2004 年 6 月 28 日 星期一 【清涼】

儀器扭計


今日開始長期留在實驗室的生活了
早上都是看 Ivan 和 Meiji 怎樣做 Ion chromatograpy (IC)
較新的 IC 機壞了，聽他們講等了三星期都無人修理
惟有用老爺機，不過今朝它又「扭計」，整了一排才用得

吃完午飯我有機會落場幫手接觸部老爺 IC 機
剛剛上手有點雞手鴨腳呢，但總算沒有意外發生 ^^
不過可能今日試的 standard solution 存放了好幾天變了質
出來的結果其實沒有甚麼價值
今日對我來說等待結果的時間是最難過的
每次打一支針入部 IC 機分析都要等十分鐘以上
間中又會遇到它扭計要重新調較過
確實要想想以後怎樣善用這些等待的時間...

>>June 28, 2004 at 10:56:18 PM GMT+8

2004 年 6 月 25 日 星期五 【晴】

實驗學徒


有樣o野其實都蘊釀左一段時間
等到今日開始左先同大家講
早排話過我o既 Summer Research Project
俾一班 Department 高高在上o既教授 reject 左
但我同 Prof.Tanner o既聯絡無因此而中斷
上個禮拜 send 左封電郵話我想做 helper 學o野
到今日終於成事...佢叫我試做一個禮拜先
鍾意的話可以留低，仲會俾返我少少酬勞 ^^
咁我可以名正言順入 Lab「搞三搞四」:P
因為只係幫手做 research，可以唔駛搞
Present 同做 report (除非老細要求落就無計啦...)
不過我都會好俾心機做o既...

今朝十點返到學校搵 research student Ivan
點知佢話今日無實驗做，只係等下晝出 field 去南丫島
佢指指點點左平時用開o既儀器，講左通常做o的咩
(就係 calibrate 同埋等...)
跟住搵 Tanner 問左可以跟 Ivan 去 field
太好喇！第一日就可以出 field
仲係去咁大個仔都未去過o既南丫島！
跟住食飯做 gym 上網等時間過
等埋做 FYP o既 Meiji 就出發喇！
搭三點十o個班「普通船」去榕樹灣，唔駛半個鐘就去到
一落船就見到三支發電廠煙囪，而 Ivan + Meiji o既 Project
(我o既 Summer research 如果有得做的話)亦都同佢地有關

Tanner 有個住南丫島o既朋友發現佢所種植物o既葉
出現左唔同大細o既窿，呢一兩年問題嚴重左
佢懷疑係發電廠排放o既氣體同雨水混成酸雨
落雨o個陣雨滴侵蝕樹葉，但當然都唔排除只係蟲蛀
我地本著科學家精神，分別o係佢屋企天台、數碼港同城大三個地方
放置收集雨水o既筒，然後拎返實驗室用儀器做分析
由於約左個戶主五點，早到左半個鐘頭
唯有o係碼頭邊o既樹蔭地方坐陣先再行去
沿路都發現好多植物樹葉有細窿
但亦都見到有蟲仔蠶食緊樹葉
去到戶主寓所，原來戶主係一位外籍太太
上到天台，發現隔離屋裝修緊，塵土飛揚
早兩日收集o既雨水又流唔晒入筒到，污染左唔用得
至少要等到裝修完左先可以正式做實驗
今趟有少少白行，o係南丫島留唔過個半鐘
但總算知道南丫島真係無乜好行，我鍾意長洲多o的 ^^
回程搭o既叫「快船」，收貴五蚊 (快船 $15, 普通船 $10)
但我發現兩程搭o既船係同一架！！
跟住等車返屋企，竟然o黎架 Centroliner 行 M722！
望多兩眼確定無睇錯之後就梗係上車啦
坐到去總站先落車(試埋佢行耀興道)
原來今日仲有至少三部 Centroliner 行 2A
條線早幾日狂開舊車，真係唔知巴士公司搞邊科...

>>June 25, 2004 at 11:42:23 PM GMT+8

2004 年 6 月 24 日 星期四 【晴】

潔身自愛


知道阿 Deep 吳浩康涉嫌藏毒被警方調查都幾驚訝
睇佢個人都好正氣，歌又唱得唔錯
明知家陣拚緊事業就唔應該去接觸毒品惹火燒身
不過佢選擇左咁...只好話佢唔自愛囉
辛辛苦苦建立o既形象同事業就毀於一旦喇...

F.I.R.飛兒樂團 最近o係台灣非常之 hit
唱片公司無乜宣傳下香港 IFPI 銷量榜竟然都排第三
今日聽過佢地其中一首歌，我都幾鍾意

Lydia
Lydia　迷離的眼眶
為何流浪　心碎的海洋

受了傷　連微笑都徬徨
Gypsy女郎　為誰而唱

你會看見霧　看見雲　看見太陽
龜裂的大地重複著悲傷

他走了帶不走妳的天堂　風乾後會留下彩虹淚光
他走了你可以把夢留下　總會有個地方　等待愛飛翔

Lydia 幸福不在遠方
開一扇窗　許下願望

你會感受愛　感受恨　感受原諒
生命總不會只充滿悲傷

他走了帶不走妳的天堂　風乾後會留下彩虹淚光
他走了你可以把夢留下　總會有個地方　等待愛飛翔

>>June 25, 2004 at 11:21:55 PM GMT+8

2004 年 6 月 22 日 星期二 【晴】

愛古好今


星期日父親節一家人去了北角鳳城酒家飲茶
孝順仔女理應早些幫爸爸霸位
但星期六實在玩得太累
只能「盡力爭取」和父親同步出門口 :P
「港式點心」吃得多了，再吃回「廣東點心」
嚐到了一種既新鮮又久別重逢的味道
傳統，其實也不全是壞東西
尤其經得起時間考驗的，差極都有限 ^^

不過香港人還是喜歡包裝、有新意
在云云地產發展商中，新地可說是佼佼者
可以把遠離市區的元朗和馬灣樓盤
包裝到成為一個小社區，不假外求
自然發售時樓價也可以「增值」！
今日趁著還有免費車免費船坐時，趕快到珀麗灣朝聖
看看新地是否真的如此「巴閉」
順道試試他們的交通工具 (← 主要目的, hehe ^^)

在 IFC can‧teen 吃過午飯後
行去中環二號碼頭搭船
搖搖晃晃了廿三分鐘終於到朝聖地
由碼頭沿路行去沙灘廣場 (辛苦晒 Raymond 陪我行)
很容易就擺脫經紀入去參觀示範單位
差不多面積的單位，有的間隔很實用
但有的房間細得十分可憐
差不多戶戶都有露台
對著青馬大橋景真的不知說什麼好
還望早日中六合彩吧 ^^
發夢完畢就坐 Super Pointer Dart 去葵芳
(今日見不到「鎮(珀麗)灣之寶」設計線電動巴士，可惜...)
得悉 K 組在 Maggie 家中砌 Puzzle
於是轉坐 46X 去大圍再行去美松苑

Maggie 家除了貓多外，原來也是砌圖世家
不過我很久沒有接觸這玩意了，來到都好像有心無力
但在六個人同心協力下，買回來打算砌好送給 Miss 的
1000 塊 Puzzle 砌了三個鐘頭都完成快將一半
嚐過了世伯煮的意粉和蒜蓉包後，我就起程回家了

後記：砌圖星期三已經完成，希望 Miss 鍾意啦！

>>June 24, 2004 at 2:33:02 PM GMT+8

2004 年 6 月 19 日 星期六 【酷熱】

錦綉一天


o係北京 Miss 主動叫我地上佢屋企玩，今日終於成事
朝早七點九就出門口，影樓下o既晨早特別線先
八點九搭地鐵去藍田轉 277X 去華明再轉 273A 到上水
o岩o岩好十點到，買埋蛋糕同利賓納(唔知點解忽然想飲)
就等村巴入錦綉花園，再跟 Miss 電話指示行去佢屋企
(期間試過按錯人地屋企門鐘...好彩無人o係屋企)
入到去循例參觀佢間屋，兩層獨立屋連前後花園
條樓梯好似巴士o個條咁(唔係直梯 :P)
不過間屋唔算得話好大
跟住就開始「康樂活動」喇，Miss 屋企有張飛行棋地氈
o的棋真係一架架飛機o黎o架！粒骰又零舍大粒
不過行一次棋都要做好多運動囉...
玩左兩盤已經好疲倦，跟住有o的捉圍棋、波子棋
我就教o的朋友玩妙探尋兇，不過玩完一次唔成功o既
玩緊第二次就話去美食廣場食午飯

食完飯返o黎轉左玩 Mastermind，但挑戰者實在過份「深思熟慮」
玩一鋪 Mastermind 隨時仲耐過玩一鋪波子棋同一圈麻將
Mastermind 之後繼續「食腦」，四方城充當 Miss 打手
輸左都係 Miss 俾錢，不過到最後關頭就要聽 Miss 指揮
結果總算幫 Miss 食左鋪牌，不過埋單 Miss 都仲係輸好多
Jeffrey「伉儷」合謀贏晒組長 Chris 同 Miss o的錢 :P
夜晚就開「麻將訓練班」教 Kathy、Sisi 佢地打牌，學費分文不收
又食左 Miss 同佢老公精心炮製，用屋外烤爐烤o既菇、番薯、露筍
同埋帶o黎o既蛋糕，留到十點就同 Miss say goodbye 喇
之後我同 Elaine 搭元朗車出元朗東，自己轉 968 去銅鑼灣
食宵夜再搭電車，返到屋企都成十二點半
自北京返o黎之後都未試過咁長時間o係出面玩喇 ^^
期待下次 gathering...

>>June 25, 2004 at 11:13:35 PM GMT+8

2004 年 6 月 17 日 星期四 【晴】

理髮有感


熱辣辣，係時候剪個短髮
其實我係有個相熟o既髮型師
佢姓程，幫襯左七至八年架喇
最開始係商場裡面一間髮廊打工
有一次搵佢剪之後屋企人覺得唔錯
所以就 keep 住搵佢剪
跟住斜對面有間髮廊開張，佢過檔我又跟住過
到佢做老細開地舖，我一樣照捧場
由父母陪我去到自己一個人剪頭髮
佢可以話睇住我大，睇住我高
成日話：「無見一排又高左喎！」
但兩三年前佢突然北上神州
我又唔太鍾意同舖其他人o既手勢
就開始周圍剪o既時間
不過都離唔開北角同鯽魚涌呢區
之後得知程師傅再返o黎原舖，都幫襯過兩三次
但剪一次比其他舖貴起碼十蚊
有時出於成本考慮，有時因為時間唔適合
結果呢一兩年都比較少搵程師傅剪，住 Hall 就更加少啦

早幾日見程師傅間舖洗剪吹減價
於是今日決定搵呢位老朋友
下晝去到見裡面得一個幫手幫人洗頭
於是就出中環影完車先再返o黎
呢次入去見程師傅訓o係梳化，洗頭幫手
剛幫一個客洗完頭，拍醒程師傅叫佢操刀
搞掂個客就輪到我，我問佢係咪得返佢一個
佢落寞咁點頭，個一刻完全感受到一個人打理成間舖真係好攰
但最大問題係靠佢一個人唔知可以撐到間舖幾耐？
希望下次有需要剪髮o既時候仍然搵到佢
甚至如果情況繼續係咁落去的話
好似舊時次次都搵佢剪以示支持又有乜所謂...

其實程師傅唔係話手勢好了得或者剪得特別有型
有時甚至嫌佢剪得過份老土
但都仲不時搵佢，就真係一個「情」字
我呢份人就係咁，識左一個人做左朋友
無論其後幾耐無聯絡都好，都會設法繼續關心佢o既近況
知道佢呢排有困難都會擔心埋一份
講到呢度，真係好想見返好多人，一齊坐低傾計呀
我相信...總有機會o既...

>>June 21, 2004 at 12:34:55 AM GMT+8

2004 年 6 月 15 日 星期二 【乍寒還暖】

驛馬星動


過去三個星期除了我去了北京外
我走了不久我父親就去印尼探望他爸爸 (即我祖父)
而我回港後第二天家姐又飛去澳洲開會
(她最近榮升做 Manager 了...加薪少少但加辛多多)
到昨晚才難得人齊交換手信 ^^

現在小弟仍尋覓心儀暑期工中
但聽到父親說公公身體狀況起了些變化
最近因支氣管有毛病要入院
想看他就趁仍健康的時候，否則再遲也無意思
我想如果剩下這兩星期都找不到工的話
七月也不會刻意再找了
八月初會再飛過去印尼
最遲 Sem A 考試後都會過去一趟吧...

昨日中午一心返學校做 Gym，之後撞到 Chris
原來他們又與 Miss 打羽毛波
趁有空又去踩場
但因為未吃午餐，表現走了樣呢...
之後吃個下午餐就回家繼續打北京的日記了
至於今日就約了朋友去將軍澳食飯
順便請教新一代的 family game 玩法
實不相瞞，新過大富翁、酒店大亨的 family game 真是一竅不通
不過玩返 Master mind 就覺得十分懷念 ^^
在將軍澳也順道搭和影 98C 的非空調巴士
皆因星期六開始就會絕跡
也從當日開始，太子去將軍澳註定比去大埔貴...~_~

>>June 15, 2004 at 10:41:17 PM GMT+8

2004 年 6 月 11 日 星期五 【晴】

亦師亦友


呢個星期中我o既心情一度跌到谷底
不過隨著外圍因素迅速改善
又有舊同學約我出o黎傾計
好快就回復返正常
呢幾日忙住做 CCIV 功課
我寫左下個禮拜先 deadline o既經驗分享
趁仲有少少記憶有感而發左先
結果抒發左 1200 字出o黎
篇文貼左o係6月4號日記
之後就要寫北京o既講座評論
好多人都揀皇權同京劇o黎寫，我亦唔例外
但同一時間又要準備今日最後一堂導修o既 Presentation
結果星期三晚寫完皇權篇評論
再為整好個 Powerpoint，搞到成接近五點先訓
而琴晚就集中火力寫京劇評論

今日導修 Present 完之後
約左K組另外五個人打羽毛球
Miss 都有join 我地食飯同打波
其實 Miss 都好想同o的學生做 friend 架
但常規課程一個CCIV導師一個學期要教百幾個學生
成日係咁轉堂，轉個頭都唔記得你係邊個
而今次去北京十四天日對夜對
老師同學生o既關係可以親緊一o的
亦師亦友，就係我心目中至正o既關係喇 ^^

打完羽毛球，出左一身汗
Chris 話打 Golf，見得閒我又走去學下
不過打左一個鐘都未見有起色
要認真學真係要上堂
不過短期內應該都唔會學喇
原因同學車一樣...無乜機會接觸...

而家主力追返北京o既日記
下個禮拜應該會重拾返影巴士同遊車河 ^^

>>June 12, 2004 at 7:53:27 PM GMT+8

2004 年 6 月 7 日 星期一 【乍寒還暖】

面試失敗


今朝 Summer research schlorship interview
o岩o岩返o黎幾日要處理好多o野
都無乜時間為呢個 interview 做準備
去到偷偷望到幾個 interviewer 都係份量十足
仲要有 Tanner 係度，唔驚就假
入到去果然無估錯...狂係度問 technical 問題
問到我口啞啞...我都唔敢望住 Tanner
以我今日o既表現相信佢唔多唔少都有o的失望
我 in 完亦都預左唔會得
但都多謝 Tanner 今日下晝就 send 封 email
通知我被 reject...可以早o的死左條心

咁究竟呢個 summer 可以點過呢?
Summer course 無乜我想讀o既科
做 Intern 又想等下年...
可幸今日都搵到兩個目標可以試試
再唔係o既...為 Year 2 進一步提升 GPA 努力囉
(今日見返o的同學原來 GPA 都 keep 住好勁
相比之下僅僅過 3 其實唔代表乜野
絕對唔可以自滿...)

>>June 8, 2004 at 12:59:04 AM GMT+8

2004 年 6 月 6 日 星期日 【乍寒還暖】

雙料娛樂


休息了兩天
是時候進行香港年青人常做的活動了
今日實行走兩場雙料娛樂
頭場跟 K 組另外七友在旺角唱 K
(待我補寫北京的日記就知什麼是 K 組 ^^)
今年第一次在香港唱 K 咋 (都無人約我 ~_~)
上星期在北京唱的歌又那麼「新」
今日當然要盡量試唱這半年推出名副其實的新歌啦
但觀乎較近期的歌都還是自己 solo 為主...
十一點唱到一點半左右
小弟要告辭趕下一場了
花了一個鐘頭去到小西灣 Raymond 家中
結束三缺一的局面
可能最近在北京玩過細細隻的麻雀
今日再看回標準 size 突然覺得零舍大隻
而且又轉了順時針摸牌，很不慣呢！
在三個鐘時間裡完成三圈半
最後預了交學費的得償所願
而我贏了 $1 但賠了車錢
不過為求娛樂都無所謂啦
而且順道可以送手信給朋友
又可拿回託朋友買的東西
(AL1 模型 + 麥兜日曆座，兩樣都好正~)

>>June 8, 2004 at 12:31:00 AM GMT+8