2003 年 12 月 6 日 星期六 【微冷】

今日好叻叻呀﹐因為我竟然會係deadline前一日就搞掂好份paper﹐而唔係deadline前一分鐘﹐突然間覺得自己勁左好多！但其實都比我expect用多左時間﹐今朝九點幾起身就開始睇notes做﹐諗住五點都可以搞掂啦﹐點知做下﹑食下飯﹑訓左個鐘﹑再睇多個鐘電視﹐咁就五點喇﹐但我都只不過做左三分一﹐真係好慢呀！不過之後發力﹐食飯之前已經算寫好﹐食完飯再搞多陣﹐到左十一點已經執好哂交得！我咁大個女都未試過寫多過required一頁咁多﹐cut到我死﹐都唔知cut咩鬼野好﹐真係激鬼氣...有乜可能唔比人寫多d？
fion就慘喇﹐我見佢疊note成兩吋厚﹐仲話要今晚睇哂﹐我完全唔覺得呢d野係可以完成架囉...但佢仲好勤力咁睇呢﹐真係好乖呀~~~就算阿偉上到黎搞搞震都無損佢既集中力（當然都影響唔到我啦~~）！
聽日開始溫書！yes！

>>December 7, 2003 at 5:10:22 PM GMT+8

2003 年 12 月 5 日 星期五 【乍暖還寒】

今日fion又去左溫書﹐又得番我一個人。我好唔生性呢...訓到九點幾十點﹐起左身仲不停咁睇相機review﹐冇法啦﹐就算試過部機上手﹐都想知其他人點睇架嘛。部A80既評價都唔錯﹐買得過﹐但究竟係邊度買好呢？呢層又要諗下喇...
之後出左去同阿偉食飯﹐之前就同佢番去換左套suit先。好型仔喎~~呵呵~~好可惜我今晚冇得去...我真係好想去呀﹐因為咁大個女都冇見過d咁既大場面﹐四十週年喎...有幾多個四十週年？？不過我又唔係d咩學生代表...算啦...
一個人番到宿﹐睇左套feel 100%﹐都幾無聊﹐唔睇好過...訓左兩個鐘﹐又起身睇下書﹑煮野食...
今日又係hae下hae下咁過左喇﹐聽日要做功課喇﹐真係要比d心機至得...

>>December 6, 2003 at 5:58:26 PM GMT+8

2003 年 12 月 4 日 星期四 【颳風】

今日坐左係部電腦前面超過十二個鐘呀~~~為咩？咪為左份quanti囉...真係好麻煩呀份野﹐都唔知應該寫d咩﹐搞左勁耐﹐又要留意番d format喎﹐但估唔到我真係可以寫到十頁﹐我原本以為我一定唔得添...成份野連appendix有成17頁呀﹐咁大個女都未試過有一份咁澎湃既paper。
不過呢份野﹐真係完全超出我預算。我開頭打算尋日就可以搞掂﹐跟住夜晚就可以休息﹐再開始溫書﹐點知我今閱做到八點囉！咩都唔使溫啦﹐仲做到頭都痛埋﹐真係可怕...


anna番左屋企喇﹐呢幾日就得番我同fion﹐不過fion日頭就同左佢dept d同學仔去左lib溫書（其實係去左訓就真...）﹐所以我通常都一個人留係宿哦。一個人係宿﹐做咩都唔會嘈住人﹐好開心。我其實好唔明點解d人鍾意去自修室果d地方溫書﹐我就唔得囉﹐唔知點解一路都唔鍾意﹐硬係覺得去左仲溫唔到書。唔知呢？都係係宿舒服d...

>>December 6, 2003 at 3:18:12 AM GMT+8

2003 年 12 月 3 日 星期三 【陰晴不定】

呢兩日都好努力想做份quanti﹐但係一路都仲係睇lit既階段﹐一路都冇郁過份野﹐真係過份。今日又為左同班畢業生影相﹐搞到我又荒廢左我d功課﹐真慘...不過﹐好似又好耐冇見過雞泡﹑小te te﹑german同yumeji佢地喇（雖然今日都見到魚爺﹐但硬係覺得好似冇幾耐之前先見過面﹐仲好似都幾常見...）﹐今日一次過見哂﹐仲影左相添！仲見到阿飯佢地﹐都影左d相﹐佢地好似都幾開心喎~~~
影完相﹑食完野﹐我又番房努力睇睇睇﹐卒之睇哂﹐仲諗左開頭點寫﹐點之又係時候出去lu﹐因為今日約左阿洪食飯。去左沖繩食﹐仲有海膽壽司﹐好開心。食得好飽﹐仲講左好多野﹐講左d咩就已經唔太記得﹐不過都係問番d佢果時去旅行同宜家做野既情況。我覺得出黎做野真係幾辛苦﹐睇下我阿哥就知啦﹐捱到殘哂...
今日見到一班岩岩畢業冇耐既人﹐又見到畢左業好耐既人（算好耐啦﹐學士畢業）﹐突然間諗﹐唔知我畢業﹐又會係點既樣呢？

>>December 4, 2003 at 4:31:40 PM GMT+8

2003 年 12 月 2 日 星期二 【乍暖還寒】

我的冬日十寶---

呢個係上年既：
1.熱維他奶
2.頸巾
3.手襪
4.暖手蛋
5.床
6.棉被
7.炒栗子
8.燴番薯
9.熱朱古力
10.電腦（我上任男友..^^"）

今年既：
1.頸巾（不過唔係溫暖牌喎...）
2.手襪 （今年有喇~~正確d黎講係今日有喇~~好開心！多謝你！愛死你呀~~）
3.暖手蛋（仲未買refill）
4.床（"不要離我太遠..."）
5.棉被（唔係宿...好慘...）
6.炒栗子（冬天既炒栗子呀~~好掛住你！）
7.書/readings/功課（...一.一"）
8.熱朱古力（今年飲多左咖啡﹐仲未飲過...）
9.電腦（我離唔開佢﹐唔好怪我...xp）
10.阿偉（我現任男友 = 流動暖爐 ~^^~）

>>December 4, 2003 at 4:44:12 AM GMT+8

2003 年 12 月 1 日 星期一 【乍暖還寒】

由於我仲未考試﹐份paper又可以遲多三日既關係﹐我決定今日都係休息番日先﹐叉足電先再衝過paper同考試。
係好充足既睡眠之下﹐我都係九點幾就醒左﹐但係個感覺係好滿足﹐好夠訓囉﹐真係好耐冇試過咁高質素既睡眠囉﹐醒左就再冇支力既感覺。跟住﹐我就係部電腦前面睇下雜誌﹑睇下新聞再睇下newsgroup咁﹐hae下hae下就點幾兩點﹐由於冇人同我食lunch﹐所以我都放棄左食野呢個念頭﹐準備出旺角行下。卒之搞到三點先出門口。
出到去﹐都唔係去左好多地方﹐亦都唔係買左好多野﹐唔知點解﹐又冇乜mood買衫﹐連睇都費事睇。買左幾本漫畫﹐仲有一隻桑莓蠟燭﹐好香﹐好開心呀~~就係咁既收穫﹐我就番左宿舍lu~~
d漫畫我已經睇哂﹐真係話都冇咁易﹐早知買多幾本啦...所以到左宜家﹐都仲未開始做功課﹐不過﹐我諗都休息得差唔多喇﹐希望係星期四就交到功課啦~~

>>December 4, 2003 at 4:42:38 AM GMT+8

2003 年 11 月 30 日 星期日 【乍雨乍晴】

今朝一早起身就係度趕classical份paper。我都未試過咁冇心機做一份功課﹐我可以坐左係電腦前面兩個鐘先寫得果幾行字﹐我自己都唔知點解﹐我唔係話唔知想寫d咩﹐但就係寫唔出﹐都冇解既！
好辛苦先係兩點半搞掂左我份paper（我原本預計兩點﹐遲左半個鐘）﹐咁就同阿偉一齊落去dept交啦﹐順便同阿烽去還左書先。落到dept﹐見到阿輝門口有個盒﹐有d assignment係度﹐我就睇都冇睇就掟左落去﹐再走去問阿丁丁可唔可以遲d交quanti。佢超好人﹐比多三日我做﹐咁我今晚就可以訓番覺好既﹐叉下電先。交完功課搞掂哂﹐就去左cc can食tea﹐好耐冇食過西多士+古古力喇~~食完野﹐唔知點解心血來潮﹐又見冇咩做﹐就捉左阿偉同我落嶺南場打籃球。好耐冇打波喇﹐射極都唔入﹐激死！
打左冇耐﹐聯宿球賽就開波喇﹐成身汗既我就同cindy同大舊一齊坐係見台度睇﹐之但係﹐我冇戴眼鏡喎...算啦...都唔係湯宿﹐唔使咁認真睇...突然間﹐roy佢地出現﹐仲問我拎番assignment未﹐我先知原來我掟落去果個係上次份assignment既盒黎架！咁我就即刻跑番上dept﹐諗住拎番出黎交番比阿輝啦﹐點知上到去﹐我﹑電芯同billy搵過哂個盒﹐連阿輝收到果疊功課都搵埋﹐但都唔見我果份﹐但我明明有交到架！激死我喇~~~點解我份野會唔見左架﹐莫非比人偷左？！呢d野都好偷既...好彩阿輝信我﹐比我聽日交番﹐如果唔係就大鑊喇...順手拎番上次份assignment...原來...我都幾低分...唉...
搞完一輪﹐就落番去睇聯宿。雖然我睇唔到邊個打邊個﹐但係某幾個既衫既顏色我都認得既...我見到阿蔡同伯宿既林業係度爭奪個波既時候﹐阿蔡既腳法真係好勁﹐扭幾下就過左﹐好得！唔怪得知佢係隊長啦...
睇完一場好好氣氛既走讀對伯宿之後﹐就到湯宿對恆生。湯宿輸左呀﹐不過﹐佢地好似冇練過﹑冇夾過咁﹐但都入到波﹐算唔錯架喇~~
我失望﹐唔係因為輸波...球賽開頭得我一個﹐我真係以為湯宿既啦啦隊得我一個...好彩之後阿sue﹑iris同謝炳都黎左﹐先至冇咁悶。之但係...點解負責帶足球隊既人冇出現呢？會唔會冇責任感左d呢？身為會長﹐宿舍有活動唔係唔黎呀？咁要個宿生會黎做咩？宿生為左宿舍打生打死﹐但就連啦啦隊都冇﹐會唔會過份左少少？？如果下次聯宿活動冇宿生出黎玩﹐都唔好怨我地囉！我開始有少少後悔投錯票﹐會唔會原來下莊都係咁樣﹐根本唔care呢d活動？我唔明...如果話要考試﹑趕paper﹐宿生就唔使？就果小小既個幾鐘都花費唔起？我點信得過佢地會運用一年既時間去服務呢個宿舍？我真係好失望...

>>December 4, 2003 at 4:42:17 AM GMT+8

2003 年 11 月 28 日 星期五 【乍雨乍晴】

十年約會---

朋友像雨點 聚半天 只一面 心知道
各有夢難遇見
離和去像信件 你愛的遍出現 很想見
卻掛念 誰幸免
*同用心講一片 預約分散過十年
同地點一起看舊照片
祈求那天 若是大家出現*
天色會未變

朋友互慰解 路再彎 風很大 祝福你
過每日能偷快
離和去像雨擺 若這生怎麼壞 請想到
永遠是 誰諒解

Reapeat *
冬天變夏天

如那天夜盡沒有白天 都可再飛天

-----------------------------------

聽到呢首歌﹐突然間諗起皮皮係本畢業生名冊度寫低既約定﹐唔知﹐有幾多人真係記得呢？

>>December 4, 2003 at 4:41:49 AM GMT+8

2003 年 11 月 28 日 星期五 【乍雨乍晴】

Rationality﹑religion﹑disenchantment﹑authorization﹑social action﹑legitimate domination﹑vocation...完全唔知發生咩事...
聽咁耐weber﹑今日算好少少﹐但唔知點解﹐一路聽﹐一路仲覺得自己知多左﹐但唔明既仲多左﹐太多野喇﹐我連自己唔明咩都唔跳﹐淨係覺得一次過接收太多野﹐唔知點執好...呢個係唔開心其一。
其二﹐我終於明白點解阿亮果時話﹐讀完soci會灰左。今日係我第一次感到theory可以咁灰。聽到阿輝講解﹐weber認為現代既人冇左宗教影響﹐冇左宗教所給予既「使命」﹑「人生意義」﹐咁宜家既人既人生意義係咩？個答案係：冇。現代人唔會再搵到所謂既﹁終極意義」﹐冇左一個既定既目標。聽到呢度﹐我突然間覺得個心一沉﹐好唔開心﹐原來人生係冇意義既﹐咁點解仲要繼續呢？跟住話﹐weber所講既解決方法係做好當下﹐meet the demand of the day﹐因為一個有vocation既人會著眼於當前﹐努力於當下。之但係﹐如果只係顧住今日﹐好似有一日冇一日咁捱落去﹐又為左d咩呢？我真係唔知...就正如weber所講﹐人生...係冇意義可以追求既...

>>December 4, 2003 at 4:41:19 AM GMT+8

2003 年 11 月 27 日 星期四 【乍雨乍晴】

由於尋日已經上哂呢個sem既lecture既關係﹐我今日好似好得閒咁﹐雖然有兩份paper係手﹐但我既上晝都係用歌同夢幻西餐廳黎打發左...lunch time就同billy一齊落左去coffee corn食飯﹐仲撞到小電電喎﹐一路食﹐小電電就一路話佢尋晚怒d/l衝上雲霄﹐仲睇左好多集﹐乜都冇做過咁話。我就d/l左十幾集咋﹐都未得閒睇﹐考完先慢慢睇都唔遲啦~~
食完飯﹐我就番宿喇﹐都成三點幾﹐又好鬼眼訓喎﹐咁又訓著左喇﹐訓到五點﹐都係時候去睇聯宿。點知去到﹐佢地都仲未開波﹐原來係冇球證...有冇搞錯...所以就call左阿偉上黎。不過由於太遲開波既關係﹐斯路哥哥趕住走﹐唔落場lu﹐就係咁﹐我地少左一員猛將。
開頭第一局我地都贏得好漂亮架﹐點知第二局﹐阿然飛身救波既時候受傷﹐送左入pw﹐伯宿既士氣就突然間大增﹐話要為阿然而戰﹐所以好不幸﹐湯宿連輸兩局敗陣lu~~
之後原本係恆生對走讀﹐點知走讀冇人黎﹐所以我地幾個就拉雜成軍同恆生打喇。有我啦﹐michael啦﹑肥ken啦﹑曾sir啦﹑淫麟啦﹑howard啦﹑仲有個我唔識既﹐就係咁﹐同恆生一班院隊﹑校隊﹑現任聯賽球員打喇friendly...真係比人炒到呢...阿tutor ben哥哥真係好恐怖﹐佢一殺波落黎﹐我地就好似玩緊閃避球咁﹐完全冇諗過接（呢個行為對我地黎講同自殺無異）﹐接到我痛死啦﹐我就好唔小心咁掂到個波兩次﹐痛到呢﹐成隻手痺哂...又由於我學藝不精﹐成場都搞左好多烏龍野出黎﹐不過唔緊要丫﹐因為我地都只不過係志在玩下﹐打下波咁之嘛﹐所以都玩得好開心喎﹐不過恆生就慘喇﹐佢地囉分囉都悶...哈！
之後同阿偉出左去食野﹐跟住仲陪佢守小賣。恆生個小賣真係好靚呢﹐不過﹐要咁靚黎做咩呢？我都唔知呀﹐唔知係咪會食得開心d？
同房真係越黎越無良（呵~~）﹐我一番到房冇人﹐以為佢地番哂屋企啦﹐點知原來佢地去左思源﹐都唔搵我﹐哼~~~

>>December 4, 2003 at 4:40:47 AM GMT+8