2005 年 1 月 3 日 星期一 【晴】

今晚好開心呀，同六樓既朋友仔去左唱K。
真係好好玩，有我，Celina，Anthea，Stella，Gloria同埋六樓tutor Raymond。

車路士真係勁，又羸米杜士堡二比零。
曼狗主場羸唔到都不特止，本應輸埋，不過旁証幫左佢地，明明入左又話唔入。


段片睇幾萬次都好明顯睇到個波入左啦，有無搞錯呀。
唯一可以做既就係造右邊果張黎串下佢。

>>January 6, 2005 at 2:50:48 AM GMT+8

2005 年 1 月 2 日 星期日 【晴】

食完鐵板超午餐之後，去左太子娛樂城。
今日終於完成左一個心願，就係打爆Virtual Striker 4。
用我既愛隊意大利，外圍賽對捷克，由下半場入替既F.恩沙基門
前執雞，贏一比零晉級international cup。十六強對摩洛哥，高成皮波，半場已經憑韋
利同托迪既腳踢頭頂，贏梗兩粒，下半場就集中練技術，無進帳下嬴二比零。八強對
愛爾蘭，對面好爛打，成場都好難踢。就係下半場，托迪想係左邊底線出波，點知唔
知點解個波竟然斬番去左閘位，我本來即刻鬧鬼架啦，點知左閘森保達一控個波，就
一腳係中場抽埋去，今次到我呆若木雞，入左先知。個波好靚，好似滑翔衝力射球咁高波
笠死掛網。就係憑呢球晉級，呢球亦都係我第一球係Virtual Striker 4既中場射門入球，佢
亦都做埋Today's Best Goal。四強對我另一愛隊阿根廷。其實我一直都諗係用阿根廷先
可以爆機，估唔到會對番阿根廷。兩大強隊決鬥都係五五波。都係憑下半場臨完場辛尼
迪既頭槌，一球僅勝。決賽對我既其中最大仇家法國，因為VS4我次次都好似輸俾佢。全
場都好均勢，係我係GOLDEN GOAL時刻有幾下威脅波都唔入。最尾射十二碼，我預左輸，
準備拎錢再挑法國。不過，最尾贏五比三，第一次爆機，以不失一球之下捧杯。
原來VS4贏冠軍之後，無Sega隊既特別比賽。最尾睇埋爆機畫面就走。

>>January 3, 2005 at 2:38:57 PM GMT+8

2005 年 1 月 1 日 星期六 【晴】

明報體育係今日報紙寫既2005年球壇狂想通勝:
老郝投英冠火速開齋
---於一月底的一場聯賽以一球十二碼射入在英首個入球，協助球會升上英冠榜首。
舒利亞掌紐卡素帥印
---紐卡素怒炒桑拿士，由舒利亞接任。而西布朗則邀得雲拿保斯協助白賴仁笠臣。
再有球星戰死沙場(大吉利是，千祈唔好)
---在英超再有一位著名非洲球星因心臟病發，在場上猝死(即係簡奴啦)。
阿爾克馬爾稱霸荷甲
---不過財力有限既佢地主場只能容納九千觀眾，未能符合參加歐冠盃最低要求。
帕爾馬多蒙特執包袱
---宣布護級失敗，正式降班。
摩連奴太囂張遭圍毆
---車路士勇奪英超，歐聯同聯賽盃冠軍。囂張的摩連奴變本加厲，結果遭敵對球迷毆打。
奇連士文捧盃即掛冠
---德國在其他球隊半力下，贏得聯盟盃 ，豈料教練捧盃後呈辭。
萬人迷返英加盟熱刺
---碧咸轉投熱刺的是希望跟其在熱刺受訓的兒子效力同一家球會。
羅賓奴細哨組成新2R
---大哨朗拿度被國家隊棄用，新比利羅賓奴與細哨組巴西新2R。
費爵爺黯然告別紅魔
---新球季展開了兩個月，曼聯未見起色，費格遜以健康理由呈辭。
烏克蘭首度進軍世盃
---舒夫真高率領下，烏克蘭歷史性出線，同組希臘和土耳其雙雙出局。
朗拿甸奴劈炮投車仔
---巴塞新一季戰績欠佳，細哨與教練鬧翻，以破世界紀錄轉會費加盟車路士。
真係吹水唔沬咀，無果句講果句。我話最多得一兩單會堅，各位年尾
記住返黎呢度睇睇。

>>January 2, 2005 at 6:02:37 PM GMT+8

2004 年 12 月 31 日 星期五 【晴】

今晚我既愛隊車路士對利物浦，係馬會買左「星期六 2 利物浦 (主) 對 車路士 (客)」，
賽果係車路士羸一比零。主客和 客 @ 2.1 買左30蚊，收番63蚊，波膽 0:1 @ 8.00
1:2 @ 7.00 每注10蚊，投注左20蚊，收番80蚊。總支出50，收番143，勁開心。
真係好啦，2005年第一個賽日就有錢羸，加埋之後半場投注紐卡素羸既五毫子，
成晚淨嬴左九十三個半，零五年第一個賽日就有個好開始。

叱吒樂壇流行榜頒獎典禮係今晚舉行，我好深刻既得獎心聲:
黃偉文第一次奪得填詞人大獎，有感而發咁講 ﹕「如果有得揀，我寧願唔拎獎，而有人
會替我唔抵，好過拎左獎有人覺得我唔值得拎。」
另外，林海峰宣布許志安奪男歌手銀獎時，亦形容佢背脊花晒，而安仔上台時含淚講﹕
「好多謝商台，咁多年都眷顧我，亦都令我有好大感觸，我今年有贏有輸，贏既係信念，
輸既係是非，但我深信音樂一定可以戰勝所有是非，thank you。」但台下反應冷淡，不過
葉德嫻依然有出現同佢合唱，擺明姿態繼續撐佢。安仔，加油，我都撐你。

>>January 6, 2005 at 2:55:33 AM GMT+8

2004 年 12 月 30 日 星期四 【晴】

好開心，今日去一休終於唔駛再做平民啦。
多謝英姐，真係英姐一出，面定要俾。

>>January 3, 2005 at 4:55:01 PM GMT+8

2004 年 12 月 29 日 星期三 【晴】

原來GTA系列既GAME係有秘技之下係咁好玩既，拎住支電鋸同重型炮周街打人，
放完炸彈又走人再睇戲，同埋減通緝星星，全部都好好玩。
唔怪得之你細佬咁暴力啦，成日玩d咁血腥既game。

>>January 3, 2005 at 4:56:38 PM GMT+8

2004 年 12 月 28 日 星期二 【晴】

今日好快咁係短短五分鐘之內番入房做左幾樣野而走人，包括換西裝同拾左幾
日既衫。再係呢幾分鐘度幫電話差番些少電，都差左半條bar。

>>January 3, 2005 at 4:57:51 PM GMT+8

2004 年 12 月 27 日 星期一 【晴】

媽媽問我有無食過係船度拎番黎既格仔餅，我話無。因為三塊都無駛，斷估都係俾
hello食晒。

>>December 28, 2004 at 8:31:08 AM GMT+8

2004 年 12 月 26 日 星期日 【晴】

正當全球歡度聖誕迎接新年之際，亞洲國家突遭世紀天災浩劫。印尼蘇門答臘昨早
發生八點九級大地震，威力相當於三千枚原子彈爆炸，地震再觸發大海嘯，
高達十米巨浪向四周輻射，衝擊東南亞多國沿岸，遠及馬爾代夫也不能倖免，數以千萬計人
們對大難臨頭毫無防備，瞬間慘遭衝天巨浪捲走或溺斃於淊淊洪水。至少八個國家受害，其
中以斯里蘭卡、印度災情最重，死傷枕藉。暫時至少超過一萬人死亡，大批人受傷，無家可
歸人們不計其數。

同左六醫班既同學去左打邊爐re-union。

>>December 28, 2004 at 9:01:46 AM GMT+8

2004 年 12 月 25 日 星期六 【晴】

上左雙魚星號玩，不過休息睇有線多過玩。

印尼蘇門答臘北部發生8.9級強烈地震，大量房屋倒塌。地震於當地時間今早7時59分
(香港時間8時59分)發生，震央位於北蘇門答臘西海岸對開的40公里海底，本港天文台
更錄到8.5級強度，遠至新加坡、泰國和馬來西亞也感到震動。
引發的海嘯橫掃斯里蘭卡、印度、印尼與泰國的海岸地區，估計已造成11,300人喪生。
我地一路係房睇梗有線新聞，一路好擔心。

>>December 28, 2004 at 8:51:27 AM GMT+8