2008 年 11 月 11 日 星期二 【微冷】

回信...


今日放工，冇咩野做，女友又要Stand by，都唔知
要唔返工，在家中同隻貓咪呆等電話...個傻瓜變左
塊"望開工石"，最後始終都難逃返工的命運，響電
話聽到佢話『我要返工呀...嗚嗚』，好明顯係扁住
個嘴而發出既聲音，但無法子啦，呢個係妳既工作嘛
，只係我擔心妳病完咁快要返工，仲有呀..可能我天
生冇女友咁醒，妳個返工Roster，我成日都睇錯，有
時滿以為妳放假妳又返工，其實係D時差問題，令到我
對妳個Roster好混亂，唔知妳可唔可以為我用手寫一
份我識睇既Roster呢....最多我買本靚靚既年曆公仔本
比妳寫丫...



* * * * * * * * * * * * * * * * * * * * * * * *
和妳真正拍拖時間好似好短，但我地相處認識時間比拍拖
時間長，我唔知了解到妳未呢..?到目前為止我地都冇不
和、意見不合、唔開心等等....，當然，我明白妳本身
是個很隨和的人，好多事情都不會去計較，事事都要做
到好好，妳先會罷手的人，只係睇妳煮飯已經知道，以
前我係永遠都唔會熨衫熨制服，或者係冇人會幫我做，
但和妳一齊，我就會有妳親手整好靚好食既飯盒，每一
天返工前都會有一套熨直熨好的制服掛住，比我換返工
，家中永遠都係好整齊，和妳一起，我都覺得自己開始
變，變得比以前好，妳的思想好特別，每每我有問題時
，妳都可以想到D計仔，去解決問題，是妳令我連跌錢
都會覺得開心的..哈哈...很奇怪呀，但我很喜歡，我
喜歡被人關心，我喜歡妳會緊張我，所以..我都會同樣
地咁喜歡妳、關心妳、了解妳，我希望每一天我都可以
同妳一齊，咁就美好喇.....

之前我睇左本『致廷光書』，內裡的內容有七成我都唔
明佢講咩，但有件事我係睇得明和認同他，就是每個人都
會有缺點，我想了很久，妳有冇缺點呢?原來都有啊，妳
既缺點係有點事情妳放不下，妳每次流淚都會問我一條
同一樣既問題，我想妳也知道是什麼問題吧，妳缺點係
欠信心，無論如何，我都唔會厭棄妳，就算事情比當初
更加壞，我也不會介意的，總之...現在妳是我女朋友，
未來的太太，我心中已經認定是妳，除非妳放棄我啦，否
則，我便是我的下半生......

雖然已經說過好多次，但我都係呢一句..我對妳係真係真的....
我期待有天妳響那張紙那一欄上....在妳的名字前寫上我的姓氏...

其實今次我是諗住用手寫上呢以上的寄給妳，但我想給
其他人見到，我對妳既承諾，等看過的人作見證，所以我選
擇打出來。
* * * * * * * * * * * * * * * * * * * * * * * * * *


妳今次出走是HKG→KUL→HKG (我有冇寫錯呀?)

>>November 12, 2008 at 7:06:50 PM GMT+8

2008 年 11 月 10 日 星期一 【颳風】

記得食藥呀.!!!!!!


朝早摸摸個傻瓜額頭，雖然已經冇咁熱，但度耳仔都仲有
燒，朝早即刻幫佢掛號睇醫生，打左支針...返來再食左一
次特效藥，已經見到明顯既好轉，我返工前見到佢都識得
自己落床裝水飲，都放心好多喇......

返工時收到佢Message知道佢已經冇事，冇事既佢又開始
慢慢咁窄窄跳，都好既，證明個傻瓜真係好返嘛，響我臨
放工仲打電話來要出街，其實都知妳想出去行架喇，我地
去左心粥館食粥，之後行超市買野，滿足下佢既購物慾啦
，剛剛好返...就去找朱古力....唉.....冇妳辦法喇，算啦，妳
鐘意就買啦，買完後返屋企，佢又要準備明天的stand by
，如果冇人SL的話，就Dayoff，如果有就要返工，因為唔
知聽日事，所以執行李都要分開兩樣執，一邊係執冬季衫
另一個係執夏天衫，因為唔知會飛咩地方嘛.....希望好執果
兩件野都用唔著啦...可以比妳懶多兩日.....想得美嗎??哈哈.....

今日先知道件事，而家買野少過唔知200定300蚊，用VISA
唔使簽名，正話去超市咩都唔使簽就走得，原本VISA都要
同OCTOPUS爭生意，一個唔好彩跌咭...咁我就多得佢唔少
喇.....

又係買朱古力...!!


食完飯就係買左呢堆野返去.......!!


>>November 11, 2008 at 5:09:50 PM GMT+8

2008 年 11 月 9 日 星期日 【颳風】

Fever 38.8度.......的妳


唉........只係落左去食飯，吹兩吹都會病，見妳連續
打左八個"乞痴"，打到眼淚水都出，其實好想好想
笑架，但見妳又真係好似好辛苦咁喎...，點知..妳真
係會病得咁快，又開始微微咁發燒，上次食剩既藥
，今次又有用喇，正話摸妳額頭都好似未退到燒，
再度妳耳仔溫度38.8度，如果明天都仲係咁，我又
會捉妳睇醫生呀.....!

家中已經冇哂退熱貼喇，比妳全部用哂，屋企連一個
冰袋都冇，點好呢?妳成日話凍，但妳又燒緊，又應該
唔比咁多被妳蓋先係，但妳又叫凍...扯住張被唔放...點
好?而家用緊我細個阿媽幫我用凍水濕毛巾敷額頭的方
法，幫妳降溫，看見訓床休息的妳，很似個小朋友咁，
希望妳今晚會好轉一點啦.....

正話幫妳度體溫，妳仲係燒緊，38.7度，妳又未夠鐘
食藥，如果都仲係燒下去的話，我點都要帶妳睇24小時
診所，傻瓜呀..其實呢一刻我真係好倦，但見妳咁又訓
得唔安樂，如果唔係我話要出去食飯，妳就唔會攪成
咁，唉.....

>>November 10, 2008 at 6:58:36 PM GMT+8

2008 年 11 月 8 日 星期六 【微冷】

妳好怕凍....


今日接個傻妹放工，今日好容易見到妳呀，因為
天氣凍左，妳著住件紅噹噹既外衣，好搶眼，哈
哈。一上左架左E33，你都未到東涌纜車站已經
訓著左，睇來妳都好怕凍，妳全程雙手都係冷
冷的，縱使比埋我件風衣妳蓋..都係好凍，妳有
幾次個鼻尖碰到我臉又係凍冰冰既，睇來下次出
街我無論點都要帶多件風衣響袋，隨時比妳用喇....

今日比妳抽小禮物，知妳鐘意麥兜豬，所以都有
選擇買隻豬仔比妳，亦都買左隻牛仔，但妳都係
抽中隻豬仔，妳喜歡嗎﹖諗住買比妳扣在妳返工
隻公司袋架...四四方方果個呀....，我就扣住另一隻
啦，一人一隻........

夜晚我地去食Pizza Hut....，估唔到妳都幾食得pizza
架喎，都食到三件半 咁多，仲可以飲埋杯野..勁呀...
聽日我返工...妳放假，妳負責同貓貓玩啦，好嗎，
我覺得貓貓都會喜歡同你一齊既...天氣凍自己要小
心點喇...，妳好容易病架，如果天氣咁凍...妳唔好
煮飯啦，費時掂到D水啦.......放工可以陪妳出去食嘛...
係咪....


一人夾左一件走喇...!!!


車...我都識整啦!!!


兩個人都食唔哂!!!


>>November 9, 2008 at 3:11:44 PM GMT+8

2008 年 11 月 7 日 星期五 【微冷】

我一個人...


今日天氣涼了很多呀，好舒服....，不過唔可以同
妳出街，因為妳又要返工......留低我一個好悶呢...
雖然明知妳明天就會返來，只係硬係覺得一返到
去冇左妳響度會無咁溫暖，但我亦必須接受這是
妳的工作，希望快點到明天快點到明天放工的時
間啦，到果陣我又會響果個地方等妳架喇。

今日送完妳返國泰城後，我走左去機場度，先至
搭機鐵返來，搭機鐵麻煩在要響青衣站轉東涌線
，真係唔方便，早知係咁..我情願搭巴士出東涌
先搭東涌線，咁就唔使係咁轉三轉車先到旺角啦
，去到約左阿靜行朗豪坊，好日都唔行既地方，
像迷宮似的，去到買了少少東西比個傻瓜，唔知
妳會唔會鐘意呢?唔好咁大希望呀，冇妳去其他地
方咁有特色既小禮物呀......很普通架乍....

呢個時候，妳應該剛剛下機到機場吧，或者可能只
係剛剛降落也不定，唔知妳今個旅程有冇比人蝦呢.?
其實都唔使點問架喇，只要一見到妳，睇下妳係個
咩表情已經會知道，我不敢說我很了解妳，但看妳
開心定係唔開心..妳是好易被看出的，我覺得。

在便利店買野時都係買左點零食比妳，特別係買左
盒糖比妳，知妳血糖低呀，一陣暈左條街度都唔知
點算好呀..!!亦都買左D朱古力比妳，因為.要為左維
持妳既飽飽臉，妳都係食多點朱古力啦，我喜歡飽
飽臉的妳多點，很可愛..好可人兒呀....

今次出走妳係(HKG) → (ICN)→ (HKG)

>>November 8, 2008 at 1:44:31 PM GMT+8

2008 年 11 月 6 日 星期四 【晴】

女友講的『工作之苦』


今日同女友既朋友食飯，有D新臉孔出現左，全部都係
女友D同事或者係一齊訓練實習既同學，雖然我同佢地
有D係第一次見，但都可以好快傾到計，主要係佢地真
係好主動與人說話，真係難聽D講句，佢地真係唔怕醜
喎，不過..呢個亦都係她們工作上需要，或者已經習慣
怎樣去短時間內與人熟絡，從女友口中講，她們原來每
一班機，每次都會同D唔同既同事一齊工作，即係話..我
今日同妳一齊工作，可能到下次有機會和妳碰頭再工作，
可能已經係幾年後時間，每一次工作完畢飛完全程，就
係大家一個工作上的句號，到下次..又會同D不同既人一齊
，所以...好多時，在機場見到D空姐空爺一落機都係自己
一個回家，除非有人管接吧，其實...她們工作都幾慘既，
要放低自己既尊嚴去服侍人，在家中她們都不會咁去服侍
人啦，比人鬧都要笑，所以女友話，在訓練果陣..有一part
係訓練佢地教佢地點樣笑，所以，有時聽完女友咁講，都
覺得佢地工作都不容易呢........。

問到女友喜歡做呢份工嘛，佢話一半一半啦，有好有唔好
，不過如果放工回來有人逗樂的話，只要心想住這樣，有
期待既心情，時間都會快過去的，其實...女友咁講都係想
我有時間就接放工，不用暗示喇，我知道喇，總之有時間
我可以的話..我一定會接妳架.......之前承認左妳既時我會做
架...放心啦...。

傻瓜今日整既公司三文治好好食呀，仲好厚好多料呀，我
諗下次帶飯帶四件都已經夠飽喇，哈.......是妳才會咁好心機
去整D咁多工序既小食......有妳..真係好....!

>>November 7, 2008 at 5:39:32 PM GMT+8

2008 年 11 月 5 日 星期三 【晴】

與妳的一天

今日同女友出左元朗唱k，冇錯..!!!又係唱k!!!由
夜晚七點幾唱到夜晚十二點幾，唱到我失聲，但
係佢仲可以係咁唱..係咁唱，服左佢!!!!我同女友
同唱左一首陳奕迅既『孤兒仔』，女友扮苦兒把
聲音真係笑到我唱唔到，只可以用低能來形容佢
把聲，真係笑爆嘴呀....哈哈~~

回程我地搭的士返屯門，響西菁街見到有架私家
車翻左，唔知有冇人受傷呢?終於返到屯門，搭左
六十幾蚊，聽日放假既佢又話明早整D小食，哈..
個傻瓜真係鐘意自己煮野呀....!!我明天要返早呀，
要訓喇，而女友就在廚房唔知整咩?!哈哈..我覺得
會煮飯的女仔真係好吸引呀，而家返工有妳整飯
盒，慳左我唔少錢呀，女友做任何野都好認真，連
飯盒放飯菜的擺位都要執，唔知妳係唔係睇得飛機
餐太多呢，學埋佢D野，執得咁靚，其實都係放入口
，點解要整得咁好喎..?

妳回答：『你咁樣會唔會食得開心D丫﹖』諗諗下..又係
喎，我見到咁真係又會食得開心D喎....妳又有妳既道理
喎...，所以我咪話妳真係好叻囉，我有妳咁細心照顧，
真係已經好滿足喇，但回望自己，我好似冇咩可以比到
妳咁，妳會唔會有點失望呀?


天天都是情人節

天天都是情人節MTV


幸運地 我有你
連發夢也能想起
今世已經 化成傳記
假若有下世仍想擁有你

如做戲 最夢幻是在戲院初吻你 (不過我們唔係在戲院...係在機場，記得嗎?)
效法主角愛到死
陪著你 天天都當作慶祝這日期
就算再忙忘不起

情人節真締 原為起誓
一天感動一世
鉛華流逝 遺忘時計
愛會叫人美麗
環游塵世 並沒路軌
隨便到哪里都安慰
活著為獻禮
期求甚麼得到甚麼 亦不計

最自負就是懂得怎吻你
讓愛升華成回味
曾害怕 單身一個最記得這日期
直到有情人一起

情人節真締 原為起誓
一天感動一世
鉛華流逝 遺忘時計
愛老了才美麗
環游塵世 並沒路軌
隨便到哪里都安慰
活著為獻禮
期求甚麼得到甚麼 亦不計

逐日地 吻過你
才證實有緣一起
不會再分 我還是你
只願每人也能有這運氣


>>November 6, 2008 at 5:38:18 PM GMT+8

2008 年 11 月 4 日 星期二 【微冷】

又係我..!!!!! 【溫馨提示】食緊或食完飯，唔好睇住!!!



今日返工...唔知第幾轉車喇，兜到自己都唔記得
，發生左一件都幾核突既事，響車度有個阿伯，估
計佢都60幾歲，搭車時..據D乘客講，佢猛咁咳，
基本上好多人已經怕左佢，情願等下一班都唔同
呢個阿伯一齊坐呢一班車，但咁當然，仲有D敢死
隊係唔怕傳染，繼續搭呢班車，而事實上架車係仲
有幾個站就到總站，所以..人都唔係好多，加上唔
係繁忙時間，架車有幾多人都可以想像到吧。只不過
阿伯唔係咳痰..唔簡單，佢仲要咳埋血，噴到成地、
車內既白色既板隔、椅子、窗口、用來扶手既支柱都
係，情況就好似發生血案咁，呢個時候有人拍我門叫
我，睇到佢咁，第一個反應..我想嘔，因為唔止係血..
仲夾集D唔知咩既黏液，又黃又綠，但個阿伯又好清醒架
喎，報上去好快有白車來到，救護員好快咁的左佢落車
，而我就開走呢架咁既充斥住嘔吐物、血、又臭氣沖車
既...列車返去Depot，返到去阿Sir叫我沖身換衫，搞左
一大輪...唉.....!!!!我都唔明..我點解成日都中呢D野﹖
搞到我完全冇胃口去食個飯盒...!!個腦係咁充滿著呢個
核突畫面，直到而家都仲響腦盤旋住...!

我下次有機會坐到呢部車身編號既列車，打死都唔會行
去果個位置，唉......超級嘔心又核突。事件阻礙左10
分鐘，好在非繁忙時間，亦都好彩冇任何人來影相，我
唔想上報登有關我既事呀!亦都好彩D乘客冇按緊急通話
，只係拍我門，若果唔係我又要做多樣野，煩多件事，
我真係好鬼黑...倒楣到極，衰野次次都有我份，好似
不斷咁作弄我呢....!!

對唔住呀....冇食到妳整給我帶的飯盒，因為真係冇胃
口呀...，留返明天再食啦，明天有時間可以陪妳呀，
妳想買果件東西嘛﹖明天我地去睇啦，仲有呀，Philip
知道我地一齊喇，佢一知..我諗好快就會好多人知喇..
，到時佢地問，我地點答好呀?我對住佢地有點難為情
呀....!




>>November 5, 2008 at 11:08:49 AM GMT+8

2008 年 11 月 3 日 星期一 【微冷】

妳既答案係點呢?


今日在屯門收車，所以響Depot放工，真係少有，
去到維修站，見到兩部車維修緊，我諗應該係要
將車頭某部份要拆除，然後再安裝新既配件，其
實見到都幾誇張，原來架車可以將個車頭換走，
簡直好似砌模型咁，一件一件既零件都可以獨立
咁拆出來，好少可..可以見到獨立一支既集電弓，
一套轉向架，平時覺得個轆好細，原來拆左出來
先覺得幾大舊，冷氣機呀、車門、椅、扶手、仲
有D我都唔知咩來，真係好有好奇心去望，原來
平時開既列車係咁構造...真係好複雜，本來都想
影下佢相，但又見到師傅同埋阿Sir響度，所以放
棄冇影，如果在屯門開工，睇到呢D野機會大好多.....
不知不覺望左成10分鐘，跟住都唔係幾好意思...就
走喇......我。

望下時間，差不多可以接女友放工，時間好鬆動今
次，我可以慢慢搭車，但永遠都係咁，我唔趕時間
時候，D車一定會等我，一去到就有車，去到機場都
仲有時間剩，自己無聊走左去離境大堂睇下地勤工作
係點，睇下忙唔忙，因為個傻瓜曾經話調做地勤，但
我覺得好似都係做返FA會好多吧，如果係為左唔想離
開香港而調職，好似好謂咁，所以妳問我調職好唔好
，我一定答妳『唔好』。其實妳自己都喜歡到處去啦
是嗎?我記得以前妳係有咁同我講過既.....

終於都等到妳出來喇，見到好都好似好疲倦咁，難怪
妳既，飛咁多個鐘，我幫妳拉住個好輕好輕既行李，
一齊上機埸巴士，一上車妳都同我講唔夠20句話，已經
合埋雙眼，訓著左，呢個時候好清楚見到妳個化妝，哈
哈，女仔化妝真係幾靚架喎，真係冇咩工要妳一定要化妝
呢﹖見到妳挨住我訓，有幾下妳差D中左上前呀，妳有冇
Feel到呢..?不過....我知妳應該Feel唔到架喇，妳咁倦...訓
成點妳都唔知啦我估...哈哈..，妳知道嘛，望住妳時我個
腦諗緊以前讀書既妳，真係差好遠好遠，而家既妳女性化
左好多，我又諗..原來我未來既太太，已經響讀書既時候相
遇左，兜左圈子，先可以和妳一齊，我又諗.....如果我果陣
唔係成日玩鬼妳整估妳，妳會唔會對我有咁深印象呢，如果
真係因為呢D事令妳對我有咁深印象，咁係唔係即係話我以
前對妳所做既事，係無錯既呢...?

係喎...真係冇問過妳呢個問題喎，真係如果當年冇對妳做D
咁既事，妳會記得我嗎...?

我講先啦，如果妳當日唔拍叫我，我真係會慢慢忘記妳，亦
都係呢D整估妳既事，可以令我咁快可以記得妳....咁妳呢..?

>>November 4, 2008 at 12:43:06 PM GMT+8

2008 年 11 月 2 日 星期日 【乍寒還暖】

補祝我生日~~~多謝阿芯~~


放工陪左阿芯食飯，哈哈~~~多謝妳餐飯呀。
冇見阿芯一排整左多負厘子直髮真係成個人
唔同哂，大個女左好多，唔係話妳老呀..唔好
誤會呀，但點都好啦，多謝妳補祝我呢一餐....

女友打長途電話來，傾左兩分鐘，知道佢唔係
幾開心呢，唔緊要啦，返來先逗妳開心啦，我
會等到妳放工既，如無意外，其實我都好想見
到妳架，無奈妳要返工，無奈呢個係妳既工作
，我冇得怨既，因為我識妳時已經知道妳係咁
架嘛，所以我會等妳架，妳都唔好咁心急喇，
總之..放工後.我應承會同妳一齊行一齊搭車啦..
好嘛.....!!妳知嘛，我個朋友見到我電話妳張相
話妳靚女喎，開心嘛~~?明天會見到妳架喇，
我會耐心地等........等妳回來一齊返屋企.....。

>>November 3, 2008 at 2:42:14 PM GMT+8