2002 年 12 月 8 日 星期日 【晴】

《幸福巧克力》
現在﹐每一晚都有幸福降臨﹐因為對我而言﹐幸福就是滿滿的一杯熱巧克力。它陪我走過微涼的夜﹐陪著我挑燈夜讀。雖然我愛咖啡的香﹐但更愛巧克力的甜。幸福不過如此...


P.S. 相信下sem更懂幸福為何物﹐因為take左唔慌happy既human happiness...

>>December 9, 2002 at 2:30:52 PM GMT+8

2002 年 12 月 7 日 星期六 【雨】

再一次證實自己有幾頹..
全屋冇人﹐一條友坐係堆lecture notes前面﹐由1400至0100﹐估唔到我都只不過係睇左兩個topic咁大把﹐睇得果幾條題目...有書唔溫只係不停地發夢。似乎我唔只頹﹐仲缺乏危機意識﹐差唔多完全唔當final係咩一回事...冇乜心機﹐冇乜原動力...
不過﹐令我欣慰既﹐係我原來仲識驚﹐雖然只係好少好少。
唔開心就有dd囉﹐d lecture notes其實好有趣﹐只不過係我唔夠時間睇﹐我要被迫放棄﹐狂谷d question喇...唉...><

>>December 8, 2002 at 5:49:53 PM GMT+8

2002 年 12 月 6 日 星期五 【雨】

睇到阿哥既homepage﹐我真係好羨慕...好羨慕果d有理想既人﹐有明確既目標﹐對生活有所感受﹐或者﹐呢d就係我所冇既野...
我自己都好想知﹐究竟我既生存目標係乜野﹐我既理想又係乜野。我對所有野都好似冇乜感受﹐就連自己既去向都唔清楚﹐一個人既時候就連決定都做唔到...到左宜家呢一刻﹐我都仲迷惘緊﹐究竟soci會唔會係我最後既方向﹐我應唔應該繼續讀落去？連適唔適合我都唔知...如果佢唔適合既話﹐仲有咩適合我？
迷路既感覺﹐可能由此而生...

>>December 7, 2002 at 5:07:56 PM GMT+8

2002 年 12 月 5 日 星期四 【晴】

咁就考完一科...正確d係炒左一科...
溫左等於冇溫﹐都唔明佢d terms做乜﹐好彩有MC﹐唔係一定肥梗！
之後落左去dept拎番上次份intro soc assignment。阿亮唔使咁手緊呀？仲低分過上次﹐但我自問比心機過上次喎﹐唔係掛...??
我對Soci既興趣係越黎越大﹐但係同時﹐我又越覺得我自己對呢科真係冇乜能力﹐佢講既野我聽唔明﹑睇唔明﹐更加apply唔到﹐係我冇心機呢？定係冇天份？我都唔知呀...自己本身就越黎越頹﹐已經去到一個不能自拔既地步﹐算啦...就比我頹廢埋呢個sem啦﹐我唔想迫自己。荒廢一個sem﹐唔係好過份丫~~

仲有四個final﹐星期一仲要交Deaf既paper﹐我仲要努力埋佢...

>>December 6, 2002 at 5:40:44 PM GMT+8

2002 年 12 月 3 日 星期二 【晴】

唉...Durkheim﹐唔通我真係要死係你手上？？
我唔明﹐好唔明﹐點解我睇左咁耐都唔明？我已經好努力好努力咁去理解﹐不過似乎我天資有限﹐get唔到。唔明都照吹﹐我覺得我好威囉﹐執哂d point出黎﹐但係點都砌唔埋一齊﹐卒之宜家寫到一鑊泡﹐我都唔想執喇﹐仲差個critique未寫﹐但我諗唔到喇﹐嚴重腦閉塞﹐聽日先算啦﹐仲要搞埋chin soc既雞精﹐之後仲要溫intro soc﹐好多野做﹐同時又好tired。
一日飲兩杯咖啡﹐係咪唔係幾好呢？就黎勁過小彩喇﹐不過好彩我唔會因為飲咖啡胃痛囉。
過埋星期一會輕鬆d既﹐我諗...

>>December 4, 2002 at 11:18:13 AM GMT+8

2002 年 11 月 28 日 星期四 【晴】

Paper既生產線差唔多完全停頓...

今日好威...我放左Prof. Susanne Chan飛機...真衰...我尋日同佢make左appointment九點﹐我本來七點就起左身﹐點知諗住訓多陣就出事﹐一訓訓到八點九...點趕都趕唔切啦...我份draft冇得consult﹐搞到我宜家想執都無從入手﹐睇黎都係死得架喇...

下晝走書通去左東華聯校畢業禮﹐由於我果form得我一個未去過﹐所以好順利地﹐得我一個冇獎囉既應屆畢業生同班form 6一齊坐...好無奈...不過算啦﹐話哂都係一個難得既機會﹐以後冇架喇﹐又未去過喎﹐就算冇人陪我﹐我都唔覺得悶。但係個個都要我幫佢囉場刊﹐搞到我個袋勁重﹐我隻手原本又已經廢左武功咁﹐好唔開心囉...
身為中大人﹐係中大連校長Prof. King既真身都未見過（超近距離果隻）﹐宜家竟然係東華畢業禮先見到佢﹐班中學生未入U都見到﹐幾唔公平呀~~
七年時間好似咁快就過﹐不過都唔奇丫﹐今日先同呀筠佢地講起﹐我地一個sem眨下眼就過﹐又final﹐但好似乜都冇郁過咁。宜家d時間好唔等使﹐唔夠時間做咁多野﹐搞到成日都唔夠訓﹐精神唔好之餘又要病﹐一d都唔好玩囉~~~
今個sem唔掂就下個努力囉﹐都預左架啦~~嘿...我都話我係死頹精...

我發覺我越黎越唔鍾意香港島...
做乜鬼野條街硬係要咁多人架！一個人occupy到既area都唔夠2m x 2m呀﹐好迫呀﹐好討厭呀！最憎咁多人既地方﹐好彩唔係HKU讀﹐唔係實玩死我。

>>November 29, 2002 at 6:07:51 PM GMT+8

2002 年 11 月 24 日 星期日 【晴】

唉...又開始趕paper既日子...我呢兩個禮拜之內要交四份paper﹐但我下星期一已經有psy quiz﹐都唔知點死。paper既進度好慢﹐因為我根本唔想做...
今日為左份paper﹐我冇去聽「色情文化週」既talk﹐亦都冇去training﹐miss韓話﹐「你都算係校隊既﹐不過唔去練就好難講喇。」我知佢講下笑串我﹐但都幾灰囉﹐其實係我自己唔係好想去...之不過﹐就算我冇去﹐我都係做唔哂份paper﹐仲灰﹐因為我唔想通頂呀...
除左份individual﹐我睇其他都係隨緣啦...

死喇﹐個頭又開始痛...

>>November 25, 2002 at 5:22:49 PM GMT+8

2002 年 11 月 23 日 星期六 【晴】

今日一大班親朋戚友去左Poly同哥哥影畢業相。我呀哥著起件袍都不知幾英！不過佢今日既職責只係人肉佈景板﹐不停咁比人影相...
真係話咁快﹐呀哥就畢業喇﹐佢挑燈夜讀﹑狂寫programme既日子好似只不過係幾日前既事﹐但一眨眼﹐佢就畢業喇﹐宜家仲要去社會做野﹐好彩以我呀哥既能耐﹐佢下個月就唔使再量地喇。呢個年頭﹐有份工做下已經係好好﹐聽佢講個老闆佢以前都有幫過手﹐又有friend一齊係果度做﹐我諗佢應該ok鍾意份工既﹐因為份工既性質同佢既興趣好相近。我都好開心呀﹐因為宜家要搵一份工難﹐要搵份有興趣既仲難嘛！不過﹐唔知佢對當初既理想﹑佢最大既興趣仲有幾大既憧憬呢？希望佢可以做得開開心心咁就好喇~~
惻日見到好多畢業生著著件袍影相﹐好開心﹑好感動呀~~大學畢業係一件好開心既事﹐我係度諗﹐幾年之後既我﹐又係咪咁著著件袍﹐係中大通山走咁影相呢？

>>November 24, 2002 at 2:15:09 PM GMT+8

2002 年 11 月 20 日 星期三 【晴】

好開心﹐好感動﹐因為我知道﹐我仲值得有人去關心。

尋晚好早就訓左喇﹐一黎冇mood﹐二黎食左藥﹐藥力發作就訓左﹐所以今日精神唔錯﹐不過我都搞到成八點先起身...
今日去左拉記搵書﹐做Chin soc﹐都唔知做咩好﹐求其執左兩本就落番信和﹐因為今日要見Prof。好無奈﹐同個Prof有d言語不通﹐唔知邁英文定講普通話好﹐又唔係好知佢想點﹐睇黎佢都唔使再係我地既生活中出現喇...
見完Prof﹐冇野做就番左屋企（其實要training﹐不過我冇去﹐唔想去呀~~）。嘩﹐我都好耐未試過咁早番屋企喇﹐都不知幾好﹐又可以狂食零食（搞到宜家冇得食...）﹐仲有....我都唔係好記得我做過咩喇﹐算啦﹐總之就係開心啦！
不過我諗下次既機會係考final既時候既事喇﹐仲有一個禮拜﹐我都要做埋呢個禮拜好好睇睇d野先得架嘛！

>>November 21, 2002 at 4:05:12 PM GMT+8

2002 年 11 月 19 日 星期二 【晴】

因為今朝心情極之不好﹐又有d唔舒服﹐所以走左堂pe﹐雖然今日應該係最後一次練開波﹐下堂要考試喇﹐不過﹐who cares？
我好耐都冇試過﹐成日都黑口黑面喇﹐雖然對住某d人都仲笑得出﹐但我實在唔想應酬﹐唔想出聲﹐唔想講野﹐唔想有人理我﹐咁就過左一日。我冇力去笑﹐冇心情搵人講野...
我知道﹐係呢個時候﹐冇乜人會了解我﹐我亦都知道﹐要搵到一個唔講野都知你發生咩事既人好難﹐甚至係冇﹐我明知道呢個係事實﹐不過我唔想去接受...
雖然唔應該宜家先黎講﹐不過我真係想話﹐今日比我副「臭臉」嚇親既人真係好無辜﹐因為唔關佢地事架...

>>November 20, 2002 at 2:29:46 PM GMT+8