2004 年 2 月 27 日 星期五 【微冷】

今日都幾唔開心呀, 仲有少少突然添...


因為今日林仔走左呀...佢永遠都比我一種突然o既感覺o既,
由佢發現有肝病開始到今日收到佢走左o既消息, 永遠都係咁突然o既,
今晚仲要係亞Shan講比我聽我先知咋, 我呢幾日都無返過P記,
而林仔個老婆通知公司o既人o既時候都叫人幾難接受,
我相信就連林仔老婆都幾難平伏呀。


仲記得林仔成日都叫我"新抱仔、新抱仔"咁架, 我哎呀老公煒烙仔都唔知點呀,
咁細個就無左Daddy, 煒烙仔都係好黏林仔添架, 成日同佢老豆做埋D招牌動作,
真係好得意、好難忘, 但而家再無機會見到佢兩父子咁溫馨的時候喇。
真係好無常! 我真係估唔到林仔就咁就走左, 都幾唔捨得佢呀,
我永遠都唔會唔記得佢架, 希望林仔老婆同煒烙仔可以快D過渡呢D苦日子啦,
我真係好希望可以做到D野幫到佢兩母子手呀...但可以做D咩呢??


13係知道架, 但佢唔話比我聽, 佢驚我知道左之後唔開心、訓唔著呀,
我知道13鍚我, 但我知道左之後亦都好在有佢o係我身邊咋,
我聽完之後真係勁心up囉, 好狂有佢陪住我傾計, 我淨係識問點解o既?點呀?點算呀?...
但13慢慢講、慢慢答埋我D白痴問題, 所以傾完心情都好Do既。

>>March 1, 2004 at 6:41:25 PM GMT+8

2004 年 2 月 25 日 星期三 【微冷】

今日係第二日返工工, 今日正正式式係我一個人開舖喇, hoho...OK 無問題!!!^^~


尋晚同13去左超級市場買左D野食, 諗住今日臨返工之前煮餐飯當早餐食架,
尋日都懶叻話我煮添...haha...^^~ 點知都係比13批中最終都係由佢煮。
變左13成日話我成日吹水、呃佢, 勁慘! >< 但13都知我幾懶架啦,
真係Sorry喇, 今朝都係因為我懶囉, 不過唔緊要啦, 13一定有機會食到我煮o既野架嘛,
都時好味到13連隻碟都食埋添呀! haha...勁自大添!!!
不過唔好食你都要食晒佢架!!! ^^

>>February 29, 2004 at 12:02:24 PM GMT+8

2004 年 2 月 24 日 星期二 【微冷】

又轉左工喇!!!!


今日第一日返新工喇, 今日成日都拍主個老闆又係陳生,
成個上晏都好空閒, 行行企企咁等D學生放學o黎上興趣班咁。
陳生就成日同我學我D野點做點做, 但講完D學生都係一樣未o黎,
之後一到4點打後D時間就易過D, 差唔多每個學生都係上30分鐘,
我就係咁睇住D人來來往往, 好快就到8點鐘收工喇。


13今日咁o岩連續4日都放假假, 可以日日都陪住我返工放工,
hoho...勁開心^^~ 好奇怪架喎, 每一次我返新工13都勁擔心, 日哦夜哦我...
驚我唔識搭車、驚我做唔o黎、驚我同D同事唔夾、驚我返得唔開心...
好多好多野驚! 雖然係好似好好笑咁, 但我都想佢relax D, 我識照顧自己架喇。


今日係我同13拍左拖一周年紀念呀, 不過好不幸地今日又要返工,
到放左工先同13去左食飯飯, 之後就返左13屋企喇, 都無話點慶祝,
事關聽日我又要返工工喇。

>>February 29, 2004 at 12:00:34 PM GMT+8

2004 年 2 月 22 日 星期日 【颳風】

今日K.Ying生日, 雖然無打比佢, 但我都記得架, 祝佢生日快樂啦, 壽星女! ^^


尋晚去左十三度訓, 事關今日約左份工o係秀茂坪度見呀, 份工係虹姨個女Kelvina介紹比我架,
約左下晝四點去見工, 係做琴行文員架, 間琴行叫樂宜音樂學校, 係Kelvina個舊亞Sir開架,
Kelvina個舊亞Sir亦都係琴行o既老闆叫Alan, 佢係大學教師o黎架, 夜晚仲係一間夜校o既校長,
所以佢都講到自己好忙架, 而間琴行呢就係Alan都佢太太o既小生意o黎o既。
主要都係做返工務員D細佬o既生意, 所以佢間音樂學校都係開係警察宿舍樓下o既商場裡面,
由朝到晚都見到好多差人叔叔架, 唔知佢地生意好唔好做架呢??


我見完工無耐, Alan就打比我叫我星期三返工咯, 真係勁快、勁等人用囉。
見工果陣Alan仲話其實之前見左一批人, 仲揀左一個女仔諗住請佢架喇,
點知Kelvina就介紹左我去見呢份工, Alan都話有熟人介紹梗好D, 所以而家就決定左請我喇。
我都未試過返一份咁遠o既工架, 識我o既人個個都知我懶架啦, 點會肯去到咁遠返工工丫,
haha... 所以我相信個個聽到我呢個消息都一定唔信o者, 但唔講唔知丫,
其實o係我屋企果便過去梗係遠啦, 但若然o係十三屋企過去喇喎, 五分鐘都唔使就去到架喇,
所以十三勁叫我執埋晒D野搬去佢度仲好喎, haha...傻佬, 點可以離家出走架??
不過我諗我以後都會多左機會去佢度借宿架喇, 因為可以方便我返工工丫嘛。


不過呢...呢排好似成日返工咁呀, 但份份都返唔長, 診所果便而家又返唔到,
就連P記呀, 都返唔到咁多時間喇, 錢就梗係搵少左啦, 但我係最驚就係我越來越懶咋...

>>February 23, 2004 at 5:58:29 PM GMT+8

2004 年 2 月 21 日 星期六 【颳風】

今日終於o黎料喇, 無啦啦今日晏晝訓訓下就開始發燒喇, 係打完支針o既反應o黎喎...
但係真係勁辛苦呀, 訓又訓唔到、又"支力"、又頭痛、又熱但熱得o黎個身又有D寒寒地,
真係超勁辛苦囉。不過細佬仔好乖呀, 但亦都好好笑, 佢知道我發燒佢就猛搵葯比我食,
知我未食野就瀝野比我食完先食葯, "針"茶遞水, 之後又瀝冰墊比我敷, 瀝完冰墊都未夠喎,
仲要瀝多成袋冰比我, haha....之後仲搵埋探熱針比我探熱添, 勁好服侍又勁頂癮喎,
唔經過呢次我都唔知細佬仔咁識照顧人o架添, haha ^^~


食完D退燒葯訓左一教好返D喇, 十三放左工就o黎左我屋企接我出去,
事關今晚十三個表哥同表嫂擺酒, 我應承左同佢屋企人一齊去,
所以十三咪o黎接我囉, 十三仲叫我唔使咁隆重就好似普普通通咁食餐飯得喇喎,
但佢屋企人呢個個都好重視呢次o既聚會, 個個都set行晒頭呀, 著晒西裝、飲衫咁,
都唔好話唔使重視呀。之後就同十三一齊去左奧海城二期果間利寶閣食飯,
去到無耐又開始o黎料喇, 又o黎"支力"、又周身骨痛、好似成身都唔舒服咁,
我又無帶葯o係身喎, 之後十三咪幫我出去左買左D成葯, 食完好似個人先清醒返D,
無咁辛苦左, 之後成晚仲鬼打都無咁精神呀, 十三仲猛話我一好返Do者就o黎串佢咀添呀,
haha...

>>February 23, 2004 at 5:28:15 PM GMT+8

2004 年 2 月 19 日 星期四 【陰晴不定】

又返完兩日診所喇, 好彩都未至於咩都唔記得晒, 有好多野都有印象點做,
不過呢兩日睇到同聽過好多唔到o既症呀, 有D都睇到有少少驚同埋心寒...><
有時見到D人睇皮膚病, 睇睇下就好似自己都痕咁, 想"R"下自己咁, haha...^^
但當然唔係比個病人傳染到啦, 只係果下有呢種感覺o者。


今日Dr.Chan見呢排咁多人o黎睇感冒, 而且感冒都算幾容易傳染,
所以幫我啦、Grace同亞Ling一人打左一支流感針, 我事前都無預計過返工要打針架,
本來我都唔想打架, 怕痛丫嘛~~~ 但無計啦Grace話打都係因為保障下自己o者,
佢又講我無錯o既, 所以最後都打左一支針針呀! 但Dr.Chan都打得幾好架,
有少少痛咁o者, 但之後隻手就開始好痺喇...>< 不過都總好過病病o既。
Thx!!! ^^

>>February 23, 2004 at 5:09:55 PM GMT+8

2004 年 2 月 16 日 星期一 【微冷】

今日返早呀, 由十一點返到九點, 不過尋晚就慘D喇, 訓唔著,
又好似訓得唔係咁好咁, 今朝都好唔想起身, 好似無訓過咁呀!
之後返到公司仲要勁靜囉, D野好快就做晒, 仲牛牛痘咁坐左o係度成個晏晝囉,
又悶、又開始想訓想訓...不過好在今日十三放假, 佢成個晏晝都可以陪我傾電話。


有樣野我好奇怪架, haha...^^ 事關今日Sandy要搵D combo咩item多人嗌,
做個research交比第二間舖喎, 咁Sandy淨係搵到個total數就搵唔到個item數,
咪就咁交個total數過去囉, 點知比人打回頭, 之後佢就叫我幫佢o係report preview度搵喎,
但report preview個function我又點識用丫???平時都係D經理用架之嘛,
佢比到我淨係叫我搵又唔教我點搵囉, 我都嘗試過架, 但又唔識就開始眼訓喇,
之後我諗到搵十三幫手喇, haha...十三真係隔住個電話教我搵喎,
搵到晒D數咪同Sandy講囉, 但Sandy唔單止唔好奇點解我會識用呢個function搵到個數啦,
又無懷疑過我比佢個數係o岩定錯囉, 真係勁奇怪呀!
不過就算佢問我點解識的話, 我都唔知點答佢好呀。hehe...^^


到左九點收工, 就同左十三去左食飯飯, 之後就去左睇《花好月圓》,
楊千嬅真係得架, 佢講野D語氣即使唔係句野好笑, 但都覺得佢講得好搞笑咁o既,
尤其是佢話:「係, 我係臭, 我一出世就係臭...」果一段雖然係好慘,
但我就覺得佢講得超好笑囉, 我都唔知點解, 總之我就係都幾鐘意呢一套戲啦。

>>February 17, 2004 at 5:16:50 PM GMT+8

2004 年 2 月 14 日 星期六 【陰晴不定】

今日原本十三會送埋我返屋企先返工架, 但可惜我地兩個都鬼咁懶,
鬧鐘響喇又唔理, 響完又再校過等佢再響, 再響又再校...校到無辦法再唔起身為止,
所以最終都係我自己一個人返屋企, 十三陪我搭巴士搭左三個站咁多啦。


之後成個晏晝都o係屋企同紮花影相留念, 今日亞Chim仲介紹左個好正o既HP比我寫日記仔添呀,
我仲Link埋上呢本日記度添, 事關Link呢兩個日記就可以發揮晒兩個日記o既優點丫嘛,
果本可以直接up相上去, 呢本又可以方便我用...咁幾好呀!!!yeah~~~
多謝亞Chim同小達達o既好介紹啦。^^


我今晚要返夜呀, 今晚都玩得好開心, 雖然今晚都忙, 但都好似平時咁啦,
有講有笑, 好快就到左收工喇, 要下星期先可以咁齊人o架喇,
今日亞邦問我...覺唔覺得返呢份工會悶喎???唔...咁我又唔係好覺囉,
可能對住佢地好好玩、好好笑卦, 所以咪唔覺悶囉, 尤其是而家生意好左,
D時間相對o黎講又過得快左, 所以我咪覺得問題唔大囉,
反而亞邦覺得成日送o黎送去, 所以覺得悶就真, 我都知佢地辛苦架喇,
但其實一邊做野一邊有得傾有得講都幾好丫, 出面邊有公司可以比我地先得架?!

>>February 15, 2004 at 5:39:16 PM GMT+8

2004 年 2 月 11 日 星期三 【陰晴不定】

今日第一日返診所做Part-time助護, 仲識左個同事仔亞玲、Dr. Chan仲有佢太太。
第一日返完工都"支力支力"地呀, 唔知係唔係我慣左夜訓, 所以尋日訓得唔好搞成咁丫,
定係份工會返到人好"支力"呢, 但都唔算多野做, 做o既野亦都唔算辛苦,
全部都係D瑣瑣碎碎o既野, 好容易做亦都好容易做漏。
但Dr. Chan好似好好人囉, 勁叫我慢慢做, 又話佢唔會鬧人呀, 唔識就學到識...
又講到好似好開通咁喎, 叫我有咩唔妥就同佢反映...
但唔知佢係唔係真係表面睇到o既咁nice呢??


如果做得好o既我都想留耐D, 學多D野第時搵工都易D嘛,
但我而家都唔知自己做唔做得o黎, 事關我今日一個人做自己野果陣都姐手姐腳、
有少少亂仲有DD做漏野呀, 雖然話Dr. Chan唔插我o者, 但我都唔好意思呀!!!

>>February 12, 2004 at 4:34:30 PM GMT+8

2004 年 2 月 9 日 星期一 【乍雨乍晴】

尋晚13收左工之後就o黎左我度接左我出去, 我地諗住去睇《花好月圓》架,
但可惜我地都未去到華懋, 點八果場就已經開左, 再下一場就要等到三點幾,
所以後尾決定唔去睇, 之後就陪左13去食飯飯, 食完飯飯就去左13屋企訓。


訓到今日就約左亞Chim 17:30去行一陣, 之後等埋亞魚今晚就去睇楊千fa演唱會,
Peggy話聽人講都幾好睇囉, 同場仲有ex同事仔Charles同佢女朋友仔添,
可惜成晚都無撞到佢, 不過我諗佢地都睇得開心o既, 預祝情人節丫嘛。^^


今晚成個show都好好睇呀, 雖然亞媽話千fa比人彈佢D衫著得佢好擁腫,
但我又唔覺得囉, 反而仲覺得佢D衫衫好靚添, 尤其是唱小星星果件勁閃衫、
同埋紫色珠片柔道衫、仲有果套有少少劍道feel o既衫啦我都覺得幾靚喎。
不過千fa今晚其實都慘慘地架, 佢唔舒服到把聲勁擦, 仲要捱晒全場喎,
佢講野又鬼咁搞笑, 加上今晚又有劉德華、陳冠希仲有亞姐做guest,
所以今晚真係睇得好開心、好精彩呀! 都係多得亞Chim幫我地去買飛咋! ^^

>>February 10, 2004 at 6:02:35 PM GMT+8