1220 「小鋒」重返九龍塘地鐵站，乘地鐵向南趨向香港島，觀察到反方向列車
都擠滿了歸心似箭趕火車回新界的上班族，地鐵有加班行駛，但出車太多
反而出現塞地鐵的情況

1250 「小鋒」轉變方向在金鐘出閘乘巴士橫過東區走廊，金鐘巴士總站出現等車人龍，
灣仔海旁塞車情況依然，但平時暢通的東隧也大塞車，令東廊上車輛都被逼慢駛，
原本希望感受搖船仔的感覺落空

1320 「小鋒」掠過太古城中心，永安馬莎、玩具反斗城等都關了門，但必勝客和
快餐廣場就很多人，買票看戲更加打蛇餅…

1330 「小鋒」集結在康山吉之島對面的一間餐廳吃午飯

1400 「小鋒」安全回到家中 ^_^

>>July 18, 2004 at 6:39:39 PM GMT+8

2004 年 7 月 14 日 星期三 【晴】

勤入南丫


過去幾日一直都落驟雨，所以無得偷懶一定要日日收雨水
繼星期日「加班」入南丫島之後，琴日同今日都係我入去收
一日咁樣過六次海，八仔一日就至少唔見四十
(假日搭船有附加費仲唔只呢個數)
而家未得閒向老細追討，所以唯有眼白白睇住銀包「瘦身」...
唯一得著就係好快用左三日就搭夠十程地鐵換張免費單程飛...
另一樣麻煩o既就係要睇船期
而家我地定一點半三地(城大、數碼港、南丫島)一齊收
咁就要搭十二點三班船入去(下班開一點趕唔切)
呢班係快船收普通船價錢，十二點八左右就到榕樹灣
想快快手做完走又唔得，因為一點半之後到兩點半先有船
o個度食午餐又唔平，都係返出中環先食
咁唯有 hea 住做到夠鐘為止
返出中環剛好「三點三」，醫完肚返城大都成四點~
所以呢個 time slot 出 trip 去南丫島其實一o的都唔 efficient...

收左咁多 sample，寓意琴日「打針日」肯定有排做
適逢另一部度 cation o既 IC 機上星期五「復工」
同一時間要兼顧兩部機
結果一如所料，琴日四點幾返o黎先o岩o岩開始打 washing
檯面仲有一大堆未掂過o既 sample, standard solution 更加係未開
六點幾開始打 sample 喇，我就幫手洗樽準備開 standard
足足用左差唔多九個字去「招呼」近廿支樽
八點幾終於開左 standard，但 sample 仲未打晒
按以往經驗打晒o的 standard 入部 IC 機係要六個鐘
如果九點開始...有數得計...真係買定個睡袋o係 Lab 訓都得 ~_~
我當然唔會一齊留到咁夜，始終再多人都唔會加快個時間好多
至多係我今日返o黎 integrate o的圖，同埋代佢地入南丫島.....
臨訓前我o係屋企張床真係有掛住o係 Lab 耕耘中o既佢地架 :P

今日由 IC 機顯示o既時間推算，佢地差唔多凌晨三點先走
自己一個人準備o的o野入南丫島
期間一直搵戶主想佢睇下有無雨水收，無就唔駛特登入去
但打電話打左成個朝早都搵唔到，唯有入去搏一鋪
好彩傭工o係屋企唔駛摸門釘
上到天台發現無料到，即刻拿拿臨換 setup 走人...趕一點半班船嘛
半個鐘後我就置身於中環吉野家歎緊牛肉飯 ^^
再過一個鐘就已經 integrate 緊琴日o既 chromatogram
今日五點就走得，好難得趕得切返屋企訓返晏覺 ^^

過兩日又話打風，即係又有雨落
下星期初睇怕又係搞到好夜
所以真係抖得就抖，而家病就真係麻煩
睇得出 Ivan 同 Meiji 呢兩日已經殘到無得再殘
希望呢一兩日多o的休息會好返o的啦...

>>July 18, 2004 at 6:37:29 PM GMT+8

2004 年 7 月 8 日 星期四 【陰】

殘酷現實


今日 Lab 無乜野做
我都無謂徙時間車錢特登返學校
不過聽日就一定有排忙 ~_~

今日用左成個下晝整理日記
打埋最後兩日o既北京之旅，而家已經刊登晒
舊年十月之前o既日記亦已經悉數搬走
仲有唔覺唔覺呢度人氣已經突破四千
多謝各位捧場，亦希望繼續你地o黎呢度o既習慣 ^^

琴日睇網上雜誌睇到一篇幾噁心o既報導
佛山有人公然將不足月o既 BB 浸嬰兒酒補身
而成左形o既就拎去燉湯同煮紅燒「排骨」
嬰兒o既來源多數係墜胎同因一子政策下被放棄o既女嬰
黑市醫生就將佢地轉售作為食物
睇完都覺得好悲哀，但社會o既真實面往往就係咁殘酷...

>>July 8, 2004 at 8:00:24 PM GMT+8

2004 年 7 月 5 日 星期一 【陰】

天降甘露


最近十天花了不少時間和心機做北京之旅的網頁
終於在今日 deadline 之前完成
>>歡迎參觀指教<<

這幾天下雨，除了幫助趕走早幾天的酷熱天氣外
也令我協助中的酸雨實驗開始有得做，還要是很忙那隻呢！
上星期五整 solution 打針，到夜晚七點幾我走的時候都未打完
Ivan 和 Meiji 還要將即日收集的雨水樣本打針
結果......他們做到凌晨十二點半......
今早我量由星期五下午到星期六下午城大收集到的雨量
竟然有4百幾毫升！！
吃完午飯就「打機」，把星期五的 chromatogram 做好 integration
昨晚看歐冠杯決賽只睡了四小時
吃完飯睡意就很濃很濃...不過都頂得到放工
基本上實驗室我可以幫手的事來來去去都是那幾樣
說不單調是騙人的...但技巧方面的確熟手了
看到實驗結果的差別縮小了也有點欣慰
因為自己都出過一點綿力嘛 ^^
另外小弟的工作環境未來可能會有改變
但暫時仍未確實，還是先賣個關子 :P

>>July 15, 2004 at 12:22:18 AM GMT+8

2004 年 7 月 1 日 星期四 【清涼】

七一遊記


猶記得舊年七月一日，我同屋企人中午一齊o係太古城飲茶
酒樓內超過一半都係「黑衣人」，食完家姐同姐夫就去維園遊行
我就返屋企開電視親眼見証五十萬人遊行O既進行

舊年無去，今年亦都無去O既打算
但相同O既係中午都係一家人飲茶
地點就改左O係北角鳳城
出到街留意身邊O既人，著白衫O既唔係太多
尤其北角街坊感覺上比較少「民主份子」
今年家姐同姐夫都唔去 lu
飲完茶大家就各自散
橫掂出開北角，影下巴士改道相都好









由城市花園行返出英皇道搭 529 上寶馬山兜一個圈
經過渣華道政府合署一段巴士前面一架車都無！
(之後諗起無影到好可惜)
一直坐到太古城影只到北角o既電車



影左一陣發現點解無巴士經過阻我影車o既?
應該係港島北岸交通唔多掂喇
行到去康怡廣場巴士站，有部「貴車」106 到
唔想o係「蒸籠」天氣等車o既都唔理咁多一於照上



事實証明仲有好多人選擇留O係港島東吃喝玩樂
但呢排政治氣氛較好都仲有超過四十萬人遊行
希望北京政府同各人大代表收到呢個好明確訊息：
香港人唔單只要溫飽，對政治都係有訴求O既！！

>>July 1, 2004 at 9:50:25 PM GMT+8

2004 年 6 月 30 日 星期三 【清涼】

至清至純


琴日一返到 Lab，Ivan 就問我打機叻唔叻
因為要睇返星期一得出o黎o既 chromagram
部機自己做 integration 做得好唔好
如果部機揀開始 in o既位唔合我地要求
就要手動調較，方法就係好似打機咁
快速按 Keyboard 幾個掣令部機停止或開始做 integration
成個朝早就係「玩」呢樣o野，都幾好玩架 :P

食完飯就學點樣洗器皿
去到 research 層面梗係唔係用水喉水沖幾沖咁簡單
尤其我地要度雨水o既 ion concentration
就更加唔容許器皿本身留低好多 ion
所以唔可以求求其其咁洗
首先要落清潔劑，輔以水喉水沖洗
然後放o係清潔劑+水喉水o既池浸一晚
之後用返水喉水沖到無泡，再用 Deionised Water (DI 水) 沖五次
放o係 Nictric acid+DI 水o既池浸一晚
拎返出o黎用DI 水沖五次，再用 Double-distilled deionised water (3D水) 沖五次
放o係 3D 水水池浸多一晚
最後再沖多幾次 3D 水就可以風乾 (當然風乾都有技巧)
但如果係膠造物每個池浸幾個字就得
又係為左乾淨，我同 Meiji 合力倒晒用左一段時間o既3D水
跟住就過隔離 Bio Lab 偷水 :P
(因為成個實驗室得三個地方有3D水供應
而我地個池要用差唔多30升3D水！)
之後就做「過池」o既工作，將DI水水池浸一晚o既器皿
經過充分洗淨再放去3D水水池
同樣方法又將浸左一晚清潔劑o既移去DI水個度
都洗左差唔多一個鐘呀！幾驚以後變職業病
屋企咁樣洗碗法實俾阿媽鬧 (衰仔徙水 ~_~)
差唔多五點就上天台 set 多一個收集雨水o既桶
同埋睇星期一個桶有無「收穫」
發現都有幾毫米雨量，收集左遲o的會拎去分析

至於今日就無乜o野做，Meiji 教我點開 solution 同
溫返點計 buffer, equilibrium o既數
開 solution 原來連 3D 水都唔合格
要用到再高一級o既 mili-Q water
呢隻水就真係絕對清純喇！
部水機全個實驗室只得一部
當 Meiji 啟動部機，提到個 Voltage 係 18.2V o既時刻
突然燈閃左一閃，初初仲以為同部機有關
其後先知係雷電擊中電力公司輸電纜
三點幾走得就繼續為北京網頁努力
希望禮拜六可以完成啦...

>>July 1, 2004 at 9:41:21 PM GMT+8