1980 年 8 月 2 日 星期六 【晴】

《為什麼》 屋企 D野就係我做哂, 讚就係讚我家姐, 頂！ 我真係唔明, 我家姐咩家務都唔做, 永世唔會剷雪, 但係就要我系零下三十幾度剷一兩個鐘雪, 佢永遠唔會幫阿爸手執野, 唔會幫佢做任何野, 我老豆有咩野都只會搵我幫手, 洗碗抹地呢 D小事唔駛講, 一定係我做哂... 都算, 但係點解仲要鬧我冇為呢個屋企做過野！？ 點解從來都冇讚過我一句！？就連我考得好高分, 都只係話： 「你要下次都考得到至得 ga！！！一剎那光輝唔代表永恆！！！！」 所有野都好似奉旨我幫手咁, 從來唔講唔該, 淨係識鬧我, 日日都鬧, no reason咁鬧... 而我家姐咩都冇做過, 但係佢淨係識講 D野 tum 長輩同阿爸阿媽, 搞到佢地所有人淨係識讚佢, 所有人都覺得佢係乖女, 我做哂所有野, 就係最可惡既女！！！有冇搞錯, 我真係好憎佢！！

>>August 17, 2007 at 10:39:02 AM GMT+8

1980 年 7 月 31 日 星期四 【晴】

《一個婚禮百個葬禮》 唉...我家姐結婚, 成村人幫佢手籌備, 唉.. 好似奉旨咁, 都算.. 佢其中一個姐妹因為有親人系 hk過左身, 要返 hk奔喪, 我家姐發皮氣, 話已經 arrange哂 D野俾佢做, 依家走左唔駛做 la, 好似全世界要就佢咁... 佢伴娘個家姐聽日搭飛機走, 本來個 wedding meeting係講左係聽晚, 我家姐突然間打黎話改今晚, 大佬, 已經係第 N個姐妹 meeting, 人地都想陪下屋企人架... jason下星期飛返 hk, 今個星期六係 wedding, 我 D朋友約好哂星期五晚同 jason送別, 點知我阿爸阿媽話星期五晚我家姐要「上頭」, 全部人都要系屋企, 唔準出街... 有冇搞錯, 「上頭」關我地咩事...>< 其實我已經幫得好多 la, 又做姐妹, 又要 arrange好多野, 不過我都係想系 jason走之前, 多 D陪下佢, 佢下星期就飛返 hk, 都唔知幾時先再見到, 唉... 有 D野真係好離譜, 我家姐依家晚晚出去蒲, 又唔返屋企訓, 聽其他姐妹講, 佢同個叫 victor既男仔好痴纏, shit~就黎結婚都仲咁, 有冇搞錯... 當然我唔係親眼見到, 但親眼睇到既係... 佢同我姐夫日日都嗌交, 係「日日」都嗌, 成日黑面嬲哂全世界, 講真, 我覺得佢依家係為結婚而結婚, 佢根本唔鍾意我姐夫, 如果鍾意就唔會出去玩 la, 佢自己話結婚壓力太大要減壓 wo, 我覺得係依家全部親戚都由世界各地黎哂觀禮, 佢咁要面子, 一定唔會唔嫁... 提起我阿爸阿媽, 真係又嬲又憫, 唉...我 jason近排成日同我講, 叫我忍埋呢一年, 讀埋 final year, 拎左個 degree之後, 話就話返 hk探我, 其實係買單程機票, 返 hk搵工, 叫我住佢屋企, (上年 summer我已經住過幾個月, 佢家人好 nice^^) 仲話只要每個月俾返 D家用佢媽媽, 咁長住應該冇問題.. 「四十幾度的香港 + 人多擠迫 + 香港人冇禮貌 + jason VS 二十幾度的多倫多 + 少人 + nice的陌生人 + 我老豆阿媽家姐」 我真係寧願揀前者... 可能我自己西化 la, 覺得中國習俗真係好麻煩, 又咩時辰沖豬, 唔出得門, 又要紅遮灑米, 又三招回門, 講真, jason話依家 hk都冇咩人跟習俗 ga la, 反而移左民既唐人仲傳統過 hk人... 我成日諗, 跟咁多習俗做咩姐, 唔通跟哂, 就會白頭到老咩, 如果個心唔系度, 跟幾多習慣都冇用 la... 我家姐從來都唔會剷雪, 我自己一個人剷一兩個鐘, 唉...我真係唔想再理我屋企人, 不過我唔想佢咁快咩住, 因為咩左佢一定會搬返黎, 咁我就死硬, 三個一齊夾攻我, 等返左 hk同 jason長住先好咩... 唉...我老豆真係好好笑, 佢竟然同我講, 話我做人唔夠圓滑, 得罪好多人, 叫我學下我家姐...= = 有時我諗, 我阿爸、阿媽同家姐係咪好憎我！？ 成日叫我做野, 但係仲可以話我冇為呢個家付出過, 又成日鬧我, 冇做錯事都可以照鬧, 真係 no reason ga... 每日都要提心吊膽, 三日唔埋兩日就黑面, 又唔知佢地嬲咩, 咩都鬧一餐, 我已經二十歲, 大學三年級 la, 仲鬧！？ 最離譜既係, 連我笑既權利都冇, 我都係笑下姐, 我老豆都喝我：「你冇病 ar！？痴左邊條筋 ar！？唔準笑！」 我只不過系屋企睇到 D好 funny既節目, 連笑都俾人鬧..sosad 唉..但我已經幫手做左好多好多野, 反而我家姐真係一 D家務都冇幫.. 我老豆依家成日叫我幫手執地牢, 大佬, D野係佢執返黎 ga, 成個地牢都係野, 依家就要我執！！？我不知幾想丟哂所有野... 之前去旅行, 我阿媽買左十幾廿個麵包, (次次去旅行都買, 但次次都冇人食..) 行行下叫我幫佢拎, 我就話有冇搞錯 ar, 自己買又唔自己拎, 買左都冇人食 ga la... 之後我阿媽又發老皮話：「依家係咪幫手拎下都唔得丫！！！」 我話唔係, 佢竟然話：「唔係就唔好出聲！！！」 頂...幫埋你手, 連呻兩句都唔得, 唔通真係幫佢拎之餘, 仲要講句「真係我既榮幸」！！？ 依家 jason成日都提醒我「兩舊金」, 就係「沉默是金」同「百忍成金」, jason叫我, 任何時候都唔好受到我阿爸阿媽既挑機, 任得佢地講, 任得佢地鬧, 我就當佢地唱緊「乖乖龍地冬」, 唔好受到挑釁, 千祈唔好出聲, 唔好駁咀, 一出聲就有痛腳俾人捉住話我駁咀, 咁仲鬧得更甘更厲害, 總之任何時候都唔好理佢地, 唔好出聲, 唔好應佢地, 最多都係「哦」同埋「知道」, 敷衍佢地就算... 我已經好努力咁去唔理佢地既挑釁, 但係我都仲未去到完全冇情緒起伏既境界, 希望可以快 D練到完全唔理佢地講咩鬧咩, 完全唔當佢地存在... 仲有一年就大學畢業 la, 希望系 hk搵到工, 咁就可以同 jason長住之餘, 又可以離開呢個屋企, 雖然 hk真係熱到爆炸~= =

>>August 17, 2007 at 10:40:03 AM GMT+8

1980 年 7 月 12 日 星期六 【晴】

我老豆退左休冇野做, 日日系屋企鬧我, 我已經係大學三年班, 下年 final year, 仲晚晚要我十二點前訓, 出夜街, 要十二點前返..sosad... 都算.. 從來冇供過我同我家姐讀書, 小學中學係政府供, 大學學費要自己俾 (問政府借), 由細到大, 都冇俾過零用錢俾我... 都算.. 成日喝我做野, 從來唔會講唔該, 一起身就喝我整野食, 之後就坐低好似大爺咁, 又喝我洗碗, 唔該一聲都冇咁嬲, 成家人系屋企睇緊戲 (佢都有份), 佢突然間叫我... 「喂..去整 D士多啤梨俾大家食,.」 我心諗, 你自己整唔得咩, 我冇出聲繼續睇, 之後就大聲喝我, 叫我去整... 都算.. 家姐從來唔剷雪, 唔做家務, 唔洗碗, 得我一個人去做, 老豆成日喝我執房, 自己個地牢就鬼死咁多野, 成層都係執返黎既廢物, 大電腦 mon都有八個！ 幾百個鞋盒, 幾百個 A4紙既箱！ 岩岩先幫佢執完丟左 D梳化同 mon！ 好似奉旨咁, 幫佢做完咁多野, 但係依然照鬧... 幫佢執完一部份後, 都仲係咁鬧, 都唔知做咩, 我岩岩養左缸魚 (係我自己既), 岩岩 set up好, 佢見我仲未貼「水草 background」, 就不停鬧我話： 「你快 D貼左個 background佢 la！！D野拿拿臨整！ 唔好成日拖住哂唔做！！成日都唔做野, 做野快手 D la！！」 之後我覺得唔貼仲靚, 我話唔整 la, 佢就話：「你嫌麻煩所以唔整 ar？都話你 ga la！ 少少野就嫌麻煩, 叫你做野就諸多藉口！」 我心諗..關你咩事..當然我o個陣係激到爆炸… 都算.. 最離譜係佢銀行有成七十幾萬港紙, 仲成日爭我錢唔還！！！爭我成一萬四千港紙！！！ 我 visa咭張 bill過左期幾日 la！催極都話得 la得 la, 每次我渣車去入哂油回家, 兩三日後去再渣, 就冇哂油！！！自己又唔入！！！ 尤得個細女去俾埋 D數！！！我依家冇收入 ga！！！ 我所有錢都係以前做 part time儲落！！！ 我阿媽就完全服從我老豆, 就算係我老豆做錯, 我駁咀, 阿媽就鬧我態度差, 又鬧我駁咀… 我老豆真係一個極度自負既人！！！ 從來都唔會認錯, 唔會道歉, 唔會講唔該！ 自己做錯野, 因為佢而誤左事, 同佢講返！ 佢就只會講：「你依家講咁多有咩用！都發生左 la！」 仲發返我皮氣, 有冇搞錯… 試過有一次, 佢渣住架車, 後面係我同阿媽, o個陣落大雪, 佢成架車剷左落個斜坡下面, 之後我叫佢 call拖車, 佢死都唔肯！ (都只不過係五十蚊加紙, hk $350) 之後佢要我落車推！！！佢自己就一路開住架車向上衝, 我系後面推, 當時零下幾十度, 凍到我成個人彊哂, 阿媽話佢自己好凍, 要開著架車開暖氣, 難道我系出面唔會凍？ 最好笑係我阿媽對我老豆講既野、做既野完全服從, 絕對信任, 佢完全覺得我老豆既做法冇問題, 尤得個女系暴風雪下剷雪推車, 之後有個警察經過, 佢同我地講, 冇可能上到黎 ga, 叫拖車 la, 我老豆都唔肯服輸, 叫個警察走, 我地繼續試… 結果我系零下十幾廿度既車外, 推左兩三個鐘都推唔到, 我老豆試左好多次都衝唔返上去, 仲因為兩三個鐘不停咁衝, 搞到個水箱爆左, 直情行唔郁, 結果最後都係要 call拖車… 本來 call拖車拖我地返上地面就 ok, 只係 $350港紙, 依家要拖返廠整, 因為水箱爆左, 要三百蚊加紙, 即係 $2100港紙！！！！ 而我就凍到成個人彊左, 因為系零下十幾廿度既雪地推車剷雪兩三個鐘, 當我同我家姐講返, 我老豆就鬧我： 「你依家講黎做乜姐！？都過左去 la！！講黎有咩用！！」 完全冇道歉既意思, 完全冇覺得自己做錯… 我覺得佢一定係以前管慣人, 因為佢以前系香港係做工程師, 仲做到幾高級, 有好多人跟佢頭, 佢就好似管 D下屬咁管我同我家姐, 永冇認錯, 永冇講唔該, 老豆說的永遠是對的, 絕不能反駁！！ 佢同阿媽都冇受過高等教育, 阿爸講既野永遠是對的, 阿媽絕對服從, 我有咩意見都係錯, 就係駁咀！！ 上個星期我同 jason, 同埋我既家人親戚, 一行十三人去了四日三夜既旅行, 本來我阿媽系最後一日既早上, 都仲係好好地, 回程時, 我渣車上 high way, 後面架車不停咬囉友, 貼到好近, 如果前面一剎車, 就算我剎得切, 後面架車都一定會撞到我, 我就好憫咁鬧後面架車, 因為我好憫好緊張, 點知我老豆就係咁鬧我, 叫我唔好噪, 做好自己唔好理人, 我就好憫咁「駁咀」話, 係後面架車貼得太近… 之後阿媽開始黑面, 仲話我態度好差, 阿爸講一句都唔得… 佢仲發埋其他親戚皮氣, 食飯時我同佢講野, 佢甚至扮聽唔到, 另轉面唔啋我… 回家後...我老竇叫我去沖涼, 我話姑媽要用, 佢就話入佢房沖, 跟住入到去, 阿媽就叫左我坐低, 然後好正經咁話... 「你知唔知今日我點解咁嬲？」 跟住我話唔知… 拒話：「我對你好失望, 你呢幾日既表現真系好差！ 你對住 jason痴身痴勢, 人地會點睇你！！？ 加上你傻下傻下, 又成日傻笑, 你令我好無面！！！」 跟住佢又話：「老竇講你一句你就發皮氣！！ 我知我咁講你一定唔會聽, 但係 jason就算入唔入到大學都好, 都要睇下佢搵唔搵到工！！你要搵老公要搵個養得起自己！！」 然後又話對我好失望…. 我爭 D想喊, 我地都只不過係拖手同埋埃下落你膊頭度姐, 佢好似嬲左全世界咁, 我就唔明我地兩個做錯 D咩… 我真系覺得好委屈, 因為好無辜被人鬧, 情侶唔拖手的麼？ 其實我覺得佢地咁樣做, 真係好似迫緊我自己搬出去咁, 講真, 錢, 都算, 但係點解仲要每日都鬧我？ 真係冇試過有一日係唔鬧我, 我自問做得比家姐多, 自問比家姐更乖, 點解佢地反而仲錫家姐多 D？ 家姐從來唔會做家務, 搬野, 執野, 洗碗, 剷雪… 而我就好似個工人咁幫佢地做哂, 但係連一句讚揚既說話都冇, 所有野都好似係奉旨咁, 就連我自己養魚, 都因為我唔貼 background而鬧到我成面屁… 講真, 我已經算好乖 ga la, 點解我做咁多野, 佢地都唔滿意, 都仲對我好不滿？ 我系呢個家庭, 從來冇俾佢地讚過, 佢地只會覺得係理所當然, 我考試考得好, 佢地只會話： 「咁你下次都要考得好至得 ga！！一剎那光輝唔係永恆！！！」 我只係要求讚一句姐, 唔係咁難開口呱？ 唉.. 我家姐大學時去左住 hall, 畢業後搬走埋, 當年我都想住 hall, 因為我鍾意 maths, 又有間大學每年俾二萬一千港紙既獎學金俾我叫我去讀精算, (total一年學費三萬幾四萬港紙) 但係間大學離家好遠, 我阿爸阿媽就唔俾我去, 要我留系屋企住, 之後我就被迫揀左依家呢間讀 bio… 因為加拿大讀藥劑, 要先系大學讀一年 bio, 之後再考入去, 佢地想我讀藥劑, 結果我考唔到, 一直讀 bio讀落去… 唉...我前排先聽到我老豆個朋友問佢, 我讀 D咩, 我老豆話：「讀 life science lor！」 佢朋友問佢, 咁畢業後可以做 D咩, 我老豆竟然話： 「條路佢自己揀既, 佢自己諗la！ 冇人幫到佢, 自己做既事要自己負責！」 當年每個人都勸我唔好出去讀精算, 又話精算系加拿大已經飽和哂, 冇前途, 我自己又心軟...唉… 我覺得佢地係因為家姐已經唔系度住, 所以死 cool爛 cool我呢個女, 我家姐係一個典型女強人, 佢真係可以做到好絕.. 搬離後連一個仙都冇俾過屋企… 我唯一可以做既就係… 當佢鬧我、喝我時, 我唔理佢, 哦一聲, 當佢耳邊風, 不過佢成日系我渣緊 high way時鬧我, 又叫我唔好咁燥, 有時真係好難 control自己唔憫… 幾年前, 我真係好 care佢地, care我同佢地既關係, care佢地講既野, care佢地鬧我… 始終都係一家人, 血濃於水, 最親既人就係佢地, 點叫我唔 care！？但係我漸漸變得盲目, 雖然依家都仲好 care佢地, 父親節我先送左部 D-cam俾佢, 但係...我真係唔想理佢地, 由得佢地講, 由得佢地鬧, 由得佢地講咩野都好, 我都當聽唔到, 哦一聲就算, 連反駁都o徙氣, 越 care就越唔開心… 不過 jason話, 如果我唔係系呢個環境下長大, 如果我家人好寵我, 咩都買俾我, 咩都順哂我意, 我可能就會成為一個港女, 嬌生慣養, 持寵生驕... 又或者我既家庭生活好幸福, 父母姐姐都錫我, 但係我男朋友就可能好衰... 世事就係咁, 個天拎走你一樣野, 就會俾另一樣野你, 個天俾樣好野你, 就拎走你另外既野....

>>August 17, 2007 at 10:40:50 AM GMT+8