2002 年 10 月 24 日 星期四 【晴】

今日又組聚﹐又部聚﹐講左好多野﹐我把聲又沙沙地喇...
我覺得我真係唔識鍚住自己﹐睇醫生果時已經講過﹐要我少d講野﹐但我真係忍唔住口﹐一見到人就不停咁講﹐乜都講一餐﹐又唔識鍚住把聲﹐搞到把聲宜家咁﹐有時真係唔知為乜。點解我成日都係咁？成日都要人擔心？成日搞到呢度傷﹐果度痛咁。
我發覺﹐我對自己既要求好低﹐叫自己講少d野﹐做唔到；叫自己快d睇完d reading準備傾﹐做唔到；叫自己快d溫書準備mid-term﹐又做唔到。究竟我要幾時先識得勤勤力力？時間無多喇﹐依然掛住玩﹐掛住訓﹐掛住上網。我都知衰﹐但又改唔到...
我覺得好煩﹐有好多野我淨係識得逃避﹐冇諗過點樣去解決﹐反而更加煩...我知呢樣唔好﹐果樣唔應該做﹐但我做唔到﹐得個煩字...我一想逃避﹐就會搵野做﹐去麻醉自己。我諗我想搞街頭文化節﹑想上莊都可能係呢個原因。有d野﹐我唔想再諗﹐唔想再理﹐唔想再比機會自己；我唔想睇reading﹑唔想做presentation﹑唔想mid-term﹐仲有好多好多野唔想諗...我覺得唔開心﹐因為我有太多野要逃避﹐我唔知要避到幾時﹐亦都唔想去面對﹐一個惡性循環...算啦...

>>October 25, 2002 at 3:00:28 PM GMT+8

2002 年 10 月 24 日 星期四 【晴】

今日好開心呀﹐又組聚又部聚~~
組聚就去左打乒乓波﹐雖然唔齊人﹐不過都好好玩呀！我應該係第一次認真打乒乓波﹐我以前好少打﹐就算打都係求求其其玩玩下﹐我今日先知﹐開波之前要彈一下自己果邊﹐雙打要一個打完到一個。乒乓波係我最唔熟識既球類之一﹐不過今日開始都叫做識少少啦﹐哈哈！估唔到原來Anna同Albert佢地打乒乓波咁勁喎﹐睇到我地目瞪口呆呀！
書通完左之後﹐就同Kenny佢地去左食tea部聚。一行九個人﹐不停咁傾﹐乜都傾﹐坐左差唔多三個鐘架都﹐ok開心啦。期待下一次更齊人既正式部聚﹐唔知幾時呢？又要等d人考哂mid-term先...

>>October 25, 2002 at 2:34:25 PM GMT+8

2002 年 10 月 18 日 星期五 【晴】

個大笪地終於都搞完喇﹐果日既場面都算幾「墟陷」架﹐一d都唔頹﹐好開心呀﹐叫做成功左喇。
搞成個大笪地期間﹐雖然辛苦﹐又有dd唔開心﹐不過係呢個function入面﹐我的確學左好多野﹐起碼我知道﹐一個活動要有好週詳既計劃﹐有好多人幫手先搞得成﹐而一個小部主既責任都好大﹐只要有一﹑兩樣野唔記得或者係冇諗到﹐個後果都可以好嚴重。我本身對搞活動可以話係冇經驗﹐所以出現既問題都唔少﹐因此﹐我真係衷心咁多謝每一個幫過手既人﹐多謝每一位OC﹐係我搞唔掂既時候出手相助﹐當然亦都包括埋我嗌救命既時候黎睇我﹑救我啦！
搞大笪地除左令我知道自己有幾唔掂之外﹐最重要係我識左班好OC﹐成班人一齊做野﹑一齊玩﹐大家都係岩岩識既﹐但都玩得埋﹐真係幾掂架！仲有就係﹐隊Band真係唔錯架﹐估唔到Michael把聲都幾掂喎！
個大笪地我除左搞之外﹐我都有奉獻我既金錢架~~不過戰利品唔多﹐因為我想後期去行下都唔得﹐我果時都跛左喇...可能真係tired得濟啦﹐抽哂筋﹐想行都冇得行﹐仲要痛死﹐痛到夜晚冇得訓﹐第二日上tuto上到釣哂魚﹑發哂夢咁...唉...
總而言之﹐大笪地係我第一個CU既function﹐亦都係一個唔錯既經驗﹑回憶﹐希望之後既function都咁好玩﹑d人都咁好啦！

>>October 19, 2002 at 4:49:10 PM GMT+8

2002 年 10 月 6 日 星期日 【晴】

今日見到一個好好笑既情景﹐我個friend係轉角位同一個係轉角位另一面既人面對面﹐冇撞上﹐係急停﹐兩個人都企左係度唔郁﹐個場面好搞笑。我唔知道點解咁既一件小事我到宜家都可以一諗起就笑﹐可能係我已經好耐冇留意過身邊好笑既小事。可能呢排忙（無事忙）﹐我都冇乜自己一個人周圍行過﹐留意下d小事。自己多野做左﹐多野諗左（各方面）﹐就連比自己休閒既時間都冇左﹐我好想簡簡單單﹑清清靜靜咁周圍行下﹑睇下戲﹑做自己鍾意做既野。
今日我就放任左自己一下﹐上完堂去左同Roy﹑Karen食tea﹐之後仲去左商務打書釘﹐無聊地睇左幾個星座既分析﹐呢d我平時唔睇﹐但今日睇得好開心﹐因為我唔想番屋企。我個「唔想番屋企病」又發作喇...我唔想番到屋企又對住一堆大大小小既文件﹑readings﹑assignment﹐唔想番屋企比呀媽嘈我「又咁夜訓」﹐唔想番到屋企咩都唔想做果種「有野但係唔想做」既無聊感覺﹐唔想番到屋企又諗起自己仲係一個人﹐冇乜人可以比我打電話去發呆﹑聽我講無聊野。講真﹐見個自己d friend拍拖我唔係冇諗過﹐但未搵到適合既人之前睇黎我都係花時間發白日夢算。
人生的意義？宜家有得勁訓對我黎講就好有意義....好頹...好眼訓...

>>October 7, 2002 at 6:27:55 PM GMT+8

2002 年 10 月 5 日 星期六 【晴】

話咁快﹐我又大一歲喇。
今年係入U第一年既生日﹐我都估唔到﹐新識既朋友仔竟然都會同我慶祝生日﹐我地識左唔係好耐﹐但佢地都咁好人﹐我越黎越覺得入左CU係恩典﹐因為神知道我會遇到一班咁好既人。當然﹐亦都唔少得一班好好既中學同學仔﹐佢地仲記得我生日﹐仲比個surprise慶祝我添﹐佢地當然都係無得彈啦！
我既細O組就係我生日前一日同我出左去食飯﹐雖然冇得BBQ﹐但可以一齊食餐飯都好好喇﹐有蛋糕食﹐仲送左份禮物比我﹐我地果日又圍埋一齊吹水﹐幾開心架~~~
我生日正日要開會﹐大O組就係果日送禮物比我﹐雖然我唔知有冇機會用個袋﹐不過我都好開心架﹐仲有張寫滿哂野既生日咭﹐好多謝佢地咁有心機寫既一字一句囉~~~
當然最掂就係高芬佢地囉﹐fake哂啦﹐叫我去華蓮﹐我仲以為做咩﹐原來同阿B華仔夾好同我慶祝﹐等我之前仲以為佢地唔我閒搵我添﹐又suprise又感動囉﹐高芬煮野比我地食喎﹐仲迫我食左好大舊蛋糕...
除左呢d之外﹐仲要多謝阿B同我去睇戲﹐Thy山長水遠由UST出黎同我去捐血﹐阿洪﹑Michael請我食飯﹐Flora既花﹐仲有好多好多人既「生日快樂」﹐好耐冇試過咁熱鬧既生日喇﹐雖然正日果日要開會﹐有少少趕...Any way﹐我會記得今年既生日﹐仲會記得每一個人﹐因為我知道﹐每個人都好好﹐係好值得交既朋友。

>>October 6, 2002 at 4:05:06 PM GMT+8

2002 年 9 月 29 日 星期日 【晴】

好耐都冇去過買衫喇﹐一黎係自己冇時間﹐二黎梗係冇錢啦！今日有幸同阿Thy係上水逛左陣﹐仲買左一條裙一件褸﹐都不知幾開心！阿Thy仲話同阿B夾錢送果件褸比我當生日禮物呀﹐勁好！其實生日禮物嘛﹐實用性高既都幾好丫﹐而精品果嘛﹐都好架﹐可以睇到送果個人既心意﹐各有各好啦！
我都好贊成阿Thy既說話﹐上水真係好好架﹐要乜有乜﹐又方便~~~

>>September 29, 2002 at 5:03:26 PM GMT+8

2002 年 9 月 21 日 星期六 【晴】

以前有人話﹐「冇話邊個冇左邊個唔得」﹐我當時都好信架﹐不過前幾日﹐我改觀喇﹐我相信有時係「冇左邊個就一定唔得」。
前幾日﹐係我最需要佢既時候﹐佢竟然一走了之﹐完全唔理我既感受﹐唔理我既需要﹐而且完全冇先兆。一切都好突然﹐我變得手足無措﹐唔知應該點做﹐直情係乜野都做唔到﹐好唔開心﹐簡直灰到爆。係果一刻﹐我至發現﹐佢對我係幾咁重要。宜家﹐佢卒之番到黎我既身邊﹐我同自己講﹐以後一定要對佢好d﹐唔好咁粗魯﹐免得歷史重演﹐累人累己。
親愛的﹐您的名字叫——電腦。

>>September 22, 2002 at 5:40:30 PM GMT+8

2002 年 9 月 9 日 星期一 【晴】

話咁快就過左成個禮拜喇﹐cu既生活都ok習慣既﹐不過﹐如果有好多空堂真係好悶囉﹐做「三才」一d都唔好受﹐好彩理論上我得今日係咁o者﹐如果唔係Prof.陳建文去左上海我都唔使咁慘。宜家發現冇宿都真係幾麻煩﹐想訓都唔知去邊好﹐悶死我喇！
由cu走之後搵左彭彭食tea﹐佢話宜家個情況好喇喎﹐冇之前咁悶。咁都好d﹐我相信以佢既能耐﹐要識人唔係好難既﹐不過要佢上堂唔發白日夢就...其實我好耐冇見過佢喇﹐都好想番甲寅﹐希望下個禮拜真係番到去啦﹐唔知宜家學校點呢？
上個禮拜四就去過ust﹐佢地都好似幾好咁﹐真係好似好耐冇見﹐去過佢地d hall﹐我覺得...好細呀！我地cu既好似大d﹐舒服d喎！
今個禮拜就去hku﹐唔知去唔去得成呢？

>>September 10, 2002 at 4:05:57 PM GMT+8

2002 年 9 月 2 日 星期一 【晴】

估唔到﹐我番學第二日就...走堂！
我今朝一彈起﹐就已經係九點﹐但我有第一二堂gee係八點半開始﹐即係話我已經遲哂大到。我科deaf awareness呀...好無奈囉﹐我都唔明﹐點解我會起唔到身架﹐點解我會迷糊中熄左個鐘架！激死！咁就蝕左堂！
聽日千祈唔好唔識起身呀﹐因為聽日要係uc gym上pe...

>>September 3, 2002 at 4:15:02 PM GMT+8

2002 年 9 月 1 日 星期日 【晴】

卒之都開學喇﹐第一日番U﹐心情難免有d緊張。
今日上左chin soc﹑pe同psy1000﹐我覺得chin soc有d難度﹐我catch up唔到﹐一方面因為我對中國歷史冇乜認識啦﹐一方面就因為今日第一日上堂﹐放左假咁耐﹐難免有d發白日夢既時候。Susanne都教得ok既﹐不過佢對CU既AV system好似...唔係好熟﹐搞左成半個鐘...（就算佢唔好都要take架啦﹐都take唔到陳海文﹐唔通唔take個major？）
至於psy﹐我都冇諗過咁過癮﹐上左一堂就覺得呢科好岩我﹐我好有興趣﹐睇黎我呢一年都要加倍努力先得喇！
不過我就真係覺得pe轉堂好麻煩囉﹐仲要係由uc gym落番cc...

>>September 2, 2002 at 4:46:18 PM GMT+8