|
2002 年 7 月 5 日 星期五 【雨】
聽日去HKU到調choices，都唔知點調好......明知入唔到Ｕ，咁調黎做乜？！
不過又可以放半日假......好舒服呀~~
荔枝幫我買左野做下美容......係咪一定有用架......我信妳o架喇~~
>>July 7, 2002 at 4:23:03 PM GMT+8
2002 年 7 月 4 日 星期四 【晴】
５條Ｅ，科科pass，升唔到Ｕ......算唔算好？不過，雖然升唔到Ｕ，但至少科科pass~~
我諗住repeat呀！！Never Give Up！！
婷婷，妳又話考得差，考得差都拎到兩條Ａ......妳講大話！！哼哼！！
>>July 6, 2002 at 2:16:36 PM GMT+8
2002 年 7 月 3 日 星期三 【晴】
嘩~~
好緊張呀~~
>>July 6, 2002 at 2:01:24 PM GMT+8
2002 年 7 月 2 日 星期二 【晴】
今日謝師宴~~正爆~~
首先，好多人著恤衫西褲，仲有好多人打tie添呀！但我就好怕呢ｄformal dressing，又煩又唔舒服......結果全場得我一個男好係著短褲去......都唔算係短褲，都過左膝頭o架，超free，好舒服，好正……晨光果檯ｄ人低Ｂ架，就係因為我著短褲，就想選我做做全場至型男同學，擺到明抬我上檯……好在輸左俾黃德林幾票o者~~
食到好飽......想死......
Connie唔舒服，佢個頭痛到嚇親我同馬樹…….佢又唔肯去醫院……佢好慘呀……不過唔舒服就一定要睇醫生，留院咪當休息，機器都要休息喇，更何況係人！！Connie呀，快ｄ睇醫生，要快ｄ好返呀！！
今晚「特派行動組」再次出動，商討「日月日免口昌K」大行動~~
>>July 4, 2002 at 7:25:00 AM GMT+8
2002 年 7 月 1 日 星期一 【晴】
今日阿元問左我一條問題：「做乜你可以成日笑o架？有乜咁好笑？」
我就話喇：「開心咪笑囉！」
阿元：「有乜咁開心？」
我：「咁無唔開心咪開心囉！」
阿元：「邊有ｄ咁既道理？！」
我：「咁無唔開心咪即係無衰野發生喇，無衰野發生咪即係好野喇，咁係咪應該開心先~~」
阿元：「嗯嗯！又有道理喎！」
我：「你夠成日笑喇！」
阿元：「我係識左你之後，見你成日笑，低低ＢＢ，好鬼開心咁，我先成日笑咋！」
原來，笑係一種病菌，會傳染o架......你地都笑下喇，去周圍傳染人喇，笑多ｄ，先至會開心ｄo架~~
好喇~~
三！！
二！！
一！！
笑！！
>>July 4, 2002 at 7:46:42 AM GMT+8
2002 年 6 月 30 日 星期日 【晴】
今日唔單止鼻涕流不斷，乞嗤打不停，仲不停咁咳......咳死......起身返工果陣勁唔舒服......
大發現！！我同ｄ朋友傾開計，發現原來鐘意傾電話ｄ人比唔鐘意傾電話ｄ人更加容易有拖拍......真o架......唔信就試下喇~~
>>July 1, 2002 at 12:34:16 PM GMT+8
2002 年 6 月 29 日 星期六 【晴】
唔知搞乜鬼，今日lunch上水之後，鼻涕流不斷，乞嗤打不停......我諗可能係我上水果陣俾ｄ風吹親......
今日下晝當更果陣，我俾林厚成同佢表妹用泳帽水彈突襲......成半個身濕晒......好慘呀~~
巴西好波~~
>>July 1, 2002 at 12:20:25 PM GMT+8
2002 年 6 月 28 日 星期五 【晴】
我同阿爸阿媽六國大封相......
事原係我阿媽話我阿嫲又盲又跛又無用，成日唔駛出街，實收埋大把錢......跟住又話我阿嫲明知人地無錢還都成日借錢俾人「戇居」......我聽完好鬼嬲，我阿嫲係又盲又跛但一定唔係無用，就係因為有我阿嫲先至有我地咁大個家族，先至有我老豆，有我地三兄妹，有我地ｕ堂、表兄弟姊妹......我叫佢唔好再咁話我阿嫲，佢居然仲罵返我：「喂！我點講關你咩事！咁緊張做咩呀！咁而家佢係又盲又跛呀！你咁叻你養佢囉！」佢平時又話好在佢唔係我家族ｄ人，唔似我家族ｄ人......既然唔係我家族ｄ人，咁我阿嫲ｄ野關佢咩事！佢又有咩資格批評我阿嫲先！我阿媽對我家族無感情都有ｄ理由，但我阿爸一樣都聽到我阿媽罵我阿嫲又盲又跛又無用，但佢居然無動於衷......仲罵返我係咪想撩交嗌......好波！自己老婆話自己個阿媽又盲又跛又無用都若無其事，枉我阿嫲咁辛苦生佢出黎......
跟住又討論我堂阿哥阿浩。阿浩有一個拖左七年既女朋友仔，有好多人都好想佢地快ｄ結婚。我阿媽又話：「超！佢有鬼用咩！讀書又讀唔到，去整冷氣……咪話我話，睇死佢呢一世都係整冷氣……我係個女仔個阿媽一定唔會俾個女嫁佢……」我只不過叫佢：「唔好睇少阿浩喇，整冷氣唔好咩？職業無分貴賤，佢而家做學徙都有六千蚊一個月喇，好過佢唔做野喇，等佢學多兩年學滿師，都過萬喇~~」佢隨即發爛渣話我：「係呀，我而家係睇少佢呀，關你咩事呀！我係鐘意睇少佢呀，鬼叫佢無鬼用呀，咪一世逗機器……」我叫佢都順便睇少埋我，事關我讀書又讀唔到，而且連冷氣都唔識整，佢就大罵：「係呀，你一樣咁無用架咋！我一樣咁睇死你！你而家同佢好親呀！去佢到住喇！叫佢養埋你喎！」簡直痴線……職業無分貴賤，《敬業樂業》都有講喇……好在佢中文拎Ｆ，唔及格咋，如果佢咁都及格我實叫考試局翻卷……唉……最抵死既係我老豆都係靠逗機器養起成頭家，甚至乎我同我細佬第時都可能逗機器……咁佢係咪睇少佢老公呢？最荒唐係我老豆居然唔餐我仲罵我撩完交嗌撩交打……想打我？簡直痴線，我都費時再同佢地講~~
妳咪睇少我囉，至少我覺得我唔係無用……最慶幸既係我性格一ｄ都唔似佢地……呵呵呵~~
我partner同會所ｄ人成日叫我游池主管……我都唔知點咁……我係救生員，唔係主管呀……
>>June 29, 2002 at 1:34:35 PM GMT+8
2002 年 6 月 27 日 星期四 【晴】
我有一個堂阿哥阿林拍拖拍左五年，另一個堂阿哥阿浩都己經拍拖拍左七年......好勁呀！！大家都催佢地快ｄ結婚！！佢地ｄ女朋友好正o架~~
不過到時我就煩喇......阿林結婚都無乜所謂，阿浩同我同年出世，連佢都結埋婚，到時大家既目標就放係我身上......咁就煩死喇！！點解ｄ堂阿哥咁早婚o架......
今日又聽到一個笑話喇：
話說有３個男人焗桑拿
突然間有ｄ「BBB......BBB......」聲不停咁響，
有一個男人就話：「唔好意思，我放左塊晶片係手背到，所以隻手亦都係call機！！」
跟住突然間又有ｄ電話聲不停咁響，
另一個男人就話：「唔好意思，我放左塊晶片係手背到，所以隻手亦都係手提！！」
隨即個男人就放自己隻手背係自己隻耳到，不停咁傾......
最後一個男人，
見到其他兩個男人咁high-tech，
自己咁low-tech，
就即刻衝出桑拿房，去廁所到塞ｄ廁紙去個屎忽到......
然後返入去個桑拿房到繼續坐......
其他兩個男人見到有ｄ廁紙係個屎忽到都好驚訝，
個男人就好自豪咁話：「唔好意思，我都移植左塊晶片，而家正在收緊Fax！！」
笑到爆，
不過呢個笑話都係用口講好笑ｄ，
最好用埋英文講~~
>>June 28, 2002 at 2:15:10 PM GMT+8
2002 年 6 月 26 日 星期三 【晴】
嘩！！今日堂大佬輝哥結婚，我做兄弟，好好玩呀~~
首先，今朝七點起身，真係好鬼眼訓......
跟住八點鐘就已經去到輝哥屋企準備一切，九點鐘就出發喇~~
大約十點鐘去到新娘屋企樓下，ｄ姊妹話仲未準備好，ｄ遊戲仲要整多陣......我地兄弟班就唯有係新娘屋企樓下等......係三十三度搵唔地方避陽光既情況之下，我覺得其實個遊戲已經開始左喇，我地係已經俾班姊妹玩緊喇……
上到去之後，有三個遊戲……
第一個：要我堂大佬講出佢老婆十大好處，我堂大佬一聽完就即刻話左四個好處：「食得、訓得、『擦』得、飲得……」笑死我~~
第二個：要同我地每一個堂兄弟塗上唇膏，然後隔住一塊膠片kiss……簡直痴線，除左堂大佬之外，全世界兄弟即刻走開……我堂大佬果然無搵錯兄弟！！好兄弟！！好齊心！！
第三個：最無聊，要輝哥唱歌……
之後下晝去婚姻註冊處，由於我嫲嫲要坐輪倚，佢又有成二百幾三百磅，連人帶倚搬上車又怕唔夠力，所以我地初時諗住抱佢上旅遊巴。點知我同老豆一抱嫲嫲，嫲嫲就即刻話隻腳好痛，所以抱唔到嫲嫲上旅遊巴……我阿爸就話不如搵架的士同嫲嫲返嫲嫲屋企，唔好要嫲嫲去婚姻註冊處喇，我見到嫲嫲ｄ眼淚即刻出左黎，畢竟呢次係嫲嫲第一次娶孫新抱，娶孫新抱係佢既願望，亦可能係佢唯一既願望，而且佢其實身體好差，隨時都可能……所以無論有幾難，都要搬嫲嫲上車！！跟住後來我地四個男丁用盡晒九牛二虎之力將嫲嫲連人帶倚搬上車……”支力” 死~~
夜晚最正，我三個堂阿哥好似痴左線咁，唔駛人地去砌醉佢地，佢地居然主動出擊，周圍同人鬥飲……最後佢地唔夠人飲，仲叫埋我去……我飲左一杯白蘭地，一杯半啤酒，好少，雖然唔夠佢地多……不過真係好好玩呀~~
今晚有廿四圍酒席，我地親戚大約有十席到……大約百幾個親戚，但最慘既係呢ｄ唔係梳唐親戚……死未！！得閒一定要整個Family Tree出黎先得……我唔記得細佬妹ｄ名，甚至我連有幾多個細佬妹都未知……好唔掂呀……所以Family Tree一定唔少得……仲有喎，咁多親戚，同三姑媽果一家係最熟，最正~~
經過呢晚之後，我覺得結婚係一件好煩既事，尤其係我呢一個大家族……不過睇到堂大佬成日笑，就知結婚好開心喇，正呀！！好快就會到另一個堂阿哥喇！！到時又有得玩喇！！
>>June 27, 2002 at 5:54:06 PM GMT+8
|
![]()
|
人氣: 27475
Design & Scripting by ShowHappy.Net
|
聽日去HKU到調choices，都唔知點調好......明知入唔到Ｕ，咁調黎做乜？！
今日阿元問左我一條問題：「做乜你可以成日笑o架？有乜咁好笑？」
我有一個堂阿哥阿林拍拖拍左五年，另一個堂阿哥阿浩都己經拍拖拍左七年......好勁呀！！大家都催佢地快ｄ結婚！！佢地ｄ女朋友好正o架~~