2004 年 1 月 8 日 星期四 【晴】

本來今日約左阿明同灝霖兄的，
返左來咁耐都未同佢地食飯，
點知灝霖竟然要上大陸傾生意，
那只好改期。

今日搵返好多我愛既舊歌，
失樂園、愛的替身、無奈、二人世界……

==================================================================================
放棄幸福？

為了重要的人
我們都會選擇有時候 ---「放棄」
讓別人少一分擔心
輕一點負擔
但這不會覺委屈的
因為我愛他們

對你們我經常計較不下
因為我在乎你們
並不是愈在乎愈計較
而是我對你愈在乎愈體諒
在你們身上學會的
也是我終身受用之所

所以我怎能不是世上最幸福的人
我們的幸福根本就是不用求
努力愛你身邊的人
就是你的幸福

>>January 9, 2004 at 8:56:53 AM GMT+8

2004 年 1 月 7 日 星期三 【晴】

算上來今日算係上學期的最後一日
迎面以來的是考試
好希望最後一日可以見多大家幾面
所以起身都早左
但見仲有時間就係家裡補完衫先返學

所有同學都返齊了
真好
落堂後阿康佢地要去踢波
我就趁機會帶左阿quin去學篤波
睇到阿quin係好俾心機學的
掌握到一些基本功

見約左阿媽就打算搵埋耀仔走時搭車
點知佢每次都係上左車先睇到個短訊
真係無哂辦法
我地係無緣架啦
哈哈~~~~不過就俾左個機會我同阿quin兩個人去左撐檯腳啦
好開心可以同quin小姐共進午餐

同阿媽行左半日街
洗左500蚊~~
見阿媽開心買左都抵的
當然我都有買俾自己啦
咁大個女都係第一次咁瘋狂購物
不過這個月大大話話都無左成千蚊

好啦！大家要努力呀！
我地好快又會再見面的

>>January 8, 2004 at 1:47:30 PM GMT+8

2004 年 1 月 6 日 星期二 【晴】

今日返學同放學有好多同級同學相伴
這難得的時刻
好希望留住

收到下學期的時間表
暫時每日都要返學
是好是壞？
剛相識的同學們
我只想見多大家幾面

兩多個月真正相處
愛上這班的人和事
真有點兒不捨

>>January 7, 2004 at 11:33:30 AM GMT+8

2004 年 1 月 5 日 星期一 【晴】

我都明白有些說話講得太明又唔知人家點諗，
所以還是有時不能講得那麼白，
結果說話愈來愈玄，也愈來愈禪了。

今日21319有籃球比賽，
難得所有出埸的人我都識得，
當然要捧埸啦！
我發覺左阿ken既人體比例原來是不正確的，
阿滔一定係幾年無曬過了，膚色那麼白的；
仲有阿la原來係咁瘦的！
哈哈~~~之後完左我都有打左幾球。好耐無打了~~~

放左學同左耀仔、阿ken、阿華、呂為去左篤波，
今日好爽，打得好順！
起碼對住阿ken都打得不俗先啦，
只係入完紅波就入唔到color波，
所以好快又俾對手追返！
幸好結果都贏哂阿ken同耀仔。

>>January 6, 2004 at 1:45:42 PM GMT+8

2004 年 1 月 4 日 星期日 【晴】

又返學了，
返左學但係帶錯notes，
多得carmen借我睇notes，先跟得上。

lunch同左阿康少、細b、阿滔去篤波，
一會有普通話考試的，
都唔理得咁多，打完先算！

算係順利考完啦！
放左學唔知搞咩鬼，
耀仔竟然走左去，
佢仲未俾返d notes我的，
可惜到我搵到佢時，
佢已經上左車……
無辦法啦，
只好夜d去take返！
但係我發覺我忘記了去見院長，
對唔住阿滔tim~~仲要doris代我去。

怕返左家會睡著，
就轉個頭去左自修室，
讀左少少書，
起碼都無浪費時間啦！

過左耀仔度notes，
仲買左波鞋tim~ 不過係佢買唔係我買，
我覺得我搵到阿星個對鞋，
但又好似唔係。

>>January 5, 2004 at 4:30:53 PM GMT+8

2004 年 1 月 3 日 星期六 【晴】

當他做朋友的，
就不用計較。

看不過眼的，
就要話。
可能愈相熟反而愈不敢講，真的嗎？
是的。
遇上這種困境，
誰也覺得難以啟齒，
明明看不過眼的，
偏偏又要把說話吞往肚子裡去。

但原來坦白，
往往會有意想不到的結果。
不要往肚子裡胡思亂想了，
把你的擔憂和他分享吧！

我自己哩？
每次講了出來，
我都輕了一些。

>>January 4, 2004 at 1:07:50 PM GMT+8

2004 年 1 月 2 日 星期五 【晴】

今日多左兩個學生，
係男仔來的，有點兒頑皮，
希望我可以應付到。

放左工落左灣仔讀下書，
angel放左工都來一齊讀，
全日只係食左個三文治的我，
最後都係頂唔順提早走去食野~~
最近胃口少左，又唔定時，
都開始要調節一下。

約左阿來食晚飯，
抱著少少內疚的心，
同佢講左聲對唔住，
因為佢次次約我都唔出，
但佢仲係約我，真係唔好意思！
聽左佢講心事，
我覺得他有點可憐，又有點歉疚。

「儘管不停的忙，
點解仍是覺得寂寞？」
我靜默，答不了他。但我想講，也許是受夠孤獨吧。
孤獨？我有否令他變得孤獨哩？
每次他打來我都匆匆收線，
而且總是拒絕赴會。
我也有份令他孤獨嗎？

吃完了飯，走過鞋舖，
想起阿星的波鞋，
好想也買一對。
點知搵極都搵唔到……

>>January 3, 2004 at 3:06:39 PM GMT+8

2004 年 1 月 1 日 星期四 【晴】

在天空中浮沉的人，
飛累了，
雙腳重新著地時，
是否有點兒不慣？
無論如何，
人總該腳踏實地做人，
習慣與否只是時間問題，
香港人畢竟是最易適應環境的人。

今日精神已經好了不少，
只是聲沙而已，
又見到大家了，真好！
阿康搞左個新髮型，愛死了!

送左份禮物俾耀仔，
個公仔我第一眼已經好鍾意，
因為個公仔做得好仔細，
色澤亦都好完美，
價錢又合理，
就令我愛不釋手了。
其實仲有幾個好靚的，
只是他們比較大又貴，
不過我都覺得好值得買。

放左學去左阿ken家玩，
本來唔枇去的，
佢又講到好似無咩人去，
點知多人都不得了！
我都無咩機會幫手，
只好坐低抱住狗狗 - 奀豬，小睡一會！
無錯！係狗呀，一隻唔會叫的真狗呀！
真係好可愛的，
見佢唔吠我，唔張大個口我就好放心咁抱佢啦！( 熟我既人都知我都好怕狗的！)

佢又乖乖wor，唔出聲咁伏係我度，
就係咁我地就sleep著了~~~

嘩！原來仲有獎抽的，
多謝阿華同阿ken送出咁多獎品。
我除左抽到獎之外，
仲抽到全場大獎，
不得了啦！
2件t-shirt、2支電動牙刷、一支漱口水、3盒香口膠、一個公仔、一支牙膏，
真係大豐收！

又咳咳了~~~真係2004多病痛！

>>January 2, 2004 at 4:46:48 PM GMT+8

2003 年 12 月 31 日 星期三 【晴】

一早起身，
同左阿quin、阿滔、阿康、阿星、doris、ashly、細b去左唱k，
狀態不好的我已經唱少左啦！

唱完之後去左篤波，
同細b一組，還是大勝。

同阿quin坐巴士去尖咀碼頭，
談了一會心。
再乘船過灣仔，
無想過可以同阿quin一齊做那麼多的事情，
我帶左quin返教會玩，
聽分享、bbq、敲鐘，
我倆也傾左好多好多。

身處銅鑼灣鬧市之地，
仍可有一寧靜之處，
我感到非常安穩。

神也許真的安排了！
在分享會上，
我聽到陳嫣紅校長講出了過去半年的起落，
「為了一句說話，我辭了職。
我在學校中最有權勢時辭職，
為的是一時衝動……」
也聽到陳校長反省自己的不是，
太過自信、自負……。

曾經作為一個體藝的學生的我，
可以聽到陳嫣紅校長的剖白，
我覺得是神特地安排的。

分享會後我也主動上前見陳校長，
她竟對我有些印象，
只是想不到會在這裡相遇。

跨越2003，我好多謝阿成同fion打俾我，
特別係kimmy，
佢係我最估唔到會打俾我的一個，
所以我都不由自主對佢講：多謝，我好感動。

睇到好多低年級生在玩，
骨頭、偉哥、富富、奧妙、子雯……等等師弟師妹在玩樂，
真開心！

可惜，就此我又再病倒了！好無奈~

==============================願大家在2004年有一個豐盛的一年==============================

>>January 1, 2004 at 6:47:41 AM GMT+8

2003 年 12 月 30 日 星期二 【晴】

在回顧的一年，
是否達成了我上年的生日願望。
我想，是的。

我得到了好多，
一直以來都好多，
甚至多得有點兒自己都妒忌自己，
二家姐講過，
假如你一生都太幸運，
你未必長壽。
我有失去，
但沒有遺憾。

我愛過，痛過，
我得過，失過；
我緊握過，也放手過，
也嘗過了生死離別的滋味。
廿年的生活，
用眼，我看過了不少，
用耳，我聽過了不少；
用鼻，我嗅過了不少，
用舌，我嚐過了不少。
原來已嘗過了那麼多……

我很自豪自己的記性。
這一年，
有很多回憶，
不同朋友的生日會，
麻麻的離開，
新學年的生活，
去旅行，
去交流，
學整曲奇，
開學日，
大家姐結婚……
其他好多好多的回憶都給我記了下來。

今日看昨日還是覺得新鮮，
但日後，回顧才知其味道。
可勾起你的回憶，
再平凡一日也有其意義。

>>January 1, 2004 at 6:13:13 AM GMT+8