2008 年 2 月 23 日 星期六 【晴】

今日我想同大家講下故仔，一個升讀中四揀科選班的故仔。

中三的時候，好多同學仔都會以理科班為首選。「揀理科班，第二時出路好d架~」、「第二時搵工都易d，條路又會易行d」……
不過一諗起成日計數，我即刻耍手擰頭，見到都驚，所以當時我第一個諗法就係：揀文科 (題外話：雖然我會考Maths係拿「A」)
當時爸爸媽媽有D唔高興，不過既然個女係咁揀，咁都要尊重佢。
雖然我決定左係揀文班，但係我都繼續有野煩，就係揀邊班。

當時中四的文科班有3班，每班的科目組合係FIX死左
OPTION 1：GEOG、ECON、世史、中國文學、HUMAN BIO
OPTION 2：中史、ECON、世史、中國文學、HUMAN BIO
OPTION 3：中史、世史、中國文學

排得1、2、3，就已經知道當時世俗眼光點樣睇呢3班，OPTION 1成為多名成績優異的學生的集中地，又名「精英班」。當時的我都算係級別中頂尖的學生，揀OPTION 1應該係話理所當然，奈何我真係好鍾意讀中史，但係我父母認為「讀史」係無用，讀GEOG加埋ECON，第二時可以夾埋D知識搵到錢(雖然現在的我唔認同呢句說話，但當時天真的我，又的確係單純咁認為，呢兩科夾埋一齊讀，係可以搵到錢)，所以讀文科揀邊班，又再一次成為「情感」同「理智」之間的兩難。

在父母期望的壓力下，我揀左OPTION 1，但係，當日……我喊左出黎 (無錯，我的確係好眼淺)。呢件事俾我父母知道左，佢地開始明白我的意願，就同我講「你鍾意點揀就點揀啦，最緊要係你鍾意，其實讀咩科都係無所謂架0者，讀中史都好既……(然後下刪1000字ELABORATE讀中史有乜好著)」，佢地都由得我繼續「任性」，我真係要多謝佢地對我的包容。

之後我就入讀OPTION 2的班別，那兩年我都讀得好開心，會考成績都好好，ESPECIALLY那科中史，我係拿A架；到左升中六，又揀返中史，結果高考出黎的RESULT都係有個B架。(講到呢度，我唔係想炫耀自己讀書成績有幾勁，我同時認為即使我拿咁高分都好，我只不過係高分低能，不過的確我靠住呢一兩個A，我報讀大學係易D。)

高考完畢，又係要揀，就係揀讀咩大學同埋咩科目。對於第1個問題，我已經二話不說咁揀左讀中大，理由好簡單，因為我由細都大都係住0係中大，情意結，無得解；然後揀科目，我就好隨心因為一個理由而揀左讀政治–因為我想了解呢個社會多D，不過其實背後的潛台詞係–我想人地話俾我知呢個世界到底係點。後尾我發現原來答案唔係人地俾，係要自己去搵，而搵的過程，係需要去作出選擇。但係當我知道呢個答案既時候，已經讀完大學。

讀完大學要去搵工，當時心諗：不如我去做一D成日搞活動令人地開心的工作，所以第1個諗法係不如做PR；但係做PR之前，都要有MEDIA的經驗，而我亦幸運地，畢業後第1次INTERVIEW即有OFFER–就係某大報章的地產版做記者。工作一年，開始覺得地產版記者的工作變得悶AND無意義，同埋真係想試下PR工作，咁岩現職公司有個機會，我就走左去做地產代理行的PR。

…………

寫到呢度，已經偏離個題目萬丈遠。不過，其實人生的路就係咁，你今日的抉擇，同你日後既發展可以係無關係，又或者係人生中出現好多唔同的機會AND機遇，扭曲左你當初選擇的原意，變出另一條新道路。

當日中三的我因為「鍾意」，而揀左讀中史；跟住又因為「鍾意」，所以揀左讀政治冷門野；其後又因「鍾意」，所以走左去做PR。今日的我，到底可唔可以再一次因為「鍾意」而作出選擇呢？

記得初讀大學的時候，我因為聽左人地講，『揀「聯X書院」啦，「聯X書院」好呀，有學生會、獎學金又多、D人又無咁GAG，同埋你D中學同學好多都揀左「聯X書院」啦，到時咪有個伴囉』，所以我揀左「聯X書院」。之後讀大學那3年，我好後悔不斷問自己：『點解當初無揀著重人文精神的「新X書院」？點解當初無揀到有我爸爸在那裡工作的「新X書院」？點解當初我無揀到一個我由細細個開始，會在那裡踩ROLLER、在宿舍裡面同爸爸打羽毛球、彈鋼琴……一個我對佢充滿深厚感情AND童年回憶的「新X書院」？』

如果「鍾意與否」呢個簡單二元關係，是一個(亦係惟一一個)為未來作出「好的選擇」的決定性因素的話，事情便容易搞定。

>>February 24, 2008 at 9:10:33 AM GMT+8

2008 年 2 月 18 日 星期一 【晴】

既來之則安之
餘下的就聽天由命了

>>February 19, 2008 at 3:00:11 PM GMT+8

2008 年 2 月 12 日 星期二 【晴】

兩頭唔到岸
正好形容現時處境
Are you ready yet??

>>February 13, 2008 at 2:25:25 AM GMT+8

2008 年 1 月 30 日 星期三 【晴】

award presentation + annual dinner 順利完成，終於都可以休息一下
上周一連七天工作，每天早上九點三返工，晚上十一點放工，做到人都癲
雖然超級辛苦，加上在普天同慶的生日周竟然要晚晚開OT，真係頂唔順，每晚都要想死的感覺
原本以為自己好捱得，但係真如某人所料，我的心房係最弱，呢個亦係我始料不及既事
到了最後關頭，我竟然可以容許自己逃避……真係想一把車自己埋牆
好彩有班好同事的支持同補位，成件事先可以順利完成
王寶寶，真係要大個LA....

ANYWAY...今次係一個寶貴的經驗，學到好多野，亦令我認識自己同埋d同事多左，希望下年的annual dinner，我會做得更好！

記住，係每次都要做到最好！唔可以輸俾自己a!!!!!!!!!!!!!

>>January 30, 2008 at 4:11:40 PM GMT+8

2008 年 1 月 30 日 星期三 【晴】

Midland Annual Dinner 28 Jan 2008

三區公關：Doris, Bobo and Yoki

 
Kin, Bobo, TC Chan and Man

Helen, Fung, Man, Rick, TC Chan, Bobo, Kin and Elaine

HK District Sales Managers, my lovely buddy

My Master: Iris and Victor

With media

2008 年 1 月 24 日 星期四 【晴】

Midland 生日會

多謝elaine悉心籌辦，由於呢排狂咁籌辦下周一的ANNUAL DINNER，大家每日都無啖好食，今餐係呢個星期以來，最豐富、食得最安落既一餐。

生日返工係唔多開心架la... 不過今年的生日過得特別有意義，因為慶幸我0係呢間公司返工，做到我想做的PR工作，識到呢一班好同事，0係呢班人身上學到好多0野，0係呢份工上拿到好多經驗……我覺得自己已經賺0左，辛苦，都算值得。多謝同事的體諒同埋支持，我知道自己未盡全力做到最好，但我會繼續撐落去。

講返個生日…有兩個gag位by Eliza
1. 當大家埋頭苦幹的時候，Eliza突然大聲地說："位位一百才唔該"，仲要repeat兩次，方死大家聽唔到咁……原來elaine send email俾大家收錢搞生日party，本來神秘的生日會/錢財瓜葛就咁被我揭穿左
當然，醒目的我更係即時大家地回應："咁我使唔使俾a? 我無錢wo"

2. 叫外賣返黎慶祝，Eliza明明同reception交帶落"外賣到左，打電話俾我"，點知reception直接打電話俾我，用賴神秘的語氣同我講："d野到左la，快d出黎拿"。Eliza知道我接左個電話，即刻彈起身咁"呀"左一聲，並隨尾趕上，可惜我依然係快人一步，率先前往reception搬d外賣入去，同大家一齊搞個生日party架.. =.=

2008 年 1 月 21 日 星期一 【晴】

正式踏入生日周……完全感受不到那份喜悅
下周一(1月28日)為本公司之annual dinner
龐大的工作量壓得我透不過氣來
之前我不懂set control point令事情充滿變數
每晚睡得不好，腸胃又差
壓力瘡有如山洪爆發，蜂擁而至
現在成了爛面Bo
面部正式宣佈率先淪陷

不過，大概只是我意志力不夠而已
放心，我會撐落去！
當是一個寶貴的經驗吧

朋友，要約我同我慶祝，after1月28日吧！
請呀~~

>>January 22, 2008 at 3:50:13 AM GMT+8

2008 年 1 月 12 日 星期六 【晴】

B and Bo's bday celebration

yoyoyo~YOyO!
B's bday on 9 Jan and Bo's bday on 25 Jan
為貪方便，兩人生日夾埋一齊搞=.=
感謝呢班朋友既支持
地點：尖沙咀重慶大廈新德里
taste good!!!!!!! 值得支持!!!!

兩位生日(????)主人翁(左起)：B、Bobo

一班好朋友

美味的烤餅(我至愛)

美味的燒雞

美味的咖哩(左起)：羊、雞

美味的雜菜

食到我lam lam舌

2008 年 1 月 10 日 星期四 【晴】

吳小姐生日
講起吳小姐，真係要同大家介紹下，佢就係我小師妹，之前做同事時識，現已做了好朋友
小妹再次發揮女公關本色，再一次成功炮製了一個出色的生日會
時間、人物、地點、食物、禮物……樣樣攞足一百分，簡直perfect！
食咗：意大利餐
飲咗：紅酒
送咗：余力機構珍藏首張CD一隻 及 精美製作生日咭乙張
大家用心用口，記住今晚，特此筆錄記下

吃盡意大利美食、滋味在Munch
 

美食一：鱸魚risotto

美食二：牛仔骨

美食三：pizza

再一次強調：是次慶祝活動主辦人-出色的女公關Bobo

以及是次活動的女主角-自稱"畢左業後，中大無靚女"的Sharon

兩位搶鏡的主人翁(左起)：Sharon + Bobo

在此祝願吳小姐生日快樂！

2008 年 1 月 5 日 星期六 【晴】

發現自己物慾好強
好想擁有下列咁多樣奢侈品
順帶一提, 我就黎生日la
我好歡迎善長人翁買下列禮物送俾我
多謝~~~~多謝~~~~~

1. HTC Touch Dual


2. seiko criteria手錶


3. Polo Ralph Lauren側孭袋