2005 年 6 月 28 日 星期二 【陰】

唉...今日好慘呀, 唔知係唔夠訓oY定點啦, 今朝一訓醒已經好"支力"架喇,
後尾仲無啦啦發燒...周身痠軟, 好似作感冒咁, 但又唔係好嚴重喎,
o尋日又請過假, 所以咁夾硬頂硬上囉, 真係好辛苦,
之後放工13o黎o左接我, 原本佢叫我陪佢出去o架,
但我真係太"支力"喇, 真係頂唔硬, 之後佢送o左我返屋企,
我食o左兩粒感冒藥之後就訓o左陣, 訓醒又無晒事喇喎,
之後咪食飯飯囉, 點知一食完食就肚痛, 仲肚痾添, 真係命苦呀,
今日總之就係成個人都唔多妥啦...苦~

>>June 30, 2005 at 3:51:32 PM GMT+8

2005 年 6 月 27 日 星期一 【晴】

今日係 MONEY 結婚o既大喜日子, 真係恭喜晒佢呀~~~


今日有幾年事同時發生, 搞到好似好旺咁呀,
首先有 Money 結婚啦, 其次就係 13 考升職試,
及後係我亞妹19歲o既生日, 真係咁o岩我咁"轎"??


今日我同亞Chim都請o左半日假, 原先我o地都好有計劃咁諗住去觀禮,
湊湊熱鬧, 開心o下o架, 點知我o地兩個遲大到囉, 我o地去到搵到個 hall,
佢o地已經行完禮步出禮堂喇, 真係唔多意思呀,
仲要比肥祺同牛丸彰走去踢爆我o地遲到添, 真係過份喇...
之後都唔發覺自己咁無時間觀念o架, 而家覺喇, 仲係有待改善~


我o地連同招呼都未同 MONEY 打就埋o左位影大合照喇,
仲比個攝影師舞來舞去, 又稱我同亞Chim係1號同2號佳麗,
仲要話我有問題添, 真係過份喇... haha...
行完禮之後, 新人們同姊妹們一齊去o左圖酒樓,
而我啦、亞Chim、梁碧琪、肥祺同牛丸彰去o左行o左陣,
其實都無無謂謂咁四圍行o左咋, 之後佢o地提議早D上酒樓睇睇,
我o地上o左去之後就詐詐帝同亞Chim潛水喇,
幾個人...有一個係無聯絡開的, 有兩個係o係澳洲剛剛返o黎的,
突然間真係唔知有咩話題呀... 所以我就同亞Chim去o左 tea,
可能肥祺佢o地真係無聊得滯啦, 所以同牛丸又打比亞Chim,
其實我o地又唔係有心賣甩佢o地o既, 咁咪叫埋佢o地一齊o黎 tea囉,
坐坐o下又OK有o野傾o既, 都係D history囉, 不過都幾好笑o既。


之後同夜D就見返好多好多舊同學喇, 有 K.Ying、Yi、肥祺呀、牛丸呀、梁碧琪、
Adam、李君鵬、何德兒、諸家詠、蔡漢杰呀、小明、暖恩仲有潔瑩...
仲有姊妹團呀魚、布詠詩、邱玲、馮汶慧、珠珠、Bobo、Elaine、
徐素芳, 總之就係好多好多舊同學啦, 有熟、有唔熟, hehe^^


到散席... 我就同亞Chim一齊走喇, 有人仲好幸福添, 有猛男接送呀下, hehe...
而我...返到屋企就真係散晒咁滯喇, 好"支力"~~~

>>June 30, 2005 at 3:56:46 PM GMT+8

2005 年 6 月 23 日 星期四 【雨】

騙案...

今日o係公司發生o左一件事... 都幾唔開心@.@

A : 文具公司女職員 B : 文具公司男職員


我 :『你好, XX (公司名)』

A : 『 我想搵貴公司負責文具o既同事o架』

(我雖然唔係負責文具, 但我係負責呢 D 咁煩o既 phone call)

我就問 :『請問有咩幫到你o架??』

A 就話 :『我係代表 Cosmo... (其實聽得唔係好清) 公司打o黎o架,
想通知你我o地公司最新o既 catalogue 出o左喇, 想安排同事經過瀝交低去你公司o架,
希望你o地公司將來o既日子都幫襯返我o地, 請問點稱呼o架??』

我就話 :『我姓羅, 你交低o係門市得o架喇, 我o地有需要會聯絡你。』

A :『睇返你o地o既戶口仲爭一盒打字機用色帶o既價錢就可以瀝到我o地公司o既優惠咭,
只要你o地有呢張優惠咭, 以後你o地o係我o地公司瀝文具永久都有八五折優惠。』

我 :『得o架喇, 我o地有需要再聯絡你啦。』

A :『如果你而家落埋單我o地同事可以一次過瀝晒比你o地,
如果唔係就唔知幾時經過先可以瀝比你o架喇, 真係好抵o架, 你考慮o下啦...』

跟住我就話 :『唔需要喇, 你有 catalogue 就放低啦, 無就算喇。』之後我就 cut o左線喇。


點知轉頭有個 B 同事打比我喎...

B :『你好呀, 我係 Cosmo....公司打o黎o架, 想通知貴公司我o地最新o既 catalogue
同色帶會o係星期一送到貴公司, 到時我o地會跟埋咭片比貴公司可以同我o地同事聯絡返,
到時只需要同事簽收返就可以o架喇......』

我就即刻打斷佢o既說話喇 『我o地無同你要過任何o野喎』

B :『小姐, 要多一盒色帶就可以有永久八五折優惠, 真係好抵o架,
一盒色帶都係4百幾蚊之o麻, 我o地同事開o左單o架喇, 佢(mean = A)新入職o架幫幫手oY...』

我 :『首先, 我o地唔o岩用, 我o地亦無同你要過任何o野,
你就算開晒單瀝過o黎我o地都唔會承認o既』

B :『我o地公司找數個期咁長, 有成兩個星期o架, 係幫幫手要埋佢啦...』

跟住我都照樣話唔需要 cut o左佢線, 之後佢照樣打o黎, 仲話星期一送過o黎添, 真頭痕喇,
邊有人咁樣做生意o架......好似夾硬比人屈咁呀。之後我就同 D 同事講有 D 咁o既事,
叫佢o地記得有咩文具都唔好簽收, 佢o地叫我唔使擔心, 佢o地話門市守衛深嚴,
但我其實都好驚呀, 事關好似係我做錯事咁呀... 好驚呀, 但呢間死人公司真係好乞人憎呀,
我自己都做過 tele-marketing, 我都知咁樣 call 有幾辛苦, 有幾大壓力,
所以每逢我接到呢 D call 都好客氣婉拒, 點知今次呢間公司個手法簡直係強迫你要咁,
真係太過份, 都唔知星期一會搞成點添呀, 好擔心! 今次真係"賴"o野喇。

希望大家都要小心 D 喇~

>>June 24, 2005 at 3:25:03 PM GMT+8

2005 年 6 月 19 日 星期日 【微雨】

今日好忙呀, 又唔夠訓, 成日就好似遊魂咁, 好辛苦~
今日 D 人又怪、D order 又怪, 一時又話有個爐o係大澳要搵師傅整,
一時又話有個爐o係躉船要搵師傅睇, o係屯門蝴蝶灣碼頭等,
吹漲~~~ 真係 BEAR BEAR 聲。


D o野又散, 百貨公司 D 人鍾意 fax 張 sale memo 過o黎,
一時又 fax 張 PO 過o黎, 天一半地一半, 做一張單就好似拾骨咁拾喎...
又多電話喎, 一個 ORDER 都未消化到又要聽令一個喎,
一個要記住要 A, 一個要 B... 令一個又要 C , 卒之搞到個人都有點兒亂。
幸好個個忙得o黎都講o下o野、笑o下先無咁難頂咋。

>>June 20, 2005 at 1:08:06 PM GMT+8

2005 年 6 月 16 日 星期四 【綿綿細雨】

今日收o左工之後就約o左 Peggy 行街食飯, 係就係想買衫去飲 Money 果餐呀,
但後尾都無咩收穫, 淨係買o左兩件 tee 咋, 但已經就o黎財赤o架喇,
飲衫喎... 都唔知點算喇~


今日 Darryl 仲打過比 Peggy 呀, 仲同 Peggy 講話上個星期六見到我添,
點知果陣我就正正同 Peggy 一齊喇, 佢都算準時喇, 早唔打遲唔打,
另外佢都算勁呀o下, 咁都仲記得我同 13, 話見到我同 13 一齊, 真佩服。
聽 Peggy 講, Darryl 而家都幾好oY, 佢又備受賞識, 份工又好過我o地以前果份工,
希望佢個『水樽 team』成績彪炳, 搵多 D 啦。


今日仲行行o下撞鬼囉, 撞到兩隻冤氣鬼拖手仔, haha....
我仲比共中一隻冤氣鬼襲擊添呀, 佢o地咪就係傳說中o既亞彬同佢女友囉,
比我撞到正之o麻就用佢把遮篤我喎... 真係過份呀, 正衰人~
不過都好戥亞彬開心o既, 希望佢修心養性啦。^^~

>>June 20, 2005 at 1:32:45 PM GMT+8

2005 年 6 月 14 日 星期二 【颱風】

WOO... 今日好勁呀, 小妹我加人工呀, yeah~~~ ^^


我都好突然o架, 今日放工晏o左走, 無啦啦我老細就叫住我喇,
咁咪入o左佢房囉, 之後佢就同我講我個 probation 已經搞掂o左喇,
仲加o左我人工添, 仲比我預期多, 好開心呀~~


平時我老細都好少同我o地講o野o架, 又多時都四圍去,
亦都唔知佢幾時會留意我o地o既工作表現, 佢為人又反覆喎,
估唔到佢無啦啦話好滿意我o既工作表現喎, 所以加我人工仲鼓勵o下我咁,
真係多謝晒呀~~


不過呢個都可能係一個好 standard o既答案啦, 不過加o左人工我都好開心...^^~

>>June 15, 2005 at 1:27:23 PM GMT+8

2005 年 6 月 11 日 星期六 【綿綿細雨】

今日好無 mood 呀, 唉~


今晚要返 P 記呀, 返到去本身都無咩o野o架, 唔知點解越夜就越無心機,
可能... 因為天氣熱, 心情煩躁,
可能... 因為公司地方細, 但人多,
可能就係因為咁都唔知行好??企好??釘單好??跟單好??pouch好定跟 T/O好??
成晚都唔知做緊 D 咩, 淨係知自己 "SHINE" 時間。


之後 10 點半放工飯又未食, 又無咩o野想食, 又無咩o野好食,
結果搞到半夜三更o係屋企食稯, 九唔搭八, 唉~
之後咁o岩 Annie 媽就打o黎喇, 同佢傾電話傾傾傾到點幾兩點,
無辦法啦, 其實大家都唔係咁開心, 大家都有呢一個需要發洩o下,
雖然唔係講完個電話就完全無晒事, 但都叫做個人舒服返少少啦。

>>June 13, 2005 at 11:28:54 AM GMT+8

2005 年 6 月 10 日 星期五 【晴】

今日晏晝去o左整頭, 從今日起我真係憎死 Frankie 呀,
又話佢幫我整果個頭同我想整果個頭有八成似, 真係似佢個頭呀,
而家.... 好核突.... 我唔想見人喇... 激死人...
仲猛咁 sell人做呢樣做果樣, 囉囉唆唆咁, 煩死人喇!
做得好就話o者, 做得好咩都值oY嘛, 電完出o黎見到個頭咁,
而家真係咩都唔想做喇, 仲白白用o左 3 個幾鐘... 妖~
我立心以後都唔去佢度剪頭髮喇!!! 歧視佢~


到o左夜晚就去o左 13 屋企, 同佢屋企人做節,
順道探o下我寄養o係 13 度o既魚魚, 今次真係唔可以唔佩服佢喇,
唔知點解 D 魚魚我養果陣時就係咁死, 係咁死,
D 水呢就瀘極都唔清, 仲好似有陣味咁添, 無論我用幾多心機都好, 都係咁死... 係咁死...
但 13 養呢又無o野喎, 如果 D 魚魚唔係弱肉強食的話呢都唔會死,
D 水又清又無咩, 所以我防止自己再作孽就寄託o左比 13,
哈~ 真係唔該晒佢呢個奶爸呀~~~~hehe^^

>>June 13, 2005 at 11:42:30 AM GMT+8

2005 年 6 月 9 日 星期四 【晴】

今日放左工之後約左 Erica 去唱 K 呀, 都幾開心oY~~
自從無一齊做o野之後我o地都少左機會見面, 上一次見佢都係好耐好耐之前o既事喇,
不過又慶幸我o地都 keep 到多o野講喎, 一見面就係咁傾傾傾...
都未去唱 K 把聲都開始 "拆拆"o地喇, haha...


今日又醜事八出啦, 真係醜死鬼, 不過唔 "火羅" 又邊有得笑oY, haha...


另一方面, 今日 Peggy 又打比我喎, 自從上次主動搵完佢,
但感覺怪怪之後就唔敢再打比佢喇, 我仲以為我o地都唔會有咩機會再搵o架喇,
點知佢今日又打比我喎。原來佢剛剛先忙完搬屋同幫佢媽咪搬公司,
我o地唔止屋企距離近左呀, 而家連返工都近埋, 實在太開心喇, yeah~~~


我o地仲約左下星期見面添, 我仲拜託 Peggy 幫o下我手揀o下衫添呀,
佢都好樂意幫忙幫忙, 真係唔該晒呀, 到而家我都未 "Dick" 起個心肝仔去買衫衫添呀,
一來豪無頭緒, 二來真係睇極都唔多o岩, 所以話出去買衫行行o下就去o左做其他o野,
都唔知著咩去飲喇。不過.... 我都未收到紅色炸彈, 唔知 Money 係唔係忘記左我呢?? hehe...^^

>>June 13, 2005 at 11:29:19 AM GMT+8

2005 年 6 月 5 日 星期日 【晴】

今日好厲害呀我, 話說 Money 真係結婚在即, 雖然我都仲未收到 invition card,
但聽說佢o地都搞得七七八八喇, 今日同亞 Chim 傾電話仲八到姊妹團成員添,
起初亞 Chim 聽完亞魚講之後就考我喇, 點知小妹都OK啦,
估錯左一個咋, 好勁呀~~ ^^


haha....當中包括o左伴娘珠珠啦、邱玲、亞魚、馮汶慧、徐素、家寶,
應該仲有 D 係好耐無見o既同學仔, 都好耐無見過喇,
所以好期待 6月28 號呢個大日子呀, 希望一對新人幸福開心,
亦希望我地可以玩得盡興顛返晚。


>>June 6, 2005 at 3:33:43 PM GMT+8