2004 年 8 月 5 日 星期四 【雨】

我知道如果跟日子補記個camp o既野的話，實會無人睇~(haha~)
所以我決定o係呢度補記~(yeah~)

入camp第一日(8月2日)

朝早9點半就去到基覺，其實都預o左唔會即刻入camp(年年如是)
一定會玩定向先，今年亦唔例外~~
不過今年真係好特別，因為一開始會抽角色
亦因所有組o既組長都唔會o係自己小組度(因為佢地要hold task)
所以會有人肩負起組長o既角色(真係要做哂組長做o既野)
亦有副組長、觀察者等等~
我覺得某o的人所分到o既角色係針對佢地要突破o既地方
至少我係，我被分到觀察者的角色，我諗，我平時好少會靜靜地做觀察o既工作~
因為通常我都係狂出聲俾意見o個o的囉~haha~
分好角色就開始玩，玩五個game~全部都係要同其他小組比賽
我o個組因為年齡比較細(多數都係中一、二)所以玩game比較輸蝕
而成績亦....(1和4負)，但我覺得好好，因為大家都真係唔計較勝負，同埋玩得投入囉~
連平時比較被動o既組員，都好肯去玩~我覺得呢個已經嬴哂~haha~
另外就係同細o既組員o既關係近o左~~呢點亦係值得感恩o既~~(尤其係新組員)

玩完定向，食埋下晝飯就正式入camp嚕~~
入到camp，第一時間唔係分房，而係開營禮~o下？開營禮？
無錯！就係開營禮，有個小小o既敬拜，為感恩上帝朝早o既安排同保守
真係好好，好多時我地真係玩完就算囉~
開心o既時候唔會記得感恩，只會o係傷心o既時候埋怨
我覺得感恩o既功課果效好大，因為懂得感恩先會o係生活中得力
之後分房，跟住就過o左成個camp最「自由」o既一個鐘
去o左營社o既康樂室度篤波，之後都無再玩嚕~~

話咁快就晚飯，然後就係講道
其實....呢下我做得唔好，因為講道途中我訓著o左....(之前o個晚訓得2個鐘囉)
只係聽到後半節....但內容我係知o架~
係要我地學試欣賞，唔單單係欣賞身邊o既野，更加係要欣賞自己
因為上帝我地每一個都係好o既，都係重價買贖返黎o既，係尊貴o既囉~~
呢篇道....我錯過o左....可惜....

之後就係小組時間，主要都係分享返當日o既感受~
其實對於我地(小組o既事奉者黎講)，係想了解下組員o既諗法
再一次感恩，因為佢地都覺得好玩，縱然係辛苦，縱然係"支力"，佢地都覺得好開心~
我諗....佢地肯玩，肯投入，已經好感恩~~
之前訓得兩個鐘，所以o個晚1點就訓o左嚕~~~zzzzz~~

入camp第二日(8月3日)

本年度最早起身o既一日----五點十分！出去行山！
正呀！！！我勁勁勁鍾意行山呀~~上帝o既創造太正喇~~
行上山，我負責殿後，因為我體格比較好~
殿後o既感覺，其實都幾孤獨....一個人行，沿途(開始o個段)又唔比講野
組員都o係哂前面，後面組o既又唔太熟....真係有o既自己撐o既感覺
不過感恩，因為我沿途真係可以欣賞上帝o既奇工~
風景真係靚到不得了！
其實行到變成山路之後，大家都開始熱鬧起黎~
不僅同自己組，同其他組o既組員都開始會傾下計~~又一次感恩~
我覺得大家都係主內o既弟兄姊妹，應該衝出小組，同其他組o既人交流下~~
yeah~又一個突破~~

上到山，8點幾，真係好靚~~日光普照住整個山頭同我地腳下o既西貢~
o係呢個咁靚o既景色敬拜，我覺得係上帝賜特別賜俾我地o既禮物~
即使之前行山幾咁辛苦，但上到黎，我覺得乜都抵返哂囉~~
另外，我感受到身邊係有好多同路人，係一齊咁辛苦，咁樣捱上黎囉~
之前o既o個種孤單一掃而空~~換係o既係一個又一個感恩，一個又一個喜樂~~
上帝，你好勁呀！！

落返山，其實都delay o左，返到camp site，沖一沖身
之後本來都係一個鐘free time，但我用o左黎做最有意義o既事----訓覺~
訓足一個鐘，之後去食飯~~
呢餐飯好特別，因為唔係同小組食，係同另外o的人食飯~
此話何解？因為我地入camp 之前已經被打亂咁編為15個大組(A-O組)
我就係K組，簡單o的黎講，K組係由本身唔同o既小組o既人所組成
而我o個組就只得我同大head~(K組有12人)
呢餐飯....其實大家都有少少拘謹，但大家可以發現，只係一日之後，有幾大改變

下晝o既係工作坊，一共有三個工係坊
第一個係言語，我地o既舌頭其實真係好唔好
好多拆毀o既說話同得罪上帝o既說話都係出自我地把口，言語o既破壞力真係好大~
我地玩o左個game，先有4個人要含住啖水10分鐘
而呢10分鐘我地就模擬開組，但各人都被指示去「搞破壞」
之後再由出唔到聲o個4個組員講返佢地睇到o的咩~
其實....好大反省，因為好多時我地開組都係做o的搞破壞o既角色....
不過....已經學習緊o架喇，我覺得聽野都係好重要
另外就係講造就人o既說話囉，要學識欣賞人，呢個更重要
互相踐踏(or 批評/指責/攻擊)不如互相鼓勵~呢句係我o既心聲....

第二個係妒忌
「男人衰鹹濕，女人衰妒忌」
其實，男人都會衰妒忌囉，每個人都會有爭勝o既心，每個人都想自己比人強
但....又邊有可能每個人都一樣咁叻呢？個個都一樣邊好玩o架~~？
上帝造每個人都有佢特別o既地方，有佢特別o既恩賜
「百節各按其職」每個人都有佢發揮o既地方
我地要學懂欣賞自己(如第一晚o既道)
第二，要睇遠o的，呢個世界咁大，實會有人叻過自己，使乜同人比呢？
同埋，要嬴人，先要嬴自己，做人最緊要係突破自己囉~~(呢個真係講得好好~~)
之後我地摺o左張紙，放o係自己額前，紙入面寫o既係欣賞自己o既地方~
哈~我摺o左個心呀~~yeah~勁靚~~

第三個係順服
一開始，我地就被人叫出去，再被分配一個no.
跟住跑圈，玩「軍官話」，做一o的幾難頂o既動作(插隻手落隻鞋度囉....)
之後返房，其實道理都係一個，要體驗順服，不問理由o既順服
作一個基督徒，我覺得有兩樣野真真正正係「最」重要o既︰
一、順服
二、謙卑
順服係一個原則，謙卑係一個方法，而家尊講一下順服
順服係指對上帝旨意o既順服，依據係聖經
順服係做上帝喜悅o既事，唔做上帝唔喜悅o既事
順服一o的都唔易，做出黎唔易，要連個心都「甘心樂意」咁做，更唔容易
但係我地都要順服，因為o係順服o既過程，我地會睇到上帝o既安排同佢o既恩典
順服....一生學習o既功課之一....
p.s.好欣賞工作坊負責人哈海山，佢病o左都陪我地跑
佢係一個好盡責o既組長/helper，好欣賞佢為主o既盡力、順服

其實o係三個工作坊之間(2節，每節半小時)，我地組都要做一隻「飛行物」
材料係報紙&膠紙only~
第一節o既時候，我地組都真係比較靜，都係得我同兩三個組員開聲講
於是開始整，我地o既設計係︰將一張又一張報攤平，然後癡埋一齊，變成一張勁大o既報紙
到第二節o既時候，我地組已經差唔多全部人一齊整~
不過礙於只係得一卷膠紙，可以參與o既人唔多，但好明顯大家都開始投入
到第三節完o左之後，我地組已經係成組一齊拎去放
我地o既「飛行物」係一張3x3報紙size大o既「大」報紙~~
點解整咁大張，因為佢地o既要求係︰
一、飛得耐
二、大
三、靚
其實呢隻野係代表住基督徒o既生命
要飛得耐，即係要生命保持住「飛」，要keep到靈命
要大，即係要俾人睇到o既，唔係收收埋埋咁
要靚，唔使多解釋啦~~
我覺得....要達成呢三點，真係唔容易....不論生命或是整呢隻野....
anyway~都叫整o左出黎~haha~

工作坊過後我地去o左影camp相，好勁呀~~230人擠o係一幅相入面
我覺得camp相係一個好好好好o既回憶，可以睇到同我地一齊成長o既「戰友」
我地睇住佢地大o既「小羊」，同埋睇住我地大o既「牧者」~
正呀~~
更正o既係，有人係o個時決志呀~~yeah~~榮耀歸俾上帝

之後晚飯，我地 K 組已經有講有笑嚕~~
大家亦開始分享少少自己o既野~~不過我地食飯真係勁快....半個鐘一定搞掂囉~
所以聚o既時間都唔多(其實好多人都會忙自己小組o既事)

晚飯完o左之後係晚會~~一個燃起我靈魂o既晚會
罪呀！老我！點解仲要停留！？點解我仲要縱容佢地？
睇到耶穌俾人釘o個下，諗到我o既罪，我係幾咁扎心，我真係覺得自己唔配
我喊，我每次諗起我o既罪我都想喊....我o既過去，多醜惡
我o既罪，幾咁重....有o的一直都改唔好，我好恨，好恨自己生命中o既罪....
中中為我祈禱o個陣，我真係好想失控，好想崩潰....但係我知，我身邊有細o既組員
我唔可以崩潰，我仲要照顧佢地，我要撐！
呢一晚，好經歷到神，經歷到佢o既愛，其實一直都經歷到
但呢一下，係聖靈o既動我去釋放，係從罪中釋放囉~
「每年camp都要喊一次」係之前3年黎都冇喊過o既我講o既一句話....
而組員們都好正，我知佢地都有用心聽，佢地都有感動囉~
之後一齊敬拜，我好鍾意用詩歌敬拜，因為我係一個笨口拙舌o既人
我唔識得用好靚o既言語去敬拜，但我可以用歌聲，用身體去敬拜上帝
我唱得好瘋狂，我會放盡聲去唱，會唱到無聲，甚至乎走音
但我都會唱，因為我瘋狂係為o左上帝囉~~我知呢個係上帝喜悅囉~
好正o既一晚，再一次感恩，再一次將榮耀歸俾上帝~
「你我要破碎老我　你我要破碎老我　你我要破碎老我....」

之後返房，沖涼，靈修，睇住班細o既訓哂，先入睡....
夜晚....臨訓前....我又有孤軍作戰o既感覺....原因？唔識講？唔係好想講....
但我祈禱，我擺上，我交託，我知道有上帝同在，我唔介意孤單
況且，我根本一o的都唔孤單，起碼我地有「六舊腹肌，兩舊胸肌」嘛~~
呢一晚，訓得好好~~

講住咁多先~仲有兩日聽日寫~(haha~都俾你地抖下氣嘛~~)
另外都夜嚕~~寫唔到咁多....

今日....返工，夜晚同jason、佳、藍食飯~
開心o既一日~~

另外~~出糧喇~~hahahaha~

>>August 6, 2004 at 7:51:34 PM GMT+8