2008 年 4 月 30 日 星期三 【陰】

過o左六點先訓 ~ 但因為阿妹醒哂 係恁同阿爸嘈 自己又校o左鬧鐘
加上都唔係咁「支力」
八點前就醒o左喇 ~
阿爸不知幾緊張會累佢遲到 ~ 邊有話要一齊出喎
阿媽陪佢個仔出 阿爸就自己出 ~ 九點一就到9樓牙科喇
尋日陳姑娘明明話係去牙科約期之o麻
點鮮會變o左睇醫生o架
登記處o既人都估唔到 兩名姓李o既求診者 原來就係父子
阿爸唔駛三、兩分鐘出來 幫個仔買飛 一買完飛 就入去喇
(*阿爸講o野真係好大聲 ~ 得幾十呎地方 ~ o的回音勁到呢 ... ...)
一入到去就係照X光
要咬住一個位 ~ 門牙對門牙的咬住一塊黃色的東西
之後就叫人瞇眼 ~ 然後就開始照喇 ~ 原來部x光機 係會轉的
姑娘叫人唔好郁 其實都真係唔知有冇郁到呀

照完返出去坐 ~ 再等一陣 ~ 又入番去頭先姑娘所屬o既2號房
原來今日要做埋個牙膠o既模
2號房的那位後生仔 叫潘醫生
好恐怖呀 ~ 第一次o的物料 姑娘被醫生話太少 要再整過
第二次o黎真喇 ~ 要一路咬實個鐵模唔放
雖然已經墊o左幾張紙巾
但都係嘔 ~ (他們說是正常的 ~ 唔好緊張 ~ 放鬆 ~ 深呼吸 ~ 用鼻呼吸 唔好用口)
嘔同流口水 ~ 衫褲都濕了
~ 未做模前 ~ 同牙醫傾o左陣偈 原來佢都有「深入」研究過人地個排板
都知道 如果歪o左少少會好大鑊 ~ (雖然佢都知做o既係「新」技術)
所以就同佢講o左o的擔心o既地方 ~ 重同佢講 有o的想打退堂鼓呢
~ 因為相對復發 ~ 自己真係驚盲眼多o的呀 ... ... 佢話呢o的就係要衡量o既得失 (廢話!)
所以「咬實牙關」時 ~ 佢就話 忍一陣啦 ~ 你都唔想個模做得唔好o家? 做一次乍
忍住啦 ... ...
真係 ~ 如果個模 做得唔好會點o家? 好驚呀!!!
做完個模 就可以返出去 走得 ~ 但登記處o的人又好似唔係好信 ~ 醫生再同佢o地講
個「模」硬化 / 攤凍o左之後 會有專人來拎 ~ 所以自己就真係可以走先 ... ...

之後 就落番地下 X光部
再照X光 ~ 唔駛照肺(住) 但照盤骨同腰都照o左三張片
轉身 著鞋 同換衫 估唔到都可以幾痛呢 ~ 係因為 唔夠止痛藥嗎?
係因為情況差o左嗎?
唔知道
照完十點二
十點三 落到地庫 去13號窗同7號房搵姑娘問覆診紙o既情況
佢地話設計室 (電療部) 會畀
恁之後 坐一陣 睇埋《交易現場》同《金曲挑戰站》之後就過設計室

去到話搵阿Jo / Joe ~ 不過道道門都係閂埋o既 ~ 除o左1號房
裡面坐住尋日見o左snoopylee成個鐘o既黃醫生
o係3號房外敲門 ~ 冇幾耐 就有姑娘應門 話等一陣 因為有病人做緊
阿爸就同人講 約o左十點半架 (其實都未到十點半)
~ 人地姑娘都講o左有其他病人做緊 同埋今日好多人啦
又唔係見唔到
不到三分鐘 就被叫名
入去 訓o係度 度位 ~ 阿Jo 畫o左兩個位o係張「公仔紙」度 ` 就叫人出去
臨出去 想睇下張「公仔紙」係點o既都唔得 ~ 究竟啥係「公仔紙」呢?
再過幾秒鐘 ~ 個阿Jo / Joe 就出來 ~ 拎著人o地o既一疊約期紙 大大聲恁講解
點解唔可以o係房入面講呢 ~ 要o係「大街大巷」講呢 .. ....
原來14號要返去見醫生 (之前約o左 13號要見腦外科)
21號再到設計室
22號照MRI ~ brain stereotactic ~ 阿Jo 千叮萬囑 唔可以遲到
23號就再到設計室 ~ 另外仲有照CT
佢講講下 又話咩可能21 / 22號入院 ~ 尋日醫生冇講喎
之後佢諗真o的話記錯o左 ~ 話人地唔駛入院的
之後 就再問佢 會唔會好似豆釘恁講 會有「紋身」o架
佢就話個個人做法唔到 ~ 位置同技術唔同 ~ 唔同醫院 唔同儀器又會唔同 (QE同呢度用o既機都唔一樣o既)
咁佢就話人地唔駛「紋身」 ~ 唔係個個要o既 ~ 雖然呢度都有人要「紋身」
講講下 ~ 唔知係咪佢以為人地唔信佢
佢講到 人地可以去私家做 或者其他醫院 「隨你喜歡」
其實不過係隨便問下o者 ~ 被佢嚇親

之後阿爸因為下晝都要覆診
就同阿媽去新墟同市中心 ~ 本來阿媽打算o係新墟食o野
但真係唔肚餓 所以只o係卓爾居買o左塊薯餅 ~ o個時o岩o岩過o左十一點
~ o係卓爾居o既電視見到一班DAB 議員o係「公審」旅發局主席藏明華o既報告公開期間
一式一樣著住套紅色制服 ~ 如果係白衣 就會好似衛生幫喇 ~ 究竟發生咩事?!
播播下另一單新聞 佢就賣廣告 過多幾分鐘 直到再同阿媽匯合都未播番新聞
~ 夜晚新聞亦冇講點解 會一式一樣著紅色(做主色o既)恤衫
再行去市中心 ~ 阿媽話不如買過個袋
揀o左好耐先揀到個o岩心水o既
有o的「名牌子」 ~ 貴一貴都係得個殼
有個Timberland o既 好多格的 個款都好靚 但就要四百幾 ~ 點買得落手 (雖然有折)
之後 再睇o左好多個款之後 終於揀o左個Podia Adventure o既 ~ 呢個牌子以前都買過三、兩個呀
不過近年o的款真係唔靚 ~ 揀好耐先揀o岩
返到屋企 發覺 都係應該畀多幾十蚊 買個三層 / 四層o既好o的
呢個好似細o左o的 ~ 但o個o的要二百幾呀

買完袋 十二回幾 就去食o野
其實依然未肚餓呀 ~ 最後揀o左去大快活 ~ 阿媽話大家樂唔駛行咁多路
其實大家樂先行得多路 ~ 大快活好o的
食o左個炸雞芝士焗燴意粉 (本來好想買個咩濃芝士魚柳焗飯) 加兩蚊可以配汽水
就加兩蚊
畀錢後 收銀又畀多張 餐飲換領券
話憑券可於指定日期前換阿活奶茶 / 香濃咖啡 / 熱檸檬茶 / 熱好立克一杯
冇講明話要買o野先有 ~ 就試下去換 ~ 個茶水就話要再買o野喎 ~ 於是就拎番張o野返埋位
食o左一陣 之後 有個執檯o既阿姐話 唔係喎 ~ 唔駛買o野 叫阿媽去收銀o個度換飛就得喇
收銀都係話要買o野 ~ 但個阿姐唔信 就幫人拎張紙去茶水
冇幾耐 阿媽又跟埋去 ~ 之後就換o左杯熱奶茶(阿活奶茶) 返來
個意粉雖然份量唔多 ~ 比起屋企煮少好多 但就多過o的意大利餐廳多多聲喇
的意粉仲好幼 好好食 ~ 係芝士太多 太濃 ~ 有點鹹
o的炸雞 亦唔係o舊o舊都咁好食 ~ 有o的都幾肥
食o左大半 ~ 就畀o左阿媽
加埋佢杯奶茶同o的咁「溜」 o既芝士 ~ 阿媽就話都夠飽喇
唔駛去新墟食o野 ~

佢落新墟 ~ 自己就返屋企先 ~ 返到門口 o岩o岩做完《午間新聞》喇
轉去新聞台 發現一單好得意o既新聞 話咩朗拿度嫖妓被人拉o左
但原來「妓女」係三個有易服僻o既男人 ~ 朗拿度重話被人搶去證件同勒索
在警局哭訴 ~ 夜既再聽now新聞台o既「詳細」報導
話原來朗拿度係同朋友飲完酒之後 在街上 被其中一名「妓女」勾搭 之後去到酒店 再被另外兩名「妓女」( 三人 ) 迫吸毒
重同o個幾個男人發生o左性行為?! 嘩! 發生咩事
新聞仲話 可能朗拿度唔會被起訴 被起訴o既會係其中一名「妓女」
~ 話時話 個「妓女」擺明係男人樣啦 ~ 點解朗拿度會睇上眼? 唔通個「靚女」個樣似佢?

兩點 奧運火炬到港 ~ 但因為太累 ~ 開住電視 同阿媽番來 都係訓著o左
到四、五點都仲係咁「支力」
(緊係啦 成晚冇訓喎)
兩點四 個Jenny無啦啦又打來 ~ 佢自己食飯食到兩點半 ~ 見未夠鐘又想搵人傾偈
就同佢講 尋晚成晚冇訓 ~ 今朝又去完醫院番來 ~ o岩o岩先有得訓
唔該畀我訓下 ~ 佢就問人係咪今日覆診 (一早都話係尋日覆診啦 ~ 尋日打來又掛住一號去玩 ~ 問都唔問下人點樣 .. ...)
冇佢咁好氣 就收線 ~ 繼續訓
訓醒之後 再睇新聞 就發現另一單新聞 話長沙灣下晝發生致命車禍
原來被車死o既係一名的士司機
在替乘客拿行李 / 過馬路取回物件時 (兩台報導不同) 被懷疑衝紅燈o既巴士撞到
另一名廿多歲男子 則被撞輕傷
點解會恁o架?!
~ (元朗) 藍地 *乜藍地唔係o係屯門咩?
亦發生致命車禍 ~ 廿多歲鐵騎士 魂斷貨車車底
六點幾 ~ 打畀Rainbow 約實聽日幾點o係邊度等
佢就講原來今日冇教古箏 ~ 因為搵到份o係赤柱做問卷o既part time
但就被上司鬧
另外 又話 有一份係幫公司入VIP資料o既part time
本來話係時薪 ~ 但而家佢簽約之後 就好似改o左斷份計
兩毫子一份 ~ 究竟一分鐘 或者一個鐘 可以做到幾多份呢?
如果一分鐘先得一份 甚至一份都做唔到 就真係犀利
七點 依然係好累 ~ 所以睇《8花齊放》時都係好累 (見到好多已經絕版o既玩具呢)
睇完又再訓過 ~ (所以都冇試打電話)
七點時 阿妹打返o黎話o係旺角要買文具 七點十再打返屋企 就話買完o岩o岩走
即係八點三先上到車啦 ~ 結果佢八點四先上到車
知道佢八點四上車 已經即刻同阿媽講佢九點三就會返到o黎喇
(阿媽就叫佢返到屯門打電話 ~ 66X喎 一到屯門都差唔多到樓下啦)
咁佢返到屋企 今次話唔駛等佢半個鐘食o個枝唔知咩水
但阿媽以為佢打番o黎時 唔係o係樓下 而係o係屯門站
所以就「之之摩摩」 ~ 結果九點九先開飯 ~ 阿妹又怪阿媽搞到佢冇飲o個枝唔知咩水 .... ....
阿爸話唔舒服 冇胃口 唔食

估唔到醫院有唔少姑娘原來記得自己之外 ~ 好似都唔少網友(o係呢個日記度) 知道人地聽日會同同學去玩 ~ 叫人玩得開心o的
記熟個環境 / 地型 / 好玩地方 ~ 遲o的就可以再帶人去玩喇
多謝!!!
差唔多十一點 見到Kimmy online
msn 寫住咩「見鬼勿O嘴」 之後重有「潛水」同「潛水怕屈機」
仲以為佢見鬼 (好驚咁問佢係唔係) 又問佢係咪返工潛水
之後佢就SEND o左單新聞過來
先知 原來 「見鬼勿O嘴，潛水怕屈機」原來係今年會考中文聆聽o既內容同題目
知道後真係O嘴 (但O唔到 ~ 會痛)
http://hk.news.yahoo.com/080427/12/2t3b3.html
「見鬼勿O嘴，潛水怕屈機」 考生轟會考中文出潮語
(明報) 04月 28日 星期一 05:10AM
【明報專訊】中學會考中文科聆聽及綜合能力部分考卷引用多句潮流用語，由學生分析運用「潮語」的利弊，連日來遭考生在網上批評揶揄，指不明「潮語」所指，其中「見鬼勿O嘴，潛水怕屈機」更成為考生熱話。
有資深中文科教師指出，考評局於試題用「潮語」雖然不影響考生成績，但並不恰當。

會考中文科試卷五要求考生以兩幅用上潮流用語製作的宣傳海報，分析用「潮語」的利弊。海報用上大量外來語及潮流用語，如「喪」、「閃」、「激賞」、「達人」等，其中一幅海報的一句口號用上「見鬼勿O嘴，潛水怕屈機」，有考生事後在網上揶揄考評局，運用大量潮流用語令人難以理解。有考生在網上留言表示，明白「潛水（不露面）」、「屈機（打機用語，指無力取勝而屈服）」兩詞的意思，但首度得知兩詞可共用。
考生網上發起英文科穿黑衣抗議
擔任試場主任的中文科老師容潔貞表示，會考試卷用潮流用語不太恰當，但她認為考生成績不會因此受影響，反而內容上有太多科學、文學成分，並不適合測試考生即時理解能力的聆聽卷，「我自己試做幾題都覺得難」。考評局發言人回應說，有關試題是要求考生分析潮流用語的特點，而非使用它們。有考生在網上發起下月2、3日，在應考英文科試卷時穿上黑衣抗議的行動，亦有考生留言表示擔心當日不穿黑衣，會遭其他考生冷眼。

睇完呢單新聞 就即刻send畀麥同學睇 ~ 原來佢一早知道喇
以為係學校老師講 ~ 原來係佢friend 講
之後拎o左上年買o既《香港潮語學習字卡》(The Picture Dictionary of Chinese Slang) ~ 蘇真真出品 ~ 限量發行的 只售60元 ~ 其實應該加印加價進軍書展啦
搵番「潛水」同「屈機」o個兩張卡出來睇 ~ 其實「潛水」點解就一早知道o架喇 ~
但睇完兩個字o既解釋 ~ 依然唔知道「潛水怕屈機」點解 ... ...
現試試將其中部份字詞串起 ~ 來解讀呢單新聞同形容應屆會考生見到咁o既題目o既心情 ... ...

『O嘴』 : 無奈或驚訝得無話可說 / 目瞪口呆 / 嘴部呈「O」型
『潛水』 :躲藏 / 出走以逃避責任 / 潛逃 / 不知所蹤 (做M記時知道潛水的解釋為「不知所蹤」,並引申為偷懶
『屈機』 : 利用制度上的漏洞或以不公平手段去獲得利益或達至勝利 / 在強弱懸殊的競爭中,強的一方擺出的姿態或作出的動作

但睇完呢三個解釋 始終都唔知咩叫「見鬼勿O嘴」同「潛水怕屈機」呢

[另類創作] :
初時見到Kimmy send單新聞來 ~ 重話呢o的係今年會考睇真係以為佢係『吹水』 (說謊 / 誇大)
但睇完單新聞 就覺得應屆會考生應會覺得出卷的或考評局 『屈機』
無啦啦見到o的恁o既題目 例必 『滴汗』 [無奈 / 無話可說 / 尷尬 / 不知所措]
他們或者會想『潛水』 (潛去打電話求救 / 走人) ~ 但這個是聆聽卷啊
看到新聞的 很想『十扑』 他們 ~ 但只怪愛莫能助
今次o既中文聆聽卷搞成恁 ~ 都唔知話邊個係『廢柴』? [沒用 / 毫無用處的 * 與「廢拉柴」同「廢拉」等同義] ~
但『廢柴』的是考生還是考評局? 抑或沒有教學生「潮語」的老師?
個個睇到呢單新聞o既 都可能覺得考評局 『kai』 [傻的] ~ 但唔識得呢o的潮語o既好學生 / 死讀書學生 會唔會覺得自己『kai』呢?
如果班考生知道邊個出卷 ~ 可能佢地會摷上門 「怒打」個出卷員 就算唔係 都會「怒投訴」、「怒鬧」
*『怒』 : 誇張地 / 憤怒地 ; 與「十分」、「超級」、「勁」、「爆」等同義
有部份考生已經決定會考英文聆聽卷當日 會「怒著」黑衫 以示抗議
唔著黑衫o既 o個日唔知會唔會被人「怒睥」?
見到呢份恁o既卷 ~ 唔知o的潮水o既學生 除o左『O嘴』之外 等夠鐘停筆 可以做o既就係得『hea』 [做無聊時情以打發時間 / 四處遊蕩 / 頹廢 / 得過且過 / 漫無目的做某事]
做卷o既可能會hea 出卷o既 改卷o既 都可能好hea .... ....
一睇到單恁o既新聞 會考題目變成恁樣 ~ 真係『噴飯』 [(覺得)事情非常可笑 / 行為、話語令人發笑]
出卷o既、做卷o既、改卷o既 ,甚至係批評o既 ~ 都可能會被(其他)人覺得 『削』 [不濟事 / 水皮 / 弱 / 深度不足]
而斷估冇人會見到份卷會覺得係『賣飛佛』 [ my favourite] 掛?!
『插』 [責罵 / 斥責] o左咁多『潮爆』 [ 作 :「一個人的言行 / 品味 / 精神等方面走在潮流尖端」解 (可煲可眨)] o既「潮語」
千祈不要說筆者『寸嘴』 ~ [寸 : 態度囂張 / 傲慢 / 寸嘴 : 說話不饒人]
如果各位想『插』筆者的話,恁筆者就唯有『閃』 [迅速地 / 無聲無息地 離開]
見到/面對恁o既試題 ~ 應屆考生只能慨嘆 『大檸樂』 [情況十分糟糕]
雖然初時睇到單恁o既新聞真係『笑爆嘴』 [咧嘴而笑 / 事情過癮使人笑得失控]
識得睇晒今次會考題目出現o既潮語o既考生 / 出卷o既 可能都可以自封為『潮童』: [希望在人群中突出自己的年青人,以穿著潮流衣飾去證明自己與眾不同]
如果佢地真係恁諗 ~ 佢地就可能已經 『上腦』 : [沉因某事不能自拔 / 被某事迷惑以致作出不正常舉動]
出卷o既 或者 認為今次份卷完全冇難度o既人 可能會以為自己以經係『神級』: [達到一個最高的境界 / 無人能及的技術 (網上遊戲用語) ]
如果恁o既題目 都可以合格 恁o個o的咁幸運o既考生 就有望 『升呢』 : [提升級數 / 升段 / 升level]
而如果今次其實有好多考生都其實在是次考試中考獲理想成績 ~ 有關方面 (考評局) 亦可能會對來屆 / 日後o既題目 『升呢』 ... ...
唔識做 / 如果考評局 今次被『怒插』的話 學生/考評局 以後就可能會『淆底』 :[怯懦 / 膽小怕事 / 畏首畏尾 / 臨陣退縮 / 害怕失敗而放棄]
其實 o的咁『攪野』 [引起麻煩 / 令人發笑 ]o既試題早就應該『收皮』: [ (粗俗語): 叫人消失,達到羞辱的目的 // 結束 / 完結 / 停止]
考評局 今云真係『瀨野』 [做了糟糕的事 / 遇上麻煩事 / 墮進陷阱 / 中招] ~ 考評局如是、考生如是、家長如是、教師如是、社會亦如是
之不過 講來講去 『喪』鬧都冇用 [喪 : 癲狂 / 抓狂 / 失去控制自己的自覺 / 無特別意識的、不停地做某事]
因為考評局 / 政府 做事就是那麼『龜速』 [速度極慢]
真係『打柴』 [死亡 / 殆盡 / 不能再用 / 廢掉]
搞到考生『頹』 [頹喪 / 頹廢]之餘 ~ 自己(考評局)又『火羅』 [出醜 / 瘀]
如果(考評局今次)冇事 / 考生竟然可以高分合格
也只能說是『符碌』 : [僥倖 / 好運 / 靠運氣而成功 (桌球術語)

就這樣 ~ 小弟就引用了大部份《香港潮語學習字卡》 (The Picture Dictionary of Cantonese Slang) 所載的潮語
在此 希望作者蘇真真見諒 ~ 不要『怒插』 ... .... 謝謝!

>>May 1, 2008 at 3:21:09 AM GMT+8