2003 年 4 月 16 日 星期三 【晴】

我愛上讓我奮不顧身的一個人
我以為這就是我所追求的世界
然而橫衝直撞 被誤解被騙
是否成人的世界背後 總有殘缺?
我走在每天必須面對的分岔路
我懷念過去單純美好的小幸福
愛總是讓人哭 讓人覺得不滿足
天空很大卻看不清楚 很孤獨
▁▁▁▁▁▁▁▁▁▁▁▁▁▁▁▁▁▁▁▁▁▁▁▁

幾年前買了一個Eva 初號機的模型.
為了心頭愛,我專程買了一樽新的模型膠水、多支初號機專用顏料、油筆、光油、各種用具......耗費了我不少積蓄.
之前雖然有砌過其他模型,但都是馬馬虎虎完事.
這是我第一次如此用心去造一個模型,因為我對那套動畫非常著迷.
對於令我著迷的東西,我總願意投放心機,不惜一切.
用了半個多月,每當夜晚飯後,我都獨自躲在陽台埋頭埋腦去弄這個模型.
我竟然難得的專注,當時可是完全著迷.
到完工前一日,卻發現初號機的左手不見了!!
我翻遍整間屋,也到過街上尋找,可是也找不到......
對此事我常耿耿於懷.我總認為這是我的過失.
既然是自己所愛的東西,我怎麼能如此粗心大意?我應該更加倍用心去保存自己所愛才是.
是我自己一手摧毀了這個本是完美的心中所愛.
這個模型現放在我的床頭,它的缺撼標誌著我的過失.
面對著這個精緻的初號機,卻沒了一隻左手,精美中帶重大缺撼,它變得不再完美.
它得不到應有的美好結果,我並沒有真正擁有它.
自此之後,我再不想砌模型.

因自己處理不當,破壞了這個本來完整、美麗的初號機模型.
幾年之後的現在,我還感悔恨.
玩物尚且如此.
對於自己弄失了的感情,
我想我會悔恨一生.

自己心愛的東西,要好好捉緊,知道嗎?
不然一旦失去,是真的回不了頭.

>>April 18, 2003 at 6:23:17 AM GMT+8

2003 年 4 月 16 日 星期三 【晴】

夜晚學生會consultation,身為漫畫會財政o甘"把炮"的我,必須出席.
原定時間八點,本以為我會遲到.後來卻延遲了近七個字才開始,害我趕餐飽!
不過,真正惡運在後頭.面對那些評委連番質詢,真的招架不住.
他們非常認真又問得非常"了能"......好像審犯一樣.
結果互相掙持了兩個半鐘,十一點終於通過.不過下星期要另交一份新改的budget plan.

四日復活節假期來臨,工作堆積如山.
希望可以好好利用,開山劈石!!!

兩份term paper,至少要給它們開了個頭!!!


>>April 17, 2003 at 5:42:21 PM GMT+8

2003 年 4 月 15 日 星期二 【晴】

放學去了阿豬屋企試玩PS2~
當然繼續係WE11 喇!
條衰仔而家有米lu,又PS2, 又話轉電話......務求剌激經濟!~
不過都係值得恭喜既....我係話恭喜自己,因為我唔駛買PS2,可以黐機打~~haha!

之後落鐘聲打波,但勁唔掂!!
手軟腳軟,命中率唔知有無一成......完全交唔到貨!


>>April 17, 2003 at 5:47:56 PM GMT+8

2003 年 4 月 14 日 星期一 【晴】

昨晚過份貪玩,放下手頭未完成的功課,便去大會堂打波.
"打波先o黎落雨~~!"這句話對於我們這班波友來說是錯的.
應該是"落雨先o黎打波~~!頂!!~~"
對!!我們很多時都是在落雨的時候,才會有人提議打波的.
由初中到今時今日,這個情況並沒多大改善.
結果當然是打打o下局住走人啦~~~~!
不過也好,可以早一點回家整notes.
由十一點做到點幾......算是完成吧...無話做得完的.

今日present的時候,用了二十幾分鐘,把幾個禮拜所看所感一口氣講出來!
中途有點口乾、有點索氣、有點聲沙......
不過氣氛幾好,無dead air,總算安慰~!
又鬆一口氣~!

今日預告:聽日又打波!

>>April 15, 2003 at 1:11:14 PM GMT+8

2003 年 4 月 13 日 星期日 【雨】

上堂途中,癲仔佳打俾我話夜晚打波,連未做好聽日present 的o野都唔理,放學即去~

不過去元朗之前,走了兩堂文學去canteen同民主黨李永達傾計,希望暑假可以幫o下手做義工,暑期工就更好啦!!
原來民主黨全香港只得六百會員,一半活躍.共產黨會員則五千萬!
香港過往愈來愈多人支持民建聯,就係因為香港人太現實,知道親中有著數!...
奇怪香港人好似好鐘意一味盲目支持或抵制一樣o野,唔會理o個樣o野係咪真正適合自己,又或者係咪真係好o野.
剩係講睇電視一樣已經夠,唔會理佢播緊的係垃圾劇集,定係變相賣廣告的無聊遊戲節目,都只會呆呆地o甘望住無線,睇完之後個腦可能乜都接收唔到......只會怕聽日唔可以同o的師奶埋堆.人有我有、人睇我睇、人講我講,無謂蝕底.

不過而家應該知衰啦,共產黨、保皇黨造就了呢個董建華無能政權,搞到今日香港貧病交逼...
姑息養奸,就會有今日的悲慘下場!!係香港人的報應!真係好想笑!
「有o甘耐風流,有咁耐折墮」其實講得幾好o架!風流緣於太過富貴、太過安逸又鍾意享樂,唔理風流完之後的惡果.十足以前的香港人唔理香港政治正逐漸變得小人當道,大家只顧炒樓炒郵票炒Hello Kitty Snoopy,!所以我地係扺死o既~

反對聲音非常重要,主流意識獨大的時候,就會出現胡作非為、獨斷獨行的情況.
"Balance of Power"是維持社會和諧和進步的必然條件.
因此,我地要支持亞視、支持民主!!

講政治好無癮!!...當你明白到o的政客點樣玩手段、點樣愚弄o的愚民、有幾o甘仆街的時候;又當你對住o的「維園阿伯」之類的「所謂愛國者」物體,點極佢地都唔明,又真係幾Q煩!
所以我在此奉勸大家,唔好以為讀政治可以做政客,事實上你會不屑為之.



>>April 15, 2003 at 12:12:25 PM GMT+8

2003 年 4 月 12 日 星期六 【陰】

今日狂揭書狂抄,沈從文o個part都七七八八.幾好!

只係"七七八八"的原因,是由於Ewing無端端叫了小琪和佢Boyfriend Tommy 上來打牌~
好耐無見小琪!一位我和Ewing在小、中學(中一、二)時補習社識的,又不太常聯絡的同學,竟然可以同Ewing保持友誼至今,又久唔久上o黎食飯打牌......真係只可以講一句"緣份"~
不過我無打,只係做外賣仔、斟茶遞水!!
我無得玩(其實係唔想打...),對住電腦玩鋤大Dee都玩o左成晚!!
佢地十二點幾散水.

小琪和佢Boyfriend 已經供緊樓,就快拉埋添喇!!
我仲讀緊書o咼......
唉..!覺得自己好似無乜plan o甘,在可見的將來仲係一片蒙查查,又無大目標.
我將來的人生係點樣,今時今日我都未有頭緒....真係...死得啦...!
方向呀方向...邊面係正確方向呀??

今晚有波睇~"皇馬V.S.皇家蘇斯達".
上半場已經1比4......


>>April 13, 2003 at 6:04:43 PM GMT+8

2003 年 4 月 11 日 星期五 【陰】

約o左E太郎傾politics presentation,原來o黎緊星期五放復活節假,呢個present又押後.
都係佢講我先知,等我尋晚仲賴勤力添!
不過,頓感輕鬆不少~

本來約了十點,我太早到,打電話俾佢又唔通,於是周圍踱.
但嶺南太細,好快行完.Canteen又無開,惟有在現代花園呆坐,等貓貓出現...
等到十點八仲未見人影,唔對路.想走去余近卿亭"探險"之際,E太郎終於出現!
傾到十二點幾,見我一輪咀講o左o甘多o野,可能佢於心不隱,搶住話要打notes.我非常歡迎~

返到屋企,又陪家姐睇多次《行運超人》.
之後又睇《虛擬索女郎(Simone)》,喜劇一齣,諷刺荷李活和美國傳媒.
所謂明星,都係造出o黎o既.在娛樂圈,講大話會好多人信;講真話,反而無人信.

功課?聽日先算o剌...


>>April 13, 2003 at 5:31:11 PM GMT+8

2003 年 4 月 10 日 星期四 【陰】

由於繼續放假的希望破滅,所以係時候做功課喇~

做功課期間,少不免食o下o野、睇o下電視、發o下呆...
用了成日,做完巴金o個part.

夜晚睇埋the world status after 911的一堆documents.

今日好勤力!好!

>>April 13, 2003 at 5:26:56 PM GMT+8

2003 年 4 月 9 日 星期三 【晴】

今朝早有點半身不遂的感覺,雙手雙腳痛到唔識郁!掙扎o左好耐先起到身.

中午又去銀座買vcd,見到LMF的《大你》,即買.
LMF鬧得好過癮呀~講o野好o岩聽,至少唔虛偽先啦!

我支持LMF!講粗口又點o者?挑!總好過o的衣冠禽獸!
佢地都係想用音樂和說話表達不滿o者!
佢地書又讀得少、又窮又無勢力,唔通叫佢地寫古文表達不滿呀?唔通上街示威呀?
o的議員日日o曹、香港人日日上街遊行,政府都唔理啦!!用粗口鬧o下唔得咩?講粗口又無犯法!

咩壞影響、教壞細路都係bullshit!!
TVB夠日日播埋晒o的垃圾電視劇,剩係情情搭搭、勾心鬥角啦!!所有角色都無腦無人性o既,劇情又低能老土,真係睇壞人!!o個o的所謂綜藝節目,為賣廣告多過乜!!又虛偽又無誠意,為錢而拍之嘛!
TVB都係教壞細路咋,潛移默化仲恐怖喇!!

就算佢地點壞影響都及唔上o的議員高官以權謀私o甘壞o卦!
我真係唔明,成龍玩女明星、楊受成做扯皮條、黃任中性虐待又無人鬧,偏偏鬧LMF為溝女而玩音樂.呢o的係咪趨炎附勢?少數弱者好蝦o的?
講粗口、紋身、食大麻係下流無教養.o甘衣冠禽獸、唯利是圖、食白粉就係好高級好有教養?
咩名流士坤ball王ball后,全部都不知民間疾苦、剩係識飲飲食食!!講真,上流社會咪即係下流社會!!

o的父母又係無腦o既,人話壞影響佢又話壞影響.
咁佢自己打仔鬧仔的時候爆晒粗、打牌食唔出十三么又搵人老母、賭波賭馬輸錢又搵人祖宗又點計?!
o的師奶三群二隊、講是講非;o的麻甩佬阿伯在公園聚賭、玩o靚妹、叫雞包二奶拋妻棄子就好神聖?莫非唔係壞影響?
除非你話你完全唔爆粗、唔食煙、唔飲酒、唔賭唔嫖、又有公德心善心愛心.......啦!!
但有人係咁的話,佢都唔係地球人啦!係火星人o羅!~

話LMFo的歌無價值的人,一定係無認真聽過的人.又或者佢地對身邊發生緊o既事係無感想、無反應、全部覺得合理的?
有粗口唔代表無價值,雕琢詞語的都唔係好高級!重要的是o個件作品的思想性!
水滸傳都有好多口語、粗口;金瓶梅又俾人話淫書,仲俾o的假道學禁過添.今日咪又係中國名著!
從來民間文學或是音樂,都是最真、最有感情、最能反映現實、最有血有肉、最能觸動人的.

香港人可唔可以唔好o甘保守?
可唔可以欣賞o下人地的優點,唔好成日將人地的缺點無限放大?
在批評別人的創作之前,多些去了解人地的背景和想法?
唔係人人都要接受主流o個套,主流亦唔代表就係最好.
點解硬要強迫其他人去接受過去的一套呢??......

就係因為香港人太過保守,搞到電視台實際上得一個,音樂種類又少,報紙一式十幾份,電影更加唔駛講一味跟風......
傳媒係多但無銀用,來來去去得幾種聲音.
大眾媒體咁窄,仲要加埋廿三條,政府講乜春創意創新o者?!
開多幾個電視台先講啦!!


>>April 12, 2003 at 6:45:06 PM GMT+8

2003 年 4 月 8 日 星期二 【晴】

繼續睇戲...
今日又看了《8 Mile》,開大Hi-Fi,超好feel~

今晚終於有波打!!
夜晚出鐘聲打波,太耐無打,有點跟不上.
打至後尾兩場,已經手軟腳軟...
他們照舊打邊爐,之後去區祖屋企打機、打牌...
我太支力,頂唔蒲,和肥龍走人~
肥龍說放假悶、番學也都悶.我認同.
做人就是悶人的.特別是生活在香港.特別是生活在今時今日的香港.
其實他有拖拍,可以消磨不少時間......我呢?我比肥龍更悶.
但我又不會因為悶而是但找一個女朋友,所以只好繼續悶.
況且有女都可能好悶...主要係我個人好悶...
所以,我只好做一條溝唔到女的可~憐~蟲~!

回到家喝了人蔘圓肉煲百合靚湯一大盅!
再食了叮叮豬扒通粉一大碗!


>>April 10, 2003 at 4:29:16 PM GMT+8