|
2003 年 11 月 24 日 星期一 【晴】
今日係swimming team BBQ gathering+我地Team Captain Sherry生日既大日子~~
首先放左學之後，福頭同Sonia同我去左彩虹買野。嘩！！唔係講笑，彩虹買野都幾貴......
買完野返到科大之後就即刻去BBQ場喇！！呢次係我入到科大之後第一次去到BBQ場咁遠，睇黎係我畢業之日都唔會行曬成間科大架喇。
去到BBQ場，一見到Sherry就梗係衝上前講生日快樂喇~~
跟住係咁燒係咁燒，科大真係超大風，差ｄ成袋野食都吹走埋！燒到成十一點半先走。呢次係我入到科大之後第一次咁夜走咋！
BBQ好好玩呀！
>>December 17, 2003 at 6:12:31 AM GMT+8
2003 年 11 月 20 日 星期四 【晴】
呢排ｄ人成日有感情煩惱，我都唔明點解而家ｄ人既戀愛觀念會咁架。
都無為另一半著想，又無理另一半既感受，男又係咁，女又係咁，只係想開心而拍拖，我以為ｄ細個既人先會咁架o者，原來一個二個都係咁。
愛情唔淨止開心咁簡單，係要互相負擔喜怒哀樂。愛並不是一個尋開心既地方，想尋開心請也不要到愛裡尋。
愛..像一道送菜，包括了甜酸苦辣；
有時甜會多ｄ，有時苦會多ｄ；
想要這種甜，也請要這種苦。
男仔又係咁，女仔又係咁，成日發對方脾氣，又要人地呢樣，又要人地果樣，有無為對方著想過架？淨係識企係自己立場去諗，又唔企下係人地立場去諗下人地。
要人地呢樣，又要人地果樣，咁自己呢？自己又做得好好？一味要人對自己好，咁自己又對人好唔好？
仲有人拍完一個又即刻同第二個拍，我只不過話休息一下，唔好一下子不停係咁拍。佢居然話愛情係要咁不停咁尋尋覓覓架喇。我唯有替呢個人可憐，尋尋覓覓唔係解試完一個又一個呀，係解搵真愛呀，一個真正相愛既人呀！！
睇黎，而家ｄ人愛自己多過愛別人，或者而家ｄ人根本唔知咩叫愛。
>>November 26, 2003 at 5:31:04 PM GMT+8
2003 年 11 月 19 日 星期三 【晴】
今晚係條街度同人鬧交......
頭先我去放福頭，同福頭坐係海旁果陣，見到有隻大狗咬住細狗條頸唔放。
隻細狗勁慘，係度慘叫，不停咁呻吟，隻大狗仲要咬住隻細狗周地咁拖。
我見隻大狗個主人無動於衷，隻細狗個主人又肥，跑到過黎隻細狗都死左喇，又無人幫隻細狗。我咪即刻衝過去打隻大狗，原本只係細細力打，但隻大狗死唔放口，海旁其他狗都好有義氣，走埋黎幫手，成十幾隻，七國咁亂，於是我用盡力（其實有留力，唔係隻大狗真係會死。）打落隻大狗個頭度先肯放口放隻細狗，跟住仲想咬我。當然喇，我自少連狼狗都唔驚，更何況區區一隻曲架狗。
隻細狗個主人：你睇實你隻狗喇！
隻大狗個主人：我隻狗就好爛玩既，係你隻狗唔夠打o者！
本來我想轉身就走，我聽到呢一句，隻大狗個主人居然仲咁串咀，真係火都黎埋！當然要駁火喇！
下面「我」既對話係文雅化左，費時教壞細路。
我：我放隻狼狗落黎咬死你隻狗，然後話你隻狗唔夠打得唔得呀！
隻大狗個主人：咁狗無性架嘛！
我：狗無性！你無性架！你唔識睇住佢架！隻狗咁大，識唔識同佢戴口罩呀！
隻大狗個主人：呢隻狗都叫大呀！
我：你隻狗唔大，咁呢個世界無乜大狗喇！就算唔戴口罩，識唔識用返條狗帶呀？！
呢個時侯，福頭好醒咁走左過黎，我即刻拎起條狗帶示範俾佢睇~~
我：狗帶呀！呢ｄ叫狗帶呀！
隻大狗個主人：我唔想再有任何爭拗......
我：唔想再有任何爭拗就好好咁睇實你隻狗！
當然，見好就收，我都帶住福頭同其他有義氣既狗狗轉身就走，ｄ狗狗要返去ｄ主人度喇~~
其實狗好有性，每一隻狗都好似人咁有佢獨特既性格，亦好有義氣，比人更加有義氣，好多狗都會見義勇為，唔駛人叫都會自己去幫手。人？哇哈哈！
>>November 27, 2003 at 8:08:07 PM GMT+8
2003 年 11 月 18 日 星期二 【晴】
今日同人拗一條問題，「我地係兩個唔同世界既人」係唔係分手既理由。
「我地係兩個唔同世界既人」係分手既理由既話，咁，「我地生活係同一個世界既人」係唔係雙方一齊既理由？
我覺得，呢個完全唔係分手既理由，係分手既籍口而已。
原本，愛就是將兩個生活係唔同世界既人拉埋一齊。就算點唔同，只要係愛對方，都唔會介意兩個人生活係兩個唔同既世界，甚至乎會想盡辦法令自己溶入對方既世界。
「我地係兩個唔同世界既人」呢個分手既籍口，只是把「唔愛對方」美麗化而已。唔愛咪唔愛囉，何必還要說謊？
>>November 27, 2003 at 6:53:20 PM GMT+8
2003 年 11 月 15 日 星期六 【晴】
我係朱古力脆脆寶？！
日子︰3月25日
朱古力︰脆脆寶（The Croustillant）
成份︰薄黑朱古力包脆曲奇夾心
特性︰精力充沛
生日占卜︰活力充沛的你，一刻也不能停下來，你需要參與多種活動，才能消耗體內過剩的精力。你很清楚自己的才幹，並不急於當領袖，外表盡情地玩樂，尤其在緊張忙碌過後，參加其他活動，可以鬆馳緊張的神經，以及填補心靈的空虛。
朱古力蜜語︰戴上歡樂的面具，總好過把憂傷掛在面上。
>>November 19, 2003 at 11:20:27 AM GMT+8
2003 年 11 月 12 日 星期三 【晴】
我係牧羊狗？！不過我都好鐘意牧羊狗~~
睇落好保守，內心非常堅強，睇到人有難，一定會幫，有正義感。
保守而穩重溫柔，內心非常堅強，能冇偏見，對身邊有難的人，好醒就察覺到，有同情心，一定會向人伸出援手。堅持自己主見，唔會貪慕虛榮，俾人第一眼印象好沈實，但一有事發生會將你的力量表現出來，耐力相當足夠，遇見痛苦事，唔會埋怨，有時俾人覺得你頑固，唔識轉彎，有時要企響人地立場諗諗。
>>November 13, 2003 at 3:55:25 PM GMT+8
2003 年 11 月 5 日 星期三 【晴】
今日游泳教師章考實習試呀......居然俾人放飛機......
呢個IED既女仔仲要係我考之前半個鐘先黎放我飛機，都幾無責任感，搞到我唔夠學生考實習試，差ｄ三千幾蚊就因為女仔而化為烏有，多得佢唔少......為人師長都咁樣真係好唔掂。
好在我果班個十九號仔有個frd可以即刻黎幫我，雖然要俾兩舊水，但好過要等一年再俾三千幾蚊去考過......
哈哈！！考試果陣開頭雖然緊張ｄ，但表現都唔差。如無意外都應該pass既~~
仲差筆試咋，考埋筆試pass埋就考到個教師章喇！！
>>November 19, 2003 at 8:54:55 AM GMT+8
2003 年 10 月 30 日 星期四 【晴】
今日Halloween前夜......記住今日唔係Halloween呀！
今晚同Amily去左海洋公園玩Halloween！！哈哈！！
首先係去左玩一間鬼屋......個感覺係......入去每隻人扮既怪獸俾廿蚊貼士，仲要行左唔夠四十秒就要走喇......呃錢架！！
玩完鬼屋就去左玩跳樓機，勁好玩呀！驚餐死，原來跳樓好恐佈架......都唔明ｄ人點會有勇氣跳樓，又無勇氣生存落去......
>>November 19, 2003 at 8:53:15 AM GMT+8
2003 年 10 月 11 日 星期六 【晴】
終於好返好多喇~~
至少夜晚無再發燒喇~~
>>October 19, 2003 at 9:01:37 PM GMT+8
2003 年 10 月 9 日 星期四 【晴】
今日係公公頭七，亦係細佬生日......
今晚比平時早訓，我都叫埋細佬早訓，十二點幾就上左床......希望公公頭七返到黎會見到我地......
細佬生日，我相信係細佬最唔開心既生日......
世事就係咁緣......
心情依然難受，但依然有好多野要做......
>>October 19, 2003 at 8:55:49 PM GMT+8
|
![]()
|
人氣: 27462
Design & Scripting by ShowHappy.Net
|
今日係swimming team BBQ gathering+我地Team Captain Sherry生日既大日子~~
呢排ｄ人成日有感情煩惱，我都唔明點解而家ｄ人既戀愛觀念會咁架。
今晚係條街度同人鬧交......
終於好返好多喇~~
今日係公公頭七，亦係細佬生日......