2002 年 9 月 1 日 星期日 【陰】

今日整日留係屋企追番套劇集,無出過去,原來一日睇5個鐘頭劇集唔簡單ga,話悶唔悶,但時間真係好長,比睇日劇高難度,不過如果睇唔晒,夜晚就接唔到。

除此之外就對住部電腦check email。

今日最大喜事係碧咸梅開二度,唔係入波,係又生仔啊!o甘佢就可以訓練佢2個仔做兄弟班,一齊簽MU,做繼Neville brother之後同時上場的兄弟。個BB叫Romeo,o甘依家一定好多人改名叫Juliet,等我都諗下改呢個名先。

>>September 3, 2002 at 6:48:27 AM GMT+8

2002 年 8 月 31 日 星期六 【晴】

今日去o左朱元璋(明孝陵)同孫中山(中山陵)既墳墓,去中山陵要行成三百幾級樓梯,行多幾次真係減到肥ga!

之後去o左賣玉的地方,有個團友買o左個水晶蘋果,我諗係送比girlfriend卦,真係romantic。(都唔知點解會係玉石舖買水晶ge)

And then今次既旅程就結果喇,返o黎之後,有個學弟既家長打電話o黎問o野,真係唔明我點解o甘好彩,o甘多人唔打,係要打比我。我又唔係同佢同系喎,不過人地打得o黎當然要盡力解答人地的問題啦,好彩最後我都完成任務。

今日好眼訓呀,係旅行後遺症,好早就上床,不過旅行真係好開心ga,可以忘記一切煩惱......

>>September 3, 2002 at 6:35:35 AM GMT+8

2002 年 8 月 30 日 星期五 【晴】

今日來到最後一站——南京。去了夫子廟,食鴨血粉絲,又去睇長江大橋,而聽日就會去中山陵。

來南京之前,還到了太湖,太湖真係好大,橫誇幾個城市,我所看到的只是冰山一角。

原來團友入面有人同我一個英文名,我終於遇到啦!haha!

聽日就要走喇!又要融入番現實生活裏,而且又是我在香港的最後10天,我好希望能夠好好利用啦!

今天的遺憾係不能在外地看到碧咸比賽,攪到過o左個好悶既星期六,我以後星期六唔會離開部電視ga la。

>>September 3, 2002 at 5:00:57 AM GMT+8

2002 年 8 月 29 日 星期四 【晴】

今日去無錫,不過無錫其實冇乜地方去,只係去o左個公園及賣紫砂茶壺既地方,反而夜晚就同o左班團友去唱K。我阿媽唱到high晒,跳晒舞o甘,又爆我細個Do野比人聽,大姐呀,你駛唔駃講埋你有幾多身家阿!

>>September 3, 2002 at 4:34:21 AM GMT+8

2002 年 8 月 28 日 星期三 【陰】

原來大陸的天氣真是極不穩定,上午陽光普照,下午就落雨。今日係蘇州坐船遊同里,同里有「東方威尼斯」之稱,坐在船上遊覽真是別具一番風味。去同里之前,去了飲菊花茶,菊花茶真係好好飲,D團友爭住買。

下午的休息時間係酒店睇o左集《愛情白皮書》,真係好想去買套VCD睇,因為有線做o個時我已經返o左去。之後去遊花園,是那些以前的富有人家的庭園,大到隨時會迷路。晚上去夜遊,買o左D蘇州榚點,返酒店後又去o左洗頭,一次只是$10咋。

>>September 3, 2002 at 4:26:57 AM GMT+8

2002 年 8 月 27 日 星期二 【雨】

原來杭州的天氣是不穩定的,一時陽光普照,一時傾盆大雨,去西湖遊船河還好好的,上船後的天氣就變差,不久就落大雨。

夜晚去行杭州市中心的百貨公司,看見一隻好難找的CD,滿足自己的購物欲真好。

明天就會啟程前往蘇州,要4個鐘車程,所以聽日要好早起身,而今晚要早D訓。

>>September 3, 2002 at 4:03:17 AM GMT+8

2002 年 8 月 26 日 星期一 【雨】

今日去了很多地方,在城隍廟買了一些手鍊及在Starbucks買飲品,不過至遺憾是沒有幸吃小籠包。黃昏的時候就乘車往杭州,我真很佩服導遊,由上車講話講到落車,由我訓覺講到我訓醒(大慨1個多小時後),但是又有人唔訓覺聽佢講o野喎。

得悉其中1個團友跟他一樣名字,為甚麼他的名字這麼普遍ga?昨晚及發夢又夢見他,不過個夢已經忘記,好像在討論甚麼,除了他以外,還有很多人。

個導遊話遊夜街又要收錢啦,呢個團真係扼錢ga!

>>September 3, 2002 at 3:54:23 AM GMT+8

2002 年 8 月 25 日 星期日 【晴】

開開心心旅行去!

落機既時候,遇上一場暴風雨,真狼狽。那時已經是黃昏,我們到達後就夜遊上海外灘及南京路,不過導遊話因為係行程以外,所以要收錢,o甘樣就比佢扼o左$80,個導遊叫「壞人」(Ryan),但佢話叫佢「壞人」就唔會應。我心諗怪唔得MU11號仔行年29,尚未娶妻,又被人飛啦,因為佢都叫「壞人」。

但其實我覺得係揀錯地方去,因為上海都好似跟佢有關係。

>>September 2, 2002 at 1:23:46 PM GMT+8

2002 年 8 月 25 日 星期日 【晴】

首先好多謝Maggie對我的鼓勵,放心啦,我唔會令你失望ge

尋晚聽到[抱抱]同[夏天的緋聞],發覺D歌詞同自己依家既心情有D似...想抱 連熱戀得不到 知己也做不到...緋聞只在夏天發生 夏天過去便沒有...

今日去剪頭髮,想比自己一個新開始,又諗起A Brand New Day 同 A New Day Has Come,要忘記過去,努力面前,向著標杆直跑...唔可以再寫落去,再寫落去就...

睇電視學到有D野過左去就返唔到轉頭(我都唔知叫過左去未),一個決定,足以影響未來的命運...

跟住夜晚去左ACM既concert,去緊個時心情好複雜,因為仲諗緊佢,不過開始個時就投入到,當主持人話應該將所有憂慮的通通交託給上帝時,我的眼淚就徘徊係眼眶,(唔係喊呀,係喜極而泣呀),不過最後無跌出來,然後就感到豁然開朗。

希望係黎緊7日的旅程可以醫治我的創傷,我的心靈,不再為這些星座話係善變的人所操縱,我要食住佢地。

>>August 25, 2002 at 8:08:48 PM GMT+8

2002 年 8 月 23 日 星期五 【晴】

Yeah!碧咸用左腳入波le!但代價係一張黃牌,如果佢今季的入球好似上季o甘多就慘啦, 實比人罰到攤攤腰。

今日本來去BBQ既,點知個個甩晒底,最後得5個人黎,唔夠人燒,等我山長水遠走去屯門,結果變o左屯門一天遊。由至雜的karaoke到至熱鬧的town centre 都去到。不過o甘都好過對住一D唔想見既人。依家既心情同一年前一樣,一年前我亦都係為o左逃避呢種心情而走去讀書,你可能覺得我任性,但我無後悔過,因為出國讀書真係見識到好多野,可以曠闊眼界,唔駛成日亂諗野,而且返來之後,對你的感覺已經唔同o左,呢樣係我最開心既。但從回來到現在,你對我的態度都無變過,不禁又勾起對你的絲絲回憶。究竟我走的時候,你有無掛住我,或者想起過我呢?

>>August 24, 2002 at 6:05:23 PM GMT+8