2004 年 10 月 17 日 星期日 【晴】

岩岩過左呢個星期, 差不多晚晚都唔夠訓
有兩晚成兩點幾先訓tim.......
所以琴日同今日都係我大昏迷的日子...
雖然係咁, 唔代表我訓得夠...
因為訓到斷斷續續咁囉....

曾經聽人講, 一個人的朋友圈子來來去去都係一班人
只係時空交錯, 大家總會在不同機遇下相遇...
亦即係話, 呢個世界好細, 玩來玩去都係同一班人...
呢個道理, 喺呢兩個星期彷彿應驗左喺我身上...

上星期出去遊船河, 講開先知, 阿may之前做姊妹
嗰位新娘原來係我中學師姐...
今日, 同個舊同事飲野, 傾傾下發現,
佢識的那個人原來我都識...
在之前, 我都唔知佢地同我識埋同一個人
這麼遠那麼近...

雖然我地共同認識的人同自己唔係好熟..
但係呢種藤"lung"瓜, 瓜"lung"藤的微妙關係
真係好得意....人與人之間, 就係咁樣互相牽引架...

我喺度諗...其實人一生中,
都不停玩緊捉迷藏的遊戲
呢個遊戲冇時間限制,
你唔會知幾時先搵晒d人
但隨時那人會自動出現你身邊,
又或者有人俾提示你, 幫你穿針引線
又或者, 目標人物出現左又匿埋...
人際關係就係咁玄妙....

>>October 17, 2004 at 8:49:45 PM GMT+8

2004 年 10 月 15 日 星期五 【晴】

心情好似好過之前兩日少少, 少少咁多

我覺得, 其實冷靜d去諗番
其實自己係覺得d工作濕碎,
來來去去做埋同一樣野, 不停重複...
我係厭倦左d工作, 定係討厭d同事order我做d濕碎野呢?
我諗兩種情況都有...
不過我真係厭倦d工作, 呢樣係唔需要懷疑...
然後再俾人push幾野, 就好易動肝火
好似琴日咁, 我就向個大陸女開炮...
我後來都有後悔...
因為, 我唔係佢阿head, 有咩資格呢...
鬧完人, 件事未必解決到, 反而令人憎左自己
係咪蠢?! 做埋d自殺式行為...

最近真係好攰...身心都疲倦...
我想轉換下環境...
我唔知將來的環境係點.
但有時真係唔可以想太多,
要孤注一擲, 搏一舖囉....

>>October 15, 2004 at 9:18:18 PM GMT+8

2004 年 10 月 13 日 星期三 【晴】

唔高興...
唉...最近唔知做乜...
好似凡事都唔順...
office個廁所又有問題...都唔知點搞
搬左入去差不多一個月, 廁所已經出左幾次事...
雖然唔關我地事(個師傅話係本身d裝修舊,用料差, 唔係我地問題)
但屋主好自然會入左我地數...鬼叫我地係用家
最近屋主返公司勁黑面, 都唔知係咪因為咁...
如果係, 我真係好冇奈囉......關我鬼事咩.....

再來, audit report...都唔明...
俾鹵味簽之前已經scan晒返台灣佢睇...
星期一來簽的時候仲問我d數點黎...
唔係掛?! 咪玩啦老細.............
乜之前唔係確認好晒先叫個auditor出report我地簽咩?
跟住個audit fee點解冇啦啦多左??!!
鹵味又問我喎..........
好似d事係我follow唔好所致咁...
但問題不在我架......
又再冇奈.........

唉..... 跟住上面班趴街又不停濕濕碎碎扔d野來香港囉
我就好似垃圾桶, 幾唔鐘意的都要收, "人棄我取", 其實係咁解架
唉.....每一件事都係urgent, 我可以點呢?
唔係我唔俾阿so幫我做...
問題嗰d野唔係打張單咁單純...
如果係咁...我相信d趴街都唔會俾我做囉...

所以今日心情又勁差..
我好想辭職, 辭職, 辭職, 辭職, 辭職.........
滿腦子都係點樣辭職......

>>October 13, 2004 at 9:55:59 PM GMT+8

2004 年 10 月 10 日 星期日 【晴】

出海感覺真爽啊~
托阿may的福, 我得到一次出海遊玩的機會
佢朋友老公公司有隻遊艇
於是請左一班人上船玩....
咁我就去左玩啦~

上到船, 吹海風, 曬太陽...
隻船直駛蒲台島...
到左之後, 佢地急不及待去玩wakeboard...
其實我都幾鐘意d有速度又刺激的活動架
但wakeboard.....識玩就話型0者...
唔識玩, 好似我呢d, 忌水忌到唔忌...
都係唔好落水獻醜....
不過睇人地玩, 確實幾心郁, 都好想試下嘅...
不過.........都係唔好啦.........
我仲記得當年坐香蕉船俾人西左落海...
而家仲猶有餘悸......唔好啦
於是我同另一d人上左岸行山囉...
冇錯..之前行完獅子山之後我講過唔行...
但今日見條山路都幾正常, 咪行下囉...
真係好舒服, 一邊行, 一邊吹下海風, 唔錯...
仲有啊, 我地行行下, 遇到班油麻地local tour...
我地唔覺唔覺混左入去....
"阿領隊, 借問聲舊石點睇係龜公呢?"
我邊行邊有類似呢d疑問....
因為只要舊石稍為大d, 騎呢d, 都可以被形容為一d好實在的野...
咩靈龜上岸, 聖僧合掌....真係乜都諗得出....
想像力超強的....
行行下, 我地去到香港最南端, 聽聞嗰度d空氣係全香港最清新的...
梗係吸多兩啖啦.....
蒲台島好細架咋...來回行左個零鐘....我地到左坤記士多...
食左個綠豆沙....唔錯啊...
食完我地坐大飛上返船...
繼續曬太陽....

呼~估唔到夏天過左, 我先黎曬...
but, 曬太陽吹海風的感覺真好~
我而家都幾黑架.....但係對腳都係唔夠黑啊....
下次再曬過先. :D

>>October 10, 2004 at 9:41:10 PM GMT+8

2004 年 10 月 5 日 星期二 【晴】

今日有個朋友突然打電話約我出去食飯...
嗯..............................................
呢排真係食左太多野啦.............
我本來真係想推....但其實上星期佢約過我架啦
好似唔係幾唔好意思喎...
所以最後都出左........
(最多打後幾晚唔好食咁多好野囉...係囉係囉....)
食完飯, 諗住行一陣先走啦
點知, 見到有個"2046"的souvenier賣喎...
好靚啊~~ d calendar....有阿菲, maggie, 朝偉......
仲有年曆卡都好靚~
我忍唔住買左啊...(又洗冇謂錢...)
我唔係王家衛fans...但真係靚到我唔捨得唔買

睇到d相, 我就諗番起2046裡面的時間, 地點, 人物...
東方酒店上的天空好暗...
朝偉好風流, 章子怡好慘, 阿菲好瘦...............................etc.
啊, 套戲樣樣都靚, 但女主角的頭髮就唔係好靚...
尤其係劉嘉玲扮機械人的假髮....太假...
不過王家衛的戲好似好鐘意用d好假的假髮...

>>October 6, 2004 at 12:31:52 AM GMT+8

2004 年 10 月 4 日 星期一 【晴】

表妹, 妳都想學整蛋糕咩?
學啊學啊~ 妳大學會唔會有d平course啊?
可能到時要妳教番我轉頭呢 >.<

大家喜歡食煲仔飯嗎? 我就好鐘意啦~
今日放工後約左個台灣同事&佢女朋友去廟街食野
於是食左我今個秋冬第一煲煲仔飯, 好味~
另外, 我地叫左d炒蜆炒螺&賴尿蝦,
雖然平日我少食海鮮, 但係今晚我勁拆喎...
可能心理上覺得出面的好食d,
同埋main point係俾左錢, 唔好晒~
然後, 我充當小小小導遊, 帶佢地去行下旺角啊...

其實今晚勁拆之前...晏奏嗰餐都拆得好勁架啦
我同阿so (新同事) 叫pizza食...
兩條友, 叫左個大批+意粉+蒜蓉包+汽水的set....
真係.....飽到我癡癡呆呆喔........

啊, 我好似未講過我個新同事阿so...
佢比我想像中乖喎, 睇佢個樣, 應該係鐘意玩, 好惡教的...
(你會問, 咁做乜我請佢, 我會答, 冇啊冇得揀嘛..當時)
仲有, 佢工作態度&性格都幾似吉表弟架...
做野好用心, 而佢非常客氣的性格又似足表弟...
好似上星期出糧俾佢, 因為我費時煩,
出多了兩日糧俾佢...由15號開始計糧俾佢...
佢係賺左...but, 唔多嘅......
我就隨口up請食飯啊,
結果佢今日真係請我食pizza喎...
我真係過意唔去呢...
佢又唔係賺得多...因為我咁講一句...
就要請我食lunch...
我俾番錢佢, 推來推去.....
結果佢話唔好好似d阿婆咁喎
聽到"阿婆"兩隻字, 我即收囉...呵呵
我冇嬲, 但我真係怕應驗, 未老先衰, 做左阿婆....
佢真係好似我表弟呢...

今日我出完銀行先返公司嘅....
返公司途中...我諗左好多好多野.
工作啦, 會諗得著唔得著的問題...
反省左好多野....
然後得出一個未finalized的結論, 轉工係我的出路囉...
要努力喔!!!!!!!!!!!!!!

>>October 5, 2004 at 1:28:05 AM GMT+8

2004 年 10 月 3 日 星期日 【微冷】

呢兩日涼左, 好秋天呢, 我喜歡 >.<

呢....之前我發過up風話想學整蛋糕然後開cafe嘅......
學整蛋糕的事, 我一直都丟在一邊...
琴日唔知咩事, 忽然好想好想去報course...
最付諸實行應該就係琴日囉....
我上網撈左d蛋糕班做reference...
我本來真係報左個今日的course....
但佢竟然話因為太少人報, 所以開唔到班
咁...已經挫左我一把啦....
後來...當我熾熱的心攤凍左少少的時候...
我忽然覺得要多謝個班開唔成....

冇啊....計計下...蛋糕班真係好死貴...
平均$200幾一堂喎....要連續報3個先可以做member...
哇.......咁咪要成$700囉?!
$700可以買好多蛋糕, 食到我唔想食...
又或者用$700買衫唔係仲值咩?!
哇....今個月已經夠晒窮....還grant loan都冇乜剩...
唔好啦, 咁奢侈的活動....我都係攤一攤先啦
慶幸自己識得懸崖勒馬......
你知我平日幾咁衝動架啦......

嗯.........其實邊個唔知整蛋糕的樂趣啊....
你估我唔知食買返來的蛋糕遠不及自己整的有滿足感咩...
諗過另一個折衷d的方法囉...........
諗左好耐...不如買個焗爐, 買書仔自己學囉....
好似幾好啊可?! 呵呵
大家睇下我幾時先買個焗爐返屋企自學囉~
呵呵

>>October 3, 2004 at 2:57:20 PM GMT+8

2004 年 10 月 2 日 星期六 【微冷】

咁耐冇寫日記, 簡直手瘾大發啦....

呢個禮拜好有holiday mood...好暢快
中秋節啦, 國慶啦....
搞到冇乜心情返工........
中秋節嗰晚我地去左白石BBQ啊...
雖然冇得坐海邊....但能夠同大家舒舒服服圍住個爐BBQ
都係一件賞心樂事嘅...
哈, 嗰晚我地坐坐下, 不經不覺坐到3:00幾4:00...
好耐未試過玩通頂啦.....就算平日我想通, 個人都頂唔到啦
你知啦, 人老左, 唔襟捱架嘛...........
我地趕到最尾一班接駁巴士, 出返馬鞍山, 然後搭N巴出旺角..
搭車期間, 我一度訓著左架....
好彩梁氏叫醒我...如果唔係我NEXT STATION唔知去左邊...
到旺角, 我從來未見過咁安靜的旺角....
係靜到.......老鼠都敢出來蒲的靜.........
(真架, 我見到有隻老鼠衝出來竄動)

好不容易, 我去到小巴站,
終於搵到架車係直接載我返屋企的....
返到屋企, 已經6:00啦....我聽到雀仔叫呢...
本來, 我想污污漕漕一覺訓左去算......
(真係好眼訓嘛...........唔怪得我喎...)
後來...模模糊糊之間搵支花灑"FEI"自己咯~
搞完一輪終於都可以訓覺....訓到晏奏咯

雖然呢個星期有得休息下......抖下.....
但唔夠囉, 我覺得要出下國先完整囉.....係咪先...

唉....本來我想攞大假架嘛...
最後都冇...因為好多野做放唔低...
算啦...我諗個大假要延期啦....
係啦, 等多兩個月X'MAS睇睇啦...

>>October 2, 2004 at 8:10:31 PM GMT+8

2004 年 9 月 19 日 星期日 【晴】

終於搬左啦~ yeah~~
嗯...一切總算順行啦, 大問題就冇, 係小問題多d囉...
接落黎就係要執番d野囉...
以前得一個位, d野多極都係擺在個位附近...
而家多左咁多位(其實得4個之嘛)...d野要諗下點擺...
同埋, 而家多左個同事...要諗下d personnel, admin野...
仲有, 上星期我基本上冇乜點做過d report...
而家積左一pat...
我諗黎緊呢個星期都唔得閒得去邊...
因為除左以上的事, 我要follow番請a/c的事, 銀行L/C的事...
呢D都係之前丟低左的...
喔....咁搞法...我真係驚鹵味唔俾我放假....
我未開口講啊...因為大陸未講放國慶的事嘛...
佢地講左我先申請啦...
不過我已經有心理準備佢唔俾我放的了...嗚嗚...
anyway, 搞掂左搬office的事...總算放下一舊大石囉...

>>September 19, 2004 at 10:03:05 AM GMT+8

2004 年 9 月 14 日 星期二 【晴】

好谷氣...
呢兩日唔知死左幾多細胞...
塊面生左幾多粒暗瘡...
大陸d人真係冇人性架!!!!!!!!
明知香港呢邊搬office, 忙到趴街
幫唔到忙不特止, 仲要處處俾麻煩我.

琴日, 忙到死...新office送設備來,
同時間又要出貨, 仲有, 文件要pack箱
第二日送新office
兩頭走, 忙得不可開交...
班x街, 冇啦啦又要加單出貨...
有冇癲d??!! 出貨一早確認好, 已經講得好清楚,
如果上星期五冇話出的貨, 呢個星期就唔出, 冇得臨時加單,
因為貨要pack好第二日送新office
我鬧得佢地好甘, 勁發爛渣...
過左一陣, 冷靜番d, 我覺得自己語氣係重左...
但佢地係抵鬧

冷靜左一陣, 另一邊大陸人, 同我講d sample好急
要即日hand carry上深圳...有冇病啊??!!!!!!!!!
知唔知我勁忙者????????!!!!!!!!
阿head都要加埋一份催我...打左兩次電話俾我...
我真係嬲到震.........
本來想叫個死人kent送, 嗰條粉皮話唔得閒,
新來的同事又唔知交收地點點去...
我都唔放心佢去...
最後咪又係我去........
不如整死我啦.
對住班癲人, 我真係勁唔想撈

>>September 14, 2004 at 8:59:25 PM GMT+8