2006 年 12 月 25 日 星期一 【微冷】

極有意義的一天

出世18年，今年平安夜係過得最開心，都明白到如何享受平安夜
一早返到教會，比平時遲，因為冇晒主日學要返lu！
本來諗住入去聽佈道會師母講道，念在我訓得5個鐘
沖涼時仲要合埋眼就訓著，無謂入去訓覺啦！點知周俊係度寫聖誕卡
搞到我想寫野，於是就溫pure，連主日學點名都冇做到添！
哎呀！幾多個人信左主呢？未問添！
我去波仔屋企幫佢拎野食，好香，佢一路分享佢d事
有點兒覺得自己虛偽，我都唔知自己既回應係真心定假意
但我又好想佢講喎！我又想聽喎！但唔識回應既時候又求其講d野咁
都好開心，學習如何令人講野比我聽，最鍾意就係聽人講野
招呼新朋友食物食晒！我同阿lun洗完野再一齊訂飯
兩點左右先食，食完係教會溫書，嘩！教會好正，一個溫修好地方
溫溫下個腦都「溫溫」下，去打左陣籃球，亂咁扔個波上去
用下力都幾好relax架！
之後同鍾太去禮堂底睇下有咩主日學禮物，真係百寶袋
拎左好多封塵既，可能有1xx份添！唔駛買就好喇！
跟住到5點係禮堂練歌，一唱到高音歌就驚自己個水樽爆
左右d姊妹(尤其小媚)發出接近超音波既頻率，超音波都好d，我聽唔到
之後分返四組，恩慈家同伉儷一組，坐返恩慈家個行，親切感大增
練歌練到好癲，興奮的癲，正！
終於出發，行去豐景園個邊，通常佢地唱，我同一d弟兄姊妹派傳單
途中聽到d細路仔用組口唱歌，真係要為佢地祈禱
之後坐輕鐵去市中心，係車到同兩個唔識既俊男傾計
佢地都有返教會，但係返咩「麥當勞堂」，其實係錦秀堂
「麥當勞堂」幾好，全世界都有
到左大會堂隔離四組合埋一齊唱歌，又一齊又舞又唱，開心無比
玩得興，傳福音都傳得興，雖然係冬天，除左溫室效應外，弟兄姊妹都比都我溫暖
完左之後返教會拎行李，一齊去大拇指食糖水
方子、余仔、Carman、Aman、Iver、Phoebe、徐副、劉景、殷豪、小媚、方洋
一行13人，好開心，第一次唔係跟周俊同d唔係同我識左好耐既弟兄姊妹享受美食
不過d菠蘿好酸，食完之後同方子搭751返歸
期待黎緊更多可以同大家生活既日子

代禱事項︰
1.一切照舊，尤其Anson，仲有唔開心，樂觀d，倚靠神多d吧！
2.一陣恩慈家職員會camp，好似得15、16個人去咋！但都願大家平安到達，一齊玩得盡情
3.聖誕節正日，願大家都可以記得或者知道聖誕節既真正意義
4.都願收到單張既人會係黎緊星期六或者星期日出現啦！
5.願各弟兄姊妹，都可以過開心既聖誕節假期，先放下壓力吧！

>>December 25, 2006 at 11:33:33 AM GMT+8

2006 年 12 月 23 日 星期六 【乍雨乍晴】

寒冷中的溫暖、興奮

17/12----我終於受浸啦！
好興奮，一路都係興奮，好多人問我緊唔緊張，我都say no
我只有興奮，一秒一秒的期待，期待「死後復活」
我而家已經係重生既人，都係重新生活既時間
係等候浸前詩歌既時間先有少少心跳加速，詩歌中又比我好感恩
不過有d無奈！唔知道要帶白襪，要赤腳等，好凍！
終於浸左啦！浸完之後去換西裝，回想第一次著全黑西裝係去喪禮
今次白色shirt衫就去浸禮，由黑到白，感受到神既光明
仲要個日天好藍，雖然係今年最凍既一日，但天氣極好，唔覺好凍
我仲記得專登著條爛牛仔褲去，浸完就煥然一新，感覺良好
好多謝弟兄姊妹贈送既禮物，收到既比我生日收到既仲多好多
都多謝弟兄姊妹(偉雄)同埋一d朋友(lokman、kenny)既觀禮
最開心都莫過於未信主的媽媽黎觀禮，同我一齊分享我既喜樂
浸完我分享見證，佢地話我篇見證仲長過講道，有d人話好感動
雖然我都分享到喊，其實我都覺得唔係好感動姐，哈哈！
收到好多書，仲有d卡，除左稱呼我三叔之外，其他卡上寫我既「恒」字都錯
多數都寫左「恆」字，唔緊要，心意姐！恩慈家既卡有好多弟兄姊妹寫d野好搞笑
最搞笑既係「bobo's bonnie」，佢話多謝我照顧bobo，我都冇乜照顧佢
唔單止咁，仲叫我快d搵返個三嫂添！哈！估唔到會有弟兄姊妹咁同我講

而呢個禮拜我收到好多神比我既禮物，每一份都好大好大份
星期一、二都上堂，呢兩日都留係學校留到9點半，比亞叔趕
因為要做phy lab report，返到屋企完全感受到開OT既感覺，都幾正架！
星期三聖誕聯歡會，見到桌上面有好多好多野食，一諗到係各位同學整既就開心
一班同學入面可能大家之間有好多分岐，但大家都合力買野食，整野食
大家都為同一樣野而努力，又有一齊玩既時間，真係好開心，係我最基本既希望
呢份係神比我既第一份禮物，玩既時候我都冇玩到，只係做下助手
終於可以透下，終於可以鬆一口氣，終於想留戀係返個班入面
之後夜晚入去屯門同亞婆食飯，有媽咪、周俊、大佬一家四口，仲有媽咪個fd
我地係屯門市中心海霸食，好齊全，雖然多左媽咪個fd，但神終於比我地聚埋一齊既機會
坦白講，我唔係好想媽咪個fd係度，但媽咪想我都冇辦法，呢個其實係我一個好大鍛練
我唔係好受到佢個fd，我不斷利用佢黎訓練我對人既包容度，真係幾難
點都好，神都比我地一家人團聚既時間，即使我地之間冇乜話題
但有陣時有d野係用說話都表達唔到出黎，食飯之間冇野講，食既過程之間都有無形既聯繫
呢樣係神比我既第二份大禮物

星期四，朝早返學補phy，本來係朝早phy，中間pure，然後lunch後又phy
但pure個亞sir話唔補，鍾sir又話廢事我地之間有四個鐘冇左，所以淨係補朝早
yeah！本來諗緊點樣d時間點樣可以鬆d，因為夜晚又入屯門同仁愛1組打邊爐
而家唔係鬆d，係鬆晒！返到屋企慢慢執野，執定下星期去camp d野
執到差唔多，飯到懶得食，三點左右入到屯門lu！本來諗住入去溫下書，等到五點幾去買野
無啦啦鍾太叫我搞選舉執事d野，yeah！又可以事奉神，而且可以收到信
我都有份選執事呀！浸左又夠18歲，等左收呢d信好耐啦！
搞到五點幾，同冬、泳池、維、KG去買野食，當初唔知做乜事，買得勁少
之後買返多d，然後返教會開餐，又話猜猜畫畫，又交換禮物，開心無比，真唔捨得離開教會
呢件係第三份禮物，一齊溫溫暖暖渡過開心既一夜，夜晚去周俊到訓

星期五一朝早起身搭車返出旺角，因為要補課，遲到3個字添！
補完就去灣仔考評局，終於搵到上年ce retake張證書啦！等左成個幾兩個月
然後五點幾返到屋企就訓教，好累，一訓就訓左兩個幾三個鐘
食完飯，睇埋賭場風雲就又入屯門，又去周俊到訓，因為第二日要pre查

等左好耐啦！好想見到d弟兄姊妹，尤其係恩慈家個d，好掛住佢地，好似好耐冇見咁
pre查既時候兆恒都帶得幾好，係較少問我地野，我諗都係佢係想將資料講比我地聽
加上冇乜時間，我都吸收得唔錯，對於下星期查經充滿信心，受浸後既第一個查經，正！
跟住返主日學，講帶查經技巧，d野好似來來去去都係個d咁，只不過不斷重覆提醒我地
完左主日學就返團契，遲晒到，鍾太送左張卡比我，事後無聊想睇佢寫乜
有張大鈔票，嚇親我，我會好好咁保管住，盡量都唔會用住既，多謝鍾太
今次週會係笑笑笑報佳音，其實主要都係玩，世界之最、傳橡筋……好似幾興奮
但不免有點兒悶，只不過同弟兄姊妹玩始終都係開心既
嘩！活力崇拜敬拜讚美會，唱好多詩歌，一諗到神比我既恩典，諗到就比我既苦況
就不免好感動，受浸係眾弟兄姊妹面前喊完，今次又黎，但真係好感動
好多謝余仔為我祈禱，都感謝卡富既紙巾，好感謝身邊既弟兄姊妹們
最後既活動，化粧晚會，得恩慈家同和平家咋！都得22人咋！但都算係有個時間一齊玩呀！
食左好多野，玩得好盡情，個個都久唔久搞下d gags，i like it，非常開心
期待黎緊既日子再繼續同各位弟兄姊妹相處！

代禱事項︰
1.都係為媽咪既健康啦！佢前排仲跌到添！真係求神保守佢！
2.Anson唔開心呀！願主賜佢身邊既朋友，賜安慰比佢！
3.方子話想知我受浸既見證，我可能會打返篇比佢，願主感動我再將d內容打一次啦！
4.天氣真係凍啦！願主保守各人都有溫暖，熱心倚靠主！
5.平安夜到啦！藉著呢一日要傳福音比人，使更多人能認識主
6.25、26號恩慈家去camp，願主都使呢個camp順利，給大家彼此和睦既時間
7.新一季主日學開鑼啦！求主讓多d人參加，使他們更認識我們的天父

>>February 21, 2007 at 10:44:42 PM GMT+8

2006 年 12 月 16 日 星期六 【乍雨乍晴】

期待著的興奮

新一季主日學又黎啦！又係我最忙既時候，都要搞報名d野
一路搞，不知不覺搞到點幾先搞完，之後又孤身到俊達食快餐
又食唔晒！都唔知做乜冬天胃口會差左，以前係好左好多架嘛！
食完上到，好眼訓，眼訓前既我當然諗下野先啦！一諗到朝早係最後一堂浸禮班
就諗到下一個禮拜就係小弟大日子啦！呢幾日都聽到d人話個日會送野比我
聽到之後好開心，其實只要有人去我都好開心架啦！仲要雙重開心添！
當初我只諗住浸，都冇諗過會收禮物^^，however，我想多d人同我一齊分享我既喜悅！
補完習就返返屋企，好累，又訓覺，好舒服！

星期一同星期二都正常返學，星期一係第二次做phy lab，好enjoy做個段時間
唔駛學新知識，又可以觀察到d野，又可以知道自己有咩做得唔好
更enjoy寫phy lab report，用電腦寫，尤其用電腦話set-up diagram，好好玩
可能都係因為phy lab先令到我更肯定我對電腦有莫大既興趣，我總feel到我會係呢方面有出色既成就
憑信心，領受神既恩賜，我要係電腦上貢獻社會，貢獻人民，貢獻教會
星期一有好多堂都唔駛上，pure朝暉冇返，UE三堂miss去左運動場彩排
我地就利用呢d空檔既時間做返上星期五做既實驗既lab，要夜晚11:59:59前交到
我屋企冇電腦用，所以要放學用phy lab部腦，做得好快呀！七點幾八點做完啦！
唔想咁快離開學校，於是打埋篇日記先就，打完就九點lu！係學校既時間好開心，即使係我自己一個
我可以有好多安靜既時間，有好多野可以冷靜思考，又可以用電腦睇人地d日記
返到屋企即刻食飯，之後又係好夜先靈修，唔掂！冇精神既靈修唔係靈修
我唔係唔想朝早靈修，屋企既唔方便係一個好大既障礙……
星期二我又係留係學校做phy lab report，今次做得好耐，做到九點先做完
個圖好難畫，但我畫得好開心，當我見到周圍d同學走晒，得我一個留係phy lab
就好大成功感，成功在d老師、職員對我既信任，相信我會盡責，close windows，鎖問，熄燈……
問心個句，如果我唔係做得好唔會有人相信我既，所以好感恩，我有一顆盡責既心
離開phy lab，見到教員室仲著燈，見 到秋官仲好勤力咁做野
雖然佢有d不良習慣，但佢真係一個好老師，教得好，學識高，有點兒太過循規蹈矩
至少起碼學生服佢，有呢個老師係我一生中其中一個大榮耀

星期三同四都係陸運會，雨天，糟糕了！
入左呢渠記七年，今年第一年坐係看台到睇住一班班團體操出黎，同時都係最後一年
但可惜，最後都冇機會睇d師弟師妹作既努力，千人操、銀樂隊、啦啦隊都冇得睇
佢地既努力係咪就咁付諸流水呢？係既話就可惜啦！
算啦！係看台見到男童軍係操得最差既一班，都已經令到我冇晒mood啦！
想當年，有個因工傷殘既消防員黎演講，計埋頒獎d時間，用左成兩個幾鐘
個個團體都企係度郁都唔郁，除左我地男童軍，其他團隊都有人暈低
個次男童軍真係威晒！威都唔係重要，人地暈都代表佢地捱到底呀！但而家d學生？唉
全部都唔捱得，全部都可能太受家長愛戴啦！令到佢地根本冇受苦既機會
咁樣佢地點成長呢？點都好，呢個雨天係比我地冇比賽既學生一個釋放
同時，比一班師弟師妹減少左鍛鍊既機會，下年似乎會一落千丈
我可以唔理，但我唔忍心，因為我都曾經係一分子，真係唔想睇住佢地死
但我有心都無力啦！問題不在我，乃是在他呢！
好在，神有聽我禱告，乜野項目取消都唔緊要，至緊要畢業生跑步唔可以取消
最後有一個唔落雨既天氣下舉行，恰巧地，跑完之後即刻落雨！happy！
第一年一點放陸運會，都係最失敗既陸運會
三點幾返到屋企，真係想幫媽咪搬野執屋，但可能淋病左，好似有d燒
返到去就訓，訓醒就食飯，媽咪有做完野，佢隻手一定又痛喇！唉！

有日夜晚，收到方子既電話，佢叫我星期六團契分享一件最唔開心既事件，仲要呢一兩年
我真係諗唔到，但我記得我有喊過，有唔開心過，有發過脾氣，但咩事真係唔記得
可以令到我喊既應該都係大件事，但係係咩事呢？我同德希講呢件事
佢又搞gag︰「你最唔開心就係識左叫你分享呢個人」抵我同佢咁老友，佢真係比到好多開心我
佢可能唔識得去成熟地關懷人，但佢有好多言語、行為都係令我感到好開心架！
之後同佢傾下計，又去打下機，減輕壓力，佢又請我玩賽車game
佢只想我同佢玩，咩都唔介意，慢都冇所謂^^，有佢呢個死黨都係個好大既恩典
估唔到，我一直都冇邀請佢去睇我受浸，我淨係同佢講星期日我浸，佢竟然主動同我講話睇下黎唔黎到
異常既開心，都啟發我一樣野，我受浸係我一件快樂事，呢件事唔應該淨係同弟兄姊妹分享
仲要同朋友、家人一齊分享，我之前係因為佢地唔信先唔敢邀請佢地
但係我應該要企係朋友角度睇，唔需要理佢地有冇信仰，我只係想佢地都同我分享喜樂姐
過幾日之後終於諗到啦！

星期五，差不多全日幫師弟補習，係咁叫佢做數，當佢諗條數點做既時候我就溫書
正！又有錢賺，又可以溫習，有多少少錢對我黎講已經好好架啦！至少我用得好舒服
返到屋企，又攤左係度！～仲有兩日咋～

星期六，好凍，朝早補習，補完返到屋企執野，好重呀個袋
仲未整尼團關顧既樂器添！返到教會先求求其其整左佢先
係車上，係咁諗我點樣講最唔開心既事，諗諗下訓覺，唔理lu！
上加油站，都係好開心，總係成日好想笑，教會好warm呀！學識點問人地問題
之後三點放加油站，好快咁整完個樂器，就求其完lu！
到團契仲warm，好正！真係一個五星級的家，仲有咁多「親戚」添！
週會既時候，有d小遊戲玩，玩完之後亞寬分享屬靈低潮，然後就到我分享
我試下用德希個句黎做開場白，都幾成功！kekekekekee
崇拜唔記得李姑娘講咩，總之係關於和好三步曲，第一步係與神和好，即係聽日既受浸
「死後復活」，期待浸入水既一刻，之後「復活」啦！
都感受到「最後的晚餐」，耶穌同十二門徒食，我就同卡富食
食完之後我返教會，好黑，好似係客西馬尼園咁，又回想夏令營既情景
不過我冇係個度禱告，醒唔起，失敗左！
聽日就係受浸啦！耶穌三日後復活，我就三秒後「復活」更新自己，yeah！

我好希望朋友們會同我一齊分享快樂
我好希望未信者會同我一齊得到永生
我好希望未受浸者會比我睇到佢受浸
我好希望弟兄姊妹會為我感恩禱告！

最後一個問題︰我最唔開心既事係咩呢？
(你地可以答我，我只會話係定唔係，冇hints，相信冇乜人知，尼團恩慈家就有好多人知呢！)

代禱事項︰
1.清楚我既都知道有邊d代禱事項例牌架啦！但要憑心為個d事祈禱！
2.願主讓更多弟兄姊妹向我訴說心事，等我可以為更多人代禱！

>>December 17, 2006 at 12:39:57 AM GMT+8

2006 年 12 月 11 日 星期一 【颳風】

真多說話----累

呢個禮拜有好多野講，其實係有好多野要講，唔明我講乜呢？

上星期日好快咁出到旺角，=o=晒嘴，要去網吧到搞辯論d野
仲要無啦啦10蚊入會費，再加20蚊5個鐘任打，但都殺左我啦！
去到我都打左一陣機，但見到亞古同千千咁辛苦做緊
我唔可以掛住玩，而楓同埋波波就係咁打機，打左成兩個幾鐘
我累都懶得話佢地，由得佢地，我呢類人都係負責打稿
本來要用20蚊黎做「功課」已經好唔妥，仲要食二手煙添！
好彩都唔係好多，但都極期望緊1月1號既來臨，我地就有救啦！
搞到七點幾，都算有一大進步，於是就散會lu！終於可以歸家
我真係想即刻訓覺，但仲未做中化功課，好彩係演講辭少於四百字姐
否則我真係會嘔血，少於四百字可以幾十字嘛！哈哈！當然，我會寫三百幾既

到第二日，大戰前一日，差唔多組組都留係學校搏殺
我個組進度好慢，但冇乜組員擔心過，當然啦！有亞古同埋丹楓兩個辯過論既
亞古仲要做過好多次最佳辯論員添！所以都唔係點驚
星期一係day4，所以我有得早放，我同德希同埋ann落去花墟食飯
第一次食，麻麻地，估唔到我呢個乜都食既人都會覺得麻麻地
可見好味程度係有幾高呢！食完就返返學校，等我d組員返黎
等左一陣，去幫團契買定d野食，出左學校門口冇幾耐，副校叫住我
佢無啦啦問句︰「有冇信心上台分享讀書心得？」我都唔知點解會答︰「有！」
咁佢就叫我準備喇！於是我買完野食，放係phy lab就返到班房，佢地仲未返
我就諗定份稿先，諗左冇耐佢地就返黎，玩我咩？
亞古同丹楓不斷比人搶住問野，到好夜我地既稿先現世呀陰公
臨走之前留下男兒淚(唔係我)，佢竟然會喊，真係大吃一驚
後來谷恒同我講我先知道咩事，唉！又係小事化大，不信事實而造成的，該煨！

唔緊要，丹楓既實力仍然咁強，第二日既辯論大大獲勝呀！我雖然得27/50
但對我黎講都係唔錯架啦！我係說話方面既技巧都增長唔少
而且對一d時事又產生左興趣，開始想關心社會，不過，有時間先啦！
下晝三堂pure，朝輝冇返，唔駛上堂lu！頭兩堂過去隔離班睇辯論
最後個堂度稿，諗下第二朝早會點樣講野，盡量都唔搞gags啦！
但我驚佢地太悶喎！真不知如何是好呢！
呢一日都好累，散晒！但仲未放鬆得，真係可憐！

星期三啦！朝早到我上堂，前面都有兩位師弟師妹分享，我最後
我覺得自己講得都ok擔定，但唔知點解隻腳又陣，但我又唔緊張喎！
可能因為覺得比人玩啦！副校叫我準備三分鐘，前面d人少我咁多既
真係=o=o=o=啦！不過最後都講左成四、五分鐘
返到上去課室，chem堂分組，小玲講左d野幾heart到我架！
不過我冇講，而家係度講，我感受到一個講者比人係背後詛咒既辛苦
小玲仲要正面咁同我講添！坦白講，都唔係我自願上台講既
況且呢d都只係想比大家一d意見姐，唔想聽都唔駛咁講野呀！
(可能你唔記得你講左咩，有四個字令我感到好難受，但我知你係玩姐)
唔緊要啦！小事一樁，自己又有多d經驗既！
chem quiz fail左，要補測，掙兩分，唔知點解讀書時間總係唔夠咁
呢d唔會打沉到我既，我會同chem死過

星期四中化堂我要做小組討論，討論得好激烈，有d火藥味
不過d火藥味都幾良性，大家都係笑住口講自己d論點
我個d就根本係「廢」點，我自己都覺得好難頂
「人之初，性本善」？我都唔知呢個題目有d咩可以講，仲要比人逼我做反…方
算啦！都係段練說話姐，仲有時間，真係想係中化oral有d成績
之後掉左堂，lunch之後個一堂係eng，同miss一齊傾聖誕聯歡會d野
搞party既同學不斷咁問其他同學意見，但大家都唔瞅唔釆
我最後仲要頂唔住鬧晒成班唔理自己班d野，太過激動，仲要喊埋添！
都係我留下男兒淚，唔知同學會唔會因為今次而討厭我呢？
我明白，我唔係一個有才能既班長，但我撫心自問，我一定係一位盡責既班長
又諗到，我唔係一個有傳福音能力既基督徒，但我至少做好神既真理
我盡量唔會做一d令人覺得「搞錯呀！基督教就係教呢d衰野呀？」
唔可以令到身邊既人會因為我而誤以為基督教唔係好既
好在，最後有鍾sir既幫助，加上亞古既帶領，最後都係成班作決定，真感恩！
好多謝鍾sir同埋有心兼用力搞好班既同學，都好對唔住各位同學，我太激動！

星期五，我lunch time要做主持，都冇乜野要講，但係聖誕音樂分享會
比大家有機會接觸上帝，感恩到不得了
放學前做chem lab，之後補測quiz，quiz完又晏又累，都去唔切團契
聽日就係星期六，可以鬆口氣啦！可以返教會啦！可以見弟兄姊妹啦！

星期六，入到屯門返教會，上主日學，又興致勃勃地搞gags
之後返團契，團長帶，有砌圖玩，但好難玩，我個組得三個人，ok灰
不過d活動都幾好，大家都玩得幾開心、幾專心
同各組既弟兄姊妹「宣傳」我下星期受浸，有d緊張，邀請左冇人去會好灰的！
都邀請左相熟既弟兄姊妹，但太趕啦！有好多都話唔得
係感到d可惜既，但我相信佢地個心仍然係度既，都有見證我受浸既一刻既
好開心，因為終於收到做司事既紙啦！二月做，yeah！
夜晚同周俊、余仁、高雞、小葉、子僑食飯，好耐冇同周俊食飯
今日好早返屋企，我都幾累，不過累極都要幫周俊搞埋太空戰士五
終於整到太空船lu！

星期日，最後一日浸禮班，不免有d唔捨得，但諗到下星期既受浸就感到好興奮
我係第一個拎住「初信造就證書」受浸既人，好大既恩典啊！
屯門好凍呀！

篇日記好長，因為好多野做，好累，好多野講，又辯論，又分享，又討論
但經驗既累積，係神所賜既！

代禱事項︰
1.下星期受浸啦！願主保守觀禮既人到個日都可以有平安既腳步！
2.都願主保守小弟既健康，讓當日有最佳狀態，分享見證！
3.願主團結7B班，中間有唔團結唔係問題，我只想大圍團結就夠啦！
4.媽咪隻手仲係唔知點咁，願主幫助佢，陪住佢。
5.好感恩！神比我可以發洩自己既怨氣，但願有更好既方法去表達自己。
6.願主保守各弟兄姊妹，在患難中事奉你，在壓力下感謝你。
7.願主保守各位同學，因著我同一些信徒認識你，該大家在永生再見！

>>February 21, 2007 at 10:45:10 PM GMT+8

2006 年 12 月 6 日 星期三 【晴】

三叔返黎呀！努力！

星期日返完教會之後，就去幫師弟補習，返到屋企散晒！
但係仲未做中化功課，搞下搞下，最後都係冇點做，因為第二日唔駛交
好累！每次星期日都係期望緊訓覺既來臨
其實都係自作自受，早d做完功課咪唔駛咁辛苦囉！就係懶得早做
所以第二晚要趕功課，只可惜，星期二一日要quiz三科
chem、pure maths同埋U.E.
所以決定放棄做功課，努力d溫書，不過，最後淨係溫左chem少少
諗住訓一陣起身再繼續溫，點知一起身就7點
真糟糕！都唔知點死
測既時候=o=晒！唔識，唔知講乜，唯有用一招「吹」
滿分62，只期望有25分，岩岩合格算，但機會好微
pure仲死，連我最有信心個科都完全唔識，我竟然見到題目停晒手
竟然係無從入手，以前都起碼寫到d野呀！而家竟然寫唔到
打擊好大！quiz完，做返中化功課，預左遲交扣一分
係十分扣一分，即係扣十分，好貴
秋官(黃sir)又計到咁準，所以中化功課係同學好著重
我都唔想豪個十分，但基於懶惰，已經比惡魔走入我個心喇！

星期三至星期五都好累，間中傾下辯論，班入面既辯論
個個都好努力呀！而我好似係我個組入面冇乜貢獻
料又係d組員搵，我淨係聽下聽下，諗下，吹下，同冇做野冇乜分別！
到星期五校園福音團契，係度用瓜子整d圖畫出黎
嘩！創意無限，都唔知道佢地點解會諗到出黎，佢地既思想都幾難捉摸
從佢地既說話、行為睇得出佢地未係基督徒，都唔係好熟悉神
但佢地用佢地整既圖案黎表達對神既心意，係唔係真心我唔知道
不過，佢地所講既我諗其他基督徒知道，而唔會講到出口
甚至有d係連基督徒都估唔到，其中一個令我印象最深刻
幅圖有一個十字架，隔離有個「石」字
個同學講︰「係基督面前，硬既石頭都會變成軟。」
我覺得好掂，「石」係硬既，用瓜子貼係紙上面砌既「石」字就係軟既
當然，個個同學似乎係亂咁吹出黎，但呢樣都係個事實
至少佢都有諗過呢d講法，掂！

到星期六，係學校補完習之後趕返屋企，換完衫執完野已經十二點九左右
趕去搭車入屯門，返教會，仲要未幫周俊搞notes
係車上面睇返上星期主日學d notes，好似唔記得晒咁，失憶
到屯門，即刻去買返兩個包先，冇食lunch，頂住先
又趕返教會派主日學file，然係搞周俊d notes
好忙！好忙！搞完之後又趕返去我既主日學，仲未開始
好在，係主日學，傾下計，搞下gags，幾開心！
之後去團契，今次係使命人手，斯文帶
佢講得好有感情，我成日都覺得佢好似一個我曾經見過既人
可能係雞哥，應該冇乜人識，都係周俊d fd

完左團契就上崇拜，上完崇拜就同卡富去食飯，成日都淨係同佢食
都好既，大家可以了解多d，傾多d
不過好似同其他弟兄姊妹冇聯繫咁姐，定係d人以為我地要撐抬腳呢？
食完飯就返教會，諗住睇亞毛同埋余仁玩risk
佢地話去亞毛屋企，咁我咪跟埋去囉！點知我都玩埋一返
用左好多「腦力」，超累！個個都係第一次玩，但幾正
玩左成兩個鐘都未玩完，所以需要好多時間
原本唔係諗住玩架！諗住佢地玩，我溫書架！誰不知……唉！
返到周俊屋企即訓，第二日上完主日學，好快咁點完名
趕出去同同學搞辯論，本來唔駛幫人補習，可以留係教會溫書
就係呢個辯論，唉！

點都好，一時三刻既努力係唔得架！我要搵返中四中五既我！

代禱事項︰
1.讀書方面有危機，但唔可以比佢打沉架！求神堅硬我既心，趕走魔鬼！
2.綜援就黎申請到啦！到時求神比我有返個安樂居啦！
3.謙(毛細佬)好耐冇返教會啦！希望神引領佢既腳步啦！
4.謙(團契)都好耐冇返團契啦！而家唔知點呢？求神仍與佢同在
5.仲有兩個禮拜受浸啦！未邀請人，希望下個禮拜會邀請到人啦！
6.主日學部聚餐未點搞，我總係覺得到時有好多人唔得，但神要保守大家有時間黎到聚會。
7.Anson，意志在你，你既決定冇人阻止到，願神都會令你明白真理。
8.媽咪隻手而家時好時壞，求神真係有大能既手醫治、減輕佢既痛楚。

>>December 6, 2006 at 6:54:22 PM GMT+8

2006 年 11 月 29 日 星期三 【晴】

奇怪的心情

星期日幫個師弟補完習之後，返到屋企，有d煩
因為第二日要搬走，要搬去我媽咪到住住先
將會租一個新單位比我地一齊住返，但我乜野都未執
有諗過第二日唔返學住，用多d時間執野，否則執唔晒
不過唔返學又唔係咁好，好煩，好想搵人傾訴
我望住本電話簿，望住每個人既名，諗住每個人個樣
奇怪！當我想搵人講既時候我竟然諗唔到搵邊個好
正常黎講我會搵Joseph既，但佢好似唔得閒
係我煩緊既時候又唔係好想有人反駁我，所以冇搵Kenny
有諗過搵周俊，不過應該會估到佢會講d咩既
都有諗過搵教會d弟兄姊妺，一係唔係好熟，一係就有d野佢地唔明白
當然都會諗下搵勞氏、小玲個d朋友既，但最後我揀左Anson
同佢傾左好耐電話，好耐冇試過，都發現到一個同我既諗法最相似既人
即係唔係我講既每一樣野佢都贊成，而係佢講d野我會覺得有理
佢都好客觀咁更正我一d諗法，我都欣然接受
之後我都有打比偉雄，同佢傾下計，同弟兄姊妹講完野真係舒服d

到星期一就搬啦！最後都決定左照返學，本來諗住一放學就返屋企執野
但最後留係學校打返篇日記，等下等下就六點半先返到屋企
返到去已經好累，真係唔想搬，第二日又要交功課，但而家又要我搬
根本冇時間，點講都好，我都係要搬架啦！
不過都執得好快，到九點幾就執完，再去食飯
但係成日個腦好鈍，好累，好辛苦，所以都冇精神去做中化份功課
都下定決心，比亞sir扣一分，其實即係扣十分，幾可憐
講就咁講，第二日我會比心機做，咁樣加一分又減一分抵消返啦！
都係個句︰「講就咁講」得個講，都係冇精神做
都唔知自己寫d乜，求其寫d野，夜晚又受誘惑睇流金歲月
咁就中晒招啦！我幾晚都有睇，幾日都好累
好奇怪，累得黎吸收能力大增，亞sir講d野我明喎！仲要清晰添

好多謝小玲，借二百蚊比我交左JUPUS費，終於交到啦！
唔單止借，仲要陪我排隊，等埋我交完添！
返到屋企睇埋揀咩科，終於諗到25科啦！但未決定個次序
其實可以唔駛理住既，不過總係唔想頭幾科咁求其
等緊下星期一鍾sir匯報下面三科既分別
Computer Science
Computer Science(Information Engineering)
Computer Engineering

更加多謝校長同副校長對我既信任，對我既支持
即使我屋企問題有好多，有好多困難，連學費都交都唔到
但學校同埋佢地都冇怪我，仲關心我既狀況
每次同校長同埋副校長講到我家庭既困難時候，都感覺到佢地對我既關懷
佢地唔單止係精神上幫助我，都有實際咁幫我
上次我係校園福音團契入面只係講左我以前每日都未必可以食得飽
甚至有時一日只可以食得一餐，但係副校聽左之後極度關注
送左一d乾糧比我，等我可以慳返d錢，真係好感恩
仲有校長同副校長合送既一份大禮物，我諗住十一奉獻比神之後
盡量都唔用，係無必需要既情況底下都唔會用到
餘下個d而家放係周俊到先，我相信係最安全既地方
校長同副校長都講，遲d一定要報答佢地，要幫一d比我細既人
當然，要幫一d有需要既人，我相信，唔單止佢地，神都想！

呢個禮拜個腦都幾暈下，有點兒痛
星期五入定去屯門，第二日家長日唔駛補UE
鍾太叫我諗見證，真係冇頭緒點寫，祈左好多次禱
夠鐘去pre查，真係好暈，好累，都唔知有冇發燒添！應該冇既
由一點半pre到兩點半，遲左去返主日學，頭腦好唔清晰
不過，為左提起精神，不斷努力搞爛gags
團契開始時，詩歌敬拜開始喇！對篇見證好感煩惱
但詩歌既歌詞、主席比我地既思考問題，都令我漸漸諗到點樣寫篇見證
到查經既時候，之後搞左勁耐野，五點先開始查，勁遲
完左之後冇時間分享，好灰，所以希望呢個禮拜會打電話搵弟兄
到崇拜既時候，好奇妙，由敬拜到崇拜完結時神都好似guide住我咁
一路教我點樣去寫一篇見證……

之後，我地團契小組第一次聚會，好開心，不過得三個人
兆恒、kevin同我，不過都同kevin傾左好多野
可惜我趕時間返教會打返篇見證，所以要早d走，唔緊要，來日方長
返到教會後，我即刻一連串的打篇見證，但我太遲返去
所以要鎖門既時候我都未打完，於是我叫Ken哥等多一陣
於是極速咁打d野上去，我覺得唔係好見證，但至少係神叫我打既

到星期日，我返教會等見執事同長老，冇乜緊張
但好興奮，好期待17/12既來臨，仲收到料去塘宣到浸
有機會可以邀請到我鍾sir到，咁就正喇！
見余仔爸爸媽媽，有時佢地問d問題我就驚答錯
不過都冇乜野，憑信心答，佢地問我有冇信心會到天家
我唔知點解極有信心，對神有信心，都對自己有信心
見長老時佢問一d問題，我答個d多數都唔中佢所諗既point
例如佢話信主有咩福氣，我就話得救，而佢就講永生，Great
我覺得唔似見長老，似上堂，短短既時間入面佢教左我唔少野
好開心！

代禱事項︰
1.媽咪呢排隻手又好似痛左好多，仲話吸氣同咳個肺附近就痛，所以希望大家為佢代禱
2.泳池而家好似個個禮拜都返到黎咁，希望佢他日會帶到佢屋企人一齊返到教會啦！
3.另外泳池要design團衫呀！祈求神真係可以讓我地可以有合一既象徵
4.阿楠(Anson)要努力啦！時間會沖淡一切，神都會帶佢行一條更加好既路
5.祈求神可以係我受浸個日帶到我d朋友同埋老師黎睇，讓佢地一齊分享我既喜樂啦！(我要每日為此代禱)

註︰步行籌款遲左打，以上日記只係由11月19-26日既日記)

>>November 30, 2006 at 6:09:18 PM GMT+8

2006 年 11 月 20 日 星期一 【晴】

完全明白

呢個禮拜發生d事好奇怪，奇怪得黎令我有好多得著

上星期同上年恩慈家組員飯聚，好開心同佢地一齊傾計
聚完之後同卡富、阿延傾計，傾完都有d煩惱，有憂慮
星期一返到學校之後，個人仍然好down，好灰，成日自閉咁
個晚我聽到神鬧我，你做咩唔完全倚靠我，你憂慮咩呢？
我個腦突然醒晒，我d憂慮走晒！離我而去
到第二日我返到學校，成個人鬆晒！個種心情好enjoy，好正！
個人變得好唔同，好開心，好興奮！
到第三日，學校影畢業照，超癲，著夏季影
影相既時候發生左d事，係呢度唔詳細講啦！
一直到放學都覺得冇乜野，萬事都好正常，意料之內
到夜晚，無啦啦收到小玲個sms，好驚訝，都感到點兒可笑
佢話「恨」我，但我既感覺，呢個「恨」係positive
唔係真係憎我，唔係討厭我，但令我個心有d酸
到第二朝同阿楠傾既時候，仲流左幾滴眼淚
呢幾滴眼淚，刻骨銘心，好深！
第二日冇乜點同佢講野，係chem堂分組我講野佢應
佢講野我有應，但大家都冇直接咁對對方講野
我個日好驚會以後同佢冇計傾
好在，星期五都傾返計，感受好開心，好感恩！
我明白到呢d都係神比我既恩賜，比我既經歷

神比我一班特別既朋友，特別既弟兄姊妹，特別既屋企人
當然比左我好多唔同既恩賜
星期三早上集會，副校無啦啦走黎搵我
佢問我星期五去學校團契可以唔可以早d去到
正常黎講低form係唔駛上第九節，但我要上
所以我話唔可以早d，於是都冇點理呢件事
到第二日，我放學落左去圖書館，見到團契職員
佢地又問我可唔可以早d去，又話唔夠人
我先明白原來係需要人手，傾左一陣，決定一打鐘就去
好奇怪！本來冇諗過要作見證，點知又要做
呢d都係神比我既機會，而我都要珍惜呢次機會
星期五放學一聽到鐘聲就出課室，衝過去團契
見另一個姊妹作緊見證，坐左3分鐘都唔夠就到我
我係完全冇準備既情況下憑信心，讓聖靈替我作見證
由於團契入面有好多同學未信，都有好多信徒屬靈未熟
所以我用既字眼同埋講既野都要盡量令佢地明白
真係有一定既難度，我講緊既時候先發覺原來我係屬靈上受既恩賜好多
因為我知道我要盡量將日常生活既恩賜、救恩講出黎
但我腦海中所受既多數係教會或者屬靈上面
當初入教會，信主，返團契，設讀經計劃，夏令營既感動……
好多都係由教會、由聖靈而黎
回想返黎，真係覺得好正，神比我有個心事奉佢
完左崇拜之後聽講另外兩個姊妹作見證作到喊
但係我就係興奮，感動係少d，因為我講既多數有關日常生活
而令我最感動既就唔係呢d，當然，好多時候我都好感恩

星期六返團契始終係我最開心既時候
令個禮拜六第一次學校eng補課，教d野好basic
但都明白個miss係想睇下我地既standard姐
放左之後即刻飛返屋企換衫，迅速執野入屯門
團契週會做drama，我扮小花，女仔=.=
冇計啦！我個組全部男仔，我盡力做架啦！
我相信我呢次drama令弟兄姊妹對我挖目雙看
我做得好放，完會釋放我內心既自己出黎，又kai又gags
當我做既時候聽到身邊d弟兄姊妹大笑我感到好開心
因為我可以令我身邊既人開心，令佢地心靈得到滿足
我都因為咁感到滿足，就好似我星期五作見證所講既咁
「我唔覺得自己窮，只覺得自己好富足，雖然現實環境中我係冇錢」
我心靈既富足係神比我，佢比我係弟兄姊妹前完全做真正既我
讓我都可以放鬆，因著佢得到喜樂，同時都令人歡樂
好溫暖，好舒服……

我完全明白，我有憂慮，但神安慰我，支持我
同時，佢賜比我好多恩典，特別係我身邊既人
神！my love

代禱事項︰
1.仲未揀好jupas，連錢都未交添！我知神會幫我解決
2.下個禮拜六係我今年團契個組既第一次飯聚，求主引領各位
3.我返左堂初信造就班，明白到阿毛細佬文謙點解唔明，所以要為佢代禱
4.願主保守我同朋友之間係可以開心見誠咁互相關心、問候
5.求主幫助阿楠(Anson)，佢表面上冇咁頹，心入面只有主知道，願主保守
6.泳池又返到黎呀！真係感恩，祈求他朝佢係可以光明正大返教會啦！
7.呢個星期我隻左手無啦啦有d唔知點既痛，但我覺得就係我媽咪個種，所以感恩，神比我同媽咪一齊經歷，願我作榜樣，願媽咪因著我信主

>>November 20, 2006 at 6:03:56 PM GMT+8

2006 年 11 月 19 日 星期日 【晴】

好灰，打左成千幾字輕機，遲d補返

>>November 19, 2006 at 1:19:07 PM GMT+8

2006 年 11 月 12 日 星期日 【晴】

有慮，會懼，很累

一路以黎，我所煩既野多數都係自己既事
屋企人既關係，佢地既健康
我同朋友既友誼，我對佢地既態度
我既學業，時進時退
我冇金錢，但我都唔係靠金錢生活
呢d野，我祈禱之後就好似冇發生過咩事咁

前日，我入屯門之前，我同媽咪講︰「我好耐冇同你一齊祈禱」
於是我地又坐低一齊祈禱，禱告後佢話︰「我呢幾日都試下祈禱啦！」
好感恩！我唔知佢有冇做，但至少佢有諗過
不過，我係屯門既時間佢都冇打過比我
之前佢真係冇痛冇痺，佢都會搵我或者周俊
可能係我多心，可能今晚返去就有好消息聽到呢！

唔知點解，我對查經既興趣一發不可收拾
前晚周俊問︰「點解話施洗約翰係以利亞？」
我係屋企用佢個本啟導本既聖經查
但入面冇直接講，於是我睇佢d參巧經文
又冇書籤，用晒五隻手指搵晒d經文
我覺得個解釋有少少唔妥，但搵既過程好正

屯門，始終比我既感覺係最正
係九龍，我鍾意係學校，我有安全感，
不過，有個條件就係冇我班既人
係新界，屯門、教會係我最享受既，因為好多認同我既人
我唔係要佢地認同我咁簡單，係想佢地對我既睇法提出一d更正確觀點
個種感覺，係正到難以形容

點解我話要冇我班既峒學呢？
其實呢件事都令我煩左幾個禮拜，有團體就有小圈子，我贊成
但兩個小圈子之間係咪一d要有敵意呢？
點解好多時候做緊d好開心既野既，但又要提一d人係背後串佢地，話佢地呢？
幾時開心，都要做d令自己心中有d火既事，好咩？
其實，令我最心灰意懶既係我個班既兩個小圈子之間
有第三者成為離間佢地既catalyst
以我觀察，呢個第三者做呢d對佢自己冇好處
佢做只係因為出於性格，但因為呢d性格
令到兩方不斷針鋒相對，大家都以為對方係背後話自己
從另一個角度，第三者講既野，雙方既思維會唔會諗錯實際情況呀？
一定會，我班同學有個問題，係要諗人地既不是
呢d係大部分香港人都有既特徵，凡事以己為先呀嘛！

我無奈，係呢件事入面，我唔係涉及在內
但係，我心入面同我講，我唔同佢地講，就無形地支持佢地「小圈子」
我憂慮，即使我祈禱，我都唔係全心，靠神既信心好低
因為咁，我每日心跳都好心，我感覺到可怕、恐懼
諗得好多，煩得好多，有點兒自找苦吃，但我覺得我要咁做
我要灌輸正確價值觀比佢地，但我用唔到力，用唔到心
思想令到我好累……

代禱事項︰
1.我一人祈禱唔夠，所以我希望大家都幫我，為我班同學，都為我媽咪！！
2.好耐冇同亞延傾計，琴晚同佢係輕鐵站傾，大家都遇到相似既問題，都比佢智慧啦！
3.余仔話佢自己今個禮拜屬靈差左d，感恩！at least佢知道，大家support佢啦！
4.琴晚前尼團組(仁愛1組)飯聚，感恩，好多人黎到，泳池都黎到，感謝主有聽我既禱告！
5.我Jupus要揀科啦！雖然呢個只係第一階段，遲d可以轉，但都盡量比到自己知道自己interets

>>November 12, 2006 at 1:17:11 PM GMT+8

2006 年 11 月 5 日 星期日 【晴】

心中的火爆發

呢個禮拜主要有三件事發生

(一)Test
呢次test表現好差，好多唔識
尤其physics，我合格的話就係奇蹟
至於chem，考三個鐘，我估左個半鐘之後
就係吹水個半鐘，根本我就唔識
中化就冇咩特別，合格係正常，高分就難d
UE就考listening同埋practical skill
listening預左聽唔到，practical skill就唔夠時間做
不過，每次test我遇到咁既情況都會令我發奮
我呢個人總係明知跌到係痛，痛完先企起身
行返穩d，我唔想再咁懶啦！

(二)小玲生日
11月2日係亞維生日，上星期六同佢慶祝左lu
到11月3日就係小玲生日
我地成班去唱k，有joseph、勞氏、小玲、ann、kenny、云峰
好耐冇試過咁放咁開心，唱完之後去影貼紙相
好耐冇影過，真係好耐，都令我回想返當年同我一齊影既朋友
但係佢地已經冇乜點同我聯絡，人少見左，係會生疏
點都好，唔可以同弟兄姊妹生疏的......
so，今個禮拜我要開始個組長既責任，就係「打電話」

(三)母子哭訴心事
星期四，亞媽叫我入屯門做d野，做一d我勁唔想做既野
但無奈我要去做，我感到自己d尊嚴冇晒
佢成日要我做咩，我一定要即刻係佢面前出現
本來我同緊joseph好開心咁行緊街
佢又要我快d返屋企搵佢，即刻冇晒feel
我覺得自己係一件工具，比佢用來用去
我成日諗︰我天生出黎係咪比佢用架！
點都好，佢係我亞媽，我明白佢做好多野都想我地好
當我做完唔想做既野，返到屋企之後
我用被遮住我，我亞媽係咁拍我，叫我
我唔想采佢，我真係頂得好辛苦
後來，佢又叫我食飯，我都唔理佢
我知道佢入左廁所叫周俊call我
所以之後收到周俊個msg，叫我唔好發媽咪脾氣
我係專登架！因為每次我都要用到發脾氣呢招
先有機會同媽咪講一d佢平時唔會聽既野
我起身，佢喊住話︰「你估我想你做個d野架？」之類啦！
我心中個一團火都令我流出眼淚
我話比佢聽有咩問題，佢話我唔食飯佢心痛
我講我問緊神好多問題，點解我要係呢個環境生活
正常人都會答，呢個係一個考驗
我知道，但對於我黎講，呢個唔係普通既考驗
係比我同媽咪溝通既一個途徑
縱使我媽咪而家做好多野我都唔滿意
唔係我本人唔鍾意，而係從神既角度諗個d行為係不當既
因此，我判斷佢所做既事係岩多定錯多，我有信心判斷係正確

團契分小組，我同弟兄們講︰「我驚，他朝我升到天堂，但以後見唔到媽咪，我會驚」

代禱事項︰
1.為媽咪代禱，我好想佢相信主，為自己，我想永遠見到佢，為神，我想神有多個女
2.再為延祈禱，佢好似有野忙，但我未探討到，佢仍淨係返團契咋！
3.請各位為我作一個好榜樣，做一個好組長祈禱，我比時間神，但對學業有好既影響
4.呢個禮拜團契好似少左人返，願主保守大家平安回到神既家
5.祈求主領恩慈家既弟兄姊妹背金句啦！
6.各位弟兄姊妹，崇拜祈禱會要返，團契祈禱會都要返呀！

>>February 21, 2007 at 10:45:51 PM GMT+8