2002 年 11 月 19 日 星期二 【晴】

今朝一起身就比人鬧...
呀媽話我成日咁夜番屋企﹐又話我唔讀書﹐淨係掛住搞呢樣搞果樣...
我真係好想話比佢知﹐我咁大個人﹐我知咩時候應該做咩﹐考試我會識溫書﹐到deadline我會識交assignment﹐如果讀大學冇野做我先驚囉﹐我宜家又唔係唔讀書﹐佢就淨係識得話我番屋企唔溫書﹐但佢又知唔知﹐功課係可以係學校拉記做架﹐我有大把空堂時間可以做功課﹐唔係淨係番到屋企先可以做囉。佢話我夜媽媽仲係度打字嘈住佢訓﹐ok﹐係我唔岩﹐但個電腦擺呢個位唔係我想架﹐我都想有宿﹐唔使夜晚做功課果時不停比人哦囉！
我番左學咁耐﹐我覺得我既生活好充實﹐因為我知道﹐大學生活唔單止係讀書﹐我有好多野想做﹐我都想玩﹐但好明顯佢既諗法同我好唔同。我好想同佢講﹐希望佢唔好再雙重標準。唔知點解﹐我做咩佢都唔贊同﹐除左讀書。我入院隊﹑校隊﹐佢都冇表示﹐我上次普通話quiz都考得幾好呀﹐我pe都full左兩個項目架﹐我真係好差咩？我估唔到我做咩係佢眼中都唔岩﹐我只不過想有少少支持﹐支持下我玩ECA﹐咁都唔得﹐係咪想我咩都放低哂﹐淨係讀？我唔知佢想點...
我係咪應該放棄？我都唔知...

>>November 20, 2002 at 2:16:47 PM GMT+8

2002 年 11 月 17 日 星期日 【晴】

睇到人地個Diary﹐先發覺原來我好少去關心一下身邊既朋友。估唔到一句短短既問候﹐佢地都會放係個心度﹐仲值得寫係Diary同人分享。
的確﹐呢排我不斷忙住做自己野﹐不停咁識新朋友﹐反而忽略左果d一路係我身邊支持我既人。其實就算佢地唔主動問候我﹐我點都應該同佢地打聲招呼。我太在意於自己既事喇﹐唔睇番佢地既Diary﹑info﹐再去問其他人﹐我根本唔知道有好多野已經發生左係佢地身上﹐我為我忽略左佢地﹑為我既自私而難過...
係呢個時候﹐我對於所有social﹑識新朋友既事都已經fed up﹐今日田徑隊o'night我真係好唔想識人﹐已經自己摺埋左...夠喇﹐我個腦已經放唔落咁多複雜既人際關係...
我既生活可唔可以簡單d？我只係想我同我既朋友可以開開心心咁生活咋...

>>November 18, 2002 at 1:46:14 PM GMT+8

2002 年 11 月 15 日 星期五 【晴】

見到KEVIN個INFO﹐我都有D同感...
係呢個微涼既季節﹐當一個人行經火車站天橋﹐一陣冷風吹過﹐又見到一對對走過﹐真係會諗下﹐如果呢個時候有人為我擋住寒風有幾好...
當身邊既朋友開始一雙一對﹐見到自己一個人既狀態﹐真係會有D衝動去搵番個可以SUPPORT我既膊頭。但係再諗深一層﹐就咁去搵一個﹐目的只係咁膚淺既話﹐又意義何在？咁同果D不知情為何物既細路又有何分別？
搵一個岩既人好難﹐即使搵到﹐萬一開始左發現唔係好岩﹐個問題就仲大。WHO KNOWS？未開始可能會以為好岩﹐將所有自己認為既美好形象套落對方身上﹐為對方做出假象去呃自己﹐又為自己戴上假面具去討好對方﹐咁有咩意思？到頭來發現大家唔夾﹐你睇唔順我呢樣﹐我睇唔順你果樣﹐最終分手收場﹐一切只係空歡喜...
談一場唔愉快既戀愛我冇興趣﹐只少﹐我相信兩個人要有溝通先會開心﹐冇共同話題點會有計傾？點可以相信一見鍾情？三唔識七﹐點開始呀？拍拖唔係靠個樣架...我亦都唔覺得識左好耐既老朋友會有得發展﹐太熟喇﹐已經冇咩刺激﹐再者﹐個ROLE已經FIX左﹐唔會改變﹐如果要變﹐淨得一個可能性﹐就係變得毫無關係；由老朋友轉換為情侶只會破壞友誼﹐除非雙方都有咁既諗法﹐但如果有呀﹐都一早開始左啦﹐使乜等咁耐？
唉...好無奈﹐我杯茶究竟幾時先會去到我身邊？

>>November 16, 2002 at 7:04:40 PM GMT+8

2002 年 11 月 15 日 星期五 【晴】

又一個禮拜...
中大精英賽已經過左喇﹐我得第三﹐跳到145﹐算係咁﹐有個交代﹐但係148真係差少少﹐我感覺得到﹐所以有少少唔開心。Anyway﹐見到果個傳說中既156﹐雖然佢冇跳呢個高度﹐不過佢真係跳得幾好架﹐第一都係實至名歸既。

星期四就去左睇陳綺貞CONCERT﹐嘩！冇得頂啦！我都未去過CONCERT可以玩得咁投入﹑咁HIGH既﹐成場都可以企係度睇﹐我覺得個FEEL好正架！美中不足既係﹐我又唔係好出得聲﹐個人又TIRED﹐唔可以同阿婷癲番晚添﹐真係唔好意思﹐睇睇下仲已經有D眼訓﹐但絕對唔係因為陳綺貞囉﹐係我本身有問題﹐所以一番到屋企冇耐就訓左喇。
講真﹐呢排越黎越夜訓﹐仲要耐唔耐就通頂﹐再係咁落去﹐我驚我有一日會一睡不起...

尋日就舊生會BBQ。好忿怒囉﹐唔知點解條數亂到嘔﹐我都唔知點計好﹐真係難為我呢個咁地位低微既財政。又好唔開心囉﹐冇乜燒過野食﹐我都唔明點解我燒左六隻雞翼但係食得果一隻囉。又冇乜同佢地吹水﹐好難得先會見到班HKU人架﹐佢地好日都唔番黎一次﹐難得一見又冇乜時間同佢地聚﹐就算佢地散左之後去食糖水﹐我都因為太TIRED而冇去﹐好難過呀﹐但我真係好好好眼訓﹐頂唔順先番屋企咋。筠﹑心﹑小海豹﹑文仔﹑輝﹑旋...佢地咁忙﹐唔知幾時先再有機會見喇...

>>November 16, 2002 at 6:39:14 PM GMT+8

2002 年 11 月 10 日 星期日 【晴】

今日係比賽前最後一次練習喇﹐跳到145﹐都算係咁啦﹐我都唔強求跳番學界果個成績﹐話哂都冇做運動咁耐﹐又老喇﹐隻腳唔聽使。但係﹐有可能星期三會跳得比宜家好﹐話哂都有人壓住嘛﹐果個人仲勁過將軍﹐可能又會迫到我跳高d~~之但係﹐新傷舊患一齊黎﹐真係擔心星期三個比賽發揮唔到平時水準......
我隻腳又痛喇......真係麻鬼煩﹐成日要就住就住﹐想去盡d都唔得......

Miss韓竟然問我番唔番章魚度練﹐講真﹐如果要去我早就去左啦﹐既然當初我為左A-Level放棄左﹐就唔會宜家無啦啦走番去。太麻煩喇﹐係中大練咪幾好﹐Miss韓都教得幾好丫﹐又唔係話章魚教就一定掂既﹐而且又要我走黎走去﹐我又唔想﹐佢迫得太緊﹐我咪仲傷﹐都係遲d先算啦﹐宜家咁忙都拎唔到時間去體院架啦﹐咪搞我！況且﹐係中大我都唔會頹練既﹐話哂都係我興趣﹐有時間既我都會放多心機落去﹐我都想挑戰自己既紀錄架嘛﹐冇目標又點會進步？我要努力！

......不過睇黎﹐我都係要搞掂左我果n份功課先得......

>>November 11, 2002 at 5:48:59 PM GMT+8

2002 年 11 月 8 日 星期五 【晴】

灰...X3丫唔該~~~
睇唔到杰倫concert...
約人部聚食飯去唔成...
最重要既係﹐聯校畢業典禮果日我竟然要上書通！真係想走左佢算...但我又唔想寫文﹐雖然只係一千字...
唔開心囉...

>>November 8, 2002 at 5:59:53 PM GMT+8

2002 年 11 月 2 日 星期六 【晴】

今日去左陳六記食飯﹐成個月冇去過喇﹐依然咁好食﹐依然咁多人~~
宜家越黎越鍾意係上水食野﹐可能係因為係上水食既機會少左啦﹐比起以前﹐日日都係上水食﹐真係食到厭呀。睇番果個講上水小食既hp﹐真係好懷念以前一得閒就去食tea既日子。個hp入面講m記果段簡直就係我地以前既生活啦﹐m記係一得閒就會去既地方﹐一黎係d野食比較平（某d啦）﹐二黎係果度位多﹐傾耐d都唔會比人趕丫嘛。宜家就唔會去喇﹐除左果日開會去過﹐之前一次都真係好耐喇﹐唔係呢邊番學﹐m記就變得唔就腳啦﹐又冇人會再一齊去果度食tea吹水...
講下講下﹐真係好想再去食明記腸粉同廣成紅豆冰呀~~一定要搵日去一次！

>>November 3, 2002 at 2:45:46 PM GMT+8

2002 年 11 月 1 日 星期五 【晴】

今日我地幾個中同gathering﹐我覺得有d野真係唔同左。只不過一個月冇見﹐幾個人比我既感覺真係完全唔同哂。文仔突然間好似老左好多﹐明顯殘左﹐佢話佢好多野做﹐好忙﹐差唔多通頂冇得訓﹐要搞hall莊﹐我覺得好恐怖囉﹐晚晚開會開到咁夜﹐又咁多野做﹐簡直收買人命。至於阿俊﹐成個人唔同左咁﹐個style唔同左﹐不由得講番句﹐smart左又靚仔左﹐但係好似靜左﹐搞到我都唔知同佢講咩好。或者...唔淨止同佢一個﹐我覺得同佢地都好似冇左一d共同既話題﹐有時候真係唔知有咩好傾﹐可能呢個係我個人問題啦﹐因為我見高芬同佢地都係咁好傾。但我覺得﹐佢地真係變左。
可能﹐好多野係我地不知不覺間已經唔同哂﹐入左唔同既U﹑Dept﹐經歷都已經唔同哂﹐圈子都唔同左﹐中同自自然然就少見。有好多野﹐已經番唔到去果個時候果種簡單既生活喇...
唔講唔覺﹐我今日梳頭先發覺我d頭髮原來已經長左好多﹐果然係好不知不覺...

>>November 2, 2002 at 5:35:41 PM GMT+8

2002 年 10 月 27 日 星期日 【晴】

我想找個地方躲起來　沒有煙味　沒有是非　沒有肥皂劇裏的對白
我想找個地方躲起來　沒有Guitar　沒有依賴　沒有約會時　的期待
離開我熟悉的城市　忘記我自己的名字　說沒有結局的故事
你不想聽　我就消失
離開我熟悉的桌子　拔掉我身上的電池　點掉我臉上的黑痣
在地平線上　消失
我想找個地方躲起來　沒有電話　沒有災害　沒有那麼多的電視台
我想找個地方躲起來　沖了馬桶看著水流　我躲在廁所
不想出來　不想出來　不想出來

>>October 28, 2002 at 2:18:18 PM GMT+8

2002 年 10 月 25 日 星期五 【晴】

唔開心...今日第一次自隊兩鑵...
原本今日要傾份Gp presentation﹐我努力左好耐﹐不過到傾果一刻我都係未睇哂﹐一黎係因為真係睇唔明﹐每一段都睇左好耐﹐二黎係我冇用心咁睇﹐用左好多時間發夢﹑小睡﹐我真係tired...mentally...
我真係覺得好灰﹐好似做咩都做唔成咁﹐睇果少少野都睇唔哂。睇番本organizer﹐d mid-term﹑assginment﹑presentation重陸續有黎﹐試問我點拆得掂？
突然間好想放低哂所有野﹐咩都唔理走左去﹐邊個都唔理﹐乜都唔理...
好想有人撐﹑好想同人講好多好多野﹐但我講唔到﹐亦都冇人知...
有冇人睇緊呢個Diary？可唔可以出個留言撐下我﹐或者比我知道有人知我寫左d咁既野都好丫...

>>October 27, 2002 at 8:55:28 AM GMT+8