2008 年 11 月 21 日 星期五 【微冷】

女友親手做的蛋糕....


個傻妹昨晚真係漏夜去整個蛋糕，做到夜晚差不多四點先
訓覺，我真的冇諗過個傻妹個咁認真，我真係好後悔話要
個蛋糕呢，為了個蛋糕要害到傻妹折騰左整整的一日一夜
，還知道有一次係失敗左要再整過，最後整到既係和餅店
menu一模一樣的芒果蛋白芝士夾心蛋糕，去到廚房見到放
滿用過的一堆"架餐"，望見這樣真係好後悔自己的幾句說話
，就要自己個女友搞到這樣，開心見到她棒起個蛋糕的笑容
外，心中帶著酸溜溜的心痛感覺.....看見個蛋糕的裝飾，要用
自己雙手切好的芒果，還要卷起它，我才知道要一日的時間
才可以做到，但食左佢只用了數秒的時間，如果妳說個蛋糕
是買回來的，我會毫不理會就食左佢，但當你知是咁辛苦整
出來，要把它吞下，那一刻真係食不下去.......，傻瓜...下次不
要咁辛苦去整喇，就算要整，賣相都不要太認真喇，見到妳做
到咁，我覺得自己好衰....一句說話做到妳傻...!

一陣的晚餐，我們出去食吧，由我的女友話事啦，妳想怎樣就
怎樣啦，我覺得自己可以為好做的太少了，我都想為妳做多點
點的，妳付出的很多，得到的就很少，但妳郤老是說不介意，
到底我可能為妳做到的又有幾多呢..?看來幸運的人不是妳..是我才對。


女友親手整架，唔捨得食呀我。Irene妳真係好叻，好細心




>>November 22, 2008 at 12:09:48 PM GMT+8

2008 年 11 月 20 日 星期四 【微冷】

Railway Make Up高手...!!

今日女友放假，我就要返工喇，像平時咁個
傻妹會響我臨尾幾轉車會陪我，直到我收工
，放工後陪她去屯門市中心行廣場，同埋食
野，天氣咁凍個傻妹仲係要扭買雪榚，結果
買就買左，食左三啖就頂唔住...好凍....要我
執手尾，個傻妹買雪榚食都係貪食兩啖...滿足
自己...騙騙自己嘴兒，唉....真係成個細路女呀。

今日我發現左個傻瓜有項好強既強項，就係響
坐輕鐵時化妝，唔單止係化妝，仲有劃眼既唔
知咩....又夾唔知咩，總之成副架餐係咁來，我
自問手車麻麻地，今日仲要係三期車，傻瓜仍
然可以好手定咁make up.....我響後鏡見到都呆
左，架車會郁架喎....點解可以唔化出界咁勁既..
。女仔真係好勁..響呢方面....服左個傻妹.....。

臨回家，傻妹話要"家政坊"買野，話要整蛋糕
，個屋企大廚為左要証明自己可以整到，我果
張紙上面所有款式既蛋糕，就要我選一個比佢
整，很認真呀.....，其實我冇話過妳唔得喎，不
過...妳話妳有興趣整呢D，咁我又期待妳既作品
喇，妳知嘛....自從和妳一起，我先真真正正感覺
到什麼叫幸福和愉快，也親身體會到什麼叫窩心
和細心，呢D感覺全部係妳可以比到我的，很多
時妳為我做的..都令我很感動呢....

>>November 21, 2008 at 11:05:03 AM GMT+8

2008 年 11 月 19 日 星期三 【微冷】

今次我做得好...冇Complain吧...?


唉....妳病好又到我病喇，唔知D咩藥咁勁，食完唔
單止冇事，仲好返到『振』添。搞到我拿起杯水飲
都差D倒瀉，正話搭巴士返來時，已經差D唔識落車，
D藥一食左就覺得個身好軟咁，好快就恰著左，如果
唔係有朋友突然打電話比我，比我醒一醒，我估我又
會訓過龍....。返到天水圍，回到自己娘家，一個人都
冇，得我自己個，自己張舊床比妹霸佔埋，來放書、
放衫、咩雜物都放，唉....真係我似知我一定唔會返來
訓咁，妳見到啦...如果連個傻瓜都唔要我，我聽訓街
架喇.....所以...唔好掉低我呀.....。真係已經冇人會要我
架喇。真係可憐呀我...!!!!

到左夜晚個妹終於返來，第一句..我隻公仔呢..?冇呀我
去都冇去過旺角，之後比個妹用左個好不屑既眼神掠過
，嘩........!!!!真係惡死，我都唔知妳點解可以做到社工??
過左一陣同個妹出去食飯，之前輸左一鋪飯比佢，今日
要補數，食左我三百幾蚊，正八婆....連阿哥都屈，仲要咁
唔客氣食...可惡，妳唔好唔記得係我供妳讀書架，下次我
唔屈返你五舊水既飯局，我誓不為你阿哥..!!!

食完飯，同個妹分開走，佢返屋企，而我就要去接個傻妹
放工喇，去到機場，老地方等她，其實唔知係唔係我真係
盲定係點啦，總係有幾次要個傻瓜響我面前出現，先會見
到個傻妹，有幾次衰到要個傻瓜用手響我面前"養下養下"
先發現到.....『我來到喇，你望邊個呀?』...其實咪望妳囉，
妳知唔知妳們一扎了個髮計，化左妝後，D樣好似個個都
一樣咁，好易睇漏眼呀....!!!而重點我真係冇望其他空姐嘛....
冤枉呀!!!我一心真係只係想等到妳找妳架...!!當然..我知妳唔
會咁諗我既.....我只係想響度好似妳平時咁，扭下計仔吧....我
都想妳能"乙水"下我嘛...哈哈....

我今次係唔係好叻呢..?兩件衫帶定喎我...就係為左比妳擋冷氣
巴士既冷氣乍，今次上下身都有得蓋，仲有個人肉暖蛋比妳挨
著，應該冇投訴吧?仲有....今日我有個朋友話傻瓜Irene妳靚靚
呀......!唔知道人地講既係唔係真架.....哈哈，不過，我女友...我
覺得怎樣...都係個可人兒....，如果第日我地D仔女似妳，能夠有
哂妳所有遺傳，唔好似足我咁樣，咁就好喇.......咁就最理想喇..!!

>>November 20, 2008 at 6:12:59 PM GMT+8

2008 年 11 月 18 日 星期二 【颳風】

有人 讚妳呀...


今日返工..我手抽住兩個袋，左一個右一個，
一個係飯盒..共有三盒，另一個係我自己個
袋，有點似師奶，用個環保袋抽住週街走嘛，
返去放入公司個雪櫃時，有個女同事問我，
幹什麼而家成日帶飯﹖哈哈...咁女友整架嘛﹖
食飯時間，同佢一齊響同一檯食，比佢見到我
飯盒，第一句問，你買返來放入去架﹖D湯真
係自家煮架﹖同事忍不住倒左我少少既什菜湯
飲，哈哈........傻妹傻妹..有同事讚妳掂呀...!!果刻
自己真係好開心，因為自己覺得有一種好得意既
感覺，係一種唔知點形容的感覺，有人話，有個咁
好既人幫你煮飯，你真係點點點.................，我反應
只有傻笑.點頭..係係係...咁回答....有點難為情呢...!!

回到家，便聞到一陣好香既菊花味，原來個傻瓜
焗緊菊花茶，加點蜜糖去飲，原來都係好飲既，
好清...又唔太甜，幾好......，傻妹，妳太叻喇，再係
咁落去，無左妳...睇怕我會餓鬼死喇，所以...妳唔可
以離我而去呀..我會餓死架....!!

天氣凍喇，妳自己身體一向唔好，好容易病，一陣
攝一攝親，妳又發燒架喇，明天妳仲要返工架，不
過我明天可以送妳機接妳機，我會多取件衫比妳搭
車架喇，即係妳著住利是封外衣時，仲會有多件衫比
妳上車蓋，今次我會識做架喇，加多件響下半身比妳
蓋嘛...我記得架，總之今次唔會凍親妳啦......

今次係唔係HKG→SIN→ HKG...如果我冇再睇錯的話呀.!!
中途會停留嘛會係....是不是呀?但睇錯左都唔好欺負我啊..!!
.

>>November 19, 2008 at 12:47:12 PM GMT+8

2008 年 11 月 17 日 星期一 【颳風】

一盒飯..一盒"食送"
..一碗湯...

今日...我係要返工，女友就放假，我返工前叫個
傻妹訓下覺休息下啦，咁最後個傻妹有冇休息...
我就唔知喇...，放工返來見到女友同隻貓咪玩緊，
睇黎隻貓咪都幾鐘意痴住她，唔知佢係唔係有陣
香水味吸引佢啦，講開隻貓除左上次想跳樓外，基
本上都好聽話，好乖，冇咩點發難，所以女友都好
鐘意同佢玩，我們都算是一家三口吧..哈哈..，因為
我知個傻妹都好錫佢，起碼去到超市都會記得賣貓
糧，都會考慮買咩比佢食..比佢玩，開頭我仲擔心女
友會趕佢出街呀.....。

回到家，個傻妹煮緊飯，整緊雜菜湯，哈哈，佢真
係唔整過野食唔安樂呀，明天我唔止有飯帶，我仲
有湯帶，我發覺我返工呢....越帶越多野，又返工袋
、又兩個飯盒..而家多左個膠兜放湯添...，成個小學
生返學咁..我而家，左一袋右一袋咁，哈哈.....不過，
多得妳..我先慳返好多飯錢，都係好事黎既。

明天妳都係放假，真係開心呀，星期四妳又飛去邊呀﹖
我次次都睇錯妳張『格仔紙』呀，妳快D教我睇妳張
紙啦.......

正話食飯果陣，我飲左罐汽水，個傻瓜講左個，佢返工
時遇到既笑話我知，如果忍唔到笑的适，我估一定噴汽
水.....妳D笑話..有點咸味呀.....!!!!!

妳真係醒呀，知我需要支潤口唇膏....檸檬味....我鐘意呀....

>>November 18, 2008 at 1:52:28 PM GMT+8

2008 年 11 月 16 日 星期日 【炎熱】

接傻瓜放工...


夜晚接個傻妹放工..哈哈，本來諗住搭機場巴士
直返屯門，但個傻瓜叫肚餓，我地由機場搭S1
既城巴去東涌東薈城食左野先再搭東涌線返去，
非繁忙的時間架車都好吉下，我地去到南昌轉西
鐵返屯門，呢段車程個傻妹唔知係唔係食飽左既
關係，好快又訓左，跌響我旁邊訓，其實，每一
次都係咁，睇黎佢做野真係好辛苦，響佢訓覺期間
，我望住佢D化妝，究竟妳用左咩野，塊臉會閃下
閃下咁既??化妝呢門學問睇黎我都係學不來，聽不
懂......，但無可否認，女孩子化左妝真係會靚好多好
多，怪不知咁多女仔會放錢響呢方面啦，女人錢真
係易賺呀哈哈......不過..我知道妳工作需要的，我一
定不會去干涉妳任何，只要妳喜歡就可以喇....。

明天我要返工呀，妳估妳又唔會唔整早餐呢﹖如果妳
話會，我而家叫妳不要整喇，昨日返完工就抖下啦，
唔好返工又派餐，返到屋企又派餐，患上職業病麼?
仲有呀..我正話見妳響屋企用個妹妹仔用既髮夾黎夾
妳把頭髮，個紅色同黃色髮夾很襯妳，頓時覺得妳好可
愛呀，好似D小學生妹妹仔返學咁..哈哈，有時諗，我
地第日如果有個囡囡的話，我諗妳一定會將佢打扮得
好可愛，好似媽咪咁..哈哈.....。記得上次我們在房中
講未來的事，我見妳對未來做媽媽充滿憧憬，我知道
妳將來一定會係個好媽咪，那晚我承諾過的事我記得
的，我定會把她實現在妳身上，但妳也應承左我一件
事喎，記得嗎?不寫出來了，讓妳有個小小的秘密啦....
，總之我相信遲早都會有一天，我能夠有資格叫你一
聲做『老婆』.......。

唉.................................
知道聖誕節會有舊生會聚會，班人衝著我同 Irene而來
，一定要我地出現，想對我地點呀?我地仲未結婚呢，
他們比我的感覺好似結婚玩新人咁，仲要講明我地係
主角呀今次，究竟係邊個爆比邊個知先?竟然咁快可
以通天，而家就連舊時班主任都知道埋，Mrs Chan今
日仲Send左E-mail比我問我...，睇怕到時我倆都不得好
死喇，點算好呀傻瓜?連妳D好姊妹都唔放過妳，我地
實聽比人玩死.....


今次妳出走係HKG→NRT→HKG (Turn-around)

>>November 17, 2008 at 6:30:58 PM GMT+8

2008 年 11 月 15 日 星期六 【晴】

傻妹厄靚妹


下午，同女友食左晏後，去左元朗公園，去左百鳥塔
度行，上到最高，望下元朗市個景，睇完景就行去草
地上面坐下，草地上面好多小朋友響度玩，玩吹肥皂
泡....好多小朋友響度玩，一時間，成個草地上都飄浮
住好多好多泡泡，埸面都幾得意，個傻妹仲"聊"小朋友
講野，其實佢係想小朋友比佢試下玩吹泡泡，最後個
傻妹終於都厄到另一個傻妹比佢玩左兩下吹泡泡...了
左心願....。

去完元朗公園之後，走左去B仔涼粉食糖水，順便行多
次千色店，去左三聯書店睇左半個鐘頭書，混左半個鐘
頭吉後，又去食雪糕，我發覺，每次去親千色店，佢都
要扭買雪榚，不過....事實上，佢D雪榚係幾好食既，我
自己都忍唔住食埋一份......，之後去埋元朗廣場，女友買
左幾件衫........比我....!!!哈哈....好呀，唔使我去費心揀，我
只係負責著，咁就最理想喇....。

晚上返一返屯門屋企放底買下的東西，之後就出左去食飯
，我地兩個去左屯門市中心食，中途碰到女友D補習學生既
媽咪，最後大家一齊去美心度食，普普通通咁食左一餐，返
到去，個傻妹執明天返工的行李，雖然係『一夜程』，即係
其實唔使點執野，其本上個行李箱係『吉』既咁滯.....，不過
形象問題，公司死都要佢地拖行李...哈哈，其實妳地拉住行李
咪仲好睇啦，感覺Pro好多嘛.......，明天妳要自己返工呀，放
工先接妳機啦..好嘛???


元朗公園內既百鳥塔





呢張係個傻妹影人地個靚妹，亦都係比人厄左玩兩下吹泡泡的受害者...哈哈，講笑吧，小妹妹係自願比傻妹玩既..!


>>November 16, 2008 at 1:25:28 PM GMT+8

2008 年 11 月 14 日 星期五 【微冷】

妳不是工人；是我愛鍚的...


傻女.....點解妳放假都唔訓晏D呀，成日都一早
起身煮早餐?其實妳買麵包比我就得架喇，最多
食方包夾花生醬或者牛油已經好足夠架喇，唔
使整腿蛋三文治咁多功夫既食物嘛，見到妳咁都
辛苦喇，雖然真係好好食......，但妳每次都要開
個煮食爐，整完又要執係咪，如果我地放假，下
次我地出街食啦...好唔好呀，我真係唔想個傻瓜
咁辛苦呀......!!!唔知我地一陣會去邊呢...?正話我
睇返自己個日誌，妳記得我地係邊一日響咩地方
相遇呢...?我覺得相遇那天真係好有意義，我唔會
忘記呢5月22 呢一日，那天仲比妳好大力拍左我一
下呀，妳有冇印象呀，以前我一直都唔會睇返自己
寫的日誌，正話我睇返自己的日誌，大概叫看完吧，
因為實在太多，我地好清楚記下我同妳由相遇、妳
我經歷過的事、妳的等待、終於可以相戀..直到現在
，如果妳有時間，出走時悶悶的時候，妳可以慢慢
睇返，妳可能都會有奇妙的感覺.......。而家既妳終於
肯乖巧地休息，響度訓覺，所以話呢，其實妳係辛苦
的，我知道妳對我真係好好好好，但我真係真係唔想
妳咁辛苦，返工又要服侍人，返到屋企又要照料我，
妳不是我工人啊，妳係我未來既太太呀..知道嗎?

唉...新既洗衣機送左黎喇....賠錢呀...嗚嗚!!!

--------------------------------------------------------------------------------------------------------------
晚上........ 【清涼】



今日部洗衣機一送到來，洗埋三轉衫便和女友
出街，我地去左屯門市中心行街，沿途行街時
傻瓜唔係食緊野，就係飲緊野，係咁食零食，
個手袋除左個化妝袋緊要之外，另一樣重要既就
係零食，個袋真係咩都有得食朱古力、糖、香口
膠、仲有兩包好細包既梳打餅，成個百寶袋咁，
隻手仲拿住支綠茶，響元朗千色店仲要扭買雪榚
，仲要食兩個球既雪榚，當然，響買之前仲要係
咁試食人地D雪榚啦，我呢..好似拖住個細路女行
街咁，哈哈.....頂妳唔順呀。

今日個傻妹除左食之外，咩都冇買到，真係少有
，去到化妝櫃位只係睇..冇買，平時同個傻妹行街
例牌去到每一個化妝櫃都會係咁以..停一停..望一
望先走，好似輕鐵一定要每個車站都停咁，之後
我地去睇電話，女友部機都舊喇，係時候換，我
都想送部好的比傻瓜，不如買部影相靚D既好嘛?
定係乾脆地送多部好細部既DC比妳好呀?我鐘意睇
妳返工時影果D相，尤其係天空雲層的景觀，妳每
次影完比我睇令我好想搭飛機呀，妳係唔係有心咁
引誘我..想我可以同妳一齊出走呢??放心啦，同妳
去旅行，唔使好耐， 我同妳就可以喇，耐心等多
一會兒啦....

晚上..同女友一齊食飯，我地又去食日本菜，去左元
朗既小店內食，我地都覺得D食物不差呀，下次我地
再去啦...好唔好呀?

我與女友今日在元朗食既晚餐...









>>November 15, 2008 at 5:46:47 PM GMT+8

2008 年 11 月 13 日 星期四 【微冷】

700蚊的布碎片!


夜晚，個傻妹約左我一齊返去，見到佢雙手抽住
一個細小環保袋，我開初都唔知個傻瓜買左D咩，
但一見到佢，佢就傻笑著向我講，我買左D野比自
己呀，冇你份啊...，一望下原來係兩套貼身野，其
實都有興趣知係咩樣..哈哈，但未見到個餡，就比
我見到張單!!!700幾蚊???????妳買咩布要買到咁
貴呀??我差D暈左響條馬路度....，但見到個傻瓜仲
響度笑，仲向我講...呢D係咁貴嘛，向我講左我永遠
都唔會著上身既理論......，激死我呀，妳用左洗衣機
的六份一價錢買左幾塊布...!!!!其實係唔係真係要咁昂
貴?不過見妳買得咁開心，好似買到寶咁........由妳啦，
而且妳係都唔比我送比妳，有冇發覺妳好多時都唔比
我送野比妳呀，化妝品次次都妳自己比錢，但你又好
多時會買野比我.....每出走一次，我就會有小禮物收。
我想自己親自買化妝品比妳架，但我真係唔識買，唔
知D化妝品咩先令你鐘意....我睇黎最叻都係買公仔同埋
D精品裝飾比妳....我係唔係好死版唔識轉彎呀?

傻瓜...有人話我地好似結左婚咁，哈哈，妳會唔會願意
嫁比我呀?妳有冇期望我要點樣向妳求婚呀?是不是要跪
響妳前呢...哈哈......。我地既關係已經比班舊同學知道哂，
佢地約左一齊食飯呀，maggie佢地班友仔要我地見人呀
，仲要講明我地係主角呀，點算好呀?我估班野一定會玩
死我地，唉...........一定比班人玩得好慘.....!!

唔知我明天會唔會比人拍醒食早餐呢?明天大家都放假，妳
有咩地方想去呀?我想去下赤柱呀，又想去下西貢，又想同
妳去濕地公園，又諗過想同妳去山頂.....我呢好想同妳去海
洋公園或者去迪士尼玩呀，我其實最想同妳一齊坐響個好大
好大摩天輪呀，好想同妳一齊坐上London eye，夜晚可以與
妳一齊望呢個美麗夜景...，如果妳問我想去邊，我會話係去
倫敦，係同妳一齊去，好想好快有一日可以一齊放大假，可以
滿足妳和我想去的地方，拖著手一齊行，空姐呀...有冇方法可
以我同我女友呀?

>>November 14, 2008 at 3:42:22 PM GMT+8

2008 年 11 月 12 日 星期三 【微冷】

我整壞了洗衣機....


唉...我整壞左女友家中既洗衣機呀...點算好?
自己又衰 ，如果可自己肯分兩轉咁洗就唔會出
事啦....!!我唔知會唔會比你罵我呢，我出去睇
過你d同款洗衣機，都要3000幾成4000蚊，唔
知妳過左保養期未呢...個洗衣機??

我做事太大意喇，點解我會咁笨拙架?原來真
真正正叫做傻瓜的人..係我..唔係妳，嗚嗚嗚嗚
..我會賠返部比妳架喇 ，唔好嬲呀.....。唔好趕
我出街呀.....唔好掉低我呀....

我仲未有你2R相片放去銀包呀，我想打開銀包
時可以見到妳呀，唔使下下都要用電話先見到
妳，我好鐘意飽飽面既妳呀，妳真係好可愛，
令我好想好想親親妳，抱著妳呀，妳D表情和
動作真係令我好想好想捉緊著妳，今天有朋友
話我"你就好啦..有個做空務員的女朋友，我朋友
都有贊妳靚女呀，開心嗎?

妳話下次會整"忌廉湯"比我試，我好期待妳煮飯
，期待妳親手整的返工比我食的飯盒，我覺得自
己越來越倚賴妳的照顧，我就快就會變到"冇左妳
會唔得"架喇，因為妳對我太好喇，試問我有咩理
由會唔要妳呢?相反...妳唔好唔要我呀，我真係可
以想像到，不幸妳真係唔要我的話...，我諗我會死，
，我寧願死喇，Irene....每當一次妳出走，我果日就
會好掛住妳，好想妳快D返來，人地分開只係一段車
程之隔，而我就同你相隔在不同的國家，那種心情係
.覺得..如果妳在外國有事，我不能立即去見到妳，我
怕妳會病、我怕妳唔開心時冇人可以陪妳，Irene我真
係真係好愛妳...真心真意的、全心全意的、一心一意的。
希望妳給我信心，我是不會離棄妳，無論妳變成怎樣，
我都會要妳，

>>November 13, 2008 at 4:21:08 PM GMT+8