2005 年 2 月 1 日 星期二 【乍雨乍晴】

畀人讚我叻
真係有 d 唔好意思喇。

2005 年 1 月 31 日 星期一 【乍雨乍晴】

今晚好趕，
幫奧林派攪團購，
今晚係旺角提貨。
約左佢地七點，
結果最遲那個七點半先到，
我行到返屋企都成八點，
食飯食到一半就趕住出門口。

去到日經已經八點七，
不過老師之前個堂仲未落堂，
即係我唔算遲到啦。
個班房得個小貓三四隻。

到正式開始上堂，
都唔夠一半人到左。
一路上堂，
一路有人遲入黎。


今堂頭半個鐘都係對答案，
除了聽解，
我做晒其他個 d，
係咪好叻呢？


餘下半個鐘教文法，
只係講左第一點，
就夠鐘落堂。

Moly 話呢班教得比以前兩個鐘一堂快。
不過我就唔係咁慣喇。
以前肯定兩堂一課，
第一堂教生字和文法，
第二堂主要會話和聽解，
好有系統咁。
而且對答案會係教完書先對，
唔會點影響教學進度。

但係現在呢？
我覺得對答案用左太多時間喇，
而且時間控制都唔係咁好，
就好似今堂咁，
文法教得個少少，
好似兩頭唔到岸咁。

2005 年 1 月 30 日 星期日 【乍雨乍晴】

發覺自己真係冇乜做勞作既天份，
今晚返左屋企食飯，
食完飯冇去做 Gym，
就係為左做勞作。

食完飯，
拿起 Plan C 既工具和財料，
係佢地毁壞之前，
先幫佢地影遺照。
之後拿起鐵線，
拿起海棉，
捲捲捲，
捲成一 Pat 野咁，
拆左去再捲過，
又係一 Pat 野咁。

份說明書得過三幅圖，
基本上係睇唔明架，
唯有自由創作，
結果當然係失敗啦。


仲要有成堆唔知點用既財料。
唉……真失敗。

開頭仲諗住送 d 唔會鼻敏感既禮物，
睇黎都係失敗，
又要上網訂喇。


Plan C 失敗左，
繼續做返 Plan A 既野，
攪到三點，
仲有漫長既路。

2005 年 1 月 29 日 星期六 【乍雨乍晴】

今日係今個賽季最後一場定向聯賽，
不過個結局就令自己好失望。
我出十點十九分
八點半就到達位於柏架山道一號燒烤場既賽事中心。
有充足的時間熱身和拉筋。
一出發已經可以即刻進入比賽狀態。


今日既賽區係寶馬山，
天氣凍，霧亦很大。
對大部份賽員黎講，
大霧會減慢佢地既速度，
但對我黎講，
有冇霧我都係咁慢。


一路都冇咩大錯，
路線選擇主要都係最短那條。
去到九號經過水站，
沿樓梯衝過大馬路，
沿河去。
原本應該係廢屋後有小路上山，
但我只見到有條小路係廢屋前，
以為唔係，
一路走過了頭。
甚至離開了圖的範圍。
浪費了近七分鐘，
終於返回正路。
係十二號控制點，
終於追返阿兆。
（我係九去十被佢過頭）
打完十三號 Point，
當人人都猶疑緊好唔好沿咀穿綠林之際，
我已經很大膽咁殺落去，
（後尾睇成績，呢段路我係第三快）

之後見到阿斌，
係十五號 Point 被佢甩左。
跑到尾 Point，
見到阿健，
之後衝返終點。

返到成績處理，
時間上係排第十二，
不過成績被人取消左，
因為我去錯尾 Point。
事後對返地圖，
我去了的那個位距我真正的 Point 只有五、六米，
（則例規定最少三十米）

就係咁，
今場比賽畫上一個不完美的句號。


等齊人之後，
我地落左吉之島食野，
之後係附近行左一陣，
想買卡，
不過睇唔中。
佢 d 卡分晒類，
生日卡都有幾個類別，
有 For 父親既；
有 For 母親既；
有 For 兒子既；
有 For 女兒既；
有 For 朋友既；
有 For 丈夫既；
有 For 妻子既，
係冇我想要個 d……

>>January 31, 2005 at 7:02:43 AM GMT+8

2005 年 1 月 28 日 星期五 【晴】

今日係第二個短周，
即係唔駛返工。
上午去左飛髮，
剪短左，
批薄左。

之後同媽媽出左大家樂食野，
食完野之後，
媽媽去旺角買餸。
我坐落元朗髻山落 Tape。


其實咩叫落 Tape 呢？
話說野外定向比賽會有好多控制點既，
為左唔好放錯位置，
即係同地圖標示的不同，
我地叫放錯 Point，
咁就會預早去到實地放 Tap 帶，
然後會有第二個人去 Check 吓有冇錯，
到真係比賽個日，
放 Point 既人只要找得到張 Tape 帶，
就唔驚放錯 Point。

約左阿健一點鐘，
放左差唔多成兩個鐘先落得山。
美中不足係，
地圖南面原本有個白林幾好玩，
現在密左好多，
原本當中都有幾個 Point，
現在就要改喇。


落山後坐返車出南昌，
轉接駁巴士出旺角。
先行一行始創，
宜家搬左之後，
改左做專題商場，
不過冇咩野行。
之後上旺角 GH 幫張會員卡續期，
之後先去朗豪坊，
再去 Wellcome，
預備 Plan B 既野。
夜晚就留係屋企，
做花木蘭。

>>January 31, 2005 at 4:09:46 AM GMT+8

2005 年 1 月 27 日 星期四 【晴】

係日本神奈川縣箱根市有個旅遊點，
叫美術之森美術館。
去遊覽呢間美術館，
要用好多交通工具。
首先坐新幹線，
到達之後，
就可以坐纜車上山，
之後坐吊車落山，
坐船仔遊湖，
最後坐巴士離開。
總共使用五種交通工具。

2005 年 1 月 26 日 星期三 【晴】

某人既愛情生活好似天氣咁反覆無常，
時好時壞。
但係點解我約親佢都係陰天？
同個心不在焉既人去食飯睇戲做 Gym，
仲慘過一個人去。
不過又有道理既，
晴天時，
佢自然同馬姬出街，
仲邊有我存在的空間 wor。

不過一個星期轉幾次天氣，
會唔會太密呢？
好彩我那個唔會姐，
雖則未至於日日天氣晴朗，
但也不會到狂風暴兩，
險釀 Close File 之禍。

平淡，
有時都是一種福份。

2005 年 1 月 25 日 星期二 【晴】

下午收到同事個 Email，
"Attached please find your itinerary for USA trip."
嚇鬼死我，
冇啦啦去咩 USA？
知後睇返封 Email，
同行既仲有 5-6 個人。
睇個勢係 LA 有 Exhibition，
之後上網 Search，
又找不到咩資料。


之後老闆打 Intercom 黎，
原來真係有 Exhibition，
公司有個 Booth。
人選未定，
但係因為預早訂機票會平 d，
所以就用住我個名先。


Departure 個日就撞正色級比賽，
飛機四時起飛，
相信要果去比賽一定趕唔切，
但係我又唔可以 Assume 一定有得去而唔報名。


我感覺到主的安排好奇妙，
雖然今次係商務簽證，
可能有效期好短，
未必可以讓我下次波士頓之旅用。
但似乎對下次申請簽證，
都會有一定的好處。

2005 年 1 月 24 日 星期一 【炎熱】

放工原本打算去睇醫生，
但媽媽打電話來話好多人排隊，
睇怕要食完飯先有得睇，
但我食完飯要返學，
所以最後都係決定星期六朝先睇。


夜晚上堂，
多左三個新同學，
或者應該話係舊同學才對。
佢地係今次個老師上一單元既學生，
也即是說是原班學生。
因為不同的理油，
而遲左兩堂先加入。


不過我就慘喇，
後面成個墟咁，
勁嘈……


今堂主要係對三十四課答案，
對左成個鐘。
以前個老師，
係會收左返去批改，
之後先派返。
現在就同學們輪流讀出黎，
好似多左講既機會，
不過我覺得好浪費時間。


問左 Moly 個「新消息」來源，
原來係小謙。

2005 年 1 月 23 日 星期日 【晴】

節錄今日生果日報兩段新聞

一場入冬以來最大的暴風雪， 周六（前日）由加拿大南下美國中西部， 再席捲整個東北地區， 受影響地區廣及十二個州， 造成陸空交通大混亂， 有逾三千班航機要取消， 數以百萬人生活受阻， 多處有停電報告。 在麻省和俄亥俄州北部地區， 積雪達七十六厘米（三十吋）。 氣象局預計， 周日天氣會進一步惡化， 一股潮濕暖流從大西洋吹至， 跟冷鋒相撞， 在東北部製造更大的暴風雪， 預料波士頓積雪會達一米（三呎）。 多個州先後發出暴雪警告， 麻省和新澤西州更宣布進入緊急狀態， 麻省還要求國民警軍協助。 市民都湧往便利店或超市搶購糧食。

天氣好凍，
戶外又危險。
如果唔係好醒咁買定 d 食物，
咁就慘 lor。
呢個情景，
亦令我想起 The Day After Tomorrow。

由女藝人薛家燕任代言人的日本OTO牌一款足部按摩機昨日發生罕見「夾腳」意外。 一名婦人在上環一間百貨公司試用其中一款新推出的足部按摩機， 可是十多分鐘後疑按摩機發生故障， 導致女事主左腳遭按摩機緊夾， 職員多番拯救， 甚至拔掉電源仍無法將她救出， 最後由消防員拆散按摩機將其腳拔出送院。 該按摩機採足桶式設計， 以七十二粒滾珠及八塊氣墊為賣點， 聲稱可作三百六十度全方位按摩腳部， 刺激腳底穴位， 促進腳部血液循環。

曾經想過買呢部機，
去改善長期穿高踭跟鞋已有既靜脈曲張。
不過因為咁大部，
好難寄，
所以一直都未成事，
現在想返真係好好彩。

>>January 24, 2005 at 8:29:27 AM GMT+8