2003 年 4 月 12 日 星期六 【晴】

今日係最後衝刺喇
聽日要返學
所以今日一定要做埋個present........
苦！
其實要做的事唔係好難
但總係力不從心
提唔起勁去做
成日想做其他野：
睇書、打機、訓覺 (雖然我已經訓到頭痛！)
唉！真係命苦！
都唔知要做到幾點！
---------------------------------------
尋晚訓得唔好
發左好多個夢，夢見好多人
阿娃啦、阿歡啦、IVY啦、媽咪啦、阿姨啦、表弟啦，
連隔離系的人都見到呀！
成晚都冇覺好訓！
一起身就周身骨痛，又頭痛
都係命賤架喇，一訓得太多就會唔舒服
仲慘過冇得訓！
----------------------------------------
死啦，聽日返學喇仲要返830
唔知醒喇一定！
---------------------------
你話讀中學幾好呢
一班人 (其實只得幾個) 好開心
乜都唔駛諗
唔會好似而家咁咁大壓力！
讀中學時，中一至中三都唔係幾開心架
又唔知自己做緊乜喎
到左中四就唔同喇
學校管得少左，自由度都大左
當然唔少得有一個可愛的同學成日帶俾我地歡樂啦
好多記憶都係佢帶俾我地架！
加上有我同阿娃，乜都笑餐死，日日都笑到肚痛！
哈哈，諗返起都好好笑！
中五都開心，識多左班朋友仔
一齊打牌、去camp、唱K、食飯、去海洋公園、BBQ
不過，會考考得唔好，所以要重讀
同呢班朋友都少左出唻
講起重讀o個年，
除左Miss Pang的特別教學方法之外，真係冇咩記憶
因為我只係想好好考多次會考，升上中六
所以都冇乜同佢地一齊玩
O個年都真係幾悶架
好彩有阿娃同阿莊陪咋，都冇咁悶
估唔到到左後期識左阿聲同patho
我地幾個成日一齊坐，一齊玩
一齊食飯，一齊去街街
佢地兩個成日都傻傻地
攪到我同阿娃不停咁笑
佢地見到我地兩個乜都笑餐飽又覺得我地攪笑
就係咁我地四個一齊真係好鬼開心架！
好彩識左佢兩個，我的重讀生涯先有d色彩咋！
讀得咁辛苦，當然升到啦
升到上中六，又係另一個新天地
一班新的同學仔
一齊玩，好開心
STEVE啦、PIERRE啦、阿捷啦、阿伯啦、WATSON啦、方沖啦、MIMER啦
當然唔少得同我同生共死的阿娃啦
後來仲有阿Lui同阿包tim
可惜有d已經好少聯絡Lu
到左中七，我地成日留o係學校溫書
我啦、阿娃啦、Pierre啦、Steve啦
一齊同班理科同學仔一齊溫書
就係咁就識左阿crab、阿豹、SQUARE
當然仲有你啦！
仲記得我、阿娃、阿歡同阿CRAB成日一齊計
一到8點就會四個一齊失蹤
匿埋傾計！好鬼開心
不過我諗而家都冇咩機會會有呢個陣容lu
不過諗返起，都係開心既！
---------------------------------------
一口氣就寫左咁多tim
都係時候繼續做present喇！
苦！

PS.生日快樂呀，史提貓！


>>April 13, 2003 at 12:19:02 PM GMT+8

2003 年 4 月 11 日 星期五 【晴】

今日仍然沉醉o係尋日的開心中！
哈哈
睇返尋晚d相，好鬼攪笑
好鬼低B！
-----------------------
今日有去補習
除左柏莉之外，其餘兩個都好鬼曳
唉！
----------
死啦，後日返學喇
好多野做
但仍然唔想做！！！
點算？
一返學實死架喇！

>>April 12, 2003 at 3:55:20 PM GMT+8

2003 年 4 月 10 日 星期四 【陰】

今日約左一班好耐冇見朋友仔食飯
實不相瞞，其實開頭唔係咁想去
因為怕耐冇見會冇野講﹗
但後來都係去左！

本來約左7點半，後來因為阿娃要遲d到
所以約左7點9
一去到見到pakho同阿聲傻下傻下咁坐o係度
之後我問佢去邊度食，pakho話去椰林閣
我問係咪食泰國野
佢話係上海野 (個名咁奇怪！？)
原來我地係去紅洋蔥食上海野
低b，咁都好玩！
一路食又一路講笑，好開心！
當然最精彩係講人地是非啦！
唔駛講！大家心照啦！
見到阿娃又可以一齊講「o個隻野」是非，真係痛快！
食完飯之後我地去左海濱傾計吹下水
吹左幾個鐘，又影下d低b相，又講下鬼故
由於有人驚所以終止左
阿pakho成個遊客咁：T恤、短褲、背囊，仲要掛住部相機
好攪笑
阿娃問佢做咩揹咁大個袋，佢話因為有個腳架
要唻影相，所以專登揹個背囊
到影相時佢話拎個腳架出唻
點知個腳架只有手掌咁大
駛唔駛咁大個背囊唻裝佢呀，大佬！
阿聲又要俾人迫扮樹，好慘！
講返以前一齊讀書d野，好好笑
「Terry~~~~~~~~~~」哈哈
雖然係無無聊聊
但好耐都未試過咁開心！

好彩我尋日有去咋
下次一定同佢地一齊去唱k
一定會好開心！

>>April 12, 2003 at 8:16:32 AM GMT+8

2003 年 4 月 9 日 星期三 【陰】

今日出左去同阿婆打邊爐
正！
澄澄冇出去
所以以今日有d悶！
如果佢o係度一定好好笑！！

>>April 12, 2003 at 4:05:06 PM GMT+8

2003 年 4 月 8 日 星期二 【雨】

今日媽咪休息，好開心！
因為今日要去殯儀館
所以早左補習！
今日個妹妹好乖
梗係啦，我俾佢做佢最鍾意既中文
唔駛做數學
所以佢好乖咁做左兩個鐘，無嘈過！
--------------------------------------------------
去殯儀館之前
我去左旺角行街
好耐冇去過喇
所以好開心！
人海茫茫，竟然俾我撞到阿KEN
真係o岩！
今日買左幾本書，
足夠我開心左成晚喇！
-------------------------------
頭先食飯
o係門口已經見到一個女仔蹲o係地下係咁喊
係咁大叫話唔想分手
入到去先知原來佢o坐係我地後面
唔知佢係飲大左定係食左葯
又喊又笑
去左成10次toilet洗面
每次洗完出唻仲喊得勁過未入去之前
一陣之後又笑到收唔到聲
又搶佢d friends既酒唻飲
跟住又係咁喊，失晒控
佢男朋友叫佢返屋企
佢又係咁喊
然後又爆杯
個男朋友嚇到搬左去第二度坐！勁好笑
喊足成個鐘，勁煩！
如果俾我係佢男朋友
個女友咁羞家
o係d friends面前係咁喊
一定早飛早著！
失戀都唔駛喊到成間酒樓都知掛！
做戲咩？
不過，成間酒樓d人真係當戲咁睇架
我地當然唔例外啦！

>>April 10, 2003 at 4:22:24 AM GMT+8

2003 年 4 月 8 日 星期二 【雨】

習慣失戀 容祖兒

作曲：舒文
填詞：林夕
編曲：舒文
監製：舒文

不拖手　或者都可堪稱熱戀
一拖手　比咳嗽更短
太快了　我未快樂過已失戀

想不起　被愛是如何溫暖
想不通　未夠資格使你心軟
但也知道心會這麼酸

＊理所當然我的錯　令你忽然離開
　半路留下我（也是我錯麼）
　為何這麼快看清楚　落得這結果＊

＃知我是個　無法討好的人
　相戀一刻　只是我的僥倖
　然而回頭　誠實去自問
　我可討厭到　如此乞你憎

　知我連眼淚　也絕不感人
　只知怎麼考驗　你的操行
　從前為何　纏在你附近＃

你不寂寞　便嫌我笨
難道我未夠好　未懂得熱吻
足夠令你憐憫　勾不起你的興奮

不擔心　自尊心這麼受損
只擔心　我將我看穿
我怕我　以後太習慣了失戀
Repeat（＊）＃

更加速發覺　原本都不相襯
我未夠吸引　你未夠狠
Repeat＃

到底這個故事　有沒有發生
何必受罪　心即使碎一碎
我仍能　繼續追
願那一刻共聚　懂得怎去相愛
愛人難　我肯學　定能愛下去
-------------------------------------------
這就是我的初戀故事！
短短的5個月零18日
但足以令我一世難忘！
雖然很怒力維繫這段關係
雖然最終不知出了甚麼錯
分手收場
但仍懷念那份感覺
痛、笑、甜、癡、悲、怒、樂
仍然懷念！

>>April 9, 2003 at 6:15:48 PM GMT+8

2003 年 4 月 7 日 星期一 【雨】

頭先睇到新聞
張國榮先生今日出殯
好多歌迷見到佢架靈車都好激動咁同佢揮手
o個一刻真係想喊！
-----------------------------
其實自從張國榮死後
我都有d情緒
覺得身邊的人係會突然間走左
唔知咩事
到時大家先覺得原來佢生前可以再同佢傾多d計
可以關心佢多d
咁個悲劇就可能唔會發生
到時大家先後悔
但都冇用啦
人都死左啦
所以我好怕身邊的人離開
包括身邊每一個朋友
我朋友個麻麻又走左
雖然我唔識佢麻麻
但都令我諗起我公公走時的情景
好唔開心！
所以呢排特別掛住身邊的人
包括家人、好耐冇見的同學仔、朋友仔
當然仲有一直在我身邊的人！
佢地曾經在我生命中出現過
我都在佢地的生命出現過
我地大家都在各自的生命的唔同時間遇到對方
佢地每一個都陪我行過一段路
開心又好唔開心又好
都係陪過我
應該好好珍惜呢d記憶

>>April 8, 2003 at 11:34:35 AM GMT+8

2003 年 4 月 7 日 星期一 【雨】

o岩o岩睇到一個好正的網頁
幾米的繪本小說《向左走向右走》將會拍成電影
由杜琪峰、韋家輝聯合執導
金城武、梁詠琪主演
今個夏天會上影架喇！
睇佢個片頭，好多場景都同書中差唔多
例如有人群中的兩把雨傘、
又有地鐵站一幕
同書中所畫的好似！
好鍾意呢個故事，
每日有好多人o係你身邊出現
有幾多我地會真心留意過
又有幾多只係擦身而過呢？
所以我一定會睇呢套戲
唔知佢拍唔拍得出幾米的味道呢？
拭目以待！

>>April 7, 2003 at 5:51:28 PM GMT+8

2003 年 4 月 6 日 星期日 【雨】

離晒譜！
咩人唻架？
--------------------------------------
話說我頭先去超級市場買野
買完之後就去排隊啦
唔知隔離o個條隊做乜，好耐都唔郁
正o係我八卦緊既時候
隔離條隊個肥婆突然間「涉」o係我前面
我就話：「有冇攪錯！」
佢望一望我，然後又當冇事咁扮聽唔到
我咪「啤」住佢囉
點知佢俾完錢之後又企o係度「啤」住我
塞Q住晒！
又唔知自己肥喎！阻Q住晒
咁我梗係「啤」行佢啦！
直到我俾完錢佢依然企o係度「啤」住我
咁我就好有禮貌咁同佢講：「唔該借借！」
佢先好唔願意咁行開！

好衰唔衰，佢竟然同我住埋同一座同一部lift
佢見到我入lift都好突然
我一見佢就「啤」行佢
呢個時候佢又扮見唔到我喎
頭先o既威勢唔知去晒邊！
離晒譜架，自己打尖仲咁Q惡！
死肥婆！
拎住支光管扭下扭下咁！！！　


>>April 7, 2003 at 12:29:41 PM GMT+8

2003 年 4 月 5 日 星期六 【雨】

今日download左好多Aaron的歌呀
好開心！

頭先金像獎見到佢
好鬼靚仔
好鬼鬼馬！

無間道拎左好多獎
三更之回家都唔差
咁佢地又真係做得幾好
尤其係原麗淇！
黃秋生唔駛講啦
抵佢地拎啦
--------------------
有一個好朋友唔開心呀
希望佢真係快d解決個問題啦！
我當佢係妹咁
都唔想見到佢唔開心！！
記住：做人有時個心要硬d！

>>April 6, 2003 at 6:34:48 PM GMT+8