2008 年 10 月 12 日 星期日 【暴雨】

妳想點...?出聲吧..!!


放工返天水圍，同個妹食個飯就返去自己家，
返到去見到女友悠閒地睇劇，唔知咩同事又借
左D咩劇比佢啦，而家日睇夜睇..放工睇..食飯
睇.....，明天女友放Dayoff，我問了她一個問題
，我問她不如等我放工幾轉搭我車丫，之後可
以去一齊食野嘛.....!!不過..妳答我唔去，比著以
前妳就係都要跟車坐...煩住哂，今時今日叫妳去
....妳話唔去，同當日答案比較有天壤之別....，其
實妳心裡頭...妳諗緊咩..?我完全唔知，而家面對
妳..妳比我感覺好陌生，唉....不想再說了，要來
始終會來..要走都留妳唔住，況且妳的確好難服
侍，我唔知妳做咁多野係唔係想趕我走，做咁多
令我難堪的事係想我出聲，知難而退，如果係咁...
可以給我一個死因嗎....?其實當妳一開始轉左工後
，妳就開始變.....，我不想再估，不如妳開口講妳
想點吧....?

>>October 13, 2008 at 3:08:47 PM GMT+8

2008 年 10 月 11 日 星期六 【晴】

害怕


唉...又為左部電腦又嘈，部電腦壞左.我
一定識整咩.?你細佬成日上D唔三唔四D
網，又成日Download Online Game，部
機唔壞就奇啦...!!!為什麼又要遷怒於我，
在萬分唔願意下幫妳整，妳簡直係強迫
我整，D語氣又差，好地地一日都比妳整
到我唔開心，得一日假乍...放過我啦好嗎?

整好部機，女友陪細佬妹一齊，我自己就
一個人出去，真係理都唔理下我..算了吧.....
我都接受到的，。跟住，我去陪Irene搭車
返工，在車上我望住佢同佢係咁講係咁講
正話在她家中發生既事，講到我有三秒鐘真
係想喊出來...我到底做錯咩事?我真係錯得咁交
關嗎?挨在她旁，我真的很累很倦，好似正
話做完苦工咁，去到她陪我食個飯，她就要
走，真係有點唔想佢走，佢走左就唔會有人
陪到我，我覺得自己好似越來越寂寞咁，而
家女友跟本好似唔當我男友咁，在她眼中做
每件事我都會出錯。阿慧...妳幾時先返香港?
只有妳才會清楚她的私人事，我真係撐不住
喇，好好歹歹都比我答案，究竟是佢還是我
真係做得咁差...?

Irene..要後天才回港，呢兩日得我一個冇人幫
我，有時我心中都有點心寒.....到底訓在我身邊
的她...是不是真的是她，為什麼會女友會變成這
樣，如果佢每次兩日唔埋...就係咁對我，我真係
精神崩潰，我而家訓覺都訓得唔安樂，經常都訓
下醒下，自己都感覺到精神好差，其實...女友是
不是想不要我呢...?會不會係反而佢想離開我呢.?
我開始有咁既估計喇，可能女友一早想我走...會唔
會先咁對我...?會唔會..?

>>October 12, 2008 at 3:44:07 PM GMT+8

2008 年 10 月 10 日 星期五 【酷熱】

無聊過一天


返到家打比女友，我都冇估錯，果然都係訓
緊覺，其實意料中事，所以我都唔多問，只
係話咁訓醒先打比我啦，之後都冇第三句就
掛線，唉...真係眼訓得咁厲害麼??

我發覺越來越唔了解清楚妳，有時我唔知妳心
諗緊乜，不知妳想點，少少野都發脾氣，還有
我漸漸感覺妳開始無左"緊張我"的心，即係好
似你死都唔關我事似的，對我只有怨言同冷淡
，我真係好似好憎妳憎咁....!

諗緊..如果要分手，很多野點分..?間屋點好..家
中任何東西點安置好?還有...我之前還有比左成
5000蚊妳妹讀書，其實讀書錢都唔緊要，煩就
煩在好多野都有合約纏身，一cut賠錢都賠唔少
，原來如果真係要行到呢一步都要好多野要整
，雖然未知結果如何，我諗我都要諗定呢D野，
多麼的纏身的煩惱.....

Irene放完假，明天要飛出香港，其實可以飛來
飛去都不錯啊，見到妳在機上影到外面的景色，
真係好靚，什麼叫雲海?我而家知喇，還見到太
陽射向雲海透出的光，我真係好想親自去睇下，
妳搞到我都想去旅行呀，但機票加旅費都不少錢，
但如果在心情差的時間去旅行..去玩下，唔知會唔
會好D呢...?但點都好啦，應承妳陪妳去惡哂城啦...
反正我都知放工唔會有野做的，陪著妳我反而更
感開心.....今日看妳借給我的書，內容提及妳們的
，估唔到妳們也有點墨水呀....!!國泰機艙服務員合
著....哈...在心中我突然想起"機艙服務員"的簡稱...
我作的...叫"艙務員(倉務員)".....，又令我想起妳所說
的"跟車"工作論，心中有一笑....真的....。

>>October 11, 2008 at 2:32:34 PM GMT+8

2008 年 10 月 9 日 星期四 【晴】

是我問題.....還是其實妳有問題?



一早開工就撞到以前七仔個副經理，如幾年前一樣
，一早起身返去叫貨點鮮奶，其實個副經理就係間
七仔老闆個妹，講野D口吻都冇咩點變，仍然係又快
但又唔知佢講咩，不過...難得的一件事佢仲問，仲係
唔係同佢一齊拍拖呀..?我唔知點答，呆了半秒...勉強
的笑容講係啦...其實箇中問題...妳地又知幾多丫，回想
起當日識佢，佢只係個很讓人喜愛既女仔，間鋪有D咁
既女仔響度做....大家精神好多~~~哈哈，個個都諗住識
佢，偏偏無心我又揀中佢，而鐘意佢個同事..差D同我反
檯....，最後大家都冇事..仲好Friend添，佢連婚都結埋，
而我一拖就五年幾...，真係估都估唔到D問題竟然係呢
段時間出來，其實冷靜諗諗，會唔會有別的原因...?我
總係覺得怎會變得咁快，明明以前都唔係咁，會唔會問題
唔響我度...響佢度呢...?我諗唔明，好想知點解，我覺得
自己冇做到滿分都一定係合格，我自問好就得佢....點解
會咁，好多個問號....好多野好似串得埋一件事咁...但又
唔知咩問題，總之係好有問題...好唔明白...!!!

放工，明天女友又放dayoff，佢又同D同事去玩，今次又
唔知係燒野食定打邊爐定點點點.....不知了，我放工知道
冇咩節目，我又知佢仲係放假，就想佢陪下我.....，約到
出來大家話不如去離島啦，開始其實只係想坐下船，而
最快開的大船係去長洲，我地就上左去，我地坐三樓，
可以走出望到大海景，可能係平日，人唔多呢個時候，
上層得六個人，唔使一個鐘到左長洲，本來都係想只係行
行，不過果度真係幾多野睇，記得上一次來我同佢都幾
好丫，仲浪費我咁多錢開珍珠...........間鋪都仲在，一切都
好似好晞虛咁.....感覺係事無變....但身邊的人就唔同左，我
一路行亦都一路向她講出好多同佢的事，或者要去返個地
方....記憶先會清楚，如果冇錯的話，對上一次係同佢睇櫻
花.....，在東灣一切都係冇變....沙灘亦都好少人，我都不敢
行咁入，我怕碰到親戚在附近，到入夜我地去左海旁食飯
，三個菜兩人食，我地飲左一支大家分兩杯的啤酒...........，
回程想搭快船，點知又係撞正係開慢船.....唔想再記起咁多
事，心想....問題出在何人究竟...?在船上收到女友電話..話
今日唔返來...返自己家訓，回到家中好無聊....我決定打完
呢篇野，我自己都回天水圍訓，找個妹傾計倒不錯吧......


多謝Irene陪左我半日，我整天都呆呆..目無表情，真係要
向妳講sorry.......，今天.妳都很靜呀~是我傳染你嗎...?

>>October 10, 2008 at 3:31:04 PM GMT+8

2008 年 10 月 8 日 星期三 【陰】

這一天的Dayoff


問過人究竟分手好唔好，基本上冇人反對過我，最大
既問題係自己做唔做得出，已經有人話我一定分梗手
喇，估唔到我都會有呢D事發生在我身上。好心煩意亂
，我應該點做好呢....?

今日女友、我和她..都放假，我個心竟然冇諗過要同女友
去邊度好，反而一心想點先可以出來同佢一齊，真係好
衰格呀自己，以前有人講，人生莫過於係..你愛既得唔到
，你唔愛既甩唔到，我發覺而家我比句說話更慘.........。
女友的無窮無盡的要求，我有無窮無盡要守既規則，有人
亦都講，相見好同住難，我同女友日日都一齊，五年幾時
間，有95%都同佢一齊，不知道係唔係咁先衍生出咁多問題
。而家我經常和她聯絡，每一次當佢飛的時候，向我講再見
的一刻，都會有種唔想佢走的感覺，她曾經向我講，每飛一
次，可能會係見大家的最後一面，因為一有意外，就唔會返
到來，亦都係咁，每一次回港她一見到對方都會急步走去對
方那邊，大家都好像好珍惜大家見到對方的機會，或者..呢
方面也是維繫感情的其中一個原因。只可惜係彼此都知而家
大家都唔可以一起，因為佢知我有女友，其實........佢係有權
去和我一齊，不過佢明知自己唔開心都向我講，要將而家我
女友的問題解決先係首要，我們始終都冇做過男女朋友會做
的事，最多都要在車上挨著對方訓覺。

亦都因為咁，我覺得好慚愧呢，我要令到對方難受呢，由細到
大我都感得女仔都係會選擇男友..先決條件...睇下靚唔靚仔先...
，直到我而家我先知真係有女仔會睇內心的，在我的朋友中，
又靚仔又型既朋友一大堆，反而而家都係單身一個，如果冇別
的女仔向我講，你已經係一個十分好的男朋友喇，我才知我不
知不覺間比而家女友訓練成咁模樣，好多女仔講，男友好似妳
咁好對我就好喇，但為什麼女友仍然覺得我唔夠好呢....?以前我
以為可能係我問題，今日好多人話我知，其實係你女友有問題....
分手啦....冇死架喇，無論男或女..答案都係一樣。其實有冇人會
反對我分手呢?有人講做事要過到人過到自己，咁我即係點呢..?

而家下午一點，佢仲訓覺，叫佢起身就叫我唔好嘈住佢訓，唉...
睇來我都要騙妳同佢出街喇....。難得一天假期，我都想開開心
心咁過，我真係唔想好似而家咁，睇妳臉色等妳起身，我把這
篇文章打到呢度，我有決定.我決定今日同她一起過。

-------------------------------------------------------------------------------------
女性天性......惡


今日我同她出街，我倆一齊食晚飯，女友就留在
家中係咁訓覺係咁訓覺，我真係唔明，點解一個
人可以訓到咁長時間..?咁既『訓覺功』真係令我
佩服.....真係可以係咁訓係咁訓都得架喎...!!

同irene出街，其實真係冇咩地方去，心只係想同
她一起，我在餐廳向她訴苦，講哂心中既委屈，
我覺得只要同人講左，我就會好好多，可能是在
她身邊，所以怨氣可以咁快消失，我去睇電話，
因為佢要為轉台的事要處理，響我睇睇下期間，
我見佢越講越大聲，慢慢開始向住電話筒係咁
鬧，聽出佢因為轉台的事令到她取消左舊電話號
碼，我果刻先知...原來女人同樣都係咁惡...，果刻真係有
D唔知點形容的感覺，某程度上，佢在鬧人方面，
真係同我女友有得比，不分上下，我不知道是不是
個個女人都係咁惡可以，她掛線後..我問她使唔使
咁惡呢...!!人地都係打份工吧，她答我話..個台已經
拖左成個月都未整好，之前已經打左好多次電話，
所以今次先咁嬲........，聽完後，我覺得又唔可以
怪佢咁惡對個接線生，可能比著我..拖我咁耐都
未整好，我可能仲惡過佢呢....!!!

晚餐我地去食日本菜，大家因為都唔係好餓，所以食
左好少..百幾蚊就走，行到商場我地又一齊食雪榚。今日真
係好開心，點解咁開心??自己心中知道點解吧...!!到夜
晚送佢返去家中，間屋真係好整齊乾淨，同我女友比真
係一個天一個地......

回到家中，一入門口就見到女友講電話，不知同誰傾呢?
有講又有笑，到佢傾完個電話，睇返佢打個號碼，我係
唔知邊個來的，但可以肯定是唔係佢D姊妹，我突然諗到
，我不如同阿慧傾下關於女友的事啦，問下佢可以了解女
友有咩問題.....，我決定明天有時間就打比佢，因為我都
想知最近點解女友會變成咁......唉~~

>>October 9, 2008 at 3:17:14 PM GMT+8

2008 年 10 月 7 日 星期二 【微冷】

可惡的......


真係好可惡，我真係好憎妳，講野唔經大腦....
講野不負責任，講野又唔理人感受，你鬧我
點都得，我話妳兩句就向我講D咁既野...!!妳
好野!!!!!

事源我地係住村屋，咁電視機接收係用『魚骨』
天線，先會接收到，近排成日打風，吹到D『魚骨』
天線short哂。咁我地就睇電視收得唔清，妳果陣
就鬼殺咁嘈，我好心話家中有個迷你天線..俗稱『
獲仔』，可以拿回來整整，咁天線安裝在家內，就算
十號風球都唔怕啦....。今日我拿到返來整，整完
叫妳幫我執好張檯佢，妳叫我自己攪掂佢，我幫
妳整好個電視比妳睇，叫妳做少少野唔過份丫，
我真係估都估唔到妳一句"得"過來，話"係你自己
要整之嘛，冇人話要妳整，我都唔睇電視既...!!!"
，我當堂真係呆左，心諗妳夠膽講多次，點知妳仲
好似好大條道理咁用電腦......，好啦..算..我自己執，
我做好自己D野，我想上網，妳又話我阻住妳，我當初
買部Notebook比你..係想妳唔使同我爭電腦用，幫妳
set哂上網，好喇..到妳用..妳要online睇台劇，咁家中
得一條上網線，而家分比兩部機用，好自然會慢左啦
，妳就為左妳自己睇台劇睇得順暢，就唔比我上網....
話我一上網會拖慢妳部機睇唔到lonline台劇，嘩.....我
咩都整比妳，一心想妳方便..用得開心睇得開心，點知
妳而家反而利用呢D事來限制我，邊有人咁自私架，
如果倒轉係我，妳一定又唔知嬲到點喇，唉...好心淡呀
對妳....!!!!

果刻見到自己咁，真係好想同妳講分手，我覺得我真
係頂唔住妳D霸道橫蠻主意，我真係就快受夠了，一個
唔關心我的女朋友，連我有差D有事都唔問多兩句，相
反她反而給我祈求一道平安符，雖然唔知可唔可以對我
有效，但點解人地可以咁細心..而妳一D表示都冇，問多
我兩句都冇，我舊曆生日..妳知都唔知，我都費時出聲，
偏偏佢就記得我生日...點解??妳知嘛??我用盡方法同
自己講，我唔可以咁狠心同妳講分手，我還要親口向她說
我們還未可以的，我因為還有妳在我身邊，我情願向她說
明白，都想保護我們的一切...，但係妳就用盡所有方法來
激我.....，難到真係想我講出口嗎...?

我發覺自己真係開始討厭妳，我亦都發覺我個心已經慢慢
向著她，我腦海開始有她的存在，妳還真的要強迫我走到
最後最後的一步嗎?說到這裡，我又覺得自己好對她唔住了。

好究竟可不可以做返一個稱職的女友呀﹖求妳唔好迫我好
嘛...!!!!!我就快發癲喇.....

>>October 8, 2008 at 2:32:44 PM GMT+8

2008 年 10 月 6 日 星期一 【微冷】

舊曆生日


女友今日又有自己節目，去同自己班同事燒野食
， 自從去左醫院返工後，佢自己既節目直線上升，
據我所知還有半數都係男同事呢...!!!不過冇所謂啦
，我們早就約定唔會干涉自己同異性朋友相處...，
而且...而家心態更加改變了，心想..如果佢可以找到
另一個男朋友都無咩所謂，不過..如果呢個係事實，
那個男仔真係唔好彩喇......!!

就係咁...今日各有各出街，我放工就約左她，在機
場行左一陣間，機場裡面D商店仔都幾多野行，有
D貨品都幾特別....!!行左一陣在機場Cafe食左D野，
坐左個幾鐘，又傾左好多野...唉......有時有D事真係
好無奈，往往下一步都知會如何，雖然妳話不緊要
，但我覺得真係好對妳唔住咁，內心真係好難過....
，如果結局不是如想像中咁，將心比心..我都會覺得
好痛苦的......坦白說，我都開始迷網喇....

今天有件事真係令我好驚喜的，連我都忘記自己今日
係舊曆生日，而妳反而記得，多謝妳給我的迷你咭片
賀卡，還有令我想不到妳會做的事，真係估不到妳都
會去神社給我祈求的平安符，很精緻，希望如妳所講
，我返工唔會再咁易生意外啦，我會等住它在袋中的
真係多謝妳~

>>October 7, 2008 at 4:06:15 PM GMT+8

2008 年 10 月 5 日 星期日 【微冷】

夾手指....痛爆!!


返工一出門口，有一種久違的感覺，就係
我發覺今日終於似返個秋天喇，你知嘛，
我 好耐都冇諗過自己要著風衣，返工著風
衣喎....件衫真係我仲以為以後都冇機會著
，大家都知啦...而家天氣咁喎...對嗎....??
一句到尾，今日天氣真係好爽，打開窗開
車，聽到同感到D風既清爽真係冇得頂.....!!

不過呢排唔知係唔係黑開有條路，前陣子差
D炒車，今日又比自己部車整傷自己，其實
都唔知邊個設計架車個駕駛室設計到咁Q細，
以我身形真係打開門入去要側身先關到門，
今日就係咁，貪方便一入去唔轉身夾硬關門
，懶係瀟灑咁，就係咁，手縮唔切，就比門
夾到手指，一句Oh Shut!!!!破口而出，我肯定
果刻既痛苦比出面既車門夾親更痛......!!但都冇
法...忍痛駕車，連按開閂門制都痛，本身用呢
隻手按"叮叮"制，有時自己唔記得自己隻手正
話夾到，就用返個隻手指按制，立即痛到叫救
命，好唔容易先到站頭，落車先睇清楚原來隻手
腫到黑左.....立即去包紮....唉...我想知有冇得賠工
傷呢??唉....1052仔..我記住你!!!!!!以後我關你門我
會關大力D報我呢個仇呀..!!!

攪到我而家打字...成日打錯，而家仲痛...真係估唔
到對門真係夾人夾得咁鬼痛....返到家，女友見到咁
都只係問左一句"無野啦"....就再冇理我，唉...心中
滴淚呢...心諗....問多兩句都唔怕死掛..??訓覺真係咁
重要嗎...??唉.......眼冤呀....!!

>>October 6, 2008 at 3:28:05 PM GMT+8

2008 年 10 月 4 日 星期六 【寒冷】

自私........原來我也是


落足一日既雨，仲要係橫風橫雨果隻，在車廂
工作其間，都感覺到D風打向車身既感覺，今日
呢個天氣，儼如打颱風，真係人都可以吹跌。

放工後約左女友去佢朋友家打牌，落狗屎都照去
，麻將的吸引力真係大，去到見到女友D姊妹既
男友，同佢地傾左一陣，大家都係傾妳女友點點
點，講到我既情況，佢地都無言以對，佢地都覺
得應該分手，難得找到個可以比她更好既女仔，
還要考慮嗎...?狠心點吧.....。講到我那一個女仔
是如何，大家都是同一反應，『有冇多個介紹呀』
，原來大家都誤以為她們一定有好多男仔追求呢..
，而事實上男性係鐘意那份『虛榮心』，定係真係
真心去鐘意佢，大家心中有數吧，所以許多呢一行
既女仔都冇男朋友，經常不在香港，一係早機去晚
機返，大家跟本無時間維繫著感情呢，其實呢個道
理也是從她口中講出來的，以前我都係有前者既想
法。

和她一起的確係開心的，因為不要遷就，人較獨立，
所以同佢一齊渡過的一天，都會很舒服，壓力無咁大
，試問有幾多個女仔可以自己照顧自己得咁妥善呢，
能夠一個人走出另一個國家，我自問都唔得，捱過
的性格上真係同女友好唔同，有時諗緊...女友究竟有
咩可取之處...?我真係要諗，可能是我攪到佢性格變成
咁，假若有一天真係分開，佢找到另一個，那一個男人
會唔會忍耐到佢呢種咁橫蠻的性格?如果可以真係比我
再開始過，我一定唔會咁就佢，但時光係無倒流的，假
若我真係可以有機會發展另一段感情的話，今次我會學
精一點，向她表明我忍耐的底線，不過我相信我設定的
底線，對大部份有失敗愛情經驗的女性來說，已經好足夠，
我諗唔會再有另一個女你可以惡攪過..我呢一個女友。

但五年幾感情又的確得來不易，我們都傾到談婚論嫁的
階段，為什麼會發展成咁?可能係妳對我惡劣的態度再加
上生命中出現了她又再加上外界的引誘，天下男人的心每
個都一樣，內心蠢蠢欲動，天性的"不能抗拒".....還有，男
人天生的"不負責任"........

有時都問自己....究竟係唔係用一切藉口同理由，去選擇
另一個..?真的問心.....我只會答..『不能排除這個答案』..
原來.....自己真係都幾自私呢...!!我都不知自己是對還是錯
，而事實上，女友的確係對我唔好，咁生命中出現一個可
以發展的，你們話我可以點選擇呢...?

>>October 5, 2008 at 2:36:37 PM GMT+8

2008 年 10 月 3 日 星期五 【暴雨】

事件"險"重演....我係主角



今日又係駕昨天既路線，講真..真係好有陰影
，心中永遠硬係覺得，果邊等燈停左響度既車
，會撞埋來，發生呢件有驚無險既事後，令我
諗起一件事，我記得當年我仲讀緊事既時候，
大概係小學六年級至中一二呢段時間，發生左
一件事，就係同樣地有架單卡既輕鐵炒向架的
士度，情況係，架的士比架輕鐵同交通燈柱炒
到夾在中間，架的士頓成三文治，的士司機無
法逃生，但好快有消防車、警車、救護車到，
我還記得當日係在客廳睇電視其間，聽到"砰"
一大聲，望下去已經係炒成一碟，真係好好睇
果時覺得.......但，估不到，在同一個交匯處，
同一個地方，同一樣都係輕鐵，萬分估不到我
險些會成為今次主角，會輪到本人身上，也許
感覺到當日個司機的無奈，仲有...原來一D都唔
好睇....

我都不知道要幾耐先會沖淡呢個陰影，撞車唔同
撞到人，我估如果我真係撞向佢度，以我平日行
呢條路既速度，佢一定死梗，過去話比我知輕鐵
撞死人既百分比係有八成以上，到時就算唔係我
錯，而撞死人..我都唔知會變成點....!!!

看新聞，今日天水圍輕鐵又撞車喇，等我明天八下
係咩一回事，諗下如果我昨日又撞..今日又有人撞，
肯定又會比其他人懷疑我們安全問題，坦白說..我們
人工就定左架啦，遲到最多比人調車.比上面D人插下
，你話我地會唔會為左咁而衝燈丫，九成半係你地路
面駕駛者，駕駛態度有問題，但又唔諗下我地三十噸
重既車加埋速度，撞埋去..你會變成點...!!!跟據以往資
料顯示，你會變成一堆"廢鐵"

唉....希望我唔會再有下一次啦....!!!

講到女友..............我都話我電話壞壞地啦，打唔通有咩出
奇..?我鬼知妳幾時..咩時候返喎，一返來又話我唔接妳電
話，又話我唔打比妳，又話Send埋Messages比我都唔覆
，咁我係收唔到嘛，妳返來都見到聽到啦，妳返來我部電
話D信息先收到架.....唉~~妳嬲飽佢啦....我睬妳都有味，成
日都係咁，我夠差D炒車啦，講比妳知...妳咪又係哦哦哦...
冷漠地咁問我有冇事..!!!人地都唔係我女友...人地都會打個
電話來帶點關心既語氣吧.....!!而家講緊我就炒車呀...妳都好
似冇咩點咁，我諗角色交換，我咁做的話，妳又會喊打喊
殺咁對住我啦....。有時諗..妳係唔係出面有另一個呀..?係就
出聲呀...妳成日咁對我..我好難頂呀...

o拿......明天妳放假又要去人地度打牌喇，又要的埋我去，一檯
牌四隻腳，我去到多左出來..你話我做咩好丫，如果我話唔去
，妳又會點丫，妳咪會黑口黑臉吧，妳話去..我就要去，妳話
唔使我去..妳就叫我食自己，邊度會有D咁既事架.....!!!

都係我既錯啦...若果當日我唔係教識妳打牌，今日妳就唔會去
玩，希望妳明天訓醒先去打牌呀，自己D牌章咁鬼屎，一陣妳
輸左我就可能當殃喇...!!

>>October 4, 2008 at 7:34:44 PM GMT+8