2004 年 8 月 11 日 星期三 【酷熱】

夜晚約左高芬彭彭食飯。彭彭番左黎咁耐都唔得閒搵佢食飯﹐真係有d唔好意思...
係pizza hut吹左好耐水先走﹐但多數我都係同高芬講...

期間﹐比人嚇親﹐佢註定差我一餐飯﹐走唔甩！

>>August 13, 2004 at 5:24:31 PM GMT+8

2004 年 8 月 10 日 星期二 【酷熱】

一朝早就番到去~~reg day丫嘛！要幫手跳舞同拉人玩大O...

跳舞﹐好支力好熱好辛苦﹐但好好玩！拉人玩大O講到口乾喉嚨痛﹐但聽到d人由唔話變左話玩再填埋form交埋﹐感動！

「果d人」唔做野唔緊要！因為我睇到我地uc真係肯做肯捱﹐落大雨都阻唔到我地專心去做我地認為應該做既野﹑應該有既態度﹐真正有heart！值得！因為...大O對我黎講太重要...

跳完舞做完野﹐散哂﹐但我地都玩game再開會﹐唔係精力旺盛而係有心！女媧果然係勁！

開完會再一齊出去食飯。再一次證明﹐阿趙同fion同一個level...

>>August 13, 2004 at 5:21:44 PM GMT+8

2004 年 8 月 9 日 星期一 【晴】

去睇collateral﹐幾ok架﹐刺激啦﹐比想像中滲入更多msg...

>>August 13, 2004 at 4:57:13 PM GMT+8

2004 年 8 月 7 日 星期六 【酷熱】

好日都唔去海灘玩﹐一去就去足兩日...今日約左阿恆佢地去海灘玩。

佢話就話係乘風航熱浪聚﹐但﹐點睇都唔似囉...阿恆﹑johnny﹑阿森﹑占士﹑scott﹑joe仔﹑ivy同我...我覺得似佢地麻甩聚而我同ivy就係路過既...一.一"

去到西貢﹐因為有人遲到既關係趕唔到船入去魚排釣魚果度﹐就去左半月灣喇。上次去都係f.7既事喇~~今次一入到去﹐嚇呆左...使唔使咁多人呀...成個沙灘都係人﹐雖然一半既原因係因為果度細﹐但﹐真係人山人海囉...我心諗﹐d海水一定好熱啦﹐一黎有咁多細路...二黎...咁多人﹐浸都浸到暖啦....(-_-")

游左一陣番埋去休息既時候﹐因為ivy既美色﹐有一班人走既時候竟然送左佢地張浮床比我地玩﹐就因為咁﹐我地跟住就上演左一幕又一幕既浮床爭奪戰﹐仲扮埋海盜係度撩事鬥非﹐整到其他唔識既人由佢地既浮床度跌落黎﹐超好玩...嘿！

玩到七點又搭番船後西貢﹐商量一輪之後都係決定難得豪一次---係西貢食海鮮！yes！貴就貴d﹐不過都算多海鮮款食啦﹐算ok啦~~食完野﹐佢地要係「第朝番工」同「球賽」之間選擇﹐卒之佢地都係決定左揀「番工」﹐得番我同ivy兩個女仔係西貢搵地方睇波﹐真可憐喇~~哈！

我地兩個就係咁﹐搵左間靜靜地既pub（我都真係冇見過咁靜既酒吧﹐仲要係有波睇添...）﹐兩個人飲下野﹑睇下波...就係咁坐到差唔多十二點﹐我就趕尾班巴士番屋企lu~~


回程時攝

>>August 11, 2004 at 5:21:18 PM GMT+8

2004 年 8 月 6 日 星期五 【酷熱】

又係女媧輔聚大日子﹐今次我地入左咖啡灣玩﹐實行「同陽光玩遊戲」~~~

三點幾入到去﹐一共有十三個人﹐包括：賢﹑AFFA﹑趙積傳﹑剛﹑chris﹑fanny﹑y2k﹑kevin。搵個靚位就玩「數字球」﹐眾望所歸﹐某幾個人已經有個特定既數字編號...雖然應該係fion輸得多d﹐但唔知點解大家都係夾手夾腳推左阿傳落水先﹐而各人都先後被拉落水﹐之後就係水邊追逐同玩﹐支力到呢...玩完水又跳下camp fire﹐再玩多陣「童年game」就已經係太陽落山既時間喇~~

我地執好哂d野之後就去左下一站---黃金海岸m記食飯~~食完飯又係度吹下水﹐再去惠康買野飲買野食再落番沙灘圍住吹水﹐講左好多野（其實係八左好多野...）﹐我真係覺得﹐傾計比齋玩更加可以令個大組close d﹐起碼﹐交換彼此想法既朋友比淨係一齊玩既朋友既感覺黎得更緊密...

吹完水﹐kevin叫左佢細佬黎屯門接佢﹐我當然唔會放過呢架順風車啦~~就係咁﹐由一個比kevin更似大佬既粗眉加迷人大眼睛細佬送我地走lu~~


btw﹐今晚吹吹下水抬頭望天竟然比我見到流星...正！

-------------------------

好擔憂.....知得越多越擔心﹐但我真係唔知我可以做d咩﹐或者﹐根本就唔需要我幫手...
但﹐我個心依然係忿忿不平﹐唉.......

>>August 13, 2004 at 4:26:42 PM GMT+8

2004 年 8 月 3 日 星期二 【酷熱】

有冇試過有d野冇做到所以後悔？

今日搭車出去同老細食飯既時候﹐係地鐵見到一個男仔﹐坐低就係度喊。我唔知佢發生咩事﹐當然亦都唔會去問﹐但好奇怪﹐我有個衝動遞張紙巾比佢；但我冇咁做。可能係﹐我覺得遞張紙巾會太唐突；又或者係﹐唔關自己事既野都係唔好理咁多。點都好﹐我行出左車廂就有d後悔。只不過係一個少少既動作﹐連自己都覺得應該﹐但就因為一直既猶豫而冇做到。社會上係咪就係缺乏呢種對陌生人既關心呢？點解人越大﹐一d越單純既關心動作就越猶豫得耐？係因為怕蝕底？定係「事不關己﹐己不勞心」既疏離問題？我唔知﹐亦都唔知應該點理……

我希望以後只要認為係岩既﹐我都可以的起心肝去做﹐唔再猶豫……

>>August 4, 2004 at 3:04:18 PM GMT+8

2004 年 8 月 1 日 星期日 【酷熱】

三日兩夜既pre camp尋日完左lu~~係一個開心體驗呢~~

星期五果日由於要番工既關係﹐我放左工先番屋企﹐再食埋野先入camp﹐入到去﹐岩岩玩到最後一個mass game--朦眼搵組員。聽fion講番﹐都係上年or前年既mass game咁...

夜晚有夜遊﹐其實即係中大check point。上年得個知字﹐今年卒之可以玩下d games喇！第一次玩trust fall﹐我真係好信任我既組員呢！諗都唔使諗就訓落去﹐由於有番咁上下重量﹐真係辛苦佢地~~其他既points...令我覺得個check point似玩恐怖感多d﹐因為...我真係好驚個廁所呀﹐但又要頂硬上﹐好彩有fanny係度...

完哂d game再開埋e﹐又係時候番房吹水玩遊戲~~玩左好好玩既心臟病...從來冇諗過可以咁好笑...山竹牛肉趙﹑奶皇飽阿傳﹑灌湯餃（九）剛﹑小籠飽kevin﹑鬆糕charmian﹑鴨腳扎fion﹑糯米雞阿縈﹑豆沙餅fanny﹑雞扎y2k同我--咸水角ally﹐外號長沙灣ally﹐另外仲有杏花傳同坑口剛﹐哈...傻哂！之後﹐大家都坐定定咁講哂所有真心說話﹐我真係覺得﹐大家都好愛女媧架！個個都為大組好﹐如果唔係﹐咁會發表咁多意見同真心話？

到左第朝星期六﹐食左個好「特別」既早餐之後﹐就出發去玩遊蹤喇﹐上年又係得個睇字﹐今次就全情投入咁玩！我係第一次去九龍公園入面咋！嘿...不過﹐d game唔算難玩﹐完全難唔到我地咁勁既女媧人！但又真係幾熱幾辛苦囉...

我地係第一組完成哂所有task番中大既大組﹐果然係醒呀！之後既大組時間﹐阿賢終於表演左營舞﹐仲教埋我地﹐其他尋日到左既人就一早學識﹐但我就點都學唔識﹐我都唔知點解...-___-"

開完e﹑食完晚飯就係互片時間﹐d slogan依然可以好好笑﹐包括針對阿鈞頂帽﹑海膽粒墨﹑阿程同kathy既身形﹑仲有馬兒同阿賢既膚色﹐片人既時候我差d笑左出黎...

跟住既晚會﹐唔好意思講句﹐輔花草選舉真係有d悶場﹐可能比較文靜啦d games﹐又或者係﹐輔導員既反應冇咁激動啦...之後既大組長gap show﹐有抄得出面既嫌疑﹐仲有就係﹐gap得黎唔係太知佢做緊乜﹐台下既人都唔多識笑﹐會係一個悶位...大組長舞係有d驚喜﹐但﹐hip hop會對少跳舞既人黎講比較難﹐佢地算跳得唔錯啦~~哈~~最後既camp fire就梗係萬眾期待啦！仲叫埋ling姐﹑tracy同sara落黎玩添！如果可以玩耐d就好喇~~

去到金沙角食宵﹐見到好多老鬼呀！雞泡啦﹑german & nicole伉儷﹑terry﹑john c & ling姐伉儷﹑tracy﹑sara﹑大ken﹑阿杰﹑何b﹑水魚﹑阿濠﹑阿集...大家都好有心呢﹐咁耐之前既人都番左黎（so called「老鬼」）﹐真係好開心見到佢地呀~~之後佢地仲起鬨搞野﹐搞到個個大組長都互咀﹐場面真係好核突﹐都係因為馬兒唔識死去撩nicole姐...唔知應唔應該多謝警察哥哥呢？因為岩岩佢地接到投訴黎check野﹐岩岩郁唔切3p~~

飯左d酒﹐番到去宿舍好眼訓﹐我慶幸自己頂住冇訓到﹐先玩到我最想玩既first impression。我地話阿傳似「打老婆會發達﹑再無能然後尋找性服務」...哈！笑死！ashley係奉子成婚type﹑阿賢最男人﹑anna係界仔王﹑kevin就最靚仔﹐fion同ashley好相似﹐阿趙就最唔知醜﹐竟然同fion一樣認為自己靚...好可惜﹐都係比我地rate佢同阿傳﹑肥chris同一level﹐哈！但我到宜家都唔明點解我會係最淫囉............一.一"

玩到差唔多通頂﹐到左「應該」七點﹐我卒之頂唔順訓左﹐訓到八點幾九點就要起身。食左個比想像中更豐富既早餐﹐開埋個大e﹑影埋大合照就散水。而女媧大組就去左uc staff can食飯﹐係食飯既時候仍不忘玩樂一番﹐就係---以極速出左個「女媧枚」！內容包括有「七傳」﹑「九剛」﹑「西趙」同「肥chris」﹐實在太好喇！kevin猜呢隻枚猜得出神入化﹐而秘訣就係﹐同對手鬥忍得笑！呢樣...實在太難...最好笑應該係睇阿傳同阿趙猜...笑死左！女媧既lunch gather就係「圍枚清台」既情況下結束﹐三日兩夜既pre camp亦都完成lu~~番到屋企完全訓死左...



呢個camp入面﹐我奉獻左我寶貴既聲線﹐為左力撐女媧﹐搞到我到宜家呢一刻都仲係出唔到聲...唉...點算？我好驚真係啞左呀...變michael都唔好呀~~~

>>August 2, 2004 at 8:12:09 AM GMT+8

2004 年 7 月 29 日 星期四 【酷熱】

番工既last day。

份工係我第一份暑期工﹐應該都係最後一份喇。做既野雖然濕碎﹑而且幾悶﹐但我都總算學到野﹐就係人事。知道大機構有幾科層﹐d低層員工可以有幾麻煩﹐再黎就係organize既重要性。其實呢d programme真係好似搞一個ocamp﹐而我既角色就只限於一個ec﹐相信咁講﹐好多人都會知道我係做d乜...

但﹐呢份工都比左好多好好既回憶比我﹐最好既﹐就係識到一班好好人既同事﹐即係一班tutors﹐包括有為食claudia﹑gordon the scum﹑可愛tommy﹑萬人迷william﹑超好人idy﹑每事問kk（希望佢睇唔到...）﹐個個都好好﹐互相幫助﹐對比起doris果邊既麻煩情況﹐我真係覺得我好好彩被派去要搭貴小巴既屯門做...

>>August 2, 2004 at 8:19:33 AM GMT+8

2004 年 7 月 28 日 星期三 【乍寒還暖】

其實...我有d唔捨得呀...

尋日係vec course既最後一日﹐有個closing ceremony﹐有d學生搵我影相呢~~好開心！

到左今日﹐所有tutor都唔使番喇﹐得番我一個要番去執野﹐有d悶﹐仲開始覺得有d唔捨得﹐做左個幾月﹐點都有d感情﹐更何況玩得幾開心添！到走果時﹐要離開呢個做左一段時間既屯門ive﹐係好唔捨得...突然間有種...ocamp閉幕既感覺...唉...

>>August 2, 2004 at 6:42:41 AM GMT+8

2004 年 7 月 26 日 星期一 【微雨】

今日...又ot...兩個半鐘...

It's what called "against expectation". I thought I deserved support; however, it is not the case. I'm quite disappointed.
Yeah, I'm serious.

>>July 27, 2004 at 3:08:26 PM GMT+8