2008 年 10 月 31 日 星期五 【炎熱】

與妳一起...在蝴蝶灣


今日天氣很好呀，涼涼地有太陽但又唔太熱，可以今
日大家都放到假，真係難得呀，睡醒的妳好似好過昨
晚好多，見妳可以自己紮紮跳都放心喇，看來妳昨日
只係普通痛症，既然妳唔想檢查就由妳喜歡吧，但妳
自己應承左我，下次再係咁就點都要去檢查喇...!!唔準
妳扭計呀..!!!!

下午本身我地想去九龍行街，擔心剛病完既妳，所以
都係留左響屯門，我地搭輕鐵去左屯門碼頭既商場食
野，食完就漫無目的咁行，行到蝴蝶果邊，傻瓜就話
去沙灘坐，其實都好既，咁既天氣真係去海邊都不錯，
我地去左便利店買左點小吃，唉.......都係抽唔中多啦
A夢!!!我地才去果邊既沙灘，一去到望下原來都有好多人
玩水，大多係小朋友同佢地D父母，而我地找到個少人
點的位置就坐低，一路食野一路傾計.......，傾左好
多讀書時代我們既事，畢業後大家失去聯絡後發生既事，
我亦話左比佢知一個小小既秘密啦，哈哈。其實向著
海向前望，對面就係機場，間中都會見到飛機在空中
橫飛過，女友明天就要飛喇，明天妳就係在天空中工作
，要飛到咁遠，我地距離係地球既另一面呀，希望
兩天可以好快咁過啦....!!呢兩天放心啦，我會自己
搞掂架喇，不用諗住要整定兩個飯盒喇...不用喇...

很想很想問妳多次，點解妳咁記得我整估妳，將妳D頭髮
夾在兩張學校既檯中間，之後拍醒妳，我今日又問，哈哈
，我諗呢世都唔會忘記果刻妳個答案個樣呀，『真係好痛
架，邊有人咁無賴架....!!』呢世都記得呀...!仲有..........我
今日先知原來冇帶果樣野，妳係出唔到街既，妳叫我今日
等妳上去取返件緊要野就係妳個......『化妝袋』，知道後
我差點暈左響條街呀...妳知道嗎.?咁貪靚都有架?!

晚餐我地去食壽司、手卷、刺身，傻瓜係咁扭計要去食，唉，
妳都未病好，但見到妳咁又...唉.....算啦，明天妳要返工，咁
就如妳所願啦，見妳食得咁開心我都開心既，明天送妳去返
工啦，國泰城點去，而家真係熟到透，我話過我得閒有時間
就會陪妳返工，我一定會做到的，講過一定唔會就咁算數...。

咁唔知妳一陣有冇野會同我講呢...??

>>November 1, 2008 at 2:30:19 PM GMT+8

2008 年 10 月 30 日 星期四 【晴】

知道喇..我會小心~


唉...我都話D人有病啦......成日衝燈尾，今次終於炒車
喇，我有時都真係怕左D車，不過......佢又衰，跟佢咁
貼仲咩呢?插正人車尾，事發時人已放工，今日都係收
風返來，咩人出事無謂講啦....。自己都要醒醒定定，而
家成日返屯門既我，走左去Depot睇下炒成點兩架車，
都係凹左少少，好少事，不過，唔親自試過你都唔會信
個"E迫"威力，個威力就係全車人跌哂，唉....希望坐完大
房佢地會無事啦......真係擔心下次會唔會係我...!!!!

女友而家都會留意我們既新聞，當然叮囑下我，叫我小心
，但有時意外好難講嘛，不過我會小心架喇.....，明天妳放
最後一天，星期日妳又要飛.....，明天去邊去呀?定係想響屋
企渡過呢?妳有冇好提議呀?


正話同個傻瓜去睇醫生，醫生要佢去照超聲波，因為痛既
位置唔尋常，個傻瓜驚如醫生所說。無論點我都唔會走架
，都未檢查清楚而家，唔好諗咁多啦，醫生都話有可能係
妳工作關係先令到身體咁嘛，食左藥唔痛兩日就得架喇，如
果仲係痛先再諗佢啦，況且妳年年都話有做年檢，應該只係
普通痛症吧....唔好再眼紅紅咁扁嘴喇，今晚有我陪妳、貓貓
又陪妳..係咪?而家最緊要乖乖地咁上床休息，明天冇事就陪
妳買想買既野好唔好..?

現在係凌晨2:12分，眼紅紅的妳終於肯入睡，望著妳抱住公仔
睡覺的樣子，很可愛，其實"包包面"也不錯丫，如果妳可以睡
到溜口水的話，就真係完全和一個小女孩無分別，真係好想親
親妳，無論在外在內心都是令我越來越喜歡妳，所以，妳的過
去跟本不重要，就算妳有什麼病患和痛苦，我都定會同妳一起
度過，捉繄妳不會放手。現在看著旁邊睡著的妳，看似睡得很
甜喇，我諗妳而家應該冇先前咁痛苦，放心啦，我會陪著妳睡
到天亮的。現在是凌晨2:26分....

>>October 31, 2008 at 6:26:24 PM GMT+8

2008 年 10 月 29 日 星期三 【酷熱】

的士??


今日返工發生件好好笑既事，在我角度睇好笑
啦當然係，話說架車去入站月台時，有個後生
仔唔知點解向我揮手，開初我以為佢係識我，但
當架車越來越近個站時，我發覺我係唔識佢既，
果陣我先知，佢揮手係咩原因，佢原來要響月台
截輕鐵!!!!咩家下我係的士佬嗎?你唔截我都會停架
啦，唉....笑死我，如果返工時可以有多D多類既趣
事，我返工就唔會咁單調咁悶喇.......不過我都知.我
地只會碰到麻煩事多，我已經好多好多好多次比D
阿婆阿伯用佢支"拐杖"擋住我關唔到門，搞到我遲到
，唉..天水圍都係都古怪既人，好似D外賣仔同你博命
睇下邊個快咁啦......希望女友幫我祈求的真係可以保護
我事事順利啦.....。

第一次在休息室叮飯盒...哈。可以睇住電視住坐梳化食﹐
都幾舒服，唔使出去爭位食飯已經夠盞鬼啦，我下次
都要帶飯呀....下次有咩飯可以帶呀?

貓貓聽女友講都算乖，只係嘈左少少，咁遲D以後果
度就係你的家喇，有多個媽媽肯照顧你，要乖D啊.....
遲D買間屋仔比你啦，越望堰覺得你肥左大隻左好多好
多，同我第一次見到你簡直係兩隻貓.....，希望你都住
得習慣啦.....

>>October 30, 2008 at 3:15:26 PM GMT+8

2008 年 10 月 28 日 星期二 【酷熱】

貓咪...


此時此刻，已經什麼都變哂，放工回家
自己執屋，找到好多唔係我既野，執好
一箱後放埋一邊，望住箱野，真係有點
稀虛，響我執野期間，隻肥貓響屋企走
來走去，可能我執野阻住佢活動吧，但
為左強迫要佢做隻家貓，我冇法子唔咁對
佢，但隻貓算唔錯，算係咁，係間中整跌
我D野外，都冇整爛傢具，起碼見到家中
有個紙皮箱都識得入去訓，睇來佢應該知
個紙皮箱的用意，不過響錦田，佢一向我
都係比紙皮箱佢訓，我諗去到新地方佢可
以適應，畢竟貓都係鐘意訓同休息吧。今
天帶左佢去比人沖涼整掃一下，做返隻乾
淨既寵物，唔知佢會諗咩呢...?

今日試下比媽媽照顧一日，其實係個考
試，如果唔合格，就可能用最壞打算，比
包租婆養，咁佢就唔會食得咁好架喇，真
係估唔到最難搞係隻貓，人與寵物既感情
，原來都係一樣，希望女友可以睇得掂佢
啦.....真係好擔心呀..........!!!

女友今日有煮晚飯，忌廉磨菇粟米湯加一碟
西蘭花肉片和一碟生炒骨，明天我可以帶飯
喇，也許我可以慳返一餐，因為我可以帶飯
返工，呢D野真係有點陌生，返咁耐工都冇試
過咁做，哈.......，但無可否認內心真係好開心
既......因為我以為呢D野阿媽先會做架嘛......多
謝妳呀......

>>October 29, 2008 at 2:42:42 PM GMT+8

2008 年 10 月 27 日 星期一 【晴】

飯後購物...


夜晚同女友走左去7-11度食...叮叮點心，哈哈
好耐都冇試過去咁食叮叮，之後我地去左超市
買野，下一餐煮忌廉湯，其實據我知茶餐廳D
做法好似係...牛油加味精、奶、麵粉，我知好
似好似係咁，真既事實唔知對不對，真係要望
下妳點整先得!!越望越覺得自己煮野好鬼"屎"，
原來真係識得煮野食既人係咁既......!!!

比人鬧我電話相用張咁既"為食相"，好喇好喇，
今次幫妳影左張..妳滿意既，咁今次用得啦?!!
但係妳夾麵果張真係好得意架，妳Del唔到架
喇，我已經有留soft copy photo...哈哈哈哈......
認真架.....呢張影得幾好丫...點解唔用得喎...??

明天我返早呀......自己照顧自己住先啦，放工先
回來陪妳，還有呀..妳過幾日又要出走兩天喇，
我地一分開就分到咁遙遠喇，我仲未習慣呀......
唉.....!!


機場用手機影呢張..?



>>October 28, 2008 at 4:23:58 PM GMT+8

2008 年 10 月 26 日 星期日 【微冷】

收到妳的信


一放工就返去錦田家，而家這裡只得我和貓咪，
見到牠，我而家只是諗到或者擔心牠的容身之處
，如果叫我唔要佢做流浪貓，好似好冇人性咁，
當日佢就係比人細細隻咁放左出街冇人理，我
先會冒險帶著牠返工，我咁做都係唔想佢冇人
理，所以要我唔要佢似乎又冇咩可能，因為點
都會有感情嘛，但現實我應該點做好?而家希望
迫你適應室內的生活啦。

正話包租婆拿了幾封信比我，大多是交費信，還
寫上前女友的名字，看來呢一封係最後一封了，
因為已經轉左名喇，再看下去有一封係用公仔信
封包的信件，是給我的，打開一看，原來是Irene
寫的，封信共有五頁紙，張張都係滿是整齊的文字
，信裡向我說左好多事，內裡表明女友內心好多事
情，我覺得Irene同其他女仔不同的地方，就係呢處
，女友會用好多方式來向我說話，有時明明大家可
以面對面講，但她喜歡寫留言、貼紙仔、今次仲寄
信，我覺得有某D事情用文字表達比面對面講更好，
女友可愛之處在於這裡，即使佢唔開心起碼我都知道
，女友喊我都知係什麼事，相處多左，我覺得女友比
前女友更加"喊包"，或者以前是朋友關係，好多內心
世界都不會全部向我講，其中一件事係我而家先詳細
咁知道女友原來返工好多時都比有D無理乘客鬧，若
果碰正D唔好既ISM或者Senior，佢開工更加慘，還要
對住D搭客強顏歡笑(妳信中寫叫做『職業笑容』)，這
樣我就知道...很難怪佢以前為什麼咁想人接放工，見到
其他同事有人接放工而自己冇人理既心情，因為自己只
係想有個人倚在旁安慰自己，所以.....我應承妳如果我
有時間可以就會接妳放工，知道妳工作很辛苦呢......。
我看完妳的信，好像知道妳更多，我諗我知道妳需要
那一方面[的安全感，我會盡力令到大家都開心，我會
令妳慢慢淡忘以前不開心不快樂和惡夢。


妳終於都返到家，我放心喇，明天我都要返工呀
，妳在家休息一下喇，到下晝5點半我先放工。
妳話妳會買全日通遊車河!!!妳跟幾轉好喇，我怕
妳兜到頭暈，況且我都冇時間去同妳傾計，我
都講過我得幾分鐘架乍，妳真係可以忍耐到我放
工?不過...無所謂啦，只要妳喜歡，仲有妳有度好
，妳唔使要我拉走遮布比妳睇，因為唔知點解，
若果比我知有識既人在後面望住，我係唔識得駕車
，所以係會悶親妳架....可能到時妳會坐到訓著左都
唔奇....哈哈。不過，我明天點都會找妳架喇，因為
有D說話想向妳講，我諗妳知左會幾開心架...!

還有呀，我用左妳張"夾麵食"張相，做左我電話桌
布呀，妳夾住麵個樣好滿足咁，好趣緻，明天比妳
睇下呀...哈哈...我唔會換架喇..暫時...!!!其實.原本我
想用妳響成田人地幫妳影果張做桌布，果張影得妳
幾靚，背景又藍天白雲，但妳著住套制服，放出來
好似對妳唔係幾好咁，所以我用左張"夾麵相".......。
明天比妳睇下啦...哈哈哈....

>>October 27, 2008 at 5:15:06 PM GMT+8

2008 年 10 月 25 日 星期六 【晴】

一頓我不會忘記的早餐～


今日放假，不過我8:45分起身，我以為已經好早
起身啦我，點知女友仲早過我起身，真係我對佢
呢一個動作好陌生，因為我以前從來從未試過女
友係咁早起身就係走去......煮早晨..!!!有人整早餐
呀..!!!!!!原來真係有人會咁做，我諗..對上一次有
人咁整早餐食時應該我仲係同阿媽一齊住果陣....
，miraculous呀....有點手足無措.不知如何是好呢..!!

女友真係好....應該點講呢?即係得兩個人，佢都情
願自己煮都唔出街食，呢個係唔係先係一個完整的
生活呢?我覺得自己好似咩都唔識咁，感覺就係好似
一個成年人，係完全不知道呢個世界係有"整早餐"呢
一回事，我去到廚房想幫手，但我好似仲阻住佢咁，
和女友一起，我覺得好似咩都唔使做咁，只係等食
..!!以前真係試都未試過呢種咁家庭既感覺，人地話
男人係鍾意果D識煮飯既女人，呢個係男人既天性，
與生俱來的，開頭我都唔信，因為我從來冇呢種感
覺，但今日我感覺得到那一份很奇妙的感覺，覺得
好開心，所以我點會捨得離開妳呢?而家好似妳不斷
咁寵壞我，其實呢D都係家務，應該兩個人分擔的，
所以一陣我唔會比妳去洗碗善後，我做吧...，再咁下
去我會越來越懶，越來越倚賴，最緊要係我唔想妳做
得咁辛苦嘛，妳返工又係要服侍D客，妳返來又係咁
做，我會覺得自己好衰呢....

今日女友煮粥和牛油方飽，妳煮果D同我比真係..唉...
唔知妳食完我煮果晚有冇肚痛呢?我今日先知女友會
響假期或者放假就會自己煮野食，其實妳仲識煮咩架
?哈....真係好被照顧，平日要返工就買定早餐給我，
放假妳又煮....，點解妳可以咁叻，我今日一早就比妳
嚇親喇，不過我深信，妳將來一定係一位好好既媽媽....。

而家我反而應該諗，我點先可以留住妳，唔好離開我呀....
我諗我唔會再咁容易找到一個咁好既女仔，我怎會捨得
離妳呢.."傻瓜"，(妳的口頭禪)，搞到我而家都成日咁講...
以後都叫妳做傻瓜好嘛...哈哈。

-------------------------------------------------------------------------------------------
給Irene的宣言 晚上 溫暖


下午後，陪女友出去Neway唱K，哈哈....原來妳
都唱得下架喎，我就真係唱唔到喇，兩個鐘比妳
開哂個人演唱會，我只係唱左十首都唔知有冇，
仲要有幾首中途Cut歌添，唱左190幾蚊，哈....傻瓜
比錢，多謝喇.....。唱完去行新都會廣場，之後又
去埋又一城，最後一站去埋屯門行吉之島，大家
只係買左食既野返去，睇黎我地都係鐘意食既人呀.....!

今日同女友一齊過得好開心，明天妳又要返工喇，
我陪不到妳喇，因為我都要返工，兩天假期就咁過
左，真係唔覺唔覺呀，Irene妳響我地拍拖呢幾天，
對我有咩感覺同感受呀...?如果妳問我覺得點，我
覺得妳好可愛，好似成日都傻下傻下咁，不知道
妳是不是對著我先係咁??因為某程度上妳真係好叻
好smart，妳做野又會做得好完美，只係睇妳煮個
公仔麵就知啦，唔知道我響妳心目中係唔係好『求
其兼是但』，和妳相處我覺得好開心，我覺得妳的
確係一個好女仔，我真係我肯定自己係好鍾意妳，
都是那一句啦，『唔好離開我』，我已經把所有放在
妳身上，妳在我生命中佔左好大好大位置，或者我
還未給到妳安全感，我都明白妳之前受的傷害係好
大好大，但我係唔會放棄架，我會繼續給妳建立安全
感，我要妳知道我係一心一意..真心真意..全心全意去
愛妳，我知道那天妳要鼓起好大勇氣，才完完全全說出
妳的遭遇，見到痛哭著說出來，我知道我應該更加要對
妳好先至可以，記得妳那一句向我講..."我同妳一齊我唔
可以騙妳，聽完先決定要唔要我"，放十萬個心啦，我一定
絕對唔會因為咁，而去嫌棄妳，在我心中妳始終都是純潔的
，而不是妳口中的"污衊"，無論如何..我已經認定妳是我太太
，我不會回頭去愛返佢，無可能的，我最愛的始終係妳。
妳知嘛，我的朋友知道我有妳這個女友，都好羨慕架...。
不過，我們不會是大富大貴的人，和我一起，我們彼此都
要捱的，但我會努力架喇，我唔會餓親我最愛既人，就係
妳...，我有信心我地可以結婚的，不知道我今次給妳的安全
感有冇增加到呢?

『我隻貓貓既去向』
今晚要各自回家，真係暫時諗唔到辦法，如果我搬，咁隻貓貓
要點安排呢，帶上樓偷偷地養都唔係問題，問題係牠唔係一隻
家貓，上到樓又怕牠反轉女友屋企，應該點做好，將牠交比收
租婆養，等牠一齊食大鑊飯?冇貓糧佢又習慣嗎?外面有十幾隻
都係食收租婆大鑊飯，都係咁生活..!!!但佢會唔會唔習慣?難道..
有異性冇人性?我又唔想女友搬來住，夜晚我度條路鬼影都冇隻
，佢著成咁返來真係又好危險，外面班"阿叉"個個都好似個賊咁
...唉.......貓貓，你想我點做好呀?我又唔捨得比你食果D飯，如果
你肯乖D唔週圍走唔週圍抓，我地可以一齊上樓嘛，仲有個媽媽
同你玩添.....唉，原來同你分手先係最困難.....我又唔想買間屋仔
困住你，你又出街蒲慣.....唉.....我點好好安排你呀?????
"你望住我冇用架..!!!!" !可愛死喇......，貓貓...比個機會你，陪你去媽
媽住兩日，如果肯乖乖地就一齊住啦..如果唔係..你要食飯，最多
一星期過來探下你啦......"你向我叫都唔知你講咩...!!!!!"激死我......!!!!
其實唔知佢有冇FEEL知道要搬呢??兩日冇見你，你真係會返來陪
我，雖然我唔知你"咪"乜......，貓貓..而家錦田得我同你乍，如果
你真係明白的話，可唔可以乖乖地做一隻"家貓"呀??

>>October 26, 2008 at 4:37:46 PM GMT+8

2008 年 10 月 24 日 星期五 【晴】

我的答案：『不會為她，而離開妳.....』


起身.....個傻瓜算係退燒喇，叫做好返啦，雖然
之前有plan定去邊度慶祝生日，去好好地食餐飯
，但我都唔想女友一病完就走來走去，我地就出
左大嶼山，搭巴士前去買左個麥當奴上車食，而
女友只係食左個鮮奶球...，無法啦，病完冇理由
食麥當奴嘛，應承她夜晚時都冇事喇先食返果D
野啦......，好聽話....只係飲左一啖汽水就算....真係乖...

我地去左迪欣湖，坐左響草地上...，我都好耐冇試過
咁坐喇，感覺幾好，女友問我一個問題，"如果舊女友
要話一齊返..同你，你會唔會應承佢呀?"..我有預感佢會
咁做呀....，咁我同妳講，我唔會呀，我唔會咁對妳..
，無論點都唔會同佢再一齊，我只會同妳一齊，放心
啦，唔好再諗呢D事啦，好嘛?在湖邊向妳講過的話，
永遠都會算數....呢一世都生效....，或者我們一齊日子
仲係好短，是我比不到安全感比妳，但我會努力給妳
知道的，所以呢.....唔使驚到走去做地勤喇，做地勤妳
都識講啦，有時做成10個鐘，辛苦死妳呀，總之...無
論點...我都唔會離開妳，同樣地，妳都唔好離開我啊......

我地最後去左機場客運大樓，睇飛機，起飛既情景，
妳每次返工就係咁飛上去架喇，真係好特別，有種
不能講出口的感覺，心想..我一定做不到，因為我真
係無妳咁叻，妳知道嗎，在我心中，妳是好smart架
，妳自己都不要為點小事而放棄做FA呀....。今天終
於用左手機影左一張有妳個樣既相，電話來電可以
睇到有妳既相片，雖然手機質數係差D...但係頂住先
，找天給妳影得靚靚的。以後.我地就響入境大堂往巴士
站的升降機那邊的一排椅度等大家，好似人地今日
個男仔咁，等女友放工，響果度，下次我都好似佢咁
響果度等妳啦，好嗎?

今年係..第一次同妳過我的生日，雖然我地冇特別的
慶祝，但我覺得好開心，以後妳病時不會再一個人，
你悶時又不會一個人，我會陪著妳，就似今次這樣，
我會陪妳睇醫生、叫妳食藥、幫妳換毛巾、煮野比妳
食，下次我會煮得好一點架喇，妳不會一個人的，不
要再擔心什麼喇....因為今時今日Irene已經係我女朋友嘛......




>>October 25, 2008 at 6:09:03 PM GMT+8

2008 年 10 月 23 日 星期四 【晴】

Flight Attendant秘傳奧義......自然治療法!!!!


今日開工時見到架的士撞到個送外賣既單車手，
唉......其實遲早都會出事架喇，睇下係比咩車撞
罷..!!有時真係好似我同佢玩生死時速咁，成日以
為大車一定唔會撞過來，我都有好幾次比佢地累
死，唉......送外賣唔使用命去駁掛。我真係怕下
一個到我，所以..天水圍路線都唔係好好做，但無
法...天水圍人，係得我地做，如果我搬去屯門，會
唔會比我做屯門人呢......?

回到家，見到女友臉好紅，好明顯係唔舒服，唔知
佢地係唔係習慣左『自然治療法』，即係自己食必
利痛再加上訓覺個病就會好?!原來個個女仔都唔鐘
意睇醫生既...，不過都好彩，唔太硬頸，都聽話去
睇下醫生，個傻妹燒到103度都可以忍受得住，返
工打比妳..又唔話我知，返到去先見到妳咁，還以為
妳發生咩事呢....下次要出聲呀..!!而家睇左醫生，食左
藥咪幾好啦，起碼食到野先嘛，今日被妳發現個秘密
，我係唔係好識煮粥架，一係整到好結，一係整到好
稀，所以呢......係咁上下架喇，下次等妳好返先教我啦
，明天妳好得九九十十先陪妳去湖邊睇景啦..好嘛?要
準時食藥呀....!!不過...放心啦..我會準時塞藥妳食架喇...
希望妳明天見到呢篇文字時...已經好返哂啦.......

響妳休息既時間，我睇果本書，果本致廷光書呢，我真
係睇極都唔明佢講咩..?點解愛情要將佢講到係"咩野宇
宙之擴大，又乜乜自我咩精神....!!!!!"呢本書共有三十幾
封信，每封信可以有成千字，寫情信寫成千字?!現代人
點會做到呢?學佢咁話.....新一代年青人...談情?30日咩都
談完啦，跟住點呀?冇得再談架喇，咪由頭再黎過，再同
對方講：『你都幾劈得架喎』......。而家我擔心我睇書會
睇到恰眼訓，有255頁，張張都係文字，有哲學根基真係
完全唔同，呢本野真係..無得頂，因為我睇唔明，我個內
心世界未有佢所說的『完全擴大』....，我只係知返工前和
返工休息時，呢本係我既禁書，真係好過數綿羊..無得彈....!!!

>>October 24, 2008 at 5:23:08 PM GMT+8