2005 年 8 月 16 日 星期二 【乍寒還暖】

今日，我又打左9/8既日記啦，今日打左好耐呀，打到好累，都打左好多呢~

不過唔知點解，個一篇打得好書面語，睇落去好似好怪喔~

>>August 16, 2005 at 4:10:22 PM GMT+8

2005 年 8 月 14 日 星期日 【乍寒還暖】

今日打左8/8既日記啦，係關於去旅行既事，我會慢慢補打返之前去旅行個

段時間既日記架啦~我會盡量每一日都補返架，好快就補返五日架啦~大家有

興趣既話，就要等多幾日啦~

>>August 15, 2005 at 2:57:05 PM GMT+8

2005 年 8 月 13 日 星期六 【陰】

退左燒啦~真係好呀~不過仲有d咳，等我好番晒之後，我

就會打番之前去旅行既日記架啦~大家等一等啦~好快架啦~

>>August 14, 2005 at 1:40:21 PM GMT+8

2005 年 8 月 12 日 星期五 【驟雨】

去完旅行之後，生病了.............希望快一點康復，跟住就可以做功課.....

>>August 13, 2005 at 2:11:41 PM GMT+8

2005 年 8 月 11 日 星期四 【晴】

哇~今日就返香港啦，真係好，好掛住屋企呀，都係自己屋企最

好~今日朝早，我地食既野同琴日既都係一樣，食自助餐，不過唔

知點解，今日胃口唔多好，而且個人有d暈暈地，好似唔多舒服....


之後，我地又返返別墅拾野，拾好d野11點幾就上車出發去機場，

原本我又以為車程好耐，點知冇15分鐘就到左食野既地方，我都冇

咩心情食野，而且我覺得自己好似好熱，不過都冇理到，食完之後，

我地就真係出發去機場啦，原本我打算訓覺，點知個導遊同個領隊一

路不停講野，搞到我訓唔到，結果我就聽mp3諗住聽唔到佢地講野啦，

點知我開到18到仲聽到佢地講野，結果我都冇再聽mp3啦，因為聽同唔

聽都冇咩分別。


佢地不停講講講，車程要成個鐘，佢地都講足全程，真係勁!不過搞到我

完全訓唔到.............之後我地就係機場行下，過左個幾鐘，就入闡啦，真係

好，快d返到屋企就最好。過左一陣就上機啦，今次坐個架飛機一定好新，

因為我聞唔到個陣好難聞既飛機味，上到機我本來打算一路訓，訓到返香

港，不過中途醒左，剛剛又係食野既時間，所以我就醒左食野啦，我好耐

都冇食過d飛機餐，因為我總係覺得好難食，不過今次又覺得幾好味，而且

又有朱古力同雪條食，真係好啦~國泰果然唔同d~


10點既時候，返到香港啦，真係太好，跟住就去令返d行李等等既野，之後

就搭車返屋企啦~返到屋企仲係覺得有d唔舒服，不過都冇理到，食左d野，沖

完涼就訓覺啦~

>>August 21, 2005 at 10:18:31 AM GMT+8

2005 年 8 月 10 日 星期三 【晴】

今日，我地全日都留係渡假村裡面，今日我地既節目係去動物園~

我地食完早餐之後，就行左去動物園既入口，跟住搭車睇動物。我

地坐既車係好似一個籠，跟住就駛入去動物住既地方，我地沿途見

到好多動物，有獅子，長頸鹿，鹿，老虎，鱷魚，猴子，仲有好多

好多~10分鐘既車程見到好多動物呀~之後，我地就去睇大象表演，

佢地好叻做到好多野，不過我見到有一隻象仔好慘呀，可能佢太細

個，唔係表演過好多次，好緊張又好驚，所以唔係好多動作都做到

，跟住佢就比訓練員打呀，佢真係好慘，所以睇睇下都冇咩心情。


之後，我地又去左睇動物大匯演，有好多動物表演，好得意呀，仲

有狗仔同猫仔呀~接住我地又去睇飛禽大匯演，有好多種鳥，最後仲有

隻鷹飛出黎，佢好大隻，D爪好利呀~不過我對於呢個飛禽大匯演唔係好

投入，因為佢地經常飛黎飛去，都唔知有冇禽流感呀!


我地再去睇一個西部牛仔表演，佢地經常有D開鎗聲，又勁大聲，搞到我

嚇到彈起，雖然都好好睇，不過成日都啪啪聲.............睇完之後，我地就去

食飯啦~食完飯之後，我地就去搭船仔去一個島，個架船係用木做既~所以

有時候架船既前面會走左D水上黎，好搞笑，因為我地大家要避起d水，搭左

冇五分鐘，我地就到左果個島啦~個島有好多馬騮，有d係個籠度，有d就係d樹

上，冇比人放係籠裡面，我見到有隻好細隻既馬騮仔，好得意架~個島原來係好

細，行左十幾步就已經行到盡頭啦，呢個島仔因為有好多馬騮，所以個島就叫做

馬騮島，真係有趣~過左一陣，我地就搭返船返去之前個島啦。


之後，我地就上返車搭車返別墅休息下，到六點既時候，先再出去食飯。每間

別墅都有一個泳池，我地本來打算游一陣，不過個泳池唔係好乾淨，我地都唔係

好想游，結果，我地就返入屋，睇下電視，拾下野，又出去影下間屋，應該係同間

屋一齊影相。


好快就到左六點啦，我地就搭車去食飯，個一餐飯都幾好食，不過唔知點解呢幾日

好多餐都係食蛋同埋豆腐，不過都冇咩所謂啦，因為佢地都煮得幾好食。食完之後，

我地就去睇紅番表演，佢地會噴火架~不過佢地每噴一次，就會飲火水，我覺得好恐怖

呀，因為我係度想「佢地日日都飲，一定好傷身，會唔會對身體唔好呢???」


之後，我地又去睇嘉年華，呢個節目每一年8月先有既~我地見到好多野呀~佢地放晒d

動物出黎，跟住又有人跳舞，好好睇呀~點知..............之後有個人同一條好大條既蛇一齊

出黎，其實我已經有d驚，因為我覺得蛇好恐怖，跟住當佢行過黎既時候，我已經縮去

我家姐後面，跟住我聽到我家姐大叫，不過我又唔知咩事，所以我又大叫，跟住我感覺

到有d野放左係我大脾上面，有d冷冰冰既感覺，跟住我心諗「呢d咩黎架........唔係蛇呀..」

之後我就驚到停左大叫，點知佢又放條蛇係我手脾上面，搞到我又大叫，佢起碼過左30秒

先拿走，之後我問返我家姐點解佢會大叫，原來係因為果個人把成條蛇放係佢大脾上面，

不過佢都好過我呀，佢著長褲，我著短褲，佢好我好多!

>>August 20, 2005 at 4:59:41 PM GMT+8

2005 年 8 月 9 日 星期二 【晴】

今日，我地係雲頂食早餐，不過都唔係好好味，之後，我地就搭車由

吉隆坡去馬六甲，車程大約2小時，所以我決定......................訓足全程!!

點知，既然係中途落車食飯，搞到我比人吵醒，如果我知唔係坐足2個

鐘頭車，我就唔訓啦~不過我都唔係好記得係食左d咩野.....


之後，我地就真正出發去馬六甲啦~我地第一站就係.......我又唔記左.....

不過係關於鄭和下西洋既一座廟，原來鄭和係第一個中國既回教徒，我真

係完全唔知呀~之後，我地再去既地方都係一d古蹟。


我發現，馬六甲同吉隆坡既感覺係完全唔同，馬六甲有一種較為鄉村風味

既地方，吉隆坡好明顯係一個city，不過我比較喜歡馬六甲。而且，原來馬

六甲係有好多華人架~


之後，我地就坐個d什麼花車去食飯，我以後都唔會再坐個d車呀~我覺得自

己好似坐緊d........都係唔好講............我地今日既晚飯係食娘惹餐，我覺得都幾

好味呀~我地7點就食完飯，之後，我地就去左一個商場買野入貨，因為我地之

後2日住既酒店係係郊區，都幾難買到打，所以我地就買定好多食物。


我地搭左1個鐘車先至到酒店，我地住既係獨立別墅，好開心呀，不過有好多

昆蟲..............這是唯一既不足之處，經常有d野飛過，爬過，有d驚~不過算啦，

因為我好眼訓，沖完涼，吹完頭之後，就爬左上張床訓著左啦~

>>August 19, 2005 at 4:33:36 PM GMT+8

2005 年 8 月 8 日 星期一 【晴】

今天，我們一早起床，一起去吃肉骨茶做早餐，原來

從前的馬來西亞人早餐就是吃肉骨茶的，因為他們要做一

些需要擔重東西的工作，就例如他們要採礦，所以他們吃

肉骨茶的時候，還會吃飯，這樣就足夠他們一個早上需要

的體力。到了現在，到一些吃肉骨茶的地方，還可以選擇

米粉，我們今天所有人都是選米粉，因為剛剛起床，大家

都沒有胃口吃太多。我覺得肉骨茶挺好吃，有好重的藥材

味道呢！！！所以立刻整個人醒了，我吃完一碗後，本來

還想吃多一碗，不過吃不下，因為覺得好飽。


我們吃飽後，走出店外去到一些小攤子看看有什麼買，我

們看到有一些芒果糖，還有一些粟米糖，我們都試吃了一點

，覺得挺好吃，所以買了一點，不過都不是一點，每一樣都

買了五包。


接著，我們又去到皇宮外拍照，原來馬來西亞的皇宮就是迪

士尼裏的阿拉丁的皇宮呢！！！我直到今天才知道呢！！！外

面有一些士兵，又有２個士兵騎著馬，我們走過去和那一些馬

拍照，不過那一些馬會"哄"過去我們那一邊，好有趣呀~


接著，我們便坐車上雲頂高原，車程大約要2小時，不過我們

在山腰停了車，因為導遊說帶我們去一間朱古力店買朱古力，

她說那裡的朱古力很好吃，到了那裡，店員讓我們試吃不同口

味，接著我們就買朱古力，我們買了很多呢，有很多款啊，我

們買了大約有$300，都不算太多。

之後，我們便去坐纜車上山頂，那程纜車真是長，我們坐了大

約有15分鐘了，不過沿途我們看見有很多假的老虎，又有一些野

人，十分有趣呢！！！我們愈上愈高，就覺得愈來愈冷，而且還

愈來愈大霧，什至最後，我們看不見外面的風景，連到了都不知

道呢！！！


到晚上的時候，我們吃完飯，那一些大人便去了賭場，而家姐就

陪我去玩機動，不過都不是太好玩，那個過山車一點都不刺激，

到了大約10時，我們便返回酒店了，那間酒店簡宜是簡陋得不能再

簡陋，沒有這樣又沒有那樣，都不知是不是酒店，又沒有風筒，弄

得我和我家姐要等到頭髮自動乾了方可睡覺，我們都等了很長的時

間呢！！！

>>August 16, 2005 at 4:06:04 PM GMT+8

2005 年 8 月 7 日 星期日 【晴】

今日，夜晚4點幾就要起身啦，因為要出機場，我2點幾先訓，訓左等

於無訓，不過都冇所謂啦，上機先訓啦~但係我就唔明，我地明明搭9點

機，但係就要6:50a.m.，好似係因為團體既話佢地就要我地早2個鐘去，

真係慘，如果唔係唔使5點就出門口啦~


每一次要我搭巴士出機場，簡直就係攞我命，我最憎就係搭巴士去，次

次都想嘔，不過好彩每一次都忍到，如果唔係就好煩架啦~仲有，仲有一

樣我出機場最討厭既野，就係迴旋處！！！都唔知邊個發明，都無用既，

不停轉轉轉，轉到我頭都暈，又想嘔，真係討厭。


幾經辛苦，我地出到機場啦，去到之後我差d虛脫，又肚餓，不過都係未

食得野住，要等多一陣呀..............



聽完個頜隊講野之後，我地就去大家樂食野啦，食得好飽呀~到左8點幾之

後，我地就入闡，跟住又行左一陣就上機啦~上到機，我就訓足全程，野都

無食，不過無所謂啦，又唔係好好食。



過左4個鐘，終於去到馬來西亞啦，好開心呀，我地去到之後，攞齊行李，

就跟住領隊上旅遊巴，之後又介紹個導遊，原來我地個團有30個人呀，都幾

多人架~有好多都係小朋友，有一個bb女好得意，好可愛架~



之後，我地就去左我地住個間酒店啦，個間酒店叫times square，入面d房好

大，好新，係呢幾日住既酒店之中最好既一間呀~過左一陣，導遊同我地去酒

店附近既一個商場行街，入面仲有一個遊樂場，不過我地去到好肚餓，所以我

地就去食左個熱狗，雖然係好肚餓，但係個時已經5點幾，就快食飯，所以只係

食少少野，食完野之後，我地就行左一陣，又睇人地玩機動，我就無玩啦，岩岩

先食先野，一陣玩玩下嘔就唔係幾好啦~


我地行左唔係好耐，就覺得好悶啦，個商場都無野行既，所以我地就返左酒店拾

下野，到7點既時候，先再去lobby集合一齊食晚飯。我地今晚係自己出錢食既~導遊

同我地去左亞羅美食街，個度有好多野食架，見到就好想食啦，而且仲好香呢！我

地自己8個最後就去左一間叫黃亞華美食店既地方食飯，我地叫左好多野食呀，有燒

魔鬼魚，沙爹，炒蝦，燒雞翼，全部都好好味架~我地個個都食得好飽呀~


我地食完野之後，就慢慢行返酒店，我同家姐返到去就即刻沖涼，之後我地就好快

訓覺，因為我地大家都好累呀~

>>August 15, 2005 at 2:59:53 PM GMT+8

2005 年 7 月 31 日 星期日 【清涼】

今日，係第二次同fox一齊去跑步啦~對上個一次係好耐之前既事，不過

我地今次去到都唔係跑步，而係去租單車踩呀！！個d單車係可以坐到3個

人個d，好大架個d，我都係第一次租呢d玩呀，起初我就冇踩到，係fox踩，

我竟坐後面，好大風，好舒服呀~ 之後，我坐左一陣之後，就睇佢俾我個封

信，跟住睇睇下，就去到斜路，所以我就落車幫手推上去，於是我就擺d信紙

在車上面，點知.........一陣風吹過黎，我d信紙吹走晒呀~~~跟住我就大喊:"停!"

跟住我就即刻走去拾起d信紙，好彩都拾返晒，總共9張。


之後，我覺得好好玩呀，一衝斜路，好似玩過山車，好激呀，之後就到左我

踩啦，不過我踩到.............好差，嚇親fox呀~哈哈，sorry啦，第一次踩，係差d

架啦，不過之後，我就踩得好好多啦，之後仲踩斜路，不過唔夠力，架車向後

退，嚇親自己又嚇親fox，結果要佢落車幫手推架車，不過之後落斜架時候，就

好好多啦，好玩好多~過左一個鐘之後，我地就還返架車俾人啦。


過左一陣，我地就行左去富善既Mcdonald坐左一陣，七點幾既時候，我地就各自

返屋企啦~今日真係好累呀~不過都好開心，我同fox約左星期五再去過呀~

>>August 2, 2005 at 2:37:53 PM GMT+8