2003 年 12 月 15 日 星期一 【乍雨乍晴】

今日係考愛哲既大日子﹐我不負眾望﹐又係溫唔哂就去考﹐即使我訓得兩個鐘﹑即使我係五點幾就同陳曉烽同神蹟地出現係湯hall既何b一齊溫書（不過同佢地兩個一齊係乜書都溫唔到﹐仲衰過係房溫...）﹐我去到試場個腦都係空白一片﹐讀完好過冇讀少少少少....
考完就梗係乜都唔理啦﹐捉埋阿偉出左沙田食飯﹐之但係...>.<
買完野就一個人番cu...番到房...訓...呆滯...唔開心...
六點幾七點又寺身溫書﹐鬼叫聽日又要考social problem﹐話哂都係三科考試入面最容易果科﹐冇理由唔溫﹑由得佢炒架嘛﹐所以係房溫到九點幾﹐頂唔順﹐溫極都唔入腦﹐又落左湯hall﹐點知仲衰﹐見到irene﹑gary同zoe﹐一路溫一路吹水﹐真慘...
到十一點幾﹐阿烽就黎生日﹐梗係一慶一慶佢﹐所以叫齊208﹑AFFA﹑albert the lord同阿杰叔叔﹑萌芽學者（呵呵~~）﹐一齊係湯com飲我買番黎既士多啤梨酒﹐真係好好飲呢我覺得~~~佢地就唔知喇~~得個飲字﹐吹下水﹐睇下flora同阿叔﹑萌芽john c打交﹐最後同阿烽「行禮」﹐佢真係風騷到呢...跟住佢地就去左思源唱k﹐本來我都想去架﹐不過...
可能飲左d酒﹐又眼訓得滯﹐兩點就訓左lu~~

>>December 17, 2003 at 3:53:37 PM GMT+8

2003 年 12 月 14 日 星期日 【颳風】

我好開心喎~~~點解？因為我阿哥幫我買相機囉！仲送左叉電器同CF card比我添呀~~~真係開心死！唔怪得之我不嬲都咁鍚佢啦~~~

不過溫書就...唔好提d傷心野~~~呵~~~


P.S. 我轉左BGM喇﹐邊個知係咩黎呢？我好鍾意呢首音樂架~~~

>>December 15, 2003 at 2:22:56 PM GMT+8

2003 年 12 月 13 日 星期六 【乍雨乍晴】

下晝等anna起左身﹐就一齊去食tea﹐食完又去百佳掃貨﹐冇法啦﹐要有零食係度我先捱到落去架嘛~~
番左去﹐冇耐﹐阿烽就上黎拎野﹐跟住edwina又走埋入黎﹐都唔記得佢咩事喇﹐不過講講下就話不如夜晚煮野食﹐於是個個都貢獻哂d意大利粉出黎﹐我就叫埋阿偉﹑阿杰同阿普佢地﹐咁岩阿杰佢地貢獻既又係意粉（車輪粉﹐何b d taste真係有d特別...）﹐於是順理成章﹐我地就整左餐意粉餐喇！
好慘呀我﹐我第一次試炒angel hair就失敗左﹐死臭普仲係咁串我﹐激死我喇！最衰都係佢地！係度阻住哂~~~anna仲過份﹐將我半樽蒜鹽落哂去﹐咸到佢地死...我自己就唔敢食...嘿...不過算啦﹐都係得我一樣失敗左之嘛﹐佢地仲有其他可以食既...食食下julie又入埋黎一齊食﹐勁開心囉﹐間房未試過咁多人架~~~不過嘈得滯﹐比tutor wendy話...xp

我間房變左圖書館？！我咁少量既藏書都有人有興趣喎~~~^^"

仲有﹐我miss左流星雨...shit！我原本睇newsgroup知架﹐諗住都溫唔到書就去睇下﹐點知都唔記得左件事﹐激死！

>>December 15, 2003 at 1:54:56 PM GMT+8

2003 年 12 月 13 日 星期六 【乍雨乍晴】

明明好有興趣溫書﹐但就硬係心散﹐我已經冇哂辦法喇...
溫左成日﹐都係得果兩課﹐真係唔知做咩囉...

>>December 15, 2003 at 3:27:29 AM GMT+8

2003 年 12 月 12 日 星期五 【颳風】

我覺得自己真係好大頭蝦囉...今朝起身﹐想去洗衫兼落去買野飲既時候﹐我先發覺原來我唔見左個銀包（正確d係散紙包﹐但入面差唔多有哂最重要既野...）﹐嚇到我死﹐好緊張咁去周圍拉啦﹐仲叫左小電幫我去學思搵添！我同阿偉就行去mmw搵﹐佢就叫我保險d﹐打左電話去card centre報失先﹐費事有咩事張credit card比人拎左去洗就係咁先...我覺得佢講得好岩﹐所以就即刻打電話去cut左張card啦﹐點知個service centre既人一話比我知佢cut左張card之後﹐我就即刻搵番個包包﹐原來佢跌左係mmw天台﹐應該係我尋晚坐低果時整跌架。但係張card cut左就唔可以即刻開番﹐唯有等佢寄番張新card黎啦...呢期又冇card用喇~~~

>>December 13, 2003 at 6:19:43 PM GMT+8

2003 年 12 月 11 日 星期四 【乍雨乍晴】

嘩！原來尋晚得果十二度咋！唔怪得之凍到我地死咁滯啦...
話說尋晚我﹑fion﹑anna同阿烽就係湯hall溫書﹐我同fion就協議左一人訓兩個鐘﹐另外果個到時到候就上房「kum」醒對方﹐佢就訓十二至二﹐我就二至四。anna同阿烽係我落番去之前就番左去訓喇。開頭都好地地﹐到我五點鐘落番去join fion既時候﹐我地兩個一齊溫左一個鐘到﹐都係決定番去訓多個鐘﹐於是﹐我就好不幸地訓到八點！但我九點半考囉...我到果時都仲差兩課lecture notes未睇過﹐書就唔使講啦﹐都唔知點睇...
so﹐我個social psy就係咁壯烈犧牲左喇！因為我題十分既essay冇答﹐d short q亦都唔識﹐mc係我收卷果時發現寫錯位﹐我都唔知衰左幾多題囉...唉...算！
考完試﹐好應該訓番陣﹐所以我雖然同左七輝講話我會早過佢到﹐之但係我訓到佢打比我我先醒囉...之但係﹐我同阿偉都未食野喎﹐所以好順理成章﹐我就同佢番左上水﹐食完野先去KYD sports day喇~~~好耐冇食過廣成喇﹐今日特登去左﹐唔係好多人咋果度﹐岩哂！d 牛肉通依然係咁正﹐好滿足既一個lunch/tea呀~~
跟住就去左睇sports day啦﹐但我去到果時已經係閉幕lu﹐不過唔緊要啦﹐我都係想睇下d record咋嘛。好令人失望呢...乜佢地突然間咁差咁既？仲以為佢地會比d驚喜我添！點知鍾卓瑩話佢冇練過喎！激死！又唔見譚嘉敏﹐想問佢搞咩都唔得添。
之後﹐約左高芬肥黨佢地食飯之後就番左屋企小睡。訓到咁上下就係時候出去食飯喇﹐今次係同肥黨﹑朱朱﹑高芬﹑肥鼠同一大班工友﹐去左陳六記食！yes！今個禮拜可以去齊上水最正既幾間舖頭（我話既）食野真係超開心！原來班工友都好有趣呢~~~估唔到朱朱同肥黨對我男朋友咁有興趣﹐真係八到呢...肥黨仲話認得阿偉﹐真係可怕﹐佢咁都記得？！
食完飯﹐節目竟然係落bar囉﹐玩大話骰﹐真係搞笑﹐原來朱朱唔飲得架﹐佢係咁傻笑﹐嚇死我地...仲要自己一個番屋企﹐好彩係火車上面我同佢一路傾計﹐佢都算清醒喇掛...今年d sports day都好早呢﹐我都冇諗過咁奇特﹐下個星期有一日係學界﹐另外果兩日竟然係一月！！傻架...
之後我一個人番到cu﹐係na落左車﹐見到個天好靚﹐好多星星﹐於是番房放低d野就出左mmw。真係好靚呢！好可能性我仲未買相機﹐如果唔係就可以影低d咁靚既星空~~~突然間心血來潮﹐就捉左小電一齊出黎睇星﹑吹水﹐吹左冇幾耐﹐佢d team-mate就叫左佢番去﹐原來其中一個team-mate生日呢﹐小電都叫埋我去﹐見今日個modd幾好就去識下新朋友仔喇。一個叫steven﹑一個叫teressa﹐佢兩個好搞笑呢﹐一路不斷咁互串﹐佢地兩個﹐仲係阿bert果個class既人囉（仲係阿bert果類添啦我諗...）不停係度講衫褲鞋襪果d﹐講下講下﹐又講到steven份工﹐佢話今日要譯野﹐係一個叫「木子美」既性開放者既diary﹐果個人係內地都算係個幾controversial既人囉﹐搞到我都好有興趣搵佢d野黎睇下...傾到十二點幾﹐我就自己一個走先lu﹐因為真係太支力喇~~

>>December 13, 2003 at 5:09:30 AM GMT+8

2003 年 12 月 10 日 星期三 【乍雨乍晴】

今日真係要好好地溫書喇...
開頭我都溫到架﹐但唔知點解後來都係集中唔到精神﹐成大半日都唔知溫左d咩﹐直至fion番左黎﹐拉埋我落湯hall溫書﹐個情況先稍有改善...湯hall個溫習氣氛真係幾好﹐個個都好努力咁既樣﹐再者﹐附近又冇d咩distractant（e,g, 電腦...）﹐所以個集中力都好好﹐不過係凍左d囉...

>>December 13, 2003 at 4:42:13 AM GMT+8

2003 年 12 月 9 日 星期二 【乍暖還寒】

今日又溫書...不過﹐依然係龜速﹐仲比我發現左以前玩過既game有新version﹐我梗係唔放過。就係咁﹐食完飯之後就由兩點幾三點打到五點幾...跟住順手訓多陣﹐就再開工。
睇得好慢呀...我一定唔會睇得哂﹐但至少﹐都要睇哂d lecture notes丫﹐之但係﹐齋睇果份野又唔知佢講咩喎﹐所以都係要睇書﹐真麻煩...勁多methodology﹐都唔知睇好唔睇好﹐又話冇教既都考﹐咁即係點呀？！仲無所適從過英姑...
算...睇得幾多得幾多...

>>December 10, 2003 at 5:52:31 PM GMT+8

2003 年 12 月 8 日 星期一 【颳風】

今日係開始溫書既日子﹐不過出師不利...我全日就淨係溫左幾頁書咋~~！都唔知點算...明明一早起身溫﹐點知睇左一份notes已經好眼訓﹐於是又訓番﹐仲訓到成點...食完飯諗住再溫﹐又掛住玩電腦...卒之的起心肝溫書果時已經五點幾﹐我跟住七點就出左去join雙番東組聚﹐同佢地班傻野一齊食飯傾計玩到十點幾。成班人真係傻架﹐講咩都可以笑一餐﹐不過講過咩﹐我又唔記得喇喎...宜家d記性真係差到呢...
之後阿偉黎接我﹐佢諗住係地鐵站等我﹐我就行去搵佢啦﹐點知...原來我真係一個路痴...我兜左個圈都搵唔到地鐵站﹐樣衰到呢...卒之都係要阿偉黎搵番我...唉...跟住又橫豎都落旺角﹐就去埋石磨坊食甜品先番宿。
死啦...我宜家記性又差﹑眼又矇﹑耳又聾咁﹐都唔知係咪有病......

>>December 9, 2003 at 6:13:21 PM GMT+8

2003 年 12 月 7 日 星期日 【微冷】

今日仲未有心機開始溫書﹐不過尋晚比條classical題目嚇一嚇﹐就算唔溫書﹐都要搵d有關既野睇下﹐所以全日一得閒就拎本《men are from mars, women are from venus》出黎睇﹐for愛哲架~~
雖然我係應該開始溫書﹐但我冇乜心情﹐所以阿偉一考完試我就捉左佢出去睇戲﹐睇《love actually》。套戲好warm呀~~講親情﹑友情﹑愛情...雖然劇情都算有d老套﹐但都不失為聖誕應節既電影啦~~推介嘛...如果想搵d warm既﹑又有d搞笑﹑又唔使諗野既戲﹐呢套都幾岩架！
睇完戲﹑行左陣﹐買左隻薑餅人（我第一次見咋﹐一定要試下！）之後﹐再食多轉明記﹐就番左屋企食飯喇。我好白痴囉﹐買左潤唇膏比阿哥好耐架喇明明﹐但次次都唔記得拎番屋企比佢﹐買左mask比阿媽又唔記得拎﹐到我番宿舍喇﹐又唔記得拎聖誕樹番黎...我究竟發生咩事？提早衰竭？？
番到大學﹐係火車站見到sylvia﹐我地竟然企左係火車站入面就咁傾左差唔多成個鐘﹐真係好厲害！講咩？咪就係講下我地d考試同paper會幾慘﹐再「順便」講下英姑壞話咋嘛...真係唔講唔得囉﹐宜家搞到我個classical半天吊咁﹐考完試又唔夠時間做﹐都唔知點算....唉...睇黎都係等死架喇...
番到宿舍﹐經過湯com﹐聽到「啪啪」聲好似好熱鬧咁﹐跟住就見到明叔行番出黎﹐原來佢地解決左一隻老鼠呀！好殘忍﹐就咁打死左佢...其實可以試下捉走佢﹐唔使一定打死佢掛...小老鼠﹐你安息啦~~~

>>December 8, 2003 at 5:32:15 PM GMT+8