2002 年 8 月 8 日 星期四 【雨】

以為人先會玩通頂，原來狗都會玩通頂......
話說尋日momo收o左過新玩具，佢不停o係到玩，
媽咪話佢玩到朝早冇訓過，呢隻狗真係一隻不平凡的狗，
自己都可以玩通頂......呢期momo好幸福!
培靈會今日主題係"活出轉化了的屬靈生活"，其實自己
等這類信息等o左年幾，好正呀!
在過去年幾，一直都沒有信息可以改變我，
又唔敢批評傳道人的講道，但有時講道真係好悶，真係想問"你o係到做乜?"
有D人實會話係唔係你自己有問題，我諗我會大膽答佢"有小小可能係自己有問題，但多數唔係......而係真係一D冇生命、冇自己體驗的信息，只是將D知識搬來搬去，幾失望......"
不過，知道自己隨便批評，可能只是看到事情的一面，太過主觀呢，或者其他人聽得好開心、好有領受呢!
今晚同阿Ruth慶祝生日，食上海菜自助餐加打邊爐，間鋪頭唔係好惦，大家都覺得佢隨時執!
有時真係覺得自己對D女仔過份關心，好驚又令人誤會，
不過性格上真係鍾意關心女性，而且真係冇動機，惟有盡
量小心......



>>August 9, 2002 at 4:25:23 PM GMT+8

2002 年 8 月 7 日 星期三 【晴】

今日培靈會主題是"捐輸的屬靈策略與回報"，好大提醒......之後，又去o左游水，我諗我真係愛上o左游水這種運動，在水中放鬆自己o個種感覺實在好正，好平安，有陣時人唔多，我會o係到祈禱。一種與造物主很接近的感覺。
今晚同寶寶去行街，好開心，亦都要慶祝教育學院收o左佢，多謝天父!我們去o左食迴轉壽司，食o左好多，其實羅小姐比我食更多o野，有一次佢食o左五塊pizza，好似前世未食過咁......
momo今日生日，媽咪整o左隻雞批佢食，呢次佢就發啦!又有隻新玩具，叫"窿窿"，其實佢幾聰明，講一次就記得玩具D名，momo! Happy Birthday!



>>August 8, 2002 at 3:57:31 PM GMT+8

2002 年 8 月 6 日 星期二 【陰】

momo呢期好"痴"身，日日都跟住我，仲成日笑，今日我抱佢上我張上格床，佢竟然o係個枕頭上面抹咀，呢條友，呀對唔住，應該係呢條狗真係想死，抹咀咀呢樣o野一向都唔會o係我張床上面，可能我真係太"錫"佢，搞到佢越o黎越大膽......
培靈會今日講事奉......
"天父呀!求你讓我事奉向著𣿫，不是向著團契、人、傳統和制度;幫助我不要做摩西臉上的帕子，卻做一個透明的人，讓人看到主耶穌基督的榮光!"


>>August 7, 2002 at 4:33:09 PM GMT+8

2002 年 8 月 5 日 星期一 【雨】

冇錯!又係講培靈會，就算睇o既人覺得悶，都冇辨法，因為重要的，總要記下來。
今日主題係講苦雖，過去以為自己對苦難這個話題都幾認識，今日又可以將全部認識丟棄，再次學習過......
好高興自己這幾天都有寫筆記，因為睇番都要慢慢吸收呢!
今日雖然很大風雨，但都去o左游水，有D凍，不過有唔同感受，特別當我見到一個父親抱住個仔，教佢游水，覺得好溫暖，我也很想天父天天抱著我呢!


>>August 6, 2002 at 3:14:06 PM GMT+8

2002 年 8 月 4 日 星期日 【雨】

今日的培靈會提到基督徒被人論斷，回想起自己被人批評的時候，雖然不大介意，但點都有D不快，天父爸爸賜下這段經文給我:
"我被你們論斷，或被別人論斷，我都以為極小的事；連我自己也不論斷自己。我雖不覺得自己有錯，卻也不能因此得以稱義；但判斷我的乃是主。"林前4:3-4
今日覺得好累......

>>August 5, 2002 at 3:32:23 PM GMT+8

2002 年 8 月 3 日 星期六 【雨】

今日去完教堂，食完飯之後就去o左圖書館，睇書睇到圖書館close，但係竟然仲好精神，睇6小時書都咁精神，唔通中午食牛减飯會精神D.......
不過反覺自己求知的心又回來了，記住係求知，唔係無知。
晚上知道去短宣的團友平安回來，開心，天父，謝謝𣿫!
尋日講開怎樣給人留下深刻的印象，回想起來，有三個人留下深刻的印象在我心裡，刻在我的心中，就係以前留學認識的黃牧師和師母，仲有就係江牧師。
黃牧師的理性，江牧師的感性，再配合黃師母的關懷，實在改變了我的生命，真係希望自己唔好咁懶，可以多D為佢地祈禱。希望快D有第四個改變我的人出現......
今日momo(我隻狗)成晚好開心，kiss完我隻手，仲咀o左我個臉兩次，好肉酸呀!
momo實在很可愛，如果有一天她要離開，都唔知點算，可能傷心過失戀，生命始終都是最重要。唔知上到天堂可唔可以求天父令momo番生，最多只係同momo一齊唱詩都好......
頭先番屋企爭D比電視台影到，好似係到採訪緊關於打風，依家都仲係1號風球，唔知個風叫乜名呢?

>>August 4, 2002 at 4:22:18 PM GMT+8

2002 年 8 月 2 日 星期五 【雨】

今天的培靈會依然正!更生活化......
"怎樣給人留下深刻的印象？"
原來幫助人要像耶穌有那種"臨格性"，意思是在那一刻將自己完全交給人，我想我過去就是沒有將自己完全獻給人。這就是真誠，並要用生命改變別人的生命，別人就記得你。這同時亦是所謂身上發出來的香氣，這種香氣，不自卑，不驕傲。
今天學了很多，求天父爸爸使我將這些教導常存在心裡，並且活出來!
今晚家會食自助餐，很滿足......
看見一位姊妹買o左D屬靈書，原來她有這樣追求成長的心，我也很開心!


>>August 3, 2002 at 5:12:07 PM GMT+8

2002 年 8 月 1 日 星期四 【晴】

今天是精彩的一天......
一早起來，便去到培靈會的會場，好多人，今日我要坐詩班席，向著聽眾，所以一定唔可以釣魚。
今天主題是從高峰到深淵經歷--"三層天"與"一根刺"。
在日記我只會記下幾句，否則就變成講道筆記。
靈修學中，過去都認為三層天是最高的境界，溫博士今次推反這個思想，並提出最高境界其實是"和神對話"，這樣說以引起一些反對的聲音，且看發展如何。
其實保羅用第三身"這個人"來代表自己，就表示他不看重這經歷。所以三層天不是最高境界也可以理解......
說到這根刺，神原本的旨意是不叫人受苦，所以聖經說這根刺是來自撒但的差役，神最後沒有拿開這剌，因這剌卻更加顯出神的恩典來。溫博士舉出的例子使我得益不少，其待有機會再聽錄音，明白更多。天父爸爸多謝你!
陪靈會之後我去o左遊水，好舒服.......
晚上有第六次分享會，有Belinda、Josephine、阿秋、渣巴、Hullian和我，感謝主，神必有預備!
希望有第7、8到無限咁多次的分享會，我會繼續努力下去，願我在這裡可以推動靈修，好好服侍弟兄姊妹!


>>August 3, 2002 at 4:47:36 PM GMT+8

2002 年 7 月 31 日 星期三 【晴】

聽著Belle & Sebastian的音樂，覺得好清新，好舒服......
今日是第七十四屆港九培靈研經大會的第一天，今年有幸能參加。希望一連九日的培靈會都出席，一早起來，其實都好累，但仍帶著其待的心情......
今年講道會由溫偉耀博士主講，正!
主題是"生命的剖白--探索九個深刻的屬靈經歷"，以聖經新譯本來講哥林多後書。
今日內容是寶貝與瓦器(林後4:7-10)，一開始我就想喊......
雖然我是瓦器，但有寶貝在我裡面。
相反，雖然有寶貝在我裡面，但我仍是瓦器。
知道自己是瓦器，是一個有血有肉的人，會犯罪，會哭。
完全感受到保羅那時"四面受壓、心裡作難"的情況，有時真係覺得自己行到盡頭，但原來一個屬靈的秘訣，就是"不放棄"，全不花巧。因為無論怎樣，HE's still there, HE still care and HE still can!
另外，在世上我們可以有榮耀，但比神的榮耀，就算不得什麼.......
如果有將來無限的快樂，現在的苦楚就是短暫......
今天得著很多，天父爸爸多謝你，其待明天再聽𣿫講說話。



>>August 1, 2002 at 4:53:16 PM GMT+8

2002 年 7 月 30 日 星期二 【晴】

今天是這個月的最後一天，回想整個月，真係覺得好充實。
除了讀夜校進修覺得學到好多o野，還有很多運動呢，我諗游水都游o左7次，真係覺得精神o左.......好開心......
還有一定要講的，就係認識聖靈更多，天父爸爸多謝你!
還有看見一個叫阿Wing的女仔改變，巳往在詩歌裡有個愛字，她就會哭，
但今次她主動領詩，而歌裡有個"愛"字，她沒有哭，反而我覺得佢係開心，並開始改變，那首歌叫"禱"，天父多謝你，因你是聽禱告的神。
最後發覺自己找到一位靈友、一位同行者、一位可以傾心事，並在主裡一同成長的人，天父，多謝你，讓我可以認識她!
今個月真係好精彩!



>>July 31, 2002 at 3:51:21 PM GMT+8