|
2003 年 1 月 26 日 星期日 【晴】
今日拎ｄmarking去影，先知原來而家ｄ影印機咁鬼先進架......
唔駛續張續張影，成疊notes放係部影印機上面就得架喇......好先進呀！！
>>January 27, 2003 at 7:59:01 PM GMT+8
2003 年 1 月 25 日 星期六 【晴】
阿公就生日，所以今日下晝就去同阿公阿婆食飯慶祝。
見到阿公好左好多喇，佢仲好開心話而家朝早成日都會落街行下~~
講開阿公，有ｄ人會覺得我特別孝順佢~~
其實係因為無論我個樣，我既性格，我既為人，都同我阿公有關~~
首先，見過我阿公既人，都會話我同阿公好似樣。事實上，我阿爸家族裡面ｄ人個個塊面尖尖地，連我細佬細妹都係尖尖地，個個面型都好靚......而我阿媽家族裡面ｄ人個個塊面都係「包」，我塊又面肥肥地，所以話我個樣唔係遺傳自阿媽個家族都無人信......
第二，如果識我屋企ｄ人，一定會奇怪我個性格，為人處事，風格，好多野都完全不同。其實係因為我個性格，為人處事，風格都係由阿公教既，又或者係阿公身上學既。我自少成日都會接觸阿公，阿公成日都教我做人既道理，點樣去對人，點樣去處世。例如，我阿爸阿媽成日教我地做人千萬唔好蝕底，寧願對唔住人地都唔好蝕底；但我阿公就剛好相反，教我做人怕咩蝕底，千萬唔好對唔住人地，寧願蝕底都唔好對唔住人地，所以我都唔怕蝕底，為人都算隨和。又好似，我阿爸阿媽成日教我地無論件事點樣唔o岩，只要唔關自己事既野，千萬唔好理；但我阿公就剛好相反，教我做人要「路見不平，拔刀相助」，只要件事唔o岩，無論關唔關自己事，只要幫到就要幫，唔可以啞忍，所以我為人都好直下，只要唔o岩就會開聲。
亦因為咁，我同我細佬ｄ性格都勁唔同~~
仲有，阿婆話我知原來以前阿公好唔鐘意我阿爸，話阿爸讀書少，連自己都未搞掂自己；但阿婆話自從阿媽有左我之後，阿爸就考到公務員，阿公都無野好講；自從我出左世，阿公知道第一個孫就係男仔，仲要似佢，佢就鬼咁開心，話我腳頭好，於是就好鐘意我阿爸，仲好鍚我添......
咁所以呢~~我特別孝順阿公係有得解既~~
>>January 27, 2003 at 7:55:18 PM GMT+8
2003 年 1 月 24 日 星期五 【晴】
我相信，董叔叔絕對為香港既前途著想，遲ｄ香港一定好有活力！
首先，董叔叔削減了綜緩，令老弱傷殘快ｄ餓死呀，凍死呀咁，仲令失業既家庭有家庭問題，等失業既家庭成員產生糾紛，唔係你砍我，就係我砍你，再唔係就自己跌落街......死左呢班人，淨底既人一定係好有活力！
第二，董叔叔既手下全面削減了教育經費，ｄ人無乜書讀，又無工好做，ｄ後生仔唯有去畫下文化中心呀，公廁呀，垃圾筒呀，邊個夠膽話香港人無活力！
第三，董叔叔既手下掃把頭除左個頭型之外，最叻搞「分化」，將香港人分成為兩邊，分成贊成同反對第廿三條兩邊，贊成同反對都有大批人上街示威，九七年之前？邊會咁得閒咁易就有成萬人上街呀~~睇下，香港幾有活力！
董叔叔簡直就係「偶像」！香港果然係活力之都！
>>January 25, 2003 at 8:32:36 PM GMT+8
2003 年 1 月 23 日 星期四 【晴】
死火喇......成日都失眠......訓左係張床到成個鐘都訓唔著......
再咁落去......會死架喎......
>>January 25, 2003 at 7:31:57 PM GMT+8
2003 年 1 月 22 日 星期三 【晴】
病喇......重病喇......
我四周圍ｄ人都病......我細佬，我同學，我鄰居......大家都相繼病好之際，我本來都仲頂得住......但係就臨尾香......支持唔住佢地ｄ菌喇......病了......
好辛苦......
>>January 24, 2003 at 4:35:39 PM GMT+8
2003 年 1 月 18 日 星期六 【晴】
話說，今日係旺角拎野去影印，有兩間鋪頭，兩間鋪頭都相對住......Ａ鋪頭就鬼死咁多人，Ｂ鋪頭就連「甲由」都無一隻......仲聽到個老闆叫慘......
我見Ｂ鋪頭就連「甲由」都無一隻咁慘，我就行下好心俾ｄmarking佢影喇......點知......
Ｂ鋪頭：marking？我地怕俾人拉，唔影架喎~~
我：唔影marking？咁有佢喇......麻煩你幫我影一影呢本書﹝有成三百幾頁架﹞......
Ｂ鋪頭：書？我地怕侵犯版權，唔影架喎~~
我：本書係我既，我自用架咋......
Ｂ鋪頭：我地怕俾人查，唔影書架喎~~
我：咁好喇，麻煩你幫我影一影ｄnotes﹝有二十幾頁到喇﹞......
Ｂ鋪頭：十幾頁咁少？我地唔影架喎~~
marking唔影，書唔影都算喇，連notes都唔影，咁你影咩呀......俾個身份證你影五百份好無呀......做乜鬼生意呀......抵你接埋間鋪頭喇......
>>January 25, 2003 at 7:52:49 PM GMT+8
2003 年 1 月 12 日 星期日 【晴】
今日去剪頭髮......
洗頭個靚女ｄ技術好好......洗得好正......
個師父ｄ技術都好好......剪得好型......
偏偏係我又唔正又唔型......如果我可以型ｄ就好喇~~
>>January 19, 2003 at 4:19:03 PM GMT+8
2003 年 1 月 7 日 星期二 【晴】
哎呀......
今日下晝返學果陣，阿媽打黎話我知公公係條街到暈低左，入左瑪嘉烈......嚇死我......
我即刻去左瑪嘉烈睇佢，佢塊面好紅，睇黎又係中風~~
好在，公公呢次無上次咁嚴重，我去到佢床邊，佢都仲認得我，仲記得我係佢個大孫仔，仲識叫我阿鏗~~
不過，係咁短時間裡面中兩次風，對佢老人家來說，好危險......
將來有機會大學畢業，如果公公黎唔到睇我畢業，將會係我畢生既遺憾......
>>January 12, 2003 at 2:59:17 PM GMT+8
2003 年 1 月 3 日 星期五 【晴】
夜晚去左打波......
點知走果陣太夜，俾警察逗......
無端端又俾警察抄底個身份證......痳鬼煩......
>>January 12, 2003 at 2:19:40 PM GMT+8
2002 年 12 月 27 日 星期五 【晴】
今日幫人補習......
唔知點解我好鐘意幫人補習......之前幫社會福利署開補習班，覺得幫到人，教到人特別有滿足感~~~
但係補習班而家完左lu......有無人要我幫佢補下呀？
>>December 29, 2002 at 12:31:25 PM GMT+8
|
![]()
|
人氣: 27470
Design & Scripting by ShowHappy.Net
|
今日拎ｄmarking去影，先知原來而家ｄ影印機咁鬼先進架......
我相信，董叔叔絕對為香港既前途著想，遲ｄ香港一定好有活力！
死火喇......成日都失眠......訓左係張床到成個鐘都訓唔著......