2003 年 3 月 25 日 星期二 【晴】

今日學校真係宣佈停課....
無計啦~都冇得反悔~
不過都好~等我有時間做我遲遲都搵唔到時間做o既野~~

放學o既時候成級中六被召到禮堂
我地都心知不妙o架喇...
點知真係被校長鬧尋日英文堂o既野...
雖然俾人鬧係唔好受
但係校長的確鬧得好o岩...
我地真係好唔成熟，好丟架....
不過我要強調，我係有打中文
但係o個o的冒認人地個名o既事絕對唔係我做！！
我行事光明磊落(我指尋日)
我寫得上去o既都會用「阿昌」o既署名
唔尊重人o既事我係唔會專登去做！！

雖然俾人鬧o左一獲...
但係之後去食tea勁開心~~
算係補返啦~~雖然原則上係唔應該咁做o既~
不過偶爾一次半次算啦~~
講返食tea~估唔到會係一個看似唔啦間o既組合：我、Wing、patpat
我自己都覺得有少少怪....(都係少少o者~)
但係就真係幾開心~
因為好耐都未試過咁輕鬆嚕...之後兩日唔使返學係咁上下啦~~

哈~~我屋企連續三日出現巨變~~~
首先今日我阿媽毀滅o左一座「袋山」
扔o左超過一百個大大小小o既膠袋同紙袋
雖然有o的唔捨得(有o的好靚...)
但係都要清o左佢先至得，所以都冇辦法...
跟住聽日同後日先至激~
因為最影響得我地屋企深遠o既兩件電器將會o係兩日內先後被換
先行一步o既係電視，佢o係兩日前壽終正寢
而佢o既接班人就會o係聽日入主我家o既電視櫃~
至於後日，就係我部電腦喇~~
等o左咁耐，終於都有時間換喇~~
yeah!!就黎唔使過用用下ie會hang機o既日子喇~~~~

終於都....
但係我又係睇唔明...

今日睇到篇文章
入面有一句：「我可以清楚的知道他的喜好，他的習慣，唯獨他對我的感覺，我猜不透」(「他」o係台灣可以等於「她」)
我想話呢句說話係廢話~
咁樣講係因為...呢句話講o既係事實.....

>>March 27, 2003 at 7:43:32 AM GMT+8

2003 年 3 月 24 日 星期一 【晴】

尋日實在太"支力"喇....
所以冇寫到日記....
今日雖然都依然好"支力"
但係唔得~點都要寫~
話過有恆心寫就要有恆心寫~~

唉....肺炎好似越迫越近咁...
搞到人人自危...講真...我一o的都唔怕~~
但係另一方面其實我會怕萬一(萬一咋)我染上o左但係我唔知...
然後惹到人，呢樣我係千萬個唔想~~
唉...希望快o的過啦~我真係唔想邊發生咁多負面o既事情....

負面...呢幾排都好似同我好有緣咁...
聽到的總係負面事情...看到的總是叫人憂心的事
唔知係咪因為唔開心o既事影響到o既野總係會大o的呢....
又或者係我會覺得開心o既事係必然o既
所以就唔會為呢o的事而開心
係o既~我承認我可能會有o的咁o既諗法o既~
例如...我仲未患上非典型肺炎已經值得高興啦~
媽媽身體已經冇乜野亦都好值得開心~
但係唔知點解...就係成日都諗唔起值得高興的事.....
主說：「要常常喜樂」呢句說話看似簡單
但做落真係唔易...唉，要好好學習先得喇....
但係又真係好多野要擔心
都唔知點好......

今日o係學校聽到星期四同星期五可能停課
我都唔知應該開心好定唔開心好
冇錯，有時真係好唔想返學
但係諗到已經落後o左個課程好多o既時候
我真係好唔想放假，咁樣太不負責任喇....
冇錯...係有得補課...但係咁樣先甜後苦又有咩意思呢....?
同埋補課感覺上(實際上都係)一定辛苦過返學
所以...唉...睇下點囉
真係停課我都冇計o架啦~
唔通淨係我一個人返去咩？
又或是站起來反抗嗎？
傻啦~咪又係默默咁聽學校講.....

公私分明
或者應該話唔絕情啦
對我黎講...應該都算係好彩o既...
雖然講唔上好受......

>>March 25, 2003 at 1:33:07 PM GMT+8

2003 年 3 月 22 日 星期六 【雨】

今天媽媽不舒服...
我心情不太好，所以不想寫太多...
唉~憂心的事接種而來...
真叫人累透了...還哪有閒情逸致去理自己的事丫...
如果我真係撐唔住o既話
希望主可以幫我撐住佢地啦...

>>March 23, 2003 at 6:42:27 PM GMT+8

2003 年 3 月 21 日 星期五 【陰】

今日係人生難忘o既一日...
可能真係神叫我經歷...
晏晝教會區聚，講到中國o既教會資源好缺乏
o個時我都冇咩感覺
只係覺得可惜...但係崇拜o個陣...
真係主，係主俾o左好大o既感動我
我亦係第一次感受到主o既呼召
要我成為一個宣教士，去第二o的地方傳福音
我o個刻完全係被聖靈感動，真係好想事奉
但當牧師呼召我地o既時候
我竟然冇行出去....
唔係因為我冇勇氣...而係因為我有好多憂慮....
但係當我諗到牧師o既一句說話：「單純的人就夠資格去宣教」
我就覺得點解我要諗咁多野呢...？
為主事奉只係需要一顆單純而充滿信心o既心就夠
其他o既主會安排，何必作無謂o既憂慮呢？？
於是我心裡面立o左志，為主事奉
我明白我唔係一個咁有恆心o既人
但係我好希望主一直提醒住我
唔好令我o個心冷卻....
所以今日係我生命中好重要o既一日...

今日令我有好大o既改變...
唔單止係呢件事...重有第二件令我經歷好深
而我覺得好心痛o既事...
但呢件事我唔想今日寫出黎...因為我要諗清楚應唔應該...
我而家只係想講我知道o左之後令我心裡面o既負擔暴增...
不過我係有必要知呢件事...
所以我唔會怨，但係我好擔心
唉.....已經有好多野要擔心
而家仲有多一件，而且仲要係好大o既事...
我唔知我可以做幾多野...
我只係知道，我做得幾多得幾多....

我覺得當人學會o左承擔，就好難再好似小孩子咁...咁天真
而真正認識社會之後，就好難再有天真o既喜樂....
至少我係咁...o係我仲撐得住o既時候
我會盡量撐住我身邊o既人
同佢地一齊背負佢地o既憂慮...
我唔知我做到幾多，但至少我心裡面想咁做...
當我睇到人地o既需要，人地o既情況之後
回頭望返自己，自己o既問題又算得係咩丫...
今日牧師都有講，而家o既人最大o既問題就係太過專目於自己o既問題
所以我好希望可以改變自己，去為其他人負擔...

最後，今日有句說話我覺得好o岩
就係：「如果人生冇問題o既話會好悶，要有問題先會好玩！」
可能我之前真係過得太過平淡...
所以變得好悶，而現在就係神俾經歷我o既時候喇...

>>March 22, 2003 at 8:47:50 PM GMT+8

2003 年 3 月 20 日 星期四 【陰】

貧富宴終於都「完滿」結束嚕...
又係做到隻狗咁~不過都預o左o架喇~
守投注站真係吃力不討好....
o的人勁唔守秩序，又要同佢地勁多互動
又多錢銀瓜葛....真係忙到隻屐咁...
令我回憶起open day o個時o既時光....(用時光好似唔係好o岩，因為時光通常係美好o既)
但係見到o的人玩得開心~
就覺得辛苦係值得o既~
同埋再講，比我辛苦o既大有人在啦~
我呢o的算得上係咩丫~~

其實成日話做得點辛苦點"支力"
都唔係真係怨o既~
見到大家都係咁辛苦o既時候
我又點會真係怨丫~
其實可以幫到忙都不知幾開心~
同埋可以咁多人一齊努力~
o個種感覺真係好開心~~
不過話時話~都幾多手尾要跟....
尤其係條數....要計都幾大獲下...
希望唔好有太大出入啦...

哈哈~~
今日PE堂入o左五球呀~~
如果我冇記錯o既話，我中學o既PE堂係未試過入咁多球o架~~
今日踢波真係on fire 呀~
同汶西、Danny三個打對面五個....
輸係正常o既~~不過都只係輸七比五
算係有交代o架喇~~

我開始覺得對人有o的盲目o既感覺....
我o既意思唔係話冇感情o個隻盲目...
而係我開始唔係好識得用唔同o既態度去對唔同o既人
同埋...我開始feel到...(都唔係第一次)
我份人愈黎愈悶.....
可能真係開始冇乜童真啦...

>>March 22, 2003 at 5:22:47 AM GMT+8

2003 年 3 月 19 日 星期三 【雨】

今日阿鈞牛一~
lunch 同佢慶祝，好開心~
但係估唔到我地會對佢地o既食量估計錯誤....
搞到o的野食唔哂...有o的徙....
不過唔緊要啦~
都冇幾可會咁~~間中一次半次...
縱然唔想都由佢啦~~

下晝做Lab...因為冇乜點認真pre過o既關係...
做到雞手鴨腳...好彩都可以趕得切o係五點前交去~
但係做得有點兒馬虎...
不過都冇辦法o架喇，Physic Lab不嬲都係勁低分...
慣o架喇~~

之後留o係學校幫手貧富宴~
但係都係o個句....冇乜特別野幫到手...
唯一叫做有o的用o既地方係我o既打字技能...
不過...其實我覺得我真係唔係好幫到咩手...
不嬲都勁有呢種感覺...
除o左打字，我根本冇乜野係突出而有用o既...
但係打字....有邊個唔識丫....

o係學校一留就留到九點鐘...
但係總係覺得唔係咁安心咁...
如終貧富宴呢o的咁大型o既活動我地之前都未搞過
緊張係正常o既~~
不過我諗應該冇問題o既
始終我地學生會o既幹事們係有本事o既~~
呀~真係好緊張聽日呀~~~

>>March 20, 2003 at 4:08:20 PM GMT+8

2003 年 3 月 18 日 星期二 【陰】

唉....唔知點解最近上pure 堂勁冇心機...
唔係因為o的野唔識喎...
又唔係因為太難聽唔明喎
但就硬係提唔起勁上堂...
Apply好少少...但係呢兩日實在教得太快喇
開始有o的消化唔到o既感覺....
Physic都唔得好好...好多野聽就聽得明
但係做就一頭霧水，完全handle唔到...
死啦~三科AL都搞到咁
點算~~~~~唔通真係要踏上補習o既征途？
不過我諗我唔會o既...始終屋企...唉~

唉~唔好講o的掃興野
其實最近上堂都幾開心
因為自己班o既同學熟o左好多
上堂o既氣氛相當不錯~~
有時又有得鋤下D咁
有時又有得篤下plam(雖然部野百分之九十九都唔係我玩)
週不時畫下"木台"咁~~(雖然咁做係唔o岩...)
真係過得幾寫意~
不過可惜上AS堂o既時候唔多丫....

今日好似同錢好有緣咁~(雖然成日都係~)
今日成日都收到好多錢
又成日都俾o左好多錢
同埋成日都o係度數錢、整理o的錢
唉...我真係怕條數會亂...
不過我諗應該唔會o既~~
始終我o既好伙伴們都係一o的好有交帶o既人~~

放學幫手準備貧富宴(都係o個句，冇乜實質野幫到手)
idea上o既野...我又唔想話講得太多...
始終人地idea有佢一定o既價值...
佈置o個o的我art又唔好...一陣搞禍o左唔好啦...
所以今日真係又係幫唔到咩手...
唉...失敗...

......
都係o個句，多一事不如少一事...

>>March 19, 2003 at 3:44:11 PM GMT+8