2004 年 5 月 25 日 星期二 【乍寒還暖】

首都遊學第五天：出出入入


今朝有堂要上，想試下o係北大食早餐
(反正用飯卡唔駛自己俾錢 ^^)
行到去農園先知原來唔供應早餐
於是行去另一間食堂去食
不過選擇都得返好少
我食左個玉米粥，感覺好似唔甜o既紅豆沙
食完就返歷史系上堂
上兩次教授係用黑板同白板授課
今日李孝聰教授就用 Powerpoint 同我地講
北京城o既城市規劃，都幾有趣

上完兩個鐘堂又係食飯時候
當然又係老地方啦
今日特別留意下北大學生有o的咩特質
發現好多都係書生樣
戴住深近視o既眼鏡，儀表唔太注重
衫褲都比較樸素庸俗
不過都有一兩個比較時髦o既
食完飯仲有o的時間
就去商店掃貨同買手信
之後就上 CCIV 第二堂導修
阿 Sir 補充返呢幾日o既要點
同埋俾我地自己組討論網頁o既內容
傾完就解散，同 groupmate 一齊去圖書館上網 check email
收費係每 15 分鐘 $1，於是就兩人一機咁用
速度當然無香港咁快啦，但都可以接受o既

上左半個鐘網，但又未係時候食晚飯
最好o既節目...就係碌保齡！
碌完返北大食飯，食完又行返去療養院
即係一日出入北大西門四次
但無計啦...o係北大食飯唔駛自己俾錢喎 ^^
亦因為張卡任擦，又想試多幾碟菜
到最後食唔晒結果剩返半碟係度，諗返起其實幾浪費架...
仲有好多貧苦學生經濟能力只係負擔到一飯一食送架咋...

今朝落左場雨，聽別同學講只係人工雨
但帶o黎少少清涼感覺都好


相片

雨中的北大


睇我地叫(浪費)左幾多碟食送?!


>>June 16, 2004 at 1:14:18 AM GMT+8

2004 年 5 月 24 日 星期一 【微雨】

首都遊學第四天：故宮天壇


今日旅遊車一早就來到療養院
但上班日入市區的要道與香港一樣擠塞
花了一小時才到天安門廣場
落車後阿 Sir 和 Miss 用快步行畢廣場
後隨的跟不上之餘又停步影相
龍頭與龍尾幾乎差半個廣場那樣遠
老師都忍不住重申我們正在上堂考察
不是旅行團，又話故宮地方大要跟緊些
然後老師拿著票讓我們進入故宮
這時有兩個不速之客魚目混珠地混入團隊中
而又沒被我們發現，結果有兩個人入不來
又要花錢買多兩張票了...

我們只在故宮逗留兩個半小時
所以只能看到最重要的建築
御花園都沒有怎麼逛就要離開了
參觀期間遇著有十多個保驃圍著一個外國女人
保驃更推一推我和 Miss
Miss 即刻話是甚麼女人那麼巴閉
當晚看新聞才知---原來是巴西總統夫人！

我們在一間著名吃炸醬麵的食店吃午餐
但昨晚剛剛才吃過炸醬麵
這次就叫了排骨麵，一樣好吃
而且又有錢袋 ^^
之後驅車去天壇，買票時收集我們的城大學生証
原來拿著香港學生証去到北京買學生票都有效
果真是「一國」(我們怎捨得獨立 :P)
今次老師就打醒十二分精神，看清楚是否全部「自己友」
但想不到入公園要付錢，睇建築要付多一次錢
真是貪得無厭 ~_~

在天壇留到五時多，今天的考察就告一段落
大部分人都跟車返北大
但又由於塞車，到北大西門已經過了六時半
因為食堂過了七時就收爐沒東西吃
時間無多，要急步走到農園搶東西吃
一邊進食，食堂亦一邊關燈和冷氣
其實我覺得北京的生活模式是非常環保的
因為可以用盡太陽光減少使用電燈嘛
四點幾天光，六點起身吃早餐
八點半開始工作，午餐十一點至一點
五點半下班晚餐，還有兩小時才天黑
十點電視台已經播晚間新聞了
在香港我想要把上述時間調慢兩小時吧
所以食堂下午一時後不供應午飯，晚上七時就休息
相信典型的香港人都會不太習慣 ^^


相片

阿 Sir 講課情況


熱鬧的故宮


>>June 16, 2004 at 1:12:06 AM GMT+8

2004 年 5 月 23 日 星期日 【酷熱】

首都遊學第三天：逛天安門


今朝本來八點起程去考察天安門
但架旅遊巴遲到，入到o黎又泊錯左位
搞到要倒幾次車先走得到
結果九點先離開療養院
我地o係人民大會堂落車
影左幾張相就行過去廣場「上堂」
其實都係 briefing 幾分鐘o者
之後我就同 groupmate 上前門(正陽門)
有o的同學就去毛澤東紀念堂瞻仰遺容
由於袋、相機等等都唔帶得入去
入紀念堂亦要大排長龍
逼住我地要o係廣場乾煎半個鐘等佢地出o黎拎返o的袋
集齊人之後 Miss 想拉 CCIV banner 影大合照
但過左無耐就有公安上前干預，仲差o的被沒收
公安話展示o既物品唔可以長或闊超過 30cm
Miss 同佢理論左一陣，但最後都無謂小事化大
無 banner o既團體相我地都照影啦...

之後過馬路到天安門城樓前，已經係十二點半
係時候行去王府井食午飯
三個字後去到一個商場下面o既食坊
見到有吉野家，但一個牛肉飯餐都成十四蚊
証明王府井消費真係高一截...
$15 津貼，我就食左碗蘭州拉麵($10)
再o係吉野家買杯凍檸茶($3.5)
跟住又由王府井行過去天安門隔離o既歷史博物館
o個度特別開設一個香港館
展出一o的上一世紀o既香港事物
包括電車同渡輪模型
另外仲有個小型蠟像館

參觀完我個組同 Vincent 唔跟車走繼續留o係市區
但又唔想行去王府井，咁就搭地鐵啦
北京o既地鐵不論搭幾多站，市區線一律都收三蚊
13號線(郊區線)來往市區就收五蚊
因為市區線係不設出入閘機
只有查票員o係落月台o既樓梯註銷車票
所以搭一站地鐵成本係非常之高
一出王府井地鐵站就係李嘉誠起o既東方廣場
聽吳同學講話呢個商場橫跨一個地鐵站咁大！
裡面o既商店當然以買名牌o野為主

之後沿王府井大街行去東華門夜市
個度檔檔都買小食，但價錢唔算平
仲要同一種食品無論街頭街尾都係一樣價
唔同o既或者就只係得師傅o既手工
行左一圈之後就折返去東安市場
好多香港人熟識o既牌子，G2000、U2、Pizza Hut 等等
都可以o係呢度搵到，仲有戲院同遊戲機中心
不過機舖無乜人打機，因為兩三蚊一鋪
o係北京o黎講都幾奢侈下

行完東安市場，又係時候醫肚
去到小食一條街，見到同團其他同學o添
個度賣o既o野食隨時令你嚇破謄
爆肚...講緊o既係羊肚
仲有串燒動物內臟、串燒昆蟲...
舖頭之間競爭都好競烈，大家都各出其謀拉客
但有o的拉客行為就實在不敢恭維
我地最後選左間舖面較大o既
柯打炸醬麵同幾串串燒一齊食
埋單剛好一個人 $15

食完就回程返北大，但因為五個人坐唔到一部的士
於是就一齊搭地鐵去最近北大o既站先轉
(想像下北大o係元朗，王府井o係旺角
我地o既做法就等於搭地鐵去荃灣轉的士
所謂最近北大o既站---西直門，其實同北大仲有段距離)
就係搭地鐵途中...小弟流鼻血喇....
其實琴日上緊堂已經小流過一次
今次就 feel 到o的鼻血係湧出o黎 (PG 家長指引)
香港從未試過流得咁厲害
幸好去到西直門就止左
出左站就即刻搵的士，不過唔係個個識我地住o既療養院
幾經辛苦搵到個識o既，就叫 Vincent 跟 Ada, Elaine 上車先
我同 Jeffrey 就上後一架識去北大西門o既，再指示佢去療養院
講埋，北京的士分每公里 $1.2, $1.6 同 $2 三種
$2 個種好少見，而前兩種都係 $10 起錶
但搭比較長程就睇到個差別
好似今晚同一條路線，$1.6/公里就要俾貴五蚊...


相片

格格和公主穿崩了！


香港夜景 -- 係咪影得好靚呢？
其實係博物館香港展廳o既佈景板o黎 :P


香港小輪模型 @香港廳


電車模型 @香港廳


金縷玉衣 @歷史博物館


清朝乾隆年間o既水晶杯
(好似日本城賣 $10 o個o的 :P)


國產第一部跑車


火紅火綠o既 Miss @天安門城樓


毛澤東紀念堂o既人潮


大城小事：收費廁所，每次五毫，大小同價 :P


東華門夜市


夜攝王府井


好大個火鍋爐呀...


王府井小食街


>>June 16, 2004 at 1:09:37 AM GMT+8

2004 年 5 月 22 日 星期六 【晴】

首都遊學第二天：北大生活


今日正式做一個北大學生喇！
第一節課九點開始
但七點鐘就已經收到 Morning call！
駛唔駛預兩個鐘俾我地食早餐呀？
一於少理，訓多半粒鐘先起身
八點過o的落到去餐廳食早餐
有番茄通粉呀！但煮到好鹹
鹹到連之後食白粥都唔覺淡
食完就同 groupmate 行去歷史系上堂
朝早呢堂係講中國o既皇權
仲請到已經退左休o既祝教授
出山為我地講課，認真難得
同香港一樣，上一個鐘堂就有兩個字休息
但唔知正式o既堂係咪都會咁做...
到 Q&A 時間我地o的同學乘機問佢關於
大陸同香港o既政制問題
而佢亦都答得好小心
不過佢仍然好受我地歡迎
放 break 同落堂之後好多同學都捉住佢影相 (包括我 ^^)
上完堂就食午飯，呢餐留o係課室食便當
味道都過得去啦


第二堂兩點半先上，食完飯仲有成兩個鐘自由活動時間
有o的同學等唔切去商店掃紀念品
有o的就去圖書館上網
而我個組就決定返去療養院o既康樂中心碌保齡 ^^
返去之前經過北大超市，諗住入去行個合鴿轉
但原來入之前要擺低個背囊去寄存
行行下咁o岩遇到阿 Sir 同 Miss，仲請我地食雪條 (多謝晒！ ^^)
返房稍事休息之後，就把握時間落去保齡球場
首先開左一局大家輪流打，之後又再開多兩局
我自己就第二局打得最好
時間差唔多就返學校上第二堂
徐教授講宮廷生活同皇家園林
呢堂就悶左o的，釣過一陣間魚
捱過呢兩個鐘，老師就宣佈其後o既行程
可以俾多o的自由我地
大部分o既膳食可以自由安排
o係學校食o既可以用飯卡，每張 $50
每組派兩張，用完可以問老師再拎
考察期間o既午膳就每人津貼 $15
食多左自己出，食得少就自己袋 :P
如果考察o既地方近市區，考察完可以繼續留低唔跟車走
呢個決定我覺得絕對係德政
因為可以揀自己最想或者最鐘意食o既o野 ^^
要o係市區玩亦都可以搭少一程車

拎左飯卡，就行去飯堂視察下
去到別同學推薦o既「農園餐廳」
裝修就好似香港o既 food court 咁
十幾個檔口，每一檔o既名就唔同喇
但賣o既o野食大同小異
都係好似香港「兩食送飯」咁
揀o岩食送，插卡，就拎得走
價錢當然視乎豐富程度啦
一款多菜少肉o既食送加一碗米飯都係 $2.50
但如果要排骨、魚蝦呢o的就要 $4.00 或以上
飲品都可以插卡俾錢架，除左飲水同百事七喜
康師傅就係我o係北京最愛 ^^

食飽飽個天都仲未黑，於是就去南門行下
一出南門o個條大街原來都好多o野食
跟住我地行到中關村圖書大廈
裡面有間新華書店，有四層樓高
地下o個層係賣 CD/VCD/Game o既
當然見到好多香港歌手o既 CD 啦
而且內地正版十幾廿蚊就有交易
上面三層就賣書o既，我買左本北京地圖書
呢本書對我日後o既行程貢獻好大
無左佢一定遇上好多阻滯
另外又買左兩本拇指 size o既書
仲影左陳列o既書架o添 ^^
書店旁邊仲有間屈臣氏
一入到去就聽到播緊麥o麥o既歌 ^^
留到八點幾就起程行返去療養院 lu
經過矽谷電腦城，但一早五點半就打烊
仲有間叫 Hi!24 o既便利店，又o係裡面「Hi」左陣
由於沿路無乜街燈，要一直開住電筒
相信當地人一睇就知我地係第二度o黎 ^^
但如果唔係靠電筒照到條路前面有o的「蠱惑的窿」
可能會有人玩左黃子華o既「一觸即發」都唔定...


相片

Canteen 外觀


Canteen 內涵 (似唔似 food court 呢?)


北京天氣點？豎立o係 Canteen 門口o既報告板話你知！


是日晚餐：雞窩 ($4) + 米飯 ($0.5) + 雀檸 ($1.5)


北大民主牆


北大南門


大城小事：樹蔭下倚著自行車睡著了


裝迷你書的迷你書架


>>June 16, 2004 at 12:53:24 AM GMT+8

2004 年 5 月 21 日 星期五 【晴】

首都遊學第一天：歡迎歡迎
(天氣情況以北京為準)

上午五時三十分
天開始光，但下著微微細雨
父親陪我拿著行李到 A12 車站
候車期間目送了頭班電車、8、82、106
(註：最近我先知頭班8號係 05:18 開)
「城市飛人」終於到了！
與父親道別，找個座位，半夢半醒的往機場去

「城市飛人」抵達機場離境層的時間，剛好是七時正！
下車後立即趕去港龍登記櫃檯找同伴
我在 Group C，同組有我同學，也是組長 Jeffrey
還有在第一次導修時識的 Ada 和 Elaine
李 Sir 同 Miss Wong 則忙著幫我們辦登記手續
由於辦登記的時間比預期耐
故此在拿到登記証，與 groupmate 落一層
到抵港層的大家樂吃早餐後
時間都不容許我在禁區內多逛一會
便要立即前往登機閘口預備登機
在眼前的是一部嬌小的 A321 空中巴士

飛機準時起飛，但過程中機身十分搖晃
機艙內娛樂設施欠奉
莫講話電視，連電台頻道也沒有！
那麼機上活動的選擇就只有：閱報、睡眠和玩撲克(一小撮人)
航程中供應了一份小午餐，我選擇了雞肉腸粉
不算得上非常難吃，但明顯地雞肉好吃過腸粉 :P
起飛後兩個半小時，航機已經到了北京郊區上空
比我想像中快了一點，然而降落時我們又要感受
一陣過山車式的搖晃 ~_~

北大方面派了兩位研究生---別同學和吳同學
在機場歡迎我們，他們亦會隨團跟足我們兩星期
大家拿著行李走到旅遊巴停泊處登上旅遊車
接待單位又派給我們每人一支水
由於一早知道北京天氣乾燥
又恐怕北京的水不適合自己腸胃
我在香港已買定三支水
在機上又拿了一支
如今我已經拿著五支水了！
老師預告要一小時才到我們下塌的地方
但原來四十分鐘便到
北京郵電療養院...不錯，我們就在這兒「療養」十四天
分配好房間，立即入自己房間一看...
原來跟普遍酒店分別不大，只是少了個雪櫃罷了
但尚算是整齊企理

我們放好行李都已經是三時了
療養院餐廳早已收爐，但幸好還留下一些「食送尾」給我們
就盡管填一填肚吧
這時 Miss 說到買電話卡事宜
最低消費 $100，包括 $50 買電話號碼加 $50 儲值額
這也成為了在北京的第一項消費

飯後就步行往北京大學「散步」
由療養院行去北大西門，大約五分鐘便到，
但要行去校園較中心的地方，例如圖書館、食堂、商店
則要花上十五至二十分鐘時間
而當地的學生當然會騎自行車(單車)代步啦

接待單位---北大歷史系辦公室在傳統的四合院內
他們為我們準備了歡迎會
分發了學生証和一袋紀念品
其後別同學又帶我們沿校園行一趟
校園的北方是風景休閒區，有湖(未名湖)有塔(博雅塔)
與行公園分別不大
晚上在學校內的勺園享用歡迎晚宴
有餃子、有烤鴨，不過飯就嫌硬了一些...

回到療養院，老師分發電話卡
第一件事打回香港報平安，記下療養院電話及房間號碼
那麼以後打來只需香港付費就可以 ^^
(致電往香港每分鐘要 $2.60)
之後就無聊看看電視有什麼台
原來都有成三四十條頻道，但全部大陸台
轉台期間看到有香港藝員出現！
原來正在做《公私戀事多》(國語配音)
又看到大陸版的《百萬富翁》
但最高獎金只有 $30000...
看到十二時多就關燈睡覺了


相片

KA990 香港→北京 (香港機場攝)


北京大學西門


藍天白雲下的北大校園 (個人甚喜歡這張)


未名湖與博雅塔


路牌


北京大學圖書館


療養院大堂一攝


今日最大負擔 --- 五支水！ (加攝房間之熱水壺)


>>June 16, 2004 at 12:32:14 AM GMT+8

2004 年 5 月 20 日 星期四 【晴】

上京前夕


住左四個半月九龍塘
今日終於都要走
有o的唔捨得...不過無計啦
窮苦學生點俾得起近萬蚊一年o既房租丫~
但走之前點都要打多一次牌先走得安樂 ^^
星期二晚十點幾到翌日凌晨三點半
打左八圈，最後輸八蚊~
我o個層樓由搬入o黎到而家走都係好靜
無乜社交聯誼活動
到而家我講得出住呢層樓o既人名都唔夠三份一 ~_~

最大規模o既搬遷行動琴日進行
我懶得行落斜路去地鐵站
選擇左o係宿舍出面巴士站等 E22 去牛頭角轉地鐵
司機見我拎晒行李，問我去邊
無錯，我係去藍田，唔係去機場 ^^
可以帶上北京繼續用o既o野都搬返屋企做中轉站
其餘零零碎碎o既就放o係 locker (搞到頂晒閘)
去完北京返o黎再執

今日返 Hall check out 之前去左一次赤柱
事關大老細請我地 VRS 食飯
估唔到到最後都仲保得住南區第二
(因為預左包尾...)
而且聽返人講，其他區上頭向 VRS/A 施壓得好勁
相比之下我o既壓力算係輕於鵝毛
(可能赤柱做o野o既人唔鐘意太緊張掛...haha)
所以我呢個幾月都做得好 enjoy
完全無後悔搵錯工，跟錯人 ^^

食埋晚飯又係時候執行李
兩個禮拜後先可以再見到大家喇
See you all later!

>>June 4, 2004 at 12:37:52 AM GMT+8

2004 年 5 月 16 日 星期日 【晴】

最後戰役


琴日同今日近乎全職做選民登記
琴日o係石澳做七個鐘
今日煞科就o係赤柱做六個鐘

好耐都無去過石澳喇
連起左個高爾夫球場都唔知
原本計劃係第二組o黎石澳三次
結果變左我o個組做今日o既唯一一次
(o個組o既組員全部失晒蹤...)
今朝天色麻麻，都擔心少左人入o黎
兩點之前o係石澳玩o既大多數都係
未合資格o既初中生
好彩班大少少o既陸續坐車o黎到
加上附近石澳村有一批人未做登記
所以到最後都做到 23 張
o係一致睇淡o既情況下成績都算唔錯

今日 last day 上頭俾我做指揮
我就決定將石澳o既拉幕拎返屋企
今日再拎去赤柱，實行「叫兩飛」
o係大街 set counter 再o係廣場擺拉幕呼籲登記
臨走之前再去赤柱正攤掃沙灘
盡力做到最多張為止
經六個鐘努力之後，大街做 31 張
廣場 16 張，正攤 7 張，合共 54 張
繼復活節o個期之後都難得做超過 50 張
呢個半月o既選民登記神聖任務亦宣告完成
當然跟住落o黎就係...等收人工
估唔到到最後我o既薪金竟然可以
cover 到北京團o既費用
(甚至可以俾埋機場稅...haha)

>>May 17, 2004 at 11:27:14 AM GMT+8

2004 年 5 月 14 日 星期五 【乍寒還暖】

旅行茶會


昨日與舊同學談 JUPAS 進展不太多，今日繼續
但因為下午要開北京團的「茶會」
所以要等到六點才能再續
希望我給予的一些愚見能幫到他選最適合的學科吧！

七日後小弟就會身處北京了！
今日先來進行四次導修中的第一次
其實跟旅行社的「茶會」分別不大
都是說明注意事項為主
不過派的就不是旅行袋，而是 Cap 帽一頂！
另外亦進行了分組和解釋功課安排
四項功課包括：
1. 從七個講座中選兩個寫評論(每篇 500 字)，
回港後一星期交 (其實在北京都做到)
2. 寫 500 字北京之旅的感想
回港後兩星期交 (可以當寫日記...哈哈)
3. 小組合作交一個網頁，回港後一個月交
(今個學期電腦課學的有用了！)
4. 評價另外兩組的網頁，每個 500 字，七月中交

乘搭港龍航空往返北京
七點就要在機場集合
即是要搭頭班 A12
現在最苦惱的是北京溫差異常大
介乎 13 至 30 度
莫非要短袖衫外穿羽絨？
當然不可不帶口罩和消毒紙巾啦
就算沒有沙士也得擋風沙嘛 ^^
(行程小弟會在出發前貼在這兒)

>>May 15, 2004 at 12:09:08 AM GMT+8

2004 年 5 月 13 日 星期四 【晴】

麻麻煩煩


無街去o既日子
最好就係返工+影巴士 ^^
本來剩係返琴晚洗樓
但見今晚無o野做，決定再賺多二百
不過黃竹坑區真係俾我地做到爛
琴晚做埋南濤閣最後一座家訪
再o係平台企左一陣，都係做得十三張
今晚再o係洗過樓o既黃竹坑村擺 counter
就真係只為等幾個「漏網之魚」
當然齋等唔係辦法，每個人都出過去巴士總站
南濤閣以至雅濤閣企一陣
我o既收穫最多，有三張
四個鐘結果做左八張，算過得去架喇

今朝去香港仔 office 交 form 前去佐敦影晨早特別線
交完 form 之後有個好耐無見，o岩o岩考完 A-level o既
舊同學打電話o黎想探我
於是就帶佢去 City Garden Cafe 食 lunch
(其實係我想去，呢個學期都未去過)
帶佢行一圈學校，又玩左陣足球機
之後就返 Hall 同佢傾 JUPAS 選科
傾到不知時日過，連約左 Raymond 銅鑼灣
食 tea o既時間都過埋
以為 182 會快o的到，點知遇上紅隧口大塞車
(係度講聲唔好意思先~)

食完 tea 搭 72A 去黃竹坑開工
o都八達通發現俾左車錢後張卡 -$0.1
但銀包就得返四十蚊
黃竹坑村又無提款機
結果收左工要問 VRA 借 $4.5 搭巴士
今日我真係麻煩到幾多人
但同時亦有人麻煩我 (註:唔代表我唔 like ^^)

>>May 14, 2004 at 11:24:19 PM GMT+8

2004 年 5 月 11 日 星期二 【晴】

我係阿爸?


琴晚考埋 Earth System
Long Question 唔係太識
又衰在題題都必答無得揀
答晒要答o既o野又決定早走 (17 分鐘前)~
正式完成晒成個 Exam
不過仲有o的同學未來幾日仲有試要考
所以未大肆慶祝住
只係幾個同學去石硤尾公園打一個鐘籃球同食宵夜 :P
其實我幾欣賞班同學讀書o個陣好用功
玩o個陣又好投入，我自問呢方面仲未做得咁好 ^^

今日搵 Tanner 借 Paper 準備 Summer research interview
原來競爭都幾激烈，有 >20 個人爭
而家又推遲到 6月先 interview
即係睇埋呢個 semester 個成績
Tanner 話機會都係 50/50
interview 表現就係得唔得o既關鍵
希望過到呢關啦
唔係呢個暑假都唔知點過咯...

夜晚同另外兩個 VRA 洗南濤閣
上年係無洗過呢度
但可能我地o黎得太遲
大部分都登記左或者改左地址
好彩都仲遇到一家三個人未改地址
咁先僅僅做到雙位數咋
不過同 VRA 閒談間原來佢地幾驚另一個 VRS
有我係度o既時候佢無乜o野
但得佢一個話事就會好 cool 好嚴格喎
不過嚴格都有嚴格o既好處o既...(站在 Supervisor 立場 ^^)
今日有個 VRA 叫左我一聲「阿爸」
我一時間唔知點反應...好唔自在...

收左工搭 107，一時興起坐去九龍城合成食糖水
望個餐牌，72 種組合
大部分係紅豆綠豆蓮子百合雪耳馬蹄玩 cross over
睇到眼都花，結果柯打左碗雪耳百合西米
話可以清熱養顏喎...
做阿爸要補一補架喇 :P

>>May 14, 2004 at 10:24:39 PM GMT+8