2003 年 2 月 10 日 星期一 【晴】

今日都冇乜特別!
一起身冇耐就煲飯..之後梗係食飯啦!
今日嬤嬤煲左"清保涼"...話對我d咳有幫助喎!
係因為我咳先煲俾我飲咋..不過到而家為止我d咳都係咁囉~
我諗應該有好左d卦!唉..一月尾開始咳到而家喇..好辛苦呀!
我諗再過多一星期都唔好既話..我真係要去睇醫生喇..都唔知會唔會變到氣管炎tim架!><"
食完飯洗埋碗就諗住換衫出街街!
當我正想外出之際..男朋友就打電話俾我o勒!
同佢傾左十分鐘倒...就出街lu!
因為想買下衫...今次出一出街真係大出血呀!
買左兩條褲褲...四件衫衫呀!唉~
出完血之後..梗係即刻返屋企啦!
以免再出過血嘛!好無聊咁到左食晚飯既時間!
食完晚飯...我又出左街lu....

>>February 11, 2003 at 2:28:44 PM GMT+8

2003 年 2 月 9 日 星期日 【晴】

唉..本來今日應該係好開心至係架嘛!
但係收到個電話之後..我就成晚都好唔開心喇!
咪就係媽咪打黎架囉!話我尋晚好唔返屋企訓覺喎!
又話我做女仔都唔檢點下喎!話一個女仔成日唔返屋企訓..人地會點睇喎!唉~
真係麻煩呀!今年我都成20歲啦!仲當我細佬咁..又唔係成日!一個月兩三次倒唔返屋企訓咋嘛!
驚咩喎!我都咁大個女咯!做野有分寸架啦!成日都驚我俾人呃..俾人搵笨!又驚我唔知攪埋d咩男女關係!真係俾佢激死呀!
好在有男朋友o係我身邊安慰我!我唔想成日都俾人管住晒呀!
其實我已經大個女架喇..你地唔駛咁擔心我架喎!我係差在未出黎做野咋嘛!
放心啦!我有搵有做架喎!不過.....hehee!有人請我先算啦!學歷唔係咁好丫嘛..睇下d啦~呵!

>>February 9, 2003 at 10:41:17 PM GMT+8

2003 年 2 月 8 日 星期六 【陰】

講返尋日先!我都話左個衰佬唔會準時11點打到俾我架啦!
佢呀..成1:09am先打俾我呀!即係成點鐘先返到屋企呀!佢同我講話撞失路喎!
難為我仲等到佢咁夜呀..我已經好累架啦!仲要等佢喎!等黎都唔知為咩既~><"
咁同佢傾左陣電話..大概兩點就訓左覺覺lu...

第二朝九點幾就要起身喇!累死人喇!今日約左d老表去唱k嘛!咁大個女..都係第一次同d老表咁齊人去唱k咋!^^"
咁十點幾就出左門口同嬤嬤去左飲茶o勒..飲完茶就直表出去旺角!因為約左男朋友~
咁大概12:45pm我地兩個都o係旺角火車站lu..跟住就同佢行街街!約左d老表4:00pm去唱k!
我同男朋友好無聊咁四周圍行...睇手提電話呀..數碼相機呀!行到差唔多四點見表妹仲未打俾我..
咁我就打俾佢喇..佢話黎緊喎!咁我地就再行多陣啦!四點三到..有兩個表妹同表弟已經開左房等我地lu..
點知我同男朋友去到..嗯..乜間房咁細間既!原本佢地係唔知我黎架..激死人喇!><"
跟住我就走去同個職員講叫佢幫我地轉房o勒!隔左無耐..表姐都黎埋lu..齊人喇!
咁就唱呀唱呀!唱到六點幾..蔚蔚表妹就話有事走先喇!佢撇甩我呀!約左男朋友喎!嗚~
之後唱到7:00pm就走lu...我同男朋友自己去行街!咁就分散晒lu...
我同男朋友就諗住o係旺角行去尖咀...行行下....經過油麻地...男朋友就話不如去廟行度行下....
咁行呀行呀...終於都行完條廟街喇!見到有間寫住八蚊大大碗既雲吞麵檔喎!咁咪入左去食野囉~
食完就梗係埋單架啦!明明應該係$21...果個人就話$23喎!計左我地一碗係貴價野!超~
之後攪攪下...終於計清楚喇!明明自己錯先..仲o係樹大大聲咁話人喎!對唔住都冇聲..都唔知呢d係咩服務態度黎架!
咁我就好唔順氣咁話佢...明明自己錯..又唔道歉喎!仲要o係度鬧人...咁佢又話返我..我又唔係鬧你!
仲話我叉把口埋去tim喎!咁我就xyz佢啦!佢又鬧返我..係咁鬥鬧左幾句...係一路行一路鬧!
咁我最後就鬧左佢一句...“潑婦罵街”咯!真係丫....世界上點會有d咁既人架!真係激死我喇!
唉...算數啦!我唔同佢呢種人一般見識!但係回想起..我真係蠢呀!我點會同佢o係條街度鬥鬧先得架!
真係有失我既禮儀呀!如果下次再有同類既事情發生...我一定唔會再係咁衝動架喇!我要忍~
唔會同呢d流氓一般見識呀...咁先係讀書人架嘛!哈哈哈~

>>February 9, 2003 at 10:42:44 PM GMT+8

2003 年 2 月 7 日 星期五 【陰】

今日又係好晏先至起身!梳洗完無耐就有飯食喇..
係完飯上左陣網...兩點幾就出左門口o勒!係陪嬤嬤去沙田威爾斯覆診呀!
未夠三點半就去到喇!攪左無耐..嬤嬤就入去見醫生!我就o係出面坐o係度等佢o勒!
四點三終於乜都攪掂晒..可以走人lu..咁就搭車出沙田火車站喇!行左一陣...
嬤嬤就o係Baleno買左年外套...$49呀!之後就搭火車走人lu...今日咪就係咁過囉!
返到屋企...就上網喇!又冇人陪我傾電話喎!個死佬丫...同人地去左玩..唔理我呀!
同d女夜媽媽一齊去行小長城喎!哼....豈有此理丫!又掉低我唔理喇!激死人呀...><"
佢應承我會十一點前返到屋企架..做唔到佢就知死呀!平時佢唔准我呢樣果樣又得...
我唔准又唔得...唉!冇天理呀!今晚玩到咁夜先返...又好夜先至訓架啦!真係唔得佢死呀~
明知聽日仲要同我去街街架嘛!嗚...原本年初二果日同班表姐妹佢地約左聽日去唱k架..
但係到而家都冇電話到呀!不過唔緊要啦!約唔成咪下次再約過囉...來日方長嘛!hehee~^^"
唉!我而家好悶呀!剩係睇電視..個死佬都唔知會唔會呃我既!不過我都睇死佢唔會十一點前返屋企架喇!
我又唔會打電話俾佢呀!等佢自動自覺打俾我啦!不過佢又點會記得我丫!同d女happy緊啦梗係!唉~
我無野好講喇......><"

>>February 7, 2003 at 9:17:29 PM GMT+8

2003 年 2 月 6 日 星期四 【陰】

唔..今日成十一點幾先至起身!因為我兩點幾先訓!好累呀~><"
起身果時心情都ok啦!之後梗係起身梳洗啦!接住落黎就係換衫去酒樓罷位o勒!
因為今日叔叔同婆婆黎拜年呀!首先就係去飲茶..飲完先返屋企!
飲茶果時竟然有利是收喎!係一個推點心車既嬸嬸俾我架!係第一封外人既利是呀!嗚~
飲完茶返到屋企...又到嬸嬸佢地派利是喇!嬸嬸往年俾開$50封架!今年得$20咋..縮左水呀!
加上上年出左$10紙幣..又收多幾封!不過總結咁多利是錢...都係冇乜點少到既!哈哈~
坐左一陣...又出左街lu...同爺爺去左姑媽度拎咳藥呀!爺爺話果隻克咳膠囊好有效架喎!
唉..病左好耐喇!咳到我死死下呀!好辛苦呀!唉...我既身子弱左好多呀!成日都病病..我一病就會死死下咁架喇!><"
唔知幾時先好得返呢??去唔去睇醫生好呢??唉~~~~唔想再食藥呀!
五點姑丈就車左我地走o勒!咁我就去火車站..因為約左男朋友去街街!
六點半去到尖沙咀天星碼頭等!去睇果個『中電全城動感耀燈輝2003』嘛!唔..都ok靚啦!不過都冇我想像中咁靚囉!
不過途中有d唔係咁開心囉!唉...唔開心既事就無謂提啦!跟住搭天星過中環..我地由七點幾鬧到八點幾呀!激鬼死...
差唔多攪左成粒鐘先攪掂..冇事咋!哼..衰到死!成鬼日都激嬲我既!仲要企硬唔肯道歉喎!蝦人既...嗚嗚~><"
過到中環再行過去灣仔食飯.食鐵板呀!哈哈~食完飯飯就行左一陣街街!之後去左中環碼頭度坐坐!
hehee~唔...一路我地都好好!冇再鬧過交交喇!到左十一點到啦!就要走喇..因為佢要趕船..果時都已經好夜喇..我都係時候要歸家喇!
唉..佢送我去搭巴士返紅磡..咁就坐火車返屋企喇!返到屋企都成十二點半喇...之後都上網同佢用yahoo message傾左陣..哈哈!今日都算係咁啦!
好啦...唔講住喇...

>>February 7, 2003 at 7:17:58 PM GMT+8

2003 年 2 月 5 日 星期三 【晴】

今日年初五...又係無無聊聊咁o係家中渡過!ICQ...聽歌..唉!悶呀~
終於都忍唔住喇!咁咪換衫出街行下囉!自己一條友on居居咁行呀行呀!
真係無聊到極呀!呢d咁苦既日子幾時先會過去呀!我諗我真係要積極d搵工至得喇!呼~

唉!我既病情越黎越嚴重喇!個鼻又塞塞啦!喉嚨又唔舒服喎!仲有咳咳tim呀!好苦苦呀~
我唔想再睇醫生喇!再食藥我真係會死架...邊有可能三個月內睇四次醫生架!想攞我命咩~唔制呀!><"
我要快d快d好返呀!梗係新年食得熱氣野多啦..個口口入面又生多粒飛滋喇!好痛痛啊!嗚嗚~~
聽日..會冇咁悶架喇!好野...係咩事!聽日再話過你地知啦~^.<

>>February 5, 2003 at 8:49:56 PM GMT+8

2003 年 2 月 4 日 星期二 【晴】

四日新年假期終於都放完喇!但係我仲有排放呀!因為我係雙失青年嘛!唉~
呢個係我既新日記呀!之前果個因為太耐冇寫..俾人刪除左lu..好唔開心呀!嗚嗚~
因為佢可以留給我好多回憶架!而家唯有開個另一個啦!呢次我一定會keep住寫字!
新年真係好悶呀!除左有得收利是之外...都冇乜野做lu~
d人剩係掛住打麻雀..我日日o係屋企都聽到d麻雀聲..真係煩死人喇!
今日整日都留o係屋企..冇野好做!上網又悶..唉!
個個都返晒工..冇人陪我傾電話!所以都冇乜值得好記囉~
唔..男友返左工!諗住佢放左工可以陪下我傾電話啦!點知佢又同爹D媽咪去左拜年喎!
拜完年返黎打俾我..傾左一陣!佢又眼訓喇!咁就訓左覺lu...激死我喇!嗚嗚~
再係咁悶落去..我就快發癲架喇!><"

>>February 5, 2003 at 2:21:15 PM GMT+8