2003 年 9 月 6 日 星期六 【綿綿細雨】

呵 ..... 我尋晚發夢見到天佑 ~ 佢仲搭住我膊頭同我影相 tim 呀 ~
wahaha ..... 可惜只係一場夢 ~

有時真係好驚朋友或者屋企人覺得冇人明白佢。
首先你唔講出黎，又點知人地係咪真係了解唔到呢 ?
做朋友 ge 唔知可以做 D 咩黎幫你，其實係好無奈。
第二，我未必真係要好清楚了解到成件事，但係都想做一個聆聽者，知道你有咩困難。
第三係尊重，做朋友或者屋企人都好應該互相尊重，將困難講比佢地知亦都係一種尊重。
有 D 野我可能唔可以幫你解決到，但其實只係想幫你分擔下。
做朋友唔係就係咁 ga 咩 ?

今日精句 : 如果我要考慮果個人有冇錢而一齊，我有幾愛佢呀 !? ( 鳴謝 Sally 啟發 )

>>September 7, 2003 at 11:28:37 AM GMT+8

2003 年 9 月 5 日 星期五 【雷雨】

我今日總共訓左十三個鐘，原來唔開心係會令人昏迷。
當我醒 ge 時侯，我好想一直訓落去唔想起身，暫時只有訓覺先可以令我好過 D 。
今日我夢見 Sammi ，盧巧音，仲有黃耀明..... ha .... 怪夢 ......
諗返起先記得，呢個暑假入面每晚一過左 12 :00 都會唔開心，不過講唔出點解。
今晚佢好似早左 D 黎搵我 ......

仲有呀 ~ 梅姐你唔好有事呀 ~
我同你係兩位一體 ga !! 你要堅強 D 呀 !!
我都相信你一定可以打贏呢場仗 ga !!
我會無限量支持你 !!!

今日精句 : 處女座 ge人係唔會做 D冇把握 ge 野，所以我 repeat !! ( 鳴謝 Open 啟發 )

>>September 6, 2003 at 3:09:26 PM GMT+8

2003 年 9 月 4 日 星期四 【暴雨】

呵 ~ 原來學校教員室係非常咁淫賤 ~
鄺 Sir 一句你呀妹入黎果時我 " 經手 " ，引得全個教員室哄堂大笑 .....
記住，係淫賤的笑 ~ !
班房一樣咁淫賤 ~ 食完 lunch 入到去成班仔響度玩扮口交 ......
呵 .... 人地好尷尬 ga 嘛 ~

今日精句 : 以前成日heehee 哈哈咁玩，冇今日都唔知以前大家原來咁好感情 ~ ( 鳴謝 Carrie 啟發 )


>>September 5, 2003 at 12:55:59 PM GMT+8

2003 年 9 月 3 日 星期三 【雷雨】

原來難到喊 .... 係真有其事 ......
哎呀 ~ 傻 sue 呀 ~ 唔好咁啦 ~
我都知你地好大壓力，比我都會上上下堂嗌阿媽 ~
你地比 d 心機讀好 d 啦 ~
我記得放榜果日見到你地可以升到真係好 " 鄧 " 你地開心 ga !! 真係唔好放棄呀 !!
當日都係 Miss Lam同我講讀書係為左開心我先願意留響度 repeat，我都唔想見到你地讀得咁唔開心。
記住享受當中 ge 過程，呢樣係我上年十一月學到一樣終生受用 ge 野，希望你地可以明白當中 ge 意思 !
大家一齊努力啦 ~ 好冇 ?

今日精句 : 升到又唔開心，升唔到又唔開心，入唔到原校 repeat 又唔開心。
咁唔開心都唔知讀黎做乜 ! ( 鳴謝 Sally 啟發 )

>>September 6, 2003 at 3:17:18 PM GMT+8

2003 年 9 月 2 日 星期二 【乍寒還暖】

頂 ~ 杜鵑姐你真係唔識做 !!
來得快完得快 ..... 攪到人地又要返學 .......
真係好難適應 ..... 問題唔係在於我係咪一個 repeater，而係我根本融入唔到班新同學 !
人 ge氣質、 上堂 ge 氣氛、甚至班裡 ge 氣味都唔同，我從來都唔知原來我係咁念舊。

今日精句 : 我覺得同一個冇感覺 ge 人拖手真係好核突 ! ( 鳴謝皓仔啟發 )

>>September 5, 2003 at 1:11:15 PM GMT+8

2003 年 9 月 1 日 星期一 【驟雨】

打風早放實在太好啦 ~ !!
好耐冇試過咁想離開學校 ge 感覺 !
上一次 ...... 應該係 Form 1 .....

今日精句 : 無論你之前幾咁珍惜，放手 ge 時候都好痛苦 ...... ( 鳴謝各位九記 ge 好朋友仔啟發 )

>>September 5, 2003 at 1:56:19 PM GMT+8

2003 年 8 月 31 日 星期日 【酷熱】

我今日終於鼓起勇氣睇晒上年 ge 日記，睇完之後 ge 結果就係喊到癲左 ......
原來睇返以前 ge 日記係一件好恐怖 ge 事，曾經好多承諾、好多目標都冇辨法達成。
好多人出現，好多成為朋友，好多成為仇人，雖然冇人成為愛人，但依然人來人往 。
今日我坐在同一個班房，同一個座位，但係感覺好陌生，甚至好無助。
同五年前 ge 今日一樣，我完全冇信心可以再認識一班好朋友。
我真係好掛住我上年愛過、恨過、珍惜過同嫌棄過 ge 人同事。
我都知唔可以成日望返以前，但係我今日一路睇本日記，個心一路 " 拿 "住 " 拿 " 住 ....
心動，心碎，心淡 ....

今日精句 : 原來我咁愛我 ge 朋友，上次流淚為左自己，今次流淚為左你地。 ( 鳴謝 02 ~ 03年日記啟發 )

>>September 5, 2003 at 1:28:42 PM GMT+8

2003 年 8 月 4 日 星期一 【晴】

~ 你懂什麼 !? ~

駁咀是我專長，" 拗頸 " 是我嗜好。不過我只是為自己的理念作出抵抗而已，有不滿的話一定據理力爭，尤其面對以為自己人生經驗比我多幾十年而自以為是的長輩 ! 他們最喜歡說 " 才十多歲，你懂什麼 ? " 好一句你懂什麼 ， 正好証明這個人有多麼膚淺 ! 不是否定他們的所擁有的知識，人生經驗固然重要，但肯定不會是一個人的全部。每當我聽到他們這樣說，我只能" 擘大個口得個窿 " ，並不是自己理虧，而是清楚知道這時起勢爭辯也沒有用。這些人根本不願意接受新事物、新思想，完全固步自封，他們都會認為自己沒理由比後輩遜，我說的話根本聽不入耳，即使出盡九牛二虎之力想勸服他們也是徒然。漸漸地，我不再浪費氣力，遇到這些情況只會在內心冷笑，笑他們像" 維園阿伯 " 般沒理據的大吵大鬧。聽聽他們發表的偉論，什麼同性戀是違反自然定律，什麼幾十年前每餐一磚腐乳配三碗白飯，男生一定要熱愛運動，女生一定要懂洗衫煮飯，還有繼後香燈 ...... 多得不能盡錄，真的有趣得令人心寒 ! 更加令人慘不忍睹的是，竟然以為將一個擁有魔鬼身材的模特兒所穿的放在自己身上會有同樣效果，他們穿上燈籠褲的同時並沒有考慮到站在櫥窗的模特兒有四十三吋腿，而忽視了自己的耶魯象 ...... 語重心長的勸導，換來的是不禮貌的問候。在各位家長認為你子女什麼都不懂的同時，請問一問自己，你們又懂得什麼 !?

>>August 5, 2003 at 10:00:06 AM GMT+8

2003 年 7 月 15 日 星期二 【晴】

~ 我們的主題曲 ~


《 Say U'll Be Mine 》家中的唱機旁播放著這首歌，令我第一次接觸到你 ......
認識你，不只是一種緣份，更是一種幸運。

《 失憶 》一班小學生在操場上無憂無慮地談天說笑，什麼也拿來開玩笑，這首歌亦不能幸免 !哈哈 ...... 開玩笑的內容都是無無聊聊的吧 ! 也許這就是小朋友才擁有的快樂，無須原因，嘻嘻哈哈已經感到很滿足。

《 薩拉熱窩的羅密歐與茱麗葉 》由錄音機轉型為能播放CD 的音響組合，擁有第一張你的CD，第一次被歌詞感動，算不上感動得淚流滿面，不過一點點的窩心才令它更加動人。也許，它已令我有一點愛上你 !

《 不拖不欠 》Diseman 的興起，成功將我和音樂世界拉近。 戴上耳機，第一次留意流行音樂的編曲，令我驚嘆音樂的厲害! 同時亦為我訂下跟音樂不可分割的關係 ......

《 放不低 》站在舞台上的你令人驚唉，那種魅力、那種光芒，誰也不能抵擋 ! 換過場景，深情的你更加吸引，哽咽的唱著這首歌，回想起來發覺你一直都喜歡強忍眼淚，或者這樣比放聲大哭更真摰，更動人。

《 愛的輓歌 》年紀小小的我已經喜愛拿起咪高風唱歌，不過說到第一次認真的唱 ，可算是這首了 ! 面對如此低音..... 到今天仍然心有餘悸 ..... 哈哈 ...... ( 笑 )

《 默契 》那人的身影愈來愈少 ，隔著模糊的車窗望了最後一眼，然後 ...... 哭得死去活來 ......
那時車廂中播放著的，正是這首歌。

《 最後一次 》愛上一個不該愛上的人，可以說是幼稚，也可以說是不幸。

《 哭泣遊戲 》面對一個前所未有的挫折，全世界也變得灰暗。躲在班房中的我，誰也不想結識。或許這次跌得太痛，足足花了一年時間才爬得起來。原來香港的教育制度，正是一場哭泣遊戲 !

《 愛你是我一生中理想 》不是重新振作，而是慢慢適應，適應之後就是一片樂土。接過第一份自己用努力爭取回來的禮物，一份你與我共同擁有的禮物。

《 發熱發亮 》親眼看著你在紅館舞台的上空徐徐降下 ...... 第一次看到你，第一次觸到你的手，第一次令我在眾人面前歡喜若狂 !!

《 感情線上 》看到你在電視銀幕上大放異彩，十分替你高興。同時你在頒獎禮上被受冷落，更加替你不值 !

《 如何掉眼淚 》淚腺閉塞得太久了，已記不清楚多久沒有流淚。我想，我的確比從前快樂吧 ! 但同時亦令我知道不快樂更值得珍惜。

《 終身美麗 》一切都順利得誇張，好像學會呼風喚雨般神奇 ! 當時你與我的成功都變得理所當然，這首歌見證了你和我最光輝的時刻 ! 不過 ...... " 莫非可終身美麗 !? "

《 交換溫柔 》由最愛的電台將榮譽交給最愛的你，在我心目中才是真真正正的交換溫柔。

《 輸得漂亮 》第一次攀得那麼高，亦是第一次從那麼高跌下來。然後要面對的，是排山倒海般的失敗、挫折和痛 ! 幸好，有你和巴治奧 !!

《 回來我身邊 》難得開心過讓我等，難得我愈捱愈振奮 !! 跟死物談戀愛，你試過沒有 !?

《 我也有那個需要 》寂寞令人更著急，不過愛一個人應該有一種強烈的感覺，我差點忘記了好感和愛之間存在的距離有多遠 ! 我希望得到的，應該是一段如這首歌的所說的那樣。

《 大暴走 》2003年7月1日，一片黑色覆蓋了香港，人們真的" 激發起舊時沒有特殊力量 " !!

《 時間之光 》五年的時間貶眼間就過去了，限時已到亦應該分手。原來學懂珍惜之餘亦要學懂放手。

《 Arigatou 》有你伴我走過這些日子，應該跟你衷心的說一句多謝 !!



>>July 15, 2003 at 6:23:57 PM GMT+8

2003 年 7 月 7 日 星期一 【晴】

~ 完全擁有 ~

由過去到依家 ，開心o既 ... 唔開心o既 ... 我同你都一齊經歷過。我o既歌可能陪伴你返學、陪住你拍拖、陪住你失戀，而其實o係同一時間，你都o向度陪住我。而依D日子，我同你都可以完全擁有 !

有無諗過點先算真係愛 ? 唔簡止愛依家o既我，亦會愛過去o既我 ... 優點，你當然識欣賞，咁缺點呢 ? 係咪都一樣 ? 愛我表面o既燦爛，亦都愛我內在o既平凡。最完整o既一份感情，依家終於可完全擁有 !

每個人都有屬於自己o既路 ... 左轉 ? 抑或需要停一停 ? 最終都係自己決定。過o左去o既，依家面對緊o既，又或者o係前面重未見到o既 ... 每一個經歷，都值得好好珍惜， 因為依個係屬於我先己o既人生，值得完全擁有 !

p.s.以上廣告對白純粹攝時間 ....... 呵呵 ......

>>July 8, 2003 at 1:09:17 AM GMT+8