|
2002 年 12 月 4 日 星期三 【晴】
今日下晝訓完午睡起身，淨係見到阿爸同細妹，唔見阿媽......但係平時呢個時侯，阿爸阿媽同細妹都會係屋企~~
於是我問阿妹：「阿媽去左邊呀？」
跟住阿妹就係度喊，我心諗：唔係嘛......問下都唔得呀......
過左陣，阿妹喊住口咁講：「嗚......阿媽入左醫院呀......」
下......唔係嘛......返左幾日工咋喎，咁就出左事？！
阿妹就坐係度拎住今日派既成績表俾我睇......真係咁o岩，派成績表阿媽就入左院......或者咁令佢有所覺悟，平時阿媽教佢做功課，佢就唔聽教，又唔願做，今日就好少可咁拎ｄ功課出黎做，唔識做就自己走過黎問我~~
過左一個鐘，阿媽打電話返黎，原來阿媽放左工去睇醫生，醫生叫佢入醫院檢查下......嚇死人呀......
結果今晚阿爸煮飯，我地三兄妹食飯果陣又開始發癲喇......笑到傻呀~~
>>December 9, 2002 at 9:27:00 PM GMT+8
2002 年 12 月 3 日 星期二 【晴】
今日勁搞笑~~
話說今日學生資助處打電話俾我細佬阿Ｂ~~
學生資助處：「請問你係咪year１？」
阿Ｂ：「係呀！有咩問題呢？」
學生資助處：「咁你阿哥係咪仲讀緊書？」
阿Ｂ：「係呀！又有咩問題呢？」
學生資助處：「咁你阿哥係form幾？」
阿Ｂ：「我阿哥form seven呀~~」
學生資助處：「咁你阿哥點解會仲低form過你？」
我都唔想架......
>>December 9, 2002 at 9:26:19 PM GMT+8
2002 年 11 月 27 日 星期三 【晴】
邊個話狗唔會喊？
媽媽而家要返工了，由八點半開始，屋企整日都唔會有人；今日之後一路至到五點半我係全屋第一個返既人，一開門就見到福頭同happy仔都係度喊，有眼淚架，我諗佢地驚我地唔要佢地卦，因為屋企未試過咁耐都無人；而且聽個狗店主人話，happy仔都曾經俾人拋棄係條街度。福頭同happy仔一見到我，就即刻好興奮咁撲去我到......
其實狗都好有人性，每當有人返到黎屋企，福頭同happy仔都會去門口去歡迎；夜晚果陣，如果屋企唔齊人既話，福頭同happy仔都會坐係門口等你返黎，等到你返黎佢地先至會返入房訓覺；屋企齊人係個廳到睇電視既話，佢地會同我地一齊坐係個廳到，其實佢地已經當我地係親人。仲有喎，如果同佢地出街行得太耐，佢地會苦苦哀求我地快ｄ返屋企，如果我地仲唔返，佢地會認得屋企條路，拉我地返屋企添......佢地一樣當我屋企係佢地屋企。
我阿爸就話，佢細個屋企都有一隻大狗，每朝都會送人出門口，又會係門口等人返黎；後來佢地唔記得左為乜，要拋棄大狗，把大狗拋棄到老遠......真係好遠，搭巴士都要成五、六個站；但係幾日之後又係屋企門口叫人開門......狗真係好有人性~~
但往往既係，當ｄ狗當人係親人既時侯，ｄ人又當佢係乜？點解要拋棄佢地？既然拋棄佢地，點解當初又要買佢地返屋企？如果唔可以再養佢地，咁一樣可以為佢地搵個第二個家......ｄ人真係無責任感！！
>>December 6, 2002 at 5:23:31 PM GMT+8
2002 年 11 月 26 日 星期二 【晴】
今日考中文......嘩！估唔到我作文咁鬼快，上左身咁，十分鐘寫大綱，五十分鐘就作左八百字喇！
>>November 30, 2002 at 2:45:56 PM GMT+8
2002 年 11 月 23 日 星期六 【晴】
今日三姑丈出殯了......選擇的是火化~~
諗返起細個果度，其實係好驚三姑丈......因為三姑丈好高大，把聲又雄厚，見親三姑丈都成日好大聲咁鬧ｄ表姊......真係唔驚就假......
但大個之後，我都有返咁大隻，其實三姑丈都無乜好驚，而且三姑丈都唔係見人就鬧，佢只係為左表姊好先鬧佢地o者......其實三姑丈好錫佢ｄ仔女~~
浩哥問我去唔去踩單車，好想去，可惜我要溫考試，唔可以去呀......
>>November 30, 2002 at 2:37:47 PM GMT+8
2002 年 11 月 22 日 星期五 【晴】
夜晚七點多去到世界儐儀館，去三姑丈o既喪禮......
去到之後，我就去上香；當睇到三姑丈張相o既時侯，我好想笑o左出黎......
我並唔係唔尊重我三姑丈，只不過果張相，三姑丈好好笑容......睇到果張相，感覺就好似三姑丈係隔離咁......其後問返表姊，原來張相影o左無幾耐，事由係三姑丈聽到互助委員會有證件相影，就好興奮咁落o左去樓下影，所以張相就好好笑容，好慈祥......估唔到張相會咁樣用......有時ｄo野就係會咁o岩......
雖然話係喪禮，但其實今日都唔係好傷感，仲好人齊，好熱鬧......對於我黎講，我就無乜「死亡」o既觀念，三姑丈就只係行先一步而已，遲ｄ到我落到下面，大家又會相聚......而且，我睇到我地今晚燒俾三姑丈o既o野，有一楝兩層連天台o既洋樓，有一部SONYo既電視機，有一張「無聲麻雀檯」......我就唔太明，麻雀又點會無聲......總之燒左超級多o野，或者下面o既生活仲好過上面......
仲有，我就發覺我地呢個大家族ｄ性格都好相似，都係好鬼好玩......而且我地呢一輩越o黎越大，開始出頭了~~三個堂阿哥都出o左o黎做o野，每一個堂阿哥都係獨當一面，而下一個出o黎做o野相信會係我同我細佬......或者我好鐘意接觸中國文化，我感到呢個大家族無幾耐就會由新一輩幫手出力承擔~~
今日應承o左下年暑假教十叔個寶貝仔游水，游水咋嘛，梗得喇~~
>>November 24, 2002 at 7:12:31 PM GMT+8
2002 年 11 月 16 日 星期六 【晴】
下晝去左淺水灣度做遇溺者......嘩......凍到死喇......
夜晚就同肥強果ｄ去打波，超爽~~
我諗咁可以減到ｄ肥卦......
>>November 20, 2002 at 2:33:22 PM GMT+8
2002 年 11 月 12 日 星期二 【晴】
雙眼好倦......
>>November 13, 2002 at 3:58:30 PM GMT+8
2002 年 11 月 11 日 星期一 【晴】
今日好傷心......咁大個人，都未試過咁傷心......
三姑丈今日下晝去了......一切都太突然了......太突然了......眼淚也來不切流......心裡現在還接受不到這個事實，根本從來沒有想過。
一大個家族裡面，只有三姑丈三姑媽一家和我家最親......每逢重要節日，我都好期待去三姑丈三姑媽屋企食飯......因為三姑丈、三姑媽同埋表姊表弟對我來說，是很重要的親人......
三姑丈、三姑媽每次見到我，都會好親切咁講一句：「衰仔，返去俾ｄ心機讀書喇，今年要升到大學喇。」同二表姊poly畢業影相果陣，我已經諗住如果我第時畢業o既時侯，一定會叫三姑丈三姑媽一家同我影相......都係我唔好，人地都Year2，我仲A-level，大學都未升到.......
眼淚不停咁流......根本睇唔到個screen......嗚......除左喊，我已經唔識點去表達自己o既傷心......
>>November 13, 2002 at 3:57:13 PM GMT+8
2002 年 11 月 9 日 星期六 【晴】
今晚睇「情常在」，覺得小思有一句野好動聽：
「由無知去到有知，令人感到很快樂！」
我覺得佢講得好o岩......唔識字都好，但絕不能無知~~
今日睇到一個笑話......呵呵~~
從前有一家人辦喪禮，大仔"潘新科"
長女"池潘氏"、細仔"潘輛茨"，
今次請到村長主持喪禮，但村長唔多識字，
於是有邊讀邊.........
村長：「大仔"番斤斗".......」 大仔開始翻筋斗，
村長：「長女"也番".......」(個"氏"字一時忘記點讀)
長女：「我？」 村長(一時記起了)：「氏！」(是)
長女也開始翻筋斗........
村長：「幼子"番兩次"......」
於是整個喪禮都是給他們翻筋斗了
>>November 11, 2002 at 10:58:07 PM GMT+8
|
![]()
|
人氣: 27464
Design & Scripting by ShowHappy.Net
|
今日下晝訓完午睡起身，淨係見到阿爸同細妹，唔見阿媽......但係平時呢個時侯，阿爸阿媽同細妹都會係屋企~~
邊個話狗唔會喊？
雙眼好倦......