2003 年 2 月 2 日 星期日 【晴】

今日原本係應該係屋企做功課既﹐係就係屋企﹐不過我訓到兩點先起身﹐食完野﹐睇左陣電視﹐四點幾又再訓過﹐訓到差唔多八點起身食飯。今日訓晏覺冇比人嘈醒﹐好開心！食完飯﹐一家人圍埋一齊睇《Signs》﹐套戲好過癮囉﹐成日都比佢嚇一嚇咁﹐之但係個theme好似唔知點咁﹐真係估唔到佢想講d咁既野囉。

睇番sara既diary﹐真係有d唔好意思囉﹐都放左咁耐假﹐但一份reading都未睇過﹐好差呀！要發奮先得喇...

>>February 3, 2003 at 6:12:03 PM GMT+8

2003 年 2 月 1 日 星期六 【晴】

拜年第二日~~
今日中午飲完茶﹐送左姑媽佢地走之後就去左細舅父屋企喇﹐我又一如尋日﹐去到冇幾耐又搵地方訓﹐好無耐﹐今日冇乜時間訓﹐岩岩訓著又比電話嘈醒...遲唔打黎早唔打黎﹐次次都係訓緊晏覺就打黎﹐真係...
開始覺得自己呢幾日真係冇乜心情同親戚打交道﹐好少講野囉。新年流流﹐係咪唔係幾好呢？
食完飯﹐坐到十一點幾就走喇﹐行到去地鐵站﹐佢地又話去舅父屋企再戰喎﹐我想番屋企﹐所以就一個人搭車番黎喇﹐好無聊呀﹐不過如果唔係咁﹐我又點可以早少少訓呢？去人地屋企就算訓﹐始終都要起身番屋企嘛...都係屋企好...
我幾時變得咁痴家？

>>February 2, 2003 at 5:40:50 PM GMT+8

2003 年 1 月 31 日 星期五 【晴】

今日既第一個行程就係去探姨婆﹐佢係一年前就入左護老院住喇﹐今次係佢入左去以黎我第一次去探佢。入到去間護老院﹐我覺得果度好細﹑好焗﹐但有好多婆婆住左係果度﹐果度比我既感覺係一個環境唔太好既居住環境。見到姨婆﹐我地一行七個人圍住佢同佢傾計﹐佢好似好感動﹐眼濕濕咁﹐可能我地真係好少見啦﹐又係新年第一班去探佢既人﹐搞到我都有dd感動。就算有幾多人照顧呢班老人家﹐最重要既始終都係家人﹐送佢地入護老院唔係唔好﹐起碼叫有人照顧﹐不過家人一定要多d探佢地﹐同佢地傾計﹐佢地先會開心架...
跟住就去左舅父屋企喇。一去到冇耐我就訓左喇﹐一黎好似冇咩做﹐二黎係真係眼訓啦﹐因為我一訓就由三點幾訓到七點幾﹐完全唔知訓左咁耐﹐直至比個電話嘈醒﹐如果唔係就會訓到食飯先比人叫醒。食完飯冇幾耐又番屋企喇﹐咁就完左一日拜年既行程喇~~

>>February 2, 2003 at 5:32:32 PM GMT+8

2003 年 1 月 31 日 星期五 【晴】

新年快樂~~~

>>February 1, 2003 at 6:36:04 PM GMT+8

2003 年 1 月 30 日 星期四 【晴】

一起身就係午飯時間﹐落左去飲茶﹐之後姑媽同呀爸佢地入左元朗行﹐我冇去﹐因為一點鐘要開舊生會。卒之都決定到三月搞咩活動﹐雖然都幾頹﹐不過好過冇野搞丫嘛！之但係﹐個annual party就麻煩d喇﹐都唔知搞咩好...最麻煩既係﹐我仲未搵上年果個囉番封信！唉...真麻煩！
開完會就番左屋企啦﹐又訓過﹐呢排好似渴睡症咁﹐訓醒冇耐又訓過﹐都唔知做乜鬼野...訓到姑媽佢地番黎﹐舅父佢地都黎埋﹐到食飯先至識起身囉...食完飯成班人又話去行花市﹐上水果個好細﹐行左一陣就行完喇﹐又冇乜野睇﹐唔似得尋日維園果個咁多唔同既野賣~~
行完花市﹐比阿俊耍左入元朗b仔涼粉食糖水！係搭車去旺角途中﹐我睇到一幕好溫馨既場面~~係上水至大圍期間﹐一個老伯同佢既孫仔坐係我對面﹐個孫仔拎住一個「哈姆太郎」既吹氣玩具﹐一路係度玩﹐我見得到個老伯個樣好"支力"好眼訓﹐但仍然同個孫仔玩﹐好錫個孫仔﹐真係好好呀...唔識講...
之後﹐一個淨係去過一次既人就帶住一個幾年冇去過元朗既人去b仔涼粉...@@"好彩﹐都搵到...我從未食過一d會食飽人既糖水囉﹐好大碗﹐好好食﹐又真係好飽...^^"不過﹐又好夜番屋企﹐好鬼眼訓...成三點先番到屋企﹐聽日又要出去拜年﹐玩死...

>>February 1, 2003 at 6:32:23 PM GMT+8

2003 年 1 月 29 日 星期三 【晴】

今日約左billy睇《catch me if you can》﹐本來阿roy都有份架﹐點知佢要開會冇得去﹐哈！好不幸！唔緊要﹐我地兩個都可以成行！
套戲我覺得ok啦﹐不過唔太突出囉﹐可能我冇乜感覺﹐呵！
睇完戲﹐好無聊﹐因為我要「hei」到七點先出旺角食飯﹐好彩billy係度﹐一齊周圍發癲先冇咁悶！我終於食過queen's既麵包喇﹐又好耐冇食過菠蘿包﹐又真係幾好食﹐又唔貴喎﹐三蚊咋﹐抵啦~~
好不容易捱到七點幾去食團年飯﹐三圍﹐算多人架都~~食完飯就同高芬佢地落左維園行年宵﹐原本係諗住搵呀鉗既﹐點知去到佢檔口佢又唔係度看檔﹐所以都係冇見過面囉。但估唔到我有收穫囉~~首先係有栗子食﹐好開心﹐果包栗子仲要好似黑洞咁﹐食極都仲有﹐笑死我！之後仲有一個萬年曆同一隻公仔﹐全部都係阿b送既﹐在此謝過~~~呵~~~
行到勁"支力"﹐好眼訓﹐就番屋企﹐點知好唔好彩﹐坐巴士去到紅磡先知趕唔到最後一班火車﹐好唔開心囉﹐因為要行到落佐敦先有van仔番屋企﹐初頭仲要搵唔到添﹐所以一上車就訓左喇﹐番到屋企唔使講梗係怒訓啦~~
咁就過左短暫年假既第一日喇...

>>February 1, 2003 at 6:00:54 PM GMT+8

2003 年 1 月 28 日 星期二 【晴】

好耐冇去練習﹐今日同阿俊一齊練...好無奈﹐我諗真係耐冇練啦﹐我竟然跳唔起！但我好明顯唔係冇力囉﹐唔知做乜鬼﹐仲要等到韓雪黎我先抽筋﹐真係吹漲...練完又勁"支力"﹐好彩仲有足夠既氣力開埋個會佢﹐如果唔係就麻煩喇。我都估唔到個會可以咁「馬拉松」﹐由六點半開到十一點幾﹐我都未試過！不過﹐個會好搞笑﹐因為佢地諗d野實在太搞笑﹐如果付諸實行﹐個春茗一定好好玩啦~~
呢排番屋企都會聞到好香既燴番薯味﹐都唔知係好事定係壞事喇...

夜晚番到屋企﹐終於收到grant loan封信喇！我好開心呀！雖然唔可以full﹐但係grant & loan都有六至八成﹐都算係咁啦﹐我諗都夠用既...太好喇﹐我諗可以做到一部份我想做既野喇~~

>>January 29, 2003 at 5:28:17 PM GMT+8

2003 年 1 月 27 日 星期一 【晴】

今日開左久違了既街節e﹐好開心又可以見番咁多人聚埋一齊！我地好威呀﹐煮左d野食全部拎哂過去秉芬﹐一齊開餐﹐食完先開會。午餐肉﹑芝士腸﹑咖啡牛腩﹑蒜蓉金菇西蘭花﹑仲有Michael贊助既雞翼﹐都算豐富啦~~不過美中不足既係d飯生左d囉...不過唔緊要﹐都影響唔到我地「一家人」食飯既氣氛~~yeah~~
開完會之後又一齊去左沙角食宵﹐我就即刻行使左要kenny請食宵既權利喇。一路食一路吹水﹐仲影左好多無聊相﹐好開心架~~呵呵~~仲知道左fion個slogan添喇~~kenny仲唔死？
可以同一班一齊左野既人咁friend真係好開心架﹐乜都玩得一餐﹐乜野都可以囉黎講笑﹐希望仲可以keep住係咁就好喇~~亦都好希望以後合作既都會咁好玩啦！

番埋聽日就放假喇﹐又有得休息﹐真係好~~不過都仲有功課做...

>>January 28, 2003 at 6:24:49 PM GMT+8

2003 年 1 月 26 日 星期日 【晴】

我地UC SOC仲唔破紀錄？成為最早完AGM既系會呀﹐六點半開場﹐八點半就走得﹐仲因為咁﹐以少半個鐘既時間贏左kenny﹐為我贏得一個早餐/tea/宵夜（未決定）添！呵~~
初頭都好緊張﹐因為唔知會有咩人問d咩問題﹐不過現莊諮得好輕鬆﹐我地先冇咁大壓力咋﹐不過到我地比人諮﹐要我答問題果時都會好緊張架﹐因為我都係驚講錯野嘛~~
諮完之後同兩莊既人一齊去左火炭食宵﹐咁早﹐都唔算食宵既。好耐冇食過雞粥喇﹐好開心呀！不過﹐今日胃口唔係好好﹐算係食得少野喇﹐如果唔係﹐點會仲有野淨？

一日既會又完喇﹐但聽日﹑後日﹑星期五都仲有會要開﹐真係....@#&*x+?

>>January 27, 2003 at 5:42:15 PM GMT+8

2003 年 1 月 23 日 星期四 【晴】

一起身就知有唔妥...喉嚨激痛﹐痛到講唔到野﹐番去上reading soc﹐都好耐冇試過用咁細既聲同人講野﹐嚇親billy...上完堂﹐再開多個會﹐問題仲大﹐因為我好暈﹐完全行唔到直線﹐唯有食完飯之後即刻走去clinic。醫生話感冒初期﹐又影響到平行既機能喎﹐所以暈下暈下。睇完醫生仲頂唔順﹐完全食唔到tea啦﹐走左去高芬個宿度怒訓﹐訓醒又再番去開會...「長命會長命開」...「長開長有」...
宜家喉嚨都仲好痛﹐又好暈﹐我好耐冇試過早訓﹐今日點都要喇...
唔好病呀...要捱埋呢個月架...

>>January 24, 2003 at 4:29:58 PM GMT+8