Showhappy.net - Members diary

日記

日記主簡介

<< 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 >>

2003 年 9 月 4 日星期四【晴】

哈哈，我昨天俾人讚足全日呀，食飯一開始老板就話要奬勵一下ｄ同事，因為我地ｄ同事個個平時都著得好隨便架，但昨天好多都有大轉變衣著方面，老板最後都獎左六個人，仲話我著得好靚呢，可能平時我真係著得太隨便啦，我都有二百蚊服裝獎呀，呵呵，但係遊戲個度就輸左呢，我同事ｗｉｎ左第二名有一千蚊，第一名有二千蚊架，當然我係冇份啦，我都幾開心架，昨天飲紅酒，有兩個同事飲左唔係好耐就猫左啦，嘔得都幾厲害呢，有個到完場都未醒呀，我呢慢慢咁飲，都飲左幾杯啦，但佢地就話我勁，飲極都唔醉喎，但其實我都唔覺多，都尾聲都唔覺有醉意囉．．．好開心呢

>>September 5, 2003 at 5:25:24 AM GMT+8

2003 年 9 月 3 日星期三【晴】

都有好多日冇寫到日記了，今日公司會出去食晚飯呀，而且今日有客黎公司，所以我地全公司個個都著得好鬼靚呀，我呢算係執得都幾好既人啦，返黎個個都讚我靚，連老板都讚靚呢，可能自己平時比較著得隨便啦，所以今日咪更明顯囉．．呵呵呵．．太好呢，不過我好大洗呀，都唔知買左乜野，唔洗兩日就用左差唔多三千蚊啦．．．不過錢本來就係用黎洗，但都希望可以捱到月尾啦．

>>September 4, 2003 at 5:12:47 AM GMT+8

2003 年 8 月 31 日星期日【晴】

如果係平常，而家應該食緊野啦，但因為今日有客黎，所以到而家都仲未食呀，我黎緊呢個禮拜都會日日遲收工架，所以都冇咩機會出去玩同行街既，真係好可憐呢，都唔知點解會咁慘呀，今日開始會坐返出黎，入面好好多呢，至少冇咁多人入去呀，我都想坐入去，但好清楚冇咩可能囉，買左一Ｄ野，但係仲未找數呀，自己本身就大洗架啦，都唔知人工幾時加呀，半年之內一定要去到七千幾，唔係好難掛，心頭都唔算高呀，我人工已經夠少架啦，好慘呢，份工我開始覺得悶啦，但明明已經比以前既工好好多了，我而家坐緊呢個位幾凍架，Ｄ同事都叫我帶衫著呢，我諗我聽日會帶下衫著掛，費時冷親喎，係咪呢．．．公司入面有個同事俾我既感覺係有Ｄ似我以前既男友架，都係對眼大啦，感覺都有Ｄ似呢，所以都幾鐘意望住佢架，不過佢女友架，我地公司男同事個個都好好仔架，同佢地既女友至少拍左三年呢，有Ｄ仲拍左六七年添呀，仲就快結婚個隻呀，但Ｄ男同事個個都唔超過廿五架，當然有Ｄ例外啦，呵呵呵．．．

>>September 1, 2003 at 6:03:23 AM GMT+8

2003 年 8 月 29 日星期五【晴】

同事個個都幾好呀，我前日已經出左糧啦，好鬼開心呢，都冇扣到請假個日既錢呢，我打算買好多護膚品呢，我最鐘意買就係呢ｄ野呢．．．到時先算啦．．．而家好鬼悶．．．打住咁多啦．．．

>>August 30, 2003 at 1:09:23 AM GMT+8

2003 年 8 月 27 日星期三【晴】

我今日約左ｃａｒｏｌ食飯呀，同埋美嫻佢地啦，電話費又吹我交錢啦，唔想交都唔得呢，好黑我憎呀，打算今晚會去沙田吧，然後順便再去交呢，ｃａｒｏｌ快快要走，講真都有ｄ唔捨得架，雖然話就話好快返黎，但係遲終都係唔可以成日見面嘛，雖然我地都唔係成日見面個隻，但想約佢時都約唔到，去左加拿大咁遠呀～～

>>August 28, 2003 at 5:39:12 AM GMT+8

2003 年 8 月 26 日星期二【晴】

今日都好悶呀，日日都好似好悶咁既，返工學野，而家就儲錢買野囉，生活既目標究竟係乜野呢，為物質，定係享受生活呢，為物質既個個年青人都會吧，享受生活情趣，我都差唔多唔記得左以前既男友了，有時候會發覺自己係個好唔值得被人喜歡既衰人，把口永遠都說得動人呢，但個心就．．．同事一早已經話我個性唔識講大話，但就古惑囉，奸奸地咁，係同事聰明定係我太唔做作呢，其實我當然係保持自我既性格啦，個性真係幾難改架，冇謂為左一個人而將自己咁辛苦呢，不過我都諗住將自己既個性變得更好架啦，做唔做到就未知住，希望下一個男友會對我更加好啦，但其實自己某程度比以前更貪玩，反正我要執著既野都冇左，咁乜野都唔緊要了，我既價值觀係改變左，但好唔好我就唔知啦，但肯定既係我比以前更隨便，同冇以前咁認真囉，我唔覺得唔好，相反仲認為好理所當然添呀～～呵呵

>>August 27, 2003 at 6:03:33 AM GMT+8

2003 年 8 月 25 日星期一【陰】

公司冇咩特別呀，所以都唔想打太多野呀，近排會少Ｄ野做，九月應該多返好多野做，會遲放工囉．．

>>August 26, 2003 at 5:53:39 AM GMT+8

2003 年 8 月 21 日星期四【晴】

ＣＡＴＨＹ我收到你既信同禮物了，真係謝謝呀，近排係公司將會調位呀．我會調出去同我個ＴＥＡＭ既人一齊坐啦，都幾好呢，唔洗成日行出行入呀，都會方便好多吧，如果我隨便找一個男仔拍下拖自己就會忘記到之前既男友的話，咁就代表之前既男友係心目中跟本唔重要，可惜又唔係喎，佢對而家既我仍然有影响力，但我覺得自己係佢心目中一點兒都唔重要，即使係拍緊拖，我係佢心入面都唔太重要，分了手我諗佢會更加開心吧，仲係分了手先會知道對方係自己心入面既位置，我清楚亦都了解，我唔會再諗同佢復合，之前仲抱有一絲既希望，但而家完全幻滅了，一個唔愛我既人離開我係唔值得我再為佢留戀，你話我打橫黎講又好，唔係又好，仲之對感情我就真係冇咩經驗，亦都唔識處理，我最上心既人都唔要我，我咁上心又做咩喎，好冇聊吧．．

>>August 22, 2003 at 5:31:55 AM GMT+8

2003 年 8 月 19 日星期二【晴】

我昨天還真係傻呀，我要比以前更堅強，更勇敢，我絕對相信自己可以完全忘記佢，但我唔會因為掛住佢而隨便找個男仔，還是等一個更可以包容我既男仔吧，或者孤單一個也不錯，至少絕對唔會再受傷吧，我本來就好懂得自己一個了，親密既朋友我都有，係冇戀人姐，不是一件很嚴重既事姐．．．我自己唔識更加疼自己咩，又唔係冇人疼我，我至唔恨你疼我呢，我要完全將你忘記，一定做到既．．．．．

>>August 20, 2003 at 5:18:24 AM GMT+8

2003 年 8 月 18 日星期一【晴】

個心唔知點解突然好痛好痛咁既，忍左咁耐，壓抑左咁耐，可以繼續忍落去嗎？時間真係可以治癒傷口嗎？我還要再扮無事落去嗎？遲鈍既我，其實我係遲鈍定係跟本有心或冇意之間將自己真正既感受忽略呢，我真係好想有人可以分享我既感受呀，冇論我係點愚笨都好，那個人都唔會離開我，永遠體貼我，關心我得嗎？即使我再冷淡，個心還是熱呢，但點解還是沒有人明白我呢，算吧，反正自己本來一早都死左了，以前就想著自己不到三十歲就死了，個心死左姐，但我還是照常返工食野，照常生活吧，世界上沒有話冇左邊個會死，本來就已經唔熱情，而家個人仲係冰冷，我究竟幾時先會真正開心呢，點解我唔可以開開心心咁過日子，等時間一過應該會好返吧，縱使唔可以完全好返，但日子還是要過吧，討厭消極的我，放心吧，都是一陣子吧，好快就會好返黎呢，沒事的．．．．而家放工走人啦．．．．

>>August 19, 2003 at 1:27:03 PM GMT+8