2008 年 12 月 1 日 星期一 【颳風】

傻妹的無聊測試...


唔知佢去邊度找出呢D問題....??算吧...
我即管問下自己...準不也好吧.....

我算是愛上嗎﹖

‧每早一張開眼就立即想起對方﹖
‧事無大小都想打個電話給對方﹖
‧很想見到對方
‧每次碰面心底裡都有喜悅的感覺﹖
‧會偷望對方﹖
‧常對著心儀對象傻笑﹖
‧對方碰過的物件都會珍而重之﹖
‧行街見到什麼都立即想到對方是否合用﹖
‧就連對方打個噴嚏你訓著覺你都會覺得佢很可愛﹖

妳問我中左幾多樣呀....﹖妳估下呢...

>>December 2, 2008 at 2:17:51 PM GMT+8

2008 年 11 月 30 日 星期日 【颳風】

傻妹：我怕...我驚


昨晚..自己做左一些連自己都不知道的事情，令她喊得
十分厲害，其實我真的冇記憶自己係有講過，但我那一
刻我知自己係諗緊野，但呢次我知道，她對個傻妹來說
真是一個十分敏感的，但會有冇下一次，我真係不敢說
沒有，始終我真係控制不到......她的消失，只是我不會再
無謂地想她，但要完完全全忘記她，我諗除非我有病啦，
否則...我冇可能百分百要她在我腦海消失..，我只可應承
和承諾不會去未問過妳就約會她和再和她扯上關係等等...，
我知道我女友一定會明白的..是嗎...?

昨晚的的確確嚇我，為什麼旁邊的妳在飲泣，我很清楚分
出今次不是扭計的喊，而是真真正正的喊，但怎樣都好，
始終告訴我發生什麼事，我知道妳無嬲過我的，或者作為
女性的確會忍受不到呢D事情吧，不需向我道歉呀，因為
大家我覺得都冇做錯事，但我當然希望呢D事情不會再發生
在我身上啦.....，我可只是可以得妳個，呢個係真的.....，妳
自己知道嘛，大喊一場後的妳，在睡著覺時還喘著哭聲的氣
，我對上一次聲到呢D聲係我好細過，我個妹又係大喊完後
發出的，我還擔心明天還要返工的妳怎見人呀，但正話見到
妳，雙眼又好似幾好，無事咁。天氣咁凍，我應該係叫妳不
用起身整早餐先係，沖個麥片和杯奶茶，準備自己的返工飯
盒，我還可以應付到的，但妳始終都起床弄好才再去睡，真的
辛苦妳了.....，是妳經常幫我做很多事，我才早上有剩咁多時間
，我知今天早上妳應該冇時間睇吧，妳一起身要趕著化妝換衫
趕車返工，留待返到來先看啦，我都差不多要準備返工了......

手多多影的...!!妳準備定的早餐，杯奶茶已經飲完喇..但正話碗麥片還很熱，還未食到住...

---------------晚上-------------------------------------【清涼】---------------
認妳....

放左工，自己回家，一踏入門口，鞋櫃上面有
個Hello人 Kitty毛公仔，上面貼左張字條，哈...
..係妳先會有呢D諗頭呢，不用向我說這些了
，正傻人，不過..妳知嘛..我入屋一見到，真的
笑了出來呀，因為我從未試過一入屋打開門，
就係隻公仔坐住等我咁既姿勢.....!

今天回到家十分之倦，因為今日兜到我頭暈，下
次返工應該帶多支『阿婆香水』喇，講起香水，
妳在我放衫掛衫的櫃內，放左幾十張沾左香水既
紙，放響我櫃，等佢將D味道散開啦，雖然..我唔
介意聞呢D味，但我有一天不知是誰放香水味，氣
味一直跟住我，到返工車上都有呢D味，果時我先
發現是我件工作風衣發出來的.......真的被妳玩透喇..
，但現在習慣左呢種味，我又覺得冇咩野咁，都係
任妳怎對我做吧.......哈哈...

夜晚接妳...今次係我見到妳先呀，我有進步喇，但
之前的上左個商務艙服務課程，又上完喇，即係....
遲D妳又話要開始Serve商務艙，到陣時妳又轉衫，
一時又呢套....一時又果套，做耐D又有另一套，我
又要再認過喇......認極都認唔完咁...唉....

>>December 1, 2008 at 3:00:52 PM GMT+8

2008 年 11 月 29 日 星期六 【颳風】

貓咪出街喇...


今日我地帶貓咪去左樓下海濱走廊散步，貓咪好耐冇出過街
喇，海風果然好凍，所以行左半個鐘就返上樓喇，今日見
佢找返D冬季衫出來，原來佢返工時套衫係佩埋件大黑褸，
有幾大件呀??可以長到離地1呎咁長啦，係咁上下，好鬼
形哩，咁下次可以唔使帶衫比妳蓋啦....哈哈...公司對妳地
不錯丫，怕妳地凍...咁大件褸...!!

妳呀...唔好再搭錯車喇，住左咁耐仲搭錯，笑大人個口喇，
妳搭車係要比錢架.....知道冇...明天Trun around..自己小心
喇，放工時可以等到妳既....就咁話啦....!!!

今次係HKG → KIX → HKG (Trun around)

>>November 30, 2008 at 2:15:04 PM GMT+8

2008 年 11 月 28 日 星期五 【颳風】

報警投訴


昨晚...樓上都唔知做咩鬼野，夜半三更響度嘈，
應該係一班人玩既聲音，打麻將聲、大叫聲、電
視音樂聲，嘈到不得了，但是女友向我講話，佢
地好多時都係咁，響放假前夕好多時都係咁，下...
有冇搞錯呀??唔明白個傻妹點解可以忍到而家，
最多都係去管理處投訴!!之後個傻妹話怕上去同
佢嘈左後唔知會發生咩事，所以一直都係啞忍，
但上面真係嘈到離哂譜，我忍唔住，捱住凍都上
去敲門同佢地講，佢一開門就見到內面起碼有六
七個人，一D打機一D打牌咁，我投訴後，對方還講
我地好細聲，又已經關哂門窗，係都話自己唔嘈，
當時我真係好激氣，不道歉都算啦，仲不肯認錯，
仲要講到好似我錯咁，我果陣已經覺得同佢講係冇
用，我警告佢再係咁我唔會同管理處講，我直接報
警，便轉身走，佢地關門後..好大聲用粗口罵我，
隔著門都可以聽到佢罵我，好清楚聽到佢話，報警
丫.正X樣..!!!!本來好眼訓既我....當堂比佢地激到暈咁滯
，我落返去之後，係靜左10分鐘左右，之後又嘈過，
D大笑聲，真係好清楚聽到，就連打麻將既.上、碰，食
既聲都聽到，我忍不住打999叫差人上去，果然過左15
分鐘左右就真係冇哂聲，直到天光，早上有人拍我地
門，一開門，原來係樓上個男人，問我係唔係報警果個
，我直接話係..係我親自打電話報，之後佢又用粗口講，
使唔X使呀，我有幾X嘈呀，又唔X見我隔離左右投訴...
你夜晚好X得閒呀...!!!正一X街，麻XX煩，還有好多好
多不滿粗口.....之後就再媽多我一野先走!!!!

而家D人真係冇咩文化，做錯都可以理直氣壯..理所當然咁
，但個傻妹就好驚以後樓上個男人會對佢不利咁，不過我
都明白既，個傻妹咁細膽又係女仔，不過唔使驚丫，我會
陪住妳架嘛，況且我覺得呢D人理虧在先，係做唔出D咩事
既...放心啦，佢夠膽對妳做任何傷害妳的事，我唔會放過佢....

但你話驚...妳咪又係一個人出去約朋友食飯啦，出街大個天
，妳邊度會驚呢...，妳留低我一個人，煮左個早餐比我就出
左去，妳幾時返來陪我呀...?妳呀...留下我一個人...我會悶死
架...!!

--------------------------------------------------------------------------------
晚上 【微冷】

應個傻瓜要求，將我個日誌全部改成word pad，等個傻瓜可以
睇得舒服D，唔使睇細細粒既字，出埋日期和標題，我覺得咁
排一排位可以當成本書睇喇...滿意未呀?傻妹...難為我 為左整
靚比你睇，而我到我眼都花呀，不過妳話想出走時睇得舒服
點，無計啦，不過我仲有剩3個月仲還改好...妳要等下喇..知嘛...

夜晚，個傻妹又去煮飯，不過今次整既係糯米飯，
所以好快就有得食喇，咁我明天果餐都係應該
食呢D，天氣咁凍，食呢D都不錯丫，而且又整
得好食，傻妹話呢D好易整，但係洗煲就煩D，
因為好黏煲邊，但難洗易洗都好啦，天氣咁凍，
我真係唔想比個怕凍既傻妹掂D水，清潔今次等
我啦，家務我都識做少少架，當然我冇妳咁叻啦
，妳有冇後悔呢..?找左一個咩都唔識做既男朋友
，妳會唔會退貨呀?


發生什麼事呀?我未結婚呀，聚餐果日好似搞到
去接新娘咁，那天我一定比人玩殘啦，無命.!!!

個模式係咁架...好嗎?




>>November 29, 2008 at 12:49:44 PM GMT+8

2008 年 11 月 27 日 星期四 【乍雨乍晴】

怕凍的妳......


天氣凍左好多，對我來說，呢D天氣我最鍾意，不過
個傻瓜就凍到只係識躲在家裡，開著個暖風機最暖，
我放工踏入門口便見到個傻妹咁，我即刻笑左出來，
哈哈.......打了個比喻比個傻瓜，暖風機是燒烤爐，而
個傻瓜係舊蕃薯，我一開門便見到『燴蕃薯』，跟住
舊蕃薯又扁嘴叫嚷著：『我邊度係蕃薯呀!!!極其量都
係芋頭乍』.....差D笑到我跌落地下，而更好笑的..係妳
可以唔笑.好似好認真講咁.....呢度先取我命呢....!!!!

之後我地去買點日用品和食物，而我個傻妹真係買料去
煲左一兜蕃薯芋頭糖水出來，天氣咁凍有薑片整的熱騰
騰蕃薯芋頭糖水，好似又特別好飲咁，飲完感覺會好暖呢....!

我雖然成日都叫妳做傻瓜傻妹傻乜乜乜....，但我真心真
心覺得個傻瓜其實好聴明的，但妳永遠永遠都在我前搞
到自己是一個小朋友咁，妳以前讀書果陣我記得妳好似
唔係咁架喎..哈哈，妳係幾粗魯下，一D都唔似女生，妳記
得嗎...?而家既妳變得好小女孩咁，其實我真係好想找返以
前我們仲係同學時既相片，但可惜真係冇，但我記得我有
本35週年校刊響天水圍，當年學校開放日時買的，我係冇掉
架，校刊有我們一班同學合照架，果本校刊終有一日佢會出
現...我相信，到陣時就可以睇下妳以前既模樣喇.....可以做個
對比，妳就會睇清楚以前妳好男仔咁啊..哈哈~咁當然啦..而
家既妳當然係靚女左好多好多可愛左好多好多啦......!!!

聖誕節聚會就到喇，我覺得好似去行刑咁，連班主任都來，
呢班人，有心玩野啦，Maggie同我講話唔會找Irene架，因
為找到我即係找到妳個傻瓜，我睇清楚你個Roster架喇，
當日妳唔使飛，唉......妳估大家會點對我地呢...?傻妹..妳有
咩應變方法呀..?.

>>November 28, 2008 at 6:47:47 PM GMT+8

2008 年 11 月 26 日 星期三 【微冷】

出發接女友啊....

哈哈....去機場找傻瓜呀....，唔知佢有咩反應呢?
希望我冇睇左咩編號啦，好似從未試過唔講佢
知去接妳嘛...返來先記下詳細....
---------------------------------------------------------------------------------
晚上 【清涼】

倦到透的妳呀......


正話響機場接個傻瓜機，事先無話比個傻妹知，
諗住嚇下佢，哈哈....當然..嚇佢唔到之餘仲比妳
嚇返我轉頭...!!我真係無咩眼力，因為個個都係
一樣衫，而個個既形象又差不多，大家又係拖住
相同的行李，所以我真係一時間響咁多人睇唔到
咁多，但個傻妹可以見到我，真係厲害，咁即係
話，妳每次都會望一望我地既老地方，女孩子真
係......哈哈，尤其係個傻妹...更加不用說啦....!天氣
變了很多，對傻妹來說係凍添啦，所以我都帶定件
褸比傻妹，等妳唔好凍親，一病了就麻煩喇，響
機場，傻妹從後面撲向我，真係比妳嚇死，還以為
比人打添..!!那一刻有點兒難為情呀，因為有人望
住嘛，但個傻妹好似唔受環境影響咁，唉......!!不
過其實自己係開心既，幾日冇見，我都想攬攬妳既
，之後拖住妳搭巴士，但我心裡面有個疑問，點解
今次妳唔倦既...?但一上到巴士，巴士都未走出機場
，個傻妹已經訓著左，見到妳咁，每次都有咁諗，
妳一定好辛苦喇返工返得，整段車程醒都冇醒過，一
訓就訓到落車，返到屯門，上左屋企，一入房門口，
個傻妹連衫都唔換妝都唔落....就上床訓，!!!其實這
一個畫面係幾得意架，看來妳真係真係好倦好眼訓
喇...，陪到妳夜晚，才出去食飯，去左美心食石頭鍋
飯，熱騰騰既食物，佢最鍾意喇，食完之後就返屋企
，有了妳在家，家中會熱烈D溫暖D，貓咪又痴向妳
處，來緊幾天，個傻妹會放假，唔知妳又會做D咩出
來呢...?例如又會整野食啦，整D估靈精怪野出來等等啦....

今次我洗衫呀，我學會用的今次，放心啦，唔會整壞
佢既，仲有呀...天氣凍呀，我返工時妳自己好好錫住
自己，唔好冷親喇。知道嗎...?

>>November 27, 2008 at 3:10:45 PM GMT+8

2008 年 11 月 25 日 星期二 【微冷】

壽星女飯局....


今日女友既一班同事打電話找我，問Irene響唔響度﹖
原來佢地其中有一個人生日，想叫佢去一齊慶祝，最
後佢地叫我去，其實果班朋友都係見過兩三次，但佢
地真係好Nice好Nice，個個女仔都好多野講，而佢地
就當中有兩個去煮飯，我發覺一樣野，唔知佢地係唔
係真係好鐘意靚既野，飯菜都整得好靚，好得好得，
之後一路食，一路比班女仔係咁問我同Irene既事，問
點識呀?點樣響埋一齊呀?而佢地又向我係咁讚Irene點
好點乖女，原來個傻妹而家仲係有人追架喎，呢個我
都唔知道，如果唔係佢地講我真係唔知，女友有人追
我應該點做呢...?當現係咩都唔使做啦，我相信個傻妹
唔會去背著我做其他事的，我覺得佢有人追即係代表
個傻妹係好架啦......而事實上個傻妹係幾討人喜歡既....。

女友冇講錯，做佢呢一行業，真係有好多單身女子，五
個女仔有三個係未拍拖的，其實她們都不差丫，點解會
冇拖拍既呢?真係奇怪，是眼角高..?佢地又話唔係，咁
係咁原因呀?我都唔知，佢地問我有冇好介紹呢.!!我心
盤旋著，以妳們的條件使要人介紹..?開玩笑吧.!!

晚上收到個傻妹Email，現在呢一刻距離返香港時間還有
幾個鐘就上機，明天我可以見到佢喇，等左幾日終於都
等到佢返喇，講真....真係好掛住佢呀，聽唔到佢把聲，
間屋真係好靜，靜到連貓咪響廳貓叫到我房都可以聽到，
可想而知有幾靜丫.......唔打緊吧，明天呢個時間，一定唔
會靜架喇....。





>>November 26, 2008 at 4:38:56 PM GMT+8

2008 年 11 月 24 日 星期一 【微冷】

Promise you........


很久冇返過咁夜的更喇，我覺得自己已唔多習慣響晚上駕咁耐
車，夜晚返工吸引之處係可以有較長個小休時間，但唔好既地
方就係半夜先可以收工，不過..我唔打緊啦，見George有事，
調更都冇所謂，反正女友都不在家，自己自由身，幫到人就幫
啦......。今日駕761P線及751線，都算係支好籤，不會兜到頭都
暈，而且放工返屯門Depot，方便自己返屋企添，響黃昏又有阿
伯阻住我關門，仲要阻鬼打咁耐，我真係想關門夾死佢，本來想
叫咪趕佢走，但心諗..呢D冇知識既阿伯，你同佢講都冇用，佢當
你死的，只會詐作聽唔到，所以我只有等等等....，間中遇著呢D人
真係...唉....當自己唔好彩啦!!!!

今日我開電腦，冇見到個傻妹Online，原來佢冇帶絛個"火牛"，部
電腦用不到，帶左等於冇帶，個傻妹打長途電話比我扁哂嘴哭訴，
冇得上網Msn，原本個傻妹話去 Cafe Online上網，但知道果邊都幾
雜，唔想個傻瓜傻下傻下比人蝦，我都係叫她由佢啦，響酒店抖下
仲好啦，出去Square行下街，開心下買下野啦， 不過，妳都唔多
致在啦，因為妳都去左呢個地方好幾次喇........!!係咪.....?

回到家看到信箱有信件，是妳寄比我的，成六頁紙咁多，睇左我成
十分鐘先睇完，可想知妳寫要寫幾耐呢?!我見妳的內容，知道妳盼
望什麼，擔心什麼，渴望什麼，堅持住整蛋糕為了什麼，我知道直
到現在，我還未給到妳絕對的安全感，妳心中總是隱憂著我會離開
妳，是嗎?雖然我講了很多次，我相信妳亦知我會怎答妳的，妳一方
面擔心著我會走，但又更加擔心妳不斷問同一條問題，妳會覺得我嫌
妳煩而討厭妳，但心中又很憂慮，又不敢向再煩問我，對嗎??妳意思
應該是這樣吧，我應承妳啦，我覺得憂心妳就問啦，我不會嫌妳煩的
，如果問完妳係會放心安心點的話，我情願妳問我也不要放在心中疑
問著，所以如果妳想問就問啦，不要再辛苦自己去做咁多事喇，經常
見妳著住圍裙響屋企做野，我真係怕有一日做到妳暈低呀，妳知啦，
我個傻瓜成日都病架嘛，哈哈。仲有呀，你信中講到未來的事，我知
妳未來想要什麼，妳有講過的，我會記得，不要再提妳之前唔開心的
事喇，總之妳的過去我跟本無介意過，只要妳願意我也會願意，放心
啦.......，另一件事呢...我都覺得是我唔好，我還向自己家人收埋妳，我
應承妳啦，新年時妳會見到我家人的，當然啦，佢地絕對冇可能有權
分開我們啦，任由她們怎說，我都會拖著妳手，難道他們可以分開我
們嗎..?我相信妳的性格，我家人都會喜歡妳的，起碼我個妹已經好喜
歡妳啦，她還說妳比我舊的那個更好溫柔更好多話題，連我個妹咁挑
剔都話妳得，妳就真係好得架喇，我個妹其實都好仰慕妳架，唔係我
作架，佢真係有咁向我講過，佢覺得妳D語言好勁，所以妳得閒教下佢
講日文喇，雖然妳成日話妳自己係有限公司，但係我有聽妳講過，雖然
唔知妳講咩，但應該OK架我覺得係.....。

最後點講都好啦，呢段日子的確是委屈了妳，要妳擔心我很多事，又收
埋左唔比妳見我邊既親人，令到妳好似唔見得光咁...Sorry呀，應承妳，
最遲2009年1月1日，之後，我會大大方方地拖著妳見人的....Promise you!!

>>November 25, 2008 at 6:43:23 PM GMT+8

2008 年 11 月 23 日 星期日 【微冷】

27號先見喇..


一陣要返工喇，一出門口之後要等到27號先會
見到妳喇，和妳一起我已經預計到會有呢D日子
，一個月總會兩三次飛幾天，離開香港幾天，今
次妳還要留一天呢，家中又得我同隻貓咪，但算
啦，我等到既，不過就應該接不到妳喇，我諗都
是和妳一起的第一次，第一次飛走幾天我既送不
到又接不到妳，但我知妳會明白的，不會介意吧?
要出門口返工喇...自己小心呀....記得帶『碌卜』呀....
傻妹.....

******晚上*********************【清涼】*************

放工喇...家中已經冇人，冇左個傻妹把聲，真係有
點靜，估不到今日自己會唔記得帶電話，我仲以為會
連女友要飛前都唔可以再接到電話，其實我有諗過返
轉頭去取，但礙於時間問題，冇可能，正當我幾個鐘
不斷咁埋怨自己冇電話同佢通話時，返工之際，架車
屯門站埋站的時候，就見到個著住紅卜卜既制服既傻
妹，用手"養下養下"咁叫我，全靠她等我先可以有電
話用返，但問題係，個傻瓜冇我車站時間表，跟本唔
知我咩時候先會到站才見到我，後來問返她先知她等
左半鐘，個傻妹呆坐30分鐘等我，仲要吹住風等，太
感動喇，我冇諗過會有人比返電話我，之後，女友上
左我車，搭一個車站就響市中心落車，只可以同佢隔
住玻璃窗講拜拜，從後鏡望到她上天橋背影消失，我
先開車走....。幸運的我地每次都會交出時間表出來，
所以今次個傻妹先可以等到我，女友係聰明既，可以
估計到我大約什麼時候會到月台，如果要等足全程，
咁起碼白等個幾鐘，還有..我諗起對上一次妳係著住
制服去工而又係坐我車，咁應該係我們初初碰見的那
一天，很多事情都變了。

現在，個傻妹在半空上，而家一個天..一個地，分得
好遠呀，不知道現在呢個時候的妳在做什麼呢..?是派
緊餐還是休息緊定或者係賣緊野又或者沖杯麵比人呢...
妳們實在太多濕碎而又煩悶的工作喇，比我一定捱不下
去，好吧，我一陣約了朋友食飯，妳都仲有排先到，MSN
見到我們再傾吧....在外面一個人自己要小心D，唔好整
病自己喇....

*******深夜凌晨*********************【清涼】******************

今個夜，前女友既姊妹約左我出去食飯，去到後感覺
像和以前的感覺不一樣了，晚飯間講起分手的起末，
原來大家都唔係好清楚，舊女友我估未有把原件事說
出，搞到我都唔知講好唔講好，心想，妳地咁好姊妹
都要搞到來問我，或者她跟本不想比人知詳細，所以
我都係很保守和保護她的方式道出大概便算了....!!響以
前，我好想知道我之前因咩事而分開，但到今時今日，
我反而唔願意去問去知去聽，或者..我覺得舊時的一切
對我來說已經係過程式，現在的我心只指向Irene，既然
已經承諾了Irene，我覺得有D事已經不用再去執著去知
結果，可能..我真的可以完完全全放下舊的了，況且...有
一個人為自己付出咁多，我還會望返轉頭嗎...?事實上..
我同Irene生活得真係好開心，彼此願打也願捱...我望的
只係想下半生都跟她一直走到盡頭吧，已經足夠..滿足了。

不知而家個傻妹做緊咩呢..?12-13個鐘既航程，而家佢係
on duty果班丫定係訓覺休息果班呢??我離她真的很遠很遠
呀，地球的另一邊呀，我估妳到下榻酒店搞好所有野都要
夾夾埋埋要14-15個鐘，辛苦妳喇，而我肚餓呀，好彩妳之
前整左個蛋糕乍，我仲有得切住來食，應該夠捱到妳返來接
濟我吧...哈哈...!!!!我不知妳幾時會到下榻酒店，所以我會一
直online Msn等妳叫我，讓我知妳安全地步，讓我能放心安
心嘛....!

今次出走係HKG → YVR → HKG.....

>>November 24, 2008 at 6:05:31 PM GMT+8

2008 年 11 月 22 日 星期六 【微冷】

自從‧和妳‧一起..........


好可愛呀，個傻妹傷風時擦鼻擦到個鼻紅卜卜咁，
不過食左藥之後好D喇，起碼唔使擦鼻丫，唔知
明天個傻妹仲會唔會返到工呢?我估應該多數返到
既，事關而家既妳已經識行識食啦，傻妹名副其實
係一個大藥煲，比我身體還要弱，如果我地D仔女
係咁既話，就不得了喇..!!今次好彩係初起的感冒，
所以妳先咁快冇事，像上次一樣的話，妳又會攬實
張棉被....打死都唔放，辛苦幾日先好得返喇...!

夜晚陪左妳去想去既地方，雖然天水圍冇咩好食，
但有我們讀書時既回憶呀，在學校大門前既樓梯
就係當年妳做prefect看守既地方，其實響細個果
陣，妳已經係叻過我地好多好多，不過冇變既係
妳仍然無什麼脾氣，比人蝦妳都唔會出聲，人太
好喇，妳不太懂保護自己，妳自己有冇發覺呢?
有陣時我真係好擔心妳返工會點﹖打不還手罵不
還口，怎麼辦好呢...?但無論怎說妳也好，妳始終
也是一個好叻好叻既女性，我怎樣也比不上妳呢..
，但妳永遠都在我面前變成一個好可愛既傻妹，
哈哈.....係唔係丫?不過....我不會再介意邊個叻個
邊個的，在我以前的女友我曾經介意這些，最終
弄到大家不愉快，我不會將同一個錯誤發生在我
們身上，因為我識既野妳又未必會識呢...是角度
看的問題，放心吧...無論點我都係喜歡妳的...不變...!!!

食完飯我地去左間精品店度『運吉』，店舖老闆想
趕我地走架喇我估，我地真係好過份『運吉』左半
個鐘，最後都係唔係幾好意思之下，互相送了對方
一套bowl set，講真..很低能呀，我比錢果陣個收銀
心內話我鬼咁白痴呢，而到妳比錢又不同呀，比人感
覺make sensible好多好多...哈哈，其實到底有冇人好
似我地咁白痴，一齊在同一地方去買野，就即刻送返
比對方呢....??以前我從未試過呢D感覺，好似兩個細
路去玩咁...哈哈....其實....我開心的快樂的。

以前拍拖.....只有我去找玩意去逗對方開心，只有我想
盡方法令她快樂，而我真係冇為過自己做過什麼，我
真係不懂去開心地去玩去笑，但自和妳一起後，很多
事變了，妳令我可以感受到，我好多好多以前冇試過
的事，我覺得自己好似由一個什麼都不懂的動物，被
另一個人拾起帶回家，呢個人就教曉他許多許多野給
他...令他知道原來世界上還有另一種感情，如果...假若
有一天以前那個主人話要收返呢個動物，妳估個動物
會不會反抗以前的那個主人呢..?我是有感覺的，誰人對
我好我會知道，縱使妳的直覺很靈驗，答案也是一個，
我不會讓妳白白付出所有感情的。雖然這條問題妳問
了我好多次，但我是諒解的，縱使係好煩都不會怪妳，
我覺得是我還未給妳足夠的信心和安全感吧，我知道
是要時間的，我會，我不介意妳再問，我也會努力去
答，直到一日妳有信心為止......。

兩個傻既...各自即場買來送比對方的禮物











>>November 23, 2008 at 6:05:32 PM GMT+8