2008 年 10 月 22 日 星期三 【晴】

Dear Irene~ (未來我的太太)


雖然有點未習慣屯門去返工，時間唔識就，
但係我諗都要開始習慣下喇，雖然未下決
定，但諗到要妳一個女仔響條村行去返工
或者返屋企，仲要夜晚既時候，真係冇可能
會放心，而且屯門都算方便丫，起碼夜極都
有個保安響妳樓下睇住嘛。租金貴點都唔緊
要啦....我們還能擔當得到的，妳人工都不錯
我知道....分分鐘加埋妳D津貼仲好過我呀.....
哈哈.......

明天雖然返唔係最早，但都係要返工，陪不到
妳架呀，我估妳都明白我要返工陪不到妳吧，
妳咁叻...自己都可以攪掂啦，我諗遲D反要妳
照顧我呀，我諗我真係冇幾多次之前個女友
會準備明天既早點比我呀，妳確係做事真係想
得週到，我從來都未試過食個即食麵，要用個
碗..加個蓋..蓋住個碗..再用個盤托出來咁食，妳
知道嘛，以前我食麵係用煮麵個煲食架，咁妳
食得要咁完美，難道妳真係唔怕洗碗嗎?其實我
識做家務架，我以為自己已經好乾淨啦，但在妳
度我覺得自己好"求其是但"，我諗我終有一天會
比妳罵我.：『整亂間屋喇.....找死嗎。』

已經同妳一起，感覺真係過得好開心，別人講這
是熱戀期，妳有冇信心可以維持我們的感情呀??
很開心可以同妳一齊，像我們今日所講，我地好早
就相識..一齊讀書...途中失去聯絡咁多年，很有緣我
地可以碰到面，妳說好像是上天安排一切似的，原來
每晚妳都會祈禱，妳說神很眷顧自己，之前的祈禱
願望實現了，原來祂想出這個方法讓我們可以一起，
，起碼我們三個都很和平的離開和一起，而舊女友又
找到另一個，其實都好像是好好的安排....一切如妳所
願，真係多麼美好呢....。我們的新開始，妳要淡忘以
前他對妳所做的一切一切，我係不會嫌棄和介意，以
前妳做的事，妳都不想嘛，現在完完本本清楚整件事
，我覺得應該更加關心妳才對呀.....

我地不如Plan好下次我們的大假啦，大家都想去旅行既
我知道，如果我地可以結婚的話，妳就唔使再捱巴士...
要上上落落喇，那陣時妳可以搭免費機鐵返工放工，車
錢都可以慳呀，又快又方便妳，到是妳就可以唔使咁早
出門口返工喇，之前妳埋怨機鐵好貴嘛，結左婚後，我
希望下次填表寫家屬證時，配偶那一項可以填上好的名
字，Irene...我都好期待這一天的來臨架......妳又點睇呀?

我呢....已經認定妳係我未來的太太架喇，我認真的，我已
經冇時間去浪費喇...如果妳唔要我..我真係咩都無架喇.......
為左將來....我地大家都努力丫....好嘛?

很怪呀...明明可以而家面對面向妳講的，為什麼要打咁多
字呢??是不是很傻瓜呀我??

致廷光書，一個哲學家寫比佢老婆既情信，佢老公死後就將佢老公以前寫比佢既信，結集成書，致廷光書...廷光是他老婆的名字，我還未睇，等我睇下寫咩情信可以寫到咁厚..!!另一本"藍天約會2"，女友叫我睇的，是公司作品，藍天約會1我睇過都ok，唔知呢本會如何呢?

我從來未試過同女友去圖書館..!!一齊借書算不算拍拖呀?


>>October 23, 2008 at 4:34:01 PM GMT+8

2008 年 10 月 21 日 星期二 【晴】

第一天屯門生活


第一次響呢度訓，第一個感覺就係未天光
已經有好應聲既汽車聲、巴士埋站聲、輕
鐵磨擦路軌既聲，間中仲要聽到有D輕鐵司
機響大"按"....呢D喪心病狂呀，好似有指引
話晨早非緊急唔使用咁嘈既警告器...咪當我
唔知喎...!!不過有度方便係半夜可以落街有野
買，唔似錦田咁，一定要打的出元朗先有，
兩者都係典型的比較吧，寧靜、唔方便對比
嘈雜、方便，各有各好和唔好的地方....，對
我來講兩者都冇咩所謂啦.....

女友家中真係好整齊，搞到我都唔好意思整亂
間屋，仲有我唔知係唔係間屋仲未熟D擺位，好
多東西我要找佢出來，好似在家中玩尋寶咁，同
時間我又好似正在玩尋寶咁，找到我好多我唔知
既野，例如....妳都幾多衫褲裙等等，我只係以為
得個梳妝台先放妳的化妝用品...點知我找其他野
時響另一處找到一大堆完全未開既化妝品....，哈
.....其實我無心去找咁多野架，我一心想找條大毛
巾，但毛巾找不到反而找到妳呢D野，但妳臨出門
前話比我任找嘛.....冇得嬲架.....，唔打咁多喇，去
食早餐兼返工...返工先去機埸接妳個傻瓜機....!!

------------------------------------------------------------------------------------
驚喜......~~ 晚上 《溫暖》


放工去接女友機，去到機場等佢，等左十五
分鐘左右...，終於見到佢拉住個行李箱出來，
其實我都唔明點解佢地公司..去邊點都要一定要
拉行李，明明個箱只係得件替換衫、一個化妝
袋，護照.....等等咁少野，我諗打大風可能都吹得走
佢，唉......公司對佢地員工個形象真係咁緊張，咩
拉住行李先真係以個空姐嗎?同女友搭巴士，不
知是不是長途機關係，見佢一上車就訓著左，望真
D...佢訓覺個樣都幾可愛喎，由上車訓到落車，叫
醒佢落車再一齊返屋企，返到去執好所有野，比
佢訓左一陣，我地就出去行街，去左旺角，去行
女人街一帶，我地又去街邊拮魚蛋，食街邊小食
，去埋朗豪坊行，佢自己買左D衫、化妝品，原來
佢買化妝品係有得平有得折扣，唔怪得家中有咁多
呢D野啦，我地行下行下去左間漫畫精品店，我自
己睇中左個散紙包，但最後冇買，原因係...唔係好
值，雖然我覺得好得意，但始終我都放低，走左，
我地跟住去食野，在食野途中，女友話要去洗手間，
一去就去左差不多15分鐘，我以為女廁要排隊所以
先咁，突然間.....女友在我面前用手...搖下搖下佢正
話我想要既散紙包，原來佢唔係去洗手間，佢去左
間精品店返轉頭買比我，哈.....開心死呀.....，其實我
在睇精品時，佢明明係睇緊其他野，究然係咩時候佢
有留意我想買呢樣野?真係神奇，一方面開心係我得到
呢樣野，更開心係佢可以咁細心睇到我想要咩，從來
只有我比驚喜別人，今日女友比驚喜我......真係好開心
，我不會忘記那一刻的感覺.....，多謝妳呀~

其實計下，我真係好少買野比女友，次次都係女友買比
我，無論出trip返港都會有一份小小的手信，今日又買左
呢樣野比我，其實，我覺得而家已經好滿足，女友又不
用我擔心，自己識得煮飯、做家務、而且仲好細心呢.....!!
所以我點會捨得離開妳呢，但願妳唔好離開我呀，我發覺
自己真係真係好喜歡妳，如果能夠一起走埋下半生，咁就
完美喇.....。

明天我要返早更呀，妳自己要一個人，到下午時間先可以陪
到妳呀，到星期日我們先一齊出去行街，陪妳做妳喜歡做的
事，妳想去的地方，好嗎 ?

女友送的禮物呀



>>October 22, 2008 at 3:13:11 PM GMT+8

2008 年 10 月 20 日 星期一 【酷熱】

未感覺過的 ─ 退縮...


今日送左女友返工，搭機場巴士去到國泰城
落車，在大門口目送她上電梯先走，有點改變
..我以前係去醫院.....而家要去國泰城或者係機
埸..，轉變都幾大，記得以前好麻煩，送完佢到
國泰城又要等一架鬼死咁耐既巴士.，先可以到
醫院，而家不用喇，我坐呢架班次比較密，蠻
好呀...。返工返新屋企都比之前方便點點兒呀....

而家先好發覺件事，使我不知如何是好，好像不
知自己想怎樣咁，我送女友返工途中，唔知佢件
衫係唔係真係好顯眼，我硬是覺得好多人望我們，
有時我真係不敢拖著她，與她相比我好似真係好唔
襯，一個係整整齊齊化好妝的女仔，身邊跟住係
一個其貌不揚又身形大份既男仔，總係覺得好唔知
點，雖然女友不介意，但總好似都唔係幾好咁，不知
是不是身份不同，以前我都覺得冇所謂的，反而..而
家有咁既想法，有點群眾的壓迫感，唔知我咁做咁
諗女友會唔會嬲呢....?怎麼辦好我應該..?要自己去
適應...?難道我真係要她咁講，返去先換衫嗎?咁我
又係唔係小題大做呢?我覺得自己不知不覺間就做了
一件令女友唔開心同難受的事了，對唔住呀~

應承妳返港放工那天，我們去食飯，妳離開在妳家真
係有點"新鮮"不知我又唔會唔適應在這裡生活呢...?

>>October 21, 2008 at 1:08:09 PM GMT+8

2008 年 10 月 19 日 星期日 【晴】

嗚嗚....


今日返屯門跌左100蚊呀，我跌錢呀.....唉
，我點解唔放銀包呢...貪方便放響褲袋，一
定係取電話時順手拉跌自己唔知啦，呢個教
訓100蚊...平定貴呢...?點解我唔跌10蚊紙.....?
但幸運我唔係跌500蚊紙.......!!!!
邊個執左呢唔知....如果阿婆執我心會好過D，
如果比D死靚仔執左走去..買煙等等........，我
會咒到"食死佢".......。唉...不過 ，冇得唔算啦.....。
多謝妳呀....肯幫我分擔50蚊....呢50蚊我唔會
用架.....你摺得咁靚...點會捨得用呢...!!

明天你要返工喇....會離開我兩日一夜，得返我
一個，不過.....妳給我門匙...我會好好的看守著
，很久冇試過住樓的滋味喇，看看大家會唔會
鐘意大家的地方，不知道妳搬來..還是我搬去，
如果要慳錢就我度喇，睇報紙妳公司FA可能要
放無薪假期呀，我們要節儉一點兒呀，今日仲跌
左五份一既人工.......

明天送妳去返工啦，送完妳就到我返喇.....妳回港
那天可以接妳呀，開心嗎...?我講過我得閒有時間
就會接妳夜機架嘛.......我會做到的....

Irene~妳正話番說話令人感到好平靜.....，點解妳
會叫我咁諗既呢?
**上天要我跌張一百蚊，可能係要幫一個有需要的
人，佢可能就係好需要呢張一百蚊，而家佢執到，
你幫到佢，你咪會開心點d..心會好過d..?我又幫你
分擔一半，我又可以買一個教訓...同時妳亦都分擔
我一半教訓......**

點解....點解妳會諗到呢d想法既...?不知是不是妳的是
基督徒關係呢..?但無論如何...妳的說話真係令人安慰......
有妳在身邊，我想我不會不開心喇....又要讚美妳...叻女呀.....

>>October 20, 2008 at 2:34:01 PM GMT+8

2008 年 10 月 18 日 星期六 【晴】

我們的第一餐住家飯...


尾三轉車，Irene陪左我一齊，來回天水圍...屯門兩轉半，
女友坐足兩個幾鐘，放工時...同我講頭暈坐到，哈....
，之後我地去左屯門市廣場下左一陣，傍晚，我們決定
煮飯食...，女友唔知響邊度買左部迷你壽司機，我地買
哂材料，到家中搞搞搞，整落先知...原來我係唔識整，
我唯一可以幫佢做就係執檯，同埋..我要咩餡料.....!!!!

我諗我唔怕以後都冇野食，同妳對比下先知..原來我煮飯
都唔係好得，我諗以後都要旨意妳喇，在我心目中，妳真
係好叻，上次機場又係妳救我，今次又係妳做哂全部野，
我點捨得離開妳喎，但求妳唔好厭棄我要一齊捱，我已經
好滿足了，Irene...我不能給妳富裕的生活，妳願意一起嗎?

今天很開心，明正言順拖住妳出街，今天我不會忘記.....
我們第一餐做的飯.....同埋妳講的說話...

>>October 19, 2008 at 2:37:05 PM GMT+8

2008 年 10 月 17 日 星期五 【炎熱】

給妳...Irene的


平靜的分開，或許已經比起很多人幸運了，今日
早上到銀行搞好D戶口取消的手續，記得我們開
戶口的時候..大家對未來都充滿憧憬，事到如今
，已經是另一回事了，怎樣也好，我都要把妳從
我心中移開到另一處，妳已經在我心中不是第一
二位了，但慶幸的是...分手我們冇變成敵人，還
算得上是朋友，也是好事吧....!

由而家開始，我要好好的對她，Irene在我心中已
經係我現在最愛的人，有些事我要為她應該去做
的，我一定會做好同埋做得到，我已經孤注一擲
把所有放在妳身上，所以我會一心一意去對妳，
我說過我不會理會妳的過去，就算他怎說都無關
係，所以不要再為呢D事擔心...為了這些事去傷心
，其實我應該感謝妳對我這麼好才對，我自問都冇
什麼值得人去愛的地方，難得妳去對我好，我一定
會珍惜的，小時候...我對妳的整估....我就將呢一生
交給妳....當作懲罰，將我交給妳，呢一生都要對妳好....
妤嗎?

我在這裡向妳講，亦都要比人知道，我係真心真意
的........Irene...我愛妳。

希望妳看完會相信我......以上說話是真心的.....

>>October 18, 2008 at 12:48:26 PM GMT+8

2008 年 10 月 16 日 星期四 【炎熱】

舊的過去....新的開始


離開的第一天，沒有想像中那麼辛苦，或者已經
預期到會有今日，事情在我計算之內，雖然可惜
，但我又可以做到什麼呢..?而家唔習慣的是家中
空無一個人，五年幾感情都可以咁兒戲，是我真
係做得不好，還是妳要求太高..?但...呢個時候都
不是回顧的時候了，我想我也要到她公平一點，
我都是時間向前看吧，好好的對她....。

早上有朋友向我說，女孩子喜歡人向她表白，我返
工想了又想，我諗怎說才好呢..?最後我都是決定直
接說吧，我決定放工到她家說，但.....向妳說真是給
妳的反應嚇壞我，聽到妳哭訴我才知妳為了我受了咁
大壓力，還有我保証我不會厭棄妳的過去，妳無乘
人之危，妳由此到終冇破壞到我和她，我整件事妳
已經明白，我不想妳去再這樣想自己，其實..我都好
想和妳一起呢....因為我都喜歡妳的......千真萬確的。

希望我們會有新的開始..好的開始，我想妳是我呢一生
中最後一個，今晚向妳講的，我會做到，在這裡寫下
作証明吧，不要再傻傻地哭喇，如果唔係，妳的妝化得
再好都遮不到呀，明早妳要返工啊，夜晚接妳吧....因為
我放假嘛...，不用再擔心我喇，乖乖的去好好睡一覺吧...

>>December 9, 2008 at 10:34:51 PM GMT+8

2008 年 10 月 15 日 星期三 【炎熱】

決定...

今日我自己好唔小心跌爛左部電話，第一次可以
跌得壞，過往D機只會用到壞...今次竟然會跌得壞
，電話是當日女友送的，都是約兩年的事了，比我
感覺好奇怪，我用咁耐電話都未試過壞，好似在
暗示我聽...連部機都玩完.....我與她是不是都是一樣..?
那一刻有點無言，將事告訴Irene知道，我們去買新
的一部，今次Irene送的，當作正日的禮物.....。

我不知妳是咩原因唔肯出聲，妳做咁多事都係我想
這樣做吧，既然妳不肯開口先............那我唯有開口
吧，總要有一方要講的，我也不想阻住妳發展，我
覺得妳想完，便由妳吧，很想知道他什麼地方會咁
吸引你，我想是他有錢過我工作好過我吧.....。

其實我也不是白痴的，妳一早便知我會問妳的朋友吧
，我估妳都係故意說她知，等我先問得到她妳的事，
做咁多事原來只係想我開口，咁..點解妳唔肯講先...?
妳怕什麼....?咩...妳都會識得"怕"嗎?

>>December 9, 2008 at 10:34:33 PM GMT+8

2008 年 10 月 14 日 星期二 【晴】

訓得唔好.... 早上 睛


其實而家真係訓唔習慣天水圍張床，可能我
已經習慣自己家張床，在天水圍訓極都極得
唔舒服，一早五點半就起左身，D抑屈好似
出埋來咁，好唔開心，我諗我都要開始習慣
番....天水圍家既生活，咁唔知隻貓貓點好呢..?
天水圍唔比養寵物，唔知點算好...。不過我諗
遲D都有辦法掛我諗...，原來分居都好多野跟
住煩......我真係頭都暈，一樣未煩完又一樣。
但...呆諗都唔係方法，自己成日同自己講，所
有事殺到埋身先算啦.......

Irene今日返來，放工先接機，看來我都要熟悉
一下機場既環境地方，我諗我..要來的機會都會
多好多，要知道一下機鐵的行車時間表，客運
大樓咩地方打咩地方..我都要知清楚，機埸咁大
而且度度一樣款，真係約錯地方都會唔清楚....。
之前..我好不容易先清楚女友做的醫院環境，在
我心目中，佢間醫院就係迷宮，好喇，到左我識
路喇，就攪成咁....唉，一直相信..我只相信只要我
對人好，人地就會對返我好，但原來唔係，咁多年
來都對佢不錯丫，好多野我能力做到的，我都滿足
到她，佢喜歡的東西我家中還有一小堆，我諗緊一
次過比埋佢定係掉左去，又要煩多件事.....點好??

看看時鐘..而家Irene應該在剛剛上機準備，等多十個
小時左右就到香港，到時我可以見到佢喇，也許而家
我見到她，個心先會有種很好很好的感覺。這刻我又
諗起一件事，如果分手...我應該點樣阿媽同親戚講...?
次次拜年都係佢，如果我同Irene一起，大家會接受她
嗎..?不知人地會點諗，人地會講我負心....貪新忘舊...?
在我親戚眼中，女友係一個非常乖巧的女仔，有人會
相信我嗎....?又有多一件事要諗....你們又會點諗...?

我又要準備返工，今日我成日同自己講，一放工就可以
見到她，我今日一定要好好工作，等待呢個大家見面的
時間，我發覺自己反而開始要倚賴她了，或者可以証明
自己真的需要她，很想同她一起。



--------------------------------------------------------------------------------------------
鬼祟的晚飯....!.. 晚上 睛


好不容易終於放工，不知是否連天都玩我，
尾果轉竟然跟住個B仔『學神』尾，睇個樣
都估到係路線實習吧，若果平日..我都會好
有耐性..吊住佢尾慢慢行，但硬係要響我D趕
時間時候碰到它，足足遲左我一分鐘，就係
呢一分鐘，我趕不到西鐵，時間一阻，一遲
就成十五分鐘先到青衣機鐵站，去到機場已
經遲左，行到出境大堂，我們等開的長椅地方
，已經發現她坐在椅上等.....無穿紅色外衣，
真係不容易發見她，但點都好，我找到她，好
開心見到佢，等了今天好像等左好耐咁，而
事實上我真的很念她，有很多說話向妳說呀....

坐機埸巴士回屯門，回到屯門我們坐在大牌
檔外食飯，果刻我才知道原來她們是不可以
在非工作時間著制服到外面食野，為了不讓
人知道，我給他風衣蓋過外衣，她亦把頭髮放下
，其實為什麼要食得咁鬼祟呢...?但那一刻真的
很開心，很久沒有開心的笑過了，我對上一
次開心的日子都不知何時了，食完飯散步行
回家，沿途說著我的事，我想我應該也要有
些交代了，今日多謝妳餐飯、手信...多謝妳
對我咁耐的忍耐，希望能夠如妳今天所說，大
家未來也可給大家"優惠"....，這樣想下去，
我們也會挺好啊.....

>>October 15, 2008 at 3:20:00 PM GMT+8

2008 年 10 月 13 日 星期一 【晴】

靈魂...在那?


心神恍惚.....扒在床上面，時間都不知道，返幾
點都唔記得，腦內堆滿好多問題，好想知點解，
好多野想清楚想明白..我想有個"知"字...

還以為今日返12:00鐘，被MSN的聲音叫醒，先
發現自己做緊咩，總之腦裡白色一片，好似冇左
方向咁，心中好想倚賴一個人，我還要等多一天
，諗諗...可能大家分開已經係遲早的事，看來我
點都要接受，或者我擔心係如果大家都找到另一
個而分開，或者係好事，但如果佢真係冇...而我又
同佢講分開...結果又會怎樣，好複雜的問題，一時
間都唔知點解決，原來諗分手係咁麻煩，比當年追
求她時難上十倍......

而家心中一方面好想快點了斷事情，另一方面又作
左好多假設，其實自己都唔知想點，其實好簡單..係
得分開同唔分開，如果可以肯定佢有另一個，事情
好似會易解決好多，但我又唔想呢個係分開的原因，
因為自己又唔係好甘心..自己衰咩要令到妳咁做....!!
我同妳分開我都叫有個原因，因為妳真係對我差....
，但如果妳冇另一個就咁掉下妳...轉頭同她一起，我
又唔知妳會諗咩......，唉....其實..我再咁下去..我知我一
定會令到Irene唔開心，咁餘下我應該點做先係最好呢?

諗到呢D我又頭暈，很想靠向妳旁邊，我而家先知....
我也有想喊的時候啊.....，今次冇睇錯時間....要返工
，真的怕心情影響我返工....。期待明天到，或者見到
妳我才能好好地靜下來....
--------------------------------------------------------------------------------
親愛的關心~


今天收到Irene的長途電話，能夠聽到佢聲音
真係頓感安慰，雖然只係短短三分鐘，幾句
的說話，不過已經給我好大的支持，我心中
好想她回來，只係等多一天，明天可以見到
她，我放工可以去接她機，只要在她旁我才
沒有那種一做錯事就會死的感覺.....。返回天
水圍家，對住細妹反而還有安全感，把事情
我的遭遇和處境告訴我個妹知道，細妹都會
關心我，真係開心，無枉我對妳咁好，終於
有多一個回報了，我覺得我好似突然咩都冇
，同時間又出現了關心我的人，雖然只是幾
個人，但已經很足夠了.....

Irene，我真的很期待妳返來，或者我已經清楚
我想要什麼了....。

>>October 14, 2008 at 2:04:50 PM GMT+8