2003 年 10 月 5 日 星期日 【晴】

有趣的悲哀

今日行過彌敦道見到有個丐幫子弟係處開工，期間一位貌似國內同胞既中年女人行埋去，笑笑口咁拋左個銀仔去個乞兒個漱口盅處，你估個乞兒點﹖佢即刻拎開個漱口盅，黎手執起頭先個個女人拋畀佢個銀仔(估計係人民幣)，一野拋返畀個女人。個女人驚又唔算好驚，不過拿拿林過左去對面馬路，仲一直係咁笑。唉！都唔知話個乞兒有骨氣好定係麻煩好，請看官自評之。

>>August 7, 2004 at 3:26:11 AM GMT+8

2003 年 10 月 1 日 星期三 【晴】

際遇

今日唔見左鎖匙，發哂脾氣。係街唔見都仲好，但最怕就係插係門口個時畀人掹走左。食過飯，見今集俗世情真又好似麻麻地，就按今日出街既路線睇下。先去惠康問一問，兩位阿姐都好好聲氣，可惜最後都係話見唔到。之後再去下鄉道公園睇下，有對情侶坐左係我之前坐開個位處，我求key心切唯有面懵懵咁打擾下佢地，係附近周圍睇下啦，但最終都係一無所獲。到後來見到有個靚仔挪住條鎖匙係手fing fing下，唸到唔知會唔會真係我個條匙又大膽上前一問，發覺原來係佢自己既(其實係理所當然)，順便問埋佢公園個管理處係邊。佢其實都唔多清楚架，不過叫我去室內運動場問下，話音未落，我就見到有位管理員咁既樣既大叔走過，初頭覺得佢講野聲大大兼粗聲粗氣，但估唔到好消息就係從佢口中講出黎——原來佢已經幫我執左條匙啦，真係多謝哂佢，我都起碼講左三四聲。
唉，世事真係多變幻，今次可以搵返條匙，除左多謝個位叔叔位，係身邊鼓勵我既人都要讚下既。
自己個種粗心大意既性格究竟幾時可以改到呢﹖

>>October 2, 2003 at 2:37:57 AM GMT+8

2003 年 9 月 25 日 星期四 【晴】

今日終於拎到回鄉証，個樣唔知點解，仲靚仔過/靚女過本身俾佢地個張相。
其實都想做張証好耐，而家學校話要做，咁就順便整埋。

呢排成日蒲旺角。差佬(或海關)日日掃場，搞到d老翻無啖好食。我又唔算同情佢地既，不過講真咪睇佢地個個黑社會咁既樣，同佢地無乜過節既話，佢地d服務態度要好過普通vcd舖頭d靚妹仔n倍，售後服務又做得好，咁耐以黎,真係無試過唔肯換。好心d係vcd舖做既靚妹仔就學下人地。

唉，功課仲係字隻未寫，唔寫la。

>>September 25, 2003 at 2:10:36 AM GMT+8

2003 年 9 月 14 日 星期日 【雨】

究竟我係唔係同呢個時代錯配﹖點解鍾意既野都係咁上一代既﹖
已經唔記得係咩情況之下聽到"moscow windows"，聽個時真係有醍醐灌頂個種立悟既感覺。
搵下搵下，呢首歌原來有唔少人唱過，暫時最愛既係烏克蘭歌手 Leonid Utesvo 唱既版本，佢把聲低沉得黎又有種滄桑美。之前唱"burnt by the sun"個時已經見識過，可惜無其他版本參照，唔知有咩唔同。

今日又肚痛，去到南京都唔知點算。

BC個處原來都有唔少經典電影可以借，相信唔使幾耐我就會開返張証。

在此立願，我今世人一定要去一次烏克蘭。

>>September 14, 2003 at 7:31:44 AM GMT+8

2003 年 7 月 28 日 星期一 【晴】

認真係門戶之災

以為爛左個窗已經夠黑，點知真係慘處未算慘。 星期六晚我竟然畀道房門鎖住係自己房。初部估計係因為個門把太過鬆，導致門栓同個擰位之間甩左位。等到天光我用手提打屋企個電話叫醒媽咪，唸住叫佢係出面幫我開返道門啦，點知都係無用。最後唯有用最暴力同原始既方法解決問題，用個螺絲枇鑿爆左個門框既閂位。唉，都唔知點解咁流年不利，點解。

呢排睇過既戲
1日本之悲劇
2雪堡雨傘
3藍色大門
4三人婚禮
5魔光血影
6婚事

>>August 11, 2003 at 1:41:37 AM GMT+8

2003 年 7 月 8 日 星期二 【晴】

破落的窗戶

一個人黑起上黎可以點﹖連開個窗都會整爛左個窗架。又要哂錢請人整番。今年真係流年不利，仲有半年要捱，究竟慘痛既日子可以幾時結束。

破落的窗外，陽光是如斯耀眼。然而於我何用呢﹖想起俄國的民歌Utomlenoe Solnce。(burnt by the sun)。講起俄國，塔可夫斯基d戲仲未睇哂，唔知暑假內睇唔睇得哂呢。

>>July 8, 2003 at 2:31:02 PM GMT+8

2003 年 6 月 19 日 星期四 【晴】

十日談
今朝起身看了帕索里尼的「十日談」。簡介話電影中大多故事多數都係同性與死亡有關，果然非常帕索里尼。不計序幕，第一個故事是說一個女子施計說自己是一個男人的同父異母妹妹然後騙取了他所有金錢，最後更設計令他掉進屎坑，但最後男子因禍得福遇上了盜墓者，得到了貴重的戒指，頗有「塞翁失馬」的況味。第二個故事最有趣，說一個男子裝聾扮啞去女修道院打工，修女們見那男人又聾又啞，知道唔會「趙完唱」，所以紛紛前來獻身，最後男人更成為修院裡的聖人。第三個故事是有關一個女人與情人在家雲雨時，丈夫剛巧回來，於是叫情人躲在一個大甕中，丈夫回來了，以為那個男人是來買甕的。男人順水推舟說甕裡太齷齪了，叫那丈夫在甕中清洗，自己則與淫妻在甕外做愛。
其餘的故事有作奸犯科的死後被奉為聖人：青年男女在陽台相好被父母撞破：神父吹牛說能把女人變作作驢子，以此淫污朋友的妻子。有一個關於兄弟殺死了妹妹的西西里情人，最後妹妹把情人的頭埋在花盆底。最後一個故事是說，兩個朋友向對方承諾，若誰先死了便告訴活著的死後的世界是怎樣。後來其中一個男人作過死，回來找朋友說人死後要為先前作過的種種罪而受罰，那朋友便問他，常常和女人做愛又要受到甚麼懲罰呢﹖死了那朋友說那個並不是罪，不會受罰的，然後便消失了。男人聽了朋友的話欣喜若狂，馬上穿上褲子去找妓女了。電影的下半部加插了帕索里尼親身主演的畫家角色(喬托)，他在夢中看見了種種神奇的美妙景象。最後在成畫時說道：「如果事物在夢中已經臻至完美，為什麼我們還要把它製成作品呢﹖」，此話看來頗有警世意味。

話時話，我以前好似買左一本「十日談」，仲要有埋插畫架，可惜唔知去左邊嚕。唔知係唔係以前窮得濟典賣左，唸起都後悔v_v。

>>June 19, 2003 at 6:54:24 PM GMT+8

2003 年 6 月 17 日 星期二 【晴】

純愛譜
一個韓城的男人，一個東京的少女，各自面對生活難題，最後一起邁過換日線找到了生命中失郤的一半。
是個愛情故事嗎﹖不完全是。兩段比較起來較喜歡看日本那部分。沈默寡言的父親，要求丈夫玩換妻遊戲的母親，看漫畫上鹹網，時常拿著玩具槍的細佬，身患重疾的自己。值得留戀的只有剛逝去的外祖母的寓所；願望是買一對漂亮的紅鞋；還有在換日線上閉息自殺，這樣就沒有人知道自己是在今天，還是昨天死去。
經線往西移過少少，住著一個公務員。一個人住著大屋，閒時靠情色網站的妹妹慰藉自己。母親的電話從來不接，有天姐夫帶著甥女走來，原來姐姐已經出走了。平靜的生活讓一個紅髮女孩泛起漣漪。早知道是不可能的，還是想逐分逐分靠近。讓她穿上鞋成為心中的天使吧。豈料女孩的愛人又是女孩。忽然明瞭，天使的寓所原來只在網上。
相信這套電影會悶壞很多人，但恰好對著本人口味。不知為什麼，緩慢的情節在這電影中變得理所當然。一人一地的故事，看到中段已覺得很有「兩生花」的況味，只差在是一男一女罷了。誰知，女孩翻起舊時去漢城的相片，男主角的樣子很「奇斯洛夫洛基」地在相片當中出現。李在容老兄，引用得有點過分耶！
紅髮女孩的角色很適合裴斗娜當演，但最後選用的不是她。橘實里不算太美，但論到擔任單身漢的天使角色也算是勝任吧。而那平板欠笑容的表情與那一心尋死的願望也是分不開。李政宰不再型男，一時麻甩起來，與入型入格還差一段距離，表演應該可以更好。
日本那段似乎是想表達現代家庭的疏離關係，四人兩次在十字路口的各走各路已經給觀眾足夠的示現。韓國那段都有涉及家庭倫理，但以單身漢生活的細節較多，對公務員的辦公室氣氛也有若干的描述。下雨一節順手拈來，輕中見力。
有些人看見電影寫得愈細便覺得愈悶，其實有時悶得來也頗有味道，只要不期待有甚麼驚天動地的事發生，其實也可以看得頗有趣。


>>June 18, 2003 at 12:32:44 PM GMT+8

2003 年 6 月 13 日 星期五 【晴】

個日記要限時先可以upload到都幾唔方便，不過算la免費既，可奈若何﹖
近排睇左好多戲，都唔得閒寫感想，暫時list哂出黎，日後心情好再補返：
卡斯高柏之謎
野草莓
二十四隻眼睛
十三個月亮
伊凡的童年
鏡子
鐵托與我

>>June 13, 2003 at 2:15:28 PM GMT+8

2003 年 6 月 1 日 星期日 【晴】

今日坐蒲仔車尾去左西貢。終於一生人第一次去左科大。人家環境超一流，有無敵大海景，地方又大，個圖書館又係對住個大海，真係好好feel。但係我最鍾意既都係個四個噴水池。真係好想好似d細路路仔落去玩下。

>>June 2, 2003 at 12:03:32 AM GMT+8