2003 年 4 月 6 日 星期日 【陰】

原來今天是家義豚的大日子,
不過因為呢隻不知所謂的非典型肺炎,
我地只有讓路吧喇。改日再戰。

>>April 8, 2003 at 2:17:24 AM GMT+8

2003 年 4 月 5 日 星期六 【陰】

好像又已經很久沒有打籃球似的。
12-2pm,石硤尾室內運動場。
好多人來了的一次,還記得上次只得剛好十人應約。

自從黎左同呢班人打波,我就越來越惰。
習慣了室內,有冷氣,有更衣室,有得沖涼,有水機飲水......(雖然係遠水路有少少...石硤尾？)
從而不大喜歡留在室外的街場,日曬兩淋。
可是,最近有機會去番街場射下波打籃球,重鬥左場波。
心底原來其實是渴望打番街場快上快落的鬥波,
比起在室內打全場,成場波走來走去,跑到成隻狗咁.....
每場十條友打波,打十一分,
打得好打四五個字一場,打得唔好兩個字就玩完收皮等下場。
打全場,半場陣地戰,咁高大就入三秒區,唔多高大就向外圍射波,
我呢種唔算高大但唔矮而又怕向籃底碰碰撞撞,
咁就留向外面射三分,但係射得多唔入的話都唔好意思喇...
我諗我要搵多點機會去街場打多點吧。

今天臨兩點前的一場,十一分勝利入面有七分來自我的,
都算係咁喇,先有一球快攻上籃,之後一球走空位接應Good Pass籃底擦板二分,
最後隊友帶球入內線,向外傳給俾站在三分線外的我,接球便跳射,三分命中,十一分完場。

打完波沖埋過涼,同阿傑落去大排檔食,想吃飯,
不過那檔賣飯的無開,只好食隔離間粉麵,十二蚊碗牛南河。

地鐵過返銅鑼灣,四點幾,無無聊聊,
又無咩地方好行,不如去剪頭髮。
打俾Mei姨拎Simon電話,Simon剛好剪完個客,咁就依家上去剪。
剪番個短髮。

晚上,又去左"久兵衛"食日本o野,四個人食個"木村"SET,
不過Iris同佢細佬都好似無食過咁,得番我同阿Kat食好多咁。
(上次同叉燒,Nevin加埋我三個人都係食呢個四人餐)
食完就行過去依館睇...
SAMSUNG聲色藝 - 黃子華「棟篤笑」- 冇炭用。

梁錦松董建華羅文謝霆鋒自殺報仇輪回.......


>>April 6, 2003 at 4:25:15 PM GMT+8

2003 年 4 月 4 日 星期五 【陰】

今天是兒童節,但我可不再是兒童了。
由細到大,除左會提下四月四號係兒童節之外,
完全地感覺唔到有甚麼特別。

原先今日要上家計會開預備會,
不過因為有家長表示本港肺炎告急,不希望孩子出席活動,
所以我地只好暫停一下,改期吧。

27/1,買Nike+Philips的運動型收音機,三百幾蚊,都算貴。
28/2,第一次拎上去合和中心十七樓的維修中心俾佢地維修一下。
12/3,維修完畢,拎番部機。
4/4,又要拎去合和個維修中心放低俾佢地整。
買回來一個月唔夠,個後掛式耳塞已開始出現問題,咁我梗係拎去整喇。
擺低兩個禮拜,打電話黎叫我可以上去拎番部機,
用左兩個星期而已,又再出現毛病,都係個耳筒輸出問題,又拎上去... ...
根本就係向個設計度出問題,真失敗！

>>April 5, 2003 at 3:47:26 AM GMT+8

2003 年 4 月 3 日 星期四 【雨】

因應非典型肺炎情况未完全穩定,未完全控制,
教育統籌局宣布,所有中小學、幼稚園及特殊學校,
延長停課時間至4月21日,暫定4月22日復課。公開試則照常舉行。

停課期間,學校繼續開放,校方將安排教師駐校,協助有需要返校的學生；
而社署轄下的幼兒中心維持開放,讓有需要的家長繼續把子女送到中心代為照顧。

至於停課時間會否進一步延長,李國章說,
教統局會密切監察非典型肺炎的疫情發展,將在預定復課之前再因應具體情況公布。

如無估計錯誤,推測失準,
所有放緊大假的同學,個暑假就會短左架喇。


>>April 4, 2003 at 3:05:39 AM GMT+8

2003 年 4 月 2 日 星期三 【陰】

專程走去油麻地百老匯電影中心, 看42年前杜魯福的黑白名片《祖與占》（Jules et Jim）。
不得不專程走過去睇,因為這是最後上映的一場。
只此四點十個字一場。只此一間戲院上映。

年多前,因為Shine"電影男孩"首張專輯,
黃偉文先生引用了這個名片來替他們的歌填詞,,而令我初次認識這個名字。

男主角,德國男子「祖」和法國男子「占」,
在巴黎結識而成為好友,非常要好的好朋友,無所不談......
及後都愛上奇女子Catherine。及後她嫁給阿祖。
大戰時祖與占各為祖國當兵對敵,
但無論做了情敵或戰敵,都沒有損害他倆的友情,以及對Catherine的愛情。

女主角其實水性楊花,濫交不忠,或者又可以叫做敢作敢為。
但綠帽丈夫阿祖死心塌地愛她,無條件投降,還撮合她與老友阿占交歡。
妙在三角關係完全坦誠,毫無掩飾,相處得很大方。
可是,在這樣的三角關係經歷過程中,
阿占對舊愛的責任,和顧及阿祖的感受,決定要離開... ...
Catherine發現阿占仍有與舊歡有所聯絡... ...

最後Catherine為左得到阿占,不讓阿占離去,
咁佢就叫左阿占上佢架車,之後直衝往斷橋,再掉落河去... ...
臨開車前佢重夠膽叫阿祖好好看著她的車子... ...

看《祖與占》,深感兩個男主角都是真君子,
只有真君子才能超乎世俗道德規限,
才能情至義盡、無怨無恨地「縱容」心愛的女子,認為她有率性而為的特權,
包括與哪個男人上牀,與哪個男人同歸於盡,都由她操縱生殺之權。

女人,有時真係可以好恐怖。


>>April 4, 2003 at 2:52:22 AM GMT+8

2003 年 4 月 1 日 星期二 【陰】

四月一日,愚人節。

哥哥張國榮傍晚在中區文華東方酒店廿四樓跳樓自殺,
頭部重創,面容絲毫無損,送院搶救終告不治,享年四十七歲。
警方在其身上發現一封遺書,內容透露「哥哥」情緒受困擾而決定輕生。
演藝界人士及歌迷對一代巨星的隕落,同感惋惜及哀悼。

發現有些有趣的：十年一星隕落宿命難破 ;
連同英年早逝的李小龍、傅聲、陳百強和黃家駒,本港剛好每十年便有一名巨星隕落。
一九七三年七月二十日,
武打巨星李小龍深夜突然昏迷,被送入伊利沙伯醫院搶救無效,享年三十一歲。
一九八三年七月七日,
影星傅聲於清水灣車禍受重傷,送入聯合醫院急救無效,享年二十九歲。
一九九三年十月廿五日,
一代情歌王子陳百強於瑪麗醫院,昏迷十七個月後逝世,享年三十五歲。
同年樂壇亦損失了另一名歌星,
樂隊Beyond主音歌手黃家駒在日本錄影一個娛樂節目時,
從高台失足跌下昏迷,終因重傷不治，享年三十一歲。
二○○三年四月一日,
巨星張國榮被發現墮樓身亡受困擾而決定輕生,享年四十七歲。

哥哥更曾經接受《時代》周刊訪問,
首次公開披露自己是一個雙性戀者,成為香港首位大膽公開特殊性取向的藝人。

>>April 2, 2003 at 12:53:23 PM GMT+8

2003 年 3 月 31 日 星期一 【陰】

由於淘大花園疫情嚴重,衛生署署長陳馮富珍昨晨六時,
根據本港法例第一百四十一章《防止傳染病蔓延規例》第二十四條,
發出「隔離令」,宣布即時把淘大花園E座列為隔離處所,直至四月九日午夜為止。

非典型肺炎爆發形勢急轉直下,政府緊急宣布,發出歷來首個「隔離令」，
把有逾百居民證實或懷疑感染非典型肺炎的淘大花園E座整幢封鎖,住客需隔離十天。

基本上始終都算是做件好事,對香港整體黎講,咁樣可以暫時防止再大規模爆發。
但係假如我係該處住客的話,
某程度上我都唔敢落街囉,去邊都唔多好喇,
感染了的,又唔想傳染俾人；未受感染的,又怕被感染。
可是,終歸都叫做失去"自由",簡直係"軟禁",好似動物園d動物咁。
呢十日,屈向屋企,做得d乜呢？
同自己大廈的隔離鄰舍打麻雀得唔得呢？
同屋企爸爸媽媽溝通下,或者同阿仔阿女傾多d計？同老婆.... ...?
上網?睇VCD?狂睡?定係不停打掃屋企,再將屋企全面消毒？

唔係今次肺炎告急,都唔知法例有呢個「隔離令」。


>>April 2, 2003 at 12:41:56 PM GMT+8

2003 年 3 月 30 日 星期日 【晴】

零晨三點幾先落網,閂電腦,拎埋本過期雜誌上床睇。
壹週刊#679<梁錦松一鋪玩完>。
全書最令我感興趣的不是"赤松"的,而是香港主教陳日君的那一篇訪問。

題為：我不後悔。

陳日君不是第一次給中方指罵，
中聯辦主任高祀仁曾於去年底警告陳日君要學胡振中樞機：老老實實做人。
愛駁嘴的陳日君以同一句話回敬，搞笑又啜核。
但想不到，他是大陸立國首批北上教書的神職人員，他和大陸的關係，又愛又恨。

原來陳主教曾幾何時係香港他工業學校的校監。

睇睇下,突然電話響起,拿起來聽,卻掛了線。
不一會又一個來電,係阿茵。通常咁夜打黎又無來電顯示的都是妳。
話就話佢向果邊好悶,所以時至現在佢都久不久就有一個來電打黎,
而通常地都總是因為有些甚麼不快的。

依家我正在聽緊"我的野蠻女友"--申勝勳-- I Believe 。
如果無記錯的話,這是我跟妳最後看過的電影了,
當時我地係向UA德福睇,大概是最後的一場<係咪算午夜場呢?>
還沒有夠鐘入場前,我地去左電梯旁的STARBUCKS飲咖啡。

這電影除令我覺得男女主角的關係之親密,打打鬧鬧,幾close,有d位當然重好好笑,
可是因為女的還不能忘記那死去不久的前男朋友而離開了... ...
到結尾,最後兩個都能夠再次走埋一齊,多幸福！

老豆今日牛一, 再祝佢生日快樂！生生性性。
晚上,去到跑馬地的竹苑海鮮酒家食飯,
今晚犀利囉,成台海鮮,又紅酒白酒,食唔哂拎走的都有四大盒。

>>April 2, 2003 at 3:45:05 PM GMT+8

2003 年 3 月 29 日 星期六 【晴】

朝頭早,叉燒打黎叫醒我落去打波... ... ,食 d o野,睇埋NBA action的Top10先落去。
落去無耐,叉燒就話走番去睇NBA,交低個波俾我,我就繼續射波...
再過左一段時間,我坐埋一邊聽收音機,903數榜,梁漢文o既501係第一位。
向我聽緊歌o既時候,有個都幾高大o既"男仔"路過籃球場,初時週圍睇下人射波... ....
跟住一個忽然已經行到過黎我跟前,佢問我借個籃球,
無乜理由唔借呀,竟然我又坐埋一邊又聽緊歌,
條友射波都幾準架,向唔太遠o既情況下,接近三分線的就比較差。
令外佢走籃上籃好柔好順<其實佢都幾高大架>。
睇佢射左一輪,我依然聽緊數榜, ... ... 佢走埋黎跟我聊起來,
閒聊間,佢問我：讀緊書定做o野？
咁我就如實告知,話佢聽：我無讀書又無做o野,
佢跟住就再問我：咁你平時做咩？落黎打波？
我便回答道：um...大概都係做d 無收入o既o野囉,做d 社會服務做義工 ...
:
:
佢：點解你唔去讀社工呢？既然你對呢方面有興趣。
我：基本想我係曾經諗過架,不過當我發現到做左社工的時候, 做o既o野並不是我理想做的, 所以...
:
:
原來佢向HKU讀緊社工,點解路過同係咪村民我就無問... ...
條友走左,咁餘下在場的三個人<他們是一伙的>,就叫我一齊打番場波。
很久沒有在街場鬥波了... ..., 二打二,打左三場,好彩都有兩勝。
只不過係三場波之嘛, 我經已頂唔得順, 上氣唔接下氣, 拿拿臨返屋企。

沖完涼, 開著電腦上網, 上到連午餐都無食。
到左三四點, 走去881903.com節目重溫, 又去聽軟硬--老人苑,
之前一路無去聽一集, 果集o既題目係"鬼故"。
事因我多數向夜晚黑時聽, 無理由聽架,咁依家日頭白白咪係好機會去收聽囉。
雖然就話當時日頭白白, 話時話都有點驚, 又驚又笑咁聽完呢集,
跟住走落床揀另一集繼續聽, 返番上床, 無幾耐就睡著了。

不經不覺睡得都幾甜,一開眼望見天已黑得差不多了,時間亦差不多晚上七時......
趕快地梳梳頭,換衫出門口,阿Mei約左話七點三向天樂里等,
慶賀老豆明天生日, Mei姨搞左去約埋老豆班同事食飯,
去左一間叫 "herpa cafe" (香港灣仔摩利臣山道9號天樂廣場36樓).



>>March 30, 2003 at 7:59:59 AM GMT+8

2003 年 3 月 28 日 星期五 【晴】

尋日,中小學才宣佈由星期六起停課9日,
今日連各間大學都一律停課一週,
不過所有公開試如常舉行,並容許考生帶口罩入試場。

高級程度會考剛剛開始不久,中五會考又唔洗幾耐就到,
有幾多聰明但唔多勤力o既考生會利用如此良機,
善用呢埋形形式式的口罩o黎「出貓」呢？
係啊！真係可以用形形式式o架,
據聞,坊間已流通多種唔同款式,甚至唔同型號o既口罩,
有紙製的<重有分厚的和薄的>,有膠製的<帶完除低都會俾人知你帶過的>,
又有布做o既<話唔定可以洗乾淨再用,幾環保>,
型號方面有,N95,N85,N75 ... ..., 聽聞有好多人搵緊珍藏版"8210"口罩。
而我就對帶口罩無乜興趣<該死就唔使病>,
除非有人送個美軍打依拉克用的防毒/防生化武器o既面具俾我,咁我就帶。

上個月先拎左個耳筒去整,今日又開始壞壞地,買左兩三個月之嘛。
Nike呢個收音機,耳筒設計完全地唔掂！或許個問題唔向Nike,係Philips.

家義豚開會,唔計Donna同叉燒,
出席者得：樹葉,Iris同我, 還有因會考關係而久未露面的恩恩patrick.
大概都係決定左四月六號o既 RunDown,
分配買o野準備呀<口罩都要買埋到時派>,同埋覆核各人當天的負責要務咁,
重有決定埋「創作性地」短片比賽的冠軍誰屬,
都係得兩片之爭,一個得冠,另一個咪亞軍囉。
幾簡單,梗係唔係喇,上星期我們眾人<有出席者>已欣賞好各同學之作品,
並完成挑選,只係未決定最佳的那兩片,哪是最好？

哈哈,最後投票決定的結果是那我最喜愛的,真好！幾有眼光！<我竟然夠膽講呢句>

開完會,大伙兒去"意粉屋"食晚餐<除左樹葉>。
由離開八樓圖書館,Donna,叉燒同埋樹葉就帶上口罩,
修頓中心行經軒尼斯道,路過一條班馬線,
直至去到The Spaghetti House坐低至除去口罩。
食飽了埋單,兩位已急不及待帶番個口罩準備逃離灣仔！(跟住應該係逃去無蹤)

之後搭小巴過西環,搵Linda地食糖水。
轉眼間又一年了,新一年的"新動力"又要開始作動,
第四代o既"新動力"要出世喇 !!~
小弟在此祝願o黎近的新動力 事事順利,得心應手,開開心心 !!! 恭喜恭喜??!!
加油呀咁多位,特別係Summer!!


>>March 29, 2003 at 1:12:51 PM GMT+8