2003 年 2 月 15 日 星期六 【晴】

其實我想...


呢幾日真係過我好辛苦呀, 諗左好多野兼諗左好耐,可能係因為見唔到你啦。
例如諗下點先可以無咁辛苦、點樣先可以開心D、諗下自己想點...


諗諗下...我明白到有太多事我都好身不由己, 例如鍾意佢啦, 呢D都唔係我想o架,
點解個個都唔簡, 係要簡一條咁辛苦o既路o黎行喎??
好多o野都唔係我一個人話晒事, 一隻手掌係拍唔響o架, 我都需要有人陪我一齊去爭取。


雖然我鍾意佢, 但我知道佢有太多顧慮, 例如佢o既過去、佢o既經歷令到佢都怕怕,
佢係我o既經理仔我只不過係普通員工仔一名, 人人都知同一間公司會唔係咁好。
o係我o既立場...我淨係想佢唔好咁辛苦, 記得佢問過我我同佢幾時先可以行前多一步,
雖然我驚我o地等唔到呢一日, 但既然而家未係時候咁咪唯有等下囉。
如果你係鍾意我o既, 我o地一定等到格, 正如你話唔難點知有無緣份喎。


雖然而家o係公司見到你真係會好辛苦、但同時都好開心係你唔知道o者,
好似好複雜呀呢種感覺。但可能係我表達能力極差, 搞到你成日都要估我係點,
但你估我o既同時我又咪係同你一樣, 我知道我同你都o係度逃避緊, 唔知幾時先可以有膽面對,
可能到頭o黎我o地會錯過晒好多o野, 但有時我會諗至少我而家仲有一個明確o既目標丫,
都未算咁差o者。可能直到你放棄搵到第二個果陣我先會醒覺用得太多時間去等,
但無計啦, 鬼叫我鍾意果個係你咩!!!

到時候又難免hurt一場、唔開心一段時間, 但人一定要經過痛先識得成長o架,
我知道呢個係一個永遠都唔變o既定律o黎o架。
大個左真係有好多好多無奈、好多唔開心, 點解做人要咁複雜??


雖然我唔甘心就咁算, 但我知道我o地o既問題都一直存在緊,
可能我會將D問題諗得嚴重左, 呢D日子我知道會好唔開心, 而你亦都會去放棄...


希望...可以的話我都想可以成日同你一齊, 因為同你一齊真係真係好開心。

>>February 16, 2003 at 6:09:20 AM GMT+8

2003 年 2 月 15 日 星期六 【晴】

Nick Nick 加油 lor !!!


o尋日同呀Nick chat左好耐呀, 知道佢好唔開心, 除左聽下佢講之外都真係幫唔到佢D咩,
雖然我o地溝通上有好大問題, 事關佢打d o野我又唔明, 成日要問佢講咩,
haha.... 但希望佢講完會開心D啦, 過左去就唔好諗咁多喇,
唔好因為呢種事而辛苦自己呀!!!


同埋比心機戒煙啦, 你之前都唔鍾意食o架, 因為咁而危害到自己健康唔值呀!!!


希望你快D好返啦~~~
我支持你lor!!! God Bless U lor!!!


唔開心好快會走o架喇~~~快D開心返啦~

>>February 16, 2003 at 6:01:45 AM GMT+8

2003 年 2 月 14 日 星期五 【陰】

好辛苦添 !


而家咁樣好辛苦呀, 返工見到又死, 見唔到又死, 加上我同佢都無咩可能o架啦。
要等都唔知等到幾時呀...況且佢info都話佢想放棄啦, 等咩喎, 白痴~


我要迫自己唔好再諗喇, 佢下look成look都返早呀, 都唔會見到佢o架啦,
既然係咁或者呢段時間可以比我凋淡D感覺。


而家真係唔係咁想返part time呀, 我想辭職唔做,
反正佢遲早都係炒人o架啦, 咁不如唔好比自己咁辛苦,
我唔知咁樣做係好定唔好, 但我諗總好過而家咁啦, 明知有Do野而唔肯去面對,
開心同唔開心都唔係為一D實實在在o既o野, 咁樣好咩??
成日扮傻、扮feel唔到繼續咁落去, 唔好話佢心淡丫, 自己遲早都變得反應遲鈍呀。


成日為左咁樣而唔開心...有邊個會知有邊個會理喎...
Down到工都唔想返呀...真係想死呀!!!
但今次我又係唔係真係可以放棄到呢??

>>February 15, 2003 at 7:38:23 AM GMT+8

2003 年 2 月 13 日 星期四 【陰】

有花收 lor !


o尋日同佢傾電果陣佢話聽日送支花比我喎,
但之後我諗住佢都係吹下水o者,
點知佢真係送左支花花比人喎, 不過唔係真花,
只係一個SMS o既圖片訊息同埋個message o黎o者,
但都多謝晒你呀!!!^^


唔知佢而家做緊咩呢??
今晚會去邊呢??
um ...............................
諗o黎諗去都係溝女??


又發作喇 d 思覺失調 ~
又o黎亂諗o野喇 ! ><

>>February 14, 2003 at 9:06:21 AM GMT+8

2003 年 2 月 13 日 星期四 【陰】

今日係情人節呀!!! 有點兒 down down o地添~


但今日個心唔知點咁硬係有D不安呀, 唔知係咩事呢,
好驚 lor !!!


一個人o既情人真係特別慘o架, 所以咩都唔想講喇。


今晚我呢D「籮底橙」仲要返工工呀, 仲係收2330添,
個個今晚都去晒拍拖拖喇, 今晚好似得我同Candy返咋,
唔知會唔會悶死呢??


琪琪今日生日呀, Annie 幫佢搞左個生日 party 呀,
希望琪琪生日快樂、愈大愈靚女&學業進步啦。

>>February 14, 2003 at 9:04:51 AM GMT+8

2003 年 2 月 13 日 星期四 【晴】

祝各位情人節快樂!~

>>February 13, 2003 at 4:30:27 PM GMT+8

2003 年 2 月 12 日 星期三 【陰】

今日我晏晝打左比佢喎 ~


今日又係四點鐘走左喇, 之後去左做facial再同小珊珊去左唱K。
都OK啦, 一有K唱梗係顛左咁o架啦。


晏晝果陣我都諗左一陣, 都係想打比佢, 所以就打左比佢喇,
佢o尋日咁惡咁話人今日又好似無咩o野咁喎, 不過都係傾埋D普通o野囉,
總之我知道佢無o野咁就得o架喇, 我都安樂D,
o尋日比佢話完又有好多o野諗呀, 搞到人o地都訓唔著。
所以一去到做facial果陣, 一訓低就訓著左喇, ZZZ....


之後佢都有打比我, 果陣我唱緊K, 但佢打o黎好似係話我o尋日做漏左o野呀,
今日要佢拾手尾, 唔好意思呀。


雖然唔知佢聽日會做D咩、約咩人, 但佢聽日同後日都放假假喎,
希望佢情人節都快快樂樂啦。

>>February 13, 2003 at 4:42:38 PM GMT+8

2003 年 2 月 11 日 星期二 【陰】

今日真係好PK呀!!!


今日晨晝兩點鐘我已經收o左工喇, 本來老闆都唔覺唔覺o架,
但其中一間供應商三點零上o黎收票喎, 上到o黎唔見人就打比我老闆,
咁我老闆就知道晒成件事喇。我之前都同間供應商講o左上o黎之前要打比我先,
點知佢唔打比我, 我見無電話咪走囉, 點知轉個頭佢又自己踩左上o黎, 次次都係咁喎,
真係麻煩呀。雖然我都好不負責任咁早就走, 但成間學校得我一個人咋,
D o野又做晒...都無咩理由一個人留o係度發"毛"o架嘛。


之後同Annie仲有天沛去o左Jusco 幫琪琪買生日party D o野,
我又順便去埋pick up 之前訂o左用o黎送比琪琪果D衫。
之後又 join 埋 Candy 去o左 tea 再上左 Annie 屋企坐左一陣,
雯雯同琪琪都好搞笑呀, 見到天沛就好怕醜, 天沛都未掂到佢o地,
佢o地就即刻縮, 又周圍走, hahah... 之後再陪埋 Annie 去訂蛋糕就返工工喇。

>>February 13, 2003 at 4:29:26 PM GMT+8

2003 年 2 月 11 日 星期二 【晴】

完( 緣)喇...音音比人鬧呀!!!


之後返工工, 我都未夠6點就返到去喇, 呀Dick o尋日叫我返6,
但又唔知佢講真定講假喎, 所以返到去都唔知拉唔拉卡好。
本來想問佢係唔係真係返6, 但佢又成日同小健匿o係經理房,
點知入去搵佢先見到佢o地同呀Lam唔知傾緊咩, 我見呀Lam o係度咪費事問佢囉,
費事累佢因為叫我返早D而比人話啦。


之後佢都無咩o架, 不過我o地都唔多傾計, 佢一開口就係話人o地, 我都知佢講笑,
但佢又真係話得人o地好應喎, 又話人廢喎...你估我真係唔識嬲o架咩??
有時都唔知我o係佢心目中係唔係真係咁廢呀。


之前我send過一首SHE o既《戀人未滿》比佢, 佢燒左隻碟返o黎, 仲特登話點比我聽,
跟住又問人o地首歌講咩??? 其實首歌咪講緊我同佢囉, 仲要中晒果隻喎,
果陣時好掛住佢咪 send 左比佢囉, 唔知佢玩定扮唔知, 問人o地首歌講咩o架喎,
叫我用廣東話解釋比佢聽, 如果要解釋咪就係一句我等緊你囉, 傻佬!


之後佢問我今日有無人接我放工, 我話唔知喎, 跟住佢話人o地今日走唔甩o架喇,
佢話佢要送我返去, 仲叫我還債比佢添。因為我之前同佢玩成鬼日搣佢,
咁佢就話我再搣佢就要每搣一下比佢鍚返一啖。
咁有時玩開佢話我我好順手咁就一o野搣過去, 搣到佢痛到成個跳起。
佢咁講過之後我唔覺唔覺之間都搣過佢三次, 所以佢就成日話人爭佢三啖仲成日叫我還添。


之後收工佢真係咩都唔做住, 同我一齊收工之後送我返去, 一路行都一路傾計咁啦。
之後返到屋企, 佢真係叫我還債比佢喎, 咁我唔知佢想點我梗係以為我講笑啦,
咁我咪返入屋囉, 返到屋企打比佢同佢傾左陣, 我問佢o係邊佢唔肯講,
我問佢係唔係返公司"瀝"車, 佢開頭話唔係,
但之後我話佢唔係話過我問佢咩佢都會講比我聽o架咩??
之後佢話係喎~跟住佢話佢真係返公司"瀝"車, 事關佢聽日追更,
追更=踩全日喎~但佢仲要送我返去, 真係辛苦晒呀!!!
之後佢問我仲有無o野問佢, 我話無啦暫時, 我話有Do野你想講你就會講o架啦,
佢又話如果我一日唔問佢一日都唔會講喎, 其實我同佢都聽得、講得有D絃外之音,
但佢都話佢唔會講...咁我可以點喎><


同佢單獨相處果陣真係可以好開心, 但一返到公司佢又好似第二個人咁,
同之前果個佢完全可以唔同晒o架。
我唔識分同佢單獨相處o既時候佢係 gentleman風度丫定係點喇,
總之我唔鍾意o係公司o既佢, 我鍾意私底下同佢o既相處。


之後我o係屋企 online 諗住睇返佢之前果日留左D咩message 比我啦,
都諗住見唔到佢 on o架喇, 點知佢又on 左一陣喎。
佢仲同我講話佢頭先真係有D衝動想鍚我, 仲問我如果佢鍚我我會唔會避喎,
我都唔知佢諗咩叫我點答佢喎。跟住我答佢咁難答o架唔識答喎...
跟住佢就鬧人...就係我成日比D咁o既答案佢, 搞到佢咁猶疑,
之後仲話佢覺得自己無用仲走左去訓唔理人o地添呀。
聽完佢咁講, 我好驚呀!!! 驚佢唔理我喇~ 其實係我驚所以都唔敢期望D咩之嘛。


之前我day off 呀邦話唔知佢返o黎做o野定溝女,
之後呀邦話你夠膽話唔係想追呀音, 佢又大大聲話唔係喎,
仲將我掟比神童輝添, 話神童輝都幾型呀, 仲話神童輝先係暗戀我。
所以我先唔知佢究竟係點咋嘛。


唔通佢真係睇唔出我鍾意佢o架咩?? 可能係我表達能力真係有好好好大問題啦。
今次佢會唔會唔再理我...?? 我好似有排都見佢唔到喎...好驚呀!!!


如果佢唔係走左去訓唔理我o既話, 可能我都已經話左比佢知我好鍾意佢喇。
佢一炆我就好驚o架喇, 況且有就有、無就無, 我都唔想再拖落去喇...
但好似一同佢有小小進展o既時候, 大家最終就會不歡而散咁。
每次傾到接近果個題目o既時候, 次次都係佢好炆或者唔好意思之後就唔理人走左去!!!
我又唔知佢想點喎, 都唔知佢幾時係講笑、幾時係認真,
我有時都好嬲點解自己要扮傻喎, 好似互相逃避緊咁,
佢話我搞到佢好猶疑, 但係佢都比左好多o野我去諗, 只不過係我唔敢去諗咁多咋。
即使我係想、我係鍾意佢都好, 我真係怕希望愈大、失望都會愈大呀。
所以我都擔心、都會驚我同佢到頭o黎都係咩都無o架, 我唔想咁樣呀!!!
可惜佢都唔明><

>>February 13, 2003 at 4:28:42 PM GMT+8

2003 年 2 月 11 日 星期二 【陰】

呢幾日學校Sport Day呀, 今朝一早返到o黎呢度就好似死城咁呀。
D咁o既日子仲要持續到下星期一喎, 點頂r ??


公司又得我老闆、我、呀鐵同呀芝喎, 人仔都唔多一隻呀。
o係山頂又凍喎, 真係慘慘呀!!! 我又無咩o野做喎, 唯一工作就o係度打下日記仔咁囉,
之後save 落隻 floppy度, 之後先上網交功課。 heheh...
但D時間仍然係過得好慢好慢...唔知幾時先到收工、唔知幾時先見到多D人呢??
幾時先夠鐘返P記r??

>>February 12, 2003 at 4:44:20 PM GMT+8