2003 年 9 月 3 日 星期三 【晴】

今日發生左件大事﹐因為fion入左醫院！
話說上完堂之後就番左屋企拎野﹐再同阿偉出左威爾斯排期覆診（被迫...仲要排到下年﹐有冇搞錯！）﹐順便拎月餅（yeah~~）...係途中﹐就收到anna個電話﹐話fion病左﹐所以我就係沙田買定菜﹐趕番宿整野食比佢喇。我生平第一次煲粥呀﹐好彩得萍姐同阿烽既幫忙﹐我先可以做到咁多野...煲粥都ok好樣架﹐不過我未食過﹐唔知好唔好食。fion就食粥﹐我地當然組聚加大ken就食anna整既忌簾蘑菇汁意粉同我整既豆腐滾菜湯。食完野﹐fion番左房﹐我地就去左打乒乓波啦﹑打康樂棋﹐同阿烽玩康樂棋中途仲差d搞到我咳死﹐因為我整左成啖蜜瓜奶入氣管﹐死人陳曉烽...笑死我...
之後又無無聊聊咁係com度睇雜誌﹐點知anna突然間走落黎話fion燒到40度！勁驚囉果下﹐即刻叫明叔call白車送佢入院﹐我地兩個同房當然都會去埋陪佢啦！由十點搞到十二點幾...好彩﹐冇事﹐之後佢就番左屋企lu﹐我同anna就番宿喇...
有驚無險！

>>December 2, 2003 at 3:45:38 AM GMT+8

2003 年 9 月 2 日 星期二 【晴】

今朝係早堂連續既第二日﹐好難頂...同edwina行左四個字有多先落到elb﹐仲要遲到﹐好冇mood。因為我上堂冇上既關係﹐要part groupmate超麻煩﹐好彩撞到gary同sylvia﹐差兩個psy人就搞掂﹐都係等星期一先再搞啦...michael bond都真係幾得意﹐不過workload又...點解d咁得意既prof既堂硬係咁多野做既呢？之但係無論佢幾咁有趣都好﹐我都係頂唔住睡魔既引誘﹐我都係差唔多訓哂﹐蝕呀！
跟住有時間就番左宿洗衫﹐下晝再上愛情哲學。越黎越覺得我應該唔好去上堂﹐上堂都係訓覺﹐不如慳番...
上完堂﹐同阿偉去左買書（又破財）兼買野食﹐再落左恆生煮飯食﹐我又失手喇﹐不過唔嚴重﹐再者﹐只要唔係難食﹐都冇問題啦~~^^"
跟住差唔多時候又上去院慶傾莊﹐之但係...好奇怪既感覺﹐好格格不入﹐唔知點咁﹐冇乜動力去加入...算啦﹐再睇定d先...好唔自在﹐所以選擇走落會室搞掂明德壁既細組旗﹐加上大ken同阿包既幫忙﹐總算清左d野﹐不過真係要記得搵大組長搞掂d野﹐雖然我唔想做野﹐但似乎都唔可以成日拖住su...搞掂﹐上番去傾莊既地方﹐佢地傾得好興起﹐我更加唔想留係度﹐咁岩阿偉番黎﹐就同佢過左思源。開始覺得﹐思源應該係我地黎緊呢年洗得最多錢既地方...同佢傾左陣﹐食下野咁就番番宿喇﹐都唔理得AFFA三成員佢地搞左幾耐﹐我所加入既又唔係咩大post﹐所以都想置身事外...

>>December 2, 2003 at 3:44:36 AM GMT+8

2003 年 9 月 1 日 星期一 【驟雨】

今日係fion牛一呀~~~咁大件事﹐我地梗係搞大佢啦~~
一早起身上早堂﹐但尋晚又夜喎﹐又搭唔到八點車﹐搭左八點半﹐遲左上soc prob﹐不過算啦﹐第一堂之嘛﹐再者﹐遲到都慣架啦上sem...估唔到﹐jennifer都幾有趣架喎﹐雖然workload都好似幾係野﹐不過有helen tuto﹐仲有個咁得意既prof教﹐都應該捱到既。跟住上多兩堂french﹐個miss個樣﹐好似電話廣告果個男人...個樣﹐好得意...都算幾好人﹐不過好明顯﹐我d french已經比番哂summer course個miss...唔得！要追番先得﹐如果唔係都唔知以後點上堂﹐都唔知佢講乜！
又上完兩堂「釣魚堂」﹐就去食細o組聚開學飯﹐一黎就聽到個唔知開心定唔開心既消息﹐就係...八號風球就黎打到黎﹐開心既係﹐唔使上下晝既堂﹐但唔開心既係﹐下晝既堂我都幾有興趣上下﹐而最重要既係﹐今晚個902聚點算？！唔通真係貴人招風雨？？但係fion冇出門喎...
同班仔女聚左一聚﹐就出左去一陣﹐跟住又番番中大﹐準備我地既902聚喇。
今晚既活動就係留係宿煮飯仔﹐雖然出面橫風橫雨﹐但無損我地既貪玩心態同為fiob慶祝既熱情。我好努力咁整左呢期最拿手既蒜汁意粉﹐不過都有少少失敗﹐始終咁大堆頭既意粉真係好難控制...我﹑fion﹑anna﹑flora﹑烽﹑肥ken﹑剛﹑michael﹑包﹑julie﹑仲有後join既148（杰﹑普﹑何b）同john c﹐就係咁食左成台既野食﹐好豐富﹐好開心﹐因為好似一家人食飯咁~~我仲餵左好多人食提子﹐我地AFFA係咁塞比fion食﹐搞到佢問我地係咪同佢有仇﹐仲認得我塞得最多。傻啦﹐我地邊度有仇架﹐玩下之嘛~~不過阿偉上唔到黎join﹐因為恆生水災﹐佢地全宿要緊急戒嚴﹐做清潔﹐哈！危樓呀~~~都係湯宿好...
我地好好彩﹐得到一樓tutor阿paul同明叔既幫助﹐可以留到九點﹐所以九點之後我地就留低哂所有碗碟比d男仔洗﹐我地就出湯com等喇。係等既期間﹐我地又係度吹水﹐講埋d野都ok白痴﹐不過又好搞笑：去廁所大便既必漏步驟﹑男人裸跑男人沖涼估藝人﹑綠豆「碌」落山既變化...之後名偉上左黎又吹左陣水﹐但實在有d 支力﹐所以148傾莊同anna fion佢地落樓吹水我都冇join﹐留左係房。
咁就過左902聚﹐夜晚冇得出去玩﹐硬係差d野...希望fion玩得開心啦！
902萬歲！

>>December 2, 2003 at 3:43:35 AM GMT+8

2003 年 8 月 31 日 星期日 【晴】

話咁快又year 2喇﹐係冇放過假既情況底下踏入我既第二年...
今日得一堂上﹐就係個愛情哲學﹐因為之前果堂係soc psy既lab﹐應該唔使上﹐所以訓到咁上下先去上愛情哲學。一入到個課室﹐嘩...使唔使咁多人呀？！仲要一大堆soc人添﹐發生咩事？搵左勁耐先有兩個位比我地坐﹐仲要不停咁有熟人...陶國璋都幾搞笑﹐我諗呢個course都應該take得過既...
之後就落左pool side食tea﹐anna後join﹐仲講左個大話比fion聽﹐點解？都係為左比機會我地出去買禮物之嘛﹐我地又點會捨得呃我地既家人呢？唔知點解pool side又勁多熟人﹐又見到爸爸啦﹐見到我個仔仔啦...一開學﹐唔係上堂都見到咁多人﹐都幾開心架~~
食完野就出左旺角﹐今次我同anna忍到手唔買自己野﹐買左禮物先﹐係旺角路痴anna既帶領底下番到去佢同阿烽見到目標既地方﹐不過都係冇買到原本睇中既野﹐反而買左其他﹐希望fion會鍾意啦~~
跟住阿偉首先離隊﹐我就同anna番去睇自己野﹐佢買完野之後就番左去開會﹐而我就自己一個繼續行﹐買定聽日902飯聚既材料﹐準備今晚煮一次先﹐反正都冇人同我食飯~~唔知點解﹐咁都可以買左百四蚊野﹐開始覺得自己係個洗錢既天才﹐不過呢d天才要黎做咩？？
番到宿幾經辛苦先整好我想整既野﹐食完飯仲有外賣糖水食﹐真係食得好飽。至於我既製成品...我覺得ok失敗囉﹐硬係乜都差dd﹐聽日要再重手d先得喇...

今日食左死貓﹐好唔開心...算...因為唔算都唔得...

>>December 2, 2003 at 3:42:45 AM GMT+8

2003 年 8 月 30 日 星期六 【晴】

今朝要早起呀﹐因為要先番屋企執野再車d野入宿﹐我成十一點就番到屋企﹐又坐番表哥架車番宿。真係好鬼多野﹐開始有少少後悔搞咩拎咁多野入宿...不過﹐我似乎仲嫌間房唔夠多野﹐因為下晝又同anna﹑烽﹑阿偉出左沙田ikea買野﹐我見到好似岩用既就執哂番去﹐又見番我隻b bear喇~~又見到好靚靚既床單被舖﹐就忍唔住手買左﹐又見到d好得意既cusion﹐又買埋﹐卒之埋單又用左四百幾﹐痴線架...都唔記得自己買左d咩...
跟住番到cu﹐同阿偉買蛋糕既途中﹐見到偉倫既人（好可怕既粉紅色...）﹐我諗住會見到七輝或者阿筠啦﹐點知望左陣都唔見﹐就唔理佢地「食麵包」既要求行左去睇蛋糕﹐點知再行番出黎﹐死肥筠就彈出黎喇﹐真係好鬼死耐冇見喇﹐佢d頭髮又長左好多咁...既然見到佢﹐梗係幫佢完成個task啦﹐仲影左相添﹐希望佢真係send番比我啦...
之後上去後join湯宿個o week﹐好灰﹐完全唔知自己咩組﹐最後同flora﹑anna﹑烽﹑肥ken入左軒轅﹐求其啦~~不過最搞笑係﹐初時燧人話我係佢果組架﹐我又話想入神農﹐irene都叫我入﹐點知成個function完左之後有個伏羲打比我話我係佢果組﹐咁究竟﹐我應該係咩組呢？呢個﹐係一個謎...唔理lu~~
今日部腦都唔知發咩神經﹐怒中毒﹐係咁自己熄機﹐我都唔知佢想點...好彩...最後都叫做搞掂左...痴線架~~~

>>December 2, 2003 at 3:41:39 AM GMT+8

2003 年 8 月 29 日 星期五 【晴】

今日就係入宿既大日子﹐我要晨咁早起身番屋企準備﹐要執好d野聽日先搬入宿﹐勁頭痛囉搞到我。
由於今日未搞掂部電腦﹐所以我放棄左今日車野入宿既念頭﹐但我自己都執左一大袋野入去﹐重到死！番到校巴站﹐竟然撞到billy同佢個friend﹐原來billy係幫佢個friend拎野入宿~~上到uc﹐一落車就見到恆生班人﹐好鬼嘈呀~~>.< 相反﹐湯宿就...
入到湯hall reg宿﹐又見到何b﹑阿杰﹑john c同阿普﹐雖然佢地好乞人憎（呵呵~~）﹐不過﹐又好親切喎...好不幸地﹐由於佢地既存在﹐又比佢地屈左去玩一個冇乜宣傳既o week﹐一百五十大元咁就飛左去喇...成班死仔﹐兇我...搞左好耐先reg完宿﹐跟住就上左房﹐三樓﹐行兩層樓梯﹐好唔開心﹐仲要咁restrict...跟住又同fion﹑flora同烽搞掂埋我地間房個擺位﹐吹下水﹑執下野咁又到六點﹐咁我就走番落恆生拎番好多我寄存既野﹐又係好多﹐同阿偉拎哂d野上黎之後﹐我地間房就係咁比d雜物攻陷左...實有排執都得啦！我聽日仲有好多野車入黎添！死得！
求其搞掂哂野之後﹐就同fion﹑烽﹑偉出左去食飯﹐食得勁飽﹐又要趕住係開戰之前番黎﹐卒之都係成十點幾先番到黎﹐番到黎見到佢地都入緊水彈喇﹐咁梗係幫手啦﹐但係﹐未正式開始之前﹐我已經玩到成身濕哂﹐都唔知有冇搞錯...等埋班su人莊聚完番黎﹐主角都到齊之後就開戰喇﹐第一樣野唔使講﹐就梗係做edmund啦~~所有人都將手上既水彈全數全力咁掟去佢到﹐真係幾過癮架~~之後就開始混戰﹐成班人都癲架﹐係咁refill﹐我地唔例外啦當然﹐但我算好乖架喇﹐唔似得佢地﹐係咁溝d唔知乜野落d水度﹐又咖啡奶茶﹑洗衣粉﹑茄汁﹑泥﹐連尿都玩埋﹐痴線架...但呢樣咁勁既野既目標都係得一個...開頭我好失望架﹐因為見唔到偶像小集集﹐東哥同阿濠佢地又唔係度﹐好彩後尾佢地自投羅網﹐我都可以一償心願﹐成桶水笠落偶像度﹐同偶像近距離接觸（哈哈~~）﹐但佢都有累到我洗衣粉入眼﹐算扯平啦~~仲有好多襲擊AFFA既人都受到應有既反擊﹐呵呵~~
我地做左edmund五六次之後﹐水戰就係「聯合最強‧振翅翱翔」之中完結﹐個個番去沖完涼之後就去左食宵慶功﹐又係泰源﹐真係好開心﹐一大班人又聚埋一齊食野~~sara﹑大ken﹑賢﹑ellen﹑karen﹑肥ken﹑joman﹑loading﹑edmund﹑何b﹑wendy﹑蜜﹑剛﹑dennis﹑祺﹑john c﹑michael﹑偉﹑杰﹑濠﹑小集集﹑掃把﹑烽﹑普﹐當然仲有最強湯宿既最強AFFA啦！不過john c唔好意思喇﹐如果你未飲夠既話﹐下次再飲過啦﹐其實我都唔係好夠架咋﹐嘿嘿~~
食完宵又番到去我地最親切既張宿吹水﹐係由湯宿出去既途中﹐我地見到豪仔一個人係湯hall整旗海﹐我同阿烽睇唔過眼﹐就走左去幫手﹐跟住又走番去張宿﹐但我真係頂唔順﹐吹左陣水就番宿訓喇...
咁就過左入宿第一日﹐亦都係勁開心既一日！

講左咁耐都唔記得講我住邊﹐就係湯宿315喇！記得得閒黎搵我﹐不過唔好違反個異性探訪時間喎（好似探監咁>.<）﹐我冇乜錢架咋...

>>December 2, 2003 at 3:39:29 AM GMT+8

2003 年 8 月 28 日 星期四 【晴】

Yeah~~好似好耐冇試過組聚喇﹐今日一班元華人又約左出黎玩﹐雖然只係短短幾個鐘...
佢地約左九點鐘係出面等﹐但由於我有十九幾萬樣野未執﹐所以我都係遲左先點出﹐點知大舊仲遲...齊人之後（其實都係差阿bert同eva）就去左尖東廣場果邊個噴水池影相。我地呢家人真係好恐怖﹐只係一個小小既噴水池﹐都可以比咁有想像力既阿爸同阿媽諗到咁多咁可怕既post出黎影相（遲d有得睇喇~~）﹐兒童不宜囉﹐嚇到其他係附近既人都即刻帶自己既仔女離開我地身處既地方...但又真係好好玩喎﹐係我地一家人先會咁做~~
影完相﹐就落左pub飲野﹐人地落pub就係飲酒﹐我地落pub就怒食﹐成班好似一日未食過野咁﹐係咁叫野食。自從上次慶祝勞動節之後﹐我地一家人又有一段時間冇試過坐低講下自己野喇。我地玩大話骰同執骰﹐從中知道一家人既事（其實係八）﹐唔知點解﹐阿媽勁輸﹐我地真係知道佢好多野囉...坐坐下差唔多時間﹐我地又出左個百週年紀念公園果邊坐﹐其間﹐我地講開902聚﹐大舊同阿bert竟然唔記得﹐真係想打佢地﹐但佢地又要組聚黎唔到﹐激死！但係大舊應承左整七色鮮果o者哩糖比fion﹐希望佢真係整到啦...
我地大O一家感情真係好好﹐到今時今日仲有聚﹐希望我地一路都仲可以keep住啦﹐不過﹐要滿足左阿媽d願望先囉...

>>December 2, 2003 at 3:38:34 AM GMT+8

2003 年 8 月 26 日 星期二 【晴】

Ocamp後遺症...
一起身就問幾點﹐唔知點解會覺得勁遲﹐然後爆粗﹐仲開始諗schedule﹐冇schedule就周身唔自在﹐係咁問人今日要做咩﹐一係就不停咁諗要做咩﹐冇野做就一定有d唔妥。發夢都見到人做緊野﹐但自己唔係﹐勁內疚...
我冇可能咁得閒架喎？！

好彩今日有個會開﹐都叫有d世藝...仲交左d手尾比我跟跟﹐好似有番d野做...

>>December 2, 2003 at 3:39:04 AM GMT+8

2003 年 8 月 24 日 星期日 【驟雨】

其實完左個o camp﹐我有好多野想講﹑好多感想﹐但我都冇係閉幕果日講﹐一黎﹐我組織唔到﹐始終我係寫出黎比講出黎更加容易表達﹐二黎﹐freshman唔會想聽﹐三黎﹐我唔想係閉幕出醜...所以﹐我宜家先講。
呢幾個月黎﹐成班人都一齊做野﹐做左好耐﹑好辛苦﹐成個暑假就係工作之中渡過。我果日番屋企﹐先知道我唔係屋企呢排發生左好多野﹐但我一d都唔知﹐屋企附近既樣都好似唔同左咁﹐我突然間覺得好難過﹐因為我又諗起﹐成班oc都係咁﹐因為大O﹐你地都可能好耐冇番過屋企或者係關心一下oc以外既人﹐所有人都為左個大O付出左好多。見到一大班人為左個o camp一齊努力﹐真係好感動！

見到有人講感想提過我個名﹐我好開心﹐但另一方面﹐我又有d慚愧﹐因為我覺得﹐係個camp入面我做既野唔係好多﹐而且做得唔夠好﹐反而比左好多麻煩好多人﹐真係好對唔住。好多人都講得好岩﹐其實我係唔識hold會﹐成日都係戰戰競競咁開會﹐搞到d會好慢﹐一d都唔efficient。有好多野我都唔識做﹐冇乜自覺性﹐唔識得搵野去做﹐搞到好多野都係拖到最後一刻先發現﹐然後再拎出黎講﹐太趕急之餘亦都搞到好亂。

成個camp都係所有人既心血﹐我開幕之前講過﹐只要成個camp行到日程﹐就乜都得！結果﹐只有一個競技行左雨程﹐其他都冇事﹐令到節目部唔使浪費佢地咁多個月以黎既planning﹐令freshman可以玩到佢地辛辛苦苦準備既野﹐呢樣野真係好開心架！係個camp入面令我最印象深刻既﹐係day 3晚會同之後既野。果日晚會之前落左場雨﹐我真係成個呆左﹐因為我好怕所有人既心血會因為落雨而冇左﹐好彩﹐最終都行番日程。直到大組長band show果下﹐我見到佢地好落力﹐雖然有少少緊張（^^"）﹐佢地同john c﹑michael咁多晚捱夜既情景仲係我腦海中浮現。唔知點解﹐去到跳camp fire果下真係好開心﹑好感動﹐差d喊左出黎﹐因為我見到一班freshman都玩得好開心﹐氣氛又好好﹐雖然我冇玩﹐但都感受到成班人既開心…之後係食宵﹐我唔知成班oc玩得開唔開心啦﹐成日比我拉左出去敬酒﹐又滿場飛咁﹐但我就真係好開心﹐因為佢地肯跟我一齊出去玩嘛~~去到閉幕﹐開始既時候直到sharing我都可以控制到自己既情緒﹐但其實當時個氣氛真係好感人﹐見到一班大組長好正經咁講自己一路以黎既感受﹐覺得佢地成班突然間好man﹑好型！但之後一唱營歌﹐就已經忍唔住﹐好彩雞泡係度﹐借左個膊頭比我…

其實一路以黎﹐我對每個部都唔係跟得好多﹐冇乜對個別既部特別熟﹐呢個都係一個遺憾﹐因為我miss左同一班咁好玩既oc一齊玩既機會。至於另一個遺憾﹐我都唔想講喇…雖然﹐搞呢個令到我呢個暑假過得好辛苦﹐不過﹐我得到一d野﹐就係我參與過呢個camp既經驗。可能好老土﹐但我真係覺得﹐參與過呢個camp既回憶先係我呢個假期最大既得著﹐當然﹐識到咁大班又好人又好玩既oc都係一種恩賜啦！

我唔知佢地點睇我﹐但我一路都覺得我地呢幾個月以黎就好似一家人咁﹐我真係好希望以後仲有機會一齊出黎玩﹑仲keep住聯絡…

sara﹑tracy﹑大ken﹑賢﹑edmund﹑joman﹑ellen﹑諾﹑loading﹑kenny﹑cherry﹑karen﹑jade﹑fenix﹑flora﹑剛﹑dennis﹑蜜﹑wendy﹑doris﹑榮﹑何b﹑祺﹑john c﹑michael﹑輝﹑anna﹑fion﹑掃把﹑terry﹑偉﹑杰﹑小集﹑濠﹑魚爺﹑東哥仲有雞泡...多謝你地比左個咁感動﹑咁值得回憶既假期比我！愛死你地呀~~~

>>December 2, 2003 at 3:37:25 AM GMT+8

2003 年 8 月 23 日 星期六 【驟雨】

眼前一亮

當　分離在即　相隔遙遠兩極
要別去的　只能加倍地愛惜
好像雙手一放　雖然充滿盼望
生命都給牽走一片　最好的
將　感情累積　別離才有價值
掛念會將生活空與白　著了色
身在天邊海角　思念不會缺席
再見為了他朝更親暱
讓前路愈去愈有方向

想將感動你的歌唱多一遍
眼前無端一閃亮 帶一點茫然
也許我的眼淺　還是不捨得你望見

想好好地看清楚每一張臉
眼前靈光一閃像照片般留存
來讓你的好鑲進心底　好到永遠

燈　依然未息　鍵琴仍要努力
最後這一曲無需軟弱　像唉息
不是種種改變　都能通過試煉
我信讓我緊握過的手
十年後亦會令我溫暖

還想將感動你的歌唱多一遍
眼前無端一閃亮 帶一點茫然
強忍過的掛牽留落於腮邊

還想好好地看清楚每一張臉
眼前靈光一閃像照片般留存
連淚眼昏花都似千顆催燦美鑽

>>December 2, 2003 at 3:36:48 AM GMT+8