|
2005 年 6 月 8 日 星期三 【陰】
首日工作
今日正式第一日開工
報到時間為九點半，我早十分鐘上到去發現鐵閘上鎖
正想在附近逛逛之際，突然想起 Michael Lam briefing
講過一個「早到變遲到」的 case
所以就留在大廈樓下不敢走
直至過了九點半打電話給 mentor (Samuel)
他說要遲兩至三個字才到
才較放心的走開一會兒...
早上 Samuel 做了少少 orientation
大概知道未來十二個星期工作大概是怎樣
他給我很多很多機會出 field
Land-based 小弟次次會有份去
Boat survey 亦安排去大部分
Helicopter 就要排隊
當有鯨豚擱淺...他會立即 call 我
希望我在實習期間能次次都去到事發現場
加上過幾個禮拜要 take up project
我返牛頭角 office 的日子應該不是太多
至於今日，九小時工作時間中
九成時間是看書、看書和看書
事關要加深自己對海豚的認識嘛！
雖然不用考試，但看書的專心程度
不遜於在自修室溫書呢！
(事實是我座位旁的電腦壞了...)
好消息：
1. 以後返 office 都是返九點半，可以睡多半小時 ^_^
2. 昨日開始算返第一日，十二個星期後
即是 28/8 我就可以離開，比原定早了五日 ^_^
期待明天的 Boat survey
更期待下個月的 Helicopter flight !!
>>June 9, 2005 at 12:44:25 AM GMT+8
2005 年 6 月 7 日 星期二 【陰】
Land-based #01
琴晚收到香港海豚保育學會(以後簡稱 DCS)o既電話
話今日做 Land-based dolphin observation
問我有無興趣跟，既然得閒就應承左去啦
九點東涌新碼頭等，搭九點二班船入大澳
我就要七點九o係屋企出發，地鐵港島線 + 東涌線
到左大澳永安街落船，行半個鐘山
去到深屈附近一個彎位
可以望晒機場至大澳近岸海面o既情況
能見度好的話仲見到沙洲龍鼓洲
呢度就係做 Land-based o既第一個 site
靠望遠鏡同肉眼搵下有無海豚o既蹤影
同埋紀錄出入觀察範圍o既船隻
通常一個 site 要企兩個鐘，至少都要企粒半
好彩今日風大無咁辛苦
不過海面o既白頭浪就搞到我好 confuse >_<
過左接近兩個鐘就去第二個 site
就係大澳石仔步碼頭
呢度耐唔耐就有「香蕉船」(嘩啦嘩啦)載人話睇海豚
有艘船上面o既乘客仲同我地打招呼o添
都唔知係好嬲定好笑
(小弟相信嘩啦嘩啦o既 engine 聲係會趕走o的海豚 ~_~)
做到兩點半就收工
回程搭嶼巴11返東涌，「鄧」到我...都係坐船好o的...
返到中環行左上荷李活道
試下呢期好出名o既民園麵家大牌檔
我覺得牛腩又唔係話好好味，但我幾欣賞o的雲吞 ^_^
P.S. 以為今日天陰陰無搽到防晒，但皮膚o係無遮無擋咁
暴露幾個鐘之後，返到屋企紅晒 >_<
以後出 field 唔理咩天氣都要搽喇...
今日起新增海豚指數，以表示出 field 睇見海豚o既收獲
分為五級：稀少、較少、一般、甚多、很多
7/6 ： 稀少
>>June 11, 2005 at 12:06:22 AM GMT+8
2005 年 6 月 6 日 星期一 【陰】
真是湊巧
琴日本來 IAS 間公司話帶我去做陸上考察
但星期六晚臨時話因雷雨 cancel
變相多左日 family day
下晝同屋企人坐免費接駁車去杏花村
諗住去新開間稻香飲下午茶
點知剩係要拎籌都要排隊
仲要打蛇餅有幾十人排
多人成咁...係咪真係咁好食呀？
於是我地無乜耐性o既就搵其他o野食
呢個時候咁o岩就撞到又係覓食中o既家姐同姐夫
咁就不如...一齊食啦 :P
之後同老豆返太古城一齊行街街
好耐未試過同老豆咁「恩愛」過喇 ^_^
今日中午呢就同阿雞 + 25仔試九龍城間大婆牛肉麵
食完送阿雞上小巴，就同 25 仔去淘大「碌齡」
一個鐘激快咁碌左四局
Last 個局靠兩個全中終於過到 100 分 ^_^
跟住返城大睇下仲有無停電
回復正常...非常好，可以去做 gym ^_^
又係約都無咁o岩o既情況下遇到 KC :P
一連氣做左兩個鐘，手腳都真係累喇
但開左工就好難抽時間返去
(雖然 field trip 我相信已經係一個好好o既運動...)
聽日原本就係呢個「暑假」o既最後一日，不過...
>>June 7, 2005 at 12:00:39 AM GMT+8
2005 年 6 月 1 日 星期三 【乍寒還暖】
警號響起
1月5日(Semester A 成績公佈日)的日記
我寫過：
...而家 CGPA 又唔係話好高
自己知自己弱項係邊度
下個 sem 要「硬闖」ecology 同 environmental sampling
稍有差池呢兩個 sem o既成果就會化為烏有...
今日出 Semester B 成績了
結果...我還是克服不了自己的弱項
前者很差... 後者也不是很好
SGPA 跌得很勁... 很痛...
一個 sem 好，一個 sem 差，Schlorship 也無望了...
嗯...有點灰...抬不起頭...
Year 2 就由它過去吧
最後一年一定一定一定不可以再走樣！！！
當然，考得好的同學，還是由衷的恭喜你們
>>June 6, 2005 at 11:29:29 PM GMT+8
2005 年 5 月 31 日 星期二 【陰】
元朗燒烤
我o既「暑假」得返一個禮拜多o的
梗係要爭取時間同各方好友 gathering
上星期六同中學同學唱 Lunch K
(好耐無搭足港島 K 場
灣仔世紀「紅盒」裝修真係好得 ^_^)
今日就同大學 ESM 同學去元朗南生圍 BBQ
我真係嫌遠架...但既然住長洲o既同學都去
我都唔應該有o的咩藉口...
順道遊個巴士河，MTR→牛頭角→269C (MAN偈AP，正！)
→天水圍→西鐵→錦上路
過左大欖隧道見舊雨雲一直跟住o黎
幾驚落雨落唔停呀，好彩舊雲無飄到去南生圍
錦上路西鐵站等齊人後就分乘兩部的士去敬輝農場
俾搭巴士小巴行少一大段路，車費都係廿幾蚊
燒o野食之前去踩一陣單車
不過個度單車o既質素就唔係太高
唔係無 brake 就係個轆無氣甚至有o野纏住郁唔到
最後揀無可揀o既情況下拎左部無 brake
行o既時候嘈到好似電單車咁o既單車
Irene 同 Peggy 仲未識踩
其他人就輪流做導師
我亦將學習o既片段拍低
但估唔到拍 Peggy o既 1st take
就已經有「車毀人亡」o既情景發生...對此表示遺憾
跟住就同 KC, Queenie 同o岩o岩學識踩單車o既 Ellis
沿錦田河繼續踩，但踩極都好似無盡頭咁
我地(主要係 Queenie)玩左一陣紅樹果子後
KC 同 Ellis 就先回程，我同 Queenie 繼續向前踩
沿山貝河(灣鱷貝貝前藏身之地)去到元朗工業村對面
有一大片草地，有幾個發燒友放模型飛機
再向前踩，搵到條路o既盡頭喇
左手邊有個樹林，o的樹生得好高
而且好似拍戲入面o既場景
o係入面踩左陣，影下相就回程喇
六點幾返到農場開始 BBQ
Eric 同 Ben 都及時o黎到
Ben 仲要行完山揹住個勁重o既大背囊o黎
o野食方面老闆準備左好多種類
仲有青口燒 (不過我唔食貝殼類海產)
老闆娘仲話唔夠可以添
又落手為我地整豆腐花
而老闆維修單車亦好落力，招呼真係一級棒
難怪吸引咁多 CityU BCH o既舊生光顧
不過同o的狗呀、鴨呀、鵝呀一齊 BBQ
(當然唔係燒佢地...雖則o個兩隻鵝耐唔耐就會用聲音「示威」...)
對我o黎講感覺又係好特別
同埋...我地十個人好似包晒個場咁 :P
燒到差唔多有o的同學又去踩單車做下運動
我同 Ellis 就協助 Irene 學單車
Irene 學得總算有o的成績，應該好快會學識
返晒o黎之後品嚐過老闆娘整o既豆腐花
影埋團體照就俾錢走人
俾 $60 就可以享受 BBQ 樂趣之餘無前顧+後顧之憂
走時老闆仲幫我地 call 的士，唔錯唔錯 ^_^
P.S. 見其他同學賣恨晒廣告，所以我唔賣 :P
有興趣知多o的o既私下問啦 ^_^
>>June 5, 2005 at 12:59:57 AM GMT+8
2005 年 5 月 27 日 星期五 【陰】
刻苦實習
今朝十點返 City 同 co-op 簽約
成班裡面得我一個係 BCH...
當然 Silas 趁機會吹水
一開口就話咁遲先簽約
多數都係 interview 有阻滯
但最後好彩都上到岸...
睇返份工o既詳細 schedule
平時會o係牛頭角香港鯨豚保育學會間 office 返工
6月8日第一日 report duty，做到9月2日
(註：9月5日開學)
星期一至五返 9am-6:30pm，星期六都係!!!
待遇就係每月 $2000 人工
最高工時，最低工資...如果俾李卓人佢地知道
肯定大大聲話剝削
不過如果可以o係呢個特長o既工作時間裡面
學到多o的o野，我唔會介意...
起碼返左工之後已經唔駛諗「暑假」做咩
十點十 co-op 個 Queeny 打電話o黎
話漏左通知我十一點 department 又有個 briefing
呢樣其實琴日由深圳返港途中已經從同學口中得知
我亦一早打算不請自來 :P
呢個 briefing 主要都係聽林氏兩兄弟 (Dr.Michael Lam + Prof.Paul Lam)
講做 IAS 應有o既態度同往年典型例子
講左差唔多一個鐘林氏兩兄弟就請我地食飯
呢個時候竟然遇上難得一遇o既康樂樓停電
要另覓地方，做學生o既當然唔敢主動提議啦
結果佢地話事去又一城翰騰閣食
ESM 霸左一圍檯同 Dr.Michael Lam 食
食完呢一餐，大家就要為自己、為 City
做好 IAS 而努力
跟住同 KC + Jeffrey 睇 FYP Exhibition
好開心 Meiji 份酸雨 FYP 都有得參展
acknowledgement 仲落左我個名，非常非常開心 :P
下年一定俾心機做好份 FYP，以參展為目標!
>>June 2, 2005 at 2:34:40 AM GMT+8
2005 年 5 月 26 日 星期四 【乍寒還暖】
深圳豪遊 Day 2
把行李都安頓好後
到附近士多買一些飲料和啤酒
回到房間就排隊等洗白白
當第一位阿 Ben 正在享受淋浴之樂之時
女軍又突然殺到，還趕我們「出房」
原來是他們房間廁所環境未如理想
結果由三人房轉二人房 (當然有退錢)
我們四個男的就只好讓出三人房了...
待全人類都梳洗好，時間已是凌晨二時許
今晚有歐冠杯決賽 (利物浦對AC米蘭)
玩了兩鋪 UNO 就專心看球賽
之後其他同學玩話事啤，出現了很多大大小小有趣的懲罰
最好笑還是一心想整別人結果自作自受 :P
一邊看他們玩陪他們癲，另一邊卻驚覺利物浦
落後三球下竟追成平手
同學玩到五時多就鳴金收兵了，我當然要繼續看加時和十二碼
結果利物浦贏...這樣贏法真的不可思議
睡了四小時，九時多就給香港直播鄧景輝的聲音「整醒」了我
十時多退房再到東門附近找早餐吃
吃了白粥和腸粉... 牛腩腸粉都幾特別
跟住就逛東門購物街，很多香港式的街舖和商場
而我們主要在一個較舊式的多層商場逛
很多東西賣(衫、精品、飾物、遊戲碟、老翻...)
而且很久未見過賣老翻賣到那麼明目張膽 :P
買東西當然要講價，但講得過份鬧翻了臉又好像不太好
總之想買的東西到了我心目中合理的價我就可以了
我的收穫是一隻不知是真是假的 Swatch 鋼帶錶 ($60)
下一站就是去書城
格局和我上年去北京的新華書城差不多
買了本教 SPSS 的書，貪它附送使用版光碟
(後按：光碟在 Win XP 是安裝不到的 >_<)
在深圳的最後一個節目 --- 按摩
原本是安排昨日進行的，但因為找酒店都找到深夜
怕人流複雜所以押後到現在
我們還是選擇昨夜住的凱利酒店內的按摩中心
我們一致做足浴，但不明白為何男賓需要寬衣
而女賓就不需要...
小龍打頭陣柯打修腳的附加服務
一會兒後服務我的「靚女技師」出現了
是時候秀出我的一雙長腿給她按摩吧 :P
Oh...絕對是視覺和感覺的享受...(恨死隔離，hehe)
她還說我曾經來過...(冤枉呀!!!)
但我總算領會到為何香港人那麼喜歡北上按摩 :P
不是這次按摩，我也不知原來雙腳真的很酸
也見識了阿 Ben 腳底的死皮多到似落雪 :P
但幾後悔這次給小費給了太闊綽了
$66 的服務我竟給了 50% 小費!!!
(我給修腳的小費太多了，但靚女技師我沒理由給得少吧...)
如果有下次的話不會再這麼慷慨的了...
按完摩已經六時多
我, KC 和小龍要返屋企食晚飯
就在酒店門口和其他同學分別
總結這次旅程，有了地鐵在深圳玩的確方便了很多
只是班次疏如東涌線，搭短短一兩個站
等車還耐過搭車是有點麻煩
另一有趣現象就是周街都是「溫馨提示」
討論區就見得多，可能發源地是來自這裡 :P
深圳兩天遊總計花了逾五百元
但最重要是跟一班同學玩得開心
這次是我跟讀書人他們相處最長的一次
對他們也增進多一些了解吧
>>May 31, 2005 at 1:51:17 PM GMT+8
2005 年 5 月 25 日 星期三 【陰】
深圳豪遊 Day 1
今次北上深圳玩o既有我, KC, Ben, 小龍,
Peggy 同讀書人 (Irene, Ellis, Queenie, Eva)
約左八點o係上水火車站集合
但比原定時間(六點三)遲左三個字起身
結果都係追唔返個 delay...
八點半等齊晒人後就經羅湖過關
非常順利咁就進入祖國懷抱
過左深圳海關就見到深圳地鐵入口
完全唔駛行出去羅湖城同深圳火車站
感覺安全同舒服左好多
(至驚遇到個度o的乞丐同扒手...)
去到車站大堂買飛搭第一次深圳地鐵
不過只係搭一個站，國貿站落車
Ben 同 Irene 要兌人民幣
於是去左地鐵站出口附近一間銀行
不過一等就等左半個鐘以上
跟住就去國貿頂樓o既旋轉餐廳醫肚
香港o既旋轉餐廳我咁大個仔都未去過
今次都係我第一次去旋轉餐廳
但都唔係好驚同完全唔頭暈
(呢間餐廳座落o係 49 樓，我家姐仲住得高過佢...)
一路 360 度咁睇深圳同香港上水o既風景
一路食點心，仲要係自助餐又點又食
每位都只不過係 $38 (另加一)，值得推介 ^_^
食飽飽跟住要解決住o既問題
之前搵左間叫歡樂谷青年旅舍床位好平
旁邊就係歡樂谷可以去玩
而家又可以搭地鐵去啦!
不過車程都要咁上下時間，好似搭地鐵去東涌咁
但點都好過搭巴士小巴o既
唔駛怕塞車之餘又唔怕會上左賊車
十二點幾去到間青年旅舍喇
但見到o的房無晒窗，十室九空
"旅舍"出面又有幾個大隻佬玩摔跤，當堂 O 晒咀...
華僑城又係旅遊區，都唔會有平酒店
咁唯有去返深圳市區住
但既然都O黎左歡樂谷，當然玩埋先走
歡樂谷售票處附近有間中旅社
佢地可以幫我地訂市區三星級酒店，雙人房 $260
價錢都 OK，諗住拍板成交俾錢啦
Eva 佢地話去到酒店先俾，剩係留房先
如是者就留左兩間雙人房
中旅社俾左個酒店名「大華酒店」同電話我地
跟住就買飛入歡樂谷玩喇
門票價錢 02 年仲講緊 90 元
到深圳地鐵通車初期已經變左 120 元
今個月再加一加去到 140 元，加得都幾狼
但入面玩機動遊戲唔駛再加錢，咁就算啦...
第一樣玩跳樓機，派左四個同學做代表 (我無份 ^_^)
呢部o野最驚嚇唔係升到最高然後跌o個下
而係等緊升上去o既時候拋一拋你
然後一聲唔該都無就升你上去 X_X
由於跳樓機都幾多人排隊
所以我同另外四個同學就拎埋佢地o的行李
排定隊玩金礦漂流
初時我同小龍都仲話唔駛要雨褸o既
但排排下見到水炮咁近距離攻擊就餚底喇
仲麻煩到 Ellis 要幫我地買雨樓受到唔好對待...
結果我地就拎住所有人o既行李上橡皮艇玩
當然著左雨樓濕極都有個譜
等到玩跳樓機班同學o黎到之後又再玩多次
我就負責睇行李
今次班男仔勇到唔著雨樓玩
而水炮就當然更加唔會客氣啦，痛快地濕身 :P
下一樣玩礦山車，排左九個字隊先有得玩
以過山車刺激程度o黎講只算係低至中級
跟住去颶風灣，好多同學繼續同水玩遊戲，去左玩激流
仲玩左兩次，兩次 Ben 都買左公園相機影佢地o既相
不過o個兩張相又真係影得 KC 同 Ben 超正o既 :P
而我就去玩隔離o既完美風暴
玩呢個遊戲深深感受到體操運動員玩緊單楨o既感覺係點
一時倒吊一時翻騰，最後仲要o係高空倒吊著翻騰五周
坐o係身邊唔識o既女仔已經驚到喊
但我竟然唔暈...咁都克服到我 IAS 出海就真係唔驚喇 :P
之後 Peggy 玩完激流返o黎又同佢坐多次
雖然話係第二次，但玩o既時候都仲係會驚
玩完呢次都深知今日刺激程度已經到 quota 喇
臨走之前玩返o的無咁激o既o野，就係碰碰車喇
的確係同班熟人同場玩碰碰車先至好玩
之後 Peggy 同 Queenie 玩歡樂風火輪
但呢個 game 都真係唔少o野，o係下面睇 fing 到唔知乜咁
隨時仲勁過頭先我玩o既完美風暴...佩服佩服
之後玩多次碰碰車，等埋 Irene 同 Eva 佢地坐完船仔
七點幾就離開歡樂谷食晚飯
睇旅遊書介紹華僑城有間百餃園
咁就諗住o係呢間食晚飯，咁聽日就唔駛等登再入o黎
不過因為旅遊書個地圖太簡單o既關係
尋尋覓覓左好耐，就o係諗住放棄o既時候
Ellis 好眼力睇到面前間舖有「百餃園」三個字
就係呢間?! 唔理喇，照去食啦！
點菜期間因為言語問題，嗌刀削麵店員誤會左係豆沙餅
仲整左四個咁多...幾經交涉最後都要我地啃
而我叫o既炸醬麵又要三催四請先o黎
o黎到都已經無乜胃口，食幾啖就算...
價錢都算平，每人廿蚊唔駛食到好多o野
但又唔係話特別好食，唔食都無損失o既...
時間將近十點，係時候搭地鐵返市區搵酒店
第一次o係國貿站打電話俾大華酒店問地址
reception 話去到東門橋就會見到
幾經辛苦行到東門橋喇，見到幾間酒店賓館招牌
就係無大華... 再打電話去
呢次另一位小姐就同我講o係中旅酒店裡面
咁咪即係要去返國貿站?! 個一刻真係好想 xyz...
但既然無俾到錢大華，我地決定一路行一路搵酒店
見到間o岩心水價錢又 ok o既就o係個度住
結果行到去凱利賓館，酒店俾到兩間三人房
經商議後價錢合理(每人俾 $80)
終於都解決左住o既問題，無記錯的話當時時間
已經過左凌晨十二點...
>>May 31, 2005 at 1:47:06 PM GMT+8
2005 年 5 月 24 日 星期二 【乍寒還暖】
趕尾班車
出左 Camp 第二日(即 20/5) 又要去 IAS interview
呢份已經係第四份 in o既工
競爭者仲有兩個讀 Bio 女同學
份工係同保育野生海豚有關，要成日出海睇海豚
Interview 之前上網搵料，原來就係
上年招呼我地一班同學去睇海豚o既機構
有o個次一面之緣，加上唔怕暈船浪
應該都有o的優勢o既
果然琴日問 co-op，公司口頭話睇中左我
今朝就收到 email 正式 confirm 星期五簽約
總算趕到呢班「尾班車」
可以同其他同學一齊暑假做 IAS ^_^
不過有少少唔捨得 OSS Summer Research o既優厚人工 :P
既然星期五先簽約
跟住呢兩日可以去玩下先
期待聽日同後日o既深圳之旅
(好幾年都無上去玩咯...)
>>May 30, 2005 at 1:34:04 AM GMT+8
2005 年 5 月 19 日 星期四 【雨】
生態營記 Day 4 ─ 最佳實驗
今早各組人輪流把三日的成果 Present 出來
除了自己負責那 part Powerpoint 部分內容有錯
而又被 demtor 發現外，其他大致上都 OK
最後還得到 Dr.Cheung 和 demtor 賞識
取得了 best experimental design
証明其實只要有心做，是會有收穫的
最想多謝的是那些「聽話」的樁象們
(可惜他們不吃朱古力 :P)
另外還有 Raymond 借出手提電腦
沒有你 notebook 內的四百多首歌和電車 Go
很難捱到這四天，昨晚也未必可以這麼早睡 :P
午餐...正如昨天所估...出現雞翼和豬扒
好在出 camp 在即不需再面對他們
回到 City 第一件事就是 check email :P
然後就陪 Jack 去 co-op 以及跟 Paul Lam say goodbye
(p.s. Paul Lam 超多叮囑，好鬼似人老豆o既o者 :P)
以及一齊過海回家 (這學期最後一次了)
衷心希望 Jack 在日本 IAS 過得愉快，滿載成果回港
>>May 23, 2005 at 12:58:35 AM GMT+8
|
鋒，二十二歲，肖鼠，雙魚座，即將進行海豚有機污染物研究
|
廣告 |
|
|
讀者留言 |
| 路人留言
|
 is this blog sti
>>June 16, 2009 at 1:44:44 AM GMT+8
請問大澳 日租既度假屋係邊度搵架
>>April 28, 2008 at 11:50:34 AM GMT+8
你好呀,我都有向書節度幫手架..
>>December 9, 2006 at 11:52:38 PM GMT+8
就係o個個xanga BB??
>>October 13, 2006 at 4:25:29 PM GMT+8
唔好意思ar~我見到你話你試過係
>>June 18, 2006 at 11:41:58 PM GMT+8
ADDDDDDDD OILLLL
>>March 15, 2006 at 5:12:36 PM GMT+8
eason, u know, a
>>February 25, 2006 at 2:56:43 PM GMT+8
你住hall之後生活好精彩咁..
>>January 1, 2006 at 8:57:36 PM GMT+8
HI，CRE 好難，上年都肥過。
>>November 30, 2005 at 11:55:14 PM GMT+8
你被點中了﹗
<br>看我的日記
>>August 31, 2005 at 4:43:38 PM GMT+8
唉，封路封路
<br>冇癮呢..
>>August 23, 2005 at 12:50:54 AM GMT+8
>> 呢o的咁有意思o既 cha
>>July 30, 2005 at 10:38:16 PM GMT+8
Add oil ar, frus
>>July 11, 2005 at 9:28:33 PM GMT+8
個度單車o既質素就唔係太高, 有
>>June 5, 2005 at 1:11:42 PM GMT+8
原來Peggy係唔等同讀書人家?
>>June 4, 2005 at 4:10:27 PM GMT+8
唔駛客氣喎，哈哈
<br>
<b
>>May 26, 2005 at 12:52:16 AM GMT+8
wow~
<br>great p
>>April 19, 2005 at 11:18:31 PM GMT+8
哈哈..
<br>呀ridge.
>>April 18, 2005 at 2:10:20 AM GMT+8
If only the guy
>>April 15, 2005 at 2:07:05 AM GMT+8
Your diary is ve
>>April 9, 2005 at 3:00:13 AM GMT+8
點解你咁鐘意車ge??
<br>
>>April 4, 2005 at 1:42:09 AM GMT+8
嘩嘩嘩..
<br>3.81 呀
>>January 6, 2005 at 11:12:25 PM GMT+8
381~ 勁!
<br>我今個
>>January 6, 2005 at 9:06:33 PM GMT+8
星期五我咪去左sogo、time
>>August 23, 2004 at 1:50:20 AM GMT+8
你都勁囉……四行就玩完一舖五隻色
>>June 16, 2004 at 3:53:54 PM GMT+8
你地打到擔擔麵咁大呀…
<br>
>>February 27, 2004 at 12:09:41 AM GMT+8
點呀
<br>考試考成點呀?
<
>>December 14, 2003 at 12:25:07 AM GMT+8
如果封封利是都是$5.3....
>>December 6, 2003 at 12:55:06 AM GMT+8
恭喜
<br>你個日記人氣指數超
>>December 3, 2003 at 1:12:25 AM GMT+8
我屋企部 desktop 中三用
>>October 6, 2003 at 11:59:06 PM GMT+8
喂喂喂
<br>大學生﹐
<br
>>September 3, 2003 at 12:53:27 AM GMT+8
Umm... regarding
>>July 1, 2003 at 11:06:11 PM GMT+8
算你有ｄ人性 ...
<br>今
>>April 11, 2003 at 2:51:02 PM GMT+8
i am 先頭部隊 lor
<b
>>March 12, 2003 at 10:27:38 PM GMT+8
你等死？
<br>唔好玩我ｌａ
>>February 19, 2003 at 11:12:46 PM GMT+8
hihi
<br>我o黎左啦
<
>>February 19, 2003 at 11:06:35 PM GMT+8
|
|
首日工作
Land-based #01
真是湊巧
警號響起
元朗燒烤