2004 年 8 月 25 日 星期三 【驟雨】

今日喉嚨好癢，又勁流鼻水，想病咁~

>>August 26, 2004 at 5:46:16 PM GMT+8

2004 年 8 月 24 日 星期二 【晴】

今日又好天喎，真係奇怪，不過因為行程delate咗，所以去到深圳已經6點，我雖然有收到997，不過收到嗰時已經播主題曲啦，即係miss咗3集……

因為尋晚食燒夜，今晚又食片皮鴨同芝士焗龍蝦，所以實肥死啦……

>>August 26, 2004 at 5:43:03 PM GMT+8

2004 年 8 月 23 日 星期一 【雨】

今日好無聊！朝早去睇梅花鹿，然後去行公園。個公園乜都要比$，我地惟有行嚟行去，幾辛苦先捱到1個鐘。行完就去睇水晶，咁啲qty就梗係同swaroski差得遠啦！食完飯就去按摩，按摩嗰陣都幾舒服，不過人地痛到哇哇叫，我就一啲痛都無，唔知係嗰個按摩女郎唔夠力，定還是我忍得痛呢？

跟住去亞馬遜主題公園，諗住去遊船河，點知又行雷落雨，攪到連夜晚個營火會都無埋，山長水遠坐個半鐘車去就係為咗食飯同埋睇半個鐘表演！餐飯又勁爛，個表演又怪，南美洲點會有草裙舞ga，唉！……

希望聽日唔好落雨啦，如果唔係就騎唔到馬ga la……

>>August 26, 2004 at 5:37:03 PM GMT+8

2004 年 8 月 22 日 星期日 【陰】

今日係我3日旅行ge第1日，由香港坐車到深圳，再到中山，然後再到珠海，再過澳門，夜晚又返去珠海，成日都係坐車咁滯，同埋落車過關lor，已經過咗n次關……

同埋我今日不在狀態，可能尋晚唔夠瞓卦，瞓得嗰3個幾鐘，所以今日成日都好攰，直到去澳門買手信ge時候，我先精神番，因為我要搵我ge車厘哥夫紐結糖。haha！好彩最後都比我搵到啫……

夜晚睇咗個歌舞show，本來有band、有跳舞，都幾好睇。不過到有2個細路女表演雜技ge時候，我個心即刻down晒，因為佢地係無戴安全帶ga，下面又無安全網喎，幾危險呀，我幾驚佢地會趺落嚟……最後梗係無事啦！不過訪問個細路女ge時候，見到佢一啲笑容都無，好似受咗委屈咁，我覺得奇怪，但係就無諗咩。。點知佢落咗台之後，逐行同觀眾握手，咁我先知佢係搵$。我覺得佢幾慘，佢得9歲咋，就要出嚟做，仲要好似同人乞咁，而且我估啲$都唔知會有幾多係真係比佢。不過佢都幾現實，如果佢見你手頭上無揸住$，咁佢就唔會同你握手。嘩！幾串呀……

No!No!No!我唔係癲婆會會員，我係番薯會senior secretary，負責協助番薯會會長訂立會規：
1.所有會員均須尊敬神奇女俠如契媽

不過我暫時只係諗到呢條……

>>August 26, 2004 at 5:24:40 PM GMT+8

2004 年 8 月 21 日 星期六 【雷雨】

今日去咗睇《三更之餃子》，近鏡影啲胚胎係有啲核突，不過意識係ok ge。但係落仔嗰幕就勁迫真，我個fd話個胎盤係真ge，諗起都幾核突。最慘就係梁家輝，個角色可有可無，一出現就係啲sex鏡頭，佢好似做鴨咁，有情客串啫，唔駛咁搏呀~~

跟住去食tea啦（其實本來睇完唔係咁想食嘢ga，不過我個fd話去飲嘢，咁仙xx要排隊，咁惟有是但搵間，但係入度去嗰間嘢單叫好貴，咁惟有叫set tea），我地總共先食$70，我個fd竟然比$10 tips，嘩！勁豪lor，外國返嚟ge有錢仔果然唔同啲~~

確定鍾意某人d八種方法

1.當妳正在忙時，卻把手機開著，等著他的電話..妳已經愛上他了.........
2.如果妳喜歡和他兩個人單獨漫步..妳已經愛上他了.........
3.當妳和他在一起時，妳會假裝不注意他， 但O當他離開妳的視線時，妳會急著尋找他...妳已經愛上他了.........
4 當他受傷或生病時，妳會很關心他，替他著急..妳已經愛上他了........
5.當他和別人要好時， 妳會感到吃醋...妳已經愛上他了.........
6.當他把臉貼近妳時，妳會感到臉紅.心跳加速..妳已經愛上他了.........
7.當妳看到他那甜美的笑時，妳的嘴角會揚起一絲得意的笑..妳已經愛上他了
8.當妳看到這篇文章時，心裡想到某個人......那麼妳肯定已經愛上他了 ^^^^到底是誰??

>>August 22, 2004 at 2:13:30 PM GMT+8

2004 年 8 月 20 日 星期五 【雷雨】

今日晏晝去咗睇阿Ron，係新港城咋喎，唔係唔去呀？佢同楊怡嗰首歌唱live好正呀！去到仲比我撞到我表妹添！佢為咗要親筆簽名poster，竟然一大清早10點就由旺角跑嚟馬鞍山排隊排到4點幾，佢真係勁呀！雖然張poster就真係幾靚，不過我自問就唔會花咁多時間嚟排啦，我先無咁無聊呀，睇吓咪好lor，有時唔一定要擁有……

跟住我表妹仲去埋追車添，因為阿Ron自己揸車嚟（佢住咁近梗係揸車啦），架車就泊係下面停車場，佢走去攞車嗰時就大把人追，咁我為咗看實我表妹（佢瞞住佢阿媽我舅母嚟ga，佢仲細個我個妹1年），咁我就梗係要追住佢啦。咁係停車場我就見到阿Ron架Audi7人車（個車牌k字頭ga，我估係新車嚟ga），載住楊怡同助手走。唔知楊怡住邊呢？不過佢以前係馬鞍山讀書，應該住得都唔會好遠~~

跟住諗住買衫返去影畢業相，去到G 2000，啲黑褲得番s，裇衫又得番長袖，咁我最後惟有要長袖裇衫襯牛仔褲~~

>>August 22, 2004 at 2:00:15 PM GMT+8

2004 年 8 月 19 日 星期四 【晴】

今日係family聚會，不過阿爸就無嚟。估唔到依家成個family得我、阿ling同阿爸仲係讀緊書，阿媽同阿盈已經做緊嘢，阿媽仲做緊保險經紀添，估唔到唔識講嘢ge佢會做一份咁需要口才ge工，而石石就未知點，佢話九月先喎，依家放吓假先……

十年人事幾翻新，估唔唔到我半年就幾翻新啦……

>>August 22, 2004 at 1:39:08 PM GMT+8

2004 年 8 月 18 日 星期三 【晴】

今日做乖乖女，陪阿媽阿爸去飲下午茶，跟住又一齊去QE探大姑媽。老實講，今日係我第一次去醫院探病，感覺ok啦，都無乜嘢，不過硬係覺得有啲嘢咁，因為令我諗起以前聽落啲醫院鬼故……

>>August 22, 2004 at 1:34:20 PM GMT+8

2004 年 8 月 17 日 星期二 【清涼】

今日因為想攞杏仁餅先約zoe出嚟，點知佢就唔記得帶，好彩我下個星期都去澳門啫，如果唔係就無得食~


仿佛聽到心跳聲 我未來及做反應
你便告知這是情 我未免少許吃驚
室溫變得很冷冰 妳為何無甚反應
錯在那一件事情 試問怎麼去考證

在世間想找到真心的一半 每每錯
配亂愛瞎了般
妳何時願意找新歡 人海中覓個伴

這一秒鐘靈魂共肉體都變重
硬放鬆 緊張的血脈沖上大腦
茫然望你表情似瘋
我像傻連動作都失了自控
怎樣傳達愛真想不通
驗試中 把心中戒律拋往後腦
流連在妳身旁
妳總
笑著望 期望有一天可愛若狂

仿佛聽到心跳聲 我在呆站沒反應
你便告知這是情 我未免少許吃驚
室溫變得很冷冰 妳為何無甚反應
錯在那一件事情 我願一一去考證


原來風箏真係可以翻「界」ga，只要隻風箏黐翻好無事，就可以再「界」ga啦……

>>August 19, 2004 at 9:15:07 AM GMT+8

2004 年 8 月 16 日 星期一 【清涼】

今日去day camp，啲遊戲幾好玩，不過就嫌無參觀到個camp site。一埸嚟到，參觀吓都好嘛，嚟過都唔參觀吓，好可惜lor；仲有就係有個超級麻煩ge靚仔係度攪攪震，真係大煞風景……

夜晚就同阿紀一齊食飯，席間陽光猛烈，因為有兩個……唔係，係三個人係度大晒恩愛，攪到我地另外一邊毛管慄兼狂隊水。不過今晚我地真係講咗好多嘢，講咗啲估唔到亦都估唔到我會有機會知ge嘢，算係大家真情流露啦！不過我真係無乜嘢講，因為我又唔係拍緊拖，亦都無鍾意ge人，所以都係聽佢地講居多，haha，不過知道咁多嘢，都有啲危險ga……

跟住大家就一齊搭火車走啦，不過當去到沙田ge時候，就有三男伴住一女落車，幾夠排埸呀，而我呢？就即刻變咗單拖啦，佢地真係夠兄弟呀……不過其實係我衰多口lor，係我開口問人做乜唔送女朋友返屋企，咁佢兩個就即刻殊一聲落咗車。雖然佢地都有問得我一個人怕唔怕，但係唔通我話怕咩？唔好啦，費事一陣有咩要揹鍋呀……

>>August 18, 2004 at 7:15:41 PM GMT+8